ᱵᱟᱹᱱᱩᱜ ᱛᱟᱢᱟ ᱡᱟᱸᱜᱟ
ᱵᱟᱹᱱᱩᱜ ᱛᱟᱢᱟ ᱞᱟᱸᱜᱟ
ᱫᱟᱲᱮᱭᱟᱱᱟᱢ ᱟᱹᱰᱤ ᱥᱚᱠᱛᱚ
ᱧᱩᱛᱩᱢ ᱛᱟᱢ ᱫᱚ ᱚᱠᱛᱚ ᱾
ᱫᱷᱟᱹᱨᱛᱤ ᱨᱮᱱᱟᱜ ᱡᱚᱛᱚ ᱡᱤᱱᱤᱥ ᱠᱷᱚᱱ
ᱰᱷᱮᱨ ᱛᱟᱢ ᱜᱚᱱᱚᱝ
ᱠᱤᱨᱤᱧ ᱛᱮᱦᱚᱸ ᱵᱟᱢ ᱧᱟᱢᱚᱜ
ᱵᱚᱫᱚᱞ ᱛᱮᱦᱚᱸ ᱵᱟᱝ ᱾
ᱚᱠᱛᱚ ᱥᱟᱶᱛᱮ ᱟᱹᱪᱩᱨᱟᱠᱟ
ᱢᱮᱱᱟᱜ ᱫᱷᱟᱹᱨᱛᱤ
ᱥᱤᱧ ᱛᱟᱭᱚᱢ ᱧᱤᱫᱟᱹ ᱦᱩᱭᱩᱜ ᱦᱟᱦᱟᱲᱟ ᱜᱮ
ᱥᱤᱨᱡᱚᱱᱤᱭᱟᱹ ᱟᱜ ᱱᱤᱛᱤ ᱾
ᱥᱟᱱᱟᱢ ᱦᱚᱲ ᱞᱟᱹᱜᱤᱱ ᱜᱮ
ᱦᱟᱹᱴᱤᱧ ᱟᱠᱟᱱ ᱵᱟᱨᱟᱵᱟᱹᱨᱤ
ᱚᱠᱛᱚ ᱫᱚ ᱦᱤᱡᱩᱜ ᱥᱮᱱᱚᱜ
ᱵᱟᱝ ᱜᱟᱱᱚᱜ ᱥᱟᱧᱪᱟᱣ ᱥᱟᱹᱨᱤ ᱾
ᱚᱠᱛᱚ ᱟᱡᱟᱜ ᱮ ᱠᱟᱹᱢᱤ ᱠᱟᱱ
ᱟᱢ ᱦᱚᱸ ᱟᱢᱟᱜ ᱠᱟᱹᱢᱤ ᱢᱮ
ᱚᱠᱛᱚ ᱠᱷᱮᱢᱟᱣ ᱵᱟᱭ ᱵᱩᱜᱤ
ᱚᱠᱛᱚ ᱛᱤᱥ ᱦᱚᱸ ᱵᱟᱭ ᱛᱟᱺᱜᱤ ᱾
ᱚᱠᱛᱚ ᱫᱚ ᱥᱮᱪᱮᱫᱤᱭᱟᱹ
ᱚᱠᱛᱚ ᱫᱚ ᱟᱹᱭᱩᱨᱤᱭᱟᱹ
ᱡᱟᱦᱟᱸᱭᱮ ᱛᱟᱲᱟᱢ ᱚᱠᱛᱚ ᱥᱟᱶᱛᱮ
ᱩᱱᱤ ᱜᱮ ᱥᱮᱴᱮᱨᱚᱜ ᱮ ᱟᱡᱟᱜ
ᱡᱚᱥ ᱴᱷᱟᱶ ᱛᱮ ᱾
ᱵᱟᱝ ᱛᱟᱦᱮᱸᱱ ᱢᱤᱫ ᱞᱮᱠᱟ
ᱚᱠᱛᱚ ᱥᱟᱨᱟ ᱵᱮᱲᱟ
ᱯᱚᱞᱚᱢ ᱟᱠᱟᱱ ᱚᱠᱛᱚ
ᱵᱟᱝ ᱜᱮ ᱨᱩᱣᱟᱹᱲ ᱫᱚᱦᱲᱟ ᱾
ᱥᱩᱠ ᱛᱟᱭᱚᱢ ᱫᱩᱠ ᱦᱤᱡᱩᱜ
ᱫᱩᱠ ᱛᱟᱭᱚᱢ ᱥᱩᱠ
ᱥᱟᱹᱨᱤ ᱜᱮ ᱚᱠᱛᱚ
ᱟᱹᱰᱤ ᱜᱮ ᱦᱟᱦᱟᱲᱟ ᱾
ᱩᱢᱮᱨ ᱠᱷᱟᱴᱚᱜ ᱠᱟᱱ
ᱛᱟᱲᱟᱢ ᱦᱚᱨ ᱢᱟ ᱥᱟᱺᱜᱤᱧᱚᱜ ᱠᱟᱱ
ᱚᱠᱛᱚ ᱨᱮᱱᱟᱜ ᱦᱮᱞᱠᱟᱣ ᱛᱮ
ᱢᱟᱹᱱᱢᱤ ᱡᱤᱭᱚᱱ ᱛᱟᱣᱟᱜ ᱛᱟᱹᱯᱤᱧᱚᱜ ᱠᱟᱱ ᱾
ᱫᱷᱟᱹᱨᱛᱤ ᱯᱩᱨᱤ ᱨᱮ ᱟᱵᱚ ᱢᱟᱹᱱᱢᱤ
ᱢᱤᱫ ᱫᱤᱱ ᱵᱟᱹᱨᱥᱤᱧ ᱯᱮᱲᱟ
ᱚᱠᱟ ᱞᱮᱠᱟ ᱵᱚᱱ ᱦᱮᱡ ᱞᱮᱱᱟ
ᱚᱱᱠᱟ ᱜᱮᱵᱚᱱ ᱨᱩᱣᱟᱹᱲᱟ ᱾
ᱫᱟᱨᱮ ᱱᱟᱹᱬᱤ ᱡᱤᱵᱽ ᱡᱤᱭᱟᱹᱞᱤ ᱠᱷᱚᱱ
ᱥᱚᱨᱮᱥ ᱢᱟᱹᱱᱢᱤ ᱡᱤᱭᱚᱱ
ᱮᱱ ᱦᱚᱸ ᱵᱟᱝ ᱵᱚᱱ ᱩᱭᱦᱟᱹᱨ ᱥᱟᱹᱨᱤ
ᱚᱠᱛᱚ ᱨᱮᱱᱟᱜ ᱜᱩᱱ ᱾
ᱥᱟᱦᱮᱫ ᱵᱷᱩᱨ ᱜᱮ ᱢᱟᱹᱱᱢᱤ
ᱡᱤᱭᱚᱱ ᱨᱮᱱᱟᱜ ᱵᱷᱚᱨᱥᱟ
ᱚᱠᱛᱚ ᱢᱮᱱᱟᱜ ᱨᱮ ᱯᱩᱨᱟᱹᱣ ᱦᱩᱭᱩᱜ
ᱠᱩᱠᱢᱩ ᱨᱮᱱᱟᱜ ᱟᱥᱟ ᱾
ᱚᱠᱛᱚ ᱟᱹᱰᱤ ᱫᱟᱢᱟᱱᱟ
ᱨᱮᱸᱜᱮᱡ ᱠᱷᱚᱱᱮ ᱠᱤᱥᱟᱹᱬ ᱢᱮ
ᱠᱤᱥᱟᱹᱬ ᱠᱷᱚᱱ ᱮ ᱱᱟᱪᱟᱨ ᱢᱮ ᱾
ᱟᱞᱚᱢ ᱰᱷᱤᱞᱟᱹᱣ ᱟᱢᱟᱜ ᱠᱚᱨᱚᱢ
ᱟᱱᱟᱴ ᱮᱴᱠᱮᱴᱚᱬᱮ ᱦᱚᱸ ᱫᱚᱱ ᱯᱟᱨᱚᱢ
ᱱᱤᱛᱚᱜ ᱦᱚᱸ ᱚᱠᱛᱚ ᱟᱢᱟᱜ ᱪᱩᱯᱩᱫ ᱛᱤᱨᱮ
ᱟᱞᱚᱢ ᱛᱟᱦᱮᱸᱱ ᱡᱟᱹᱯᱤᱫ ᱛᱷᱤᱨ ᱨᱮ ᱾
ᱚᱠᱛᱚ ᱯᱚᱞᱚᱢ ᱟᱠᱟᱱ ᱨᱮᱦᱚᱸ
ᱟᱢᱮᱢ ᱵᱤᱞᱚᱢ ᱟᱠᱟᱱ ᱨᱮᱦᱚᱸ
ᱛᱟᱲᱟᱢ ᱛᱟᱲᱟᱢ ᱞᱚᱜᱚᱱ ᱛᱟᱲᱟᱢ ᱢᱮ
ᱥᱮᱴᱮᱨᱚᱜ ᱜᱮᱭᱟᱢ ᱟᱢᱟᱜ ᱡᱚᱥ ᱴᱷᱟᱶ ᱛᱮ
ᱛᱟᱭᱚᱢ ᱛᱟᱭᱚᱢ ᱛᱮ ᱨᱮᱦᱚᱸ ᱾
ᱨᱟᱹᱱᱤ ᱢᱩᱨᱢᱩ
***
