ᱫᱟᱥᱟᱸᱭ ᱵᱚᱸᱜᱟ ᱥᱮᱴᱮᱨᱮᱱᱟ ᱼ
ᱫᱷᱟᱹᱨᱛᱤ ᱜᱚᱴᱟ ᱦᱟᱹᱨᱭᱟᱹᱲ ᱟᱠᱟᱱᱟ,
ᱥᱮᱨᱢᱟ ᱨᱤᱢᱤᱞ ᱯᱳᱹᱰ ᱟᱠᱟᱱᱟ
ᱥᱤᱥᱤᱨ ᱡᱟᱹᱲᱤᱜ ᱠᱟᱱᱟ ᱾
ᱥᱤᱨᱚᱢ ᱼ ᱠᱟᱹᱥᱤ ᱜᱮᱞᱮ ᱟᱠᱟᱱᱟ ᱼ
ᱟᱹᱰᱤ ᱢᱚᱡᱽ ᱜᱮ ᱧᱮᱞᱚᱜ ᱠᱟᱱᱟ,
ᱦᱳᱲᱳ ᱜᱟᱹᱪᱷᱤ ᱫᱚᱞᱚᱵ ᱫᱚᱞᱚᱵ ᱼ
ᱦᱚᱭᱛᱮ ᱮᱱᱮᱡ ᱠᱟᱱᱟ ᱿
ᱦᱤᱥᱤᱫ ᱦᱤᱥᱤᱫ ᱨᱮᱭᱟᱲ ᱦᱚᱭ ᱼ
ᱚᱴᱟᱝ ᱵᱟᱲᱟᱭ ᱠᱟᱱᱟ,
ᱫᱟᱥᱟᱸᱭ ᱨᱮᱱᱟᱜ ᱥᱟᱜᱟᱭ ᱠᱟᱛᱟᱭ,
ᱠᱷᱟᱯᱟᱭ ᱠᱷᱚᱯᱚᱭ ᱠᱟᱱᱟ ᱾
ᱵᱟᱹᱫᱽᱼᱵᱟᱹᱭᱦᱟᱹᱲᱮᱢ ᱠᱚᱭᱚᱜ ᱞᱮᱨᱮ ᱼ
ᱵᱩᱡᱷᱟᱹᱣᱟᱢ ᱵᱷᱚᱨᱚᱢ ᱜᱮ,
ᱢᱚᱱᱮ ᱡᱤᱭᱤ ᱯᱮᱨᱮᱡ ᱜᱚᱫᱟᱭ ᱼ
ᱨᱟᱹᱥᱠᱟᱹ ᱨᱟᱥᱟ ᱛᱮ ᱿
ᱩᱯᱟᱹᱞ ᱯᱚᱨᱟᱭᱱᱤ ᱵᱟᱦᱟ ᱠᱚᱜᱼᱟ ᱼ
ᱩᱰᱩᱞ ᱰᱩᱵᱩᱞ ᱯᱩᱠᱷᱨᱤ ᱨᱮ,
ᱵᱩᱨᱩ ᱡᱟᱨᱱᱟᱭ ᱢᱟᱛᱟᱣ ᱠᱚᱜᱼᱟ ᱼ
ᱥᱟᱜᱟᱭ ᱥᱮᱨᱮᱧ ᱨᱮ ᱾
ᱟᱭᱳ ᱦᱚᱲ ᱠᱚ ᱯᱳᱹᱰ ᱡᱮᱲᱮᱨᱟ ᱼ
ᱚᱲᱟᱜ ᱠᱚᱠᱚ ᱥᱟᱯᱷᱟᱭᱟ,
ᱨᱟᱪᱟ ᱠᱷᱟᱹᱨᱟᱹᱭ ᱠᱚ ᱡᱮᱨᱮᱲ ᱠᱟᱜᱼᱟ
ᱟᱛᱳ ᱚᱲᱟᱜ ᱧᱮᱞᱚᱜ ᱨᱤᱞᱟᱹᱢᱟᱞᱟ ᱿
ᱠᱩᱰᱟ>ᱢ ᱠᱚᱨᱮ ᱦᱚᱛᱚᱫ ᱛᱩᱸᱵᱟᱹ ᱼ
ᱥᱤᱠᱣᱟᱹᱨ ᱨᱮᱠᱚ ᱟᱠᱟ ᱠᱟᱜᱼᱟ,
ᱥᱟᱥᱟᱭ ᱮᱱᱮᱡ ᱫᱤᱥᱚᱢ ᱫᱟᱲᱟᱱ ᱼ
ᱵᱷᱩᱣᱟᱹᱝ ᱠᱚᱠᱚ ᱵᱮᱱᱟᱣ ᱾
ᱟᱹᱭᱩᱵ ᱠᱷᱟᱱ ᱜᱮ ᱛᱤᱨᱭᱟᱹᱣᱼ ᱵᱟᱱᱟᱢ ᱼ
ᱧᱚᱦᱚᱲ ᱧᱚᱦᱚᱲ ᱟᱸᱡᱚᱢᱜᱼᱟ ᱼ
ᱵᱷᱩᱣᱟᱹᱝ ᱥᱟᱰᱮ ᱟᱸᱡᱚᱢᱚᱜᱼᱟ ᱼ
ᱜᱳᱴᱟ ᱟᱛᱳ ᱰᱤᱭᱟᱱᱟ ᱿
ᱫᱟᱥᱟᱸᱭ ᱜᱩᱨᱩ ᱟᱹᱭᱩᱨ ᱛᱮ ᱼ
ᱫᱟᱥᱟᱸᱭ ᱠᱚ ᱮᱱᱮᱡᱼᱟ,
ᱫᱤᱥᱚᱢ ᱫᱤᱥᱚᱢ ᱠᱚ ᱫᱟᱲᱟᱱᱟ ᱼ
ᱟᱭᱱᱚᱢ ᱠᱟᱡᱚᱞ ᱯᱟᱸᱡᱟ ᱾
ᱚᱲᱟᱜ ᱚᱲᱟᱜ ᱛᱩᱞᱥᱤ ᱵᱩᱴᱟᱹ ᱼ
ᱥᱩᱱᱩᱢ ᱥᱤᱸᱫᱩᱨ ᱠᱚ ᱵᱚᱸᱜᱟᱭᱟ,
ᱥᱩᱠᱷ ᱥᱟᱶᱟᱭ ᱟᱹᱥᱤᱥ ᱠᱚ ᱼ
ᱟᱛᱟᱝ ᱫᱟᱨᱟᱢᱟ ᱿
ᱫᱟᱥᱟᱸᱭ ᱠᱚ ᱮᱱᱮᱡᱼᱟ ᱼ
ᱮᱱᱮᱡ ᱟᱛᱮ ᱠᱚ ᱦᱩᱞᱥᱟᱹᱭᱟ,
ᱡᱤᱭᱚᱱ ᱨᱮᱱᱟᱜ ᱧᱩᱱᱩ ᱵᱟᱹᱛᱤ ᱠᱚ ᱼ
ᱡᱳᱞ ᱢᱟᱨᱥᱟᱞᱟ
ᱵᱤᱨ ᱛᱮᱱᱟ ᱪᱟᱞᱟᱜ ᱯᱮ ᱼ
ᱩᱫ ᱚᱠᱱᱟ ᱦᱟᱞᱟᱝ ᱯᱮ
ᱥᱳᱲᱮ ᱯᱮ ᱱᱟ ᱥᱳᱲᱮ ᱯᱮ ᱼ
ᱰᱷᱮᱨ ᱠᱟᱹᱧ ᱯᱮ ᱾
ᱫᱟᱥᱟᱸᱭ ᱨᱮᱱᱟᱝ ᱦᱩᱞᱥᱟᱹᱭ ᱮᱱᱮᱡ ᱼ
ᱨᱮᱸᱜᱮᱡ ᱱᱟᱪᱟᱨ ᱢᱟᱹᱱᱢᱤ ᱢᱚᱱᱮ ᱨᱟᱹᱥᱠᱟᱹ ᱜᱚᱫᱟ ᱼ
ᱟᱫ ᱟᱠᱟᱱ ᱥᱩᱠᱷ ᱫᱷᱚᱱᱮ ᱼ
ᱯᱟᱸᱡᱟ ᱜᱳᱴᱟᱭᱟ ᱿
ᱫᱟᱥᱟᱸᱭ ᱜᱮᱛᱚᱭ ᱫᱟᱨᱟᱢᱟ ᱼ
ᱥᱚᱦᱨᱟᱭ ᱨᱟᱹᱱᱤ ᱫᱟᱨᱟᱢᱮᱭᱟ,
ᱵᱚᱭᱦᱟ ᱼᱵᱩᱦᱤᱱ ᱥᱟᱹᱜᱟᱹᱭ ᱢᱟᱞᱟᱭ ᱼ
ᱜᱟᱞᱟᱝ ᱡᱚᱲᱟᱣᱟ ᱾
ᱟᱭᱳ ᱞᱮᱠᱟ ᱥᱟᱡᱽ ᱠᱟᱛᱮ ᱼ
ᱵᱟᱴᱟ ᱞᱮᱠᱟ ᱥᱟᱡᱽ ᱠᱟᱛᱮ,
ᱦᱤᱡᱩᱜ ᱟᱭ ᱫᱟᱥᱟᱸᱭ ᱼ
ᱡᱚᱲᱟᱣ ᱟᱭ ᱥᱩᱞᱩᱠ ᱥᱟᱹᱜᱟᱹᱭ ᱿
