ᱥᱟᱹᱜᱩᱱ ᱵᱟᱯᱞᱟ
“ᱵᱟᱯᱞᱟ” ᱼ ᱟᱵᱚ ᱥᱟᱱᱛᱟᱲ ᱥᱟᱶᱛᱟ ᱨᱮᱭᱟᱜ ᱵᱟᱯᱞᱟ ᱫᱚ ᱟᱹᱰᱤ ᱱᱤᱨᱚᱲ ᱟᱨ ᱥᱚᱨᱮᱥ ᱜᱮᱭᱟ ᱾ ᱥᱟᱶᱛᱟ ᱨᱮᱭᱟᱜ ᱟᱹᱨᱤᱻᱪᱟᱹᱞᱤ ᱢᱟᱹᱫᱽ ᱨᱮ ᱵᱟᱯᱞᱟ ᱦᱚᱸ ᱟᱹᱰᱤ ᱞᱟᱹᱠᱛᱤ ᱟᱱ ᱢᱤᱫ ᱟᱹᱨᱤᱻᱪᱟᱹᱞᱤ ᱨᱟᱭᱻᱨᱤᱛ ᱠᱟᱱᱟ ᱾ ᱱᱚᱶᱟ ᱨᱮᱭᱟᱜ ᱨᱟᱭᱻᱨᱤᱛ ᱠᱟᱛᱷᱟ ᱫᱚ ᱥᱮᱫᱟᱭ ᱠᱷᱚᱱ ᱜᱮ ᱦᱟᱲᱟᱢᱻᱦᱟᱯᱲᱟᱢ ᱴᱷᱮᱱ ᱠᱷᱚᱱ ᱵᱚᱱ ᱵᱟᱰᱟᱭ ᱤᱫᱤ ᱟᱠᱟᱫᱼᱟ ᱾
ᱱᱟᱜᱟᱢ ᱠᱟᱛᱷᱟ ᱞᱮᱠᱟᱛᱮ ᱯᱤᱞᱪᱩ ᱦᱟᱲᱟᱢ ᱟᱨ ᱯᱤᱞᱪᱩ ᱵᱩᱰᱷᱤ ᱛᱤᱠᱤᱱ ᱦᱚᱸ ᱟᱹᱠᱤᱱᱟᱜ ᱵᱟᱨᱭᱟ ᱡᱤᱣᱤ ᱢᱚᱱᱮ ᱠᱷᱚᱱ ᱢᱤᱫ ᱡᱤᱣᱤ ᱛᱚᱯᱚᱞᱚᱜ ᱨᱮᱭᱟᱜ ᱫᱩᱞᱟᱹᱲ ᱛᱷᱩᱢᱟᱹᱱ ᱢᱟᱨᱟᱝ ᱵᱳᱨᱳ ᱴᱷᱮᱱ ᱠᱷᱚᱱ ᱠᱤᱱ ᱧᱟᱢ ᱞᱮᱫᱼᱟ ᱾
ᱵᱟᱯᱞᱟ ᱫᱚ ᱥᱟᱹᱜᱩᱱ ᱚᱠᱛᱚ ᱨᱮᱭᱟᱜ ᱪᱚᱴ ᱪᱟᱸᱫᱚ ᱢᱟᱨᱟᱝ ᱵᱳᱨᱳ ᱥᱟᱹᱠᱷᱤ ᱠᱟᱛᱮᱫ ᱵᱟᱨᱭᱟ ᱢᱚᱱᱮ ᱡᱤᱣᱤ ᱨᱮᱭᱟᱜ ᱡᱤᱣᱤ ᱫᱩᱞᱟᱹᱲ ᱥᱟᱹᱜᱩᱱ ᱛᱚᱯᱚᱞ ᱢᱤᱞᱚᱱ ᱠᱟᱱᱟ ᱾ ᱵᱟᱨᱭᱟ ᱢᱚᱱᱮ ᱢᱮᱥᱟ ᱠᱟᱛᱮᱫ, ᱛᱤᱻᱛᱤ ᱛᱮ ᱥᱟᱯᱟᱵ ᱠᱟᱛᱮᱫ ᱡᱤᱣᱤᱫ ᱡᱤᱭᱚᱱ ᱵᱷᱩᱨ ᱢᱤᱫ ᱛᱮ ᱛᱟᱲᱟᱢ ᱨᱮᱭᱟᱜ ᱢᱤᱫ ᱨᱟᱹᱥᱠᱟᱹ ᱰᱟᱦᱟᱨ ᱠᱟᱱᱟ ᱾ ᱵᱟᱯᱞᱟ ᱫᱚ ᱢᱤᱫ ᱫᱩᱞᱟᱹᱲ ᱛᱚᱯᱚᱞ ᱥᱤᱠᱲᱤ ᱠᱟᱱᱟ ᱡᱟᱦᱟᱸ ᱨᱮ ᱢᱤᱫ ᱠᱚᱲᱟ ᱟᱨ ᱢᱤᱫ ᱠᱩᱲᱤ ᱚᱱᱛᱚᱨ ᱢᱚᱱᱮ ᱛᱮ ᱠᱤᱱ ᱛᱚᱞ ᱢᱤᱫᱩᱜᱼᱟ ᱾ ᱚᱱᱟ ᱥᱟᱶᱛᱮ ᱟᱹᱠᱤᱱᱟᱜ ᱥᱚᱨᱮᱥ ᱫᱩᱞᱟᱹᱲ ᱜᱷᱟᱨᱚᱸᱡᱽ ᱛᱤᱸᱜᱩ ᱠᱮᱴᱮᱡ ᱨᱮᱭᱟᱜ ᱠᱩᱠᱢᱩ ᱠᱤᱱ ᱨᱤᱠᱟᱹᱭᱟ ᱾ ᱚᱱᱟ ᱥᱟᱹᱜᱩᱱ ᱵᱮᱲᱟ ᱚᱠᱛᱚ ᱞᱟᱹᱜᱤᱫ ᱫᱚ ᱪᱚᱴ ᱪᱟᱸᱫᱚ ᱢᱟᱨᱟᱝ ᱵᱳᱨᱳ ᱥᱟᱶᱛᱮ ᱫᱤᱥᱚᱢ ᱦᱚᱲ ᱠᱚᱦᱚᱸ ᱥᱟᱹᱠᱷᱤ ᱠᱚ ᱛᱟᱦᱮᱸᱱᱟ ᱾
ᱟᱵᱚ ᱥᱟᱶᱛᱟ ᱨᱮᱭᱟᱜ ᱵᱟᱯᱞᱟ ᱟᱹᱨᱤᱻᱪᱟᱹᱞᱤ ᱟᱨ ᱨᱟᱭᱻᱨᱤᱛ ᱫᱚ ᱟᱹᱰᱤ ᱞᱮᱠᱟᱱᱟ ᱟᱨ ᱚᱱᱟ ᱞᱮᱠᱟᱛᱮ ᱜᱮ ᱦᱟᱹᱴᱤᱧ ᱟᱠᱟᱱᱟ ᱾ ᱵᱟᱰᱟᱭ ᱧᱟᱢ ᱞᱮᱠᱟ ᱛᱮ ᱫᱚ ᱱᱚᱶᱟ ᱠᱚ ᱠᱟᱱᱟ ᱼᱼ
᱑ᱹ ᱫᱩᱣᱟᱹᱨ ᱤᱛᱩᱫ ᱥᱤᱸᱫᱩᱨ ᱵᱟᱯᱞᱟ/ᱫᱤᱠᱩ ᱵᱟᱯᱞᱟ / ᱥᱤᱨᱤ ᱵᱟᱹᱨᱤ ᱵᱟᱯᱞᱟ
᱒ᱹ ᱥᱟᱸᱜᱮ ᱵᱟᱹᱨᱤᱭᱟᱹᱛ ᱵᱟᱯᱞᱟ / ᱥᱟᱹᱫᱟᱹᱭ ᱵᱟᱯᱞᱟ
᱓ᱹ ᱴᱩᱝᱠᱤ ᱫᱤᱯᱤᱞ ᱵᱟᱯᱞᱟ / ᱦᱟᱲᱟᱢ ᱵᱟᱹᱨᱤᱭᱟᱹᱛ ᱵᱟᱯᱞᱟ / ᱫᱚᱞ ᱵᱟᱯᱞᱟ
᱔ᱹ ᱜᱚᱞᱟᱺᱭᱴᱤ ᱵᱟᱯᱞᱟ / ᱥᱟᱸᱜᱟᱛᱤᱭᱟᱹ ᱵᱟᱯᱞᱟ
᱕ᱹ ᱠᱚᱸᱰᱮᱞ ᱧᱟᱯᱟᱢ ᱵᱟᱯᱞᱟ / ᱜᱷᱚᱞᱴᱟᱣ ᱧᱟᱯᱟᱢ ᱵᱟᱯᱞᱟ / ᱜᱩᱲᱫᱟᱹᱣ ᱧᱟᱯᱟᱢ ᱵᱟᱯᱞᱟ /
᱖ᱹ ᱠᱤᱨᱤᱧ ᱡᱟᱶᱟᱭ ᱵᱟᱯᱞᱟ
᱗ᱹ ᱜᱷᱟᱹᱨᱫᱤ ᱡᱟᱶᱟᱭ ᱵᱟᱯᱞᱟ
᱘ᱹ ᱚᱨ ᱤᱛᱩᱫ ᱵᱟᱯᱞᱟ / ᱚᱨ ᱟᱫᱮᱨ ᱵᱟᱯᱞᱟ / ᱚᱨ ᱟᱹᱜᱩ ᱵᱟᱯᱞᱟ / ᱚᱨ ᱵᱟᱹᱦᱩ ᱵᱟᱯᱞᱟ
ᱠ᱙ᱹ ᱥᱤᱸᱫᱩᱨ ᱩᱲᱷᱟᱹᱣᱱᱤ ᱵᱟᱯᱞᱟ
᱑᱐ᱹ ᱤᱛᱩᱫ ᱜᱚᱥᱚ ᱵᱟᱯᱞᱟ / ᱤᱛᱩᱫ ᱵᱟᱯᱞᱟ
᱑᱑ᱹ ᱥᱟᱸᱜᱷᱟ ᱵᱟᱯᱞᱟ
᱑᱒ᱹ ᱵᱟᱦᱟ ᱵᱟᱯᱞᱟ
᱑᱓ᱹ ᱧᱤᱨᱵᱚᱞᱚ ᱵᱟᱯᱞᱟ
᱑᱔ᱹ ᱟᱺᱜᱤᱨ ᱵᱟᱯᱞᱟ
᱑᱕ᱹ ᱜᱷᱟᱨ ᱡᱟᱶᱟᱭ ᱵᱟᱯᱞᱟ
᱑᱖ᱹ ᱪᱷᱩᱴᱠᱤ ᱵᱟᱯᱞᱟ
ᱥᱮᱫᱟᱭ ᱦᱟᱯᱲᱟᱢ ᱠᱚ ᱚᱠᱛᱚ ᱟᱨ ᱥᱩᱵᱤᱫᱷᱟ ᱞᱟᱹᱠᱛᱤ ᱡᱟᱹᱱᱤ ᱵᱟᱯᱞᱟ ᱨᱮᱭᱟᱜ ᱨᱟᱭᱻᱨᱤᱛ ᱟᱨ ᱠᱟᱹᱢᱤ ᱦᱚᱨᱟ ᱠᱚ ᱦᱟᱹᱴᱤᱧ ᱞᱮᱫᱼᱟ ᱾ ᱵᱟᱯᱞᱟ ᱠᱟᱹᱢᱤ ᱠᱚ ᱦᱚᱸ ᱟᱹᱰᱤ ᱢᱟᱱᱟᱣ ᱵᱟᱛᱟᱣ ᱠᱟᱛᱮᱫ ᱜᱮ ᱠᱟᱹᱢᱤ ᱦᱩᱭᱩᱜ ᱛᱟᱦᱮᱱ ᱟᱨ ᱱᱮᱛᱟᱨ ᱫᱤᱱ ᱦᱚᱸ ᱵᱚᱱ ᱢᱟᱱᱟᱣ ᱵᱟᱛᱟᱣ ᱮᱫ ᱜᱮᱭᱟ ᱾ ᱱᱟᱦᱟᱜ ᱚᱠᱛᱚ ᱨᱮ ᱡᱚᱛᱚ ᱞᱮᱠᱟᱱ ᱵᱟᱯᱞᱟ ᱫᱚ ᱵᱟᱵᱚᱱ ᱥᱟᱵ ᱟᱠᱟᱜ ᱪᱮ ᱢᱟᱞᱚᱴ ᱤᱫᱤ ᱮᱱᱟ ᱾ ᱠᱤᱪᱷᱩ ᱜᱟᱱ ᱜᱮ ᱥᱮᱨᱣᱟ ᱛᱟᱞᱟ ᱨᱮ ᱢᱮᱱᱟᱜ ᱟᱜ ᱟᱨ ᱚᱱᱟ ᱜᱮ ᱵᱚᱱ ᱢᱟᱱᱟᱣ ᱵᱟᱛᱟᱣ ᱾
ᱥᱮᱫᱟᱭ ᱞᱮᱠᱟ ᱛᱮ ᱫᱩᱣᱟᱹᱨ ᱤᱛᱩᱫ ᱥᱤᱸᱫᱩᱨ ᱥᱮ ᱫᱤᱠᱩ ᱥᱮ ᱥᱤᱨᱤ ᱵᱟᱹᱨᱤ ᱵᱟᱯᱞᱟ ᱫᱚ ᱟᱵᱚᱣᱟᱜ ᱵᱟᱭ ᱛᱟᱦᱮᱸ ᱞᱮᱱᱟ ᱟᱫᱚ ᱚᱠᱛᱚ ᱥᱚᱢᱚᱭ ᱡᱟᱹᱱᱤ ᱵᱚᱱ ᱟᱯᱱᱟᱨ ᱤᱫᱤ ᱠᱮᱭᱟᱜ ᱾ ᱚᱱᱠᱟ ᱟᱵᱚ ᱥᱟᱶᱛᱟ ᱨᱮᱭᱟᱜ ᱢᱟᱨᱟᱝ ᱵᱟᱯᱞᱟ ᱫᱚ ᱥᱟᱸᱜᱮ ᱵᱟᱹᱨᱤᱭᱟᱹᱛ ᱥᱮ ᱥᱟᱹᱫᱟᱹᱭ ᱵᱟᱯᱞᱟ ᱠᱟᱱᱟ ᱾ ᱥᱟᱹᱜᱩᱱ ᱥᱩᱯᱟᱹᱲᱤ ᱴᱷᱤᱞᱤ ᱞᱮᱠᱟ ᱟᱵᱚ ᱠᱚᱣᱟᱜ ᱵᱟᱯᱞᱟ ᱦᱚᱸ ᱥᱟᱨᱻᱥᱟᱹᱜᱩᱱ ᱠᱚᱜ ᱢᱟ ᱾
***
