ᱛᱤᱨᱞᱟᱹ ᱵᱮᱜᱚᱨ ᱜᱳᱴᱟ ᱫᱷᱟᱹᱨᱛᱤ
ᱧᱩᱛᱟᱹᱛ ᱟᱹᱭᱠᱟᱹᱜᱼᱟ,
ᱛᱤᱨᱞᱟᱹ ᱵᱮᱜᱚᱨ ᱢᱟᱹᱱᱢᱤ ᱡᱤᱭᱚᱱ
ᱱᱤᱥᱩᱱ ᱜᱮ ᱵᱩᱡᱷᱟᱹᱜᱼᱟ ᱾
ᱛᱤᱨᱞᱟᱹ ᱵᱮᱜᱚᱨ ᱵᱟᱝ ᱦᱩᱭᱩᱜ
ᱟᱢᱟᱜ ᱥᱤᱜᱤᱞ ᱠᱟᱹᱢᱤ,
ᱛᱤᱨᱞᱟᱹ ᱵᱮᱜᱚᱨ ᱵᱟᱝ ᱦᱩᱭᱩᱜ
ᱟᱢᱟᱜ ᱛᱮᱨᱫᱮᱡ ᱠᱩᱱᱟᱹᱢᱤ ᱾
ᱛᱤᱨᱞᱟᱹ ᱵᱮᱜᱚᱨ ᱵᱟᱝ ᱦᱩᱭᱩᱜ
ᱟᱢᱟᱜ ᱥᱟᱶᱛᱟ ᱟᱹᱨᱤ,
ᱛᱤᱨᱞᱟᱹ ᱵᱮᱜᱚᱨ ᱵᱟᱝ ᱦᱩᱭᱩᱜ
ᱟᱢᱟᱜ ᱠᱩᱠᱢᱩ ᱥᱟᱹᱨᱤ ᱾
ᱛᱤᱨᱞᱟᱹ ᱵᱟᱭ ᱥᱩᱛᱩᱜ ᱞᱮᱢ ᱨᱮ
ᱵᱟᱝ ᱞᱟᱦᱟᱜ ᱟᱢᱟᱜ ᱡᱟᱸᱜᱟ ᱯᱟᱹᱣᱲᱤ,
ᱛᱤᱨᱞᱟᱹ ᱵᱟᱭ ᱛᱟᱸᱦᱮ ᱞᱮᱱ ᱠᱷᱟᱱ
ᱵᱟᱝ ᱛᱚᱯᱚᱞᱚᱜ ᱥᱟᱹᱜᱟᱹᱭ ᱱᱟᱹᱲᱤ ᱾
ᱛᱤᱨᱞᱟᱹ ᱵᱮᱜᱚᱨ ᱥᱮᱛᱟᱜ ᱠᱟᱹᱢᱤ
ᱵᱟᱝ ᱞᱚᱜᱚᱱᱚᱜ ᱡᱟᱹᱥᱛᱤ,
ᱛᱤᱨᱞᱟᱹ ᱵᱮᱜᱚᱨ ᱤᱥᱤᱱ ᱫᱟᱠᱟ
ᱵᱟᱝ ᱧᱟᱢᱚᱜ ᱞᱟᱡ ᱵᱤᱻ ᱵᱟᱹᱲᱛᱤ ᱾
ᱛᱤᱨᱞᱟᱹ ᱜᱮ ᱟᱢᱟᱜ ᱥᱩᱨ ᱨᱮ ᱛᱟᱸᱦᱮᱱᱟᱭ
ᱟᱢᱟᱜ ᱨᱩᱣᱟᱹ ᱦᱟᱹᱥᱩ ᱨᱮ,
ᱡᱚᱛᱚᱱ ᱢᱮᱭᱟᱭ ᱥᱟᱨᱟ ᱜᱷᱟᱹᱲᱤᱡ
ᱦᱩᱭᱩᱜ ᱨᱮᱦᱚᱸ ᱟᱡᱟᱜ ᱡᱤᱣᱤ ᱵᱟᱹᱲᱤᱡ ᱾
ᱛᱤᱨᱞᱟᱹ ᱜᱮᱭ ᱩᱫᱩᱜ ᱟᱢ
ᱱᱟᱯᱟᱭ ᱰᱟᱦᱟᱨ ᱟᱢ,
ᱛᱤᱨᱞᱟᱹ ᱜᱮᱭ ᱥᱟᱨᱦᱟᱣ ᱢᱮ
ᱵᱟᱦᱟ ᱛᱷᱩᱯᱱᱟᱹᱜ ᱛᱮ ᱟᱢ ᱾
ᱛᱤᱨᱞᱟᱹ ᱨᱮᱜᱮ ᱟᱢᱟᱜ ᱡᱟᱱᱟᱢ ᱨᱚᱲ
ᱛᱤᱨᱞᱟᱹ ᱛᱟᱞᱟ ᱛᱮᱜᱮ ᱩᱯᱨᱩᱢ ᱢᱮᱭᱟ ᱠᱚ ᱦᱚᱲ,
ᱛᱤᱨᱞᱟᱹ ᱜᱮ ᱟᱢ ᱨᱮᱱ ᱚᱲᱟᱜ ᱵᱚᱸᱜᱟ
ᱟᱨ ᱦᱚᱸ ᱟᱢ ᱨᱮᱱ ᱚᱲᱟᱜ ᱜᱚᱢᱠᱮ ᱮᱨᱟ ᱾
ᱚᱱᱟᱛᱮ ᱛᱤᱨᱞᱟᱹ ᱵᱮᱜᱚᱨ ᱵᱟᱢ ᱞᱟᱦᱟᱜ
ᱡᱩᱫᱤᱢ ᱨᱤᱠᱟᱹᱭ ᱛᱤᱨᱞᱟᱹ ᱠᱷᱚᱱ ᱥᱟᱦᱟᱜ,
ᱛᱤᱨᱞᱟᱹ ᱵᱮᱜᱚᱨ ᱵᱟᱢ ᱧᱟᱢᱟ ᱢᱚᱱᱮ ᱨᱮ ᱨᱟᱹᱥᱠᱟᱹ
ᱡᱩᱫᱤᱢ ᱠᱷᱚᱡᱚᱜ ᱮᱥᱠᱟᱨ ᱛᱮ,
ᱰᱚᱭᱞᱟᱝ ᱤᱫᱤ ᱟᱢᱟᱜ ᱡᱤᱭᱚᱱ ᱞᱟᱹᱣᱠᱟᱹ ᱾
***
