ᱞᱚᱠᱟ ᱞᱚᱠᱟ ᱛᱮ ᱠᱚᱞᱮ ᱦᱟᱨᱟ ᱠᱮᱫ ᱢᱮ ᱾
ᱦᱮᱢᱮ ᱦᱮᱢᱮ ᱛᱮ ᱛᱤᱸᱜᱩ ᱠᱮᱴᱮᱡ ᱥᱮᱸᱲᱟ ᱠᱮᱫ ᱢᱮ ᱾
ᱫᱩᱞᱟ.ᱲ ᱛᱷᱩᱢᱟ.ᱱ ᱛᱮ ᱜᱩᱸᱜᱩᱫ ᱠᱮᱫ ᱢᱮ ᱾
ᱟᱭᱳ ᱟᱧᱪᱟᱨ ᱛᱮ ᱩᱢᱩᱞ ᱠᱮᱫ ᱢᱮ ᱿
ᱟᱡᱟᱜ ᱠᱩᱥᱤ ᱩᱭᱦᱟ.ᱨ, ᱟᱡᱟᱜ ᱨᱟ.ᱥᱠᱟ. ᱵᱷᱟᱵᱽᱱᱟ ᱾
ᱟᱢ ᱞᱟ.ᱜᱤᱫ ᱜᱮ ᱥᱟᱢᱴᱟᱣ ᱠᱮᱫᱟᱭ ᱾
ᱟᱡᱟᱜ ᱨᱮᱸᱜᱮᱡ ᱛᱮᱛᱟᱝ, ᱟᱡᱟᱜ ᱠᱷᱟ.ᱴᱱᱤ ᱵᱤᱯᱚᱫᱽ ᱾
ᱟᱢ ᱞᱟ.ᱜᱤᱫ ᱜᱮ ᱟᱨᱡᱟᱣ ᱠᱮᱫᱟᱭ ᱿
ᱦᱚᱨᱚᱜ ᱞᱩᱜᱽᱲᱤ ᱛᱟᱭ ᱵᱟ.ᱱᱩᱜ,
ᱵᱟᱫᱮᱱ ᱥᱟ.ᱲᱤ ᱛᱟᱭ ᱵᱟ.ᱱᱩᱜ ᱾
ᱫᱟᱯᱟᱞ ᱠᱮᱫᱟᱭ ᱟᱡᱟᱜ ᱦᱚᱲᱢᱚ ᱜᱟᱢᱪᱷᱟ ᱛᱮ ᱾
ᱮᱱ ᱨᱮᱦᱚᱸ ᱱᱟᱶᱟ ᱫᱚᱛᱚ, ᱱᱟᱶᱟ ᱞᱩᱜᱽᱲᱤ,
ᱨᱟ.ᱥᱠᱟ. ᱛᱮ ᱟᱢ ᱜᱮ ᱮᱢᱟᱫ ᱢᱮ ᱿
ᱫᱩᱠᱷ ᱮ ᱥᱟᱦᱟᱣ ᱠᱮᱫᱟᱭ, ᱦᱟᱨᱠᱮᱛ ᱮ ᱧᱟᱢ ᱠᱮᱫᱟᱭ ᱾
ᱡᱚᱛᱚ ᱡᱚᱴᱟᱣ ᱟᱛᱮ, ᱡᱚᱛᱚ ᱥᱟᱦᱟᱣ ᱟᱛᱮ ᱾
ᱟᱢ ᱞᱟ.ᱜᱤᱫ ᱜᱮ ᱜᱚᱴᱟᱭ ᱛᱤᱸᱜᱩ ᱮᱱᱟᱭ ᱾
ᱟᱢ ᱞᱟ.ᱜᱤᱫ ᱜᱮ ᱜᱚᱴᱟᱭ ᱞᱟᱦᱟᱭ ᱮᱱᱟᱭ ᱿
ᱟᱭᱳ ᱫᱩᱞᱟ.ᱲ ᱫᱚ ᱪᱚᱴ ᱪᱟᱸᱫᱚ
ᱠᱷᱚᱱ ᱦᱚᱸ ᱟ.ᱰᱤ ᱢᱟᱨᱟᱝ ᱜᱮ ᱾
ᱥᱤᱧ ᱪᱟᱸᱫᱚ ᱠᱷᱚᱱ ᱦᱚᱸ ᱟ.ᱰᱤ ᱢᱟᱨᱥᱟᱞ ᱜᱮ ᱾
ᱜᱟᱰᱟ ᱫᱚᱨᱭᱟ ᱠᱷᱚᱱ ᱦᱚᱸ
ᱟ.ᱰᱤ ᱜᱟ.ᱦᱤᱨ ᱜᱮ, ᱟ.ᱰᱤ ᱫᱟᱨᱦᱟ ᱜᱮ ᱿
ᱟᱭᱳ ᱫᱩᱞᱟ.ᱲ ᱫᱚ ᱟᱞᱚ ᱵᱚᱱ ᱦᱟ.ᱴᱤᱧ ᱢᱟ ᱾
ᱟᱭᱳ ᱫᱩᱞᱟ.ᱲ ᱫᱚ ᱟᱞᱚ ᱵᱚᱱ ᱦᱤᱲᱤᱧ ᱢᱟ ᱾
ᱡᱚᱜᱟᱣ ᱡᱚᱛᱚᱱ ᱵᱚᱱ ᱫᱚᱦᱚᱭ ᱢᱟ ᱟᱭᱳ ᱫᱩᱞᱟ.ᱲ ᱾
ᱥᱟ.ᱜᱩᱱ ᱥᱟᱨᱦᱟᱣ ᱵᱚᱱ ᱫᱚᱦᱚᱭ ᱢᱟ ᱟᱭᱳ ᱫᱩᱞᱟ.ᱲ ᱿
ᱟᱭᱳ ᱫᱩᱞᱟ.ᱲ ᱜᱮ ᱫᱩᱞᱟ.ᱲ ᱟᱭᱳ ᱠᱟᱱᱟᱭ ᱾
ᱟᱭᱳ ᱫᱩᱞᱟ.ᱲ ᱜᱮ ᱡᱟᱱᱟᱢ ᱟᱭᱳ ᱠᱟᱱᱟᱭ ᱾
ᱟᱭᱳ ᱫᱩᱞᱟ.ᱲ ᱜᱮ ᱥᱟ.ᱨᱤ ᱟᱭᱳ ᱠᱟᱱᱟᱭ ᱿
ᱟᱰᱤ ᱥᱚᱨᱮᱥ, ᱟ.ᱰᱤ ᱥᱤᱵᱤᱞ,
ᱟ.ᱰᱤ ᱨᱚᱢᱚᱡᱽ, ᱟ.ᱰᱤ ᱱᱟᱯᱟᱭ
ᱫᱩᱞᱟ.ᱲ ᱟᱭᱳ ᱫᱚ, ᱡᱟᱱᱟᱢ ᱟᱭᱳ ᱫᱚ ᱿
ᱟᱡᱟᱜ ᱡᱟᱸᱜᱟ ᱯᱚᱨᱟᱭᱱᱤ ᱨᱮ
ᱚᱛ ᱡᱟᱯᱟᱜ ᱥᱟᱭ ᱥᱟᱭ ᱢᱟᱱᱚᱛ ᱜᱚᱰ ᱡᱚᱦᱟᱨ ᱿
***
