ᱠᱩᱲᱤ ᱦᱚᱯᱚᱱ ᱠᱚ ᱞᱟᱹᱜᱤᱫ ᱕ ᱜᱚᱴᱟᱝ ᱡᱤᱭᱚᱱ ᱥᱮᱪᱮᱫ

᱑ᱹ ᱱᱤᱡᱮ ᱛᱮ ᱞᱤᱪᱟᱹᱲ ᱛᱤᱥ ᱦᱚᱸ ᱟᱞᱚᱢ ᱩᱭᱦᱟᱹᱨᱚᱜᱼᱟ –

ᱢᱚᱱᱮ ᱨᱮᱱᱟᱜ ᱫᱟᱲᱮ ᱜᱮ ᱟᱹᱰᱤ ᱢᱟᱨᱟᱝ ᱫᱟᱲᱮ ᱠᱟᱱᱟ ᱾ ᱟᱢ ᱡᱩᱫᱤ ᱢᱚᱱᱮ ᱛᱮ ᱞᱤᱪᱟᱹᱲ ᱮᱢ ᱩᱭᱦᱟᱹᱨᱚᱜᱼᱟ, ᱮᱱᱠᱷᱟᱱ ᱮᱢ ᱞᱤᱪᱟᱹᱲ ᱜᱮᱭᱟ ᱾ ᱦᱚᱲ ᱦᱚᱸ ᱠᱚ ᱯᱚᱥᱲᱟ ᱢᱮᱭᱟ ᱾ ᱚᱱᱟᱛᱮ ᱱᱤᱡᱮᱛᱮ ᱱᱤᱡᱮ ᱞᱤᱪᱟᱹᱲ ᱵᱟᱝ ᱩᱭᱦᱟᱹᱨ ᱠᱟᱛᱮ, ᱩᱭᱦᱟᱹᱨ ᱢᱮ ᱠᱤ ᱤᱧ ᱴᱷᱮᱱ ᱫᱚ ᱡᱚᱛᱚ ᱞᱮᱠᱟᱱ ᱫᱟᱲᱮ ᱢᱮᱱᱟᱜᱼᱟ ᱾ ᱥᱟᱢᱟᱝ ᱨᱮ ᱡᱟᱦᱟᱸ ᱞᱮᱠᱟᱱ ᱦᱟᱞᱟᱛ ᱜᱮ ᱦᱤᱡᱩᱜ ᱨᱮᱦᱚᱸ ᱜᱮ ᱥᱟᱢᱟᱝ ᱟᱹᱧ ᱟᱨ ᱡᱚᱛᱚᱣᱟᱜ ᱜᱮ ᱟᱹᱰᱤ ᱱᱟᱯᱟᱭ ᱛᱮᱜᱮᱹᱧ ᱥᱟᱸᱵᱽᱲᱟᱣᱟ ᱾

᱒ᱹ ᱢᱤᱫ ᱦᱩᱱᱟᱹᱨ ᱪᱮᱫᱽ ᱢᱮ –

ᱡᱤᱭᱚᱱ ᱨᱮ ᱚᱠᱟ ᱞᱮᱠᱟᱱ ᱫᱤᱱ ᱠᱚ ᱦᱤᱡᱩᱜᱼᱟ ᱵᱟᱝ ᱢᱮᱱᱚᱜᱚᱜᱼᱟ ᱾ ᱵᱮᱥ ᱵᱟᱹᱲᱤᱡ ᱢᱮᱱᱟᱜ ᱜᱮᱭᱟ ᱾ ᱵᱮᱥ ᱚᱠᱛᱚ ᱢᱮᱱᱟᱜ ᱡᱚᱦᱚᱜ ᱜᱮ ᱢᱤᱫ ᱦᱩᱱᱟᱹᱨ ᱪᱮᱫ ᱠᱟᱜ ᱢᱮ ᱾ ᱟᱨ ᱚᱱᱟ ᱦᱩᱱᱟᱹᱨ ᱫᱟᱲᱮ ᱛᱮᱜᱮ ᱢᱟᱬᱟᱝ ᱥᱮᱫ ᱞᱟᱦᱟᱜ ᱢᱮ ᱾ ᱞᱟᱹᱠᱛᱤ ᱯᱟᱲᱟᱣᱜ ᱠᱷᱟᱱ ᱚᱱᱟ ᱦᱩᱱᱟᱹᱨ ᱟᱨᱡᱟᱣ ᱨᱮᱱᱟᱜ ᱦᱚᱨ ᱵᱮᱱᱟᱣ ᱢᱮ ᱾ ᱟᱢᱟᱜ ᱜᱷᱟᱨᱚᱸᱡᱽ ᱨᱮᱱᱤᱡ ᱢᱤᱫ ᱟᱨᱡᱟᱣᱮᱫᱤᱡ ᱵᱮᱱᱟᱣᱜ ᱢᱮ ᱡᱩᱫᱤᱢ ᱫᱟᱲᱮᱭᱟᱜ ᱠᱷᱟᱱ ᱾ ᱦᱤᱡᱩᱜ ᱠᱟᱱ ᱫᱤᱱ ᱞᱟᱹᱜᱤᱫ ᱟᱢᱟᱜ ᱟᱨ ᱟᱢ ᱥᱟᱶᱛᱮ ᱟᱨ ᱢᱤᱫ ᱦᱚᱲᱟᱜ ᱦᱚᱸᱢ ᱵᱷᱟᱹᱞᱟᱹᱭ ᱫᱟᱲᱮᱭᱟᱜᱼᱟ ᱾ ᱟᱨ ᱵᱟᱹᱲᱤᱡ ᱚᱠᱛᱚ ᱨᱮᱦᱚᱸ ᱟᱢ ᱦᱚᱲ ᱴᱷᱮᱱ ᱠᱚᱠᱚᱭ ᱵᱟᱝ ᱦᱩᱭ ᱟᱢᱟ ᱾

᱓ᱹ ᱠᱩᱲᱤ ᱜᱤᱫᱽᱨᱟᱹ ᱠᱚ ᱠᱷᱩᱵ ᱯᱟᱲᱦᱟᱣ ᱚᱪᱚ ᱠᱚᱢ –

ᱧᱮᱞ ᱮᱫ ᱜᱮᱭᱟ ᱵᱚᱱ, ᱟᱵᱚ ᱥᱟᱶᱛᱟ ᱨᱮ ᱠᱩᱲᱤ ᱜᱤᱫᱽᱨᱟᱹ ᱠᱚ ᱱᱟᱥᱮ ᱠᱚ ᱞᱟᱹᱴᱩ ᱮᱱ ᱠᱷᱟᱱ ᱯᱮᱲᱟ ᱠᱚ ᱦᱤᱡᱩᱜᱼᱟ ᱟᱨ ᱵᱚᱱ ᱡᱟᱶᱟᱭ ᱠᱟᱠᱚ ᱠᱟᱱᱟ ᱾ ᱚᱞ ᱯᱟᱲᱦᱟᱣ ᱯᱩᱨᱟᱹᱣ ᱥᱮᱫ ᱫᱚ ᱵᱟᱝ ᱵᱚ ᱢᱚᱱᱮᱭᱮᱫᱼᱟ ᱾ ᱟᱭᱳ ᱵᱟᱵᱟ ᱟᱜ ᱦᱤᱥᱟᱹᱵᱽ ᱛᱮ ᱟᱵᱚᱣᱟᱜ ᱟᱺᱜᱤᱵᱷᱟᱨ ᱠᱟᱱᱟ ᱪᱤ ᱠᱚᱲᱟ ᱜᱤᱫᱽᱨᱟᱹ ᱞᱮᱠᱟ ᱜᱮ ᱠᱩᱲᱤ ᱜᱤᱫᱽᱨᱟᱹ ᱦᱚᱸᱵᱚ ᱚᱞ ᱯᱟᱲᱦᱟᱣ ᱚᱪᱚ ᱮᱭᱟ ᱾ ᱡᱩᱫᱤ ᱜᱟᱱᱚᱜ ᱠᱷᱟᱱ ᱢᱟᱬᱟᱝ ᱟᱡᱟᱜ ᱡᱟᱸᱜᱟ ᱛᱮ ᱛᱤᱸᱜᱩ ᱠᱮᱴᱮᱡ ᱚᱪᱚ ᱠᱟᱛᱮ ᱡᱟᱶᱟᱭ ᱮᱢ ᱾ ᱚᱱᱠᱟ ᱠᱷᱟᱱ ᱦᱤᱡᱩᱜ ᱠᱟᱱ ᱫᱤᱱ ᱨᱮ ᱟᱡᱟᱜ ᱠᱟᱹᱴᱤᱡ ᱠᱟᱹᱴᱤᱡ ᱞᱟᱹᱠᱛᱤ ᱡᱤᱱᱤᱥ ᱠᱚ ᱞᱟᱹᱜᱤᱫ ᱚᱠᱚᱭ ᱴᱷᱮᱱ ᱦᱚᱸ ᱞᱟᱫᱮᱜ ᱵᱟᱝ ᱦᱩᱭ ᱟᱭᱟ ᱾

᱔ᱹ ᱟᱢ ᱦᱚᱸ ᱟᱢᱟᱜ Qualification ᱵᱟᱰᱷᱟᱣ ᱢᱮ –

ᱟᱢ ᱦᱚᱸ ᱡᱩᱫᱤ ᱟᱭᱳ ᱵᱟᱵᱟ ᱠᱚ ᱞᱚᱜᱚᱱ ᱠᱚ ᱜᱚᱝ ᱟᱠᱟᱫ ᱢᱮᱭᱟ, ᱟᱨ ᱚᱱᱟ ᱤᱫᱤ ᱠᱟᱛᱮ ᱵᱟᱝ ᱮᱢ ᱚᱞ ᱯᱟᱲᱦᱟᱣ ᱫᱟᱲᱮᱭᱟᱫᱼᱟ, ᱱᱤᱛᱚᱜ ᱦᱚᱸᱢ ᱚᱞ ᱫᱟᱲᱮᱭᱟᱜ ᱜᱮᱭᱟ ᱾ Qualification ᱥᱮ ᱰᱤᱜᱽᱨᱤ ᱟᱢ ᱴᱷᱮᱱ ᱛᱟᱦᱮᱸᱱ ᱠᱷᱟᱱ ᱡᱟᱦᱟᱸ ᱛᱤᱥ ᱜᱮ ᱠᱟᱹᱢᱤ ᱨᱮ ᱦᱤᱡᱩᱜ ᱜᱮᱭᱟ ᱾ Distance ᱛᱮ ᱟᱹᱰᱤ ᱦᱚᱲ ᱠᱚ ᱚᱞᱚᱜ ᱠᱟᱱᱟ, ᱚᱲᱟᱜ ᱨᱮ ᱠᱟᱹᱢᱤ ᱠᱚ ᱪᱟᱵᱟ ᱠᱟᱛᱮ ᱚᱞᱚᱜ ᱠᱚ ᱫᱩᱲᱩᱵ ᱠᱟᱱᱟ, ᱟᱢ ᱦᱚᱸ ᱚᱞᱚᱜ ᱢᱮ ᱾

᱕ᱹ ᱵᱚᱸᱜᱟ ᱴᱷᱮᱱ ᱯᱟᱹᱛᱭᱟᱹᱣ ᱫᱚᱦᱚᱭ ᱢᱮ –

ᱵᱚᱸᱜᱟ ᱥᱮᱵᱟ ᱫᱚ ᱟᱹᱰᱤ ᱞᱟᱹᱠᱛᱤ ᱠᱟᱱ ᱜᱮᱭᱟ ᱾ ᱵᱚᱸᱜᱟ ᱠᱚ ᱠᱩᱥᱤ ᱨᱮᱠᱚ ᱛᱟᱦᱮᱸᱱ ᱠᱷᱟᱱ ᱟᱢᱟᱜ ᱚᱲᱟᱜ ᱫᱩᱣᱟᱹᱨ ᱦᱚᱸ ᱱᱟᱯᱟᱭ ᱜᱮ ᱛᱟᱦᱮᱸᱱᱟ ᱾ ᱥᱮᱛᱟᱜ ᱨᱮ ᱩᱢ ᱵᱟᱲᱟ ᱠᱟᱛᱮ ᱵᱚᱸᱜᱟ ᱥᱮᱵᱟ ᱠᱚᱢ ᱾ ᱟᱢᱟᱜ ᱡᱟᱦᱟᱸᱭ ᱵᱚᱸᱜᱟ ᱴᱷᱮᱱ ᱜᱮ ᱯᱟᱹᱛᱭᱟᱹᱣ ᱢᱮᱱᱟᱜᱼᱟ ᱾ ᱫᱤᱱ ᱜᱮ ᱥᱮᱵᱟ ᱮᱢ ᱟᱨ ᱵᱷᱚᱨᱚᱥᱟ ᱫᱚᱦᱚᱭ ᱢᱮ ᱾ ᱚᱱᱠᱟ ᱠᱷᱟᱱ ᱧᱮᱞᱟᱢ, ᱟᱢᱟᱜ ᱡᱤᱭᱚᱱ ᱨᱮ ᱡᱟᱦᱟᱸ ᱛᱤᱱᱟᱹᱜ ᱜᱮ ᱢᱩᱥᱠᱤᱞ ᱠᱚ ᱦᱤᱡᱩᱜ ᱨᱮᱦᱚᱸ ᱜᱮ ᱟᱞᱜᱟ ᱛᱮᱢ ᱥᱚᱞᱦᱮ ᱫᱟᱲᱮᱭᱟᱜᱼᱟ ᱾ ᱡᱚᱛᱚᱣᱟᱜ ᱜᱮ ᱟᱹᱰᱤ ᱟᱞᱜᱟᱢ ᱵᱩᱡᱷᱟᱹᱣᱟ ᱾

***