ᱠᱩᱲᱤ ᱦᱚᱯᱚᱱ ᱡᱟᱱᱟᱢ ᱫᱟᱹᱭᱱᱟ
ᱚᱲᱟᱜ ᱫᱩᱣᱟᱹᱨ ᱠᱚ ᱥᱚᱵᱷᱟᱭ,
ᱡᱟᱹᱛᱤ ᱫᱷᱚᱨᱚᱢ ᱠᱚ ᱢᱟᱨᱥᱟᱞ,
ᱵᱚᱸᱜᱟ ᱵᱩᱨᱩ ᱠᱚ ᱠᱩᱥᱤᱜ ᱾
ᱠᱩᱲᱤ ᱦᱚᱯᱚᱱ ᱡᱟᱱᱟᱢ ᱫᱟᱹᱭᱱᱟ
ᱚᱲᱟᱜ ᱫᱩᱣᱟᱹᱨ ᱠᱚ ᱥᱟᱨᱪᱟᱭ,
ᱵᱩᱫᱷᱤ ᱜᱮᱭᱟᱱ ᱠᱚ ᱟᱨᱡᱟᱣ ᱥᱟᱶᱛᱮ
ᱞᱟᱹᱭ ᱞᱟᱠᱪᱟᱨ ᱠᱚ ᱩᱛᱷᱱᱟᱹᱣ ᱾
ᱠᱩᱲᱤ ᱜᱮᱛᱚ ᱥᱤᱨᱡᱚᱱᱤᱭᱟᱹ, ᱵᱤᱨᱡᱚᱱᱤᱭᱟᱹ,
ᱫᱟᱲᱮ ᱪᱟᱪᱟᱞᱤᱭᱟᱹ
ᱪᱟᱜ ᱵᱟᱝ ᱠᱚ ᱵᱩᱡᱷᱟᱹᱣᱜ ᱫᱟᱹᱭᱱᱟ
ᱫᱤᱥᱚᱢ ᱦᱚᱲ ᱫᱚ ᱫᱤᱱ ᱦᱚᱸ,
ᱵᱮᱵᱟᱹᱲᱤᱡ ᱩᱱᱟᱹᱝ ᱱᱟᱦᱟᱪᱟᱨ
ᱠᱟᱹᱢᱤ ᱭᱟᱠᱚ ᱠᱩᱲᱤ ᱦᱚᱯᱚᱱ ᱪᱮᱛᱟᱱ ᱾
ᱟᱯᱚᱱ ᱚᱲᱟᱜ ᱜᱮᱛᱚ ᱡᱟᱦᱮᱨ ᱛᱷᱟᱱ,
ᱥᱟᱶᱛᱟ ᱫᱷᱚᱨᱚᱢ ᱛᱷᱟᱱ,
ᱛᱷᱟᱯᱚᱱ ᱢᱮᱱᱟᱜ ᱠᱚ ᱡᱚᱛᱚ ᱵᱚᱸᱜᱟᱵᱩᱨᱩ ᱾
ᱦᱟᱯᱲᱟᱢ ᱠᱚᱜᱮ ᱥᱟᱶᱛᱟ ᱫᱷᱚᱨᱚᱢ ᱜᱩᱨᱩ,
ᱫᱤᱥ ᱦᱩᱫᱤᱥ ᱥᱟᱱᱟᱢ ᱪᱟᱪᱟᱞ ᱠᱚ
ᱟᱹᱠᱩᱛ ᱵᱮᱲᱟ ᱦᱚᱨᱰᱟᱦᱟᱨ ᱩᱜᱫᱩᱜ ᱠᱚ ᱾
ᱡᱟᱹᱛᱤ ᱫᱷᱚᱨᱚᱢ ᱱᱤᱨᱟᱹᱭᱚᱜᱼᱟ,
ᱞᱟᱠᱪᱟᱨ ᱥᱚᱨᱮᱥᱚᱜᱼᱟ,
ᱟᱢ ᱦᱚᱸᱢ ᱥᱚᱦᱟᱬ ᱥᱟᱶᱟᱨᱚᱜᱼᱟ ᱾
ᱡᱟᱱᱟᱢ ᱱᱟᱭᱳ ᱜᱮᱛᱚ ᱡᱟᱦᱮᱨ ᱱᱟᱭᱳ
ᱥᱤᱱᱟᱹᱢ, ᱦᱚᱯᱚᱱᱮ ᱡᱚᱛᱚᱱ ᱦᱟᱨᱟᱭᱮᱠᱟᱱ ᱾
ᱨᱮᱸᱜᱮᱡ ᱛᱮᱛᱟᱝ, ᱡᱟᱨᱜᱮ ᱡᱟᱹᱯᱩᱫ,
ᱨᱩᱴᱷᱤ ᱥᱤᱛᱩᱝ ᱨᱟᱵᱟᱝ ᱨᱮᱦᱚᱸ,
ᱚᱲᱮᱡ ᱟᱧᱪᱟᱨ ᱛᱮ ᱫᱟᱯᱟᱞ ᱮᱥᱮᱫ ᱦᱟᱨᱟᱭᱮᱛᱮ,
ᱡᱤᱣᱤ ᱫᱚᱭ ᱨᱟᱲᱮᱡᱽ ᱛᱟᱭᱟ ᱾
ᱛᱤ ᱫᱚᱛᱟᱭ ᱞᱩᱠᱷᱤ ᱟᱭᱳ ᱞᱮᱠᱟ
ᱫᱷᱚᱱ ᱫᱩᱨᱤᱵᱽ ᱛᱮ ᱯᱮᱨᱮᱡ ᱥᱟᱨᱮᱲᱟ,
ᱨᱩᱣᱟᱹ ᱦᱟᱹᱥᱩ ᱨᱚᱜᱽ ᱵᱤᱜᱽᱱᱟᱹ ᱨᱮ
ᱦᱚᱯᱚᱱᱮ ᱜᱩᱝᱜᱩᱫ ᱠᱟᱭᱟ ᱪᱷᱟᱛᱟ ᱫᱟᱨᱮ ᱞᱮᱠᱟ ᱾
ᱦᱚᱯᱚᱱ ᱮᱨᱟ ᱜᱮ ᱪᱟᱱᱫᱟᱱ ᱵᱤᱴᱤ,
ᱵᱟᱹᱦᱩ ᱠᱩᱲᱤ ᱜᱮ ᱡᱟᱦᱮᱨ ᱮᱨᱟ,
ᱚᱢᱚᱝ ᱵᱚᱨᱠᱮᱛ ᱫᱷᱤ ᱫᱟᱲᱮ ᱠᱤᱱ ᱪᱟᱪᱟᱞ,
ᱫᱮᱵᱚᱱ ᱩᱢᱟᱹᱬ ᱯᱮᱨᱮᱡ ᱠᱤᱱ ᱾
ᱠᱚᱲᱟ ᱦᱚᱯᱚᱱ ᱠᱷᱚᱱ ᱦᱚᱸ
ᱦᱚᱯᱚᱱ ᱮᱨᱟ ᱢᱟᱹᱱ ᱫᱚ
ᱩᱥᱛᱟᱹᱭ ᱢᱮᱱᱟᱜ ᱜᱮᱭᱟ
ᱠᱩᱲᱤ ᱦᱚᱯᱚᱱ ᱧᱩᱛᱩᱢ ᱢᱤᱫ ᱫᱤᱱ
ᱫᱷᱟᱹᱨᱛᱤ ᱨᱮ ᱚᱢᱚᱱ ᱨᱟᱠᱟᱵ ᱨᱤᱦᱤᱴᱚᱜ ᱜᱮᱭᱟ ᱾
ᱠᱩᱲᱤ ᱦᱚᱯᱚᱱ ᱪᱮᱛᱟᱱ
ᱫᱟᱹᱱᱢᱤ ᱦᱚᱲᱟᱜ ᱢᱮᱫ ᱫᱚ
ᱢᱤᱫ ᱫᱤᱱ ᱵᱩᱥᱟᱹᱲᱚᱜ ᱜᱮᱭᱟ ᱾
ᱠᱩᱲᱤ ᱦᱚᱯᱚᱱ ᱪᱮᱛᱟᱱ
ᱠᱮᱲᱚᱝ ᱠᱟᱹᱢᱤ ᱢᱤᱫ ᱫᱤᱱ
ᱫᱷᱟᱹᱨᱛᱤ ᱠᱷᱚᱱ ᱢᱮᱴᱟᱣ ᱥᱟᱹᱨᱤᱜ ᱜᱮᱭᱟ ᱾
ᱟᱹᱠᱤᱞ ᱜᱮᱭᱟᱱ ᱥᱮᱬᱟ ᱨᱮᱦᱚᱸᱢ,
ᱠᱟᱬᱟ ᱢᱟᱹᱱᱢᱤ ᱥᱤᱱᱟᱹᱢ
ᱵᱟᱞᱮ ᱛᱤ ᱠᱟᱹᱴᱩᱵ ᱱᱟᱞᱚᱢ
ᱠᱚᱴᱮᱡ ᱯᱚᱥᱟᱜᱽ ᱛᱟᱭᱟ ᱾
ᱪᱟᱞ ᱟᱭᱢᱮ ᱱᱟᱱᱦᱟ ᱛᱤᱨᱮ
ᱥᱮᱪᱮᱫ ᱥᱤᱠᱷᱱᱟᱹᱛ ᱨᱮᱱᱟᱝ ᱠᱚᱞᱚᱢ ᱠᱟᱹᱴᱷᱤ
ᱪᱟᱞ ᱟᱭ ᱢᱮ ᱥᱟᱫᱟ ᱠᱟᱜᱚᱡᱽ
ᱡᱟᱹᱛᱤ ᱥᱟᱶᱛᱟ ᱚᱞᱛᱚᱞ ᱥᱩᱫᱟᱹᱭ ᱡᱤᱣᱤᱫ ᱞᱟᱹᱜᱤᱫ ᱾
ᱢᱚᱱᱮ ᱡᱤᱣᱤ ᱨᱟᱹᱥᱠᱟᱹ ᱩᱨᱩᱱᱯᱩᱨᱩᱱ
ᱦᱩᱱᱩᱨ ᱢᱤᱫ ᱫᱤᱱ ᱢᱮᱱᱟᱜ ᱜᱮᱭᱟ
ᱡᱟᱝᱜᱮ ᱫᱟᱨᱟᱢ ᱦᱩᱨᱩᱫ ᱰᱷᱩᱱᱴᱩᱫ ᱥᱟᱱᱟᱢ
ᱢᱤᱫ ᱫᱤᱱᱮ ᱫᱚᱱ ᱯᱟᱨᱚᱢ ᱜᱮᱭᱟ ᱾
ᱥᱚᱱᱚᱛ ᱢᱚᱱᱮ, ᱪᱚᱦᱚᱴ ᱠᱟᱹᱢᱤ ᱫᱷᱩᱨᱟᱹᱣ
ᱨᱤᱦᱤᱴ ᱠᱟᱛᱮ ᱪᱚᱴ ᱞᱟᱯᱷᱟᱝ
ᱢᱤᱫ ᱫᱤᱱᱮ ᱫᱮᱡᱚᱜ ᱜᱮᱭᱟ ᱟᱡᱟᱜ ᱚᱲᱟᱜ ᱫᱩᱣᱟᱹᱨ
ᱜᱷᱮᱸᱴ ᱢᱚᱴᱨᱟ ᱦᱮᱨᱢᱮᱫ ᱫᱤᱯᱤᱞ ᱥᱟᱶᱛᱮ,
ᱡᱟᱹᱛᱤ ᱥᱟᱶᱛᱟ ᱞᱟᱯᱷᱟᱝ ᱮ ᱜᱚᱦᱚᱲ ᱤᱫᱤ ᱜᱮᱭᱟ ᱹᱹᱹᱹᱹ᱾
***
ᱥᱟᱨᱦᱟᱣ ᱜᱮ ᱡᱩᱛᱤ(ᱥᱣᱟᱛᱤ)..
ᱯᱩᱭᱞᱩ ᱛᱮ ᱩᱱᱟ.ᱝ ᱱᱟᱯᱟᱭ ᱚᱱᱚᱬᱦᱮ ᱜᱟᱜ ᱜᱟᱵᱟᱱ ᱫᱟᱲᱮᱭᱟᱫ ᱟᱢ ᱾
ᱚᱱᱟᱛᱮ ᱟ.ᱰᱤ ᱨᱟ.ᱥᱠᱟ., ᱱᱚᱝᱠᱟ ᱜᱮ ᱟᱨᱦᱚᱸ ᱱᱟᱯᱟᱭ ᱠᱷᱚᱱ ᱱᱟᱯᱟᱭ ᱥᱮᱨᱮᱧ ᱟᱨ ᱚᱱᱚᱬᱦᱮ ᱠᱚ ᱜᱟᱵᱟᱱ ᱢᱮ ᱾
ᱜᱷᱟᱨᱚᱧ ᱨᱤᱱ ᱥᱟᱱᱟᱢ ᱠᱚ ᱟᱢᱟᱜ ᱠᱩᱠᱢᱩ ᱥᱟ.ᱨᱤᱜ ᱢᱟ ᱢᱮᱱᱛᱮ ᱚᱲᱟᱜ ᱵᱚᱸᱜᱟᱵᱩᱨᱩ ᱴᱷᱮᱱ ᱞᱮ ᱱᱮᱦᱚᱨ ᱮᱱᱟ ᱾
ᱡᱚᱦᱟᱨ