ᱵᱟᱹᱭᱥᱟᱹᱠᱷ ᱡᱷᱮᱸᱴ ᱵᱚᱸᱜᱟ ᱯᱟᱲᱟᱣ ᱮᱱ
ᱞᱚᱞᱚ ᱜᱮ ᱥᱤᱛᱩᱝ ᱫᱤᱱ ᱫᱚ ᱥᱮᱴᱮᱨᱮᱱ
ᱚᱛ ᱦᱟᱥᱟ ᱵᱟᱹᱞᱤ ᱫᱷᱤᱨᱤ ᱡᱷᱚᱛᱚ ᱜᱮ ᱞᱚᱞᱚᱜᱼᱟ
ᱦᱚᱲᱢᱚ ᱨᱮ ᱞᱚᱞᱚ ᱜᱮ ᱦᱚᱭ ᱫᱚ ᱵᱟᱡᱟᱜᱼᱟ
ᱫᱮᱥᱮ ᱠᱟᱹᱴᱤᱡ ᱦᱚᱭ ᱢᱮ ᱟᱻ ᱛᱤᱱᱟᱹᱜ ᱱᱟᱯᱟᱭ ᱾
ᱩᱫᱽᱜᱟᱹᱨ ᱫᱟᱜ ᱛᱮ ᱦᱚᱲᱢᱚ ᱫᱚ ᱩᱢ ᱟᱬᱜᱚᱱ
ᱡᱷᱟᱨᱱᱟ ᱫᱟᱜ ᱞᱮᱠᱟ ᱜᱮ ᱦᱚᱲᱢᱚ ᱠᱷᱚᱱ ᱞᱤᱸᱜᱤᱱ
ᱟᱠᱟᱵ ᱥᱟᱠᱟᱵ ᱢᱟᱱᱚᱶᱟ ᱟᱨ ᱡᱤᱽᱵᱡᱤᱭᱟᱹᱞᱤ ᱠᱚ
ᱟᱢ ᱜᱮ ᱦᱚᱭ ᱡᱤᱣᱤ ᱫᱚᱢ ᱡᱤᱭᱟᱹᱲ ᱠᱟᱛᱟ ᱠᱚ
ᱫᱮᱥᱮ ᱠᱟᱹᱴᱤᱡ ᱦᱚᱭ ᱢᱮ ᱟᱻ ᱛᱤᱱᱟᱹᱜ ᱱᱟᱯᱟᱭ ᱾
ᱱᱟᱞᱦᱟ ᱛᱩᱢᱟᱹᱞ ᱦᱚᱲ ᱫᱚ ᱞᱚᱞᱚ ᱥᱤᱛᱩᱝ ᱵᱟᱭ ᱵᱟᱛᱟᱣ
ᱢᱤᱫ ᱵᱤᱛᱟᱹ ᱞᱟᱡ ᱡᱟᱞᱟ ᱪᱮᱫ ᱦᱚᱸ ᱵᱟᱭ ᱦᱮᱛᱟᱣ
ᱡᱷᱟᱨ ᱡᱷᱟᱨ ᱢᱚᱞᱚᱝ ᱨᱮᱱᱟᱜ ᱩᱫᱽᱜᱟᱹᱨ ᱫᱟᱜ ᱡᱚᱨᱚ ᱟᱛᱮ
ᱥᱮᱨᱢᱟ ᱥᱤᱛᱩᱝ ᱮᱢ ᱫᱮᱭᱟᱭ ᱵᱟᱨ ᱠᱟᱹᱣᱰᱤ ᱨᱚᱡᱽᱜᱟᱨ ᱟᱸᱥᱛᱮ
ᱫᱮᱥᱮ ᱠᱟᱹᱴᱤᱡ ᱦᱚᱭ ᱢᱮ ᱟᱻ ᱛᱤᱱᱟᱹᱜ ᱱᱟᱯᱟᱭ ᱾
ᱢᱮᱨᱚᱢ ᱵᱷᱤᱰᱤ ᱰᱟᱹᱝᱨᱤ ᱜᱟᱹᱭ ᱠᱟᱰᱟ
ᱟᱹᱛᱤᱧ ᱟᱠᱚ ᱯᱩᱲᱭᱟᱹ ᱰᱟᱹᱦᱤ ᱜᱚᱰᱟ
ᱛᱮᱛᱟᱝ ᱠᱚ ᱛᱤᱨᱯᱤᱫᱽ ᱜᱟᱰᱟ ᱢᱩᱰᱩ ᱨᱮ ᱫᱟᱜ ᱧᱩ ᱠᱟᱛᱮ
ᱞᱚᱞᱚ ᱜᱮ ᱥᱤᱛᱩᱝ ᱡᱟᱞᱟ ᱵᱩᱨᱩᱢ ᱟᱠᱚ ᱦᱮᱢᱟᱞ ᱩᱢᱩᱞ ᱨᱮ ᱢᱤᱫ ᱥᱟᱶᱛᱮ
ᱫᱮᱥᱮ ᱠᱟᱹᱴᱤᱡ ᱦᱚᱭ ᱢᱮ ᱟᱻ ᱛᱤᱱᱟᱹᱜ ᱱᱟᱯᱟᱭ ᱾
ᱫᱟᱜ ᱧᱩᱫᱚ ᱮᱠᱟᱞ ᱟᱞᱚᱜᱮᱯᱮ ᱦᱤᱲᱤᱧ
ᱞᱚᱞᱚ ᱥᱤᱛᱩᱝ ᱫᱤᱱ ᱥᱮᱛᱟᱜ ᱵᱟᱹᱥᱤᱭᱟᱹᱢ ᱛᱤᱠᱤᱱ ᱛᱟᱨᱟᱥᱤᱧ
ᱫᱟᱜ ᱫᱚ ᱜᱟᱛᱮ ᱮᱢ ᱫᱟᱜ ᱫᱚ ᱥᱚᱸᱜᱮᱭᱮᱢ ᱫᱟᱜ ᱜᱮᱛᱟᱢ ᱡᱤᱵᱚᱱ ᱫᱚ
ᱥᱟᱺᱜᱤᱧᱮᱢ ᱥᱮᱱᱚᱜ ᱥᱩᱨᱮᱢ ᱥᱮᱱᱚᱜ ᱫᱟᱜ ᱜᱮ ᱱᱟᱯᱟᱭ ᱫᱚᱦᱚᱢ ᱟᱢ ᱫᱚ
ᱫᱮᱥᱮ ᱠᱟᱹᱴᱤᱡ ᱦᱚᱭ ᱢᱮ ᱟᱻ ᱛᱤᱱᱟᱹᱜ ᱱᱟᱯᱟᱭ ᱾
ᱟᱢᱟᱜ ᱦᱚᱭ ᱛᱮ ᱦᱤᱞᱟᱹᱜ ᱫᱟᱨᱮ ᱥᱟᱠᱟᱢ
ᱨᱚᱦᱚᱲ ᱰᱟᱹᱨ ᱨᱮ ᱠᱩᱠᱩ ᱰᱩᱵᱩᱨ ᱢᱟᱞᱟ ᱯᱚᱛᱟᱢ
ᱥᱤᱛᱩᱝ ᱡᱟᱞᱟ ᱛᱮ ᱨᱮᱨᱮᱧ ᱨᱮᱸᱻ ᱨᱮᱸᱻ ᱨᱟᱜᱟᱭ
ᱟᱡᱟᱜ ᱨᱟᱦᱟ ᱛᱮᱜᱮ ᱜᱚᱴᱟᱭ ᱟᱸᱫᱚᱲ ᱠᱟᱜ ᱟᱭ
ᱱᱤᱡᱷᱩᱢ ᱱᱤᱪᱚᱞ ᱛᱤᱠᱤᱱ ᱵᱮᱲᱟ ᱞᱚᱞᱚ ᱥᱤᱛᱩᱝ ᱫᱮᱥᱮ ᱠᱟᱹᱴᱤᱡ ᱦᱚᱭ ᱢᱮ ᱾
***
