ᱢᱮᱬᱦᱮᱫ ᱥᱟᱠᱚᱢ

ᱤᱛᱩᱫ ᱥᱤᱸᱫᱩᱨ ᱦᱩᱭ ᱥᱟ.ᱛ ᱠᱟᱛᱮ ᱥᱚᱦᱟᱜᱤ ᱞᱩᱵᱤᱱ ᱪᱷᱟᱴᱠᱟ ᱨᱮ ᱯᱟᱱᱛᱮ ᱛᱮᱠᱚ ᱛᱤᱸᱜᱩ ᱟᱠᱟᱫ ᱠᱤᱱᱟ. ᱪᱟᱸᱫᱚ ᱨᱟᱠᱟᱵ ᱥᱮᱫ ᱥᱟᱢᱟᱝ ᱠᱟᱛᱮ ᱾ ᱡᱟᱸᱜᱟ ᱫᱟᱜ ᱠᱟᱛᱮ ᱚᱲᱟᱜ ᱠᱷᱟ.ᱲ ᱠᱚ ᱛᱳᱲ ᱡᱳᱲ ᱮᱫ ᱠᱟᱱᱟ ᱱᱟᱣᱟ ᱵᱟ.ᱦᱩ ᱡᱟᱶᱟᱭ ᱥᱳᱦᱟᱜᱤ ᱟᱨ ᱞᱩᱵᱤᱱ ᱾ ᱛᱤᱱᱟ.ᱜ ᱥᱮᱨᱢᱟ ᱨᱮᱱᱟᱜ ᱫᱩᱞᱟ.ᱲ ᱥᱟ.ᱜᱟ.ᱭ ᱛᱮᱸᱦᱮᱧ ᱟ.ᱛᱩ ᱢᱟ.ᱡᱷᱤ ᱢᱚᱲᱮ ᱦᱚᱲ ᱵᱚᱸᱜᱟ ᱵᱳᱨᱳ ᱠᱚ ᱥᱟ.ᱠᱷᱤ ᱥᱚᱵᱷᱟᱭᱮᱫᱟ ᱾

ᱫᱟ.ᱣᱲᱟ ᱪᱮᱛᱟᱱ ᱫᱷᱩᱲᱤ ᱥᱤᱫᱩᱨ ᱛᱮᱭ ᱡᱩᱨᱤ ᱠᱮᱫᱮ ᱨᱮᱦᱚᱸ ᱞᱩᱵᱤᱱ ᱥᱚᱦᱟᱜᱤᱭᱟᱜ ᱞᱮᱸᱜᱟ ᱛᱤᱨᱮ ᱥᱚᱱᱛᱚᱠ ᱥᱟᱠᱚᱢ ᱫᱚ ᱵᱟᱭ ᱦᱚᱨᱚᱜ ᱟᱫᱮᱭᱟ ᱾ ᱚᱱᱟ ᱧᱮᱞ ᱠᱟᱛᱮ ᱞᱩᱢᱩᱝ ᱜᱷᱩᱴᱩ ᱢᱟ.ᱡᱷᱤ ᱢᱚᱲᱮ ᱦᱚᱲ ᱫᱚᱠᱚ ᱧᱤᱨ ᱮᱱᱟ ᱾ ᱟᱨ ᱠᱚ ᱢᱮᱱ ᱠᱮᱫᱟ ᱱᱚᱝᱠᱟ ᱫᱚ ᱟᱞᱮ ᱥᱮᱫ ᱫᱚ ᱱᱮᱭᱟᱢ ᱵᱟ.ᱱᱩᱜ ᱟᱱᱟ ᱾ ᱱᱚᱝᱠᱟ ᱜᱩᱞᱢᱟᱞ ᱨᱮᱜᱮᱲ ᱡᱷᱮᱜᱮᱲ ᱟᱸᱡᱚᱢ ᱠᱟᱛᱮ ᱥᱚᱦᱟᱜᱤ ᱟᱡ ᱟᱭᱳ ᱟ.ᱛᱩ ᱢᱚᱲᱮ ᱦᱚᱲ ᱫᱚᱭ ᱢᱮᱛᱟᱫ ᱠᱚ ᱜᱮᱭᱟ, ᱵᱟᱵᱟ ᱦᱟᱯᱮ ᱥᱮ ᱜᱟᱞᱢᱟᱨᱟᱣ ᱞᱮᱜᱮ ᱵᱚᱱ, ᱵᱟᱝ ᱠᱷᱚᱱ ᱵᱟᱝ ᱥᱮᱱ ᱮᱱ ᱜᱮᱭᱟ ᱠᱚ ᱾ ᱨᱟᱺᱰᱤ ᱵᱟ.ᱯᱩᱲᱤᱡ ᱟᱨ ᱪᱮᱫ ᱮ ᱢᱮᱱᱟ ᱾ ᱵᱟᱯᱞᱟ ᱚᱲᱟᱜ ᱱᱤᱥᱩᱱ ᱮᱱ ᱞᱮᱠᱟ ᱟ.ᱭᱠᱟ.ᱜ ᱠᱟᱱᱟ ᱾

ᱥᱮᱛᱟᱜ ᱠᱷᱚᱱ ᱵᱟ.ᱥᱭᱟᱹᱢ ᱮᱱ ᱨᱮᱦᱚᱸ ᱪᱷᱟᱴᱠᱟ ᱨᱮᱜᱮ ᱛᱤᱸᱜᱩ ᱨᱮ ᱢᱮᱱᱟᱜ ᱠᱤᱱᱟ ᱥᱟᱦᱟᱜᱤ ᱞᱩᱵᱤᱱ ᱾ ᱟᱯᱟᱛ ᱵᱟ.ᱱᱩᱜ ᱮ ᱤᱫᱤ ᱠᱟᱛᱮ ᱥᱚᱦᱟᱜᱤ ᱦᱩᱰᱤᱧ ᱟᱯᱟᱛ ᱦᱩᱰᱤᱧ ᱟᱭᱳ ᱜᱮ ᱟᱭᱳ ᱵᱟᱵᱟ ᱟᱜ ᱠᱟ.ᱢᱤ ᱫᱚᱠᱤᱱ ᱥᱟᱵ ᱟᱠᱟᱫᱟ ᱾ ᱟ.ᱰᱤ ᱵᱮᱲᱟᱭᱮᱱ ᱨᱮᱦᱚᱸ ᱢᱚᱲᱮ ᱦᱚᱲ ᱵᱟᱠᱚ ᱥᱩᱨᱩᱜ ᱠᱟᱱ ᱧᱮᱞᱛᱮ ᱥᱚᱦᱟᱜᱤ ᱦᱩᱰᱤᱧ ᱟᱭᱳ ᱫᱚ ᱯᱤᱸᱰᱟ. ᱥᱮᱫ ᱨᱮ ᱯᱟᱨᱠᱚᱢ ᱨᱮᱭ ᱫᱩᱲᱩᱵ ᱠᱮᱫ ᱠᱤᱱᱟ ᱾ ᱛᱩᱢᱫᱟᱜ ᱴᱟᱢᱟᱜ ᱥᱟᱰᱮ ᱦᱚᱸ ᱛᱷᱤᱨ ᱛᱷᱟᱨ ᱮᱱᱟ ᱾ ᱵᱟ.ᱨᱭᱟᱹᱛ ᱠᱚᱦᱚᱸ ᱟᱠᱚᱣᱟᱜ ᱰᱮᱨᱟ ᱛᱮᱠᱚ ᱨᱩᱣᱟ.ᱲ ᱮᱱᱟ ᱟᱫᱚ ᱪᱮᱫ ᱠᱚ ᱪᱮᱠᱟᱭᱟ ? ᱥᱚᱦᱟᱜᱤ ᱟᱡ ᱟᱭᱳ ᱛᱤᱱᱟ.ᱜ ᱜᱟᱱ ᱦᱚᱲ ᱥᱟᱶᱛᱮ ᱠᱟᱛᱮ ᱟ.ᱛᱩ ᱦᱚᱲ ᱴᱷᱮᱱ ᱥᱮᱱ ᱠᱟᱛᱮᱭ ᱢᱮᱱ ᱞᱮᱫ ᱜᱮᱭᱟ ᱵᱟᱵᱟ ᱱᱚᱶᱟ ᱠᱟ.ᱢᱤ ᱛᱮᱫ ᱵᱚᱱ ᱯᱟᱨᱚᱢ ᱠᱟᱜ ᱢᱟ ᱡᱟᱸᱦᱟ ᱜᱮ ᱛᱟᱭᱱᱚᱢ ᱵᱚᱱ ᱨᱚᱯᱟᱲᱟ ᱾ ᱵᱟᱠᱚ ᱞᱩᱛᱩᱨᱟᱫ ᱛᱟᱭᱟ ᱾ ᱚᱠᱚᱭ ᱟᱸᱡᱚᱢᱟᱭ ᱨᱟᱺᱰᱤ ᱦᱚᱲᱟᱜ ᱠᱟᱛᱷᱟ ᱾

ᱥᱚᱦᱟᱜᱤ ᱞᱩᱵᱤᱱ ᱱᱟᱶᱟ ᱵᱟ.ᱦᱩ ᱡᱟᱶᱟᱭ ᱚᱲᱟᱜ ᱟᱫᱮᱨ ᱠᱟᱛᱮ ᱡᱟᱸᱦᱟ ᱠᱟ.ᱢᱤ ᱠᱚ ᱦᱩᱭᱩᱜ ᱠᱟᱛᱷᱟ ᱚᱱᱟ ᱠᱚ ᱦᱚᱸ ᱤᱱᱠᱟ. ᱨᱮᱜᱮ ᱛᱟᱸᱦᱮᱭᱮᱱᱟ ᱾ ᱢᱮᱬᱦᱮᱫ ᱥᱟᱠᱚᱢ ᱜᱮ ᱮᱥᱮᱫ ᱠᱮᱫᱟᱭ ᱚᱲᱟᱜ ᱵᱚᱞᱚᱱ ᱫᱩᱣᱟ.ᱨ ᱾

ᱵᱮᱲᱟ ᱦᱚᱸᱭ ᱫᱟᱱᱟᱝ ᱚᱜ ᱞᱟᱱᱟ, ᱞᱩᱵᱤᱱ ᱵᱟ.ᱨᱭᱟᱹᱛ ᱰᱮᱨᱟ ᱥᱮᱫ ᱥᱮᱱ ᱠᱟᱛᱮᱭ ᱨᱩᱣᱟ.ᱲ ᱦᱮᱡ ᱮᱱᱟ ᱟᱨ ᱥᱚᱦᱟᱜᱤᱭ ᱢᱮᱛᱟᱭ ᱠᱟᱱᱟ “ᱥᱚᱦᱟᱜᱤ” ᱫᱮᱞᱟ ᱤᱧ ᱥᱟᱶᱛᱮᱢ ᱥᱮᱱᱚᱜ ᱠᱷᱟᱱ ᱪᱚᱞᱚ ᱟᱨ ᱵᱟᱝᱠᱷᱟᱱ ᱛᱟᱸᱦᱮᱱ ᱢᱮ ᱾ ᱥᱚᱦᱟᱜᱤ ᱪᱮᱫ ᱦᱚᱸ ᱵᱟᱝ ᱢᱮᱱ ᱠᱟᱛᱮ ᱞᱩᱵᱤᱱᱟᱜ ᱛᱤ ᱥᱟᱵ ᱠᱟᱛᱮᱭ ᱛᱟᱱᱟᱢ ᱠᱮᱫ-ᱟ ᱵᱟᱥ ᱜᱟ.ᱰᱤ ᱨᱮ ᱫᱮᱡ ᱠᱟᱛᱮ ᱵᱟ.ᱨᱭᱟᱹᱛ ᱠᱚ ᱥᱟᱶᱛᱮ ᱞᱩᱵᱤᱱ ᱛᱮᱠᱚ ᱚᱲᱟᱜ ᱠᱤᱱ ᱥᱮᱴᱮᱨ ᱠᱮᱫᱟ ᱾ ᱵᱤᱱ ᱢᱟᱛᱠᱚᱢ ᱵᱩᱴᱟ ᱛᱮᱜᱮ ᱟ.ᱛᱩ ᱢᱟ.ᱡᱷᱤ ᱢᱚᱲᱮ ᱦᱚᱲ ᱵᱮᱜᱚᱨ ᱠᱤᱱ ᱵᱤᱫᱟ.ᱭ ᱮᱱᱟ ᱾

ᱯᱚᱱᱚᱛ ᱦᱚᱱᱚᱛ ᱴᱚᱴᱷᱟ ᱴᱚᱞᱟ ᱨᱟᱭᱨᱤᱛ ᱛᱟᱵᱚᱱ ᱱᱟᱥᱮ ᱦᱟᱱᱛᱮ ᱱᱟᱛᱮ ᱾ ᱚᱱᱠᱟ ᱞᱮᱠᱟᱛᱮ ᱦᱟᱱᱦᱟᱨ ᱟᱭᱳ ᱥᱚᱦᱟᱜᱤᱭ ᱦᱚᱨᱚᱜ ᱟᱭ ᱠᱮᱭᱟ ᱛᱤᱨᱮ ᱢᱮᱲᱦᱮᱫ ᱥᱟᱠᱚᱢ ᱾ ᱟᱠᱚᱣᱟᱜ ᱨᱟᱭᱨᱤᱛ ᱛᱮ ᱾ ᱚᱱᱟ ᱢᱟ ᱜᱚᱱᱯᱚᱱ ᱨᱟ.ᱯᱩᱫ ᱥᱮ ᱵᱟᱯᱞᱟ ᱢᱟᱲᱟᱝ ᱚᱠᱚᱭ ᱢᱟ.ᱡᱷᱤ ᱦᱚᱸ ᱵᱟ.ᱠᱤᱱ ᱨᱚᱯᱚᱲ ᱜᱚᱴᱟ ᱞᱮᱱᱟ ᱾ ᱵᱟᱯᱞᱟ ᱢᱟ ᱢᱤᱫ ᱛᱮ ᱵᱟᱭ ᱦᱩᱭᱩᱜ-ᱟ ! ᱛᱚᱵᱮ ᱱᱚᱶᱟ ᱨᱮᱱᱟᱜ ᱫᱳᱥ ᱫᱚ ᱥᱚᱦᱟᱜᱤ ᱞᱩᱵᱤᱱ ᱴᱷᱮᱱ ᱪᱮᱫᱟᱜ ᱞᱟᱫᱮᱜ-ᱟ? ᱟ.ᱠᱤᱱᱟᱜ ᱥᱟ.ᱜᱩᱱ ᱡᱤᱭᱚᱱ ᱛᱟᱱᱟᱢ ᱦᱚᱨ ᱨᱮ ᱪᱮᱫᱟᱜ ᱱᱚᱶᱟ ᱮᱴᱠᱮ ᱴᱚᱬᱮ? ᱟᱵᱚ ᱢᱟᱵᱚᱱ ᱵᱟᱰᱟᱭ ᱜᱮᱭᱟ ᱛᱤᱱᱟᱹᱜ ᱜᱟᱱ ᱯᱚᱱᱚᱛ ᱦᱚᱱᱚᱛ ᱥᱟᱞᱟᱜ ᱨᱟᱭᱨᱤᱛ ᱵᱟᱭ ᱢᱤᱫᱩᱜ ᱛᱟᱵᱚᱱᱟ ᱾

ᱚᱱᱟ ᱠᱚᱫᱚ ᱱᱟᱶᱟ ᱢᱟ ᱵᱟᱝ ᱠᱟᱱᱟ ᱾ ᱟᱨ ᱚᱱᱟ ᱨᱟᱭᱨᱤᱛ ᱠᱚ ᱵᱟᱯᱞᱟ ᱢᱟᱲᱟᱝ ᱵᱟᱨᱭᱟ ᱢᱟ.ᱡᱷᱤ ᱵᱟᱝ ᱨᱚᱯᱚᱲ ᱠᱟᱛᱮ ᱜᱮ ᱛᱤᱱᱟ.ᱜ ᱜᱟᱱ ᱠᱟ.ᱢᱤ ᱦᱚᱸ ᱱᱚᱝᱠᱟ ᱦᱩᱭᱩᱜ ᱠᱟᱱ ᱜᱮᱭᱟ ᱾ ᱡᱟᱸᱦᱟ ᱨᱮ ᱵᱟᱨᱭᱟ ᱢᱟ.ᱡᱷᱤ ᱥᱮ ᱵᱟᱨᱭᱟ ᱟ.ᱛᱩ ᱢᱤᱫᱴᱟᱹᱝ ᱥᱩᱞᱩᱠ ᱥᱟ.ᱜᱟ.ᱭ ᱛᱮ ᱡᱟᱡᱩᱜᱽ ᱛᱚᱞ ᱠᱚᱜ-ᱟ ᱚᱱᱟ ᱨᱮ ᱥᱤᱨᱡᱟ.ᱣ ᱮᱱᱟ ᱟ.ᱲᱤᱥ ᱾ ᱤᱱᱟ. ᱥᱮᱱ ᱜᱮ ᱟᱫᱚ ᱥᱚᱦᱟᱜᱤ ᱡᱟᱱᱟᱢ ᱚᱲᱟᱜ ᱛᱮᱫᱚ ᱵᱟᱭ ᱦᱮᱡ ᱞᱮᱱᱟ ᱢᱚᱬᱮ ᱥᱮᱨᱢᱟ ᱾ ᱠᱚᱲᱟ ᱜᱤᱫᱽᱨᱟ. ᱦᱩᱭ ᱥᱟᱶᱛᱮᱭ ᱟᱫ ᱠᱮᱫᱮᱭᱟ ᱫᱩᱠ ᱫᱚᱭ ᱟᱴᱠᱟᱨ ᱜᱮᱭᱟ ᱡᱟᱱᱟᱢ ᱚᱲᱟᱜ ᱥᱮᱱᱚᱜ ᱞᱟ.ᱜᱤᱫ ᱢᱚᱱᱮ ᱦᱚᱸ ᱛᱟᱭᱮ ᱨᱟᱜᱽ ᱜᱮᱭᱟ ᱾ ᱚᱠᱟ ᱞᱮᱠᱟ ᱨᱮᱭ ᱥᱮᱱᱚᱜ-ᱟ ᱾ᱟ.ᱛᱩ ᱦᱚᱲ ᱯᱟᱞᱮᱱ ᱟᱨᱦᱚᱸ ᱦᱟ.ᱴᱤᱧ ᱟᱭᱳ ᱛᱟᱭ ᱠᱚ ᱮᱠᱟ ᱜᱷᱩᱨᱤᱭᱟ.ᱠᱟᱭᱟ ᱾ ᱚᱱᱟ ᱠᱚ ᱵᱚᱨᱚ ᱛᱮ ᱡᱚᱵᱚᱨ ᱮ ᱦᱤᱲᱤᱧ ᱮᱫᱟ ᱡᱟᱱᱟᱢ ᱚᱲᱟᱜ ᱨᱮᱱᱟᱜ ᱢᱟᱭᱟ ᱾

ᱛᱤᱱᱟ.ᱜ ᱫᱷᱟᱣ ᱢᱟ.ᱡᱷᱤ ᱠᱚ ᱥᱟᱶ ᱜᱟᱞᱢᱟᱨᱟᱣ ᱠᱟᱛᱮ ᱨᱮᱵᱮᱱ ᱮᱱᱟ ᱠᱚ ᱢᱟ.ᱡᱷᱤ ᱢᱚᱲᱮ ᱦᱚᱲ ᱥᱟᱨᱮᱡ ᱠᱟ.ᱢᱤ ᱯᱟ.ᱦᱟ.ᱛᱟ ᱞᱟ.ᱜᱤᱫ ᱾ ᱧᱤᱨ ᱞᱮᱠᱟᱭ ᱧᱤᱨ ᱞᱮᱱᱟ ᱥᱚᱦᱟᱜᱤ ᱾ ᱵᱟᱯᱞᱟ ᱢᱚᱬᱮ ᱥᱮᱨᱢᱟ ᱛᱟᱭᱚᱢ ᱡᱟᱱᱟᱢ ᱚᱲᱟᱜ ᱫᱩᱣᱟ.ᱨ ᱞᱮᱵᱮᱫ ᱥᱟᱶᱛᱮ ᱦᱤᱰᱤᱨ ᱦᱤᱰᱤᱨ ᱢᱮᱫ ᱫᱟᱜ ᱡᱚᱨᱚᱭᱮᱱ ᱛᱟᱭᱟ ᱾ ᱵᱟᱝ ᱫᱚ ᱢᱚᱬᱮ ᱥᱮᱨᱢᱟ ᱵᱟᱝ ᱦᱮᱡ ᱠᱷᱟ.ᱛᱤᱨ ᱵᱟᱝ ᱫᱚ ᱪᱮᱫ, ᱵᱟᱰᱟᱭᱟᱭ ᱥᱚᱦᱟᱜᱤ ᱜᱮ !!!

***