ᱡᱟᱹᱞᱤ ᱩᱢᱮᱨ ᱵᱩᱥᱟᱹᱲ ᱵᱟᱦᱟ
ᱥᱟᱜᱮᱱ ᱞᱮᱜᱮᱡ ᱟᱥᱟ,
ᱩᱲᱩᱫ ᱩᱲᱩᱫ ᱩᱰᱟᱹᱣ ᱢᱚᱱᱮ
ᱠᱩᱞᱦᱤ ᱫᱷᱩᱲᱤᱨᱮ ᱠᱟᱢᱥᱟᱜ ᱾
ᱱᱤᱨᱚᱲ ᱢᱚᱱᱮ ᱵᱟᱦᱟ ᱞᱮᱠᱟ
ᱯᱷᱩᱴᱟᱹᱣ ᱨᱟᱠᱟᱵ ᱜᱚᱫᱚᱜᱼᱟ,
ᱦᱤᱥᱟᱹ ᱥᱩᱭᱟᱹ ᱦᱤᱨᱠᱟᱹ ᱟᱹᱲᱤᱥ
ᱯᱟᱯ ᱜᱮ ᱵᱟᱹᱱᱩᱜᱼᱟ ᱾
ᱦᱮᱥᱮᱡ ᱥᱮᱠᱮᱡ ᱜᱟᱛᱮ ᱛᱩᱞᱩᱡ
ᱫᱟᱹᱲ ᱜᱷᱤᱴ ᱜᱷᱤᱴ ᱠᱩᱞᱦᱤ ᱨᱮ,
ᱜᱮᱱᱮᱡ ᱜᱮᱱᱮᱡ ᱡᱟᱸᱜᱟ ᱯᱟᱸᱡᱟ ᱫᱚ
ᱧᱮᱞᱚᱜ ᱠᱩᱞᱦᱤ ᱫᱷᱩᱲᱤᱨᱮ ᱾
ᱥᱟᱨᱚ ᱢᱤᱨᱩ ᱟᱲᱟᱝ ᱥᱤᱱᱟᱹᱢ
ᱨᱚᱲ ᱫᱚ ᱴᱮᱲᱮᱡ ᱴᱮᱲᱮᱡ,
ᱢᱚᱡᱽ ᱜᱮ ᱚᱲᱟᱜ ᱵᱟᱠᱷᱳᱞ
ᱞᱟᱸᱫᱟ ᱦᱚᱸ ᱠᱷᱮᱱᱮ ᱠᱷᱮᱡ ᱾
ᱟᱫᱷᱟ ᱟᱫᱷᱟ ᱵᱟᱞᱮ ᱠᱩᱪᱤ
ᱨᱚᱲ ᱫᱚ ᱵᱮᱲᱮᱡ ᱵᱮᱲᱮᱡ,
ᱥᱚᱱᱚᱭ ᱥᱚᱯᱷᱚᱭ ᱱᱤᱨᱚᱲ ᱢᱚᱱᱮ
ᱢᱮᱱᱟᱜ ᱫᱩᱞᱟᱹᱲ ᱯᱮᱨᱮᱡ ᱾
ᱚᱸᱵᱟᱜ ᱡᱟᱯᱟᱜ ᱠᱤᱰᱟᱹ ᱢᱟᱰᱟ
ᱪᱟᱪᱳ ᱠᱮᱴᱮᱡ ᱛᱟᱲᱟᱢ ᱥᱟᱱᱟ,
ᱡᱟᱱᱟᱢ ᱟᱭᱳ ᱛᱤ ᱫᱚᱭ ᱞᱟᱦᱟᱭ
ᱞᱟᱹᱭᱟᱭ ᱫᱮᱞᱟ ᱥᱚᱱᱟ ᱾
ᱟᱭᱳ ᱦᱚᱦᱚ ᱢᱚᱱᱮᱭ ᱟᱫᱟᱭ
ᱩᱯᱷᱞᱟᱹᱜ ᱛᱟᱲᱟᱢ ᱥᱟᱱᱟ,
ᱛᱟᱺᱦᱩ ᱛᱟᱺᱦᱩ ᱵᱷᱚᱨᱥᱟ ᱠᱩᱲᱟᱹᱜ
ᱵᱟᱭ ᱵᱟᱛᱟᱣᱼᱟ ᱢᱟᱱᱟ ᱾
ᱞᱟᱞᱮ ᱪᱟᱯᱮ ᱨᱟᱹᱥᱠᱟᱹ ᱥᱟᱨᱮᱲ
ᱠᱤᱫᱚᱡ ᱠᱚᱫᱚᱡ ᱛᱟᱲᱟᱢ,
ᱪᱚᱜ ᱪᱮᱯᱮᱨᱮᱡ ᱥᱤᱵᱤᱞ ᱫᱩᱞᱟᱹᱲ
ᱢᱚᱱᱮ ᱫᱚᱭ ᱟᱫᱟ ᱠᱟᱛᱟᱢ ᱾
ᱜᱷᱟᱱᱮ ᱨᱟᱜᱟᱭ ᱜᱷᱟᱱᱮ ᱞᱟᱸᱫᱟᱭ
ᱜᱷᱟᱱᱮ ᱠᱷᱟᱹᱞᱤ ᱚᱡᱟᱭ,
ᱦᱟᱹᱞ ᱵᱟᱹᱞᱭᱟᱹ ᱥᱤᱥᱩ ᱢᱚᱱᱮ
ᱦᱟᱱᱟ ᱱᱟᱣᱟ ᱥᱟᱵᱟᱭ ᱾
ᱨᱮᱡ ᱨᱮᱯᱮᱡ ᱡᱳᱨ ᱡᱩᱞᱩᱢ
ᱨᱟᱜ ᱛᱮ ᱫᱟᱲᱮ ᱟᱭ,
ᱥᱟᱫᱮᱨ ᱥᱚᱱᱟᱭ ᱞᱟᱸᱫᱟᱭ ᱨᱮᱫᱚ
ᱢᱚᱱᱮ ᱡᱤᱣᱤ ᱫᱚᱭ ᱟᱫᱟᱭ ᱾
ᱩᱫᱟᱹᱨ ᱯᱚᱨᱟᱱ ᱥᱤᱥᱩ ᱢᱚᱱᱮ
ᱟᱹᱰᱤ ᱜᱮᱪᱮ ᱱᱟᱯᱟᱭ,
ᱠᱩᱨᱩ ᱢᱩᱴᱩ ᱢᱟᱨᱟᱝ ᱠᱚᱼᱟᱜ
ᱦᱚᱨ ᱜᱮ ᱯᱟᱱᱛᱮᱭᱟᱭ ᱾
ᱟᱹᱴᱤᱠ ᱪᱩᱴᱤᱡ ᱪᱩᱞᱩᱝ ᱵᱩᱴᱩᱝ
ᱜᱚᱴᱟᱭ ᱰᱩᱸᱰᱷᱟᱹᱣ ᱵᱟᱲᱟᱭ,
ᱚᱠᱟ ᱵᱩᱜᱤ ᱚᱠᱟ ᱵᱟᱹᱲᱤᱡ
ᱱᱟᱥᱮ ᱦᱚᱸ ᱵᱟᱝ ᱮ ᱵᱟᱰᱟᱭ ᱾
ᱢᱚᱱᱮ ᱢᱟᱛᱟᱭ ᱱᱤᱨᱚᱲ ᱱᱤᱨᱟᱹᱭ
ᱨᱟᱹᱭᱞᱟᱹ ᱯᱷᱟᱹᱭᱞᱟᱹ ᱥᱟᱯᱷᱟ,
ᱚᱠᱟ ᱦᱚᱨᱛᱮᱢ ᱟᱹᱭᱩᱨ ᱮᱭᱟ
ᱚᱱᱟᱜᱮ ᱩᱱᱤᱭ ᱥᱟᱵᱟ ᱾
ᱟᱹᱭᱩᱨ ᱟᱹᱭᱩᱨ ᱜᱩᱭᱩᱨ ᱜᱩᱭᱩᱨ
ᱟᱢᱟᱜ ᱦᱚᱨ ᱜᱮ ᱯᱟᱸᱡᱟᱭ,
ᱥᱤᱥᱩ ᱢᱚᱱᱮ ᱟᱹᱦᱤ ᱵᱷᱟᱹᱵᱤ
ᱪᱮᱫ ᱪᱚ ᱱᱟᱦᱟᱜ ᱠᱷᱚᱡᱟᱭ ᱾
ᱟᱡ ᱠᱩᱥᱤ ᱠᱷᱤᱞᱳᱲ ᱵᱟᱲᱟᱭ
ᱢᱚᱱᱮ ᱨᱮᱛᱟᱭ ᱛᱤᱱᱟᱹᱜ ᱟᱥᱟ,
ᱢᱮᱱᱟᱜ ᱟᱱᱟᱝ ᱚᱱᱛᱚᱨ ᱵᱷᱤᱛᱤᱨ
ᱡᱷᱚᱛᱚᱢ ᱩᱠᱩ ᱵᱟᱥᱟ ᱾
***
