ᱚᱞ ᱪᱤᱠᱤ ᱫᱚ ᱪᱮᱫ ᱠᱟᱱᱟ ?
ᱟᱹᱫᱤᱢ ᱠᱚᱣᱟᱜ ᱢᱮᱫ ᱠᱟᱱᱟ ᱾
ᱢᱟᱨᱥᱟᱞ ᱦᱚᱨ ᱰᱟᱦᱟᱨ ᱮ ᱟᱹᱭᱩᱨ ᱵᱚᱱᱟ ᱾
ᱚᱞ ᱪᱤᱠᱤ ᱫᱚ ᱪᱮᱫ ᱠᱟᱱᱟ ?
ᱟᱹᱫᱤᱢ ᱠᱚᱣᱟᱜ ᱩᱯᱨᱩᱢ ᱠᱟᱱᱟ
ᱚᱱᱟ ᱫᱟᱲᱮ ᱛᱮᱭ ᱩᱫᱩᱜ ᱥᱚᱫᱚᱨ ᱢᱮᱭᱟ
ᱟᱢ ᱫᱚᱢ ᱚᱠᱟ ᱡᱟᱹᱛᱤ ᱠᱟᱱᱟ ᱾
ᱡᱟᱦᱟᱸ ᱡᱟᱹᱛᱤ ᱚᱞ ᱪᱤᱠᱤ ᱢᱮᱱᱟᱜ
ᱩᱱᱤ ᱡᱟᱹᱛᱤ ᱡᱩᱞᱩᱜ
ᱡᱟᱦᱟᱸ ᱡᱟᱹᱛᱤ ᱚᱞ ᱪᱤᱠᱤ ᱵᱟᱹᱱᱩᱜ
ᱩᱱᱤ ᱡᱟᱹᱛᱤ ᱟᱫᱚᱜ ᱾
ᱡᱩᱫᱟᱹ ᱡᱩᱫᱟᱹ ᱨᱚᱲ ᱨᱮ
ᱡᱩᱫᱟᱹ ᱟᱲᱟᱝ ᱟᱹᱱᱩᱡ ᱜᱮ ᱚᱞ ᱪᱤᱠᱤ ᱢᱮᱱᱟᱜ ᱾
ᱟᱵᱚ ᱟᱜ ᱦᱚᱸ ᱟᱲᱟᱝ ᱟᱹᱱᱩᱡ ᱜᱮ
ᱚᱞ ᱪᱤᱠᱤ ᱫᱚ ᱢᱮᱱᱟᱜ ᱾
ᱡᱚᱛᱚ ᱪᱤᱠᱤ ᱞᱤᱯᱤ ᱜᱮ ᱥᱚᱨᱮᱥᱟ
ᱡᱟᱱᱟᱢ ᱚᱞ ᱪᱤᱠᱤ ᱫᱚ ᱟᱹᱰᱤ ᱜᱮ ᱥᱚᱨᱮᱥᱟ ᱾
ᱡᱚᱛᱚ ᱪᱤᱠᱤ ᱞᱤᱯᱤ ᱜᱮ ᱫᱩᱞᱟᱹᱲ ᱟᱜ ᱢᱮ ᱾
ᱡᱟᱱᱟᱢ ᱚᱞ ᱪᱤᱠᱤ ᱫᱩᱞᱟᱹᱲ ᱫᱚ ᱟᱞᱚᱢ ᱦᱤᱲᱤᱧᱟ ᱾
ᱪᱤᱠᱤ ᱞᱤᱯᱤ ᱢᱟ ᱚᱞ ᱠᱚᱨᱮᱭᱟᱜ
ᱜᱟᱨ ᱪᱤᱠᱷᱱᱟᱹ ᱠᱟᱱᱟ
ᱚᱱᱟ ᱫᱚᱲ ᱛᱮ ᱚᱞ ᱮ ᱜᱟᱨ ᱥᱮᱬᱟᱭᱟ ᱾
ᱚᱞ ᱪᱤᱠᱤ ᱢᱟ ᱨᱚᱲ ᱠᱚᱨᱮ ᱠᱷᱚᱱ ᱦᱮᱡ ᱟᱠᱟᱱ
ᱚᱠᱟ ᱡᱟᱭ ᱪᱤᱛᱟᱹᱨ ᱧᱩᱛᱩᱢ ᱠᱚᱨᱮ ᱠᱷᱚᱱ
ᱚᱱᱟ ᱚᱲᱚᱝ ᱚᱞ ᱪᱤᱠᱤ ᱦᱩᱭ ᱟᱠᱟᱱᱟ ᱾
ᱚᱞ ᱫᱟᱲᱮ ᱛᱮ
ᱢᱚᱱ ᱵᱷᱤᱛᱤᱨ ᱨᱮᱭᱟᱜ ᱟᱭᱠᱟ
ᱡᱤᱣᱤ ᱦᱚᱲᱢᱚ ᱨᱮᱭᱟᱜ ᱛᱟᱨᱠᱚ
ᱢᱚᱱᱮ ᱢᱚᱱᱮ ᱛᱮ ᱵᱚ ᱚᱞ ᱟᱬᱜᱚᱭ ᱾
ᱯᱚᱛᱚᱵ ᱯᱩᱛᱷᱤ ᱨᱮᱵᱚ ᱪᱷᱟᱯᱟᱭ
ᱱᱚᱱᱚᱞ ᱥᱩᱸᱜᱟᱹ ᱛᱮᱵᱚ ᱠᱷᱚᱫᱟᱭ
ᱡᱩᱜᱮ ᱡᱩᱜᱮ ᱛᱟᱦᱮᱸᱱ ᱱᱚᱱᱚᱞ ᱠᱷᱚᱫᱟ ᱾
ᱚᱞ ᱜᱩᱨᱩ ᱚᱞ ᱮ ᱚᱯᱮᱞ ᱞᱮᱫ
ᱚᱱᱟᱛᱮ ᱯᱚᱛᱚᱵ ᱯᱩᱛᱷᱤ ᱨᱮ
ᱪᱷᱟᱯᱟ ᱫᱚᱦᱚ ᱞᱮᱫ
ᱱᱤᱛ ᱯᱤᱲᱦᱤ ᱪᱮᱛᱟᱱ ᱯᱤᱲᱦᱤ
ᱜᱟᱬᱟ ᱪᱮᱛᱟᱱ ᱜᱟᱬᱟ ᱠᱚ ᱯᱟᱲᱦᱟᱣ ᱮᱫ ᱾
ᱡᱟᱱᱟᱢ ᱟᱲᱟᱝ ᱛᱮᱜᱮ ᱚᱞ ᱟᱬᱜᱚ
ᱚᱱᱟ ᱯᱟᱹᱨᱥᱤ ᱛᱮᱜᱮ ᱚᱞ ᱯᱩᱥᱴᱟᱹᱣ
ᱚᱱᱟ ᱛᱮᱜᱮ ᱟᱯᱟᱱ ᱟᱹᱯᱤᱱ
ᱯᱟᱹᱨᱥᱤ ᱫᱚᱵᱚ ᱠᱷᱚᱡᱚᱜ ᱾
ᱢᱮᱱᱟᱜ ᱛᱟᱢᱟ ᱚᱞ ᱪᱤᱠᱤ
ᱚᱞ ᱫᱚ ᱟᱞᱚᱢ ᱦᱤᱲᱤᱧ ᱾
ᱚᱞ ᱫᱚ ᱵᱟᱨᱟᱦᱤ ᱠᱟᱱᱟ
ᱟᱵᱚᱭ ᱛᱚᱞ ᱫᱚᱦᱚ ᱵᱚᱱᱟ ᱾
ᱚᱞ ᱛᱮ ᱠᱟᱛᱷᱟ ᱛᱚᱞᱚᱜ
ᱯᱟᱲᱦᱟᱣ ᱛᱮ ᱟᱵᱚ ᱵᱚ ᱛᱚᱞᱚᱜ ᱾
***
