ᱡᱤᱨᱤᱦᱤᱨᱤ ᱪᱟᱸᱫᱚᱭ ᱨᱟᱠᱟᱵ
ᱠᱟᱢᱥᱟᱣ ᱠᱟᱛᱮ ᱦᱤᱡᱩᱜ ᱥᱤᱧ ᱥᱟᱫᱚᱢ,
ᱟᱦᱞᱟ ᱟᱹᱭᱠᱟᱹᱣ ᱠᱟᱛᱮ ᱧᱩᱛᱟᱹᱛ
ᱜᱤᱛᱤᱡ ᱟᱴᱮᱫ ᱥᱟᱢᱴᱟᱣ ᱠᱟᱛᱮ ᱟᱛᱚᱢ ᱾
ᱵᱩᱰᱷᱤ ᱯᱟᱨᱠᱚᱢ ᱜᱟᱹᱭ ᱰᱟᱦᱟᱨ
ᱡᱟᱞᱟᱫ ᱡᱩᱞᱩᱫ ᱵᱷᱩᱨᱠᱟᱹᱜ ᱤᱯᱤᱞ,
ᱥᱤᱧ ᱪᱟᱸᱫᱚ ᱚᱜᱚᱢ ᱫᱚᱨᱮᱭᱟ ᱨᱮ
ᱟᱸᱜᱮᱱ ᱮᱱ ᱠᱚ ᱥᱟᱱᱟᱢ ᱟᱨᱟᱬ ᱤᱯᱤᱞ ᱾
ᱩᱢ ᱨᱟᱠᱟᱵ ᱫᱟᱨᱮ ᱱᱟᱹᱲᱤ ᱜᱷᱟᱥ
ᱫᱤᱯᱤᱞ ᱠᱮᱫ ᱠᱚ ᱥᱤᱥᱤᱨ ᱦᱤᱨᱟᱹ ᱵᱟᱹᱛᱤ,
ᱥᱮᱨᱮᱧ ᱟᱛᱮ ᱰᱤᱸᱜᱚᱨ ᱵᱷᱟᱶᱟᱨ
ᱵᱮᱨᱮᱫ ᱠᱚᱭ ᱥᱟᱱᱟᱢ ᱵᱷᱩᱴᱩᱜ ᱢᱟᱹᱞᱤ ᱾
ᱮᱵᱷᱮᱱ ᱮᱱ ᱠᱚ ᱪᱮᱬᱮᱼᱪᱤᱯᱨᱩᱜ
ᱨᱟᱹᱲ ᱠᱮᱫ ᱠᱚ ᱥᱟᱱᱟᱢ ᱯᱤᱨᱩᱼᱯᱤᱨᱩ,
ᱵᱟᱹᱜᱤ ᱠᱟᱛᱮ ᱜᱤᱛᱤᱡ ᱯᱟᱨᱠᱚᱢ
ᱫᱷᱩᱨᱟᱹᱣ ᱮᱱᱟᱭ ᱪᱷᱟᱹᱱᱤ ᱜᱮᱜᱮᱫ ᱪᱟᱹᱢᱨᱩ ᱾
ᱱᱟᱦᱮᱞ ᱟᱨᱟᱬ ᱜᱚᱜ ᱠᱟᱛᱮ
ᱪᱟᱹᱢᱨᱩ ᱨᱮᱞᱟᱣ ᱮᱱᱟᱭ ᱜᱩᱯᱤ ᱠᱟᱹᱱᱦᱟᱹᱭ ᱥᱟᱶ,
ᱥᱤᱭᱩᱜ ᱞᱟᱹᱜᱤᱫ ᱠᱷᱮᱨᱱᱟ ᱵᱟᱹᱭᱦᱟᱹᱣ
ᱯᱟᱨᱚᱢ ᱠᱟᱛᱮ ᱵᱤᱨ ᱜᱟᱡᱟᱲ ᱢᱟᱶᱼᱢᱟᱶ ᱾
ᱨᱟᱪᱟ ᱪᱷᱟᱴᱠᱟ ᱪᱷᱮᱨᱮᱡᱼᱪᱷᱮᱨᱮᱡ
ᱟᱸᱫᱚᱲ ᱮᱱᱟ ᱴᱚᱞᱟ ᱯᱟᱲᱟ ᱨᱮ,
ᱵᱟᱹᱴᱤ ᱞᱚᱴᱟ ᱛᱟᱹᱠᱤᱡᱼᱛᱟᱹᱯᱟᱹᱠᱤᱡ
ᱟᱹᱛᱩ ᱵᱟᱦᱮᱨ ᱟᱦᱟᱨ ᱜᱷᱟᱴ ᱨᱮ ᱾
ᱜᱤᱫᱟᱹᱨ ᱠᱚ ᱨᱮᱞᱟᱣ ᱮᱱ ᱟᱹᱠᱤᱞ ᱥᱮᱬᱟ
ᱰᱩᱝᱨᱤ ᱯᱟᱨᱚᱢ ᱚᱞᱚᱜ ᱟᱥᱲᱟ ᱛᱮ,
ᱞᱤᱯᱤ, ᱞᱩᱛᱤ, ᱥᱤᱱᱜᱚ ᱟᱨ ᱰᱷᱮᱬᱟ
ᱜᱩᱨᱤᱡ ᱜᱤᱰᱤ ᱴᱷᱮᱠᱟ ᱵᱟᱹᱜᱤ ᱠᱟᱛᱮ ᱾
***
