ᱵᱟᱝ ᱧᱩᱛᱩᱢ ᱧᱟᱢᱚᱜᱚᱜ
ᱞᱮᱠᱟᱱ ᱞᱟᱞᱚᱪ ᱟᱡᱟᱨ ᱠᱚᱛᱮ
ᱵᱟᱝ ᱞᱟᱹᱭ ᱫᱟᱲᱮᱭᱟᱜ
ᱞᱮᱠᱟᱱ ᱥᱟᱱᱟ ᱵᱮᱢᱟᱨ ᱠᱚᱛᱮ
ᱨᱮᱸᱜᱮᱡ ᱛᱮᱛᱟᱝ ᱡᱟᱞᱟ ᱫᱚ ᱟᱹᱠᱩᱞ ᱵᱤᱠᱚᱞ
ᱡᱤᱱᱛᱤ ᱯᱤᱯᱤᱲᱤ ᱢᱟᱱᱣᱟ ᱡᱟᱱᱣᱟ ᱡᱚᱛᱚ ᱜᱮ ᱟᱠᱟᱞ ᱥᱟᱠᱟᱞ ᱾
ᱨᱚᱦᱚᱲ ᱦᱟᱹᱠᱩ ᱥᱤᱬᱤᱡ ᱪᱟᱴᱟ ᱯᱟᱴᱟ ᱨᱮ
ᱟᱠᱟ ᱟᱠᱟᱱ ᱪᱟᱹᱲᱤ ᱟᱱᱟᱠ ᱡᱤᱞ ᱯᱚᱴᱚᱢ ᱨᱮ
ᱰᱷᱩᱞᱟᱹ ᱨᱮᱰᱮᱫ ᱥᱟᱨᱶᱜᱟ ᱥᱮᱭᱟ ᱛᱟᱹᱦᱩᱸ ᱜᱚᱨᱚᱡᱽ
ᱪᱩᱞᱦᱟᱹ ᱨᱚᱸᱜᱚ ᱪᱟᱹᱬᱠᱟᱹ ᱦᱟᱹᱠᱩ ᱢᱚᱜᱚᱫ ᱥᱚ ᱛᱚᱨᱚᱡ
ᱦᱮᱸᱫᱮ ᱯᱩᱥᱤ ᱥᱤᱸᱜᱟᱹᱲ ᱩᱢᱫᱷᱤ ᱱᱚᱶᱟᱭ ᱩᱨᱩᱢ
ᱡᱟᱹᱯᱤᱫ ᱥᱟᱲᱟ ᱥᱟᱹᱛᱤᱧ ᱟᱫᱚ ᱵᱟᱝ ᱮ ᱵᱩᱨᱩᱢ
ᱟᱹᱪᱷᱤᱢ ᱮᱵᱷᱮᱱ ᱮᱱᱟᱭ ᱵᱟᱥᱱᱟ ᱞᱚᱵᱽ ᱛᱮ
ᱥᱮᱸᱫᱽᱨᱟ ᱠᱟᱨᱠᱟ ᱡᱚᱝᱟᱭ ᱱᱤᱛ ᱫᱚ ᱯᱟᱡᱷᱟᱲ ᱨᱩᱯ ᱛᱮ ᱾
ᱚᱠᱟᱭ ᱛᱟᱬᱟᱜ ᱜᱟᱸᱰᱮ ᱥᱟᱸᱰᱮ
ᱠᱩᱰᱟᱹᱢ ᱥᱟᱛᱮ ᱟᱨᱦᱚᱸ ᱦᱟᱸᱰᱮ ᱱᱷᱟᱰᱮ
ᱩᱭᱩᱝ ᱪᱩᱸᱰᱩᱜ ᱱᱤᱥᱚᱛ ᱧᱩᱛᱟᱹᱛ
ᱥᱟᱹᱲᱤᱢ ᱥᱟᱛᱮ ᱜᱚᱴᱟ ᱨᱚᱲᱟ ᱚᱛᱮᱛ ᱾
ᱛᱮᱦᱮᱧ ᱜᱟᱯᱟ ᱯᱟᱞᱮᱱ ᱚᱠᱟ ᱞᱮᱠᱟ
ᱯᱟᱨᱚᱢ ᱥᱮᱱᱚᱜ ᱥᱤᱸᱜᱟᱹᱲ ᱦᱚᱞᱟ ᱞᱮᱠᱟ
ᱵᱟᱝ ᱮ ᱧᱟᱢᱮᱫ ᱨᱟᱜᱮ ᱢᱤᱭᱩᱝ ᱢᱤᱭᱩᱝ
ᱡᱤᱞ ᱠᱩᱴᱤ ᱦᱟᱹᱠᱩ ᱦᱟᱵᱚᱲ ᱨᱟᱜᱮ ᱢᱮᱭᱟᱝ ᱢᱮᱭᱟᱝ ᱾
ᱪᱮᱨᱚ ᱵᱮᱨᱚ ᱪᱷᱮᱨᱟ ᱠᱤᱥᱱᱤ ᱢᱟᱫ ᱡᱷᱟᱲ ᱨᱮ
ᱪᱩᱨ ᱪᱩᱨ ᱡᱷᱟᱹᱱᱴᱤ ᱠᱚᱠᱚᱨ ᱠᱚᱪᱟ ᱠᱚᱬ ᱨᱮ
ᱛᱟᱞᱟ ᱧᱤᱫᱟᱹ ᱜᱷᱩᱜᱽᱨᱤ ᱨᱟᱜ ᱛᱮ ᱟᱸᱫᱚᱲ
ᱜᱟᱛᱮ ᱯᱟᱱᱛᱮ ᱯᱟᱱᱛᱮ ᱥᱤᱸᱜᱟᱹᱲᱮ ᱵᱷᱟᱸᱜᱚᱲ
ᱨᱟᱸᱜᱟᱣᱮᱱ ᱛᱮ ᱜᱟᱨᱡᱟᱣᱮᱱ ᱱᱟᱡᱚᱢ ᱯᱟᱭᱚ ᱢᱟᱱᱛᱟᱨ
ᱫᱩᱨᱩᱥ ᱟᱱᱛᱮᱭ ᱠᱚᱭᱚᱜᱽ ᱥᱟᱱᱟᱢ ᱠᱚ ᱛᱷᱤᱨ ᱛᱷᱟᱨ ᱾
ᱠᱮᱴᱟᱵ ᱠᱮᱴᱮᱵ ᱦᱳᱲᱳ ᱦᱟᱰᱟᱵ ᱥᱟᱰᱮ ᱟᱛᱮᱱ ᱠᱮᱫᱼᱟ
ᱥᱟᱹᱨᱤ ᱠᱟᱛᱷᱟ ᱢᱮᱱᱛᱮ ᱪᱮᱨᱪᱮᱴᱮᱡ ᱮ ᱯᱷᱚᱴᱮᱞ ᱠᱮᱫᱼᱟ
ᱫᱩᱱᱥᱤ ᱯᱩᱱᱥᱤ ᱯᱩᱥᱤ ᱰᱷᱩᱞᱟᱹ ᱡᱷᱩᱞᱟᱹ ᱨᱮᱱᱟᱝ
ᱛᱟᱬᱟᱜ ᱮᱱᱟᱭ ᱵᱟᱺᱫᱤ ᱪᱤᱨᱤᱫ ᱪᱤᱠᱟᱹᱬ ᱦᱚᱨᱟ ᱫᱟᱱᱟᱝ
ᱯᱟᱹᱛᱟᱹᱛ ᱮᱱᱟᱭ ᱱᱤᱛ ᱫᱚ ᱡᱚᱢᱮ ᱦᱟᱵᱚᱲ ᱜᱮᱭᱟ
ᱯᱟᱨᱟᱵᱽ ᱯᱩᱱᱟᱹᱭ ᱯᱩᱥᱤ ᱱᱤᱛᱮ ᱢᱟᱱᱟᱣ ᱜᱮᱭᱟ ᱾
ᱟᱲᱟᱥ ᱫᱟᱱᱟᱝ ᱚᱲᱟᱜ ᱪᱩᱴᱭᱟᱹ ᱜᱩᱰᱩ ᱜᱚᱸᱜᱷᱚᱨ
ᱥᱮᱱᱮᱨ ᱫᱟᱱᱟᱝ ᱨᱚᱲᱟ ᱥᱟᱨᱶᱜᱟ ᱥᱚᱝᱥᱟᱨ
ᱨᱟᱹᱥᱠᱟᱹ ᱞᱚᱵᱽ ᱛᱮ ᱯᱩᱥᱤᱭ ᱨᱟᱹᱱᱤ ᱟᱠᱟᱱ
ᱪᱩᱴᱭᱟᱹ ᱨᱟᱡᱽ ᱨᱮ ᱨᱟᱹᱱᱤ ᱫᱚᱭ ᱜᱩᱛᱨᱩᱫ ᱟᱠᱟᱱ
ᱚᱜᱚᱢ ᱫᱚᱨᱭᱟ ᱛᱚᱣᱟ ᱨᱮ ᱪᱮᱠᱟᱭ ᱰᱟᱹᱵᱽᱹᱨᱟᱹᱣᱜ ᱪᱚᱝ
ᱵᱟᱝ ᱫᱚᱭ ᱡᱟᱸᱵᱮᱫ ᱡᱚᱢ ᱡᱚᱝ, ᱵᱟᱝ ᱫᱚᱭ ᱪᱮᱯᱮᱡ ᱧᱩ ᱡᱚᱝ ᱾
ᱛᱤᱱᱟᱹᱝ ᱵᱟᱞᱮ ᱠᱩᱪᱤ ᱦᱚᱲᱢᱚ ᱨᱮ ᱢᱚᱪᱲᱟᱣ ᱞᱮᱫ ᱠᱚ
ᱛᱤᱱᱟᱹᱝ ᱮᱸᱜᱟᱛ ᱟᱯᱟᱛ ᱪᱷᱮᱱᱟᱯᱟᱱᱟ ᱧᱮᱢᱵᱮᱫ ᱞᱮᱫ ᱠᱚ
ᱥᱩᱠᱷᱮᱨ ᱥᱚᱝᱥᱟᱨ ᱜᱟᱬᱟ ᱜᱩᱥᱴᱤ ᱱᱤᱯᱟᱹᱛ ᱞᱮᱫᱼᱟ
ᱜᱩᱰᱩ ᱥᱟᱨᱶᱜᱟ ᱪᱩᱴᱭᱟᱹ ᱨᱟᱡᱮ ᱢᱟᱹᱴᱩᱡ ᱩᱡᱟᱹᱲ ᱞᱮᱫᱼᱟ ᱾
ᱩᱭᱦᱟᱹᱨ ᱵᱷᱟᱵᱽᱱᱟ ᱦᱚᱢᱚᱨ ᱨᱟᱹᱱᱤ ᱫᱚᱭ ᱨᱟᱜ ᱡᱚᱝ ᱠᱟᱱ
ᱨᱮᱸᱜᱮᱡ ᱛᱮᱛᱟᱝ ᱱᱟᱦᱮᱫᱽ ᱨᱮ ᱱᱤᱛ ᱫᱚᱭ ᱡᱚᱵᱮ ᱟᱠᱟᱱ
ᱫᱷᱩᱞᱩ ᱢᱩᱞᱩ ᱡᱟᱹᱯᱤᱫ ᱠᱷᱚᱱᱮ ᱪᱚᱢᱠᱟᱣ ᱟᱠᱟᱱ
ᱟᱠᱟ ᱟᱠᱟᱱ ᱥᱤᱠᱣᱟᱹᱨ ᱵᱚᱨᱟ ᱠᱚᱦᱚᱸᱰᱟ ᱧᱩᱨ ᱟᱠᱟᱱ
ᱯᱟᱯ ᱨᱮᱱᱟᱝ ᱯᱟᱨᱚᱝᱜᱚᱛ ᱡᱤᱵᱚᱱ ᱨᱮ ᱢᱮᱱᱟᱜ ᱟᱠᱟᱱ
ᱵᱚᱨᱟ ᱠᱚᱦᱚᱸᱰᱟ ᱞᱮᱠᱟ ᱯᱩᱥᱤ ᱨᱟᱹᱱᱤ ᱫᱚᱭ ᱵᱷᱟᱨᱟ ᱵᱷᱟᱴᱮᱱ ᱾
***
