ᱨᱟᱦᱞᱟ ᱫᱚ ᱡᱟᱹᱯᱤᱫ ᱠᱷᱚᱱᱮ ᱪᱚᱢᱠᱟᱣ ᱵᱮᱨᱮᱫ ᱮᱱᱟ ᱾ ᱪᱮᱫᱟᱜ ᱥᱮ ᱟᱹᱰᱤ ᱜᱮ ᱵᱚᱛᱚᱨ ᱮ ᱠᱩᱠᱢᱩ ᱠᱮᱫ-ᱟ ᱾ ᱱᱤᱛ ᱪᱚᱢᱠᱟᱣ ᱵᱮᱨᱮᱫ ᱠᱟᱛᱮ ᱦᱚᱸ ᱟᱹᱰᱤ ᱡᱩᱨ ᱨᱟᱨᱟᱜ ᱥᱟᱱᱟᱭᱮ ᱠᱟᱱᱟ ᱾ ᱢᱮᱫ ᱮ ᱦᱟᱛᱣᱟ ᱞᱮᱱᱟ ᱫᱚ ᱢᱮᱫ ᱠᱷᱚᱱ ᱢᱮᱫ ᱫᱟᱜ ᱦᱤᱰᱤᱨ ᱦᱤᱰᱤᱨ ᱡᱚᱨᱚᱜ ᱠᱟᱱᱟ ᱾ ᱨᱟᱦᱞᱟ ᱨᱟᱜ ᱵᱟᱭ ᱥᱟᱸᱵᱽᱲᱟᱣ ᱫᱟᱲᱮᱭᱟᱫ-ᱟ, ᱦᱮᱸᱠᱚᱜ ᱩᱛᱟᱹᱨ ᱠᱮᱫ ᱟᱭ ᱾
ᱨᱟᱦᱞᱟᱭ ᱩᱭᱦᱟᱹᱨᱟ, ᱥᱟᱹᱨᱤ ᱜᱮ ᱠᱩᱲᱤ ᱦᱚᱯᱚᱱ ᱫᱚ ᱡᱟᱶᱟᱭ ᱚᱲᱟᱜ ᱵᱤᱫᱟᱹᱭ ᱠᱟᱛᱮ ᱨᱮᱦᱚᱸ ᱟᱠᱚᱣᱟᱜ ᱟᱛᱢᱟ ᱫᱚ ᱡᱟᱱᱟᱢ ᱚᱲᱟᱜ ᱥᱟᱶ ᱜᱮ ᱡᱩᱲᱟᱹᱭ ᱠᱟᱛᱮ ᱛᱟᱦᱮᱸᱱᱟ ᱾ ᱩᱱ ᱵᱷᱩᱨ ᱫᱚ ᱟᱹᱰᱤ ᱜᱟᱺᱦᱤᱨ ᱜᱮ, ᱛᱤᱱ ᱵᱷᱩᱨ ᱡᱟᱶᱟᱭ ᱚᱲᱟᱜ ᱨᱮ ᱯᱩᱨᱟᱹᱯᱩᱨᱤ ᱵᱟᱭ ᱦᱟᱢᱥᱟ ᱟᱠᱟᱱᱟ ᱾ ᱪᱮᱫᱟᱜ ᱵᱟᱝ ᱵᱷᱟᱞᱟ, ᱡᱟᱱᱟᱢ ᱚᱲᱟᱜ ᱨᱮ ᱢᱚᱱᱮ ᱡᱤᱣᱤ ᱛᱚᱯᱚᱞ ᱛᱟᱦᱮᱸᱱᱟ ᱾ ᱟᱭᱳ ᱠᱩᱠᱷᱤ ᱨᱮᱭ ᱛᱟᱦᱮᱸᱱ ᱠᱷᱚᱱ ᱚᱱᱟ ᱵᱟᱹᱠᱷᱩᱞ ᱨᱮᱱᱟᱜ ᱠᱚᱬ ᱠᱚᱪᱟᱭ ᱟᱹᱭᱠᱟᱹᱣ ᱠᱟᱜ-ᱟ ᱾ ᱡᱟᱱᱟᱢ ᱠᱟᱛᱮ ᱯᱩᱭᱞᱩ ᱫᱷᱟᱹᱨᱛᱤ ᱨᱮᱱᱟᱜ ᱦᱟᱥᱟ ᱫᱷᱩᱲᱤ ᱚᱱᱟ ᱚᱲᱟᱜ ᱨᱮᱭ ᱞᱮᱵᱮᱫᱟ ᱾ ᱩᱞᱴᱟᱹᱣ ᱠᱟᱰᱟ, ᱚᱛᱟ ᱛᱟᱵᱮᱨ, ᱚᱸᱵᱟᱜ ᱤᱠᱲᱩᱢ, ᱪᱟᱪᱚ ᱛᱟᱲᱟᱢ, ᱠᱮ~ᱠᱚᱴᱚᱨ, ᱨᱟᱹᱲ, ᱨᱚᱲ, ᱨᱟᱜ, ᱞᱟᱸᱫᱟ ᱚᱱᱟ ᱚᱲᱟᱜ ᱨᱮᱭ
ᱮᱛᱚᱭᱟ ᱾
ᱚᱱᱟ ᱚᱲᱟᱜ ᱨᱮᱱᱟᱜ ᱡᱚᱱᱚᱜ ᱴᱷᱩᱴᱠᱤ ᱠᱷᱚᱱ ᱮᱛᱚᱦᱚᱵ ᱠᱟᱛᱮ, ᱪᱷᱚᱸᱪ ᱞᱩᱸᱰᱟᱹ, ᱦᱩᱰᱤᱧ ᱠᱷᱚᱱ ᱦᱩᱰᱤᱧ ᱟᱨ ᱢᱟᱨᱟᱝ ᱠᱷᱚᱱ ᱢᱟᱨᱟᱝ ᱡᱟᱭ ᱡᱤᱱᱤᱥ ᱥᱟᱞᱟᱜ ᱟᱡᱟᱜ ᱜᱟᱺᱦᱤᱨ ᱥᱟᱹᱜᱟᱹᱭ ᱛᱟᱦᱮᱸᱱᱟ ᱾ ᱦᱟᱨᱟᱛᱚᱨᱟ ᱠᱷᱚᱱ ᱜᱮ ᱴᱷᱤᱞᱤ, ᱥᱩᱯᱟᱹᱲᱤ, ᱦᱟᱸᱰᱦᱟ, ᱰᱤᱯᱪᱤ ᱥᱟᱞᱟᱜ ᱥᱟᱹᱜᱟᱹᱭ ᱮ ᱡᱚᱲᱟᱣᱟ ᱾ ᱴᱩᱠᱩᱡ ᱴᱚᱠᱟᱜ, ᱴᱷᱤᱞᱤ, ᱥᱩᱯᱟᱹᱲᱤ ᱨᱮ ᱟᱡᱟᱜ ᱜᱮ ᱨᱚᱲ ᱞᱟᱸᱫᱟ ᱛᱟᱠᱮᱨᱚᱜ-ᱟ ᱾ ᱠᱩᱞᱦᱤ ᱵᱟᱲᱜᱮ ᱨᱮᱱᱟᱜ ᱫᱟᱨᱮ ᱱᱟᱹᱬᱤ, ᱫᱟᱨᱮ ᱰᱟᱹᱨ ᱨᱮ ᱪᱮᱬᱮ ᱪᱤᱯᱨᱩᱜ, ᱡᱤᱱᱛᱤ, ᱯᱤᱯᱤᱲᱤ, ᱥᱤᱠᱬᱤᱡ, ᱚᱲᱢᱚᱡ ᱟᱡᱟᱜ ᱫᱩᱞᱟᱹᱲ, ᱟᱡᱟᱜ ᱮᱜᱮᱨ ᱠᱚ ᱟᱸᱡᱚᱢ ᱟᱠᱟᱫ-ᱟ ᱾
ᱪᱮᱫ ᱥᱟᱹᱨᱤ ᱜᱮ ᱦᱚᱯᱚᱱ ᱮᱨᱟ ᱫᱚ ᱮᱴᱟᱜ ᱚᱲᱟᱜ ᱞᱟᱹᱜᱤᱫ ᱮ ᱡᱟᱱᱟᱢᱚᱜ-ᱟ ᱡᱟᱱᱟᱢ ᱚᱲᱟᱜ ᱨᱮ ? ᱪᱮᱫ ᱥᱟᱹᱨᱤ ᱜᱮ ᱦᱚᱯᱚᱱ ᱮᱨᱟ ᱫᱚ ᱡᱟᱱᱟᱢ ᱚᱲᱟᱜ ᱨᱮ ᱦᱚᱠ ᱟᱹᱭᱫᱟᱹᱨ ᱫᱚ ᱵᱟᱝ ᱛᱟᱦᱮᱸᱱ ᱛᱟᱭᱟ ᱾ ᱡᱟᱦᱟᱸ ᱠᱷᱟᱹᱛᱤᱨ ᱡᱟᱱᱟᱢ ᱚᱲᱟᱜ ᱠᱷᱚᱱ, ᱡᱟᱱᱟᱢ ᱟᱭᱳ ᱵᱟᱵᱟ ᱠᱷᱚᱱ ᱥᱟᱦᱟᱜ ᱦᱩᱭ ᱟᱭᱟ ᱦᱚᱯᱚᱱ ᱮᱨᱟ ? ᱦᱟᱨᱟᱛᱚᱨᱟ ᱨᱮᱜᱮ ᱥᱟᱱᱟᱢᱟᱜ ᱠᱷᱚᱱ ᱪᱩᱰᱟᱹᱨ ᱠᱟᱛᱮ, ᱥᱟᱱᱟᱢ ᱥᱟᱹᱜᱟᱹᱭ ᱠᱚᱴᱟ ᱜᱤᱰᱤ ᱠᱟᱛᱮ ᱞᱟᱦᱟᱜ ᱦᱩᱭ ᱟᱭᱟ ᱮᱴᱟᱜ ᱚᱲᱟᱜ ᱟᱯᱱᱟᱨ ᱾ ᱮᱴᱟᱜ ᱚᱲᱟᱜ ᱢᱟᱭ ᱟᱯᱱᱟᱨ ᱜᱮᱭᱟ ᱟᱡ ᱾ ᱚᱱᱟ ᱞᱟᱹᱜᱤᱫ ᱜᱮᱛᱚ, ᱡᱟᱱᱟᱢ ᱚᱲᱟᱜ ᱫᱩᱣᱟᱹᱨ, ᱥᱟᱱᱟᱢ ᱥᱟᱹᱜᱟᱹᱭ ᱠᱷᱚᱱ ᱮ ᱥᱟᱦᱟᱜ ᱠᱟᱱᱟ ᱾
ᱤᱠᱷᱟᱹᱱ ᱡᱟᱶᱟᱭ ᱚᱲᱟᱜ ᱪᱮᱫ ᱮᱴᱟᱜ ᱦᱚᱯᱚᱱ ᱮᱨᱟᱭ ᱟᱯᱱᱟᱨ ᱦᱚᱫᱮᱭᱟ ??ᱵᱟᱝ !!! ᱡᱟᱱᱟᱢ ᱚᱲᱟᱜ ᱡᱟᱦᱟᱸ ᱞᱮᱠᱟᱭ ᱢᱮᱱ ᱞᱮᱫ-ᱟ, ᱟᱡᱟᱜ ᱫᱷᱟᱹᱨᱛᱤ ᱦᱟᱥᱟ ᱞᱮᱵᱮᱫ ᱦᱤᱞᱚᱜ ᱠᱷᱚᱱ “ᱟᱢ ᱫᱚ ᱵᱤᱴᱤ ᱮᱴᱟᱜ ᱫᱷᱚᱱ” ᱾ ᱴᱷᱤᱠ ᱚᱱᱠᱟ ᱜᱮ ᱢᱤᱫ ᱠᱩᱲᱤ ᱦᱚᱯᱚᱱ ᱡᱟᱶᱟᱭ ᱚᱲᱟᱜ ᱮ ᱞᱮᱵᱮᱫᱽ ᱦᱤᱞᱚᱜ ᱠᱷᱚᱱ ᱜᱮ ᱱᱚᱶᱟᱭ ᱪᱷᱟᱹᱴᱭᱟᱹᱨᱚᱜ-ᱟ, “ᱟᱢ ᱫᱚ ᱮᱴᱟᱜ ᱦᱚᱯᱚᱱ ᱮᱨᱟ” ᱾ ᱱᱚᱶᱟ ᱠᱟᱛᱷᱟ ᱢᱮᱱ ᱞᱟᱦᱟ ᱨᱮ ᱢᱮᱢᱮᱱ ᱦᱚᱲ ᱩᱭᱦᱟᱹᱨ ᱞᱟᱹᱠᱛᱤᱜ ᱠᱟᱱᱟ, “ᱮᱴᱟᱜ ᱦᱚᱯᱚᱱ ᱮᱨᱟ ᱜᱮ ᱢᱤᱫ ᱦᱚᱲᱤᱡ ᱮᱨᱟ ᱥᱮ ᱠᱤᱢᱤᱱ ᱫᱚᱭ ᱦᱩᱭᱩᱜ-ᱟ, ᱮᱴᱟᱜ ᱦᱚᱯᱚᱱ ᱮᱨᱟ ᱜᱮ ᱚᱲᱟᱜ ᱫᱚᱭ ᱥᱚᱵᱷᱟᱭᱟ ᱾ ᱩᱱᱤ ᱜᱮ ᱚᱲᱟᱜ ᱨᱤᱱᱤᱡ ᱞᱩᱠᱷᱤ ᱫᱚ ᱾ ᱩᱱᱤ ᱜᱮ ᱚᱲᱟᱜ ᱫᱚᱭ ᱡᱚᱜᱟᱣ ᱡᱚᱛᱚᱱᱟ ᱟᱨ ᱩᱱᱤ ᱜᱮ ᱚᱲᱟᱜ ᱫᱚᱭ ᱯᱮᱨᱮᱡᱟ ᱾ “ᱡᱟᱱᱟᱢ ᱚᱲᱟᱜ ᱠᱷᱚᱱ ᱦᱚᱯᱚᱱ ᱮᱨᱟᱭ ᱵᱤᱫᱟᱹᱭᱮᱱ ᱛᱟᱭᱚᱢ ᱡᱟᱶᱟᱭ ᱚᱲᱟᱜ ᱨᱮᱦᱚᱸ ᱵᱟᱹᱦᱩ ᱠᱩᱲᱤ ᱟᱯᱱᱟᱨ ᱫᱚ ᱵᱟᱭ ᱧᱟᱢ ᱦᱚᱫᱟ ᱾ ᱯᱩᱭᱞᱩ ᱡᱟᱱᱟᱢ ᱨᱮ ᱟᱡ ᱞᱟᱹᱜᱤᱫ ᱡᱟᱦᱟᱸ ᱞᱮᱠᱟ ᱫᱷᱟᱹᱨᱛᱤ ᱯᱩᱨᱤ ᱫᱚ ᱱᱟᱶᱟ ᱜᱮ, ᱟᱹᱱᱟᱹᱲᱤ ᱜᱮ ᱛᱟᱦᱮᱸ ᱠᱟᱱᱟ ᱾
ᱱᱚᱶᱟ ᱟᱡᱟᱜ ᱫᱚᱥᱟᱨ ᱡᱟᱱᱟᱢ ᱨᱮᱦᱚᱸ ᱟᱡᱟᱜ ᱡᱤᱭᱚᱱ ᱫᱚ ᱴᱷᱤᱠ ᱚᱱᱠᱟ ᱜᱮ, ᱫᱚᱥᱟᱨ ᱫᱷᱟᱹᱨᱛᱤ ᱯᱩᱨᱤ ᱨᱮ ᱥᱟᱱᱟᱢᱟᱜ ᱱᱟᱶᱟ ᱟᱨ ᱥᱟᱱᱟᱢᱟᱜ ᱟᱹᱱᱟᱹᱲᱤ ᱟᱹᱱᱟᱹᱲᱤ ᱾
ᱟᱹᱰᱤ ᱢᱩᱥᱠᱤᱞ ᱛᱮ, ᱟᱹᱰᱤ ᱵᱟᱨᱠᱮᱛ ᱛᱮ ᱵᱟᱹᱭ ᱵᱟᱹᱭ ᱛᱮ ᱥᱟᱱᱟᱢ ᱥᱟᱹᱜᱟᱹᱭ ᱥᱟᱶᱮ ᱩᱯᱨᱩᱢᱚᱜ-ᱟ ᱟᱨ ᱮ ᱟᱯᱱᱟᱨ ᱤᱫᱤᱭᱟ ᱾ ᱥᱮᱫᱟᱭ ᱠᱷᱚᱱ ᱠᱟᱛᱷᱟ ᱨᱮ ᱢᱮᱱᱟᱜ ᱞᱮᱠᱟ – ᱚᱠᱚᱭ ᱮ ᱢᱮᱱ ᱞᱮᱫ, ᱟᱞᱮᱭᱤᱡ ᱦᱚᱯᱚᱱ ᱮᱨᱟ ᱟᱜ ᱫᱚ ᱡᱟᱝ ᱦᱚᱸ ᱡᱟᱝ ᱟᱨ ᱛᱚᱨᱚᱡ ᱦᱚᱸ ᱛᱚᱨᱚᱡ ᱞᱮ ᱟᱹᱠᱷᱨᱤᱧ ᱟᱠᱟᱣᱟᱫ ᱯᱮᱭᱟ ᱾ ᱫᱩᱠ ᱨᱮ ᱢᱩᱦᱤᱢ ᱨᱮ, ᱨᱟᱹᱥᱠᱟᱹ ᱨᱮ ᱦᱩᱞᱟᱹᱥ ᱨᱮ ᱡᱟᱶᱟᱭ ᱚᱲᱟᱜ ᱜᱮ ᱟᱢᱟᱜ ᱚᱲᱟᱜ, ᱚᱸᱰᱮ ᱜᱮ ᱡᱤᱣᱤ ᱟᱨ ᱚᱸᱰᱮ ᱜᱮ ᱢᱟᱬᱟ ᱾ ᱱᱟᱯᱟᱭ ᱠᱟᱛᱷᱟ, ᱢᱤᱫ ᱠᱩᱲᱤ ᱦᱚᱯᱚᱱᱟᱜ ᱚᱞᱚᱝ ᱞᱤᱠᱷᱚᱱ ᱟᱨ ᱥᱟᱶᱛᱟ ᱨᱮᱱᱟᱜ ᱨᱟᱭᱨᱤᱛ ᱢᱟᱱᱟᱣ ᱵᱟᱛᱟᱣ ᱛᱮ ᱦᱩᱭᱩᱜ-ᱟ ᱾ ᱫᱷᱟᱹᱨᱛᱤ ᱯᱩᱨᱤ ᱨᱮ ᱠᱩᱲᱤ ᱟᱨ ᱠᱚᱲᱟ ᱢᱤᱫ ᱛᱮᱠᱚ ᱡᱟᱱᱟᱢ ᱮᱱᱟ, ᱤᱠᱷᱟᱹᱱ ᱜᱚᱴᱟᱯᱟᱲᱟ ᱠᱷᱚᱱ ᱮᱨᱮᱲ ᱨᱮᱱᱟᱜ, ᱮᱸᱰᱟᱜ
ᱜᱤᱰᱤ ᱨᱮᱱᱟᱜ ᱨᱟᱭᱨᱤᱛ ᱫᱚ ᱠᱩᱲᱤ ᱦᱚᱯᱚᱱ ᱞᱟᱹᱜᱤᱫ ᱜᱮ ᱚᱞ-ᱛᱚᱞ ᱮᱱᱟ ᱾ ᱤᱠᱷᱟᱹᱱ ᱡᱟᱦᱟᱸ ᱛᱤᱱᱟᱹᱜ ᱨᱮᱦᱚᱸ ᱢᱤᱫ ᱦᱚᱯᱚᱱ ᱮᱨᱟ, ᱵᱟᱝ ᱜᱮᱭ ᱮᱨᱮᱲ ᱜᱚᱫᱟ ᱡᱟᱱᱟᱢ ᱚᱲᱟᱜ ᱫᱩᱣᱟᱹᱨ ᱾ ᱟᱡᱟᱜ ᱦᱩᱫᱤᱥ, ᱟᱡᱟᱜ ᱟᱹᱭᱠᱟᱹᱣ ᱡᱟᱱᱟᱢ ᱚᱲᱟᱜ ᱥᱟᱶ ᱡᱩᱲᱟᱹᱭ ᱠᱚᱜ ᱜᱮᱭᱟ ᱾
ᱚᱱᱟᱛᱮ ᱨᱟᱦᱞᱟ ᱡᱟᱹᱯᱤᱫ ᱠᱷᱚᱱ ᱪᱚᱢᱠᱟᱣ ᱵᱮᱨᱮᱫ ᱨᱮᱱᱟᱜ ᱚᱡᱮ ᱫᱚ ᱱᱚᱶᱟ ᱜᱮ ᱠᱟᱱᱟ ᱾ ᱨᱟᱦᱞᱟ ᱠᱚ ᱡᱟᱶᱟᱭ ᱠᱮᱫᱮ ᱛᱟᱭᱚᱢ, ᱡᱟᱱᱟᱢ ᱚᱲᱟᱜ ᱨᱮ ᱡᱟᱱᱟᱢ ᱟᱭᱳ ᱵᱟᱵᱟ ᱦᱟᱥᱟ ᱨᱮᱠᱤᱱ ᱢᱤᱞᱟᱹᱣ ᱮᱱᱟ ᱾ ᱠᱩᱲᱤ ᱵᱚᱭᱦᱟ ᱥᱟᱱᱟᱢ ᱡᱟᱶᱟᱭ ᱚᱲᱟᱜ, ᱠᱚᱲᱟ ᱵᱚᱭᱦᱟ ᱪᱟᱹᱠᱨᱤ ᱫᱤᱥᱚᱢ ᱾ ᱡᱟᱦᱟᱸ ᱠᱷᱟᱹᱛᱤᱨ ᱨᱟᱦᱞᱟ ᱟᱜ ᱡᱟᱱᱟᱢ ᱵᱟᱹᱠᱷᱩᱞ ᱫᱚ ᱡᱚᱛᱚᱱ ᱵᱟᱝ ᱛᱮ ᱫᱷᱟᱹᱨᱛᱤ ᱨᱮ ᱢᱟᱹᱬᱤ ᱢᱮᱴᱟᱣ ᱮᱱᱟ ᱾
ᱨᱟᱦᱞᱟ ᱫᱤᱱᱟᱹᱢ ᱜᱮᱭ ᱠᱩᱠᱢᱩᱭᱟ, ᱡᱟᱦᱟᱸ ᱠᱷᱚᱱ ᱜᱮ ᱡᱟᱱᱟᱢ ᱚᱲᱟᱜ ᱮ ᱥᱮᱱᱚᱜ-ᱟ, ᱤᱠᱷᱟᱹᱱ ᱚᱲᱟᱜ ᱥᱮᱴᱮᱨ ᱠᱟᱛᱮᱭ ᱧᱮᱞᱟ, ᱡᱟᱱᱟᱢ ᱵᱟᱹᱠᱷᱩᱞ ᱢᱟ ᱵᱟᱹᱱᱩᱜ, ᱡᱟᱱᱟᱢ ᱟᱭᱳ ᱵᱟᱵᱟ ᱦᱚᱸ ᱵᱟᱹᱱᱩᱜ ᱠᱤᱱ ᱾ ᱛᱚᱵᱮ ᱚᱠᱟᱨᱮᱧ ᱥᱮᱴᱮᱨᱚᱜ-ᱟ, ᱚᱠᱟᱨᱮᱧ ᱵᱚᱞᱚᱱᱟ ᱾ ᱱᱚᱶᱟᱭ ᱩᱭᱦᱟᱹᱨ ᱞᱮᱠᱷᱟᱱ ᱜᱮ ᱨᱟᱦᱞᱟ ᱫᱚ ᱠᱩᱞᱦᱤ ᱢᱩᱪᱟᱹᱫ ᱦᱩᱭᱩᱜ ᱥᱮ, ᱚᱲᱟᱜ ᱪᱷᱟᱴᱠᱟ ᱦᱩᱭᱩᱜ ᱡᱟᱱᱟᱢ ᱵᱟᱹᱠᱷᱩᱞ ᱵᱟᱹᱱᱩᱜ ᱩᱭᱦᱟᱹᱨ ᱛᱮ ᱦᱩᱨᱤᱵᱤᱠᱚᱞ ᱮ ᱨᱟᱜᱟ ᱾ ᱟᱨ ᱫᱤᱱᱟᱹᱢ ᱜᱮ ᱡᱟᱹᱯᱤᱫ ᱠᱷᱚᱱᱮ ᱪᱚᱢᱠᱟᱣ ᱵᱮᱨᱮᱫ-ᱟ ᱢᱮᱫ ᱯᱮᱨᱮᱡ ᱢᱮᱫ ᱫᱟᱜ ᱥᱟᱶᱛᱮ ᱾
(ᱥᱮᱪᱮᱫ – ᱱᱚᱶᱟ ᱠᱟᱹᱦᱱᱤ ᱠᱷᱚᱱ ᱥᱮᱪᱮᱫ ᱫᱚ ᱪᱮᱫ? “ᱦᱚᱯᱚᱱ ᱮᱨᱟ, ᱢᱤᱥᱨᱟ ᱵᱚ ᱡᱟᱶᱟᱭ ᱠᱟᱠᱚ ᱠᱟᱱ ᱨᱮᱦᱚᱸ, ᱡᱟᱱᱟᱢ ᱵᱟᱹᱠᱷᱩᱞ ᱡᱚᱜᱟᱣ ᱡᱚᱛᱚᱱ ᱨᱮᱱᱟᱜ ᱟᱺᱜᱤᱵᱷᱟᱨ ᱫᱚ ᱦᱚᱯᱚᱱ ᱥᱮ ᱠᱚᱲᱟ ᱵᱚᱭᱦᱟ ᱟᱜ ᱠᱟᱱᱟ ᱾ ᱚᱱᱟ ᱞᱟᱹᱜᱤᱫ ᱜᱮᱛᱚ ᱟᱭᱳ ᱵᱟᱵᱟ ᱠᱤᱱ ᱟᱹᱴᱩᱯᱟᱹᱴᱩᱜ-ᱟ ᱛᱤᱱ ᱵᱷᱩᱨ ᱚᱲᱟᱜ ᱨᱮ ᱦᱚᱯᱚᱱ ᱵᱟᱭ ᱡᱟᱱᱟᱢ ᱟᱠᱟᱱᱟ ᱾ ᱵᱟᱵᱟ ᱵᱤᱫᱟᱹᱞ ᱵᱟᱵᱟ ᱛᱤᱸᱜᱩᱱ ᱞᱟᱹᱜᱤᱫ ᱾ ᱡᱟᱦᱟᱸ ᱛᱤᱥ ᱨᱮ ᱢᱤᱫ ᱜᱷᱟᱹᱲᱤᱠ ᱦᱚᱯᱚᱱ ᱮᱨᱟ ᱦᱤᱨᱤ ᱦᱤᱡᱩᱜ ᱥᱟᱱᱟ ᱮᱭᱟ ᱡᱟᱱᱟᱢ ᱚᱲᱟᱜ ᱨᱮ ᱵᱟᱨᱮᱭ ᱟᱛᱟᱝ ᱫᱟᱨᱟᱢ ᱮᱢᱟ, ᱢᱤᱫ ᱵᱮᱲᱟ ᱡᱚᱢ ᱟᱨ ᱛᱟᱦᱮᱸᱱ ᱞᱟᱹᱜᱤᱫ ᱴᱷᱟᱶ ᱮ ᱪᱟᱞ ᱟᱭ ᱢᱟ ᱾ ᱫᱩᱠ ᱨᱮ ᱢᱩᱦᱤᱢ ᱨᱮ ᱢᱮᱫ ᱫᱟᱜ ᱮ ᱡᱚᱫᱽ ᱛᱟᱭ ᱥᱟᱶᱛᱮ, ᱜᱚᱲᱚ ᱥᱚᱦᱚᱫ ᱞᱟᱹᱜᱤᱫ ᱛᱤᱭ ᱞᱟᱦᱟᱭ ᱛᱟᱭ ᱢᱟ ᱾ ᱚᱱᱟ ᱚᱲᱟᱜ ᱨᱮ ᱦᱚᱯᱚᱱ ᱮᱨᱟ ᱟᱜ ᱦᱚᱸ ᱩᱱᱟᱹᱝ ᱜᱮ ᱦᱚᱠ, ᱡᱟᱦᱟᱸ ᱛᱤᱱᱟᱹᱝ ᱦᱚᱯᱚᱱᱟᱜ ᱾ ᱢᱤᱫ ᱵᱮᱲᱟ ᱦᱤᱡᱩᱜ ᱥᱮᱱᱚᱜ ᱨᱮᱱᱟᱜ ᱫᱟᱣᱮ ᱧᱟᱢ ᱢᱟ ᱚᱱᱟ ᱠᱷᱟᱹᱛᱤᱨ ᱜᱮ ᱚᱛ ᱦᱟᱥᱟ ᱨᱮᱱᱟᱜ ᱦᱚᱠ ᱫᱚ ᱟᱡ ᱵᱟᱭ ᱠᱷᱚᱡᱚᱜ-ᱟ ᱾)
***
