ᱢᱟᱨᱟᱜ ᱨᱟᱜ ᱛᱮᱢ ᱮᱵᱷᱮᱱᱚᱜ
ᱥᱤᱢ ᱨᱟᱜ ᱛᱮᱢ ᱵᱮᱨᱮᱫᱚᱜ
ᱫᱩᱣᱟᱹᱨ ᱜᱟᱱᱟᱰᱮ ᱜᱮᱡ ᱜᱩᱨᱤᱡ
ᱨᱟᱪᱟ ᱪᱷᱟᱴᱠᱟ ᱡᱚᱜ ᱨᱟᱪᱟ
ᱯᱟᱭᱟᱝ ᱯᱩᱭᱩᱝ ᱨᱮᱜᱮ ᱟᱢᱟᱜ
ᱠᱟᱹᱢᱤᱢ ᱛᱚᱨᱟᱣ ᱛᱟᱢ
ᱨᱟᱠᱟᱵ ᱪᱟᱸᱫᱚ ᱥᱮᱯᱮᱧ ᱫᱟᱨᱟᱢ
ᱫᱤᱱ ᱫᱚᱢ ᱥᱟᱹᱜᱩᱱ ᱛᱟᱢ ᱾
ᱜᱷᱟᱨᱚᱸᱡᱽ ᱨᱮᱱ ᱥᱟᱱᱟᱢ ᱠᱚᱣᱟᱜ
ᱟᱢᱮᱢ ᱫᱚᱦᱚᱭ ᱛᱚᱞᱟᱥ
ᱪᱮᱫ ᱠᱚ ᱡᱚᱢᱟ
ᱪᱮᱫ ᱮᱢ ᱤᱥᱤᱱ
ᱵᱟᱹᱥᱭᱟᱹᱢ ᱢᱟᱡᱟᱱ ᱠᱤᱫᱩᱜ ᱦᱟᱹᱵᱤᱡ
ᱟᱢ ᱫᱚ ᱢᱮᱱᱟᱢ ᱪᱷᱩᱴᱟᱹᱣ
ᱟᱢᱟᱜ ᱡᱚᱢ ᱧᱩ ᱡᱤᱨᱟᱹᱣ ᱨᱮᱱᱟᱜ
ᱚᱠᱛᱚ ᱵᱟᱹᱱᱩᱜ ᱛᱟᱢ
ᱟᱢ ᱞᱟᱹᱜᱤᱫ ᱟᱢᱟᱜ ᱚᱠᱛᱚ
ᱛᱤᱥ ᱦᱚᱸ ᱵᱟᱝ ᱮᱢ ᱠᱩᱲᱟᱹᱣ ᱾
ᱩᱭᱦᱟᱹᱨ ᱟᱢᱟᱜ ᱠᱩᱠᱢᱩ ᱠᱟᱛᱷᱟ
ᱠᱩᱠᱢᱩ ᱨᱮᱜᱮ ᱛᱟᱦᱮᱸᱱ
ᱜᱷᱟᱨᱚᱸᱡᱽ ᱥᱟᱶᱛᱟ ᱥᱟᱶᱛᱮ ᱟᱢᱟᱜ
ᱥᱟᱶᱦᱮᱫ ᱫᱩᱞᱟᱹᱲ ᱢᱮᱱᱟᱜ
ᱚᱠᱛᱚ ᱯᱟᱨᱚᱢ ᱥᱮᱱᱚᱜ ᱠᱟᱱᱟ
ᱛᱤᱥ ᱫᱚ ᱠᱟᱹᱢᱤᱢ ᱥᱟᱹᱜᱩᱱ
ᱛᱤᱼᱨᱮ ᱱᱚᱱᱚᱞ ᱞᱟᱪᱷᱟ ᱟᱛᱮ
ᱫᱮᱥᱮ ᱫᱩᱲᱩᱵ ᱢᱮ
ᱢᱚᱱᱮ ᱨᱮᱱᱟᱜ ᱠᱟᱛᱷᱟ ᱟᱢᱟᱜ
ᱚᱞ ᱛᱮ ᱥᱚᱫᱚᱨ ᱢᱮ
ᱥᱟᱶᱛᱟ ᱨᱮᱱᱟᱜ ᱢᱩᱴᱷᱟᱹᱱ ᱫᱮᱥᱮ
ᱡᱷᱟᱞᱠᱟᱣ ᱢᱮ ᱥᱟᱶᱦᱮᱫ ᱟᱹᱨᱥᱤ ᱨᱮ
ᱱᱚᱱᱚᱞ ᱨᱮᱱᱟᱜ ᱥᱩᱸᱜᱟᱹ ᱛᱮ
ᱚᱞ ᱫᱚ ᱥᱟᱹᱜᱩᱱ ᱢᱮ ।
ᱚᱞ ᱪᱤᱠᱤ ᱡᱤᱲᱤᱫ ᱡᱟᱲᱟᱝ
ᱯᱟᱹᱨᱥᱤ ᱯᱚᱦᱟ ᱵᱟᱦᱟ
ᱜᱩᱛᱩ ᱜᱟᱞᱟᱝ ᱥᱟᱡᱟᱣ ᱢᱮᱥᱮ
ᱞᱟᱪᱷᱟ ᱯᱮᱨᱮᱡ ᱢᱟᱞᱟ
ᱚᱞ ᱢᱮᱥᱮ ᱚᱱᱚᱬᱦᱮ’
ᱠᱟᱹᱦᱱᱤ ᱠᱩᱫᱩᱢ ᱜᱟᱢᱟᱢ
ᱥᱟᱶᱦᱮᱫ ᱵᱟᱜᱽᱣᱟᱱ ᱥᱟᱡᱟᱣ ᱠᱟᱛᱮ
ᱥᱟᱹᱜᱩᱱ ᱢᱮ ᱛᱟᱢ ᱥᱟᱹᱜᱩᱱ ᱠᱟᱹᱢᱤ
ᱥᱟᱶᱛᱟ ᱛᱟᱞᱟ ᱨᱮ ।
***
