ᱟᱞᱮ ᱢᱟᱹᱭ ᱟᱞᱮ ᱢᱟᱹᱭ ᱢᱮᱱᱟᱭ ᱛᱟᱞᱮ
ᱵᱟᱞᱮ ᱵᱮᱠᱮᱨ ᱠᱷᱚᱱ ᱦᱮᱢ ᱦᱟᱨᱟ ᱠᱮᱫᱮ ᱭᱟᱞᱮ ᱾
ᱯᱤᱸᱰᱟᱹᱨᱮ ᱫᱩᱲᱩᱵ ᱠᱟᱛᱮᱭ ᱠᱚᱭᱚᱜ ᱵᱟᱲᱟᱭ
ᱢᱚᱪᱟ ᱵᱮᱫ ᱠᱟᱛᱮ ᱠᱷᱮᱱᱮ ᱠᱷᱮᱡ ᱞᱟᱸᱫᱟ ᱜᱚᱫᱟᱭ ᱾
ᱜᱷᱟᱱᱮ ᱨᱟᱪᱟᱭ ᱡᱚᱜᱽ ᱜᱷᱟᱱᱮ ᱪᱷᱟᱴᱠᱟᱭ ᱡᱚᱜᱽ
ᱜᱷᱟᱱᱮ ᱰᱟᱸᱰᱟᱨᱮ ᱪᱟᱯᱚ ᱠᱟᱛᱮᱭ ᱠᱚᱭᱚᱜᱽ ᱾
ᱠᱮᱱᱮ ᱠᱚᱛᱮ ᱨᱚᱲᱛᱮ ᱪᱚᱦᱟᱱ ᱠᱟᱜ ᱟᱭ
ᱞᱩᱴᱤ ᱨᱮᱜᱮ ᱢᱮᱱᱟᱜ ᱥᱮᱨᱮᱧ ᱛᱟᱭ ᱾
ᱜᱷᱟᱱᱮ ᱨᱟᱜ ᱜᱚᱫᱟᱭ ᱢᱮᱫ ᱫᱟᱜ ᱡᱚᱨᱚᱜ
ᱜᱷᱟᱱᱮ ᱞᱟᱸᱫᱟᱭ ᱩᱞᱤᱫᱟᱜ ᱡᱚᱨᱚᱜ ᱾
ᱱᱤᱱ ᱩᱰᱤᱡ ᱠᱩᱲᱤ ᱜᱤᱫᱽᱨᱟᱹ ᱪᱮᱫ ᱛᱮᱦᱚᱸ ᱵᱟᱭ ᱠᱚᱢ
ᱜᱷᱟᱨᱚᱸᱡᱽ ᱨᱮᱱᱟᱜ ᱠᱟᱹᱢᱤ ᱪᱮᱫ ᱦᱚᱸ ᱵᱟᱭ ᱮᱛᱚᱢ ᱾
ᱥᱮᱛᱟᱜ ᱠᱷᱚᱱ ᱥᱤᱸᱜᱟᱹᱲ ᱪᱷᱩᱴᱟᱹᱣ ᱠᱚᱜ ᱟᱭ
ᱞᱩᱴᱩᱨ ᱯᱩᱴᱩᱨ ᱡᱤᱨᱟᱹᱣ ᱵᱟᱹᱱᱩᱜ ᱛᱟᱭ ᱾
ᱛᱩᱱᱠᱷᱤ ᱛᱚᱞᱟᱥ ᱫᱚᱦᱚᱭᱟᱭ ᱡᱷᱚᱛᱚ ᱦᱚᱲᱟᱜ
ᱟᱞᱮ ᱢᱟᱹᱭ ᱫᱚ ᱟᱹᱰᱤ ᱜᱮᱪᱚᱭ ᱪᱤᱠᱷᱚᱲᱟ ᱾
ᱜᱷᱟᱨᱚᱸᱡᱽ ᱨᱮᱱᱟᱜ ᱥᱟᱜᱟᱲ ᱜᱟᱹᱲᱤ
ᱞᱟᱜᱟ ᱦᱟᱠᱟᱭ ᱛᱟᱦᱮᱱ ᱥᱟᱨᱟ ᱜᱷᱟᱹᱲᱤ ᱾
ᱫᱟᱠᱟᱭᱟᱭ ᱩᱛᱩᱭᱟᱭ ᱡᱚᱢ ᱚᱪᱚ ᱠᱚᱣᱟᱭ
ᱥᱟᱱᱟᱢ ᱜᱮ ᱥᱚᱢᱟᱱ ᱛᱮ ᱦᱟᱹᱴᱤᱧ ᱟᱠᱚᱣᱟᱭ ᱾
ᱜᱟᱛᱮ ᱜᱟᱯᱟᱛᱮ ᱮᱱᱮᱡ ᱡᱚᱝ ᱠᱩᱞᱦᱤ ᱫᱷᱩᱲᱤ ᱨᱮ
ᱢᱤᱨᱩ ᱪᱮᱬᱮ ᱟᱲᱟᱝ ᱞᱮᱠᱟ ᱛᱟᱠᱮᱨᱚᱜ ᱞᱩᱛᱩᱨ ᱨᱮ ᱾
ᱪᱷᱟᱴᱠᱟ ᱫᱩᱣᱟᱹᱨ ᱚᱰᱚᱠ ᱠᱟᱛᱤᱧ ᱧᱮᱞ ᱠᱮᱫ ᱠᱚ
ᱟᱹᱰᱤ ᱪᱚᱨᱚᱠ ᱜᱟᱛᱮ ᱜᱟᱛᱮ ᱟᱞᱮ ᱢᱟᱹᱭ ᱛᱮᱠᱚ ᱾
***
