ᱥᱩᱠ

ᱡᱤᱭᱚᱱ ᱨᱮ ᱥᱩᱠ ᱫᱚ ᱞᱟᱹᱠᱛᱤ
ᱥᱩᱠ ᱧᱟᱢ ᱞᱟᱜᱟᱱ ᱛᱮ
ᱢᱚᱱᱮ ᱡᱤᱣᱤ ᱦᱚᱸ ᱵᱟᱹᱣᱲᱤ ᱾

ᱚᱠᱚᱭ ᱵᱟᱰᱟᱭ ᱚᱠᱟ ᱨᱮ
ᱥᱩᱠ ᱫᱚ ᱢᱮᱱᱟᱜ
ᱚᱠᱚᱭ ᱵᱟᱰᱟᱭ ᱚᱠᱟᱨᱮ
ᱱᱤᱨᱟᱹᱭ ᱫᱚ ᱧᱟᱢᱚᱜ
ᱮᱱ ᱦᱚᱸ ᱢᱚᱱᱮ ᱡᱤᱣᱤᱭ ᱨᱟᱜᱽ ᱾

ᱥᱩᱠ ᱧᱟᱢ ᱞᱟᱜᱟᱱ ᱛᱮ
ᱫᱤᱥᱚᱢ ᱫᱤᱥᱚᱢ ᱦᱚᱸ ᱫᱟᱲᱟᱭ
ᱵᱟᱡᱟᱨ ᱵᱟᱡᱟᱨ ᱦᱚᱸ ᱫᱟᱲᱟᱭ
ᱫᱷᱚᱨᱚᱢ ᱫᱷᱚᱨᱚᱢ ᱦᱚᱸ ᱯᱟᱸᱡᱟᱭ
ᱮᱱ ᱦᱚᱸ ᱥᱩᱠ ᱜᱮ ᱵᱟᱭ ᱧᱟᱢᱚᱜ ᱾

ᱥᱩᱠ ᱧᱟᱢ ᱞᱟᱜᱟᱱ ᱛᱮ
ᱵᱚᱸᱜᱟ ᱵᱳᱨᱳ ᱦᱚᱸ ᱵᱚᱫᱚᱞ
ᱫᱷᱚᱨᱚᱢ ᱠᱚᱨᱚᱢ ᱦᱚᱸ ᱵᱚᱫᱚᱞ
ᱡᱚᱢ ᱧᱩ ᱦᱚᱸ ᱵᱚᱫᱚᱞ
ᱮᱱ ᱦᱚᱸ ᱱᱤᱨᱟᱹᱭ ᱜᱮ ᱵᱟᱭ ᱧᱟᱢᱚᱜ ᱾

ᱡᱤᱭᱚᱱ ᱨᱮ ᱫᱩᱠ ᱜᱮ ᱵᱟᱹᱲᱛᱤ
ᱫᱩᱠ ᱫᱚᱨᱮᱭᱟ ᱨᱮᱜᱮᱢ
ᱩᱱᱩᱢ ᱰᱩᱵᱩᱡ ᱡᱟᱹᱥᱛᱤ
ᱫᱩᱠ ᱢᱩᱦᱤᱢ ᱠᱷᱚᱱ
ᱥᱟᱦᱟ ᱞᱟᱜᱟᱱ ᱛᱮ
ᱡᱤᱣᱤ ᱦᱚᱲᱢᱚ ᱦᱚᱸ ᱱᱟᱥᱟᱶ ᱜᱚᱫᱟᱢ
ᱮᱱ ᱦᱚᱸ ᱥᱩᱠ ᱜᱮ ᱵᱟᱭ ᱧᱟᱢᱚᱜ ᱾

ᱫᱷᱟᱹᱨᱛᱤ ᱨᱮᱜᱮ ᱵᱟᱹᱱᱩᱜᱼᱟ ᱯᱟᱞᱮ
ᱚᱱᱠᱟᱱ ᱴᱷᱟᱶ ᱡᱟᱦᱟᱸ ᱨᱮ
ᱥᱩᱠ ᱟᱨ ᱥᱩᱠ ᱢᱮᱱᱟᱜ
ᱢᱤᱨᱛᱤᱠᱟ ᱨᱮᱜᱮ ᱵᱟᱹᱱᱩᱜ
ᱚᱱᱠᱟᱱ ᱫᱤᱥᱚᱢ ᱜᱮ
ᱡᱟᱦᱟᱸ ᱨᱮ ᱱᱤᱨᱟᱹᱭ ᱟᱨ ᱱᱤᱨᱟᱹᱭ ᱧᱟᱢᱚᱜ ᱾

ᱡᱤᱭᱚᱱ ᱨᱮ ᱥᱩᱠ ᱮᱢ ᱠᱷᱚᱡᱽ ᱠᱷᱟᱱ
ᱫᱩᱠ ᱥᱟᱦᱟᱣ ᱦᱩᱭ ᱟᱢ
ᱫᱩᱠ ᱥᱟᱶ ᱜᱮᱥᱮᱨ ᱦᱩᱭ ᱟᱢ
ᱫᱩᱠ ᱥᱟᱶ ᱜᱚᱭᱚᱱ ᱦᱩᱭ ᱟᱢ
ᱫᱩᱠ ᱥᱟᱶ ᱛᱟᱯᱟᱢ ᱦᱩᱭ ᱟᱢ
ᱩᱱᱤ ᱥᱟᱶ ᱡᱤᱛᱠᱟᱹᱨ ᱦᱩᱭ ᱟᱢ
ᱛᱮᱵᱮ ᱜᱮ ᱥᱩᱠ ᱫᱚ ᱧᱟᱢᱚᱜ ᱾

ᱠᱟᱛᱷᱟ ᱨᱮ ᱢᱮᱱᱟᱜ
ᱥᱮᱸᱜᱮᱞ ᱢᱮᱱᱟᱜ ᱠᱷᱟᱱ
ᱚᱸᱰᱮ ᱫᱷᱩᱶᱟᱹᱜ
ᱫᱷᱩᱶᱟᱹ ᱢᱮᱱᱟᱜ ᱠᱷᱟᱱ
ᱚᱸᱰᱮ ᱥᱮᱸᱜᱮᱞ ᱡᱩᱞᱩᱜ
ᱥᱩᱠ ᱢᱮᱱᱟᱜ ᱠᱷᱟᱱ
ᱫᱩᱠ ᱫᱚ ᱦᱤᱡᱩᱜ
ᱫᱩᱠ ᱢᱮᱱᱟᱜ ᱠᱷᱟᱱ
ᱥᱩᱠ ᱫᱚ ᱦᱤᱡᱩᱜ ᱾

ᱡᱤᱭᱚᱱ ᱨᱮ ᱥᱩᱠ ᱢᱮᱱᱟᱜ
ᱠᱷᱟᱱ ᱡᱟᱦᱟᱸ ᱨᱮᱜᱮᱢ
ᱛᱟᱦᱮᱸᱱ ᱡᱤᱭᱚᱱ ᱨᱮ
ᱥᱩᱠ ᱫᱚ ᱧᱟᱢᱚᱜ ᱾

***