ᱟᱸᱜᱮᱱ

ᱱᱮᱥ ᱜᱮ ᱯᱟᱹᱜᱩᱱ ᱵᱚᱸᱜᱟ ᱨᱮᱱᱟᱝ ᱥᱟᱹᱜᱩᱱ ᱢᱟᱦᱟᱨᱮ ᱱᱟᱶᱟ ᱵᱟᱹᱦᱩ ᱫᱚᱠᱚ ᱟᱹᱜᱩ ᱟᱠᱟᱫᱮᱹᱭᱟ ᱾ ᱥᱤᱢᱟᱹ ᱜᱚᱰᱟ ᱟᱛᱳ ᱨᱮ ᱱᱤᱭᱟᱹ ᱞᱟᱦᱟ ᱱᱚᱝᱠᱟᱱ ᱪᱚᱨᱚᱠᱟᱱ ᱵᱟᱹᱦᱩ ᱫᱚ ᱵᱟᱠᱚ ᱟᱹᱜᱩ ᱟᱠᱟᱫ ᱠᱚᱣᱟ ᱾ ᱧᱮᱞ ᱡᱚᱝ ᱛᱮ ᱵᱮᱨᱮᱞ ᱥᱟᱥᱟᱝ, ᱦᱟᱨᱟ ᱨᱟᱠᱟᱵ ᱠᱩᱪᱤ ᱯᱚᱦᱟᱞ ᱠᱟᱸᱰᱮᱨ ᱰᱟᱹᱨ, ᱯᱚᱦᱟ ᱫᱟᱨᱮᱹ ᱥᱟᱶ ᱜᱮᱢ ᱛᱩᱞᱩᱡ ᱫᱟᱲᱮᱭᱟᱭᱟ ᱾ ᱮᱥᱮᱞ ᱩᱥᱩᱞ ᱛᱮ ᱚᱠᱟ ᱞᱮᱠᱟ ᱚᱱᱠᱟᱜᱮ ᱢᱮᱫ ᱢᱩᱴᱷᱟᱹᱱ ᱛᱮᱦᱚᱸ ᱾ ᱚᱠᱚᱭ ᱢᱮᱱ ᱠᱟᱛᱷᱟ ᱵᱚᱸᱜᱟ ᱠᱩᱲᱤ ᱞᱮᱠᱟ ᱢᱮᱫ ᱢᱩᱴᱷᱟᱹᱱ ᱛᱟᱭ, ᱰᱟᱸᱰᱟ ᱡᱚᱠᱷᱟ ᱦᱮᱸᱫᱮ ᱧᱚᱲᱚᱢ ᱧᱚᱲᱚᱢ ᱩᱵ ᱛᱟᱭ ᱦᱮᱸᱫᱮ ᱨᱤᱢᱤᱞ ᱞᱮᱠᱟ ᱾ ᱱᱟᱣᱟ ᱵᱟᱹᱦᱩ ᱟᱜ ᱧᱩᱛᱩᱢ ᱫᱚ ᱪᱷᱤᱛᱟᱹ ᱾ ᱦᱟᱱᱦᱟᱨ ᱟᱭᱳ ᱥᱟᱶ ᱜᱮᱭ ᱠᱟᱹᱢᱤ ᱵᱟᱲᱟᱭᱟ ᱾ ᱦᱟᱱᱦᱟᱨ ᱟᱭᱳ ᱫᱚ ᱩᱫᱩᱜ ᱥᱤᱠᱷᱟᱹᱣ ᱟᱭᱟᱭ ᱚᱲᱟᱜ
ᱨᱮᱭᱟᱜ ᱵᱷᱤᱛᱟᱹᱨ ᱵᱟᱦᱨᱮ ᱠᱟᱹᱢᱤ ᱾ ᱯᱮᱲᱟ ᱯᱟᱹᱨᱤᱵᱷᱟᱨ ᱵᱮᱣᱦᱟᱨ ᱮ ᱞᱟᱹᱭ ᱥᱤᱠᱷᱟᱹᱣ ᱮᱭᱟ ᱾

ᱱᱮᱜᱼᱮ ᱜᱮ ᱡᱷᱮᱴ ᱵᱚᱸᱜᱟ ᱯᱟᱲᱟᱣ ᱜᱚᱫ ᱟᱠᱟᱱᱟ ᱾ ᱠᱷᱮᱛ ᱵᱟᱹᱫᱽ ᱨᱮ ᱠᱟᱹᱢᱤ ᱨᱮᱭᱟᱜ ᱚᱠᱛᱚ ᱾ ᱮᱱ ᱦᱤᱞᱳᱜ ᱦᱟᱱᱦᱟᱨ ᱟᱭᱳ ᱫᱚᱭ ᱢᱮᱱ ᱠᱮᱫᱟ, ᱮ ᱵᱟᱹᱦᱩ ᱫᱮᱞᱟᱝ ᱛᱤᱦᱤᱧ ᱫᱚ ᱠᱷᱮᱛ ᱨᱮ ᱜᱩᱨᱤᱡ ᱞᱟᱝ ᱤᱫᱤᱭᱟᱜᱼᱟ ᱾ ᱚᱱᱟ ᱥᱟᱛᱮ ᱠᱷᱚᱱ ᱠᱟᱺᱰᱷᱩᱢ ᱟᱹᱜᱩᱭ ᱵᱮᱱ ᱫᱮᱱ ᱾ ᱱᱟᱣᱟ ᱵᱟᱹᱦᱩ ᱫᱚ ᱱᱚᱝᱠᱟᱱ ᱠᱟᱺᱰᱷᱩᱢ ᱫᱚ ᱱᱮᱜᱼᱮ ᱜᱮ ᱯᱳᱭᱞᱚᱭᱮ ᱧᱮᱞᱮᱫᱟ ᱾ ᱟᱹᱰᱤ ᱪᱚᱨᱚᱠ ᱞᱮᱸᱡᱮᱨ ᱜᱮ, ᱠᱩᱞᱤ ᱜᱚᱫ ᱠᱮᱫᱟᱭ ᱱᱚᱣᱟ ᱫᱚ ᱪᱮᱫ ᱠᱟᱺᱰᱷᱩᱢ ᱠᱟᱱᱟ ᱜᱚ ᱾ ᱦᱟᱱᱦᱟᱨ ᱛᱮᱫ ᱮ ᱢᱮᱱ ᱠᱮᱫᱟ ᱮᱛᱮ ᱵᱟᱹᱦᱩ ᱵᱟᱵᱮᱱ ᱧᱮᱞᱮᱫᱟ ᱥᱟᱥᱟᱝ ᱠᱟᱺᱰᱷᱩᱢ ᱫᱚ ᱾ ᱟᱢ ᱜᱚ ᱛᱟᱠᱚᱣᱟᱜ ᱱᱚᱝᱠᱟᱱ ᱠᱟᱺᱰᱷᱩᱢ ᱫᱚ ᱵᱟᱹᱱᱩᱜᱼᱟ ᱪᱮᱠᱟ? ᱪᱷᱤᱛᱟᱹᱭ ᱢᱮᱱ ᱠᱮᱫᱟ ᱼ ᱟᱹᱞᱤᱧ ᱫᱚ ᱜᱩᱨᱤᱡ ᱜᱤᱰᱤ ᱜᱮ ᱵᱟᱞᱤᱧ ᱪᱟᱞᱟᱣ ᱵᱟᱲᱟᱣᱟᱠᱟᱱᱟ ᱾ ᱦᱟᱱᱦᱟᱨ ᱛᱮᱫ ᱮ ᱢᱮᱱ ᱠᱮᱫᱟ ᱢᱟ ᱵᱟᱹᱦᱩ ᱟᱹᱵᱮᱱ ᱯᱟᱹᱦᱤᱞ ᱛᱮᱞᱤᱧ ᱛᱩᱞ ᱟᱵᱮᱱᱟ ᱾ ᱦᱟᱱᱦᱟᱨ ᱛᱮᱫ ᱮ ᱛᱩᱞ ᱟᱫᱮᱭᱟ, ᱦᱚᱴᱚᱜ ᱞᱤᱠᱟᱹ ᱞᱟᱠᱮ ᱦᱤᱞᱟᱹᱜ ᱧᱮᱞ ᱛᱮ ᱦᱟᱱᱦᱟᱨ ᱛᱮᱫ ᱫᱚᱭ ᱠᱩᱞᱤ ᱠᱮᱫᱮᱭᱟ ᱦᱮᱸᱫᱟ ᱵᱟᱹᱦᱩ ᱦᱟᱢᱟᱞᱮᱫ ᱵᱮᱱᱟ ᱥᱮ ᱪᱮᱛᱟ ᱵᱚᱦᱚᱜ ᱦᱟᱱᱛᱮ ᱱᱟᱛᱮ ᱦᱤᱞᱟᱣᱜ ᱠᱟᱱ ᱛᱟᱵᱮᱱ ᱫᱚ? ᱵᱟᱝ ᱦᱟᱢᱟᱞᱮᱫ ᱞᱤᱧᱟᱹ, ᱫᱤᱯᱤᱞ ᱫᱚ ᱵᱟᱹᱞᱤᱧ ᱫᱤᱯᱤᱞ ᱵᱟᱲᱟ ᱟᱠᱟᱫᱟ ᱛᱚ ᱟᱱᱟᱛᱮ ᱾ ᱦᱮᱸ ᱢᱟ ᱦᱮᱣᱟᱜ ᱟᱵᱮᱱ ᱱᱟᱦᱟᱜ, ᱵᱟᱹᱭ ᱵᱟᱹᱭ ᱛᱮ ᱛᱟᱲᱟᱢ ᱵᱮᱱ ᱫᱮᱞᱟᱝ ᱾ ᱠᱷᱮᱛ ᱟᱲᱮ ᱦᱚᱨ ᱛᱮᱠᱤᱱ ᱛᱟᱲᱟᱢ ᱟᱠᱟᱫᱟ ᱾ ᱦᱟᱱᱦᱟᱨ ᱟᱭᱳ ᱛᱟᱭᱚᱢ ᱛᱟᱭᱟᱢ ᱛᱮᱭ ᱛᱟᱲᱟᱢ ᱟᱠᱟᱫᱟ ᱱᱟᱣᱟ ᱵᱟᱹᱦᱩ ᱫᱚ ᱾ ᱛᱤᱱᱟᱹᱜ ᱡᱟᱸᱜᱟᱭ ᱞᱟᱦᱟ ᱮᱫᱟ ᱩᱱᱟᱹᱜ ᱫᱷᱟᱣ ᱜᱩᱨᱤᱡ ᱡᱷᱚᱲᱟ ᱫᱚ ᱟᱭᱟᱜ ᱵᱚᱦᱚᱜ ᱨᱮᱜᱮᱭ ᱚᱛᱟ ᱜᱟᱹᱰᱷᱭᱟᱹᱣ ᱮᱫᱟ ᱾

ᱯᱟᱥᱮᱫ ᱫᱚ ᱡᱟᱸᱜᱟᱭ ᱦᱟᱲᱟᱜᱚᱜ, ᱚᱱᱟ ᱥᱟᱶ ᱛᱮ ᱜᱩᱨᱤᱡ ᱡᱷᱚᱲᱟ ᱦᱚᱸ ᱯᱟᱥᱮᱫ ᱵᱚᱦᱚᱜ ᱠᱷᱚᱱ ᱦᱚᱥᱚᱨ ᱧᱩᱨᱩᱜ ᱾ ᱦᱟᱱᱦᱟᱨ ᱛᱮᱫ ᱠᱚᱭᱚᱜ ᱨᱩᱣᱟᱹᱲ ᱠᱟᱛᱮᱫ ᱮ ᱢᱮᱱ ᱠᱮᱫᱟ – ᱦᱮᱸᱫᱟ ᱵᱟᱹᱦᱩ ᱩᱱᱟᱹᱜ ᱵᱮᱱ ᱛᱟᱭᱚᱢ ᱟᱠᱟᱱᱟ? ᱢᱟᱥᱮ ᱟᱞᱤᱧ ᱫᱚᱞᱤᱧ ᱢᱮᱱ ᱮᱫᱟ ᱥᱳᱨ ᱨᱮᱜᱮ ᱵᱮᱱ ᱦᱤᱡᱩᱜ ᱠᱟᱱᱟ ᱾ ᱛᱮᱸᱜᱳ ᱟᱠᱟᱱᱟᱞᱤᱧ ᱫᱮᱞᱟ ᱦᱮᱡ ᱦᱚᱫᱚᱜ ᱵᱮᱱ ᱾ ᱛᱟᱲᱟᱢ ᱛᱤᱭᱳᱜ ᱠᱮᱫᱮ ᱠᱷᱟᱱ ᱦᱟᱱᱦᱟᱨ ᱟᱭᱳ ᱠᱤᱢᱤᱱ ᱛᱮᱫ ᱮ ᱠᱩᱞᱤ ᱠᱮᱫᱮᱭ ᱮᱛᱮ ᱵᱟᱹᱦᱩ ᱟᱢ ᱵᱟᱵᱟ ᱛᱟᱠᱳᱣᱟᱜ ᱠᱷᱮᱛ ᱠᱚᱫᱚ ᱥᱳᱨ ᱥᱳᱨ ᱛᱮᱜᱮ ᱢᱮᱱᱟᱜ ᱛᱚᱠᱳᱣᱟ ᱥᱮ ᱪᱮᱛᱟ? ᱠᱤᱢᱤᱱ ᱛᱮᱫ ᱮ ᱢᱮᱱ ᱠᱮᱫᱟ ᱦᱮᱸ ᱤᱧ ᱵᱟᱵᱟ ᱛᱟᱠᱳᱣᱟᱜ ᱠᱷᱮᱛ ᱫᱚ ᱵᱟᱲᱜᱮ ᱫᱷᱟᱨᱮ ᱫᱷᱟᱨᱮ ᱢᱤᱫ ᱪᱚᱠ ᱨᱮᱜᱮ ᱢᱮᱱᱟᱜᱼᱟ ᱾ ᱚᱱᱟᱛᱮ ᱜᱩᱨᱤᱡ ᱜᱤᱰᱤ ᱫᱚ ᱵᱟᱞᱤᱧ ᱯᱟᱹᱨᱠᱟᱹᱣ ᱟᱠᱟᱱᱟ ᱾ ᱦᱟᱱᱦᱟᱨ ᱛᱮᱫ ᱫᱚᱭ ᱢᱮᱱ ᱠᱮᱫᱟ ᱦᱮᱸᱢᱟ ᱜᱟᱯᱟ ᱠᱷᱚᱱ ᱫᱚ ᱛᱟᱞᱟ ᱡᱷᱚᱲᱟ ᱠᱟᱛᱮᱫ ᱯᱮᱨᱮᱡᱽ ᱵᱮᱱ ᱮᱸᱰᱮᱠᱷᱟᱱ ᱵᱟᱝ ᱦᱟᱢᱟᱞ ᱵᱮᱱᱟ ᱾ ᱟᱨᱦᱚᱸᱭ ᱠᱩᱞᱤ ᱠᱮᱹᱫᱮᱹᱭᱟ ᱫᱚᱢᱮ ᱦᱟᱢᱟᱞᱮᱫ ᱵᱮᱱᱟ ᱥᱮ ᱪᱮᱛᱟ? ᱱᱟᱶᱟ ᱵᱟᱹᱦᱩ ᱫᱚ ᱢᱚᱴᱟᱧᱚᱜᱼᱮ ᱥᱟᱦᱮᱫ ᱠᱮᱫ ᱛᱮᱭ ᱢᱮᱱ ᱠᱮᱫᱟ ᱦᱮ ᱢᱟᱱᱮ ᱻᱻ ᱯᱟᱹᱨᱠᱟᱹᱣ ᱵᱟᱝ ᱾ ᱠᱷᱮᱛ ᱟᱲᱮ ᱥᱮᱴᱮᱨ ᱛᱮ ᱱᱟᱣᱟ ᱵᱟᱹᱦᱩ ᱪᱷᱤᱛᱟᱹ ᱫᱚ ᱩᱫᱽᱜᱟᱹᱨ ᱛᱮᱭ ᱠᱟᱹᱨᱤ ᱜᱷᱟᱢᱮᱱᱟ ᱾ ᱦᱟᱱᱦᱟᱨ ᱛᱮᱫ ᱫᱚ ᱜᱩᱨᱤᱡ ᱡᱷᱚᱲᱟ ᱜᱤᱰᱤ ᱠᱟᱛᱮ ᱪᱷᱤᱛᱟᱹᱭ ᱢᱮᱛᱟᱭ ᱠᱟᱱᱟ, ᱢᱟ ᱵᱟᱹᱦᱩ ᱱᱚᱣᱟ ᱠᱷᱮᱛ ᱨᱮᱜᱮ ᱜᱤᱰᱤᱭ ᱵᱮᱱ ᱾ ᱜᱩᱨᱤᱡ ᱵᱤᱰᱤ ᱥᱟᱶᱛᱮ ᱢᱚᱞᱚᱝ ᱠᱷᱚᱱ ᱩᱫᱽᱜᱟᱹᱨ ᱫᱟᱜ ᱡᱟᱸᱜᱟᱨᱮ ᱴᱷᱚᱯ ᱴᱷᱚᱯ ᱡᱚᱨᱚᱣᱟᱫᱮᱭᱟ ᱾ ᱟᱹᱰᱤ ᱟᱸᱴ ᱢᱚᱴᱟ ᱧᱚᱜ ᱥᱟᱦᱮᱫ ᱠᱟᱛᱮ ᱟᱭᱟᱜ ᱟᱧᱪᱟᱨ ᱛᱮᱜᱮᱭ ᱡᱚᱫ ᱥᱟᱯᱷᱟᱜ ᱠᱟᱱᱟ ᱟᱨᱮ ᱢᱮᱱᱮᱫᱟ ᱵᱟᱵᱟᱨᱮ ᱛᱤᱱᱟᱹᱜ ᱩᱫᱽᱜᱟᱹᱨ ᱠᱟᱱᱟ ᱾ ᱦᱟᱱᱦᱟᱨ ᱛᱮᱫ ᱫᱚ ᱡᱷᱚᱲᱟ ᱟᱛᱮ ᱩᱫᱩᱜ ᱤᱸᱜᱩᱞ ᱠᱟᱛᱮ ᱠᱤᱢᱤᱱ ᱛᱮᱫᱼᱮ ᱢᱮᱛᱟᱭ ᱠᱟᱱᱟ ᱮ ᱵᱟᱹᱦᱩ ᱱᱚᱜᱼᱚᱭ ᱵᱮᱸᱜᱮᱫᱟᱜ ᱵᱮᱱ ᱡᱮᱹᱞᱮᱹᱧ ᱡᱮᱹᱞᱮᱹᱧ ᱟᱲᱮ ᱧᱮᱞᱚᱜ ᱠᱟᱱᱟ ᱥᱮ, ᱦᱟᱱᱮ ᱦᱟᱱᱟ ᱢᱩᱪᱟᱹᱫ ᱫᱷᱟᱹᱵᱤᱡ ᱚᱱᱟ ᱠᱚ ᱠᱷᱮᱛ ᱫᱚ ᱟᱵᱚᱣᱟᱜ ᱠᱟᱱ ᱜᱮᱭᱟ ᱾ ᱚᱱᱟ ᱪᱮᱛᱟᱱ ᱟᱲᱮ ᱠᱚᱨᱮ ᱛᱟᱞᱮᱹ ᱫᱟᱨᱮ ᱧᱮᱞᱚᱜ ᱠᱟᱱᱟ, ᱚᱱᱟ ᱠᱚᱦᱚᱸ ᱟᱵᱚᱣᱟᱜ ᱠᱟᱱ ᱜᱮᱭᱟ ᱾ ᱟᱵᱮᱱ ᱫᱚ ᱫᱤᱱᱟᱹᱢ ᱦᱤᱞᱳᱜ ᱡᱷᱚᱲᱟ ᱛᱮ ᱜᱩᱨᱤᱡ ᱫᱤᱯᱤᱞ ᱟᱹᱜᱩ ᱠᱟᱛᱮ ᱡᱷᱚᱛᱚ ᱠᱷᱮᱛ ᱨᱮ ᱜᱤᱰᱤᱭᱟᱜ ᱵᱮᱱ ᱦᱳᱭ ᱥᱮ ᱾ ᱱᱮᱛᱟᱨ ᱫᱚ ᱟᱫᱚ ᱢᱟᱸᱫᱮ ᱨᱮᱫᱚ ᱟᱞᱳᱵᱮᱱ ᱜᱤᱰᱤᱭᱟ ᱾ ᱫᱤᱱᱟᱹᱢ ᱦᱤᱞᱳᱜ ᱫᱚ ᱱᱟᱦᱟᱜ ᱟᱹᱞᱤᱧ ᱫᱚ ᱜᱩᱨᱤᱡ ᱜᱤᱰᱤ ᱫᱚ ᱵᱟᱞᱤᱧ ᱦᱮᱡ ᱫᱟᱲᱮᱹᱭᱟᱜᱼᱟ ᱾

ᱠᱤᱢᱤᱱ ᱛᱮᱫ ᱫᱚ ᱢᱤᱫ ᱜᱷᱟᱹᱲᱤᱡ ᱛᱷᱤᱨ ᱧᱚᱜ ᱠᱟᱛᱮ ᱜᱚᱴᱟᱭ ᱠᱚᱭᱚᱜ ᱟᱹᱪᱩᱨ ᱵᱟᱲᱟ ᱠᱮᱫᱟ ᱟᱨ ᱵᱚᱛᱚᱨ ᱧᱚᱜ ᱟᱲᱟᱝ ᱛᱮ ᱦᱟᱱᱦᱟᱨ ᱛᱮᱫ ᱮ ᱠᱩᱞᱤ ᱠᱮᱹᱫᱮᱹᱭᱟ ᱦᱮᱸ ᱜᱚ ᱫᱚᱢᱮ ᱜᱟᱡᱟᱲ ᱜᱮᱭᱟ ᱱᱚᱣᱟ ᱜᱟᱡᱟᱲ ᱠᱚᱨᱮ ᱡᱟᱦᱟᱱ ᱠᱚ ᱵᱟᱹᱱᱩᱜ ᱠᱚᱣᱟ? ᱦᱟᱱᱦᱟᱨ ᱛᱮᱫ ᱫᱚᱭᱮ ᱢᱮᱱ ᱠᱮᱫᱟ ᱪᱮᱹᱞᱮᱹ ᱫᱚᱠᱚ ᱛᱟᱦᱮᱱᱟ ᱵᱟᱹᱦᱩ? ᱳᱠᱳᱨ ᱪᱮᱹᱞᱮᱹ ᱜᱮᱛᱚ ᱵᱟᱞᱮ ᱧᱟᱢ ᱵᱟᱲᱟ ᱟᱠᱟᱫ ᱠᱚᱣᱟ ᱛᱤᱥ ᱦᱚᱸ ᱾ ᱵᱟᱝ ᱵᱟᱝ ᱟᱞᱳᱵᱮᱱ
ᱵᱚᱛᱚᱨᱟᱜᱼᱟ ᱾ ᱫᱮᱞᱟᱝ ᱛᱤᱦᱤᱧ ᱫᱚ ᱚᱲᱟᱜ ᱛᱮ, ᱢᱟ ᱞᱟᱦᱟᱜ ᱵᱮᱱ ᱟᱵᱮᱱ ᱜᱮ ᱾ ᱱᱟᱣᱟ ᱵᱟᱹᱦᱩ ᱫᱚ ᱦᱟᱱᱛᱮ ᱱᱟᱛᱮ ᱠᱚᱭᱚᱜ ᱠᱚᱭᱚᱜ ᱛᱮᱭ ᱛᱟᱲᱟᱢ ᱟᱠᱟᱫᱟ ᱾ ᱟᱫᱚ ᱢᱚᱱᱮᱨᱮ ᱪᱮᱫ ᱪᱚᱝ ᱵᱚᱛᱚᱨ ᱵᱚᱛᱚᱨᱮ ᱟᱹᱭᱠᱟᱹᱣ ᱮᱫᱟ ᱾ ᱦᱟᱱᱦᱟᱨ ᱛᱮᱫ ᱞᱟᱦᱟ ᱞᱟᱦᱟ ᱛᱮᱭ ᱪᱟᱞᱟᱜ ᱠᱟᱱ ᱨᱮᱦᱚᱸ ᱪᱮᱫᱟᱜ ᱪᱚᱝ ᱪᱳᱢᱳᱞ ᱜᱮᱭ ᱟᱹᱭᱠᱟᱹᱣ ᱮᱫᱟ ᱾ ᱜᱷᱟᱱᱮ ᱦᱟᱱᱦᱟᱨ ᱛᱮᱫ ᱜᱮᱭ ᱠᱚᱭᱚᱜ ᱨᱩᱣᱟᱹᱲᱟᱭ ᱠᱟᱱᱟ ᱾ ᱯᱟᱞᱮᱱ ᱦᱟᱱᱦᱟᱨ ᱛᱮᱫ ᱜᱮᱭ ᱡᱟᱦᱟ ᱞᱮᱠᱟᱱ ᱜᱮ! ᱚᱠᱚᱭ ᱵᱟᱲᱟᱭ ᱦᱟᱯᱮᱱ ᱫᱤᱱ ᱞᱟᱹᱜᱤᱫ ᱪᱮᱫ ᱪᱚᱝ ᱚᱞ ᱢᱮᱱᱟᱜ ? ᱟᱫᱚ ᱢᱤᱫᱴᱟᱝ ᱠᱟᱰᱮᱡ ᱨᱮᱭ ᱦᱟᱲᱟᱜ ᱜᱚᱫ ᱮᱱᱟ ᱾ ᱦᱟᱱᱦᱟᱨ ᱛᱮᱫ ᱮ ᱢᱮᱱ ᱜᱚᱫ ᱠᱮᱫᱟ ᱼ ᱢᱚᱡᱽ ᱛᱮ ᱛᱟᱲᱟᱢ ᱵᱮᱱ ᱵᱟᱹᱦᱩ ᱪᱮᱫ ᱩᱱᱟᱹᱜ ᱫᱚᱵᱮᱱ ᱧᱮᱞᱮᱫᱟ? ᱟᱫᱚ ᱠᱤᱢᱤᱱ ᱛᱮᱫ ᱫᱚᱭ ᱞᱟᱡᱟᱣ ᱮᱱ ᱛᱮ ᱪᱮᱫ ᱦᱚᱸ ᱵᱟᱭ ᱢᱮᱱ ᱞᱮᱫᱟ ᱥᱩᱴᱩᱝ ᱥᱩᱴᱩᱝ ᱮ ᱛᱟᱲᱟᱢ ᱦᱚᱫ ᱠᱮᱫᱟ ᱾

ᱫᱚᱥᱟᱨ ᱦᱤᱞᱚᱜ ᱫᱚ ᱦᱟᱱᱦᱟᱨ ᱛᱮᱫ ᱫᱚ ᱵᱟᱨᱮᱛᱼᱛᱮᱫ ᱛᱟᱠᱚ ᱴᱷᱮᱱᱮ ᱪᱟᱞᱟᱣᱟᱠᱟᱱ ᱛᱮ ᱮᱥᱠᱟᱨ ᱜᱮ ᱛᱟᱞᱟ ᱡᱷᱚᱲᱟ ᱜᱟᱱ ᱜᱩᱨᱤᱡ ᱯᱮᱨᱮᱡ ᱠᱟᱛᱮ ᱠᱷᱮᱛ ᱛᱮᱭ ᱤᱫᱤᱭ ᱞᱟᱹᱜᱤᱫ ᱾ ᱪᱷᱟᱴᱠᱟ ᱫᱩᱣᱟᱹᱨ ᱳᱰᱳᱠ ᱠᱟᱛᱮ ᱱᱟᱥᱮᱱᱟᱜ ᱮ ᱛᱮᱸᱜᱳ ᱧᱚᱜ ᱮᱱᱟ ᱾ ᱦᱟᱱᱛᱮ ᱱᱟᱛᱮᱭ ᱠᱚᱭᱚᱜ ᱟᱹᱪᱩᱨ ᱠᱮᱫᱟ ᱟᱨᱮ ᱛᱟᱲᱟᱢ ᱠᱮᱫᱟ ᱾ ᱵᱟᱲᱜᱮ ᱞᱟᱛᱟᱨ ᱵᱟᱹᱫᱽ ᱟᱲᱮ ᱫᱟᱨᱮᱹ ᱡᱷᱩᱲ ᱜᱟᱡᱟᱲ ᱧᱮᱞ ᱛᱮ ᱪᱮᱫᱟᱜ ᱪᱚᱝ ᱦᱚᱲᱢᱚ ᱠᱚ ᱨᱩᱢᱩᱭ ᱨᱩᱢᱩᱭ, ᱪᱟᱢᱟᱞ ᱪᱩᱢᱩᱞ, ᱱᱤᱡᱷᱩᱢ ᱜᱮᱭ ᱟᱹᱭᱠᱟᱹᱣ ᱮᱫᱟ ᱾ ᱜᱩᱨᱤᱡ ᱡᱷᱚᱲᱟ ᱦᱟᱢᱟᱞ ᱟᱨ ᱪᱟᱢᱟᱞ ᱪᱩᱢᱩᱞ ᱵᱚᱛᱚᱨ ᱛᱮ ᱦᱚᱲᱢᱚ ᱫᱚ ᱩᱫᱽᱜᱟᱹᱨ ᱛᱮ ᱠᱟᱹᱨᱤᱜᱷᱟᱢᱚᱜ ᱠᱟᱱ ᱛᱟᱭᱟ ᱾ ᱛᱟᱲᱟᱢ ᱛᱮ ᱡᱟᱸᱜᱟ ᱦᱚᱸ ᱟᱲᱮᱹ ᱠᱷᱚᱱ ᱞᱮᱸᱡᱮᱫ ᱯᱷᱟᱹᱥᱩᱲᱚᱜ ᱠᱟᱱ ᱛᱟᱭᱟ ᱾ ᱠᱷᱮᱛ ᱛᱤᱭᱳᱜ ᱥᱟᱶᱛᱮ ᱟᱹᱴᱩ ᱯᱟᱹᱴᱩ ᱜᱩᱨᱤᱡ ᱡᱷᱚᱲᱟᱭ ᱜᱤᱰᱤ ᱦᱚᱫ ᱠᱮᱫᱟ ᱟᱨ ᱟᱹᱰᱤ ᱟᱸᱴᱛᱮ ᱢᱚᱴᱟ ᱥᱟᱹᱦᱤᱡ ᱮ ᱥᱟᱦᱮᱫ ᱠᱮᱫᱟ ᱾ ᱟᱧᱪᱟᱨ ᱵᱷᱩᱲᱤ ᱠᱟᱛᱮ ᱢᱚᱞᱚᱝ ᱠᱚᱭ ᱡᱚᱫ ᱦᱟᱣᱮᱫ ᱠᱮᱫ ᱛᱟᱭᱟ ᱾ ᱱᱟᱥᱮᱱᱟᱜ ᱛᱮᱸᱜᱳ ᱛᱷᱤᱨ ᱠᱟᱛᱮ ᱦᱟᱱᱛᱮ ᱱᱟᱛᱮᱭ ᱠᱚᱭᱚᱜ ᱟᱹᱪᱩᱨ ᱠᱮᱫᱟ ᱾ ᱪᱮᱹᱞᱮᱹ ᱦᱚᱸ ᱦᱚᱲ ᱠᱚᱫᱚ ᱵᱟᱹᱱᱩᱜ ᱠᱚᱣᱟ ᱾ ᱟᱫᱚ ᱚᱲᱟᱜ ᱨᱩᱣᱟᱹᱲ ᱦᱚᱨ ᱛᱮᱭ ᱛᱟᱲᱟᱢ ᱠᱮᱫᱟ ᱾ ᱛᱟᱲᱟᱢᱮᱫᱟᱭ ᱟᱨᱮ ᱠᱚᱭᱚᱜ ᱨᱩᱣᱟᱹᱲᱮᱫᱟ ᱯᱟᱞᱮᱱ ᱡᱟᱦᱟᱭ ᱠᱚ ᱦᱤᱡᱩᱜ ᱠᱟᱱ ᱾ ᱚᱠᱚᱭ ᱦᱚᱸ ᱵᱟᱠᱚ ᱧᱮᱞᱚᱜ ᱠᱟᱱᱟ ᱾ ᱢᱮᱱᱠᱷᱟᱱ ᱟᱭᱟᱜ ᱛᱟᱭᱚᱢ ᱛᱮ ᱚᱠᱚᱭ ᱪᱚᱝ ᱛᱟᱲᱟᱢ ᱟᱠᱟᱫ ᱞᱮᱠᱟᱜᱮᱭ ᱟᱹᱭᱠᱟᱹᱣ ᱮᱫᱟ ᱾ ᱵᱟᱨ ᱡᱟᱸᱜᱟᱭ ᱛᱟᱲᱟᱢᱟ ᱟᱨ ᱛᱟᱭᱚᱢ ᱥᱮᱱᱮ ᱠᱚᱭᱚᱜᱟ ᱾ ᱪᱮᱞᱮ ᱦᱚᱸ ᱵᱟᱭ ᱧᱮᱞ ᱧᱟᱢ ᱠᱚᱣᱟ ᱾ ᱮᱠᱷᱮᱱ ᱦᱚᱲ ᱛᱟᱲᱟᱢ ᱞᱮᱠᱟᱜᱮᱭ ᱟᱹᱭᱠᱟᱹᱣᱮᱫᱟ ᱾ ᱚᱲᱟᱜ ᱵᱟᱲᱜᱮ ᱢᱩᱪᱟᱹᱫ ᱦᱟᱹᱵᱤᱡ ᱚᱱᱠᱟ ᱜᱮᱭ ᱟᱹᱭᱠᱟᱹᱣ ᱠᱮᱫᱟ ᱾ ᱩᱱᱤ ᱱᱟᱣᱟ ᱵᱟᱹᱦᱩ ᱫᱚ ᱫᱤᱱᱟᱹᱢ ᱜᱮ ᱜᱩᱨᱤᱡ ᱜᱤᱰᱤᱭ ᱪᱟᱞᱟᱜᱼᱟ ᱟᱨᱮ ᱵᱚᱛᱚᱨᱚᱜᱼᱟ ᱾ ᱢᱤᱫ ᱫᱤᱱ ᱦᱟᱱᱦᱟᱨ ᱛᱮᱫ ᱮ ᱢᱮᱛᱟᱭ ᱠᱟᱱᱟ ᱮ ᱜᱚ ᱠᱷᱮᱛ ᱛᱮ ᱜᱩᱨᱤᱡ ᱜᱤᱰᱤ ᱪᱟᱞᱟᱜ ᱛᱮ ᱵᱚᱛᱚᱨ ᱜᱮᱞᱤᱧ ᱟᱹᱭᱠᱟᱹᱣᱟ ᱾ ᱚᱠᱚᱭ ᱪᱚᱝ ᱛᱟᱭᱚᱢ ᱛᱟᱭᱚᱢ ᱛᱮᱭ ᱯᱟᱸᱡᱟ ᱵᱟᱲᱟᱭᱮᱫ ᱞᱮᱠᱟ ᱞᱤᱧ ᱟᱹᱭᱠᱟᱹᱣᱟ ᱾ ᱦᱟᱱᱦᱟᱨ ᱛᱮᱫ ᱫᱚ ᱚᱱᱟ ᱠᱟᱛᱷᱟ ᱫᱚ ᱵᱟᱭ ᱯᱟᱹᱛᱭᱟᱹᱣ ᱟᱫ ᱛᱟᱭᱟ? ᱢᱮᱱ ᱠᱮᱫᱟᱭ ᱢᱟᱥᱮ ᱵᱷᱟᱞᱟ ᱱᱩᱭ ᱵᱟᱹᱦᱩ ᱫᱚ ᱠᱟᱹᱴᱤᱡ ᱜᱤᱫᱽᱨᱟᱹ ᱞᱮᱠᱟᱭᱮ ᱵᱚᱛᱚᱨᱚᱜ ᱠᱟᱱᱟ ᱾ ᱪᱮᱹᱞᱮᱹ ᱦᱚᱸ ᱵᱟᱹᱱᱩᱜ ᱠᱚᱣᱟ ᱵᱟᱹᱦᱩ ᱾ ᱱᱟᱣᱟ ᱱᱟᱣᱟ ᱦᱚᱛᱮᱡ ᱛᱮ ᱚᱱᱠᱟ ᱵᱮᱱ ᱟᱹᱭᱠᱟᱹᱣ ᱮᱫᱟ ᱾ ᱦᱮᱣᱟ ᱞᱮᱱ ᱠᱷᱟᱱ ᱵᱮᱱ ᱟᱫᱚ ᱚᱱᱠᱟ ᱫᱚ ᱵᱟᱵᱮᱱ ᱟᱹᱭᱠᱟᱹᱣᱟ ᱾ ᱟᱫᱚ ᱚᱱᱠᱟ ᱵᱚᱛᱚᱨ ᱵᱚᱛᱚᱨ ᱛᱮᱜᱮ ᱫᱤᱱᱟᱹᱢ ᱦᱤᱞᱳᱜ ᱠᱷᱮᱛ ᱛᱮᱜᱮ ᱜᱩᱨᱤᱡ ᱜᱤᱰᱤ ᱫᱚᱭ ᱪᱟᱞᱟᱜᱼᱟ ᱾

ᱢᱤᱫ ᱫᱤᱱ ᱦᱟᱱᱦᱟᱨ ᱛᱮᱫ ᱫᱚᱭᱮ ᱢᱮᱱ ᱠᱮᱫᱟ ᱮ ᱵᱟᱹᱦᱩ ᱛᱤᱦᱤᱧ ᱫᱚ ᱫᱟᱛᱨᱚᱢ ᱤᱫᱤ ᱛᱚᱨᱟᱭ ᱵᱮᱱ, ᱦᱤᱡᱩᱜ ᱡᱚᱠᱷᱟᱱ ᱟᱵᱳ ᱟᱲᱮ ᱨᱮᱱᱟᱝ ᱛᱟᱞᱮ ᱥᱟᱠᱟᱢ ᱵᱮᱱ ᱜᱮᱫ ᱛᱚᱨᱟᱭᱟ ᱾ ᱵᱟᱨᱭᱟ ᱜᱟᱱ ᱜᱩᱸᱜᱩᱸ ᱞᱤᱧ ᱵᱮᱱᱟᱣ ᱠᱟᱜᱼᱟ ᱾ ᱦᱳᱲᱳ ᱨᱚᱦᱚᱭ ᱡᱚᱠᱷᱟᱱ ᱵᱟᱠᱷᱟᱱ ᱪᱮᱫ ᱛᱮᱞᱟᱝ ᱩᱢᱩᱞᱚᱜᱼᱟ ᱾ ᱮᱱ ᱦᱤᱞᱚᱜ ᱫᱚ ᱟᱨᱦᱚᱸ ᱰᱷᱮᱨ ᱧᱚᱜᱼᱮ ᱵᱚᱛᱚᱨᱚᱜ ᱠᱟᱱᱟ ᱪᱮᱫᱟᱜ ᱥᱮ ᱛᱤᱦᱤᱧ ᱫᱚ ᱟᱨᱦᱚᱸ ᱵᱟᱲᱛᱤ ᱜᱷᱟᱹᱲᱤᱡ ᱛᱟᱦᱮᱱ ᱦᱚᱭᱚᱜ ᱛᱟᱭᱟ ᱾ ᱚᱱᱟᱛᱮᱭ ᱢᱮᱱ ᱠᱮᱫᱟ ᱮ ᱜᱚ ᱫᱮᱞᱟᱝ ᱛᱤᱦᱤᱧ ᱫᱚ ᱟᱵᱮᱱ ᱦᱚᱸ ᱜᱚᱲᱚ ᱟᱹᱞᱤᱧ ᱵᱮᱱ ᱾ ᱦᱟᱱᱦᱟᱨ ᱛᱮᱫ ᱮ ᱢᱮᱱ ᱠᱮᱫᱟ ᱼ ᱦᱚᱧᱦᱟᱨ ᱵᱮᱱ ᱱᱤᱛ ᱜᱮᱦᱟᱸᱜ ᱵᱟᱡᱟᱨᱮ ᱪᱟᱞᱟᱜᱼᱟ ᱩᱱᱤ ᱦᱚᱸ ᱵᱟᱝ ᱞᱟᱹᱭ ᱡᱩᱛᱟᱭ ᱠᱷᱟᱱ ᱡᱚᱛᱚᱭ ᱦᱤᱲᱤᱧ ᱠᱟᱜᱼᱟ ᱱᱟᱦᱟᱜ ᱾
ᱫᱳ ᱦᱟᱸᱜ ᱪᱟᱞᱟᱜ ᱵᱮᱱ ᱠᱚᱭᱚᱜ ᱵᱮᱱᱟᱞᱤᱧ ᱱᱟᱦᱟᱜ ᱾ ᱚᱱᱠᱟ ᱢᱮᱱ ᱢᱮᱱ ᱛᱮᱜᱮ ᱜᱩᱨᱤᱡ ᱴᱷᱮᱠᱟ ᱫᱚᱭ ᱛᱩᱞ ᱟᱫᱮᱭᱟ ᱾ ᱟᱫᱚ ᱱᱟᱣᱟ ᱵᱟᱹᱦᱩ ᱫᱚ ᱩᱭᱦᱟᱹᱨ ᱩᱭᱦᱟᱹᱨ ᱛᱮᱭ ᱛᱟᱲᱟᱢ ᱟᱠᱟᱫᱟ ᱠᱷᱮᱛ ᱟᱲᱮ ᱦᱚᱨᱛᱮ ᱾ ᱥᱮᱴᱮᱨ ᱠᱮᱫᱟᱭ ᱠᱷᱮᱛ, ᱜᱩᱨᱤᱡ ᱮ ᱜᱤᱰᱤ ᱠᱮᱫᱟ, ᱟᱫᱚ ᱛᱟᱞᱮᱹ ᱥᱟᱠᱟᱢ ᱜᱮᱜᱮᱫ ᱮ ᱫᱷᱩᱨᱟᱹᱣ ᱮᱱᱟ ᱾ ᱪᱮᱛᱟᱱ ᱠᱷᱮᱛ ᱟᱲᱮᱹ ᱨᱮᱱᱟᱝ ᱢᱤᱫ ᱦᱚᱵᱟᱨ ᱛᱟᱞᱮ ᱥᱟᱠᱟᱢᱮ ᱜᱮᱫ ᱠᱮᱫᱟ ᱾ ᱩᱱ ᱚᱠᱛᱚ ᱢᱤᱫ ᱴᱟᱝ ᱱᱟᱱᱦᱟ ᱥᱟᱹᱦᱤᱡ ᱦᱚᱭ ᱟᱭᱟᱜ ᱦᱚᱲᱢᱚ ᱥᱮᱫᱼᱛᱮ ᱯᱟᱨᱚᱢ ᱪᱟᱞᱟᱣ ᱮᱱᱟ ᱾ ᱱᱟᱥᱮᱱᱟᱜ ᱮ ᱞᱩᱠᱩᱫ ᱜᱚᱫ ᱮᱱᱟ ᱾ ᱢᱤᱫ ᱫᱷᱟᱣ ᱫᱚ ᱡᱷᱩᱲ ᱠᱷᱚᱱ ᱪᱮᱹᱞᱮᱹ ᱪᱚᱝ ᱧᱤᱨ ᱳᱰᱳᱠᱮᱱ ᱞᱮᱠᱚᱭ ᱟᱹᱭᱠᱟᱹᱣ ᱠᱮᱫᱟ ᱾ ᱢᱤᱫ ᱫᱷᱟᱣ ᱫᱚ ᱚᱠᱚᱭ ᱪᱚᱝ ᱟᱭᱟᱜ ᱛᱟᱭᱚᱢ ᱥᱮᱫ ᱛᱮᱭ ᱯᱟᱨᱚᱢ ᱪᱟᱞᱟᱣ ᱮᱱ ᱞᱮᱠᱟᱭ ᱟᱹᱭᱠᱟᱹᱣ ᱠᱮᱫᱟ ᱾ ᱱᱚᱝᱠᱟ ᱟᱭᱢᱟ ᱫᱷᱟᱣ ᱴᱟᱴᱠᱟ ᱵᱷᱤᱞᱠᱤ ᱞᱮᱠᱟᱭ ᱵᱩᱡᱷᱟᱹᱣ ᱮᱫᱟ ᱾ ᱩᱱᱫᱚ ᱟᱹᱴᱩ ᱯᱟᱹᱴᱩ ᱟᱨ ᱢᱤᱫ ᱦᱚᱵᱟᱨ ᱛᱟᱞᱮᱹ ᱥᱟᱠᱟᱢ ᱮ ᱜᱮᱫ ᱦᱚᱫ ᱠᱮᱫᱟ ᱾ ᱟᱫᱚ ᱚᱲᱟᱜ ᱛᱮᱭ ᱪᱟᱞᱟᱜ ᱞᱟᱹᱜᱤᱫ ᱛᱟᱞᱮ ᱥᱟᱠᱟᱢᱮ ᱛᱚᱞ ᱵᱚᱡᱷᱟᱭ ᱞᱟᱜᱤᱫ ᱩᱱ ᱚᱠᱛᱚ ᱜᱮ ᱢᱤᱫ ᱢᱟᱨᱟᱝ ᱵᱷᱟᱨᱰᱚ ᱦᱮᱡ ᱮᱱᱟ ᱾ ᱚᱱᱟ ᱵᱷᱟᱨᱰᱚ ᱛᱮ ᱛᱟᱞᱮᱹ ᱥᱟᱠᱟᱢ ᱠᱚ ᱡᱚᱛᱚᱭ ᱦᱚᱭ ᱚᱴᱟᱝ ᱠᱮᱫ ᱛᱟᱭᱟ ᱟᱨ ᱟᱡ ᱦᱚᱸ ᱳᱠᱟᱥᱮᱡ ᱪᱚᱝ ᱮ ᱦᱚᱭ ᱚᱴᱟᱝ ᱠᱮᱫᱮᱭᱟ ᱵᱩᱡᱽ ᱜᱮ ᱵᱟᱭ ᱧᱟᱢ ᱞᱮᱫᱟ ᱾ ᱚᱲᱟᱜ ᱛᱮᱫᱚ ᱟᱫᱚ ᱵᱟᱭ ᱨᱩᱣᱟᱹᱲ ᱫᱟᱲᱮᱭᱟᱫᱟ ᱾

ᱦᱟᱱᱦᱟᱨ ᱛᱮᱫ ᱫᱚ ᱟᱭᱟᱜ ᱠᱟᱛᱷᱟ ᱞᱮᱠᱟ ᱛᱮ ᱠᱤᱢᱤᱱ ᱛᱮᱫ ᱠᱚᱭᱚᱜ ᱫᱟᱨᱟᱢᱮ ᱪᱟᱞᱟᱣᱮᱱᱟ ᱾ ᱢᱮᱱᱠᱷᱟᱱ ᱠᱤᱢᱤᱱ ᱛᱮᱫ ᱫᱚ ᱵᱟᱭ ᱧᱮᱞ ᱧᱟᱢᱮ ᱠᱟᱱᱟ ᱾ ᱠᱚᱭᱚᱜ ᱠᱚᱭᱚᱜ ᱛᱮ ᱠᱷᱮᱛ ᱫᱷᱟᱹᱵᱤᱡ ᱜᱮᱭ ᱪᱟᱞᱟᱣ ᱮᱱᱟ ᱾ ᱠᱷᱮᱛ ᱨᱮ ᱪᱟᱞᱟᱣ ᱠᱟᱛᱮᱭ ᱧᱮᱞᱮᱫᱟ ᱠᱟᱺᱰᱷᱩᱢ, ᱡᱷᱚᱲᱟ, ᱫᱟᱛᱨᱚᱢ ᱢᱤᱫᱴᱷᱮᱱ ᱜᱮ ᱫᱚᱦᱚ ᱢᱮᱱᱟᱜᱼᱟ ᱾ ᱛᱟᱞᱮᱹ ᱥᱟᱠᱟᱢ ᱫᱚ ᱦᱚᱭᱛᱮ ᱜᱚᱴᱟ ᱯᱟᱥᱱᱟᱣ ᱵᱟᱲᱟᱣᱟᱠᱟᱱᱟ ᱾ ᱦᱚᱦᱚ ᱵᱟᱲᱟᱭᱮᱫᱟᱭ, ᱮ
ᱵᱟᱹᱦᱩ ᱚᱠᱟᱭᱮᱱᱟᱵᱮᱱ ᱱᱟ, ᱵᱟᱹᱦᱩ ᱮ ᱵᱟᱹᱦᱩ! ᱵᱟᱵᱟ ᱼ ᱵᱟᱵᱟ ᱫᱷᱚᱱᱱᱤ ᱜᱤᱫᱽᱨᱟᱹ ᱠᱟᱱᱟᱢ ᱱᱟ ᱾ ᱪᱮᱫᱟᱜ ᱵᱟᱹᱧ ᱜᱚᱝᱼᱟ? ᱩᱱᱫᱚ ᱟᱫᱚ ᱱᱟᱱᱟ ᱦᱩᱱᱟᱹᱨ ᱩᱭᱦᱟᱹᱨ ᱦᱮᱡ ᱟᱭ ᱠᱟᱱᱟ ᱾ ᱠᱩᱢᱚᱱᱮᱭᱟᱱ ᱦᱚᱲ ᱠᱚᱦᱚᱸ ᱡᱟᱦᱟ ᱞᱮᱠᱟ ᱠᱚ ᱚᱨ ᱟᱹᱛᱠᱤᱨ ᱵᱟᱲᱟ ᱫᱟᱲᱮ ᱟᱭᱟ ᱾ ᱵᱟᱝ ᱨᱮᱫᱚ ᱟᱡ ᱛᱮᱦᱚᱸ ᱡᱟᱦᱟᱥᱮᱱᱮ ᱪᱟᱞᱟᱣ ᱫᱟᱲᱮᱭᱟᱜᱼᱟ ᱾ ᱟᱹᱰᱤ ᱜᱩᱱᱤ ᱵᱷᱟᱹᱵᱤ ᱨᱮᱭ ᱯᱟᱲᱟᱣ ᱮᱱᱟ ᱾ ᱞᱟᱛᱟᱨ ᱠᱷᱮᱛ ᱪᱮᱛᱟᱱ ᱠᱷᱮᱛ ᱜᱚᱴᱟ ᱦᱚᱦᱚ ᱦᱚᱦᱚ ᱛᱮᱭ ᱯᱟᱸᱡᱟ ᱟᱹᱪᱩᱨ ᱠᱮᱹᱫᱮᱹᱭᱟ ᱾ ᱢᱮᱱᱠᱷᱟᱱ ᱠᱤᱢᱤᱱ ᱛᱮᱫ ᱫᱚ ᱵᱟᱭ ᱯᱟᱸᱡᱟ ᱧᱟᱢ ᱞᱮᱹᱫᱮᱹᱭᱟ ᱾ ᱢᱚᱠᱚᱧ ᱛᱮ ᱵᱟᱝ ᱫᱚ, ᱟᱡ ᱜᱚᱼᱵᱟ ᱛᱟᱠᱚ ᱴᱷᱮᱱ ᱜᱮᱪᱚᱭ ᱫᱟᱹᱲ ᱠᱮᱫ, ᱵᱟᱝ ᱫᱚ ᱡᱟᱦᱟᱭ ᱠᱚ ᱟᱹᱛᱠᱤᱨ ᱠᱮᱹᱫᱮᱹ? ᱜᱩᱱᱤ ᱵᱷᱟᱹᱵᱤ ᱛᱮ ᱚᱠᱟᱜᱮ ᱵᱟᱭ ᱧᱟᱢ ᱫᱟᱲᱮᱭᱟᱜ ᱠᱟᱱᱟ ᱾ ᱮᱴᱟᱜ ᱟᱛᱳ ᱚᱲᱟᱜ ᱨᱮᱱ ᱠᱩᱲᱤ ᱜᱤᱫᱽᱨᱟᱹ ᱱᱟᱣᱟ ᱱᱟᱣᱟ ᱫᱚ ᱢᱚᱠᱚᱧ ᱟᱹᱭᱠᱟᱜᱼᱟ ᱾ ᱦᱟᱱᱟ ᱱᱤᱭᱟᱹ ᱜᱩᱱᱤᱼᱵᱷᱟᱹᱵᱤ, ᱜᱩᱱᱤᱵᱷᱟᱹᱵᱤ ᱛᱮ ᱛᱟᱞᱮᱹ ᱥᱟᱠᱟᱢ ᱠᱚᱫᱚᱭ ᱦᱟᱹᱨ ᱜᱩᱴᱭᱟᱹᱣ ᱠᱮᱫᱟ ᱟᱨ ᱟᱲᱟᱜ ᱛᱮᱭ ᱨᱩᱣᱟᱹᱲ ᱦᱮᱡ ᱮᱱᱟ ᱾ ᱩᱢᱤᱱ ᱫᱤᱱ ᱫᱚ ᱵᱟᱭ ᱵᱚᱛᱚᱨ ᱟᱠᱟᱱ ᱨᱮᱦᱚᱸ ᱛᱤᱦᱤᱧ ᱫᱚ ᱪᱮᱫᱟᱜ ᱪᱚᱝ ᱪᱳᱢᱳᱞ ᱪᱳᱢᱳᱞ ᱜᱮᱭ ᱟᱹᱭᱠᱟᱹᱣ ᱮᱫᱟ ᱾ ᱪᱮᱹᱞᱮᱹ ᱪᱚᱝ ᱛᱟᱭᱚᱢ ᱥᱮᱫ ᱠᱷᱚᱱ ᱛᱟᱞᱮᱹ ᱥᱟᱠᱟᱢᱮ ᱚᱨᱮᱫ ᱛᱟᱭ ᱞᱮᱠᱟᱭ ᱟᱹᱭᱠᱟᱹᱣᱮᱫᱟ ᱾ ᱵᱷᱟᱵᱽᱱᱟ ᱛᱮ ᱟᱨ ᱵᱚᱛᱚᱨ ᱛᱮ ᱢᱮᱫ ᱫᱟᱜ ᱜᱮ ᱥᱟᱨᱮᱲᱚᱜ ᱠᱟᱱ ᱛᱟᱭᱟ ᱾ ᱚᱲᱟᱜ ᱨᱮᱜᱮ ᱞᱚᱫᱚᱢ ᱵᱟᱹᱵᱩ ᱨᱮᱱ ᱟᱡ ᱵᱟᱵᱟ ᱫᱚᱭ ᱛᱟᱸᱦᱮ ᱠᱟᱱᱟ ᱾ ᱵᱚᱞᱚ ᱛᱚᱨᱟ ᱥᱮᱸ ᱯᱷᱚᱸ ᱥᱟᱦᱮᱫ ᱟᱛᱮᱭ ᱞᱚᱫᱚᱢ ᱟᱡ ᱵᱟᱭ ᱢᱮᱛᱟᱭ ᱠᱟᱱᱟ “ᱵᱟᱹᱦᱩ ᱢᱟ ᱜᱩᱨᱤᱡ ᱜᱤᱰᱤ ᱥᱮᱱ ᱠᱟᱛᱮ ᱚᱠᱟ ᱨᱮᱪᱚᱭ ᱟᱸᱜᱮᱱ ᱮᱱᱟ”᱾ ᱜᱚᱴᱟᱧ ᱯᱟᱸᱡᱟ ᱠᱮᱫᱮᱭᱟ ᱚᱠᱟ ᱨᱮᱜᱮ ᱵᱟᱹᱧ ᱧᱟᱢ ᱞᱮᱫᱮᱭᱟ ᱾ ᱞᱚᱫᱚᱢ ᱟᱡ ᱵᱟ ᱥᱟᱹᱢᱩ ᱫᱚᱭ ᱢᱮᱱ ᱠᱮᱫᱟ ᱯᱟᱞᱮᱱ ᱟᱡ ᱜᱚ ᱵᱟ ᱚᱲᱟᱜ ᱛᱮᱭ ᱫᱟᱹᱲ ᱠᱮᱫ ᱾ ᱱᱤᱛ ᱜᱮ ᱵᱟᱞᱟ ᱠᱚᱲᱟ ᱞᱟᱹᱭ ᱚᱴᱚ ᱦᱚᱸ ᱦᱳᱭᱳᱜᱼᱟ ᱾ ᱟᱨ ᱪᱟᱞᱟᱣ ᱟᱠᱟᱱ ᱠᱷᱟᱱ ᱫᱚᱭ ᱯᱟᱸᱡᱟ ᱴᱷᱮᱥᱟ ᱦᱚᱸ ᱦᱳᱭᱳᱜᱼᱟ ᱾ ᱵᱟᱹᱵᱩ ᱚᱠᱟᱥᱮᱫ ᱠᱟᱰᱟᱭ ᱤᱫᱤ ᱟᱠᱟᱫ ᱠᱳᱣᱟ ᱯᱟᱸᱡᱟ ᱧᱟᱢ ᱠᱟᱛᱮᱫ ᱤᱧ ᱞᱟᱹᱭ ᱟᱭ ᱜᱮ ᱾

ᱞᱚᱫᱚᱢ ᱟᱨ ᱥᱟᱢᱩ ᱟᱯᱟ ᱦᱚᱯᱚᱱ ᱱᱟᱹᱭᱦᱟᱹᱨ ᱠᱤᱱ ᱪᱟᱞᱟᱣ ᱮᱱᱟ ᱾ ᱥᱮᱴᱮᱨ ᱠᱟᱛᱮᱫ ᱥᱟᱱᱟᱢ ᱟᱜ ᱠᱟᱛᱷᱟ ᱠᱤᱱ ᱞᱟᱹᱭᱟᱫ ᱠᱳᱣᱟ, ᱢᱮᱱᱠᱷᱟᱱ ᱪᱷᱤᱛᱟᱹ ᱢᱟᱹᱭ ᱫᱚ ᱱᱚᱸᱰᱮ ᱫᱚ ᱵᱟᱭ ᱦᱮᱡ ᱟᱠᱟᱱᱟ ᱾ ᱟᱹᱰᱤ ᱦᱟᱭ ᱦᱩᱛᱟᱹᱥ ᱨᱮᱠᱤᱱ ᱯᱟᱲᱟᱣ ᱮᱱᱟ ᱾ ᱦᱟᱱᱦᱟᱨ ᱛᱮᱫ ᱮ ᱢᱮᱱ ᱠᱮᱫᱟ ᱼ ᱯᱟᱥᱮᱫ ᱡᱟᱶᱟᱭ ᱦᱚᱯᱚᱱ ᱮᱨᱟᱧ ᱫᱚᱭ ᱢᱚᱠᱚᱧ ᱮᱢᱟᱱ ᱞᱮᱱ? ᱵᱟᱵᱮᱱ ᱟᱹᱭᱠᱟᱹᱣ ᱟᱠᱟᱫᱮᱭᱟ ᱡᱟᱢᱟᱭ ᱩᱥᱟᱹᱫ ᱦᱚᱲ ᱞᱮᱠᱟ ᱡᱟᱯᱟᱜ ᱡᱮᱨᱮᱫ ᱢᱩᱞᱤᱱ ᱢᱮᱫ ᱟᱦᱟ ᱠᱟᱛᱮ ᱱᱤᱡᱷᱩᱢ ᱛᱷᱤᱨ ᱠᱟᱛᱮᱫ ᱛᱟᱦᱮᱱ?

ᱞᱚᱫᱚᱢ ᱺᱼ ᱵᱟᱝᱼᱟ ᱜᱚ ᱟᱞᱤᱧ ᱫᱚ ᱥᱟᱨᱟ ᱫᱤᱱ ᱞᱟᱸᱫᱟ ᱢᱮᱫ ᱟᱦᱟ ᱠᱟᱛᱮᱫ ᱜᱮᱭ ᱨᱚᱲ ᱟᱠᱟᱫ ᱞᱤᱧᱟ ᱾ ᱢᱚᱠᱚᱧ ᱞᱮᱠᱟ ᱫᱚ ᱵᱟᱞᱤᱧ ᱵᱩᱡᱽ ᱵᱟᱲᱟ ᱟᱠᱟᱫᱮᱭᱟ ᱾

ᱥᱟᱢᱩ ᱺᱼ ᱵᱟᱞᱟ ᱠᱚᱲᱟ ᱦᱳ ᱱᱤᱛ ᱫᱚ ᱪᱮᱫ ᱵᱚᱱ ᱪᱮᱠᱟᱭᱟ? ᱫᱮᱞᱟ ᱟᱞᱮ ᱴᱷᱮᱱ ᱜᱮᱵᱚᱱ ᱪᱟᱞᱟᱣ ᱞᱮᱱ ᱜᱮ, ᱵᱟᱞᱟᱢ ᱯᱮ ᱮᱨᱟ ᱜᱮ ᱯᱟᱥᱮᱫ ᱡᱟᱦᱟᱱᱟᱜ ᱚᱱᱠᱟᱱ ᱰᱚᱜᱚᱨ ᱮ ᱞᱟᱹᱭ ᱫᱟᱲᱮ ᱟᱵᱳᱱ ᱠᱷᱟᱱ ᱫᱚ ᱾ ᱟᱨ ᱥᱟᱱᱟᱢ ᱦᱚᱲ ᱫᱩᱲᱩᱵ ᱠᱟᱛᱮᱫ ᱵᱚᱱ ᱨᱚᱯᱚᱲᱟ ᱾

ᱞᱚᱫᱚᱢᱟᱜ ᱦᱟᱱᱦᱟᱨ ᱦᱚᱧᱦᱟᱨ ᱚᱲᱟᱜ ᱠᱷᱚᱱ ᱥᱟᱱᱟᱢ ᱦᱚᱲ ᱞᱚᱫᱚᱢ ᱛᱟᱠᱚ ᱚᱲᱟᱜ ᱛᱮᱠᱚ ᱨᱩᱣᱟᱹᱲ ᱦᱮᱡ ᱮᱱᱟ ᱾

ᱞᱚᱫᱚᱢ ᱺᱼ ᱟᱡ ᱜᱚᱜᱚ ᱦᱚᱦᱚ ᱟᱛᱮᱭ ᱢᱮᱛᱟᱭ ᱠᱟᱱᱟ ᱮ ᱜᱚ ᱫᱮᱞᱟ ᱱᱚᱰᱮ ᱦᱮᱡ ᱞᱮᱱ ᱢᱮ ᱾

ᱦᱟᱱᱦᱟᱨ ᱮᱨᱟ ᱺᱼ ᱦᱟᱭ ᱦᱟᱭ – ᱟᱯᱮ ᱫᱚ ᱚᱠᱟᱛᱮ ᱜᱤᱫᱽᱨᱟᱹ ᱫᱚᱯᱮ ᱠᱳᱞ ᱜᱤᱰᱤ ᱠᱟᱫᱮᱭᱟ ᱦᱳ? ᱢᱟᱥᱮ ᱞᱟᱭ ᱯᱮ? ᱱᱤᱛ ᱫᱚ ᱚᱠᱟᱨᱮ ᱵᱚᱱ ᱧᱟᱢᱮᱭᱟ ᱦᱳ? ᱪᱮᱫ ᱠᱚ ᱯᱮ ᱨᱚᱲ ᱮᱜᱮᱨ ᱟᱠᱟᱫᱮᱭᱟ ᱯᱟᱥᱮᱫ? ᱢᱟᱥᱮ ᱞᱟᱹᱭ ᱟᱞᱮ ᱯᱮ?

ᱢᱟᱞᱤ ᱺᱼ ᱵᱟᱝ ᱵᱟᱝᱼᱟ ᱯᱷᱩᱞ ᱟᱵᱚ ᱫᱚ ᱪᱮᱫ ᱜᱮ ᱵᱟᱝ ᱵᱚᱱ ᱨᱚᱲ ᱮᱜᱮᱨ ᱮᱭᱟ ᱜᱤᱫᱽᱨᱟᱹ ᱫᱚ ᱾ ᱪᱮᱫ ᱠᱷᱟᱛᱤᱨ ᱜᱮ ᱵᱟᱝ ᱵᱚᱱ ᱮᱜᱮᱨ ᱮᱭᱟ ᱾ ᱟᱯᱱᱟᱨ ᱨᱮᱱ ᱠᱩᱲᱤ ᱜᱤᱫᱽᱨᱟᱹ ᱞᱮᱠᱟᱱ ᱜᱤᱫᱽᱨᱟᱹ ᱠᱟᱱᱟᱭ ᱾

ᱥᱟᱢᱩ ᱺᱼ ᱮ ᱜᱳ ᱵᱟᱹᱦᱩ ᱜᱤᱫᱽᱨᱟᱹ ᱡᱟᱦᱟᱱᱟᱜ ᱠᱚ ᱵᱟᱭ ᱞᱟᱭ ᱵᱟᱲᱟ ᱟᱠᱟᱫ ᱢᱮᱭᱟ? ᱢᱟᱱᱮ ᱵᱚᱛᱚᱨ ᱠᱟᱛᱷᱟ ᱠᱚ ᱾ ᱢᱮᱱ ᱟᱠᱳ ᱟᱹᱰᱤ ᱥᱮᱫᱟᱭ ᱥᱮᱫᱟᱭ ᱠᱷᱚᱱ ᱟᱵᱚ ᱵᱟᱲᱜᱮ ᱞᱟᱛᱟᱨ ᱫᱚ ᱵᱷᱩᱛᱟᱹᱦᱟ ᱜᱮᱭᱟ ᱾ ᱚᱠᱟᱭᱮᱱᱟᱭ ᱜᱤᱫᱽᱨᱟᱹ ᱫᱚ ᱯᱟᱡᱟᱛᱮ ᱵᱟᱭ ᱧᱟᱢᱚᱜ ᱠᱟᱱᱟ ᱡᱚᱠᱷᱚᱱ ᱾ ᱯᱟᱥᱮᱫ ᱫᱚ ᱟᱸᱜᱮᱱ ᱮᱱᱟᱭ ᱪᱷᱟᱱ ᱮᱱᱟᱭ?

ᱢᱟᱞᱤ ᱺᱼ ᱦᱮᱸ ᱥᱮ ᱪᱮᱛᱟ ᱜᱳ? ᱵᱚᱸᱜᱟᱼᱵᱚᱸᱜᱟ ᱠᱟᱛᱷᱟ ᱫᱚ ᱩᱢᱤᱱ ᱫᱤᱱ ᱪᱮᱫᱟᱜ ᱵᱟᱢ ᱞᱟᱭ ᱟᱠᱟᱫᱤᱧᱟ ᱜᱳ? ᱚᱱᱟᱛᱮᱜᱮ ᱯᱟᱥᱮᱫ ᱯᱳᱭᱞᱳ ᱫᱤᱱ ᱜᱩᱨᱤᱡ ᱜᱤᱰᱤ ᱪᱟᱞᱟᱣ ᱨᱮᱜᱮ ᱠᱩᱞᱤ ᱞᱤᱫᱤᱧᱟᱭ ᱼ ᱦᱮᱸ ᱜᱚ ᱱᱚᱣᱟ ᱜᱟᱡᱟᱲ ᱠᱚᱨᱮ ᱪᱮᱞᱮ ᱦᱚᱸ ᱵᱟᱱᱩᱜ ᱠᱚᱣᱟ? ᱵᱟᱱᱩᱜ ᱢᱮᱱᱛᱮᱧ ᱢᱮᱛᱟ ᱫᱮᱭᱟ ᱾ ᱟᱨ ᱢᱤᱫᱴᱟᱝ ᱠᱟᱛᱷᱟ ᱫᱚᱧ ᱫᱤᱥᱟᱹ ᱠᱮᱫ ᱛᱟᱭᱟ ᱾ ᱜᱩᱨᱤᱡ ᱜᱤᱰᱤ ᱪᱟᱞᱟᱜ ᱞᱟᱦᱟ ᱜᱮᱭ ᱞᱟᱹᱭ ᱟᱫᱤᱧ ᱛᱟᱸᱦᱮᱫ – ᱮᱜᱚ ᱫᱤᱱᱟᱢ ᱦᱤᱞᱚᱜ ᱜᱮ ᱟᱞᱤᱧ ᱛᱟᱭᱚᱢ ᱛᱟᱭᱚᱢ ᱛᱮ ᱦᱚᱲ ᱛᱟᱲᱟᱢ ᱞᱮᱠᱟ ᱪᱟᱢᱟᱞ ᱪᱚᱢᱚᱞ ᱞᱤᱧ ᱵᱩᱡᱷᱟᱹᱣᱟ ᱾ ᱟᱫᱚᱧ ᱢᱮᱛᱟᱭ ᱠᱟᱱᱟ ᱵᱟᱝ ᱵᱟᱹᱦᱩ ᱪᱮᱞᱮ ᱦᱚᱸ ᱵᱟᱱᱩᱜ ᱠᱚᱣᱟ ᱾ ᱪᱟᱜ ᱵᱮᱱ ᱵᱚᱛᱚᱨᱚᱜ ᱠᱟᱱᱟ? ᱟᱫᱚ ᱜᱩᱨᱤᱡ ᱡᱷᱚᱲᱟᱭᱤᱧ ᱛᱩᱞ ᱟᱫᱮᱛᱮᱭ ᱪᱟᱞᱟᱣ ᱮᱱᱟᱭ ᱾ ᱚᱱᱟ ᱠᱟᱛᱷᱟ ᱵᱮᱜᱚᱨ ᱫᱚ ᱪᱮᱫ ᱜᱮ ᱵᱟᱹᱧ ᱵᱟᱰᱟᱭᱟ ᱯᱷᱩᱞ ᱾

ᱥᱟᱱᱟᱢ ᱠᱚ ᱵᱷᱟᱵᱤᱛ ᱠᱟᱛᱮ ᱠᱚ ᱧᱮᱞ ᱠᱮᱫᱟ ᱵᱟᱝᱢᱟ – ᱡᱟᱱᱤᱡ ᱮ ᱟᱸᱜᱮᱱ ᱟᱠᱟᱱ ᱜᱮᱭᱟ ᱾ ᱚᱱᱟᱛᱮ ᱥᱩᱱᱩᱢ ᱥᱟᱠᱟᱢ ᱠᱚ ᱵᱚᱸᱜᱟ ᱠᱮᱫᱟ ᱥᱮᱠᱚ ᱜᱟᱥᱟᱣ ᱠᱮᱫᱟ ᱾ ᱢᱮᱱ ᱠᱮᱫᱟ ᱠᱚ ᱫᱳᱥ ᱜᱮ ᱦᱳᱭ ᱟᱠᱟᱱᱟ ᱾ ᱵᱟᱲᱤᱡ ᱦᱳᱭ ᱟᱠᱟᱱᱟ ᱾ ᱪᱷᱤᱛᱟᱹ ᱢᱟᱹᱭ ᱫᱚᱭ ᱟᱸᱜᱮᱱ ᱟᱠᱟᱱ ᱜᱮᱭᱟ ᱵᱚᱸᱜᱟ ᱜᱮᱠᱳ ᱩᱢᱩᱞ ᱟᱠᱟᱫᱮᱭᱟ ᱾

ᱞᱚᱫᱚᱢ ᱺᱼ ᱚᱡᱷᱟ ᱵᱟ ᱪᱮᱫ ᱪᱮᱠᱟᱭ ᱦᱚᱭᱚᱜ ᱟ? ᱪᱮᱠᱟᱛᱮ ᱵᱟᱹᱦᱩ ᱞᱮ ᱧᱟᱢ ᱨᱩᱣᱟᱹᱲ ᱮᱭᱟ?

ᱚᱡᱷᱟᱺᱼ ᱵᱟᱯ ᱫᱷᱚᱱ – ᱟᱸᱡᱚᱢ ᱯᱮ, ᱟᱯᱮᱫᱚ ᱟᱞᱚᱯᱮ ᱵᱷᱟᱵᱽᱱᱟᱜᱼᱟ ᱟᱞᱚ ᱯᱮ ᱨᱟᱜᱟ ᱾ ᱨᱟᱜ ᱞᱮᱠᱷᱟᱱ ᱩᱢᱩᱞ ᱟᱠᱟᱫᱮ ᱵᱚᱸᱜᱟ ᱵᱩᱨᱩ ᱠᱚ ᱢᱮᱱᱟ ᱟᱯᱮ ᱚᱲᱟ ᱦᱚᱲ ᱟᱢ ᱵᱟᱱᱩᱜ ᱢᱮᱛᱮ ᱛᱤᱱᱟᱜ ᱠᱚ ᱨᱟᱹᱥᱠᱟᱹᱜ ᱠᱟᱱᱟ ᱾ ᱟᱞᱚ ᱯᱮ ᱨᱟᱜᱟ ᱟᱞᱚ ᱯᱮ ᱨᱚᱲ ᱜᱟᱞᱢᱟᱨᱟᱣ ᱵᱟᱲᱟᱭᱟ ᱟᱛᱳ ᱴᱚᱞᱟ ᱨᱮᱱ ᱦᱚᱲ ᱴᱷᱮᱱ ᱾ ᱵᱟᱝ ᱠᱷᱟᱱ ᱨᱩᱣᱟᱲ ᱞᱟᱜᱤᱫ ᱛᱮ ᱮᱴᱠᱮᱴᱚᱲᱮ ᱨᱮᱭᱟᱜ ᱠᱚ ᱠᱟᱹᱢᱤ ᱫᱟᱲᱮᱭᱟᱜᱼᱟ ᱵᱟᱲᱤᱡ ᱢᱚᱱᱮ ᱨᱮᱱ ᱦᱚᱲ
ᱠᱚ ᱾

ᱯᱮ ᱢᱟᱦᱟ ᱯᱟᱨᱚᱢ ᱜᱚᱫ ᱮᱱᱟ, ᱯᱮ ᱢᱟᱦᱟ ᱯᱟᱨᱚᱢ ᱦᱤᱞᱚᱜ ᱛᱮᱫᱚ ᱟᱹᱭᱩᱵ ᱧᱩᱦᱩᱢ ᱧᱩᱛ ᱟᱠᱟᱱᱟ ᱢᱟᱪᱷᱤ ᱟᱫᱷᱟᱨ ᱟᱠᱟᱱᱟ ᱾ ᱚᱲᱟᱜ ᱦᱚᱲ ᱠᱚ ᱟᱹᱰᱤ ᱜᱩᱱᱤ ᱵᱷᱟᱹᱵᱤᱛ ᱟᱛᱮ ᱨᱟᱪᱟ ᱠᱚᱨᱮ ᱟᱯᱟᱱ ᱟᱯᱤᱱ ᱫᱩᱲᱩᱵ ᱠᱟᱛᱮ ᱱᱟᱱᱟ ᱦᱩᱱᱟᱹᱨ ᱠᱚ ᱫᱤᱥᱟᱹ ᱨᱟᱠᱟᱵ ᱫᱤᱥᱟᱹ ᱟᱲᱜᱳᱭᱮᱫᱟ ᱢᱚᱱᱮᱨᱮ ᱪᱷᱤᱛᱟᱹ ᱢᱟᱹᱭᱟᱜ ᱠᱟᱛᱷᱟ ᱾ ᱩᱱ ᱚᱠᱛᱚ ᱨᱟᱪᱟ ᱨᱮ ᱰᱤᱵᱟ ᱵᱟᱛᱤ ᱡᱩᱞᱩ ᱡᱩᱞᱩ ᱡᱩᱞᱩᱜ ᱠᱟᱱ ᱛᱟᱸᱦᱮ ᱠᱟᱱᱟ ᱾ ᱢᱤᱫᱴᱟᱝ ᱱᱟᱱᱦᱟ ᱥᱟᱦᱤᱡ ᱦᱚᱭ ᱦᱮᱡ ᱮᱱᱟ ᱰᱤᱵᱟ ᱵᱟᱹᱛᱤ ᱦᱚᱸ ᱦᱚᱭ ᱵᱷᱟᱨᱰᱚ ᱛᱮ ᱤᱬᱤᱡ ᱜᱚᱫ ᱮᱱᱟ ᱡᱳᱞᱳᱜ ᱰᱤᱵᱟᱹ ᱥᱮᱸᱜᱮᱞ ᱾ ᱚᱱᱟ ᱥᱟᱶᱛᱮ ᱟᱨᱦᱚᱸ ᱟᱰᱤ ᱡᱩᱨ ᱵᱷᱟᱨᱰᱚ ᱜᱩᱨᱞᱟᱼᱜᱩᱨᱞᱤ ᱵᱚᱞᱚᱭᱮᱱᱟ ᱾ ᱚᱱᱟ ᱥᱟᱶᱛᱮ ᱪᱷᱤᱛᱟᱹ ᱢᱟᱹᱭ ᱦᱚᱸᱭ ᱜᱩᱨᱞᱟᱣ ᱵᱚᱞᱚᱭᱮᱱᱟ ᱾ ᱟᱨ ᱦᱚᱭ ᱦᱚᱸ ᱢᱤᱫ ᱜᱷᱟᱲᱤ ᱛᱟᱭᱚᱢ ᱛᱷᱤᱨ ᱠᱮᱫᱟᱭ ᱾ ᱨᱟᱪᱟᱨᱮ ᱛᱤᱸᱜᱩ ᱛᱷᱤᱨ ᱟᱠᱟᱱ ᱪᱷᱤᱛᱟᱹ ᱧᱮᱞ ᱠᱟᱛᱮ ᱡᱚᱛᱚ ᱦᱚᱲ ᱠᱚ ᱦᱟᱦᱟᱲᱟᱜ ᱟᱠᱟᱱᱟ ᱾ ᱪᱷᱤᱛᱟᱹ ᱼ ᱪᱷᱤᱛᱟᱹ ᱢᱮᱱ ᱠᱟᱛᱮ ᱞᱚᱫᱚᱢ ᱫᱚᱭ ᱫᱟᱹᱲ ᱥᱮᱴᱮᱨ ᱮᱱᱟ ᱪᱷᱤᱛᱟᱹ ᱥᱟᱢᱟᱝ ᱨᱮ ᱾ ᱪᱷᱤᱛᱟᱣᱟᱜ ᱛᱤ ᱥᱟᱵ ᱠᱟᱛᱮ ᱞᱚᱫᱚᱢ ᱫᱚᱭ ᱨᱟᱜ ᱠᱮᱫᱟ ᱾ ᱟᱨ ᱞᱚᱫᱚᱢ ᱪᱷᱤᱛᱟᱹᱭ ᱠᱩᱞᱤ ᱠᱮᱫᱮᱭᱟ ᱼ ᱢᱟ ᱞᱟᱭ ᱢᱮ ᱜᱳ ᱚᱠᱟᱨᱮᱢ ᱛᱟᱸᱦᱮ ᱠᱟᱱᱟ ᱩᱢᱤᱱ ᱫᱤᱱ ᱫᱚ?

ᱪᱷᱤᱛᱟᱹ ᱢᱟᱹᱭ ᱫᱚ ᱥᱟᱱᱟᱢ ᱦᱚᱲ ᱮ ᱞᱟᱹᱭ ᱠᱮᱫᱟ ᱤᱧ ᱫᱚ ᱵᱚᱸᱜᱟ ᱫᱤᱥᱚᱢ ᱛᱮ ᱠᱚ ᱤᱫᱤ ᱞᱤᱫᱤᱧᱟ ᱾ ᱟᱸᱜᱮᱱ ᱟᱠᱟᱱ ᱫᱤᱥᱚᱢ ᱨᱮᱱ ᱵᱚᱸᱜᱟ ᱵᱳᱨᱳ ᱠᱚ ᱤᱧ ᱢᱟᱱᱚᱛ ᱞᱟᱜᱤᱫ ᱤᱧ ᱧᱩᱛᱩᱢ ᱡᱚᱢ ᱧᱩ ᱠᱚ ᱟᱜᱩ ᱥᱳᱨ ᱟᱧ ᱠᱟᱱᱟ ᱾ ᱛᱟᱵᱮᱱ ᱫᱚ ᱡᱚᱡᱚ ᱥᱟᱠᱟᱢ, ᱜᱩᱲ ᱫᱚ ᱥᱤᱢ ᱥᱤᱢᱤᱡ, ᱯᱤᱴᱷᱟ ᱫᱚ ᱜᱚᱭᱴᱷᱟᱹ ᱟᱨ ᱫᱩᱲᱩᱵ ᱞᱟᱹᱜᱤᱫ ᱫᱚ ᱵᱤᱧ ᱜᱟᱸᱰᱳ ᱪᱟᱠ ᱞᱮᱠᱟ ᱜᱩᱲᱭᱟᱹᱢ ᱠᱟᱛᱮ ᱚᱱᱟ ᱨᱮ ᱠᱚ ᱫᱩᱲᱩᱵᱤᱧ ᱠᱟᱱᱟ ᱾ ᱠᱩᱞᱤᱧ ᱠᱟᱱᱟ ᱠᱚ ᱵᱟᱹᱧ ᱨᱚᱲ ᱠᱟᱱᱟ ᱾ ᱡᱚᱢᱟᱜ ᱠᱚ ᱤᱢᱟᱹᱧ ᱠᱟᱱᱟ ᱵᱟᱧ ᱡᱚᱢᱮᱫᱟ ᱫᱟᱜ ᱦᱚᱸ ᱵᱟᱹᱧ ᱧᱩᱞᱮᱫᱟ ᱾ ᱢᱤᱫ ᱵᱟᱨᱥᱤᱧ ᱯᱟᱨᱚᱢ ᱮᱱᱟ ᱾ ᱤᱧ ᱫᱚ ᱵᱤᱱ ᱡᱚᱢᱛᱮ ᱫᱟᱜ ᱛᱮᱛᱟᱝ ᱛᱮ ᱨᱮᱸᱜᱮᱡ ᱛᱮ ᱤᱧ ᱫᱚᱧ ᱞᱚᱨᱟᱣ ᱮᱱᱟ ᱾ ᱨᱮᱸᱜᱮᱡ ᱛᱮᱛᱟᱝ ᱛᱤᱧ ᱡᱷᱤᱸᱱᱼᱡᱷᱤᱱᱟᱣ ᱪᱟᱵᱟ ᱟᱠᱟᱱᱟᱹᱧ ᱾ ᱢᱮᱱᱠᱷᱟᱱ ᱵᱚᱸᱜᱟ ᱵᱳᱨᱳ ᱦᱚᱸ ᱧᱮᱞ ᱠᱟᱛᱮ ᱟᱰᱤ ᱜᱩᱱᱤ ᱵᱷᱟᱵᱤᱛ ᱨᱮᱠᱚ ᱯᱟᱲᱟᱣ ᱟᱠᱟᱱᱟ, ᱧᱮᱞ ᱠᱟᱛᱮ ᱠᱚ ᱵᱚᱸᱜᱟ ᱵᱳᱨᱳ ᱠᱚ ᱢᱮᱱ ᱠᱮᱫᱟ ᱫᱮᱞᱟᱝ ᱱᱩᱭ ᱢᱟᱱᱣᱟ ᱫᱚᱵᱚᱱ ᱤᱫᱤ ᱠᱟᱭᱟ ᱡᱟᱦᱟ ᱴᱷᱮᱱ ᱵᱚᱱ ᱧᱟᱢ ᱟᱠᱟᱫᱮᱭᱟ ᱚᱰᱮ ᱜᱮ ᱵᱚᱱ ᱨᱩᱣᱟᱹᱲ ᱤᱫᱤᱠᱟᱭᱟ ᱾ ᱚᱱᱟᱛᱮ ᱥᱟᱱᱟᱢ ᱵᱚᱸᱜᱟ ᱠᱟᱛᱷᱟ ᱢᱤᱫ ᱮᱱ ᱠᱷᱟᱹᱛᱤᱨ ᱠᱚ ᱨᱩᱣᱟᱹᱲ ᱠᱤᱫᱤᱧᱟ ᱵᱚᱸᱜᱟ ᱫᱤᱥᱚᱢ ᱠᱷᱚᱱ ᱾ ᱟᱵᱚ ᱱᱚᱣᱟ ᱫᱷᱟᱹᱨᱛᱤ ᱫᱤᱥᱚᱢ ᱛᱤᱧ ᱨᱩᱣᱟᱹᱲ ᱦᱮᱡ ᱮᱱᱟ ᱾

ᱚᱡᱷᱟ ᱵᱟᱵᱟ ᱫᱚ ᱱᱚᱛᱮ ᱠᱩᱲᱯᱟᱲ ᱠᱟᱢᱤ ᱠᱷᱟᱛᱤᱨ ᱪᱷᱤᱛᱟᱹ ᱢᱟᱹᱭ ᱦᱚᱸ ᱨᱩᱣᱟᱹᱲ ᱦᱮᱡ ᱞᱟᱹᱜᱤᱫ ᱟᱰᱤ ᱟᱸᱴ ᱟᱹᱴᱩ ᱯᱟᱹᱴᱩ ᱞᱮᱱ ᱛᱟᱭᱟ ᱢᱚᱱᱮ ᱡᱤᱭᱤ ᱵᱤᱪᱷᱚᱠ ᱪᱟᱵᱟ ᱞᱮᱱ ᱛᱟᱭᱟ ᱾

***