ᱚᱛ ᱦᱟᱥᱟ ᱫᱷᱤᱨᱤ ᱫᱟᱨᱮ ᱱᱟᱹᱬᱤ ᱫᱟᱜ ᱫᱚᱨᱮᱭᱟᱛᱮ
ᱥᱤᱨᱤᱡᱽ ᱜᱚᱲᱦᱚᱱ ᱥᱟᱡᱟᱣ ᱟᱠᱟᱱ ᱫᱷᱟᱹᱨᱛᱤ ᱯᱩᱨᱤ
ᱡᱟᱦᱟᱸᱨᱮ ᱢᱤᱫ ᱴᱷᱮᱱ ᱢᱮᱱᱟᱜ ᱠᱚ ᱠᱩᱥᱤ ᱨᱟᱹᱥᱠᱟ ᱨᱮ
ᱥᱟᱱᱟᱢ ᱪᱮᱬᱮᱸ ᱪᱤᱯᱨᱩᱫ ᱡᱤᱵᱽ ᱡᱤᱭᱟᱹᱞᱤ ᱟᱨ ᱢᱟᱹᱱᱢᱤ ᱾
ᱜᱮᱞᱵᱟᱨ ᱵᱚᱸᱜᱟ ᱛᱩᱨᱩᱭ ᱨᱤᱛᱩ ᱛᱤᱭᱟᱹᱜ ᱥᱩᱛᱩᱜ
ᱢᱤᱢᱤᱫᱴᱤᱡ ᱛᱮ ᱦᱮᱡᱩᱜ ᱥᱮᱱᱚᱜ ᱠᱚ ᱵᱚᱪᱷᱚᱨ ᱫᱤᱱᱨᱮ
ᱯᱨᱚᱠᱨᱩᱛᱤ ᱥᱟᱡᱟᱣ ᱟᱭ ᱵᱷᱤᱱᱟᱹ ᱵᱷᱤᱱᱟᱹ ᱨᱩᱯ ᱛᱮ
ᱢᱩᱴᱷᱟᱹᱱ ᱟᱹᱨᱩ ᱯᱷᱮᱨᱟᱣᱜ ᱨᱤᱛᱩ ᱵᱚᱫᱚᱞᱚᱜ ᱥᱟᱶᱛᱮ ᱾
ᱟᱥᱟᱲ ᱥᱟᱱ ᱵᱚᱸᱜᱟ ᱡᱷᱚᱢᱚᱨ ᱡᱟᱹᱯᱩᱫ ᱨᱤᱛᱩ ᱛᱮ
ᱡᱷᱟᱴᱟᱥ ᱥᱤᱰᱜᱤᱨ ᱟᱹᱨᱩᱵ ᱯᱷᱩᱨᱪᱟᱹᱜ ᱢᱤᱨᱛᱷᱤᱠᱟ
ᱫᱷᱩᱲᱤ ᱢᱟᱹᱭᱞᱟᱹ ᱚᱡᱽᱨᱟ ᱟᱹᱨᱩᱵ ᱵᱚᱦᱮᱞ ᱜᱤᱰᱤᱜ
ᱫᱷᱟᱹᱨᱛᱤ ᱧᱮᱞᱚᱜ ᱡᱤᱭᱟᱹᱲ ᱞᱮᱜᱮᱡ ᱨᱤᱞᱟᱹᱢᱟᱞᱟ ᱾
ᱵᱷᱟᱫᱚᱨ ᱫᱟᱥᱟᱸᱭ ᱵᱚᱸᱜᱟ ᱦᱟᱣᱮᱫ ᱨᱤᱛᱩ ᱨᱮ ᱫᱚ
ᱤᱛᱟᱹ ᱡᱟᱝ ᱚᱢᱚᱱ ᱯᱚᱴᱠᱚᱡ ᱥᱟᱠᱟᱢ ᱫᱟᱞᱟᱭ ᱫᱟᱞᱟᱭᱚᱜ
ᱩᱥᱩᱞ ᱵᱩᱨᱩ ᱠᱷᱚᱱ ᱚᱛ ᱯᱷᱮᱰ ᱫᱷᱩᱵᱤ ᱛᱟᱥᱟᱫ
ᱦᱟᱹᱨᱭᱟᱹᱲ ᱞᱩᱜᱽᱲᱤ ᱛᱮ ᱡᱮᱢᱚᱱ ᱵᱟᱸᱫᱮ ᱯᱟᱴᱷᱮ ᱠᱚᱜ ᱾
ᱥᱚᱦᱨᱟᱭ ᱟᱜᱷᱟᱬ ᱵᱚᱸᱜᱟ ᱦᱮᱢᱟᱞ ᱨᱤᱛᱩ ᱨᱮᱢᱟ
ᱵᱟᱹᱫᱽ ᱵᱟᱹᱭᱦᱟᱹᱲ ᱠᱷᱮᱛᱨᱮ ᱵᱤᱞᱤᱜ ᱪᱟᱥ ᱠᱤᱨᱥᱤ
ᱥᱚᱱᱟ ᱵᱚᱨᱚᱱ ᱦᱳᱲᱳ ᱜᱮᱞᱮ ᱞᱮᱭᱚᱨ ᱠᱚᱫᱚᱨᱚᱜ
ᱛᱤᱨᱩᱵ ᱤᱸᱜᱩᱫ ᱥᱟᱹᱨᱤ ᱡᱚᱦᱟᱨᱟᱭ ᱠᱟᱱ ᱵᱚᱥᱢᱚᱛᱤ ᱾
ᱯᱩᱥ ᱢᱟᱜᱽ ᱵᱚᱸᱜᱟ ᱠᱟᱱᱠᱟᱱᱟᱣ ᱨᱟᱵᱟᱝ ᱨᱤᱛᱩ ᱨᱮ
ᱦᱚᱲᱢᱚ ᱴᱷᱩᱨᱩ ᱴᱷᱩᱨᱩ ᱨᱩᱠᱩᱼᱨᱩᱢᱩᱜ ᱛᱩᱠᱩᱱ ᱨᱮᱭᱟᱲᱟ
ᱥᱮᱛᱟᱜ ᱥᱮᱛᱟᱜ ᱫᱷᱩᱸᱫᱽ ᱠᱩᱦᱲᱟᱹ ᱜᱩᱨᱞᱟᱹᱣ
ᱪᱟᱸᱫᱚ ᱵᱚᱸᱜᱟ ᱦᱚᱸ ᱵᱟᱭ ᱧᱮᱞ ᱦᱚᱫᱚᱜ ᱩᱥᱟᱹᱨᱟ ᱾
ᱯᱷᱟᱹᱜᱩᱱ ᱪᱟᱹᱛ ᱵᱚᱸᱜᱟ ᱱᱤᱨᱚᱲ ᱨᱤᱛᱩ ᱨᱮ ᱠᱷᱟᱱ
ᱛᱷᱚᱯᱮ ᱛᱷᱚᱯᱮ ᱰᱟᱹᱨ ᱨᱮ ᱵᱟᱦᱟ ᱵᱷᱩᱴᱩᱜ ᱵᱩᱥᱟᱹᱲᱚᱜ
ᱡᱚ ᱵᱤᱞᱤ ᱠᱚᱲ ᱯᱟᱠᱚᱲ ᱥᱟᱵᱚᱜ ᱡᱷᱟᱝᱠᱟ ᱡᱷᱟᱹᱠᱩᱨ
ᱦᱚᱭ ᱨᱮ ᱴᱟᱝᱠᱟ ᱴᱟᱹᱠᱩᱨ ᱮᱱᱮᱡ ᱰᱷᱤᱞᱣᱟᱹᱝᱼᱚᱜ ᱾
ᱵᱟᱹᱭᱥᱟᱹᱠ ᱡᱷᱮᱸᱴ ᱵᱚᱸᱜᱟ ᱨᱩᱴᱷᱤ ᱥᱤᱛᱩᱝ ᱨᱤᱛᱩ ᱨᱮ
ᱟᱦᱟᱨ ᱯᱩᱠᱷᱨᱤ ᱠᱩᱸᱭ ᱨᱮᱱᱟᱜ ᱫᱟᱜ ᱟᱸᱡᱮᱫ ᱟᱡᱹᱟᱣᱲᱤᱜ
ᱫᱷᱟᱹᱨᱛᱤ ᱮᱫᱽᱨᱮ ᱟᱠᱟᱱ ᱞᱮᱠᱟ ᱫᱩᱲᱩᱭ ᱫᱩᱲᱩᱭ ᱞᱚᱞᱚᱜ
ᱚᱠᱟ ᱛᱮ ᱦᱚᱸ ᱵᱟᱢ ᱪᱟᱞᱟᱣ ᱫᱟᱲᱮᱭᱟᱜ ᱟᱹᱛᱷᱟᱹᱣᱲᱤᱜ ᱾
ᱤᱱᱤ ᱪᱟᱸᱫᱚ ᱤᱱᱠᱩ ᱤᱯᱤᱞ ᱤᱱᱟᱹ ᱜᱮ ᱚᱣᱟᱝ ᱨᱮ
ᱵᱤᱨ ᱵᱩᱨᱩ ᱜᱟᱰᱟ ᱡᱷᱟᱨᱱᱟ ᱦᱚᱸ ᱚᱱᱟ ᱠᱚ ᱜᱮ
ᱱᱚᱣᱟ ᱥᱤᱨᱡᱚᱱ ᱥᱤᱨᱤᱡᱽ ᱟᱠᱟᱱ ᱦᱤᱞᱚᱜ ᱠᱷᱚᱱᱟᱜ
ᱨᱤᱛᱩ ᱜᱮ ᱟᱹᱨᱩ ᱯᱷᱮᱨᱟᱣᱜ ᱠᱟᱱ ᱫᱷᱟᱹᱨᱛᱤ ᱨᱮ ᱾
***
