ᱱᱚᱣᱟ ᱫᱷᱟᱹᱨᱛᱤ ᱛᱟᱞᱟᱨᱮ ᱫᱚ
ᱢᱟᱹᱱᱢᱤ ᱦᱚᱯᱚᱱ ᱫᱚ
ᱥᱤᱨᱡᱚᱱᱤᱭᱟᱹ ᱜᱮ ᱥᱤᱨᱡᱚᱱ ᱟᱠᱟᱫ ᱠᱚᱫᱚ
ᱠᱩᱲᱤ ᱠᱚᱲᱟ ᱨᱩᱯ ᱛᱮᱫᱚ ᱾
ᱠᱩᱲᱤ ᱦᱚᱯᱚᱱ ᱵᱟᱝ ᱵᱚᱱ ᱵᱟᱹᱲᱤᱡ ᱠᱚ
ᱦᱩᱰᱤᱧ ᱢᱮᱱᱛᱮ ᱵᱟᱝ ᱵᱚᱱ ᱵᱷᱟᱹᱵᱤ ᱠᱚ
ᱠᱩᱲᱤ ᱦᱚᱯᱚᱱᱟᱜ ᱦᱚᱠ ᱦᱚᱸ ᱢᱮᱱᱟᱜ ᱜᱮ
ᱠᱚᱲᱟ ᱦᱚᱯᱚᱱ ᱞᱮᱠᱟ ᱜᱮ ᱾
ᱱᱚᱣᱟ ᱫᱷᱟᱹᱨᱛᱤ ᱛᱟᱞᱟᱨᱮ
ᱦᱚᱲ ᱠᱚᱣᱟᱜ ᱢᱚᱱᱮᱨᱮ
ᱠᱩᱲᱤ ᱦᱚᱯᱚᱱᱮ ᱡᱟᱱᱟᱢ ᱞᱮᱱᱠᱷᱟᱱ ᱫᱚᱨᱮ
ᱦᱚᱲ ᱠᱚ ᱟᱹᱲᱤᱥᱚᱜ ᱫᱚᱨᱮ ᱾
ᱥᱮᱫᱟᱭ ᱡᱩᱜᱽ ᱛᱟᱦᱮᱸ ᱠᱟᱱ
ᱥᱤᱠᱷᱱᱟᱹᱛ ᱦᱚᱲ ᱠᱚ ᱵᱟᱝ ᱠᱚ ᱛᱟᱦᱮᱸ ᱠᱟᱱ
ᱠᱩᱲᱤ ᱦᱚᱯᱚᱱᱮ ᱡᱟᱱᱟᱢ ᱞᱮᱱᱠᱷᱟᱱ
ᱢᱚᱱᱮ ᱛᱟᱠᱚ ᱟᱹᱲᱤᱥᱚᱜ ᱛᱟᱦᱮᱸ ᱠᱟᱱ ᱾
ᱥᱮᱫᱟᱭ ᱡᱩᱜᱽ ᱦᱚᱸ ᱯᱟᱨᱚᱢ ᱮᱱ
ᱥᱤᱠᱷᱱᱟᱹᱛ ᱡᱩᱜᱽ ᱦᱚᱸ ᱥᱮᱴᱮᱨ ᱮᱱ
ᱠᱩᱲᱤ ᱦᱚᱯᱚᱱ ᱦᱚᱸ ᱠᱚᱲᱟ ᱞᱮᱠᱟ ᱜᱮ
ᱡᱚᱛᱚᱣᱟᱜ ᱠᱟᱹᱢᱤᱨᱮ ᱥᱚᱢᱟᱱ ᱜᱮ ᱾
ᱚᱞᱚᱜ ᱯᱟᱲᱦᱟᱣ ᱠᱚᱨᱮ
ᱤᱥᱠᱩᱞ ᱠᱚᱞᱮᱡᱽ ᱠᱚᱨᱮ
ᱠᱚᱲᱟ ᱦᱚᱯᱚᱱ ᱠᱷᱚᱱᱟᱜ ᱫᱚᱨᱮ
ᱠᱩᱲᱤ ᱦᱚᱯᱚᱱ ᱜᱮ ᱢᱟᱬᱟᱝ ᱨᱮ ᱾
ᱪᱟᱹᱠᱨᱤ ᱱᱩᱠᱨᱤ ᱠᱚᱨᱮ ᱦᱚᱸ
ᱨᱟᱡᱽᱟᱹᱨᱤ ᱠᱚᱨᱮ ᱦᱚᱸ
ᱠᱚᱲᱟ ᱦᱚᱯᱚᱱ ᱠᱷᱚᱱᱟᱜ ᱫᱚᱨᱮ
ᱠᱩᱲᱤ ᱦᱚᱯᱚᱱ ᱜᱮ ᱢᱟᱬᱟᱝ ᱨᱮ ᱾
ᱠᱩᱲᱤ ᱦᱚᱯᱚᱱ ᱡᱟᱱᱟᱢ ᱫᱚᱨᱮ
ᱮᱴᱟᱜ ᱚᱲᱟᱜ ᱜᱮᱨᱮ
ᱡᱚᱛᱚ ᱦᱚᱲ ᱠᱚ ᱵᱟᱰᱟᱭ ᱜᱮᱨᱮ
ᱠᱩᱲᱤ ᱦᱚᱯᱚᱱᱟᱜ ᱠᱟᱛᱷᱟ ᱫᱚᱨᱮ ᱾
ᱠᱩᱲᱤ ᱦᱚᱯᱚᱱ ᱫᱚᱨᱮ
ᱡᱟᱱᱟᱢ ᱚᱲᱟᱜ ᱨᱮ
ᱟᱭᱳ ᱵᱟᱵᱟ ᱠᱚᱞᱮ ᱨᱮᱜᱮ
ᱥᱤᱠᱷᱱᱟᱹᱛ ᱫᱚᱭ ᱧᱟᱢ ᱠᱟᱜ ᱜᱮ ᱾
ᱚᱞᱚᱜ ᱯᱟᱲᱦᱟᱣ ᱮᱦᱚᱵ ᱠᱷᱚᱱᱟᱜ
ᱯᱷᱩᱲᱩᱜ ᱯᱟᱛᱲᱟ ᱯᱟᱹᱴᱤ ᱠᱷᱚᱱᱟᱜ
ᱟᱪᱟᱨ ᱵᱮᱵᱷᱟᱨ ᱯᱮᱲᱟ ᱫᱟᱨᱟᱢ ᱡᱚᱛᱚ ᱨᱮᱜᱮ
ᱥᱤᱠᱷᱱᱟᱹᱛ ᱮ ᱧᱟᱢ ᱠᱟᱜᱼᱟ ᱡᱟᱱᱟᱢ ᱚᱲᱟᱜ ᱨᱮᱜᱮ ᱾
ᱠᱩᱲᱤ ᱦᱚᱯᱚᱱ ᱫᱚᱨᱮ
ᱵᱟᱝ ᱵᱚᱱ ᱵᱟᱹᱲᱤᱡ ᱠᱚᱣᱟᱨᱮ
ᱵᱚᱝᱜᱟ ᱵᱳᱨᱳ ᱥᱟᱯᱲᱟᱣ ᱠᱟᱹᱢᱤ ᱫᱚᱨᱮ
ᱠᱩᱲᱤ ᱦᱚᱯᱚᱱ ᱜᱮ ᱢᱟᱬᱟᱝᱨᱮ ᱾
ᱯᱟᱨᱟᱵᱽ ᱯᱩᱱᱟᱹᱭ ᱠᱚᱨᱮ ᱦᱚᱸ
ᱵᱟᱦᱟ ᱥᱚᱦᱨᱟᱭ ᱠᱚᱨᱮ ᱦᱚᱸ
ᱵᱷᱤᱛᱟᱹᱨ ᱵᱟᱦᱮᱨ ᱜᱮᱡ ᱜᱩᱨᱤᱡᱽ ᱠᱟᱹᱢᱤ ᱨᱮᱫᱚ
ᱠᱩᱲᱤ ᱦᱚᱯᱚᱱ ᱜᱮ ᱢᱟᱬᱟᱝ ᱨᱮᱫᱚ ᱾
ᱵᱚᱸᱜᱟ ᱦᱟᱺᱰᱤ ᱫᱚᱦᱚᱨᱮ
ᱵᱚᱸᱜᱟ ᱯᱷᱩᱲᱩᱜ ᱯᱟᱹᱴᱤᱨᱮ
ᱠᱩᱲᱤ ᱦᱚᱯᱚᱱᱟᱜ ᱛᱤ ᱛᱮᱜᱮ ᱨᱮ
ᱠᱟᱹᱢᱤ ᱦᱩᱭᱩᱜ ᱢᱟᱬᱟᱝ ᱨᱮ ᱾
ᱟᱭᱳ ᱟᱲᱟᱝ ᱥᱮᱪᱮᱫ ᱨᱮ
ᱡᱟᱱᱟᱢ ᱟᱭᱳ ᱜᱮ ᱢᱟᱬᱟᱝ ᱨᱮ
ᱵᱟᱝ ᱵᱚᱱ ᱵᱟᱹᱲᱤᱡ ᱠᱚᱣᱟ ᱨᱮ
ᱠᱩᱲᱤ ᱦᱚᱯᱚᱱ ᱫᱚᱨᱮ ᱾
ᱠᱩᱲᱤ ᱠᱚᱲᱟ ᱥᱮᱪᱮᱫ ᱮᱱᱟᱝ ᱜᱮ
ᱡᱟᱹᱛᱤ ᱥᱟᱶᱛᱟ ᱫᱚ ᱵᱟᱧᱪᱟᱣᱜ ᱜᱮ
ᱥᱮᱪᱮᱫ ᱵᱟᱝᱠᱷᱟᱱ ᱟᱜᱟᱢ ᱛᱟᱵᱚᱱ
ᱧᱩᱛᱟᱹᱛ ᱜᱮ ᱛᱟᱦᱮᱸᱱ ᱛᱟᱵᱚᱱ ᱾
***
