ᱫᱟᱨᱮ ᱱᱟᱹᱲᱤ ᱨᱮ ᱵᱟᱦᱟ ᱢᱳᱦᱮᱜ
ᱯᱷᱟᱹᱜᱩᱱ ᱢᱮᱱᱟᱜ ᱛᱮ,
ᱠᱩᱭᱞᱤ ᱪᱮᱬᱮᱭ ᱠᱩᱦᱩ ᱠᱩᱦᱩᱭ
ᱥᱤᱵᱤᱞ ᱟᱲᱟᱝ ᱢᱮᱱᱟᱜ ᱛᱮ ᱾
ᱵᱟᱸᱫᱮᱞᱟ ᱨᱮ ᱵᱟᱦᱟ ᱫᱳᱞᱮᱜ
ᱦᱤᱥᱤᱫ ᱦᱚᱭ ᱢᱮᱱᱟᱜ ᱛᱮ,
ᱥᱤᱧᱼᱧᱤᱫᱟᱹ ᱪᱟᱸᱫᱳᱭ ᱨᱟᱠᱟᱵ
ᱫᱷᱟᱹᱨᱛᱤ ᱟᱹᱪᱩᱨᱚᱜ ᱛᱮ ᱾
ᱢᱟᱹᱱᱢᱤ ᱛᱟᱞᱟ ᱥᱤᱵᱤᱞ ᱥᱟᱹᱜᱟᱹᱭ
ᱫᱩᱞᱟᱹᱲ ᱢᱮᱱᱟᱜ ᱛᱮ,
ᱢᱤᱫ ᱥᱟᱶᱛᱮ ᱡᱤᱭᱚᱱ ᱵᱚ ᱠᱷᱟᱸᱰᱟᱣ
ᱜᱷᱟᱨᱚᱸᱡᱽ ᱢᱮᱱᱟᱜ ᱛᱮ ᱾
ᱥᱩᱠᱼᱫᱩᱠᱨᱮ, ᱫᱩᱜ ᱫᱟᱨᱟᱢ ᱨᱮ
ᱱᱟᱯᱟᱭ ᱥᱟᱹᱜᱟᱹᱭ ᱢᱮᱱᱟᱜ ᱛᱮ,
ᱢᱟᱹᱱᱢᱤ ᱛᱟᱞᱟ ᱢᱟᱯᱟᱜ ᱜᱚᱯᱚᱡ
ᱦᱤᱥᱠᱟᱹ ᱢᱮᱱᱟᱜ ᱛᱮ ᱾
ᱞᱚᱞᱚ ᱥᱤᱛᱩᱝ ᱩᱢᱩᱞ ᱠᱚᱜ ᱟᱢ
ᱡᱩᱨᱤ ᱩᱢᱩᱞ ᱢᱮᱱᱟᱜ ᱛᱮ,
ᱨᱟᱹᱥᱠᱟᱹᱼᱨᱚᱢᱚᱡᱽ, ᱨᱚᱲᱼᱞᱟᱸᱫᱟᱭᱟᱢ
ᱢᱚᱱᱮᱼᱡᱤᱣᱤ ᱢᱮᱱᱟᱜ ᱛᱮ ᱾
***
