ᱢᱟᱨᱟᱝ ᱵᱟᱡᱟᱨ ᱨᱮ ᱛᱟᱦᱮᱸᱱᱟᱭ ᱾ ᱡᱟᱦᱟᱸᱨᱮ ᱛᱟᱦᱮᱸᱱᱟᱭ ᱚᱸᱰᱮ ᱢᱤᱫᱴᱟᱹᱝ ᱟᱥᱨᱚᱢ ᱢᱮᱱᱟᱜᱼᱟ ᱾ ᱚᱱᱟ ᱟᱥᱨᱚᱢ ᱨᱮᱫᱚ ᱦᱟᱲᱟᱢ ᱟᱨ ᱵᱩᱰᱷᱤ ᱠᱚ ᱛᱟᱦᱮᱸᱱᱟ ᱾ ᱚᱠᱛᱚ ᱠᱩᱧ ᱧᱟᱢ ᱞᱮᱠᱷᱟᱱ ᱤᱧ ᱚᱱᱟ ᱟᱥᱨᱚᱢ ᱥᱮᱫ ᱫᱟᱬᱟ ᱵᱟᱲᱟ ᱠᱟᱛᱤᱧ ᱨᱩᱣᱟᱹᱲᱟ, ᱩᱱᱠᱩ ᱥᱟᱞᱟᱜ ᱫᱩᱠᱷ ᱥᱩᱠᱷ ᱜᱟᱯᱟᱞ ᱢᱟᱨᱟᱣ ᱠᱟᱛᱤᱧ ᱨᱩᱣᱟᱹᱲᱟ ᱾
ᱤᱱᱟᱹ ᱦᱤᱞᱚᱜ ᱫᱚ ᱚᱱᱠᱟᱛᱮ ᱛᱟᱨᱟᱥᱤᱧ ᱵᱮᱲᱟ ᱛᱟᱦᱮᱸ ᱠᱟᱱᱟ ᱾ ᱢᱤᱫᱴᱟᱹᱝ ᱵᱩᱰᱤ ᱮᱨᱟ ᱫᱟᱨᱮ ᱩᱢᱩᱞ ᱨᱮ ᱫᱩᱲᱩᱵ ᱞᱮᱱ ᱛᱟᱦᱮᱸ ᱠᱟᱱᱟᱭ ᱾ ᱤᱧ ᱦᱚᱸ ᱩᱱᱤ ᱵᱩᱰᱤ ᱮᱨᱟ ᱥᱩᱨᱛᱤᱧ ᱪᱟᱞᱟᱣ ᱮᱱᱟ ᱟᱨ ᱟᱡ ᱥᱩᱨ ᱨᱤᱧ ᱫᱩᱲᱩᱵ ᱢᱮᱥᱟᱭᱮᱱᱟ ᱾ ᱟᱡ ᱥᱩᱨ ᱨᱮ ᱫᱩᱲᱩᱵ ᱠᱟᱛᱤᱧ ᱢᱮᱛᱟᱭ ᱠᱟᱱᱟᱼᱜᱚᱲᱚᱢ ᱵᱩᱰᱷᱤ ᱱᱚᱣᱟ ᱵᱟᱹᱭᱥᱟᱹᱛ ᱵᱚᱸᱜᱟ ᱛᱟᱨᱟᱥᱤᱧ ᱵᱮᱲᱟ ᱨᱮ ᱱᱚᱰᱮᱢ ᱫᱩᱲᱩᱵ ᱟᱠᱟᱱᱟ, ᱪᱮᱫ ᱞᱚᱞᱚ ᱦᱚᱭ ᱮᱢ ᱡᱚᱢ ᱮᱫᱟ ᱾ ᱟᱫᱚ ᱜᱚᱲᱚᱢ ᱵᱩᱰᱷᱤ ᱢᱤᱛᱟᱧ ᱠᱟᱱᱟᱭ ᱵᱟᱝᱟ ᱜᱚᱲᱚᱢ ᱵᱟᱹᱦᱩ ᱱᱚᱣᱟ ᱛᱟᱨᱟᱥᱤᱧ ᱵᱮᱲᱟ ᱨᱤᱱᱤᱡ ᱪᱟᱸᱫᱚ ᱜᱤᱧ ᱠᱚᱭᱚᱜ ᱟᱠᱟᱫᱮᱭᱟ ᱾ ᱪᱮᱫ ᱞᱮᱠᱟ ᱛᱟᱨᱟᱥᱤᱧ ᱵᱮᱲᱟ ᱨᱤᱱᱤᱡ ᱪᱟᱸᱫᱚ ᱠᱟᱹᱡ ᱠᱟᱹᱡ ᱛᱮ ᱦᱟᱹᱥᱩᱨ ᱤᱫᱤᱜ ᱠᱟᱱᱟᱭ ᱾
ᱦᱚᱸ ᱜᱚᱲᱚᱢ ᱵᱩᱰᱷᱤ,ᱱᱚᱣᱟ ᱛᱟᱨᱟᱥᱤᱧ ᱵᱮᱲᱟ ᱨᱤᱱᱤᱡ ᱪᱟᱸᱫᱚ ᱦᱚᱸᱭ ᱦᱟᱹᱥᱩᱨ ᱤᱫᱤᱜᱼᱟ ᱧᱩᱛ ᱦᱚᱸ ᱥᱮᱴᱮᱨ ᱤᱫᱤᱜᱼᱟ ᱾ ᱨᱮᱭᱟᱲ ᱦᱚᱭ ᱦᱚᱸᱭ ᱦᱚᱭᱟ ᱟᱨ ᱧᱩᱛ ᱦᱚᱸ ᱥᱮᱴᱮᱨᱚᱜᱼᱟ ᱾ ᱥᱮᱨᱢᱟ ᱨᱮ ᱤᱯᱤᱞ ᱮᱸᱜᱮᱞ ᱦᱚᱸ ᱠᱚ ᱨᱟᱠᱟᱵᱚᱜᱼᱟ ᱾ ᱡᱟᱦᱟᱸ ᱧᱮᱞᱚᱜ ᱠᱟᱱᱟ ᱜᱚᱲᱚᱢ ᱵᱩᱰᱷᱤ ᱟᱢᱟᱜ ᱡᱤᱵᱚᱱ ᱨᱮᱱᱟᱝ ᱛᱟᱨᱟᱥᱤᱧ ᱵᱮᱲᱟ ᱦᱟᱹᱥᱩᱨ ᱤᱫᱤᱜ ᱠᱟᱱᱟ ᱾ ᱟᱢ ᱫᱚᱢ ᱵᱟᱰᱟᱭ ᱫᱟᱲᱮᱭᱟᱜ ᱠᱟᱱᱟ ?
ᱮ ᱜᱚᱲᱚᱢ ᱵᱟᱹᱦᱩ, ᱤᱧᱟᱜ ᱡᱤᱵᱚᱱ ᱨᱮᱱᱟᱝ ᱛᱟᱨᱟᱥᱤᱧ ᱵᱮᱲᱟ ᱫᱚ ᱛᱤᱱᱟᱹᱜ ᱫᱤᱱ ᱢᱟᱬᱟᱝᱨᱮ ᱦᱟᱹᱥᱩᱨ ᱥᱟᱹᱨᱤ ᱟᱠᱟᱱᱟ ᱾ ᱱᱤᱛᱚᱜ ᱫᱚ ᱤᱧᱟᱜ ᱦᱚᱲᱢᱚ ᱜᱮ ᱦᱟᱹᱥᱩᱨᱚᱜ ᱨᱮᱱᱟᱜ ᱵᱟᱹᱠᱤ ᱢᱮᱱᱟᱜᱼᱟ ᱾
ᱤᱧ ᱫᱚ ᱟᱭᱳ ᱵᱟᱵᱟᱭᱤᱡ ᱢᱟᱨᱟᱝ ᱦᱚᱯᱚᱱ ᱮᱨᱟᱧ ᱛᱟᱦᱮᱸ ᱠᱟᱱᱟ ᱾ ᱤᱧᱟᱜ ᱞᱟᱛᱟᱨ ᱨᱮ ᱵᱟᱨᱭᱟ ᱠᱚᱲᱟ ᱵᱚᱭᱦᱟ ᱠᱤᱱ ᱛᱟᱦᱮᱸ ᱠᱟᱱᱟ ᱾ ᱤᱧ ᱫᱚ ᱦᱮᱸᱫᱮᱭᱟᱧ ᱢᱮᱱᱛᱮ ᱚᱠᱚᱭ ᱦᱚᱸ ᱵᱟᱝ ᱠᱚ ᱫᱩᱞᱟᱹᱲᱤᱧᱟ ᱾ ᱟᱭᱳ ᱵᱟᱵᱟ ᱦᱚᱸ ᱵᱟᱝ ᱠᱤᱱ ᱫᱩᱞᱟᱹᱲᱤᱧᱟ ᱪᱮ ᱤᱧ ᱨᱤᱱ ᱦᱩᱰᱤᱧ ᱵᱚᱭᱦᱟ ᱦᱚᱸ ᱵᱟᱝᱠᱤᱱ ᱫᱩᱞᱟᱹᱲᱤᱧᱟ ᱾ ᱤᱧ ᱦᱮᱸᱫᱮ ᱤᱫᱤᱠᱟᱛᱮ ᱟᱞᱮ ᱚᱲᱟᱜ ᱨᱤᱱ ᱡᱚᱛᱚ ᱦᱚᱲᱜᱮ ᱦᱤᱨᱠᱟᱹ ᱜᱮᱠᱚ ᱧᱮᱞᱤᱧᱟ ᱾ ᱚᱲᱟᱜ ᱨᱮᱱᱟᱜ ᱡᱚᱛᱚᱣᱟᱜ ᱨᱮ ᱛᱟᱭᱚᱢ ᱨᱮᱜᱮ ᱠᱚ ᱫᱚᱦᱚᱭᱤᱧᱟ ᱾ ᱡᱚᱢ ᱧᱩ ᱨᱮ ᱟᱨ ᱵᱟᱝ ᱦᱚᱨᱚᱜ ᱵᱟᱺᱫᱮ ᱨᱮᱦᱚᱸ ᱤᱧ ᱫᱚ ᱟᱹᱰᱤ ᱠᱚᱢ ᱨᱮᱜᱤᱧ ᱛᱟᱦᱮᱸᱱ ᱠᱟᱱ ᱛᱟᱦᱮᱸ ᱫᱚᱜ ᱾ ᱤᱧᱟᱜ ᱯᱟᱲᱦᱟᱣ ᱨᱮ ᱟᱹᱰᱤ ᱡᱩᱨᱜᱮ ᱢᱚᱱᱮ ᱛᱟᱹᱧ ᱛᱟᱦᱮᱸ ᱠᱟᱱᱟ ᱾ ᱤᱠᱷᱟᱹᱱ ᱯᱩᱱ ᱪᱟᱹᱱᱚᱪ ᱨᱮᱱᱟᱝ ᱤᱧᱟᱜ ᱯᱚᱛᱚᱵ ᱦᱚᱸ ᱠᱚ ᱨᱮᱡ ᱤᱫᱤ ᱠᱤᱫᱤᱧᱟ ᱥᱟᱶᱛᱮ ᱤᱧᱟᱜ ᱛᱤ ᱠᱷᱚᱱᱟᱜ ᱱᱚᱱᱚᱞ ᱦᱚᱸ ᱠᱚ ᱪᱷᱟᱰᱟᱣ ᱤᱫᱤ ᱠᱮᱫᱼᱟ ᱾ ᱤᱧ ᱫᱚ ᱪᱩᱞᱦᱟᱹ ᱵᱩᱴᱟᱹ ᱨᱮᱠᱚ ᱫᱩᱲᱩᱵ ᱠᱤᱫᱤᱧᱟ ᱾ ᱚᱱᱟ ᱚᱠᱛᱚ ᱨᱮ ᱯᱟᱲᱦᱟᱣᱜ ᱨᱮᱱᱟᱝ ᱵᱮᱲᱟ ᱦᱚᱸ ᱤᱧᱟᱜ ᱦᱟᱹᱥᱩᱨ ᱞᱮᱱᱟ ᱾
ᱚᱱᱟ ᱛᱟᱭᱱᱚᱢ ᱟᱨ ᱢᱤᱫᱴᱟᱹᱝ ᱡᱤᱵᱚᱱ ᱨᱮᱱᱟᱝ ᱛᱟᱨᱟᱥᱤᱧ ᱵᱮᱲᱟ ᱦᱚᱸᱭ ᱦᱟᱹᱥᱩᱨ ᱞᱮᱱᱟ…………
ᱡᱟᱦᱟᱸ ᱛᱤᱱ ᱨᱮ ᱤᱧᱟᱜ ᱜᱮᱵᱟᱨ ᱩᱢᱮᱨ ᱛᱟᱦᱮᱸ ᱠᱟᱱᱟ ᱚᱱᱟ ᱩᱢᱮᱨ ᱨᱮᱜᱮ ᱟᱢ ᱜᱚᱲᱚᱢ ᱦᱟᱲᱟᱢ ᱥᱟᱞᱟᱜ ᱠᱚ ᱵᱟᱯᱞᱟ ᱞᱤᱫᱤᱧᱟ ᱾ ᱤᱧ ᱦᱚᱸ ᱦᱩᱰᱤᱧ ᱩᱢᱮᱨ ᱨᱮᱫᱚ ᱥᱟᱹᱜᱟᱹᱭ ᱪᱮᱫ ᱠᱟᱱᱟ ᱵᱟᱹᱧ ᱵᱟᱰᱟᱭ ᱛᱟᱦᱮᱸᱫ ᱫᱚ ᱾ ᱦᱩᱰᱤᱧ ᱩᱢᱮᱨ ᱫᱚ ᱪᱮᱫ ᱠᱟᱱᱟ ᱚᱱᱟ ᱦᱚᱸ ᱵᱟᱹᱧ ᱵᱟᱰᱟᱭ ᱛᱟᱦᱮᱸᱫ ᱫᱚ ᱾ ᱵᱟᱯᱞᱟ ᱪᱮᱫ ᱠᱟᱱᱟ ᱚᱱᱟ ᱩᱭᱦᱟᱹᱨ ᱦᱚᱸ ᱤᱧ ᱴᱷᱮᱱ ᱫᱚ ᱵᱟᱭ ᱛᱟᱦᱮᱸ ᱠᱟᱱᱟ ᱾ ᱩᱢᱮᱨ ᱫᱚ ᱪᱮᱫ ? ᱤᱧᱟᱜ ᱩᱢᱮᱨ ᱨᱮᱱᱟᱜ ᱫᱟᱢᱟᱱ ᱵᱟᱹᱧ ᱪᱮᱫ ᱞᱮᱫᱼᱟ ᱪᱮ ᱵᱟᱹᱧ ᱵᱟᱰᱟᱭ ᱛᱟᱦᱮᱸᱫ ᱫᱚ ᱾ ᱢᱤᱫᱴᱟᱹᱝ ᱪᱩᱞᱦᱟᱹ ᱵᱩᱴᱟᱹ ᱠᱷᱚᱱᱟᱜ ᱟᱨ ᱢᱤᱫᱴᱟᱹᱝ ᱪᱩᱞᱦᱟᱹ ᱵᱩᱴᱟᱹ ᱛᱮᱠᱚ ᱵᱷᱮᱡᱟ ᱠᱤᱫᱤᱧᱟ ᱾
ᱚᱱᱟ ᱚᱠᱛᱚ ᱨᱮᱜᱮ ᱤᱧᱟᱜ ᱩᱢᱮᱨ ᱛᱟᱨᱟᱥᱤᱧ ᱵᱮᱲᱟ ᱫᱚ ᱦᱟᱹᱥᱩᱨ ᱞᱮᱱ ᱛᱟᱦᱮᱸ ᱠᱟᱱᱟ ᱾
ᱦᱚᱸ ᱟᱨᱦᱚᱸ ᱚᱱᱠᱟ ᱜᱮ ᱟᱨ ᱢᱤᱫᱴᱟᱹᱝ ᱛᱟᱨᱟᱥᱤᱧ ᱵᱮᱲᱟᱭ ᱦᱟᱹᱥᱩᱨ ᱞᱮᱱ ᱛᱟᱦᱮᱸᱜ ᱠᱟᱱᱟ…………
ᱤᱧ ᱡᱟᱶᱟᱭ ᱚᱲᱟᱜ ᱦᱮᱡ ᱛᱟᱭᱱᱚᱢ ᱤᱧ ᱫᱚ ᱡᱤᱦᱚᱞ ᱠᱷᱟᱱᱟᱨᱮ ᱢᱮᱱᱟᱹᱧ ᱞᱮᱠᱟᱜᱤᱧ ᱵᱩᱡᱷᱟᱹᱣ ᱠᱮᱫᱼᱟ ᱾ ᱡᱟᱶᱟᱭ ᱚᱲᱟᱜ ᱨᱮ ᱞᱟᱸᱫᱟ ᱦᱚᱸ ᱢᱟᱱᱟ ᱛᱟᱦᱮᱸ ᱠᱟᱱᱟ ᱟᱨ ᱨᱟᱜ ᱦᱚᱸ ᱢᱟᱱᱟ ᱛᱟᱦᱮᱸ ᱠᱟᱱᱟ ᱾ ᱪᱩᱞᱦᱟᱹ ᱵᱩᱴᱟᱹ ᱠᱷᱚᱱᱟᱜ ᱚᱲᱟᱜ ᱨᱮᱜᱮ ᱚᱲᱟᱜ ᱨᱮᱱᱟᱜ ᱪᱩᱞᱦᱟᱹ ᱵᱩᱴᱟᱹ ᱨᱮᱜᱮ ᱡᱤᱦᱚᱞ ᱠᱟᱛᱮ ᱠᱚ ᱫᱚᱦᱚ ᱞᱤᱫᱤᱧᱟ ᱾ ᱚᱸᱰᱮ ᱫᱚ ᱫᱩᱞᱟᱹᱲ ᱧᱟᱢ ᱨᱮᱱᱟᱝ ᱫᱚ ᱢᱤᱫᱴᱟᱹᱝ ᱠᱩᱠᱢᱩ ᱞᱮᱠᱟᱜᱮ ᱛᱟᱦᱮᱸ ᱠᱟᱱᱟ ᱾ ᱠᱤᱪᱷᱩᱠ ᱫᱤᱱ ᱯᱚᱞᱚᱢ ᱛᱟᱭᱱᱚᱢ ᱟᱭᱳ ᱨᱮᱱᱟᱝ ᱪᱤᱱᱦᱟᱹ ᱧᱟᱢ ᱨᱮᱱᱟᱝ ᱫᱟᱣ ᱤᱧ ᱧᱟᱢᱮᱫ ᱛᱟᱦᱮᱸᱜ ᱠᱟᱱᱟ ᱾ ᱤᱧᱟᱜ ᱞᱟᱡ ᱠᱷᱚᱱᱟᱜ ᱠᱩᱲᱤ ᱜᱤᱫᱽᱨᱟᱹᱭ ᱚᱢᱚᱱᱚᱜᱼᱟ ᱢᱮᱱᱛᱮ ᱵᱟᱰᱟᱭ ᱞᱮᱱᱟ ᱾ ᱤᱠᱷᱟᱹᱱ ᱚᱢᱚᱱᱚᱜ ᱢᱟᱬᱟᱝ ᱨᱮ ᱩᱱᱤ ᱠᱚ ᱱᱚᱥᱴᱚ ᱠᱮᱫᱮᱭᱟ ᱾ ᱤᱧᱟᱜ ᱟᱭᱳ ᱪᱤᱱᱦᱟᱹ ᱦᱚᱸᱠᱚ ᱴᱷᱮᱞᱟᱣ ᱥᱟᱦᱟ ᱠᱟᱫᱟ ᱾
ᱱᱚᱣᱟ ᱫᱚ ᱯᱩᱭᱞᱩ ᱨᱮᱱᱟᱝ ᱟᱭᱳ ᱪᱤᱱᱦᱟᱹ ᱧᱟᱢ ᱨᱮᱱᱟᱝ ᱛᱟᱨᱟᱥᱤᱧ ᱵᱮᱲᱟ ᱦᱚᱸ ᱦᱟᱹᱥᱩᱨ ᱞᱮᱱ ᱛᱟᱦᱮᱸᱜ ᱠᱟᱱᱟ ᱾
ᱠᱤᱪᱷᱩᱠ ᱥᱮᱨᱢᱟ ᱯᱚᱞᱚᱢᱮᱱ ᱛᱟᱭᱱᱚᱢ ᱤᱧ ᱨᱤᱱ ᱵᱟᱨᱮᱭᱟ ᱠᱚᱲᱟ ᱜᱤᱫᱽᱨᱟᱹ ᱠᱤᱱ ᱚᱢᱚᱱ ᱞᱮᱱ ᱛᱟᱦᱮᱸᱜ ᱠᱟᱱᱟ ᱾ ᱩᱱᱠᱤᱱᱟᱜ ᱢᱮᱫᱦᱟ ᱧᱮᱞᱛᱮ ᱟᱨ ᱞᱟᱸᱫᱟ ᱧᱮᱞᱛᱮ ᱤᱧ ᱦᱚᱸ ᱞᱟᱸᱫᱟᱧ ᱪᱮᱫ ᱞᱮᱫ ᱛᱟᱦᱮᱸᱜ ᱠᱟᱱᱟ ᱾ ᱤᱧᱟᱜ ᱫᱩᱠᱷ ᱡᱤᱣᱤ ᱵᱷᱤᱛᱨᱤ ᱨᱮ ᱛᱮᱱ ᱠᱟᱛᱮ ᱜᱤᱫᱽᱨᱟᱹ ᱠᱤᱱᱟᱜ ᱡᱤᱵᱚᱱ ᱨᱮ ᱥᱩᱠᱷ ᱤᱧ ᱩᱢᱟᱹᱬ ᱯᱮᱨᱮᱡᱟᱫ ᱠᱤᱱ ᱛᱟᱦᱮᱸᱜ ᱠᱟᱱᱟ ᱾
ᱴᱟᱴᱠᱟ ᱜᱮ ᱟᱨ ᱢᱤᱫᱴᱟᱹᱝ ᱛᱟᱨᱟᱥᱤᱧ ᱵᱮᱲᱟ ᱦᱚᱸᱭ ᱦᱟᱹᱥᱩᱨᱮᱱᱟ………
ᱡᱟᱦᱟᱸ ᱛᱤᱱ ᱨᱮ ᱤᱧ ᱟᱨ ᱦᱚᱯᱚᱱ ᱛᱤᱠᱤᱱ ᱤᱧᱤᱡ ᱡᱤᱛᱟᱹ ᱫᱷᱟᱹᱨᱛᱤ ᱠᱷᱚᱱᱟᱜ ᱮ ᱵᱟᱹᱜᱤᱭᱟᱫ ᱞᱮᱭᱟ, ᱩᱱ ᱵᱮᱲᱟ ᱨᱮ ᱤᱧᱟᱜ ᱛᱤ ᱠᱷᱚᱱᱟᱜ ᱢᱮᱬᱦᱮᱫ ᱥᱟᱠᱚᱢ ᱟᱨ ᱵᱚᱦᱚᱜ ᱨᱮᱱᱟᱜ ᱦᱚᱨᱟᱥᱤ ᱠᱷᱚᱱᱟᱜ ᱥᱤᱸᱫᱩᱨᱮ ᱨᱮᱡ ᱤᱫᱤ ᱞᱮᱫᱼᱟᱭ ᱟᱨ ᱨᱟᱺᱰᱤ ᱥᱟᱡᱟᱣ ᱚᱴᱚ ᱞᱤᱫᱤᱧᱟᱭ ᱾
ᱚᱱᱟ ᱵᱮᱲᱟ ᱨᱮᱜᱮ ᱤᱧᱟᱜ ᱢᱮᱬᱦᱮᱫ ᱥᱟᱠᱚᱢ ᱟᱨ ᱥᱤᱸᱫᱩᱨ ᱨᱮᱱᱟᱝ ᱛᱟᱨᱟᱥᱤᱧ ᱵᱮᱲᱟᱭ ᱦᱟᱹᱥᱩᱨ ᱞᱮᱱ ᱛᱟᱦᱮᱸᱜ ᱠᱟᱱᱟ ᱾
ᱛᱤᱱᱟᱹᱜ ᱦᱟᱨᱠᱮᱛ ᱥᱟᱥᱮᱛ ᱛᱮ ᱵᱟᱨᱮᱭᱟ ᱠᱚᱲᱟ ᱜᱤᱫᱽᱨᱟᱹᱧ ᱦᱟᱨᱟᱵᱩᱨᱩ ᱞᱮᱫ ᱠᱤᱱᱟ ᱾ ᱯᱟᱲᱦᱟᱣ ᱦᱩᱧ ᱯᱟᱲᱦᱟᱣ ᱚᱪᱚ ᱞᱮᱫ ᱠᱤᱱᱟ, ᱵᱟᱵᱟ ᱣᱟᱜ ᱫᱩᱞᱟᱹᱲ ᱦᱚᱸ ᱩᱨᱩᱱ ᱯᱩᱨᱩᱱᱤᱧ ᱮᱢᱟᱫ ᱠᱤᱱ ᱛᱟᱦᱮᱸᱜ ᱠᱟᱱᱟ ᱾ ᱛᱮᱦᱮᱧ ᱢᱟᱨᱟᱝ ᱚᱯᱷᱤᱥᱟᱨ ᱪᱟᱹᱠᱨᱤ ᱦᱚᱸ ᱠᱤᱱ ᱪᱟᱹᱠᱨᱤ ᱠᱟᱱᱟ ᱟᱨ ᱢᱟᱨᱟᱝ ᱠᱤᱥᱟᱹᱬ ᱚᱲᱟᱜ ᱠᱷᱚᱱᱟᱜ ᱦᱚᱸ ᱵᱟᱹᱦᱩ ᱵᱤᱴᱤ ᱦᱩᱧ ᱟᱹᱜᱩᱟᱣᱫ ᱠᱤᱱᱟ ᱾ ᱱᱤᱛᱚᱜ ᱵᱟᱨᱮᱭᱟ ᱦᱚᱯᱚᱱ ᱥᱟᱶᱛᱮ ᱠᱤᱢᱤᱱ ᱡᱚᱛᱚ ᱜᱮ ᱱᱟᱯᱟᱭ ᱨᱮᱜᱮ ᱢᱮᱱᱟᱜ ᱠᱚᱣᱟ ᱾
ᱢᱮᱱᱠᱷᱟᱱ ᱤᱧ ᱫᱚ ᱦᱟᱲᱟᱢ ᱵᱩᱰᱷᱤ ᱟᱥᱨᱚᱢ ᱨᱮ ᱾ ᱤᱧᱟᱜ ᱜᱷᱟᱨᱚᱸᱡᱽ ᱦᱚᱯᱚᱱ ᱠᱤᱢᱤᱱ, ᱜᱚᱲᱚᱢ ᱠᱚᱲᱟ ᱜᱚᱲᱚᱢ ᱠᱩᱲᱤ ᱛᱟᱦᱮᱸ ᱠᱟᱛᱮ ᱦᱚᱸ ᱤᱧ ᱫᱚ ᱮᱠᱞᱟ ᱜᱮ ᱾ ᱤᱧᱟᱜ ᱡᱤᱵᱚᱱ ᱨᱮ ᱵᱮᱥ ᱛᱤᱧ ᱞᱟᱸᱫᱟ ᱫᱟᱲᱮᱭᱟᱫᱟ ᱪᱮ ᱵᱮᱥ ᱛᱤᱧ ᱪᱟᱠᱷᱟ ᱫᱟᱲᱮᱭᱟᱫᱟ ᱾
ᱱᱚᱣᱟ ᱫᱚ ᱤᱧᱟᱜ ᱡᱤᱵᱚᱱ ᱨᱮᱱᱟᱝ ᱛᱟᱨᱟᱥᱤᱧ ᱵᱮᱲᱟ ᱦᱟᱹᱥᱩᱨᱚᱜ ᱠᱟᱱᱟ ᱛᱚ ?
ᱤᱧᱟᱜ ᱦᱚᱲᱢᱚ ᱨᱮ ᱡᱤᱞ ᱟᱨ ᱡᱟᱝ ᱜᱮ ᱢᱮᱱᱟᱜᱼᱟ ᱾ ᱱᱚᱣᱟ ᱦᱚᱸ ᱢᱤᱫ ᱫᱤᱱ ᱦᱤᱞᱚᱜ ᱵᱟᱝ ᱜᱮ ᱧᱮᱞᱚᱜᱼᱟ ᱾
ᱱᱚᱣᱟ ᱦᱚᱲᱢᱚ ᱦᱟᱥᱟ ᱦᱚᱲᱢᱚ ᱛᱤᱧ
ᱦᱟᱥᱟ ᱨᱮᱜᱮ ᱢᱤᱞᱟᱣᱜᱼᱟ ᱛᱤᱧ
ᱡᱤᱵᱚᱱ ᱨᱮᱱᱟᱝ ᱛᱟᱨᱟᱥᱤᱧ ᱵᱮᱲᱟ ᱦᱚᱸ ᱛᱤᱧ
ᱵᱮᱲᱟ ᱦᱚᱸᱭ ᱦᱟᱹᱥᱩᱨᱚᱜ ᱠᱟᱱ ᱛᱤᱧ ᱾
ᱱᱤᱛᱚᱝ ᱤᱧᱟᱜ ᱡᱤᱞ ᱦᱚᱲᱢᱚ ᱛᱤᱧ
ᱛᱟᱨᱟᱥᱤᱧ ᱵᱮᱲᱟ ᱭᱮᱱ ᱛᱤᱧ
ᱵᱮᱲᱟᱭ ᱦᱟᱹᱥᱩᱨ ᱞᱮᱱᱠᱷᱟᱱ ᱛᱤᱧ
ᱡᱤᱣᱤ ᱫᱚ ᱢᱤᱞᱟᱹᱣᱜ ᱦᱚᱭ ᱨᱮᱜᱮ ᱛᱤᱧ ᱾
***
ᱥᱟᱨᱦᱟᱣ ᱞᱟ.ᱭ ᱞᱮᱠᱷᱟᱱ ᱵᱟᱝ ᱯᱩᱨᱟ.ᱜᱟ,ᱢᱮᱫᱽ ᱨᱮ ᱢᱮᱫᱽ ᱫᱟᱜ ᱥᱮᱛᱮᱧ ᱮᱱ ᱛᱤᱧ,ᱟ.ᱰᱤ ᱡᱚᱛᱷᱟᱛ ᱟᱨ ᱟ.ᱰᱤ ᱥᱟ.ᱨᱤ ᱜᱮ ᱫᱟ.ᱭ ᱦᱟᱲᱟᱢ ᱵᱩᱰᱷᱤ ᱠᱚᱣᱟᱜ ᱡᱤᱭᱚᱱ ᱨᱮᱱᱟᱜ ᱛᱟᱨᱟᱥᱤᱧ ᱵᱮᱨ ᱫᱚᱭ ᱦᱟ.ᱥᱩᱨᱚᱜ ᱠᱟᱱᱟᱭ🙏🙏ᱟ.ᱰᱤ ᱥᱤᱠᱷᱱᱟ.ᱛ ᱨᱮᱱᱟᱜ ᱮᱢ ᱪᱟᱞ ᱟᱠᱟᱫᱟ ᱵᱚᱱᱟ
ᱟᱹᱞᱤᱧᱟᱜ ᱚᱱᱚᱞ ” ᱡᱤᱵᱚᱱ ᱨᱮᱱᱟᱝ ᱛᱟᱨᱟᱥᱤᱧ ᱵᱮᱲᱟ ” ᱟᱹᱵᱤᱱ ᱯᱟᱰᱦᱟᱣ ᱠᱟᱛᱮ ᱟᱹᱵᱤᱱᱟᱜ ᱡᱤᱣᱤ ᱨᱮ ᱫᱩᱠᱷ ᱜᱮ ᱥᱟᱨᱦᱟᱣ ᱟᱠᱟᱱᱟ ᱟᱨ ᱥᱚᱫᱚᱨ ᱠᱟᱛᱮ ᱵᱤᱱ ᱵᱟᱰᱟᱭ ᱚᱪᱚ ᱟᱠᱟᱫ ᱞᱤᱧᱟ, ᱚᱱᱟ ᱤᱫᱤᱛᱮ ᱟᱹᱞᱤᱧ ᱟᱭᱢᱟ ᱟᱭᱢᱟ ᱥᱟᱨᱦᱟᱣ ᱞᱤᱧ ᱪᱟᱞ ᱟᱹᱵᱤᱱ ᱠᱟᱱᱟ ᱾
ᱥᱟᱹᱨᱤ ᱜᱮ ᱢᱤᱫᱴᱟᱹᱝ ᱥᱟᱢᱟᱝ ᱟᱠᱟᱱ ᱡᱤᱱᱤᱥ ᱫᱚ ᱵᱟᱢ ᱪᱟᱠᱷᱟ ᱞᱮᱠᱟᱷᱟᱱ ᱚᱱᱟ ᱨᱮᱱᱟᱝ ᱥᱤᱵᱤᱞ ᱫᱚ ᱵᱟᱝᱜᱮᱢ ᱵᱟᱰᱟᱭ ᱫᱟᱲᱮᱭᱟᱜ-ᱟ ᱾
🙏🌹💐🌹🌺🌹