ᱢᱤᱫᱴᱟᱹᱝ ᱵᱩᱰᱷᱤ ᱵᱤᱨ ᱛᱟᱞᱟ ᱛᱮ ᱥᱟᱦᱟᱱ ᱧᱟᱢ ᱮ ᱥᱮᱱ ᱟᱠᱟᱱᱟ ᱾ ᱥᱟᱦᱟᱱ ᱠᱚ ᱧᱟᱢ ᱠᱟᱛᱮᱭ ᱛᱚᱞ ᱢᱤᱫ ᱠᱮᱫᱼᱟ, ᱤᱠᱷᱟᱹᱱ ᱫᱤᱯᱤᱞ ᱵᱤᱫᱟᱹᱞ ᱢᱟ ᱵᱟᱭ ᱫᱤᱯᱤᱞ ᱫᱟᱲᱮᱭᱟᱜ ᱠᱟᱱᱟ ᱾ ᱟᱨ ᱦᱚᱲ ᱠᱚᱦᱚᱸ ᱚᱠᱚᱭ ᱦᱚᱸ ᱥᱩᱨ ᱠᱚᱨᱮ ᱵᱟᱭ ᱧᱮᱞ ᱧᱟᱢ ᱮᱫ ᱠᱚᱣᱟ, ᱚᱠᱚᱭ ᱥᱟᱦᱟᱱ ᱮ ᱫᱤᱯᱤᱞ ᱚᱪᱚ ᱠᱚ ᱞᱟᱹᱜᱤᱫ ᱾ ᱟᱫᱚ ᱟᱹᱛᱷᱟᱹᱣᱲᱤ ᱜᱮᱭ ᱦᱚᱦᱚ ᱟᱠᱚ ᱠᱟᱱᱟ, ᱢᱮᱱᱮᱫ ᱟᱭ, ᱚᱠᱚᱭ ᱚᱠᱟᱨᱮ ᱢᱮᱱᱟᱜ ᱯᱮ ᱠᱷᱟᱱ ᱦᱤᱡᱩᱜ ᱯᱮᱥᱮ ᱜᱳ, ᱥᱟᱦᱟᱱ ᱠᱟᱹᱴᱤᱡ ᱫᱤᱯᱤᱞ ᱚᱴᱚᱣᱟᱹᱧ ᱯᱮ ᱾ ᱵᱟᱹᱧ ᱫᱤᱯᱤᱞ ᱫᱟᱲᱮᱭᱟᱜ ᱠᱟᱱ ᱫᱚ ᱾ ᱮᱱ ᱦᱚᱸ ᱪᱤᱞᱤ ᱦᱚᱸ ᱵᱟᱠᱚ ᱧᱮᱞᱚᱜ ᱠᱟᱱᱟ ᱾ ᱟᱫᱚ ᱩᱱᱤ ᱵᱩᱰᱷᱤ ᱫᱚ ᱟᱨ ᱢᱤᱫ ᱫᱷᱟᱣᱮ ᱦᱚᱦᱚ ᱠᱮᱫᱼᱟ ᱾ ᱮᱜᱳ! ᱱᱚᱶᱟ ᱠᱚᱨᱮ ᱚᱠᱚᱭ ᱠᱚ ᱢᱮᱱᱟᱜ ᱯᱮ ᱠᱷᱟᱱ ᱫᱮᱞᱟ ᱥᱮ ᱥᱟᱦᱟᱱ ᱫᱤᱯᱤᱞ ᱜᱚᱫ ᱟᱹᱧ ᱯᱮ, ᱫᱤᱯᱤᱞ ᱟᱹᱧ ᱠᱷᱟᱱ ᱫᱚᱯᱮ ᱢᱤᱫᱴᱟᱹᱝ ᱦᱚᱯᱚᱱ ᱮᱨᱟᱹᱧ ᱮᱢᱟᱯᱮᱭᱟ ᱾
ᱟᱫᱚ ᱚᱱᱠᱟ ᱜᱮ ᱵᱟᱨ ᱯᱮ ᱫᱷᱟᱣᱮ ᱦᱚᱦᱚ ᱠᱮᱫ ᱠᱷᱟᱱ ᱢᱤᱫᱴᱟᱹᱝ ᱨᱚᱴᱮ ᱪᱩᱲᱩᱵ ᱪᱩᱲᱩᱵ ᱫᱚᱱ ᱟᱛᱮᱭ ᱦᱮᱡ ᱮᱱᱟ ᱾ ᱟᱨ ᱩᱱᱤ ᱵᱩᱰᱷᱤᱭ ᱢᱮᱛᱟᱭ ᱠᱟᱱᱟ, ᱮᱱᱟᱝ ᱠᱷᱚᱱᱮᱢ ᱦᱚᱦᱚ ᱵᱟᱲᱟᱭᱮᱫᱼᱟ ᱵᱩᱰᱤ ᱟᱭᱳ ᱚᱠᱚᱭ ᱦᱚᱸ ᱵᱟᱝ ᱠᱚ ᱦᱮᱡ ᱞᱮᱱᱟ, ᱚᱱᱟᱛᱮ ᱤᱧᱤᱧ ᱦᱮᱡ ᱮᱱᱟ ᱾ ᱢᱟᱛᱚᱵᱮ ᱠᱟᱺᱦᱰᱩᱢ ᱵᱮᱱᱟᱣ ᱢᱮ ᱟᱨ ᱥᱟᱦᱟᱱ ᱫᱚ ᱤᱧ ᱜᱮᱹᱧ ᱫᱤᱯᱤᱞ ᱟᱢᱟ ᱾ ᱟᱫᱚ ᱩᱱᱤ ᱵᱩᱰᱷᱤᱭ ᱢᱮᱱᱮᱫᱼᱟ, ᱦᱚᱭ ᱜᱳ, ᱫᱤᱯᱤᱞ ᱢᱟᱢ ᱫᱤᱯᱤᱞ ᱟᱹᱧ ᱜᱮᱭᱟ, ᱢᱮᱱᱠᱷᱟᱱ ᱟᱢ ᱢᱟᱢ ᱨᱚᱴᱮ ᱠᱟᱱ ᱫᱚ, ᱪᱤᱠᱟᱹᱛᱮ ᱤᱧ ᱫᱚᱢ ᱥᱮᱴᱮᱨ ᱤᱧ ᱛᱮᱢ ᱫᱤᱯᱤᱞ ᱟᱹᱧᱟ ᱾
ᱟᱫᱚ ᱩᱱᱤ ᱨᱚᱴᱮᱭ ᱢᱮᱱ ᱠᱮᱫᱼᱟ, ᱦᱚᱭ ᱵᱩᱰᱤ ᱟᱭᱳ, ᱤᱧ ᱫᱚᱹᱧ ᱨᱚᱴᱮ ᱠᱟᱱ ᱨᱮᱦᱚᱸ ᱛᱚᱵᱮ ᱥᱟᱦᱟᱱ ᱫᱚᱹᱧ ᱫᱤᱯᱤᱞ ᱫᱟᱲᱮᱭᱟᱢ ᱜᱮᱭᱟ ᱟᱞᱚᱢ ᱵᱷᱟᱵᱽᱱᱟᱜᱼᱟ ᱾ ᱟᱫᱚ ᱩᱱᱤ ᱵᱩᱰᱷᱤ ᱢᱟ ᱢᱟᱬᱟᱝ ᱨᱮ ᱠᱟᱛᱷᱟᱭ ᱢᱮᱱ ᱟᱠᱟᱫᱼᱟ ᱡᱮ ᱚᱠᱚᱭ ᱥᱟᱦᱟᱱ ᱮ ᱫᱤᱯᱤᱞ ᱟᱹᱧᱟ, ᱩᱱᱤ ᱜᱮ ᱢᱤᱫᱴᱟᱹᱝ ᱦᱚᱯᱚᱱ ᱮᱨᱟᱹᱧ ᱮᱢᱟᱭᱟ ᱢᱮᱱᱛᱮ ᱾ ᱟᱨ ᱱᱩᱭ ᱢᱟᱭ ᱨᱚᱴᱮ ᱠᱟᱱᱟ, ᱦᱚᱯᱚᱱ ᱮᱨᱟ ᱫᱚ ᱪᱤᱠᱟᱹ ᱛᱮᱧ ᱮᱢᱟᱭᱟ ᱾ ᱟᱨ ᱡᱩᱫᱤᱧ ᱮᱢᱟᱭᱟ, ᱪᱮᱫ ᱞᱮᱠᱟᱨᱮᱭ ᱟᱹᱥᱩᱞ ᱮᱭᱟ ᱾
ᱟᱫᱚ ᱚᱱᱠᱟ ᱵᱷᱟᱹᱵᱤ ᱵᱟᱲᱟ ᱠᱟᱛᱮ ᱩᱱᱤ ᱵᱩᱰᱷᱤ ᱫᱚ, ᱩᱱᱤ ᱨᱚᱴᱮᱭ ᱢᱮᱛᱟᱭ ᱠᱟᱱᱟ, ᱦᱚᱭ ᱫᱤᱯᱤᱞ ᱢᱟᱢ ᱫᱤᱯᱤᱞ ᱟᱹᱧᱟ, ᱢᱮᱱᱠᱷᱟᱱ ᱤᱧ ᱢᱟ ᱦᱚᱯᱚᱱ ᱮᱨᱟ ᱮᱢᱚᱜ ᱤᱧ ᱢᱮᱱ ᱟᱠᱟᱫᱼᱟ ᱟᱨ ᱟᱢᱮᱢ ᱫᱤᱯᱤᱞ ᱟᱹᱧ ᱠᱷᱟᱱ ᱤᱧᱤᱧ ᱦᱚᱯᱚᱱ ᱮᱨᱟ ᱫᱚ ᱟᱹᱜᱩ ᱠᱟᱛᱮ ᱚᱠᱟᱨᱮᱢ ᱫᱚᱦᱚ ᱮᱭᱟ ᱟᱨ ᱪᱮᱫ ᱮᱢ ᱡᱚᱢ ᱚᱪᱚ ᱮᱭᱟ ? ᱟᱫᱚ ᱩᱱᱤ ᱨᱚᱴᱮᱭ ᱢᱮᱱᱮᱫᱼᱟ, ᱟᱢ ᱡᱩᱫᱤ ᱠᱟᱛᱷᱟᱢ ᱮᱢ ᱟᱠᱟᱫᱼᱟ ᱦᱚᱯᱚᱱ ᱮᱨᱟ ᱮᱢᱚᱜ, ᱟᱢᱤᱡ ᱦᱚᱯᱚᱱ ᱮᱨᱟ ᱟᱹᱜᱩ ᱠᱟᱛᱮ ᱨᱟᱹᱱᱤ ᱞᱮᱠᱟᱹᱧ ᱫᱚᱦᱚ ᱮᱭᱟ ᱾ ᱡᱚᱢᱟᱜ ᱧᱩᱣᱟᱜ, ᱞᱩᱜᱽᱲᱤ ᱞᱟᱯᱚ, ᱪᱮᱫ ᱛᱮᱦᱚᱸ ᱵᱟᱭ ᱚᱵᱷᱟᱵᱚᱜᱼᱟ, ᱤᱧ ᱪᱮᱛᱟᱱ ᱨᱮ ᱯᱟᱹᱛᱭᱟᱹᱣ ᱫᱚᱦᱚᱭ ᱢᱮ ᱾ ᱤᱧ ᱦᱚᱸ ᱟᱢ ᱠᱟᱛᱷᱟᱹᱧ ᱮᱢᱟᱢ ᱠᱟᱱᱟ ᱾ ᱟᱫᱚ ᱤᱱᱟᱹᱜ ᱠᱷᱟᱱ ᱩᱱᱤ ᱵᱩᱰᱷᱤᱭ ᱢᱮᱱᱮᱫᱼᱟ, ᱦᱚᱭ ᱛᱚᱵᱮ ᱪᱚᱞᱚ ᱥᱟᱦᱟᱱ ᱫᱤᱯᱤᱞ ᱟᱹᱧ ᱢᱮ ᱟᱨ ᱤᱧ ᱥᱟᱶᱛᱮ ᱟᱞᱮ ᱚᱲᱟᱜ ᱛᱮᱹᱧ ᱤᱫᱤ ᱛᱟᱨᱟ ᱢᱮᱭᱟ ᱾ ᱟᱫᱚ ᱩᱱᱤ ᱵᱩᱰᱷᱤ ᱫᱚ ᱩᱱᱤ ᱨᱚᱴᱮ ᱟᱠᱚ ᱚᱲᱟᱜ ᱛᱮᱭ ᱤᱫᱤ ᱛᱟᱨᱟ ᱠᱮᱫᱮᱭᱟ ᱾ ᱟᱫᱚ ᱥᱟᱦᱟᱱ ᱠᱚ ᱫᱚᱦᱚ ᱵᱟᱲᱟ ᱠᱟᱛᱮ ᱚᱲᱟᱜ ᱥᱮᱫ ᱨᱮ ᱩᱱᱤ ᱨᱚᱴᱮ ᱦᱚᱸ ᱢᱟᱹᱪᱤ ᱠᱚ ᱵᱤᱞ ᱠᱟᱛᱮᱭ ᱫᱩᱲᱩᱵ ᱠᱮᱫᱮᱭᱟ ᱾ ᱟᱫᱚ ᱩᱱᱤ ᱵᱩᱰᱷᱤ ᱫᱚ ᱚᱲᱟᱜ ᱥᱮᱫ ᱵᱚᱞᱚ ᱠᱟᱛᱮ ᱟᱡᱤᱡ ᱦᱚᱯᱚᱱ ᱮᱨᱟ ᱡᱷᱚᱛᱚ ᱠᱟᱛᱷᱟᱭ ᱞᱟᱹᱭ ᱟᱫᱮᱭᱟ ᱡᱮ ᱮᱻ ᱵᱤᱴᱤ ᱟᱢ ᱫᱚ ᱱᱩᱭ ᱴᱷᱮᱱ ᱤᱧ ᱡᱟᱶᱟᱭ ᱢᱮᱭᱟ ᱟᱨ ᱢᱟ ᱟᱢ ᱫᱚ ᱫᱟᱠᱟ ᱩᱛᱩ ᱠᱚ ᱪᱚᱸᱫᱟᱭ ᱢᱮ ᱟᱨ ᱡᱚᱢ ᱧᱩ ᱵᱟᱲᱟ ᱠᱟᱛᱮ ᱥᱟᱡᱟᱣ ᱥᱟᱯᱲᱟᱣ ᱠᱟᱛᱮ ᱟᱢ ᱫᱚ ᱡᱟᱶᱟᱭ ᱚᱲᱟᱜ ᱛᱮᱹᱧ ᱵᱤᱫᱟᱹᱭ ᱢᱮᱭᱟ ᱾
ᱟᱫᱚ ᱫᱟᱠᱟ ᱩᱛᱩ ᱠᱚ ᱤᱥᱤᱱ ᱵᱟᱲᱟ ᱠᱟᱛᱮ ᱡᱚᱢ ᱧᱩ ᱵᱟᱲᱟ ᱠᱟᱛᱮ ᱩᱱᱤ ᱠᱩᱲᱤ ᱫᱚ ᱩᱱᱤ ᱨᱚᱴᱮ ᱡᱟᱶᱟᱭ ᱴᱷᱮᱱ ᱜᱮᱭ ᱡᱟᱶᱟᱭ ᱠᱮᱫᱮᱭᱟ ᱾ ᱟᱨ ᱨᱚᱱᱮᱵᱚᱱᱮ ᱥᱟᱡᱟᱣ ᱥᱟᱯᱲᱟᱣ ᱠᱟᱛᱮ ᱠᱚ ᱵᱤᱫᱟᱹᱭ ᱠᱮᱫ ᱠᱤᱱᱟ ᱾ ᱟᱨ ᱩᱱᱤ ᱨᱚᱴᱮ ᱡᱟᱶᱟᱭ ᱦᱚᱸ ᱩᱱᱤ ᱠᱩᱲᱤ ᱵᱟᱹᱦᱩ ᱨᱩᱯ ᱛᱮ ᱟᱠᱚ ᱚᱲᱟᱜ ᱮ ᱤᱫᱤ ᱠᱮᱫᱮᱭᱟ ᱟᱨ ᱚᱲᱟᱜ ᱨᱮ ᱡᱚᱛᱚ ᱠᱚᱜᱮ ᱢᱮᱱᱟᱜ ᱠᱚᱣᱟ ᱟᱭᱳ ᱵᱟᱵᱟ ᱠᱚᱦᱚᱸ ᱾ ᱟᱨ ᱩᱱᱤ ᱠᱩᱲᱤ ᱦᱚᱸ ᱚᱱᱟ ᱚᱲᱟᱜ ᱨᱮ ᱱᱟᱯᱟᱭ ᱨᱮᱜᱮ ᱵᱟᱹᱦᱩ ᱠᱩᱲᱤ ᱟᱨᱵᱟᱝ ᱨᱟᱡᱟ ᱨᱟᱹᱱᱤ ᱞᱮᱠᱟ ᱜᱮᱭ ᱛᱟᱦᱮᱸ ᱮᱱᱟ ᱩᱱᱤ ᱨᱚᱴᱮ ᱡᱟᱶᱟᱭ ᱴᱷᱮᱱ ᱾
ᱟᱫᱚ ᱩᱱᱤ ᱨᱚᱴᱮ ᱠᱚᱲᱟ ᱫᱚ ᱫᱤᱱᱟᱹᱢ ᱜᱮ ᱛᱟᱞᱟ ᱧᱤᱫᱟᱹ ᱦᱚᱲ ᱠᱚ ᱡᱟᱹᱯᱤᱫ ᱥᱟᱲᱟ ᱥᱟᱹᱛᱤᱧ ᱞᱮᱱᱠᱷᱟᱱ ᱨᱚᱴᱮ ᱠᱷᱚᱱᱟᱜ ᱚᱰᱚᱠ ᱠᱟᱛᱮ ᱦᱚᱲᱚᱜ ᱟᱭ ᱟᱨ ᱟᱡᱟᱜ ᱨᱩᱯ ᱫᱚ ᱥᱚᱨᱚᱜᱽ ᱯᱩᱨᱤ ᱨᱤᱱᱤᱡ ᱵᱚᱸᱜᱟ ᱠᱚᱲᱟ ᱠᱟᱱᱟᱭ ᱠᱩᱱᱟᱹᱢᱤ ᱪᱟᱸᱫᱚ ᱞᱮᱠᱟ ᱢᱚᱦᱚᱨ ᱢᱩᱴᱷᱟᱹᱱ ᱛᱟᱭ ᱾ ᱟᱫᱚ ᱨᱚᱱᱮ ᱵᱚᱱᱮ ᱥᱟᱡᱟᱣ ᱥᱟᱯᱲᱟᱣ ᱠᱟᱛᱮ ᱥᱚᱨᱚᱜᱽ ᱨᱤᱱ ᱵᱚᱸᱜᱟ ᱠᱚᱲᱟ ᱴᱷᱮᱱ ᱡᱩᱣᱟᱹ ᱮᱱᱮᱡ ᱮ ᱥᱮᱱᱚᱜᱼᱟ ᱾ ᱟᱨ ᱥᱤᱢᱨᱟᱜ ᱛᱟᱭᱚᱢ ᱛᱮᱫᱚ ᱥᱚᱨᱚᱜᱽ ᱠᱷᱚᱱᱟᱜ ᱟᱬᱜᱚ ᱦᱮᱡ ᱠᱟᱛᱮ ᱟᱨ ᱦᱚᱸ ᱚᱱᱟ ᱨᱚᱴᱮ ᱵᱷᱤᱛᱨᱤ ᱜᱮᱭ ᱵᱚᱞᱚ ᱠᱚᱜᱼᱟ ᱾ ᱟᱫᱚ ᱚᱱᱟ ᱦᱚᱲ ᱨᱩᱯ ᱫᱚ ᱪᱤᱞᱤ ᱴᱷᱮᱱ ᱦᱚᱸ ᱵᱟᱭ ᱥᱚᱫᱚᱨ ᱟᱠᱟᱱᱟ ᱾
ᱢᱤᱫ ᱫᱤᱱ ᱫᱚ ᱠᱩᱱᱟᱹᱢᱤ ᱪᱟᱸᱫᱚ ᱛᱮᱨᱫᱮᱡ ᱢᱟᱨᱥᱟᱞ ᱨᱮ ᱡᱟᱣ ᱞᱮᱠᱟᱜᱮ ᱨᱚᱴᱮ ᱠᱷᱚᱱᱟᱜ ᱚᱰᱚᱠ ᱠᱟᱛᱮ ᱨᱚᱢᱡᱷᱚᱢ ᱨᱚᱵᱮᱵᱚᱱᱮ ᱥᱟᱡᱟᱣ ᱥᱟᱯᱲᱟᱣ ᱠᱟᱛᱮ ᱚᱰᱚᱠ ᱪᱟᱞᱟᱜ ᱠᱟᱱ ᱚᱠᱛᱚ ᱨᱮ ᱟᱡ ᱦᱟᱛᱚᱢ ᱫᱚᱭ ᱧᱮᱞ ᱠᱮᱫᱮᱭᱟ ᱾ ᱟᱫᱚ ᱫᱚᱥᱟᱨ ᱦᱤᱞᱚᱜ ᱫᱚ ᱩᱱᱤ ᱵᱟᱹᱦᱩ ᱠᱩᱲᱤ ᱫᱚᱭ ᱞᱟᱹᱭᱟᱭ ᱠᱟᱱᱟ ᱡᱮ, ᱮ ᱵᱟᱹᱦᱩ, ᱦᱚᱢᱚᱱᱚᱧ ᱫᱚ ᱨᱚᱴᱮ ᱫᱚᱭ ᱵᱟᱝ ᱠᱟᱱᱟ ᱾ ᱵᱚᱸᱜᱟ ᱠᱚᱲᱟ ᱠᱟᱱᱟᱭ, ᱤᱧ ᱛᱮᱦᱮᱧ ᱧᱤᱫᱟᱹᱧ ᱧᱮᱞ ᱟᱠᱟᱫᱮᱭᱟ ᱾ ᱨᱚᱱᱮᱵᱚᱱᱮ ᱥᱟᱡᱟᱣ ᱠᱟᱛᱮ ᱚᱠᱟᱛᱮ ᱪᱚᱭ ᱥᱮᱱ ᱮᱱᱟ ᱾ ᱟᱫᱚ ᱩᱱᱤ ᱵᱟᱹᱦᱩ ᱠᱩᱲᱤ ᱫᱚ ᱵᱟᱭ ᱯᱟᱹᱛᱭᱟᱹᱣᱜ ᱠᱟᱱᱟ ᱾ ᱢᱮᱱᱮᱫ ᱟᱭ, ᱥᱟᱹᱨᱤ ᱥᱮ ᱦᱟᱛᱚᱢ ᱤᱧ ᱢᱟ ᱯᱟᱹᱛᱭᱟᱹᱣ ᱦᱚᱸ ᱵᱟᱝ ᱦᱮᱡ ᱟᱹᱧ ᱠᱟᱱᱟ ᱾ ᱟᱫᱚ ᱟᱡ ᱦᱟᱛᱚᱢ ᱮ ᱢᱮᱱᱮᱫᱼᱟ, ᱵᱟᱹᱦᱩ, ᱡᱩᱫᱤ ᱵᱟᱹᱵᱤᱱ ᱯᱟᱹᱛᱭᱟᱹᱣᱜ ᱠᱟᱱᱟ, ᱟᱹᱵᱤᱱ ᱠᱩᱱᱟᱹᱢᱤ ᱩᱶᱟᱹᱥ ᱧᱤᱸᱫᱟᱹ ᱛᱟᱬᱟᱜ ᱟᱭ ᱵᱤᱱ ᱟᱞᱚ ᱵᱤᱱ ᱡᱟᱹᱯᱤᱫᱟ ᱾ ᱟᱨ ᱡᱩᱫᱤ ᱪᱟᱞᱟᱜ ᱵᱤᱱ ᱧᱮᱞᱮ ᱠᱷᱟᱱ ᱟᱡ ᱨᱩᱣᱟᱹᱲ ᱡᱚᱦᱚᱜ ᱚᱱᱟ ᱨᱚᱴᱮ ᱨᱮ ᱟᱹᱣᱨᱤ ᱵᱚᱞᱚᱱ ᱢᱟᱬᱟᱝ ᱨᱮ ᱟᱡᱟᱜ ᱚᱱᱟ ᱨᱚᱴᱮ ᱠᱷᱚᱞ ᱫᱚ ᱟᱛᱟᱨᱟᱜ ᱛᱟᱭ ᱵᱤᱱ ᱾ ᱟᱫᱚ ᱤᱱᱟᱹ ᱠᱷᱟᱱ ᱡᱚᱛᱚ ᱫᱤᱱ ᱞᱟᱹᱜᱤᱫ ᱜᱮ ᱦᱚᱲ ᱨᱩᱯ ᱨᱮᱭ ᱛᱟᱦᱮᱸ ᱫᱚᱦᱚᱜᱼᱟ ᱾
ᱟᱫᱚ ᱩᱱᱤ ᱵᱟᱹᱦᱩ ᱠᱩᱲᱤ ᱦᱚᱸ ᱟᱡ ᱦᱟᱛᱚᱢᱟᱜ ᱠᱟᱛᱷᱟ ᱞᱮᱠᱟᱛᱮ ᱜᱮ ᱠᱩᱱᱟᱹᱢᱤ, ᱟᱢᱵᱟᱵᱟᱹᱥᱤᱭᱟᱹ ᱧᱤᱫᱟᱹᱭ ᱛᱟᱬᱟᱜ ᱟᱫᱮᱭᱟ ᱾ ᱟᱫᱚ ᱥᱟᱹᱨᱤ ᱜᱮ ᱛᱟᱞᱟ ᱟᱫᱷᱟ ᱧᱤᱫᱟᱹᱭ ᱧᱮᱞ ᱠᱮᱫᱮᱭᱟ, ᱨᱚᱴᱮ ᱠᱷᱚᱱ ᱚᱰᱚᱠ ᱠᱟᱛᱮ ᱥᱤᱱᱟᱹᱢ ᱵᱚᱸᱜᱟ ᱠᱚᱲᱟ ᱜᱮ ᱨᱚᱱᱮ ᱵᱚᱱᱮ ᱡᱷᱚᱢᱚᱨ ᱡᱷᱚᱢᱚᱨ ᱮ ᱥᱟᱡᱟᱣ ᱮᱱᱟ ᱠᱩᱱᱟᱹᱢᱤ ᱪᱟᱸᱫᱚ ᱞᱮᱠᱟ ᱨᱩᱯ ᱢᱚᱦᱚᱨ ᱛᱟᱭ ᱢᱟ ᱾ ᱟᱫᱚ ᱥᱮᱨᱢᱟ ᱥᱚᱨᱚᱜᱽ ᱯᱩᱨᱤ ᱛᱮᱭ ᱨᱟᱠᱟᱵ ᱪᱟᱞᱟᱣ ᱮᱱᱟ ᱾ ᱟᱫᱚ ᱩᱱᱤ ᱵᱟᱹᱦᱩ ᱠᱩᱲᱤ ᱫᱚ ᱟᱨ ᱦᱚᱸ ᱟᱡ ᱡᱟᱶᱟᱭᱟᱜ ᱦᱤᱡᱩᱜ ᱦᱚᱨ ᱠᱚᱭᱚᱜ ᱨᱮᱭ ᱛᱟᱬᱟᱜ ᱛᱟᱦᱮᱸ ᱮᱱᱟ ᱾ ᱟᱫᱚ ᱴᱷᱤᱠ ᱥᱤᱢᱨᱟᱜ ᱚᱠᱛᱚ ᱨᱩᱣᱟᱹᱲ ᱦᱮᱡ ᱮᱱ ᱡᱚᱦᱚᱜ ᱩᱱᱤ ᱵᱟᱹᱦᱩ ᱠᱩᱲᱤ ᱫᱚ ᱟᱡ ᱡᱟᱶᱟᱭᱟᱜ ᱚᱱᱟ ᱨᱚᱴᱮ ᱠᱷᱚᱞ ᱫᱚ ᱢᱟᱹᱨ ᱫᱮᱭᱟᱥᱤᱞ ᱮ ᱩᱨᱩᱫ ᱟᱫ ᱛᱮᱭ ᱟᱛᱟᱨ ᱠᱮᱫᱼᱟ ᱾ ᱤᱱᱟᱹ ᱠᱷᱟᱱ ᱩᱱᱤ ᱡᱟᱶᱟᱭ ᱛᱟᱭ ᱦᱚᱸ ᱫᱟᱹᱲ ᱠᱟᱛᱮᱭ ᱦᱮᱡ ᱮᱱᱟ ᱾ ᱢᱮᱱᱮᱫ ᱟᱭ, ᱮᱦᱮ ! ᱮᱦᱮ! ᱤᱧᱟᱜ ᱚᱲᱟᱜ ᱢᱟ ᱞᱚᱜ ᱠᱟᱱ ᱛᱤᱧ ᱫᱚ !! ᱟᱫᱚ ᱟᱡ ᱫᱟᱹᱲ ᱥᱮᱴᱮᱨ ᱵᱟᱲᱟᱜ ᱛᱮᱜᱮ ᱚᱱᱟ ᱨᱚᱴᱮ ᱯᱚᱥᱟᱠ ᱫᱚ ᱞᱚ ᱛᱚᱨᱚᱡ ᱪᱟᱵᱟᱭᱮᱱ ᱛᱟᱭᱟ ᱾ ᱟᱫᱚ ᱤᱱᱟᱹ ᱦᱤᱞᱚᱜ ᱠᱷᱚᱱᱟᱜ ᱫᱚ ᱦᱚᱲ ᱠᱟᱛᱮ ᱜᱮᱭ ᱛᱟᱦᱮᱸ ᱮᱱᱟ ᱾ ᱟᱨ ᱟᱡ ᱵᱟᱹᱦᱩ ᱥᱟᱶᱛᱮ ᱱᱟᱶᱟ ᱥᱚᱝᱥᱟᱨ ᱮ ᱵᱮᱱᱟᱣ ᱠᱮᱫᱼᱟ ᱾ ᱟᱨ ᱟᱹᱰᱤ ᱠᱩᱥᱤ ᱨᱟᱹᱥᱠᱟᱹ ᱨᱮᱠᱚ ᱛᱟᱦᱮᱸ ᱮᱱᱟ ᱥᱟᱱᱟᱢ ᱚᱲᱟᱜ ᱦᱚᱲ ᱠᱚ ᱥᱟᱶ ᱦᱚᱸ ᱾
***
