ᱡᱩᱫᱤᱧ ᱵᱟᱹᱜᱤ ᱟᱢᱟ ᱜᱟᱛᱮ
ᱟᱢ ᱫᱚ ᱵᱚᱸᱜᱟ ᱫᱤᱥᱚᱢ,
ᱪᱚᱰᱚᱨ ᱟᱹᱧ ᱢᱮ ᱡᱷᱟᱨ ᱦᱟᱺᱰᱤ
ᱵᱟᱝ ᱠᱷᱟᱱ ᱨᱟᱥᱟ ᱢᱟᱛᱠᱚᱢ ᱾
ᱛᱟᱸᱦᱮ ᱠᱚᱜ ᱢᱮ ᱱᱟᱯᱟᱭ ᱵᱩᱜᱤ
ᱜᱤᱫᱟᱹᱨ ᱯᱤᱫᱟᱹᱨ ᱟᱛᱮ,
ᱟᱫᱚ ᱟᱞᱚᱢ ᱡᱚᱴᱟᱣ ᱡᱚᱝᱼᱟ
ᱡᱤᱣᱤ ᱨᱟᱲᱮᱡ ᱜᱟᱛᱮ ᱾
ᱡᱚᱱᱚᱢ ᱡᱮᱠᱷᱚᱱ ᱢᱮᱱᱟᱜ ᱜᱮᱭᱟ
ᱦᱩᱭᱩᱜ ᱜᱮᱭᱟ ᱜᱩᱡᱩᱜ,
ᱵᱟᱹᱨᱥᱤᱧ ᱜᱟᱱ ᱠᱷᱮᱞᱳᱸᱰ ᱞᱟᱹᱜᱤᱫ
ᱟᱵᱚ ᱫᱚᱵᱚ ᱦᱤᱡᱩᱜ ᱾
ᱟᱸᱥ ᱫᱚ ᱛᱟᱦᱮᱱ ᱜᱮᱭᱟ ᱯᱟᱞᱮ
ᱡᱤᱣᱤᱨᱮ ᱛᱟᱦᱮᱱ ᱛᱮᱛᱟᱝ,
ᱵᱟᱧᱪᱟᱣ ᱛᱟᱦᱮᱱ ᱨᱮᱫᱚ ᱢᱚᱱᱮ
ᱠᱷᱚᱡᱟᱭ ᱥᱩᱞᱩᱠ ᱮᱞᱟᱝ ᱾
ᱵᱟᱝ ᱡᱩᱴᱟᱹᱣᱜᱼᱟ ᱡᱷᱚᱛᱚ ᱦᱚᱲᱟᱜ
ᱥᱩᱞᱩᱠ ᱨᱮᱱᱟᱜ ᱪᱟᱹᱵᱤ,
ᱵᱟᱝ ᱥᱟᱹᱨᱤᱜᱼᱟ ᱚᱠᱟ ᱡᱚᱦᱚᱜ
ᱠᱩᱠᱢᱩ ᱨᱮᱱᱟᱜ ᱪᱷᱩᱵᱤ ᱾
ᱯᱳᱞᱳᱫ ᱯᱳᱞᱳᱫ ᱧᱩᱬᱩ ᱧᱩᱬᱩ
ᱱᱟᱥᱮ ᱢᱟᱨᱥᱟᱞ ᱛᱟᱨᱟᱥ,
ᱛᱟᱦᱮ ᱠᱚᱜᱼᱟ ᱩᱠᱩ ᱵᱟᱥᱟ
ᱥᱟᱱᱟᱢ ᱞᱮᱠᱟᱱ ᱟᱸᱥ ᱾
ᱵᱟᱝ ᱯᱩᱨᱟᱹᱣᱜ ᱨᱮᱫᱚ ᱟᱥᱟ
ᱪᱮᱫ ᱟᱫᱚᱢ ᱪᱤᱠᱟᱹᱭ,
ᱮᱱᱛᱮ ᱨᱮᱸᱦᱚ ᱫᱷᱟᱹᱨᱛᱤ ᱠᱷᱚᱱᱟᱜ
ᱦᱟᱛᱟᱣ ᱦᱩᱭᱩᱜ ᱵᱤᱫᱟᱹᱭ ᱾
ᱥᱩᱛᱟᱹᱢ ᱯᱟᱨᱠᱚᱢ ᱪᱮᱛᱟᱱ ᱛᱮᱜᱮ
ᱦᱩᱭᱩᱜ ᱯᱟᱨᱚᱢ ᱪᱟᱞᱟᱣ,
ᱦᱚᱭ ᱡᱤᱣᱤ ᱦᱚᱭᱨᱮ ᱩᱰᱟᱹᱣᱜ
ᱦᱟᱥᱟ ᱨᱮ ᱢᱚᱦᱚᱨ ᱢᱮᱴᱟᱣᱜ ᱾
ᱤᱧᱟᱜ ᱦᱚᱸᱛᱚ ᱟᱸᱥ ᱫᱚ ᱢᱮᱱᱟᱜ
ᱛᱤ ᱯᱮᱨᱮᱡ ᱥᱟᱠᱚᱢ ᱪᱩᱲᱤ,
ᱵᱚᱦᱚᱜ ᱯᱮᱨᱮᱡ ᱥᱤᱸᱫᱩᱨ ᱦᱚᱨᱚᱜ
ᱵᱟᱸᱫᱮ ᱨᱚᱝᱜᱤᱱ ᱥᱟᱹᱲᱤ ᱾
ᱥᱟᱡᱚᱱ ᱵᱟᱡᱚᱱ ᱪᱟᱞᱟᱜ ᱥᱟᱱᱟᱹᱧ
ᱤᱧ ᱫᱚ ᱦᱟᱱᱟ ᱯᱩᱨᱤ,
ᱢᱚᱱᱮ ᱟᱞᱚᱢ ᱠᱟᱹᱦᱤᱸᱥ ᱵᱤᱪᱷᱚᱠ
ᱮᱜᱳ ᱤᱧ ᱨᱮᱱ ᱡᱩᱨᱤ ᱾
ᱵᱟᱞᱟᱝ ᱵᱷᱩᱸᱡᱟᱹᱣ ᱯᱩᱨᱟᱹᱣ ᱞᱮᱫᱼᱟ
ᱡᱩᱨᱤ ᱯᱟᱹᱨᱤ ᱟᱞᱟᱝ,
ᱢᱚᱱᱮ ᱵᱟᱹᱲᱤᱡ ᱡᱤᱣᱤ ᱨᱚᱫᱷᱚᱱ
ᱟᱞᱚᱢ ᱦᱚᱢᱚᱨ ᱦᱟᱞᱟᱝ ᱾
ᱚᱠᱛᱚ ᱛᱤᱧᱼᱢᱟ ᱥᱮᱴᱮᱨ ᱟᱠᱟᱱ
ᱦᱟᱛᱟᱣ ᱦᱩᱭᱩᱜ ᱵᱤᱫᱟᱹᱭ,
ᱛᱟᱸᱦᱮ ᱠᱚᱜ ᱢᱮ ᱱᱟᱯᱟᱭ ᱵᱩᱜᱤ
ᱵᱤᱫᱟᱹᱭ ᱵᱮᱲᱟᱹᱧ ᱞᱟᱹᱞᱟᱹᱭ ᱾
***
