ᱵᱟᱝᱟᱼᱵᱟᱝᱟ
ᱵᱟᱦᱟ ᱫᱚ ᱱᱟᱞᱚ ᱨᱮᱢ ᱴᱮ’ᱜᱚᱡᱟ,
ᱵᱟᱦᱟ ᱢᱟ ᱯᱷᱩᱴᱟᱹᱣ ᱞᱟᱹᱜᱤᱫ ᱛᱮᱜᱮ ᱢᱚᱦᱮ ᱟᱠᱟᱱᱟ ᱾
ᱴᱮ’ᱜᱚᱡ ᱥᱟᱱᱟᱭᱮᱫ ᱢᱮᱠᱷᱟᱱ
ᱢᱚᱱᱮ ᱨᱮᱱᱟᱝ ᱜᱚᱨᱚᱵᱽ ᱴᱮ’ᱜᱚᱡ ᱢᱮ ᱾
ᱚᱱᱟᱢ ᱴᱮ’ᱜᱚᱡ ᱞᱮᱠᱷᱟᱱ ᱯᱟᱪᱷᱮ
ᱡᱮᱜᱮᱛ ᱨᱮ ᱧᱩᱛᱩᱢᱮᱢ ᱟᱢᱮᱴ ᱡᱚᱝᱟ ᱿
ᱵᱟᱝᱟ ᱵᱟᱝᱟ,
ᱥᱟᱠᱟᱢ ᱫᱚ ᱱᱟᱞᱚ ᱨᱮᱢ ᱛᱤᱨᱢᱤᱫᱟ,
ᱥᱟᱠᱟᱢ ᱢᱟ ᱥᱟᱜᱮᱱ ᱞᱟᱹᱜᱤᱫ ᱛᱮᱜᱮ ᱯᱚᱴᱠᱚᱡ ᱟᱠᱟᱱᱟ ᱾
ᱛᱤᱨᱢᱤᱫ ᱥᱟᱱᱟᱭᱮᱫ ᱢᱮᱠᱷᱟᱱ
ᱡᱟᱹᱱᱩᱢ ᱛᱤᱨᱢᱤᱫᱽ ᱢᱮ,
ᱚᱱᱟᱢ ᱛᱤᱨᱢᱤᱫ ᱞᱮᱠᱷᱟᱱ ᱯᱟᱪᱷᱮ
ᱟᱜᱟᱢ ᱰᱟᱦᱟᱨ ᱛᱟᱢ ᱥᱩᱥᱟᱹᱨᱚᱜᱼᱟ ᱿
ᱵᱟᱝᱟ ᱵᱟᱝᱟ,
ᱰᱟᱹᱨ ᱫᱚ ᱱᱟᱞᱚ ᱨᱮᱢ ᱪᱟᱜᱟᱫᱟ,
ᱰᱟᱹᱨ ᱢᱟ ᱞᱤᱰᱩᱨ ᱞᱟᱹᱜᱤᱫ ᱛᱮᱜᱮ ᱪᱟ’ᱫᱷᱮᱲ ᱟᱠᱟᱱᱟ,
ᱪᱟᱜᱟᱫ ᱥᱟᱱᱟᱭᱮᱫ ᱢᱮᱠᱷᱟᱱ
ᱟᱢᱟᱜ ᱚᱱᱛᱚᱨ ᱢᱚᱱᱮ ᱠᱷᱚᱱ ᱦᱤ’ᱥᱟᱹ ᱥᱩᱭᱟᱹ
ᱪᱟᱜᱟᱫ ᱠᱟᱜ ᱢᱮ,
ᱚᱱᱟᱢ ᱪᱟᱜᱟᱫ ᱞᱮᱠᱷᱟᱱ ᱯᱟᱪᱷᱮ,
ᱥᱟᱱᱟᱢ ᱠᱚ ᱥᱟᱶ ᱥᱩᱞᱩᱠ ᱥᱟᱹᱜᱟᱹᱭᱮᱢ
ᱢᱩᱲᱟᱹᱣ ᱫᱚᱦᱚ ᱠᱟᱜᱼᱟ ᱿
ᱵᱟᱝᱟ ᱵᱟᱝᱟ,
ᱡᱚ ᱫᱚ ᱱᱟᱞᱚ ᱨᱮᱢ ᱯᱚᱥᱟᱜᱟ,
ᱡᱚ ᱫᱚ ᱵᱤᱞᱤᱜ ᱞᱟᱹᱜᱤᱫ ᱛᱮᱜᱮ ᱚᱢᱚᱱ ᱟᱠᱟᱱᱟ ᱾
ᱯᱚᱥᱟᱜ ᱥᱟᱱᱟᱭᱮᱫ ᱢᱮᱠᱷᱟᱱ ᱜᱟᱫᱮᱞ ᱛᱟᱞᱟ ᱠᱷᱚᱱ
ᱨᱟᱹᱜᱤ ᱨᱟᱹᱯᱟᱹᱜᱤ ᱯᱚᱥᱟᱜᱽ ᱢᱮ
ᱚᱱᱟᱢ ᱯᱚᱥᱟᱜ ᱞᱮᱠᱷᱟᱱ ᱯᱟᱪᱷᱮ ᱥᱟᱶᱛᱟ ᱨᱮᱱᱟᱜ
ᱱᱮᱭᱟᱣ ᱠᱷᱟᱹᱯᱟᱹᱨᱤᱭᱟᱹᱣ ᱠᱚ ᱵᱮ’ᱰᱟᱣᱜᱼᱟ ᱿
ᱵᱟᱝᱟ ᱵᱟᱝᱟ,
ᱤᱛᱟᱹ ᱫᱚ ᱱᱟᱞᱚ ᱨᱮᱢ ᱜᱮᱢᱮᱨᱟ
ᱤᱛᱟᱹ ᱫᱚ ᱱᱟᱣᱟ ᱚᱢᱚᱱᱚᱜ ᱞᱟᱹᱜᱤᱫ ᱛᱮᱜᱮ ᱯᱟᱠᱚᱲ ᱟᱠᱟᱱᱟ ᱾
ᱜᱮᱡᱮᱨ ᱥᱟᱱᱟᱭᱮᱫ ᱢᱮᱠᱷᱟᱱ ᱟᱹᱫᱤᱢ ᱥᱟᱶᱛᱟ ᱠᱷᱚᱱ
ᱟ’ᱫᱷᱟ ᱯᱟᱹᱛᱭᱟᱣ ᱜᱮᱡᱮᱨ ᱥᱟᱦᱟᱭ ᱢᱮ,
ᱚᱱᱟᱢ ᱜᱮᱡᱮᱨ ᱞᱮᱠᱷᱟᱱ ᱯᱟᱪᱷᱮ ᱥᱟᱶᱛᱟ ᱨᱮ ᱱᱤᱨᱟᱹᱭ ᱫᱟᱨᱟᱭᱟ ᱿
***
