ᱥᱤᱨᱡᱚᱱᱤᱭᱟᱹ ᱟᱢᱟᱜ ᱥᱤᱨᱡᱚᱱ ᱫᱟᱲᱮ
ᱟᱹᱰᱤ ᱦᱟᱦᱟᱲᱟ ᱜᱮᱭᱟ ᱥᱟᱹᱨᱤ ᱜᱮ
ᱞᱮᱜᱮᱡ ᱦᱟᱹᱨᱤᱭᱟᱹᱲ ᱞᱩᱜᱩᱵ ᱯᱟᱹᱴᱤᱭᱟᱹ ᱨᱮ
ᱫᱩᱲᱩᱵ ᱠᱟᱛᱤᱧ ᱠᱚᱭᱚᱜ ᱟᱹᱪᱩᱨ ᱨᱮ
ᱧᱮᱞ ᱧᱟᱢᱚᱜ ᱠᱟᱱ ᱞᱮᱼᱞᱮᱸᱜᱮᱫ ᱫᱷᱟᱹᱨᱛᱤ
ᱜᱚᱴᱟᱼ ᱯᱟᱲᱟ ᱦᱟᱹᱨᱤᱭᱟᱹᱲ ᱜᱮ ᱥᱟᱹᱨᱤ ᱾
ᱥᱤᱨᱡᱚᱱᱤᱭᱟᱹ ᱟᱢᱟᱜ ᱥᱤᱨᱡᱚᱱ ᱫᱟᱲᱮ
ᱟᱹᱰᱤ ᱦᱟᱦᱟᱲᱟ ᱜᱮᱭᱟ ᱥᱟᱹᱨᱤ ᱜᱮ
ᱧᱟᱞᱟᱫ ᱥᱮᱨᱢᱟ ᱨᱮᱢᱟ ᱤᱯᱤᱞ ᱼ ᱮᱸᱜᱮᱞ
ᱡᱩᱞᱩᱜ ᱠᱟᱱ ᱠᱚ ᱯᱤᱲᱤᱫ ᱼ ᱯᱤᱲᱤᱫ
ᱥᱟᱡᱟᱣ ᱵᱟᱹᱛᱤ ᱞᱮᱠᱟ ᱡᱷᱟᱞᱠᱟᱣᱚᱜ ᱠᱟᱱ
ᱛᱤᱱᱟᱹᱜ ᱢᱚᱡᱽ ᱠᱚ ᱧᱮᱞᱚᱜ ᱡᱤᱲᱤᱫ ᱼ ᱡᱤᱲᱤᱫ ᱾
ᱥᱤᱨᱡᱚᱱᱤᱭᱟᱹ ᱟᱢᱟᱜ ᱥᱤᱨᱡᱚᱱ ᱫᱟᱲᱮ
ᱟᱹᱰᱤ ᱦᱟᱦᱟᱲᱟ ᱜᱮᱭᱟ ᱥᱟᱹᱨᱤ ᱜᱮ
ᱵᱤᱨ ᱼ ᱵᱩᱨᱩᱢ ᱥᱟᱡᱟᱣ ᱠᱮᱫ ᱫᱷᱤᱨᱤ, ᱫᱟᱨᱮ ᱼ ᱱᱟᱹᱲᱤ ᱛᱮ
ᱡᱤᱵᱽ ᱼ ᱡᱤᱭᱟᱹᱞᱤ ᱠᱚᱣᱟᱜ ᱨᱟᱜ ᱨᱚᱫᱚᱱ ᱛᱮ
ᱟᱨᱦᱚᱸ ᱪᱮᱬᱮ ᱪᱤᱯᱨᱩᱫ ᱠᱚᱣᱟᱜ ᱪᱮᱨᱚ ᱼ ᱵᱮᱨᱚ ᱛᱮ
ᱨᱟᱹᱥᱠᱟᱹ ᱛᱮ ᱟᱸᱫᱷᱚᱲ ᱠᱚᱜ ᱥᱤᱵᱤᱞ ᱟᱲᱟᱝ ᱛᱮ ᱾
ᱥᱤᱨᱡᱚᱱᱤᱭᱟᱹ ᱟᱢᱟᱜ ᱥᱤᱨᱡᱚᱱ ᱫᱟᱲᱮ
ᱟᱹᱰᱤ ᱦᱟᱦᱟᱲᱟ ᱜᱮᱭᱟ ᱥᱟᱹᱨᱤ ᱜᱮ
ᱥᱟᱡᱟᱣ ᱠᱮᱫ ᱟᱢ ᱜᱟᱰᱟ ᱼ ᱢᱩᱰᱩ ᱛᱮ ᱴᱟᱺᱰᱤ
ᱟᱨᱦᱚᱸ ᱚᱜᱚᱢ ᱫᱚᱨᱭᱟ ᱡᱷᱟᱨᱱᱟ ᱰᱟᱹᱰᱤ
ᱫᱟᱜ ᱡᱟᱱᱣᱟ ᱠᱚ ᱚᱯᱮᱞᱮᱱ ᱟᱢᱟᱜ ᱫᱟᱲᱮ ᱛᱮ
ᱧᱮᱞᱚᱜ ᱪᱮᱦᱮᱞ ᱼ ᱪᱮᱯᱮᱞ ᱨᱤᱞᱟᱹᱼ ᱢᱟᱞᱟ ᱫᱟᱜ ᱛᱮ ᱾
ᱥᱤᱨᱡᱚᱱᱤᱭᱟᱹ ᱟᱢᱟᱜ ᱥᱤᱨᱡᱚᱱ ᱫᱟᱲᱮ
ᱟᱹᱰᱤ ᱦᱟᱦᱟᱲᱟ ᱜᱮᱭᱟ ᱥᱟᱹᱨᱤ ᱜᱮ
ᱪᱮᱬᱮ ᱼ ᱪᱤᱯᱨᱩᱫ ᱡᱤᱭᱟᱹᱞᱤᱭᱟᱜ ᱨᱟᱜ ᱦᱚᱢᱚᱨ
ᱟᱸᱡᱚᱢᱚᱜ ᱛᱤᱱᱟᱹᱜ ᱱᱟᱯᱟᱭ ᱪᱮᱦᱚᱨ ᱼ ᱵᱮᱦᱚᱨ
ᱦᱤᱥᱤᱫ ᱼ ᱦᱤᱥᱤᱫ ᱦᱚᱭ ᱨᱮᱭᱟᱜ ᱦᱮᱞᱠᱟᱣ ᱛᱮ
ᱫᱟᱨᱮ ᱼ ᱱᱟᱹᱲᱤ ᱠᱚ ᱦᱚᱸ ᱞᱮᱣᱮᱨ ᱠᱚᱫᱚᱨ ᱦᱚᱭ ᱛᱮ ᱾
ᱥᱤᱨᱡᱚᱱᱤᱭᱟᱹ ᱟᱢᱟᱜ ᱥᱤᱨᱡᱚᱱ ᱫᱟᱲᱮ
ᱟᱹᱰᱤ ᱦᱟᱦᱟᱲᱟ ᱜᱮᱭᱟ ᱥᱟᱹᱨᱤ ᱜᱮ
ᱦᱚᱭ ᱢᱮᱱᱟᱜ ᱡᱤᱣᱤ ᱵᱟᱧᱪᱟᱣ ᱞᱟᱹᱜᱤᱫ
ᱫᱟᱜ ᱡᱟᱹᱲᱤ ᱢᱮᱱᱟᱜ ᱡᱤᱭᱚᱱ ᱞᱟᱹᱜᱤᱫ
ᱡᱚ ᱼ ᱵᱤᱞᱤ ᱢᱮᱱᱟᱜ ᱦᱚᱲᱢᱚ ᱱᱤᱯᱷᱩᱴ ᱞᱟᱹᱜᱤᱫ
ᱫᱷᱟᱹᱨᱛᱤ ᱟᱭᱳ ᱢᱮᱱᱟᱭ ᱢᱟᱹᱱᱢᱤ ᱥᱟᱶᱟᱨ ᱞᱟᱹᱜᱤᱫ ᱾
ᱥᱤᱨᱡᱚᱱᱤᱭᱟᱹ ᱟᱢᱟᱜ ᱥᱤᱨᱡᱚᱱ ᱫᱟᱲᱮ
ᱟᱹᱰᱤ ᱦᱟᱦᱟᱲᱟ ᱜᱮᱭᱟ ᱥᱟᱹᱨᱤ ᱜᱮ
ᱵᱤᱨ ᱼ ᱵᱩᱨᱩ ᱫᱟᱨᱮ ᱼ ᱱᱟᱹᱲᱤ ᱵᱟᱵᱚᱱ ᱢᱟᱜ ᱯᱷᱟᱫᱟᱭ
ᱥᱤᱨᱡᱚᱱᱤᱭᱟᱹ ᱥᱤᱨᱤᱡᱽ ᱟᱠᱟᱫ ᱵᱟᱧᱪᱟᱣ ᱫᱚᱦᱚᱭᱟᱵᱚᱱ
ᱦᱤᱥᱟᱹᱵᱽ ᱨᱮᱭᱟᱜ ᱜᱮᱵᱚᱱ ᱟᱨᱡᱟᱣ ᱚᱱᱟ ᱠᱷᱚᱱ ᱵᱟᱝ ᱵᱟᱹᱲᱛᱤ
ᱡᱚᱛᱚᱱᱟᱵᱚᱱ ᱨᱚᱯᱷᱟᱭᱟᱵᱚᱱ ᱞᱮᱜᱮᱡ ᱦᱟᱹᱨᱤᱭᱟᱹᱲ ᱫᱷᱟᱹᱨᱛᱤ ᱾
***
