ᱯᱟᱨᱵᱚᱱ ᱫᱟᱨᱟᱭ ᱠᱟᱱ

ᱦᱮᱢᱟᱞ ᱨᱤᱛᱩ ᱵᱷᱟᱫᱚᱨ ᱫᱟᱸᱥᱟᱭ ,
ᱨᱟᱦᱟ ᱫᱚ ᱨᱟᱶᱟᱜ ᱠᱟᱱᱟ ᱦᱟᱭ ᱦᱟᱭ ᱾
ᱟᱹᱛᱩ ᱴᱚᱞᱟ ᱯᱟᱲᱟ ᱜᱚᱴᱟ __
ᱟᱸᱫᱳᱲ ᱪᱟᱵᱟ ᱟᱠᱟᱱ,
ᱦᱮᱥᱮᱡ ᱥᱮᱠᱲᱮᱡ ᱨᱟᱹᱥᱠᱟᱹ ᱜᱮᱪᱚ___
ᱯᱟᱨᱵᱚᱱ ᱫᱟᱨᱟᱭ ᱠᱟᱱ ᱿

ᱵᱟᱹᱫᱽ ᱵᱟᱹᱭᱦᱟᱹᱲ ᱦᱩᱲᱩ ᱜᱟᱹᱪᱷᱤ,
ᱜᱟᱰᱟ ᱟᱲᱮ ᱨᱮ ᱵᱟᱦᱟ ᱠᱟᱹᱥᱤ ᱾
ᱦᱤᱥᱤᱫ ᱦᱟᱞᱟᱭ ᱦᱚᱭᱛᱮ___
ᱢᱚᱡᱽᱼᱜᱮ ᱦᱤᱞᱟᱹᱜ ᱠᱟᱱ,
ᱦᱟᱹᱨᱤᱭᱟᱹᱲ ᱜᱟᱹᱪᱷᱤ ᱪᱮᱛᱟᱱ ᱛᱮᱜᱮ___
ᱯᱟᱨᱵᱚᱱ ᱫᱟᱨᱟᱭ ᱠᱟᱱ ᱾᱾

ᱥᱤᱥᱤᱨ ᱡᱟᱺᱲᱤ ᱥᱮᱛᱟᱜ ᱵᱮᱲᱟ,
ᱵᱟᱞᱮ ᱵᱮᱲᱟ ᱛᱟᱨᱟᱥ ᱟᱦᱞᱟ
ᱜᱷᱟᱸᱥ ᱰᱚᱜᱽ ᱨᱮ ᱡᱩᱞᱩᱫ ᱡᱩᱞᱩᱫ___
ᱢᱚᱡᱽ ᱜᱮ ᱡᱷᱟᱞᱠᱟᱜ ᱠᱟᱱ,
ᱱᱟᱥᱮ ᱨᱮᱭᱟᱲ ᱨᱩᱢᱩᱭ ᱦᱚᱭ ᱛᱮ _
ᱯᱟᱨᱵᱚᱱ ᱫᱟᱨᱟᱭ ᱠᱟᱱ ᱿

ᱚᱛ ᱫᱚ ᱦᱮᱢᱟᱞ ᱥᱮᱨᱢᱟ ᱨᱟᱞᱟᱜ,
ᱯᱷᱟᱨᱪᱟ ᱯᱷᱟᱹᱨᱪᱤ ᱜᱚᱴᱟ ᱠᱷᱟᱨᱥᱟᱞᱟᱜ ᱾
ᱪᱷᱩᱵᱤ ᱞᱮᱠᱟ ᱫᱷᱟᱹᱨᱛᱤ ᱟᱭᱳ___
ᱢᱚᱡᱽᱼᱜᱮ ᱥᱟᱡᱟᱣ ᱟᱠᱟᱱ,
ᱦᱟᱹᱨᱤᱭᱟᱹᱲ ᱥᱟᱠᱟᱢ ᱫᱟᱱᱟᱝ ᱫᱟᱱᱟᱝ__
ᱯᱟᱨᱵᱚᱱ ᱫᱟᱨᱟᱭ ᱠᱟᱱ ᱿

ᱥᱮᱨᱢᱟ ᱥᱟ:ᱜᱤᱧ ᱞᱤᱞ ᱜᱮ ᱧᱮᱞᱚᱜ,
ᱫᱟᱨᱮ ᱱᱟᱲᱤ ᱦᱚᱸ ᱞᱮᱜᱮᱡ ᱞᱮᱜᱮᱡᱚᱜ ᱾
ᱰᱟᱹᱨ ᱯᱮᱨᱮᱡ ᱱᱟᱱᱟ ᱦᱩᱱᱟᱹᱨ __
ᱵᱟᱦᱟ ᱵᱟᱦᱟ ᱟᱠᱟᱱ,
ᱯᱷᱩᱴᱟᱹᱣ ᱵᱟᱦᱟ ᱢᱚᱦᱚᱠ ᱥᱚ ᱥᱟᱶ__
ᱯᱟᱨᱵᱚᱱ ᱫᱟᱨᱟᱭ ᱠᱟᱱ ᱿

ᱥᱟᱹᱨᱤ ᱥᱟᱯᱷᱟᱨᱚᱢ ᱪᱷᱤᱱᱤᱡ ᱵᱤᱛᱤᱨ,
ᱛᱮᱨᱮ ᱛᱮᱥᱮ ᱦᱤᱨᱤᱡ ᱯᱟᱹᱥᱤᱨ ᱾
ᱧᱩᱨᱦᱩ ᱟᱠᱟᱱ ᱫᱟᱨᱮ ᱵᱩᱴᱟᱹᱨᱮ___
ᱚᱛ ᱦᱚᱸ ᱯᱚᱴᱚᱢ ᱟᱠᱟᱱ,
ᱧᱩᱨᱦᱟᱹ ᱵᱟᱦᱟ ᱵᱟᱦᱟ ᱪᱮᱛᱟᱱ ᱛᱮ___
ᱯᱟᱨᱵᱚᱱ ᱫᱟᱨᱟᱭ ᱠᱟᱱ ᱿

ᱵᱟᱸᱫᱽ ᱯᱩᱠᱷᱨᱤ ᱪᱮᱹᱲᱮᱹᱢ ᱪᱮᱹᱲᱮᱹᱢ,
ᱱᱟᱹᱭ ᱜᱟᱰᱟ ᱞᱮᱜᱮᱢ ᱞᱮᱜᱮᱢ ᱾
ᱡᱤᱨᱤ ᱦᱤᱨᱤ ᱡᱷᱟᱨᱱᱟ ᱫᱟᱜ ᱫᱚ___
ᱢᱚᱡᱽᱼᱜᱮ ᱞᱤᱸᱜᱤᱱ ᱠᱟᱱ ,
ᱜᱟᱰᱟ ᱟᱲᱮᱹ ᱫᱷᱟᱨᱮ ᱛᱮᱜᱮ___
ᱯᱟᱨᱵᱚᱱ ᱫᱟᱨᱟᱭ ᱠᱟᱱ ᱿

ᱯᱩᱠᱷᱨᱤ ᱯᱮᱨᱮᱡ ᱩᱯᱟᱹᱞ ᱵᱟᱦᱟ,
ᱥᱚᱵᱷᱟ ᱟᱠᱟᱱ ᱯᱚᱨᱟᱭᱱᱤ ᱵᱟᱸᱫᱮᱹᱞᱟ ᱾
ᱦᱮᱞᱠᱟᱣ ᱫᱟᱜᱼᱨᱮ ᱵᱟᱦᱟ ᱯᱚᱨᱟᱭᱱᱤ___
ᱢᱚᱡᱽᱼᱜᱮ ᱧᱮᱞᱚᱜ ᱠᱟᱱ,
ᱯᱚᱨᱟᱭᱱᱤ ᱵᱟᱦᱟ ᱥᱟᱠᱟᱢ ᱪᱮᱛᱟᱱ ᱛᱮ__
ᱯᱟᱨᱵᱚᱱ ᱫᱟᱨᱟᱭ ᱠᱟᱱ ᱿

ᱟᱹᱛᱩ ᱴᱚᱞᱟ ᱥᱟᱦᱟᱨ ᱱᱟᱜᱟᱨ,
ᱱᱟᱱᱟ ᱦᱩᱱᱟᱹᱨ ᱥᱟᱡᱟᱣ ᱵᱟᱦᱟᱨ ᱾
ᱨᱤᱛᱤ ᱛᱨᱤᱭᱳᱣ ᱦᱩᱫᱩᱲ ᱵᱷᱩᱣᱟᱹᱝ ᱠᱟᱸᱥᱟ
ᱠᱚᱨᱛᱟᱞ___
ᱢᱚᱡᱽᱼᱜᱮ ᱨᱟᱶᱟᱜ ᱠᱟᱱ ,
ᱡᱷᱚᱢᱚᱨ ᱡᱷᱚᱢᱚᱨ ᱨᱟᱹᱥᱠᱟᱹ ᱨᱚᱢᱚᱡᱽ___
ᱯᱟᱨᱵᱚᱱ ᱫᱟᱨᱟᱭ ᱠᱟᱱ ᱿