ᱱᱩᱱᱟᱹᱜ ᱞᱚᱜᱚᱱ ᱛᱩᱨᱤ ᱜᱷᱩᱨᱤ
ᱛᱚᱠᱟᱢ ᱪᱟᱞᱟᱜ ᱨᱟᱦᱞᱟ ᱡᱩᱨᱤ?
ᱦᱟᱯᱮ ᱥᱮ ᱰᱚᱸᱰᱮᱠ ᱛᱤᱸᱜᱩ ᱞᱮᱱ ᱢᱮ
ᱠᱟᱛᱷᱟ ᱛᱤᱧ ᱫᱚ ᱟᱸᱡᱚᱢ ᱛᱚᱨᱟᱭ ᱢᱮ ᱾
ᱨᱟᱦᱞᱟ ᱡᱩᱨᱤᱭ ᱢᱮᱱ
ᱚᱠᱛᱚ ᱵᱟᱹᱱᱩᱜ ᱞᱟᱹᱭ ᱢᱮ ᱜᱟᱛᱮᱧ
ᱪᱟᱞᱟᱣ ᱦᱩᱭᱩᱜ ᱟᱹᱰᱤ ᱥᱟᱺᱜᱤᱧ,
ᱦᱟᱱᱮ ᱥᱟᱺᱜᱤᱧ ᱥᱩᱥᱱᱤ ᱵᱩᱨᱩ
ᱪᱟᱞᱟᱣ ᱛᱮᱢᱟᱹᱧ ᱜᱩᱨᱩ ᱥᱩᱨᱩ ᱾
ᱦᱟᱯᱮ ᱥᱮ ᱰᱚᱸᱰᱮᱠ ᱛᱤᱸᱜᱩ ᱞᱮᱱ ᱢᱮ
ᱥᱩᱥᱱᱤ ᱵᱩᱨᱩ ᱫᱷᱟᱥᱱᱟ ᱨᱮ
ᱜᱤᱫᱷᱳᱲ ᱟᱹᱛᱩ ᱢᱩᱪᱟᱹᱫ ᱨᱮ,
ᱢᱮᱱᱟᱭ ᱛᱤᱧᱟ ᱮᱵᱷᱮᱱ ᱵᱮᱴᱟ
ᱞᱟᱹᱭ ᱟᱭ ᱢᱮ ᱤᱧᱟᱜ ᱠᱟᱛᱷᱟ ᱾
ᱨᱟᱦᱞᱟ ᱡᱩᱨᱤᱭ ᱢᱮᱱ
ᱞᱟᱹᱭ ᱢᱮ ᱜᱟᱛᱮᱧ ᱪᱮᱫ ᱠᱟᱛᱷᱟ?
ᱵᱮᱴᱟ ᱛᱟᱢᱮ ᱢᱮᱱᱟᱭ ᱟᱥᱟ,
ᱮᱸᱜᱟ ᱦᱚᱯᱚᱱ ᱡᱤᱣᱤ ᱛᱟᱵᱤᱧ
ᱪᱮᱫᱟᱜ ᱦᱟᱭᱨᱮ ᱥᱟᱺᱜᱤᱧ ᱥᱟᱺᱜᱤᱧ!
ᱮ ᱜᱳ ᱡᱩᱨᱤ,
ᱠᱩᱞᱤ ᱮᱢ ᱥᱮ ᱦᱚᱯᱚᱱ ᱛᱤᱧ
ᱪᱮᱫᱟᱜ ᱦᱟᱞᱮᱭ ᱵᱟᱹᱜᱤ ᱟᱹᱫᱤᱧ,
ᱢᱤᱨᱩ ᱛᱤᱧ ᱩᱭᱦᱟᱹᱨ ᱛᱮᱢᱟ
ᱮᱸᱜᱟᱛ ᱡᱤᱣᱤ ᱞᱚᱜ ᱠᱟᱱᱟ!
ᱨᱟᱦᱞᱟ ᱡᱩᱨᱤᱭ ᱢᱮᱱ
ᱪᱮᱫᱟᱜ ᱵᱷᱟᱹᱵᱤ ᱮᱜᱳ ᱜᱟᱛᱮᱧ
ᱢᱮᱫ ᱫᱟᱜ ᱮᱢ ᱡᱚᱨᱚᱭ ᱥᱟᱨᱟ ᱥᱟᱹᱛᱤᱧ,
ᱨᱩᱣᱟᱹᱲᱚᱜ ᱟᱭ ᱥᱳᱱᱟ ᱛᱟᱢᱮ
ᱥᱮᱫᱟᱭ ᱞᱮᱠᱟ ᱟᱢᱟᱜ ᱠᱳᱞᱮ ᱾
ᱫᱳᱥᱮ ᱡᱩᱨᱤ ᱞᱚᱜᱚᱱᱚᱜ ᱢᱮ
ᱯᱟᱞᱮᱱ ᱠᱷᱤᱞᱳᱸᱰ ᱠᱟᱱᱟᱭ ᱵᱩᱨᱩ ᱫᱷᱟᱨᱮ,
ᱡᱤᱣᱤ ᱯᱮᱨᱮᱡ ᱛᱷᱩᱢ ᱟᱹᱥᱤᱥ
ᱪᱟᱞ ᱟᱭ ᱢᱮ ᱫᱤᱥ ᱦᱩᱫᱤᱥ ᱾
ᱨᱟᱦᱞᱟ ᱡᱩᱨᱤᱭ ᱢᱮᱱ
ᱠᱟᱺᱦᱤᱥ ᱢᱚᱱᱮ ᱵᱤᱪᱷᱚᱠ ᱡᱤᱣᱤ
ᱥᱟᱢᱴᱟᱣ ᱠᱟᱛᱟᱢ ᱥᱟᱨᱟ ᱜᱷᱟᱲᱤ,
ᱦᱚᱯᱚᱱ ᱠᱟᱛᱷᱟ ᱫᱤᱥᱟᱹ ᱠᱟᱛᱮ
ᱟᱞᱚᱢ ᱨᱟᱹᱯᱩᱫᱽ ᱡᱤᱣᱤ ᱢᱚᱱᱮ ᱾
ᱟᱨ ᱦᱚᱸᱢ ᱢᱮᱛᱟᱭ,
ᱚᱞᱚᱜ ᱢᱟᱥᱮ ᱥᱮᱸᱲᱟᱭ ᱢᱟᱭ
ᱢᱟᱨᱟᱝ ᱦᱚᱲ ᱮ ᱵᱮᱱᱟᱣᱜ ᱟᱭ,
ᱤᱧ ᱜᱩᱡᱩᱜ ᱢᱟᱲᱟᱝ ᱨᱮᱦᱚᱸ
ᱧᱟᱯᱟᱢ ᱛᱚᱨᱟᱜ ᱢᱟᱭ ᱾
ᱨᱟᱦᱞᱟ ᱡᱩᱨᱤᱭ ᱢᱮᱱ,
ᱪᱮᱫᱟᱢ ᱡᱚᱨᱚᱭ ᱢᱮᱫᱼᱫᱟᱜ ᱜᱟᱛᱮᱧ
ᱟᱹᱰᱤ ᱪᱟᱲᱛᱮᱧ ᱥᱮᱴᱮᱨ ᱜᱚᱫᱟᱹᱧ,
ᱞᱟᱹᱭ ᱟᱭ ᱛᱟᱢᱮᱧ ᱮᱵᱷᱮᱱ ᱵᱮᱴᱟ
ᱟᱢ ᱨᱮᱱᱟᱜ ᱥᱟᱱᱟᱢ ᱠᱟᱛᱷᱟ !
***
