ᱚᱠᱟ ᱥᱤᱛᱩᱝ ᱚᱠᱟ ᱡᱟᱹᱯᱩᱫ
ᱚᱠᱟ ᱨᱟᱵᱟᱝ ᱚᱠᱟ ᱧᱩᱛᱟᱹᱛ
ᱥᱟᱨᱟ ᱞᱮᱛᱟᱲ ᱤᱧ ᱥᱟᱶ
ᱥᱩᱨ ᱥᱩᱨ ᱠᱚᱨᱮ ᱜᱮ ᱢᱮᱱᱟᱭᱟ ᱿
ᱵᱩᱨᱩ ᱥᱚᱸᱜᱷᱟ ᱨᱮᱦᱚᱸ
ᱫᱚᱨᱭᱟ ᱟᱲᱮ ᱠᱚᱨᱮ ᱦᱚᱸ
ᱥᱟᱸᱡᱥᱩᱸᱡ ᱦᱚᱨ ᱨᱮᱦᱚᱸ
ᱧᱩᱛᱟᱹᱛ ᱠᱟᱲᱟᱝ ᱠᱟᱲᱟᱝ ᱚᱲᱟᱜ ᱨᱮᱦᱚᱸ
ᱚᱠᱟ ᱦᱤᱞᱚᱜ ᱦᱚᱸ ᱵᱟᱭ ᱵᱟᱹᱜᱤ ᱟᱠᱟᱣᱟᱫ ᱫᱤᱧᱟ ᱿
ᱡᱟᱦᱟᱸ ᱛᱤᱱᱟᱹᱜ ᱤᱧ ᱮᱫᱽᱨᱮ ᱟᱠᱟᱱ ᱨᱮᱦᱚᱸ
ᱡᱟᱦᱟᱸ ᱛᱤᱱᱟᱹᱜ ᱤᱧ ᱩᱥᱟᱹᱫ ᱟᱠᱟᱱ ᱨᱮᱦᱚᱸ
ᱨᱟᱹᱜᱤ ᱛᱮ ᱟᱜ ᱼ ᱥᱟᱨ ᱤᱧ ᱦᱮᱞᱟᱣ ᱟᱠᱟᱫ ᱨᱮᱦᱚᱸ
ᱦᱚᱲ ᱵᱷᱤᱲ ᱨᱮᱧ ᱨᱮᱰᱮᱫ ᱯᱟᱨᱚᱢ ᱟᱠᱟᱱ ᱨᱮᱦᱚᱸ
ᱤᱧ ᱜᱮ ᱯᱟᱸᱡᱟ ᱠᱟᱹᱧ ᱫᱚ ᱿
ᱤᱧᱤᱧ ᱜᱤᱛᱤᱡ ᱠᱟᱱ ᱠᱷᱟᱱ
ᱟᱡ ᱦᱚᱸᱭ ᱜᱤᱛᱤᱡ
ᱤᱧᱤᱧ ᱵᱮᱨᱮᱫ ᱠᱟᱱ ᱠᱷᱟᱱ
ᱟᱡ ᱦᱚᱸᱭ ᱵᱮᱨᱮᱫ ᱠᱟᱱ
ᱞᱟᱸᱜᱟ ᱛᱮ ᱤᱧ ᱡᱤᱨᱟᱹᱣ ᱠᱷᱟᱱ
ᱟᱡ ᱦᱚᱸᱭ ᱡᱤᱨᱟᱣᱚᱜ ᱿
ᱤᱧᱤᱧ ᱟᱸᱜᱚᱵ ᱟᱠᱟᱫ ᱠᱷᱟᱱ
ᱟᱡ ᱦᱚᱸᱭ ᱟᱸᱜᱚᱵ ᱠᱟᱜ
ᱤᱧ ᱯᱟᱹᱭᱬᱤ ᱦᱟᱯᱟᱧ ᱥᱟᱵ ᱟᱠᱟᱫ ᱠᱷᱟᱱ
ᱟᱡ ᱦᱚᱸᱭ ᱥᱟᱵ ᱠᱟᱜ ᱿
ᱤᱧᱤᱧ ᱫᱩᱲᱩᱵ ᱜᱚᱫᱚᱜ ᱠᱟᱱ ᱠᱷᱟᱱ
ᱟᱡ ᱦᱚᱸᱭ ᱫᱩᱲᱩᱵᱼᱟ
ᱤᱧᱤᱧ ᱥᱮᱨᱮᱧ ᱞᱮᱠᱷᱟᱱ
ᱟᱡ ᱦᱚᱸᱭ ᱥᱮᱨᱮᱧᱮᱜᱼᱟ ᱿
ᱤᱧᱟᱜ ᱢᱮᱫᱼᱫᱟᱜ ᱡᱚᱨᱚ ᱞᱮᱱ ᱠᱷᱟᱱ
ᱟᱡᱟᱜ ᱢᱮᱫᱼᱫᱟᱜ ᱦᱚᱸ ᱡᱚᱨᱚᱜ
ᱤᱧ ᱨᱟᱹᱥᱠᱟᱹ ᱛᱮ ᱛᱤᱱᱟᱹᱜ ᱤᱧ ᱨᱟᱹᱥᱠᱟᱹᱜ
ᱟᱡ ᱦᱚ ᱩᱱᱟᱹᱜ ᱜᱮᱭ ᱨᱟᱹᱥᱠᱟᱹᱜ ᱿
ᱵᱟᱹᱧ ᱵᱟᱰᱟᱭᱟ ᱤᱧ ᱫᱚ
ᱪᱮᱫ ᱨᱮᱱᱟᱜ ᱩᱱᱟᱹᱜ ᱮ ᱫᱩᱞᱟᱹᱲᱤᱧ
ᱱᱩᱱᱟᱹᱜ ᱤᱧ ᱵᱟᱰᱟᱭᱟ
ᱜᱩᱡᱩᱜ ᱫᱷᱹᱟᱵᱤᱡ ᱩᱱᱤ ᱜᱮ
ᱤᱧ ᱥᱟᱶ ᱫᱚᱭ ᱛᱟᱦᱮᱸᱱ ᱜᱮᱭᱟ ᱿
***
