ᱡᱷᱩᱴᱤ ᱨᱮᱢᱟᱢ ᱞᱟᱜᱟᱣ ᱟᱠᱟᱫ
ᱥᱩᱫ ᱵᱟᱦᱟ ᱯᱟᱱ ᱠᱟᱱᱴᱟ
ᱥᱚᱵᱷᱟ ᱵᱟᱝ ᱜᱮᱢ ᱟᱹᱭᱠᱟᱹᱣ ᱞᱮᱫ ᱛᱮ
ᱨᱮᱵᱮᱫ ᱟᱠᱟᱣᱟᱱᱟᱢ ᱵᱟᱡᱟᱨ ᱵᱟᱦᱟ ᱿
ᱥᱩᱫ ᱵᱟᱦᱟ ᱨᱮ ᱜᱚᱨᱚᱵᱽ ᱵᱟᱹᱱᱩᱜ
ᱵᱟᱡᱟᱨ ᱵᱟᱦᱟ ᱨᱮ ᱜᱚᱨᱚᱵᱽ
ᱥᱩᱫ ᱵᱟᱦᱟ ᱨᱮ ᱢᱟᱱᱚᱛ ᱵᱟᱹᱱᱩᱜ
ᱫᱟᱯᱟᱞ ᱠᱮᱫ ᱟᱢ ᱵᱟᱡᱟᱨ ᱵᱟᱦᱟ ᱛᱮ ᱿
ᱥᱟᱹᱛᱣᱟᱹ ᱵᱮᱱᱟᱣ ᱥᱩᱫ ᱵᱟᱦᱟ
ᱫᱟᱢ ᱛᱮᱢ ᱠᱤᱨᱤᱧ ᱟᱠᱟᱫ
ᱮᱱ ᱦᱚᱸ ᱵᱟᱡᱟᱨ ᱵᱟᱦᱟ ᱛᱮᱜᱮ
ᱟᱢ ᱫᱚᱢ ᱥᱟᱡᱟᱣ ᱟᱠᱟᱱ ᱿
ᱥᱩᱫ ᱵᱟᱦᱟ ᱯᱟᱱ ᱠᱟᱱᱴᱟ ᱠᱤᱞᱤᱯ ᱛᱮᱜᱮ
ᱟᱢ ᱫᱚᱢ ᱥᱚᱵᱷᱟᱜᱼᱟ
ᱛᱤᱨᱞᱟᱹ ᱟᱢᱟᱜ ᱥᱟᱡᱽ ᱠᱟᱱᱟ
ᱱᱩᱱᱟᱹᱜ ᱟᱞᱚᱢ ᱚᱱᱦᱮᱲᱟᱭᱟ ᱿
ᱯᱟᱸᱲᱦᱟᱸᱰ ᱯᱟᱹᱧᱪᱤ ᱯᱟᱴᱷᱮ ᱵᱟᱸᱫᱮ
ᱵᱟᱸᱫᱮ ᱟᱞᱚᱢ ᱞᱟᱡᱟᱣᱜ
ᱥᱟᱡᱽ ᱜᱚᱭᱱᱟ ᱨᱩᱱᱩᱼᱡᱷᱩᱱᱩ
ᱦᱚᱨᱚᱜ ᱟᱞᱚᱢ ᱵᱷᱟᱡᱟᱜ ᱿
ᱵᱟᱯᱞᱟ ᱵᱮᱦᱟ ᱵᱟᱦᱟ ᱥᱚᱦᱨᱟᱭ
ᱢᱮᱱᱟᱜ ᱛᱟᱢᱟ ᱯᱟᱨᱟᱵᱽ
ᱚᱠᱛᱚ ᱡᱟᱹᱱᱤᱡ ᱥᱟᱡᱟᱣᱜ ᱢᱮ
ᱫᱤᱱᱟᱹᱢ ᱨᱩᱱᱩᱼᱡᱷᱩᱱᱩ ᱿
ᱵᱟᱦᱟ ᱥᱚᱦᱨᱟᱭ ᱫᱚᱝ ᱞᱟᱸᱜᱽᱲᱮ
ᱮᱱᱮᱡ ᱢᱮ ᱵᱤᱫᱽᱞᱟᱹᱭ ᱼᱥᱟᱫᱽᱞᱟᱭ
ᱱᱚᱣᱟ ᱡᱚᱱᱚᱢ ᱟᱫᱚ ᱵᱟᱭ ᱧᱟᱢᱚᱜ
ᱛᱟᱦᱮᱱ ᱢᱮ ᱠᱩᱥᱤ ᱨᱟᱹᱥᱠᱟᱹ ᱿
***
