ᱡᱤᱭᱚᱱ ᱨᱮᱱᱟᱜ ᱰᱟᱦᱟᱨ ᱫᱳ ᱡᱮᱞᱮᱧ ᱜᱮ,
ᱮᱱ ᱦᱚᱸ ᱟᱵᱚ ᱞᱟᱦᱟᱜ ᱦᱩᱭᱩᱜ ᱛᱟᱵᱚᱱ ᱜᱮ ᱾
ᱢᱤᱫ ᱢᱤᱫ ᱛᱮ ᱯᱟᱹᱣᱲᱤ ᱞᱟᱦᱟᱭ ᱦᱩᱭᱩᱜ,
ᱛᱚᱦᱚᱫ ᱦᱟᱲᱟᱜ ᱥᱟᱱᱟᱢᱟᱜ ᱜᱮ ᱧᱟᱢᱚᱜ ᱾
ᱚᱠᱟ ᱨᱮᱫᱳ ᱠᱩᱪᱤᱛ ᱜᱮ ᱰᱟᱦᱟᱨ,
ᱚᱠᱟ ᱴᱷᱮᱱ ᱫᱳ ᱧᱟᱢᱚᱜᱼᱟ ᱟᱦᱟᱨ ᱾
ᱚᱠᱟ ᱨᱮᱫᱳ ᱩᱥᱩᱞ ᱫᱟᱬᱟᱝ,
ᱟᱨ ᱦᱚᱸ ᱚᱠᱟ ᱨᱮᱫᱳ ᱠᱷᱟᱨᱟᱝ ᱾
ᱟᱬᱜᱳ ᱨᱟᱠᱟᱵ ᱛᱟᱸᱦᱮᱱ ᱜᱮ ᱰᱟᱦᱟᱨ,
ᱚᱠᱟ ᱨᱮᱫᱳ ᱛᱟᱸᱦᱮᱱ ᱵᱤᱨ ᱜᱟᱡᱟᱲ ᱾
ᱚᱠᱟ ᱨᱮᱫᱳ ᱡᱟᱹᱱᱩᱢ ᱛᱮ ᱜᱳᱴᱟ,
ᱦᱚᱨᱮ ᱨᱟᱢᱯᱷᱟ ᱮᱥᱮᱫ ᱠᱟᱜᱼᱟ ᱾
ᱵᱤᱧ ᱠᱤᱫᱤᱧ ᱥᱟᱱᱟᱢ ᱠᱚᱜᱮ,
ᱛᱟᱲᱟᱢ ᱰᱟᱦᱟᱨ ᱠᱚ ᱡᱟᱸᱜᱮ ᱫᱟᱨᱟᱢ ᱜᱮ ᱾
ᱥᱟᱱᱟᱢᱟᱜ ᱜᱮ ᱮᱲᱟᱣ ᱠᱟᱛᱮᱜ,
ᱢᱟᱲᱟᱝ ᱚᱜ ᱜᱮ ᱦᱩᱭᱩᱜ ᱾
ᱞᱮᱸᱡᱮᱫ ᱞᱚᱥᱚᱫ ᱦᱚᱨ ᱰᱟᱦᱟᱨ ᱨᱮ,
ᱛᱟᱸᱦᱮᱱ ᱠᱷᱮᱛ ᱟᱬᱮ ᱨᱮ ᱾
ᱧᱩᱨ ᱞᱮᱱᱠᱷᱟᱱ ᱵᱮᱨᱮᱫ ᱠᱟᱛᱮᱫ,
ᱛᱟᱲᱟᱢ ᱦᱩᱭᱩᱜ ᱢᱟᱲᱟᱝ ᱥᱮᱫ ᱾
ᱥᱟᱱᱟᱢᱟᱜ ᱨᱟᱪᱟᱜ ᱛᱚᱯᱟᱜ ᱠᱟᱛᱮᱫ,
ᱢᱚᱦᱰᱟ ᱦᱩᱭᱩᱜ ᱟᱯᱱᱟᱨ ᱰᱟᱦᱟᱨ ᱥᱮᱫ ᱾
ᱛᱟᱲᱟᱢ ᱰᱟᱦᱟᱨ ᱨᱮ ᱡᱟᱸᱜᱮ ᱫᱟᱨᱟᱢ,
ᱛᱟᱸᱦᱮᱱ ᱜᱮ ᱱᱚᱶᱟ ᱠᱚ ᱥᱟᱱᱟᱢ ᱾
ᱢᱚᱱᱨᱮ ᱵᱮᱡᱟᱨ ᱟᱹᱲᱤᱥ ᱥᱟᱱᱟᱢ,
ᱥᱟᱱᱟᱢ ᱟᱜ ᱜᱮ ᱥᱟᱦᱟ ᱠᱟᱛᱟᱢ ᱾
ᱥᱟᱱᱟᱢ ᱦᱟᱨᱠᱮᱛ ᱥᱟᱦᱟ ᱠᱟᱛᱮ ᱜᱮ,
ᱛᱟᱲᱟᱢ ᱰᱟᱦᱟᱨ ᱫᱚᱢ ᱢᱩᱪᱟᱹᱫᱽ ᱜᱮ ᱾
***
