ᱯᱷᱟᱹᱜᱩᱱ ᱵᱚᱸᱜᱟ ᱵᱚᱞᱚ ᱞᱮᱱ ᱠᱷᱟᱱ
ᱵᱚᱸᱜᱟᱼᱵᱳᱨᱳ, ᱢᱟᱹᱱᱢᱤ, ᱡᱤᱵᱽᱼᱡᱤᱭᱟᱹᱞᱤ ᱢᱚᱱᱮᱨᱮ ᱨᱟᱹᱥᱠᱟᱹ ᱥᱟᱨᱥᱟᱣᱜ
ᱵᱤᱨ ᱵᱩᱨᱩ ᱨᱮ ᱱᱟᱣᱟ ᱥᱟᱠᱟᱢ ᱥᱟᱜᱮᱱ ᱥᱟᱶᱛᱮ
ᱱᱟᱱᱟ ᱦᱩᱱᱟᱹᱨ ᱵᱟᱦᱟᱛᱮ ᱜᱚᱴᱟ ᱫᱷᱟᱹᱨᱛᱤ ᱥᱟᱡᱟᱣᱜ ᱾
ᱮᱫᱮᱞ, ᱢᱩᱨᱩᱫ, ᱤᱪᱟᱹᱜ, ᱦᱩᱴᱟᱹᱨ, ᱢᱟᱛᱠᱚᱢ, ᱥᱟᱨᱡᱚᱢ ᱵᱟᱦᱟ
ᱧᱮᱞᱛᱮ ᱪᱮᱬᱮ ᱪᱤᱯᱨᱩᱡ ᱠᱚ ᱠᱩᱥᱤ ᱨᱟᱹᱥᱠᱟᱹ ᱡᱚᱝ
ᱵᱟᱦᱟ ᱨᱮᱭᱟᱜ ᱥᱚᱸᱫᱷᱟᱬ ᱥᱚ ᱦᱤᱥᱤᱫ ᱦᱚᱭᱛᱮ
ᱟᱹᱛᱩ ᱴᱚᱞᱟ ᱦᱚᱲᱟᱜ ᱢᱚᱱᱮᱨᱮ ᱟᱹᱜᱩᱭ ᱱᱟᱣᱟᱼᱱᱟᱣᱟ ᱨᱚᱝ ᱾
ᱱᱟᱣᱟᱼᱱᱟᱣᱟ ᱥᱟᱠᱟᱢ ᱥᱟᱜᱮᱱ ᱠᱟᱛᱮ
ᱜᱚᱴᱟ ᱧᱮᱞᱚᱜ ᱦᱟᱹᱨᱭᱟᱹᱲ ᱜᱮ ᱡᱮᱸᱜᱮᱫᱼᱡᱮᱸᱜᱮᱫ
ᱰᱟᱹᱨ ᱯᱮᱨᱮᱡ ᱞᱚᱯᱮ ᱛᱷᱚᱯᱮ ᱵᱟᱦᱟ ᱠᱚᱜ ᱟᱹᱣᱲᱤ ᱜᱮ
ᱦᱟᱱᱟ ᱵᱟᱦᱟ ᱠᱷᱚᱱ ᱱᱷᱟᱣᱟ ᱵᱟᱦᱟ ᱩᱨᱩ ᱵᱷᱟᱶᱟᱨ ᱨᱟᱥᱟ ᱠᱚ ᱪᱮᱯᱮᱡᱽ ᱾
ᱩᱰᱟᱹᱣᱜ ᱟᱠᱚ ᱪᱮᱬᱮ ᱦᱟᱱᱟ ᱰᱟᱹᱨ ᱱᱷᱟᱣᱟ ᱰᱟᱹᱨ
ᱟᱨᱦᱚᱸ ᱟᱸᱡᱚᱢᱚᱜ ᱠᱩᱭᱞᱤ ᱪᱮᱬᱮᱭᱟᱜ ᱠᱩᱦᱩᱼᱠᱩᱦᱩ ᱟᱲᱟᱝ
ᱡᱚᱛᱚ ᱠᱷᱚᱱ ᱱᱟᱯᱟᱭ ᱵᱩᱡᱷᱟᱹᱣᱜᱼᱟ ᱵᱟᱦᱟ ᱵᱚᱸᱜᱟ ᱜᱮ
ᱱᱟᱣᱟ ᱥᱮᱨᱢᱟ ᱛᱟᱭᱚᱢ ᱵᱟᱦᱟ ᱵᱚᱸᱜᱟ ᱜᱮ ᱦᱤᱡᱩᱜ ᱢᱟᱬᱟᱝ ᱾
ᱢᱩᱞᱩᱜ ᱢᱚᱬᱮ ᱢᱟᱦᱟᱸ ᱠᱷᱚᱱᱟᱜ ᱮᱦᱚᱵᱚᱜ ᱵᱟᱦᱟ ᱵᱚᱸᱜᱟ ᱫᱚ
ᱴᱚᱴᱷᱟ, ᱡᱟᱹᱱᱤ ᱠᱚ ᱵᱟᱦᱟᱜ ᱯᱷᱟᱹᱜᱩᱱ ᱵᱚᱸᱜᱟ ᱠᱩᱱᱟᱹᱢᱤ ᱫᱷᱟᱹᱨᱤᱡ
ᱵᱚᱸᱜᱟᱼᱵᱳᱨᱳ ᱠᱚ ᱩᱢ ᱱᱟᱲᱠᱟ ᱡᱟᱦᱮᱨᱼᱜᱟᱲ ᱠᱚ ᱯᱷᱩᱨᱪᱟᱹᱼᱯᱷᱩᱨᱪᱤ
ᱵᱟᱦᱟ ᱵᱚᱸᱜᱟ ᱧᱩᱛᱩᱢ ᱱᱤᱨᱚᱲ ᱢᱚᱱᱮᱛᱮ ᱡᱚᱛᱚ ᱠᱚ ᱜᱮᱡᱼᱜᱩᱨᱤᱡᱽ ᱾
***
