ᱞᱚᱴᱚ ᱡᱟᱹᱱᱩᱢ ᱠᱟᱨᱠᱟ ᱡᱟᱹᱱᱩᱢ ᱛᱟᱞᱟ ᱛᱮ
ᱚᱛ ᱟᱴᱮᱫ ᱨᱟᱺᱜᱟᱹᱭᱱᱤ ᱡᱟᱹᱱᱩᱢ ᱪᱮᱛᱟᱱ ᱛᱮ
ᱛᱟᱲᱟᱢ ᱞᱮᱫ ᱟᱹᱠᱤᱱ ᱮᱠᱷᱮᱱ ᱡᱟᱸᱜᱟ ᱛᱮ ᱾
ᱫᱷᱟᱹᱨᱛᱚ ᱟᱭᱳ ᱨᱚᱯᱷᱟᱭ ᱞᱟᱹᱜᱤᱫ
ᱟᱭᱳ ᱦᱚᱲᱟᱜ ᱠᱚᱪᱚᱞᱚᱸᱰ ᱱᱟᱦᱟᱪᱟᱨ
ᱧᱮᱞ ᱛᱮ ᱵᱟᱹᱠᱤᱱ ᱛᱟᱦᱮᱸ ᱞᱮᱱ ᱛᱷᱤᱨ ᱾
ᱢᱟᱹᱱ ᱢᱚᱦᱚᱛ ᱠᱩᱸᱵᱟᱹ ᱫᱷᱟᱹᱥᱩᱲᱚᱜ ᱠᱟᱱ
ᱥᱮᱸᱜᱮᱞ ᱴᱩᱴᱤ ᱛᱮ ᱪᱷᱤᱛᱤᱨ ᱵᱤᱛᱤᱨᱚᱜ ᱠᱟᱱ
ᱯᱮᱨᱮᱡ ᱥᱩᱯᱟᱹᱲᱤ ᱮᱱᱛᱮ ᱾
ᱱᱚᱝᱠᱟ ᱪᱤᱛᱟᱹᱨ ᱧᱮᱞ ᱛᱮ
ᱵᱟᱹᱠᱤᱱ ᱥᱟᱦᱟᱣ ᱞᱮᱫ ᱮᱱᱛᱮ
ᱯᱟᱹᱧᱪᱤ ᱜᱚᱜᱚᱜ ᱯᱟᱴᱷᱮ ᱠᱟᱛᱮ
ᱛᱤᱨᱮ ᱴᱮᱸᱜᱚᱡ ᱠᱟᱹᱯᱤ ᱟᱛᱮ ᱾
ᱦᱩᱞᱜᱟᱹᱨᱤᱭᱟᱹ ᱦᱩᱞ ᱠᱤᱱ ᱢᱮᱱ ᱠᱮᱫ
ᱵᱟᱹᱭᱨᱤ ᱦᱚᱴᱚᱜ ᱠᱤᱱ ᱦᱮᱞᱮᱡ ᱞᱮᱫ
ᱵᱤᱨ ᱛᱟᱹᱨᱩᱵ ᱞᱮᱠᱟ
ᱵᱟᱹᱭᱨᱤ ᱛᱩᱞᱩᱡ ᱠᱤᱱ ᱛᱟᱯᱟᱢ ᱞᱮᱱ ᱾
ᱦᱚᱭ ᱵᱟᱹᱨᱰᱩ ᱞᱮᱠᱟ
ᱜᱩᱨᱞᱟᱹᱣ ᱞᱮᱱᱟ ᱠᱤᱱ ᱵᱟᱹᱭᱨᱤ ᱴᱷᱮᱱ
ᱵᱤᱴᱤ ᱨᱩᱠᱱᱤ ᱴᱩᱠᱱᱤ ᱨᱚᱯᱷᱟ ᱞᱮᱫ ᱠᱤᱱ
ᱟᱨ ᱦᱚᱸ ᱟᱭᱢᱟ ᱛᱤᱨᱞᱟᱹ ᱦᱚᱯᱚᱱ ᱠᱚ ᱾
ᱦᱩᱞ ᱦᱩᱞᱥᱟᱹᱭ ᱵᱷᱚᱜᱽᱱᱟᱰᱤ ᱨᱮ
ᱢᱟᱭᱟᱢ ᱜᱟᱰᱟ ᱜᱮ ᱞᱤᱸᱜᱤ ᱞᱮᱱ
ᱛᱤᱨᱞᱟᱹ ᱦᱚᱯᱚᱱ ᱟᱢ ᱫᱚ
ᱟᱞᱚᱢ ᱢᱚᱱᱮᱜᱼᱟ ᱠᱚᱢ ᱫᱚ ᱾
ᱢᱮᱱᱟᱜ ᱵᱚᱸᱜᱟ ᱵᱳᱨᱳ
ᱡᱟᱦᱮᱨ ᱟᱭᱳ ᱛᱷᱩᱢ ᱫᱟᱲᱮ
ᱥᱟᱶᱛᱮ ᱯᱷᱩᱞᱚ ᱡᱷᱟᱱᱚ ᱵᱤᱨ ᱫᱟᱲᱮ
ᱵᱤᱨ ᱫᱟᱲᱮ ᱵᱤᱨ ᱫᱟᱲᱮ ᱾
***
