ᱤᱧ ᱫᱚ ᱟᱹᱫᱤᱢ ᱠᱷᱮᱨᱣᱟᱲ,
ᱡᱟᱹᱛᱤ ᱛᱤᱧ ᱫᱚ ᱥᱟᱱᱛᱟᱲ,
ᱯᱟᱹᱨᱥᱤ ᱫᱚ ᱛᱤᱧ ᱥᱟᱱᱛᱟᱞᱤ,
ᱡᱟᱸᱦᱟ ᱫᱚ ᱥᱚᱱᱟ ᱜᱟᱨ ᱛᱮ ᱚᱞ ᱨᱟᱠᱟᱵ ᱟᱠᱟᱱ
ᱵᱷᱟᱨᱚᱛ ᱫᱤᱥᱚᱢ ᱥᱟᱸᱣᱤᱫᱷᱟᱱ ᱨᱮᱱᱟᱝ ᱤᱨᱟᱹᱞᱟᱜ ᱫᱷᱟᱯ ᱨᱮ,
ᱨᱤᱞᱟᱹ ᱢᱟᱞᱟ ᱡᱟᱹᱛᱤ ᱥᱟᱶᱛᱟ,
ᱡᱤᱲᱤᱫ ᱡᱟᱲᱟᱫ ᱯᱟᱹᱨᱥᱤ ᱨᱮᱱᱟᱝ ᱤᱧᱟᱜ ᱩᱯᱨᱩᱢ ᱿
ᱯᱟᱹᱨᱥᱤ ᱥᱤᱧ ᱪᱟᱸᱫᱚ ᱜᱩᱨᱩ ᱜᱚᱢᱠᱮ,
ᱪᱤᱠᱤ ᱯᱟᱥᱱᱟᱣ ᱞᱟᱹᱜᱤᱫ ᱩᱯᱮᱞ ᱞᱮᱱᱟᱭ,
ᱵᱤᱨ ᱵᱟᱱᱴᱟ ᱥᱤᱫᱩ ᱠᱟᱹᱱᱦᱩ,
ᱚᱛ ᱦᱟᱥᱟ ᱵᱟᱧᱪᱟᱣ ᱞᱟᱹᱜᱤᱫ ᱠᱤᱱ ᱞᱟᱹᱲᱦᱟᱹᱭ ᱞᱮᱫᱟ,
ᱱᱟᱜᱟᱢ ᱨᱮᱱᱟᱝ ᱤᱧᱟᱜ ᱱᱚᱣᱟ ᱜᱮ ᱩᱯᱨᱩᱢ ᱿
ᱛᱤ ᱨᱮ ᱠᱟᱜᱚᱡᱽ ᱠᱚᱞᱚᱢ ᱡᱟᱭᱜᱟ ᱨᱮ,
ᱟᱜ ᱥᱟᱨ ᱠᱟᱹᱯᱤ ᱥᱟᱠᱣᱟ ᱥᱟᱯᱟᱵ ᱛᱤᱧ
ᱟᱛᱨᱟ ᱜᱮᱛᱤᱧ ᱚᱱᱟ ᱛᱮ ᱤᱧᱟᱜ ᱱᱟᱜᱟᱢ,
ᱠᱷᱟᱴᱚ ᱜᱮᱛᱤᱧ ᱚᱱᱟ ᱛᱮ ᱤᱧᱟᱜ ᱩᱯᱨᱩᱢ ᱿
ᱟᱜ ᱥᱟᱨ ᱠᱟᱹᱯᱤ ᱡᱟᱦᱮᱨ ᱜᱟᱲ,
ᱥᱟᱹᱨᱤ ᱥᱟᱨᱡᱚᱢ ᱵᱩᱴᱟᱹ ᱵᱚᱸᱜᱟ ᱛᱷᱟᱱ,
ᱢᱟᱨᱟᱝ ᱵᱳᱨᱳ, ᱡᱟᱦᱮᱨ ᱟᱭᱳ,
ᱢᱚᱬᱮ ᱠᱚ ᱟᱨ ᱛᱩᱨᱩᱭ ᱠᱚ,
ᱥᱟᱨᱱᱟ ᱫᱷᱚᱨᱚᱢ ᱢᱮᱱᱛᱮ ᱤᱧᱟᱜ ᱩᱯᱨᱩᱢ ᱿
ᱛᱤ ᱨᱮ ᱢᱮᱱᱟᱜ ᱛᱤᱨᱭᱳ ᱵᱟᱱᱟᱢ,
ᱦᱚᱴᱚᱜ ᱨᱮᱛᱤᱧ ᱛᱩᱢᱫᱟᱜ ᱴᱟᱢᱟᱠ,
ᱮᱱᱮᱡ ᱥᱮᱨᱮᱧ, ᱨᱟᱹᱥᱠᱟᱹ ᱨᱚᱢᱚᱡᱽ,
ᱞᱟᱠᱪᱟᱨ ᱨᱮᱱᱟᱝ ᱤᱧᱟᱜ ᱩᱯᱨᱩᱢ ᱿
ᱵᱚᱸᱜᱟ ᱵᱮᱵᱷᱟᱨ ᱫᱚ ᱛᱟᱝ ᱦᱟᱺᱰᱤ,
ᱥᱟᱨᱡᱚᱢ ᱥᱟᱠᱟᱢ ᱪᱩᱠᱲᱩᱡ ᱯᱷᱩᱲᱩᱜ,
ᱯᱮ ᱠᱷᱚᱬ ᱨᱮ ᱵᱚᱸᱜᱟ ᱦᱟᱹᱴᱤᱧ,
ᱵᱚᱸᱜᱟ ᱵᱳᱨᱳ ᱨᱮᱱᱟᱝ ᱤᱧᱟᱜ ᱩᱯᱨᱩᱢ ᱿
ᱜᱟᱸᱰᱚ ᱢᱟᱹᱪᱤ ᱟᱨ ᱯᱟᱨᱠᱚᱢ ᱵᱤᱞ ᱟᱛᱮ,
ᱯᱮᱨᱮᱡ ᱞᱚᱴᱟ ᱫᱟᱜ ᱫᱚᱲᱚᱢ ᱠᱟᱛᱮ,
ᱚᱛ ᱡᱟᱯᱟᱜ ᱜᱚᱰ ᱡᱚᱦᱟᱨ ᱟᱛᱮ,
ᱫᱟᱜ ᱥᱤᱛᱟᱹ ᱡᱚᱢ ᱚᱪᱚ ᱠᱟᱛᱮ,
ᱯᱮᱲᱟ ᱢᱟᱹᱱ ᱵᱮᱵᱷᱟᱨ ᱨᱮᱱᱟᱝ ᱤᱧᱟᱜ ᱩᱯᱨᱩᱢ ᱿
ᱫᱷᱟᱹᱭ ᱵᱩᱰᱷᱤ ᱛᱤᱛᱮ ᱵᱩᱠᱟᱹ ᱛᱚᱯᱟ,
ᱱᱤᱢ ᱫᱟᱜ ᱢᱟᱹᱰᱤ ᱟᱺᱲᱛᱤ ᱦᱟᱹᱴᱤᱧ ᱠᱟᱛᱮ,
ᱦᱚᱞᱚᱝ ᱛᱤᱨᱯᱤ ᱠᱟᱛᱮ ᱪᱷᱩᱛ ᱯᱷᱮᱲᱟᱣ,
ᱞᱮᱜ ᱟᱪᱟᱨ ᱨᱮᱱᱟᱝ ᱤᱧᱟᱜ ᱩᱯᱨᱩᱢ ᱿
ᱫᱟᱹᱣᱲᱟᱹ ᱪᱮᱛᱟᱱ ᱨᱟᱹᱦᱤ ᱪᱷᱟᱹᱣᱰᱟᱹᱞ ᱪᱮᱛᱟᱱ,
ᱪᱟᱸᱫᱚ ᱤᱯᱤᱞ ᱥᱟᱹᱠᱷᱤ ᱠᱟᱛᱮ,
ᱢᱟᱨᱟᱝ ᱵᱳᱨᱳ ᱦᱤᱨᱞᱟᱹ ᱰᱟᱠ ᱠᱟᱛᱮ,
ᱢᱟᱹᱡᱷᱤ ᱢᱚᱬᱮ ᱠᱚ ᱥᱟᱹᱠᱷᱤ ᱥᱚᱵᱷᱟ ᱠᱟᱛᱮ,
ᱜᱚᱝ ᱜᱚᱱᱚᱝ ᱮᱢ ᱮᱯᱮᱢ ᱠᱟᱛᱮ,
ᱵᱟᱹᱱᱤᱡ ᱟᱹᱜᱩ ᱠᱚᱞᱮ ᱵᱟᱹᱦᱩ ᱵᱤᱴᱤ,
ᱟᱹᱨᱤ ᱪᱟᱹᱞᱤ ᱨᱮᱱᱟᱝ ᱤᱧᱟᱜ ᱩᱯᱨᱩᱢ ᱿
ᱡᱚᱜᱽ ᱢᱟᱹᱡᱷᱤ ᱟᱜ ᱫᱩ ᱫᱮᱞᱟ ᱛᱮ,
ᱢᱟᱹᱡᱷᱤ ᱪᱷᱟᱴᱠᱟ ᱨᱮ ᱵᱤᱪᱟᱹᱨ ᱟᱪᱟᱨ ᱠᱟᱛᱮ,
ᱥᱚᱞᱦᱮ ᱟᱞᱮ ᱦᱩᱰᱤᱧ ᱢᱟᱨᱟᱝ ᱱᱮᱭᱟᱣ ᱨᱚᱯᱚᱲ,
ᱵᱮᱱᱟᱣ ᱫᱚᱦᱚᱭᱟᱞᱮ ᱥᱩᱞᱩᱠ ᱥᱟᱹᱜᱟᱹᱭ,
ᱥᱮᱫᱟᱭ ᱠᱷᱚᱱᱟᱜ ᱦᱮᱡ ᱟᱹᱜᱩ ᱟᱠᱟᱱ,
ᱥᱟᱱᱛᱟᱲ ᱥᱟᱶᱛᱟ ᱨᱮᱱᱟᱝ ᱨᱟᱭᱼᱨᱤᱛ ᱿
ᱛᱤ ᱨᱮ ᱢᱮᱱᱟᱜ ᱱᱟᱦᱮᱞ ᱠᱟᱸᱬᱵᱟ,
ᱰᱟᱸᱰᱟ ᱨᱮᱫᱚ ᱯᱷᱩᱴᱟᱹ ᱜᱟᱢᱪᱷᱟ,
ᱩᱫᱽᱜᱟᱹᱨ ᱫᱟᱜ ᱡᱚᱫ ᱟᱛᱮ,
ᱫᱤᱱᱟᱹᱢ ᱱᱟᱞᱦᱟ ᱛᱩᱢᱟᱹᱞ ᱠᱟᱛᱮ,
ᱜᱷᱟᱨᱚᱸᱡᱽ ᱨᱮᱱᱟᱝ ᱞᱟᱡ ᱤᱧ ᱯᱮᱨᱮᱡᱟ,
ᱠᱚᱭ ᱠᱟᱛᱮ ᱡᱚᱢ ᱯᱟᱲᱚᱠ ᱨᱮᱜᱮ ᱵᱟᱹᱱᱩᱜᱼᱟ,
ᱠᱟᱹᱢᱤ ᱟᱨᱡᱟᱣ ᱨᱮᱱᱟᱝ ᱤᱧᱟᱜ ᱩᱯᱨᱩᱢ ᱿
ᱛᱤ ᱨᱮ ᱢᱮᱱᱟᱜ ᱢᱮᱬᱦᱮᱫ ᱥᱟᱠᱚᱢ,
ᱦᱚᱨᱟᱥᱤ ᱯᱮᱨᱮᱡ ᱥᱚᱦᱟᱜᱽ ᱥᱤᱸᱫᱩᱨ,
ᱰᱟᱸᱰᱟ ᱨᱮᱛᱤᱧ ᱯᱟᱹᱧᱪᱤ ᱥᱟᱹᱲᱤ,
ᱚᱲᱟᱜ ᱨᱤᱱᱤᱡ ᱤᱧᱜᱮ ᱜᱟᱨᱚᱸᱡᱽ ᱨᱟᱹᱱᱤ,
ᱵᱟᱹᱦᱩ ᱵᱤᱴᱤ ᱢᱮᱱᱛᱮ ᱤᱧᱟᱜ ᱩᱯᱨᱩᱢ ᱿
ᱟᱭᱳ ᱵᱟᱵᱟ ᱥᱟᱶ, ᱵᱚᱠᱚ ᱵᱚᱭᱦᱟ ᱥᱟᱶ,
ᱢᱤᱫ ᱨᱟᱪᱟ ᱨᱮ ᱛᱟᱦᱮᱸ ᱢᱤᱫᱩᱜ ᱥᱟᱲ,
ᱥᱟᱶᱛᱮ ᱫᱟᱜ ᱥᱤᱛᱟᱹ ᱦᱟᱹᱴᱤᱟᱧ ᱡᱚᱢ ᱢᱤᱫ,
ᱥᱩᱠ ᱫᱩᱠ ᱨᱮ ᱥᱟᱶᱛᱮ ᱛᱟᱸᱦᱮ ᱢᱤᱫᱩᱜ,
ᱱᱚᱶᱟ ᱜᱮ ᱛᱚ ᱤᱧᱟᱜ ᱥᱩᱞᱩᱠ ᱥᱟᱹᱜᱟᱹᱭ ᱨᱮᱱᱟᱝ ᱩᱯᱨᱩᱢ,
ᱱᱚᱶᱟ ᱜᱮ ᱛᱚ ᱥᱟᱱᱛᱟᱲ ᱥᱟᱶᱛᱟ ᱨᱮᱱᱟᱝ ᱩᱯᱨᱩᱢ ᱿
***
