ᱟᱵᱚᱣᱟᱜ ᱡᱟᱱᱟᱢ ᱯᱟᱹᱨᱥᱤ ᱨᱚᱲ ᱨᱟᱦᱟ
ᱥᱟᱨᱚ ᱢᱤᱨᱩ ᱟᱲᱟᱝ ᱞᱮᱠᱟ ᱡᱩᱫᱟᱹᱦᱟ ᱾
ᱪᱤᱱᱤ ᱜᱩᱲ ᱠᱷᱚᱱ ᱦᱚᱸ ᱥᱤᱵᱤᱞ ᱦᱮᱲᱮᱢ
ᱡᱟᱹᱛᱤ ᱵᱤᱨᱟᱹᱫᱟᱹᱞᱤ ᱛᱟᱵᱚᱭ ᱩᱯᱩᱨᱩᱢ ᱾
ᱪᱚᱜ ᱪᱮᱨᱮᱡ ᱟᱹᱰᱤ ᱜᱚᱨᱚᱡᱽ ᱫᱩᱞᱟᱹᱲ
ᱟᱭᱳᱭ ᱪᱮᱪᱮᱫ ᱡᱟᱱᱟᱢ ᱟᱲᱟᱝ ᱨᱚᱲ ᱾
ᱚᱢᱵᱟᱜ ᱤᱠᱲᱩᱢ ᱠᱟᱰᱟ ᱪᱟᱪᱚ ᱫᱟᱹᱲ ᱵᱟᱲᱟ
ᱯᱩᱭᱞᱩ ᱟᱹᱲᱟᱹ ᱵᱚ ᱢᱮᱱ ᱜᱟᱲᱢᱟᱹᱫ ᱛᱚᱛᱲᱟ ᱾
ᱛᱚᱯᱟᱜ ᱛᱚᱯᱟᱜ ᱫᱤᱡ ᱦᱤᱫᱤᱡᱚᱜ ᱠᱟᱛᱷᱟ
ᱦᱟᱨᱟᱵᱩᱨᱜ ᱥᱟᱶᱛᱮ ᱨᱚᱲ ᱱᱤᱥᱴᱟᱹ ᱯᱩᱥᱴᱷᱟᱹᱣᱼᱟ ᱾
ᱥᱮᱛᱮᱧ ᱞᱤᱸᱜᱤᱜ ᱡᱷᱟᱨᱱᱟ ᱫᱟᱜ ᱞᱮᱠᱟ
ᱢᱚᱱᱮ ᱠᱟᱛᱷᱟ ᱟᱫᱚ ᱵᱚ ᱯᱷᱚᱴᱮᱞ ᱥᱚᱫᱚᱨᱟ ᱾
ᱵᱟᱝ ᱪᱤᱱᱦᱟᱹᱯ ᱩᱨᱩᱢ ᱦᱚᱲ ᱠᱟᱱ ᱨᱮᱦᱚᱸᱭ
ᱥᱟᱱᱛᱟᱲ ᱛᱮ ᱨᱚᱲ ᱠᱷᱟᱱ ᱟᱯᱱᱟᱨ ᱜᱚᱫᱚᱜᱼᱟᱭ ᱾
ᱱᱟᱦᱟᱸᱜ ᱱᱮᱛᱟᱨ ᱠᱚ ᱠᱩᱲᱤ ᱠᱚᱲᱟ
ᱦᱤᱱᱫᱤ, ᱤᱸᱝᱞᱤᱥ, ᱩᱰᱤᱭᱟᱹ ᱵᱟᱝᱞᱟ ᱛᱮᱠᱚ ᱨᱚᱲᱟ ᱾
ᱥᱟᱱᱛᱟᱹᱲᱤ ᱛᱮᱢ ᱠᱩᱞᱤ ᱵᱟᱲᱟ ᱠᱚᱠᱷᱟᱱ
ᱱᱩᱭ ᱫᱚᱭ ᱜᱟᱺᱶᱞᱤ ᱜᱮᱭᱟ ᱠᱚ ᱢᱮᱢᱮᱱ ᱾
ᱡᱟᱱᱟᱢ ᱯᱟᱹᱨᱥᱤ ᱟᱭᱳ ᱟᱲᱟᱝ ᱜᱮᱛᱚ
ᱡᱟᱹᱛᱤ ᱥᱟᱶᱛᱟ ᱦᱟᱜ ᱨᱮᱦᱮᱫ ᱫᱟᱲᱮ ᱫᱚ ᱾
ᱡᱟᱱᱟᱢ ᱯᱟᱹᱨᱥᱤ ᱜᱮᱛᱚᱭ ᱡᱩᱢᱤᱫᱽ ᱠᱟᱵᱚᱱ
ᱫᱤᱥᱚᱢ ᱫᱩᱱᱤᱭᱟᱹ ᱡᱟᱦᱟᱸ ᱨᱮᱜᱮ ᱵᱚ ᱛᱟᱦᱮᱸᱱ ᱾
ᱵᱟᱝᱠᱷᱟᱱ ᱟᱯᱟᱫ ᱠᱚᱜ ᱟᱵᱚ ᱛᱤᱥᱨᱮ
ᱥᱟᱱᱟᱜᱷᱟᱴᱟ ᱵᱟᱨᱚ ᱡᱟᱹᱛᱤ ᱦᱚᱲ ᱵᱷᱤᱲᱨᱮ ᱾
ᱯᱟᱹᱨᱥᱤ ᱵᱟᱜᱟᱱ ᱠᱷᱚᱱ ᱛᱩᱢᱟᱹᱞ ᱚᱞ ᱟᱹᱲᱟᱹᱛᱮ
ᱜᱟᱵᱟᱱᱚᱜ ᱠᱩᱫᱩᱢ, ᱠᱟᱹᱦᱱᱤ, ᱜᱟᱢᱟᱢ, ᱚᱱᱚᱬᱦᱮ ᱾
ᱥᱟᱶᱦᱮᱫ ᱯᱟᱹᱨᱥᱤᱭᱟᱜ ᱡᱷᱟᱠ ᱡᱷᱟᱠ ᱨᱩᱯ ᱥᱚᱵᱷᱟ
ᱥᱟᱶᱛᱟ ᱦᱟᱜ ᱢᱩᱴᱷᱟᱹᱱᱮ ᱡᱷᱟᱞᱠᱟᱣ ᱥᱚᱫᱚᱨᱟ ᱾
ᱡᱟᱱᱟᱢ ᱟᱲᱟᱝ ᱵᱟᱝ ᱵᱚ ᱫᱩᱞᱟᱹᱲ ᱠᱷᱟᱱ
ᱡᱟᱹᱛᱤ ᱥᱟᱶᱛᱟ ᱞᱟᱦᱟᱱᱛᱤ ᱫᱚ ᱚᱦᱚᱣᱟᱱ ᱾
ᱟᱭᱳ ᱟᱲᱟᱝ ᱛᱮ ᱚᱞ ᱨᱚᱲ ᱯᱚᱲᱦᱚᱱ ᱵᱚ ᱥᱮᱬᱟᱭᱟ
ᱮᱱ ᱫᱚ ᱡᱮᱜᱮᱛᱨᱮ ᱡᱟᱱᱟᱢ ᱯᱟᱹᱨᱥᱤ ᱡᱤᱭᱟᱹᱲᱚᱜᱼᱟ ᱾
***
