ᱵᱩᱨᱩ ᱫᱤᱥᱚᱢ ᱚᱲᱟᱜ ᱛᱟᱞᱮ,
ᱟᱞᱮ ᱫᱚ ᱟᱹᱫᱤᱵᱟᱹᱥᱤ
ᱜᱟᱰᱟ ᱫᱷᱟᱨᱮ ᱵᱟᱹᱫᱽ ᱵᱟᱹᱭᱦᱟᱹᱲ
ᱧᱩᱛᱩᱢᱚᱜ ᱟᱞᱮ ᱪᱟᱹᱥᱤ
ᱟᱞᱮ ᱫᱚ ᱟᱹᱥᱤᱵᱟᱹᱥᱤ
ᱛᱟᱦᱮᱸᱱ ᱟᱞᱮ ᱟᱹᱰᱤ ᱠᱩᱥᱤ ᱾
ᱪᱮᱬᱮ ᱪᱤᱯᱨᱩᱡ ᱠᱚ ᱥᱮᱨᱮᱧᱟ
ᱵᱩᱨᱩᱦᱟᱨᱟ ᱠᱚ ᱪᱚᱦᱚᱲᱟ,
ᱟᱸᱧᱚᱢ ᱡᱚᱝ ᱜᱮ ᱥᱟᱱᱟ
ᱥᱮᱨᱮᱧ ᱡᱚᱝ ᱜᱮ ᱥᱟᱱᱟ
ᱢᱚᱱᱮ ᱫᱚ ᱥᱚᱦᱟᱬᱚᱜᱼᱟ
ᱡᱤᱣᱤ ᱫᱚ ᱡᱩᱫᱟᱹᱥᱚᱜᱼᱟ ᱾
ᱵᱤᱧ ᱠᱤᱫᱤᱧ ᱦᱤᱥᱠᱟᱹᱫ ᱡᱟᱱᱣᱟ
ᱥᱟᱱᱟᱢ ᱯᱟᱲᱟ ᱠᱚ ᱛᱟᱦᱮᱱᱟ
ᱡᱮᱼᱡᱟᱦᱟᱨ ᱞᱮ ᱫᱩᱠᱷᱢᱟᱹᱭ
ᱛᱤᱥ ᱦᱚᱸ ᱵᱟᱞᱮ ᱛᱟᱯᱟᱢᱟ
ᱫᱤᱱᱟᱹᱢ ᱫᱤᱱ ᱞᱮ ᱧᱮᱯᱮᱞᱟ
ᱯᱮᱲᱟ ᱞᱮᱠᱟ ᱞᱮ ᱛᱟᱦᱮᱱᱟ ᱾
ᱟᱹᱛᱩ ᱛᱟᱞᱟ ᱨᱮ ᱟᱠᱷᱲᱟ
ᱥᱤᱸᱜᱟᱹᱲ ᱫᱚᱞᱮ ᱮᱱᱮᱡᱼᱟ
ᱛᱩᱢᱫᱟᱜ ᱴᱟᱢᱟᱠ ᱥᱟᱰᱮ ᱥᱟᱶᱛᱮ
ᱟᱠᱷᱲᱟ ᱫᱚ ᱟᱸᱫᱚᱲᱚᱜ
ᱵᱩᱨᱩ ᱥᱚᱸᱜᱷᱟ ᱛᱟᱣᱟᱜ ᱛᱟᱨᱥᱮ
ᱨᱟᱹᱥᱠᱟᱹ ᱜᱚᱴᱟ ᱜᱩᱨᱞᱟᱹᱣ ᱵᱟᱲᱟᱭᱟ ᱾
ᱨᱮᱸᱜᱮᱡ ᱛᱮᱛᱟᱝ ᱢᱮᱱᱟᱜ ᱨᱮᱦᱚᱸ
ᱢᱚᱱ ᱫᱚ ᱵᱟᱞᱮ ᱞᱤᱪᱟᱹᱲᱟ
ᱠᱩᱨᱩᱢᱩᱴᱩ ᱪᱷᱩᱴᱟᱹᱣᱜ ᱟᱞᱮ
ᱪᱟᱥ ᱠᱟᱹᱢᱤ ᱞᱮ ᱧᱮᱞᱟ
ᱰᱟᱹᱨᱤ ᱠᱟᱰᱟ ᱥᱤᱢ ᱥᱩᱠᱨᱤ
ᱟᱞᱮ ᱜᱚᱲᱟ ᱨᱮ ᱢᱮᱱᱟᱜ ᱠᱚ ᱾
ᱨᱩᱴᱷᱤ ᱥᱤᱛᱩᱝ ᱡᱟᱨᱜᱮ ᱡᱟᱹᱯᱩᱫ
ᱥᱟᱦᱟᱣ ᱟᱞᱮ ᱠᱚᱥᱴᱚ
ᱦᱳᱲᱳ ᱮᱨᱵᱟ ᱡᱷᱟᱸᱡᱽᱲᱟ ᱜᱟᱺᱜᱟᱹᱭ
ᱥᱟᱱᱟᱢ ᱜᱮᱞᱮ ᱟᱨᱡᱟᱣᱟ
ᱯᱮᱲᱟ ᱯᱩᱬᱦᱟᱹ ᱱᱮᱶᱛᱟ ᱟᱛᱮ
ᱟᱞᱮ ᱢᱚᱱ ᱠᱩᱥᱤ ᱞᱮ ᱡᱚᱢᱟ ᱾
ᱥᱟᱨᱟᱣᱱᱟ ᱵᱤᱨ ᱟᱠᱟᱴ ᱞᱟᱴᱟ
ᱥᱟᱹᱨᱤ ᱥᱟᱨᱡᱚᱢ ᱫᱟᱨᱮ
ᱵᱚᱸᱜᱟ ᱵᱳᱨᱳ ᱫᱮᱵᱟ ᱥᱮᱵᱟ
ᱡᱟᱦᱮᱨ ᱜᱟᱲ ᱨᱮ
ᱱᱟᱭᱠᱮ ᱵᱟᱵᱟ ᱵᱚᱸᱜᱟ ᱵᱳᱨᱳ
ᱟᱞᱮ ᱱᱤᱨᱚᱜᱽ ᱱᱤᱨᱚᱲ ᱞᱟᱹᱜᱤᱱ ᱜᱮ ᱾
ᱚᱠᱟ ᱡᱷᱚᱜ ᱚᱠᱚᱭ ᱪᱟᱸᱫᱚ
ᱫᱷᱟᱹᱨᱛᱤ ᱨᱮ ᱡᱚᱦᱚᱜᱚᱜ
ᱚᱱᱟ ᱞᱮᱠᱟᱱ ᱯᱟᱛᱟ ᱯᱟᱨᱟᱵᱽ
ᱯᱟᱹᱨᱛᱩᱲ ᱟᱞᱮᱞᱮ ᱢᱟᱱᱟᱣᱟ
ᱨᱟᱹᱥᱠᱟᱹ ᱨᱚᱢᱚᱡᱽ ᱩᱨᱩᱱ ᱯᱩᱨᱩᱱ
ᱪᱮᱫ ᱜᱮ ᱵᱟᱞᱮ ᱱᱟᱦᱮᱫᱚᱜ ᱾
ᱢᱟᱜᱽ ᱪᱟᱸᱫᱚ ᱢᱩᱞᱩᱜ ᱞᱮᱱᱠᱷᱟᱱ
ᱱᱟᱶᱟ ᱥᱮᱨᱢᱟ ᱵᱚᱞᱚᱱ
ᱢᱟᱜᱽ ᱢᱚᱬᱮ ᱟᱹᱢᱤ ᱨᱮᱫᱚ
ᱢᱟᱜᱽ ᱞᱮ ᱵᱚᱸᱜᱟᱭᱟ
ᱤᱱᱟᱹ ᱦᱤᱞᱚᱜ ᱠᱷᱚᱱ ᱚᱲᱟᱜ ᱥᱟᱹᱲᱤᱢ ᱞᱮ ᱫᱟᱞᱚᱵᱟ
ᱥᱤᱸᱜᱟᱹᱲ ᱛᱟᱨᱟ ᱠᱩᱞᱦᱤ ᱨᱮᱫᱚ ᱰᱟᱦᱟᱨ ᱞᱮ ᱮᱱᱮᱡᱼᱟ ᱾
ᱯᱷᱟᱹᱜᱩᱱ ᱵᱚᱸᱜᱟ ᱢᱩᱞᱩᱜ ᱢᱚᱬᱮ ᱢᱟᱦᱟᱸ
ᱡᱟᱦᱮᱨ ᱛᱷᱟᱱ ᱨᱮ ᱵᱟᱦᱟ ᱞᱮ ᱵᱚᱸᱜᱟᱭᱟ
ᱫᱚᱥᱟᱨ ᱦᱤᱞᱚᱜ ᱵᱟᱦᱟ ᱥᱮᱸᱫᱽᱨᱟ
ᱠᱚᱲᱟ ᱠᱚ ᱪᱟᱞᱟᱜᱼᱟ
ᱤᱱᱟᱹ ᱦᱤᱞᱚᱜ ᱠᱷᱚᱱ ᱫᱚ ᱟᱞᱮ
ᱡᱚᱼᱣᱟᱜ ᱡᱚᱢ ᱠᱚᱞᱮ ᱠᱟᱨᱠᱟᱭᱟ ᱾
ᱢᱟᱹᱡᱷᱤ ᱯᱟᱹᱨᱱᱤᱠ ᱡᱚᱜᱚ ᱜᱚᱰᱮᱛ
ᱟᱨᱦᱚᱸ ᱢᱚᱬᱮ ᱦᱚᱲ ᱠᱚ
ᱢᱟᱹᱱ ᱢᱟᱱᱚᱛ ᱦᱚᱲᱜᱮ ᱱᱩᱠᱩ
ᱟᱹᱛᱩ ᱨᱟᱭ ᱠᱚ ᱞᱟᱲᱟᱣᱟ
ᱱᱟᱭ ᱫᱷᱚᱨᱚᱢ ᱥᱚᱱᱚᱛ ᱥᱟᱶᱛᱟ
ᱱᱤᱨᱟᱹᱭ ᱨᱮᱜᱮ ᱡᱚᱛᱚ ᱞᱮ ᱛᱟᱦᱮᱱᱟ ᱾
ᱟᱹᱛᱩ ᱨᱮᱱᱟᱝ ᱵᱩᱜᱤ ᱵᱟᱹᱲᱤᱡ
ᱢᱟᱹᱡᱷᱤ ᱵᱟᱵᱟᱭ ᱵᱤᱪᱟᱹᱨᱟ
ᱟᱪᱟᱨ ᱵᱤᱪᱟᱹᱨ ᱠᱟᱛᱷᱟ ᱠᱚᱫᱚ
ᱥᱟᱱᱟᱢ ᱦᱚᱲ ᱞᱮ ᱵᱟᱛᱟᱣᱟ
ᱱᱮᱭᱟᱣ ᱨᱚᱯᱚᱲ ᱮᱯᱮᱨ ᱦᱮᱸᱰᱮ
ᱨᱮᱨᱟᱲ ᱛᱤᱥ ᱜᱮ ᱵᱟᱞᱮ ᱵᱟᱰᱟᱭᱟ ᱾
ᱥᱟᱶᱛᱟ ᱥᱟᱹᱜᱟᱹᱭ ᱢᱟᱹᱱ ᱟᱛᱮ
ᱟᱞᱮ ᱞᱮ ᱦᱚᱯᱚᱦᱚᱜ
ᱢᱟᱱᱟ ᱢᱟᱹᱱᱛᱤ ᱥᱟᱹᱜᱟᱹᱭ ᱟᱹᱱᱩᱡ
ᱨᱟᱭ ᱫᱚ ᱛᱚᱯᱚᱞ ᱢᱮᱱᱟᱜᱼᱟ
ᱦᱤᱥᱟᱹ ᱥᱩᱭᱟᱹ ᱛᱤᱥ ᱦᱚᱸ ᱵᱟᱝ ᱜᱮ ᱦᱤᱡᱩᱜᱼᱟ
ᱢᱤᱫ ᱟᱯᱟᱛ ᱦᱚᱯᱚᱱ ᱞᱮᱠᱟ ᱱᱟᱯᱟᱭ ᱨᱮᱞᱮ ᱛᱟᱦᱮᱱᱟ ᱾
***
