“ᱚᱠᱛᱚ” ᱟᱢ ᱫᱚᱢ ᱚᱠᱟ ᱞᱮᱠᱟᱱᱟ
ᱚᱠᱟ ᱞᱮᱠᱟ ᱛᱟᱢ ᱢᱚᱦᱚᱨ ᱢᱩᱴᱷᱟᱹᱱ
ᱵᱟᱝ ᱮᱢ ᱧᱮᱞᱚᱜ ᱵᱟᱝ ᱮᱢ ᱥᱚᱫᱚᱨᱚᱜ
ᱚᱠᱟᱨᱮ ᱟᱢ ᱫᱚ ᱢᱮᱱᱟᱢ ?
ᱚᱠᱛᱚ ᱟᱢ ᱫᱚ ᱚᱠᱚᱭ ᱞᱟᱹᱜᱤᱫ ᱦᱚᱸ
ᱵᱟᱝ ᱜᱮᱢ ᱛᱟᱦᱮᱱ ᱛᱟᱺᱜᱤ ᱨᱮ
ᱟᱢ ᱞᱟᱹᱜᱤᱫ ᱜᱮ ᱥᱟᱱᱟᱢ ᱦᱚᱲ ᱠᱚ
ᱛᱟᱦᱮᱱᱟ ᱛᱟᱺᱜᱤ ᱛᱟᱸᱬᱟᱜ ᱨᱮ ᱿
ᱵᱟᱝ ᱫᱚ ᱧᱮᱞᱚᱜ ᱨᱩᱯ ᱟᱢᱟᱜ
ᱵᱟᱝ ᱫᱚ ᱧᱮᱞᱚᱜ ᱨᱚᱝ ᱛᱟᱢ
ᱵᱟᱝ ᱫᱚ ᱜᱚᱲᱦᱚᱱ ᱵᱟᱝ ᱫᱚ ᱟᱲᱳᱝ
ᱵᱟᱝ ᱫᱚ ᱟᱸᱡᱚᱢᱚᱜ ᱨᱟᱦᱟ ᱟᱲᱟᱝ ᱿
ᱵᱟᱝ ᱮᱢ ᱨᱚᱲᱟ ᱵᱟᱝ ᱮᱢ ᱦᱚᱦᱚᱭᱟ
ᱛᱤᱥ ᱦᱚᱸ ᱵᱟᱝ ᱜᱮᱢ ᱫᱮᱞᱟ ᱟᱞᱮ
ᱢᱮᱱᱠᱷᱟᱱ ᱚᱠᱛᱚ ᱟᱢ ᱜᱮ ᱫᱤᱱᱟᱹᱢ
ᱟᱹᱭᱩᱨ ᱟᱠᱟᱢ ᱟᱹᱭᱩᱨ ᱟᱠᱟᱫ ᱞᱮ ᱟᱞᱮ ᱿
ᱵᱟᱹᱱᱩᱜ ᱟᱱᱟ ᱞᱟᱸᱜᱟ ᱟᱢᱟᱜ
ᱵᱟᱹᱱᱩᱜᱼᱟ ᱡᱤᱨᱟᱹᱣ ᱦᱚᱸ ᱛᱟᱢ
ᱚᱠᱚᱭ ᱦᱚᱦᱚ ᱛᱮᱦᱚᱸ ᱵᱟᱢ ᱛᱤᱸᱜᱩᱱ
ᱞᱮᱛᱟᱲ ᱞᱟᱦᱟ ᱟᱠᱟ ᱜᱮ ᱢᱮᱱᱟᱢ ᱿
ᱚᱠᱛᱚ ᱟᱢᱟᱜ ᱱᱩᱱᱟᱹᱜ ᱫᱟᱲᱮ
ᱡᱟᱱᱟᱢ ᱠᱷᱚᱱᱟᱜ ᱜᱩᱡᱩᱜ ᱫᱷᱟᱹᱵᱤᱡ
ᱟᱢᱟᱜ ᱠᱳᱞᱮ ᱨᱮ ᱠᱚ ᱦᱟᱨᱟ ᱵᱩᱨᱩᱜ
ᱡᱚᱛᱚ ᱠᱚ ᱜᱮ ᱵᱩᱜᱤ ᱟᱨ ᱵᱟᱹᱲᱤᱡ ᱿
ᱟᱢ ᱥᱟᱶᱛᱮ ᱛᱟᱲᱟᱢ ᱞᱟᱹᱜᱤᱫ
ᱡᱟᱦᱟᱸᱭ ᱜᱮ ᱠᱚ ᱜᱟᱛᱮᱜ ᱨᱮ ᱦᱚᱸ
ᱵᱩᱜᱤ ᱵᱟᱹᱲᱤᱡ ᱠᱟᱹᱢᱤ ᱨᱮᱱᱟᱜ ᱫᱚ
ᱟᱢ ᱜᱮᱢ ᱥᱚᱝᱼᱟ ᱠᱩᱲᱟᱹᱭ ᱦᱚᱸ ᱿
ᱵᱟᱹᱱᱩᱜ ᱛᱟᱢᱟ ᱵᱷᱮᱜᱮᱫ ᱟᱢᱟᱜ
ᱦᱩᱰᱤᱧ ᱢᱟᱨᱟᱝ ᱛᱟᱞᱟ ᱨᱮ
ᱚᱱᱟ ᱛᱮᱜᱮ ᱥᱟᱱᱟᱢ ᱠᱚ ᱜᱮ
ᱛᱟᱦᱮᱸ ᱱᱟᱠᱚ ᱟᱢ ᱥᱟᱶᱨᱮ ᱿
ᱵᱟᱢ ᱧᱮᱞᱚᱜᱼᱟ ᱢᱮᱫ ᱛᱮ
ᱵᱟᱢ ᱛᱟᱠᱮᱨᱚᱜ ᱞᱩᱛᱩᱨ ᱨᱮ
ᱮᱱ ᱦᱚᱸ ᱟᱢᱟᱜ ᱩᱢᱩᱞ ᱪᱷᱟᱯ ᱫᱚ
ᱵᱩᱡᱷᱟᱹᱣᱜᱼᱟ ᱢᱟᱹᱱᱢᱤ ᱡᱤᱭᱚᱱ ᱨᱮ ᱾᱾
***
