ᱥᱟᱸᱜᱮ ᱟᱹᱫᱤᱵᱟᱹᱥᱤ ᱢᱩᱞᱩᱠᱨᱮ ᱢᱮᱱᱟᱜ ᱢᱤᱫ ᱵᱟᱡᱟᱨ ᱛᱟᱞᱟᱢᱟᱞᱟ ᱨᱮᱱᱟᱜ ᱦᱩᱰᱤᱧ ᱦᱚᱸ ᱵᱟᱝ ᱪᱮ ᱢᱟᱨᱟᱝ ᱦᱚᱸ ᱵᱟᱝ ᱞᱩᱜᱽᱲᱤ ᱫᱚᱠᱟᱱ ᱨᱤᱱ ᱵᱟᱨᱮᱭᱟ ᱠᱟᱹᱢᱤᱭᱟᱹ ᱠᱚᱲᱟ ᱫᱚ ᱢᱩᱸᱰᱟᱹ ᱠᱟᱱᱟ ᱠᱤᱱ ᱾ ᱧᱩᱛᱩᱢ ᱫᱚ ᱛᱟᱹᱠᱤᱱ ᱯᱚᱨᱮᱥ ᱟᱨ ᱫᱷᱚᱨᱢᱮᱥ ᱾ ᱥᱩᱨ ᱥᱩᱯᱩᱨ ᱴᱚᱞᱟᱨᱮ ᱵᱟᱱᱟ ᱦᱚᱲᱟᱜ ᱚᱲᱟᱜ ᱛᱟᱹᱠᱤᱱ ᱾ ᱢᱤᱫ ᱫᱷᱟᱣ ᱛᱮ ᱴᱷᱤᱠ ᱴᱟᱹᱭᱤᱢ ᱨᱮ ᱫᱚᱠᱟᱱ ᱠᱤᱱ ᱥᱮᱴᱮᱨᱚᱜᱼᱟ ᱟᱨ ᱠᱟᱹᱢᱤᱨᱮ ᱠᱤᱱ ᱥᱟᱵᱚᱜᱼᱟ ᱾ ᱨᱩᱣᱟᱹᱲ ᱡᱷᱚᱜ ᱦᱚᱸ ᱚᱱᱠᱟ ᱜᱮ ᱢᱤᱫ ᱫᱷᱟᱣ ᱛᱮᱠᱤᱱ ᱪᱷᱩᱴᱤᱜᱼᱟ ᱟᱨ ᱟᱯᱟᱱ ᱟᱹᱯᱤᱱ ᱚᱲᱟᱜ ᱛᱮᱠᱤᱱ ᱨᱩᱣᱟᱲᱟ ᱾ ᱡᱮ ᱡᱟᱦᱟᱨ ᱥᱟᱭᱠᱮᱞ ᱛᱮ ᱟᱢ ᱪᱮ ᱤᱧ ᱚᱠᱚᱭ ᱢᱟᱲᱟᱝ ᱞᱚᱜᱚᱱ ᱚᱲᱟᱜ ᱛᱮ ᱥᱮᱴᱮᱨᱚᱜ ᱟᱭ ᱛᱟᱲᱟᱼᱛᱟᱹᱲᱤ ᱪᱟᱹᱞᱩ ᱠᱟᱛᱮᱫ ᱢᱤᱫ ᱨᱩᱭᱩᱫ ᱛᱮ ᱠᱤᱱ ᱩᱴᱷᱟᱹᱣ ᱡᱚᱝᱼᱟ ᱾ ᱦᱚᱨ ᱦᱚᱨᱛᱮ ᱵᱤᱱ ᱨᱚᱯᱚᱲ ᱠᱩᱯᱩᱞᱤ ᱜᱟᱯᱟᱞᱢᱟᱨᱟᱣ ᱠᱟᱛᱮᱱ ᱠᱚᱱᱚ ᱥᱩᱠ ᱫᱩᱠ ᱵᱩᱜᱤ ᱵᱟᱹᱲᱤᱡ ᱠᱟᱛᱷᱟ ᱠᱚ ᱢᱤᱫ ᱵᱟᱨ ᱯᱚᱫᱽ ᱜᱟᱱ ᱾
ᱯᱚᱨᱮᱥ ᱟᱨ ᱫᱷᱚᱨᱢᱮᱥ ᱫᱚᱠᱟᱱ ᱨᱮᱦᱚᱸ ᱡᱟᱦᱟᱸ ᱛᱤᱱᱟᱹᱜ ᱫᱚᱨᱠᱟᱨ ᱤᱱᱟᱹᱜ ᱜᱮᱠᱤᱱ ᱜᱟᱯᱟᱞᱢᱟᱨᱟᱣᱜᱼᱟ ᱾ ᱢᱟᱹᱞᱤᱠ ᱡᱟᱦᱟᱸᱱᱟᱜ ᱠᱟᱹᱢᱤ ᱵᱟᱛᱞᱟᱣ ᱟᱹᱠᱤᱱ ᱠᱷᱟᱱ ᱵᱟᱱᱟ ᱦᱚᱲ ᱜᱮ ᱦᱚᱨᱚᱵᱚᱨᱚ ᱪᱩᱨᱟᱹᱢᱟᱨᱟ ᱠᱤᱱ ᱠᱟᱹᱢᱤ ᱵᱟᱲᱟ ᱜᱚᱫᱟ ᱾ ᱟᱹᱠᱤᱱᱟᱜ ᱠᱟᱹᱢᱤ ᱠᱚᱨᱮ ᱠᱷᱚᱱ ᱯᱚᱨᱚᱠᱚᱜᱼᱟ ᱡᱮᱢᱚᱱ ᱚᱠᱚᱭ ᱰᱮᱦᱮᱨ ᱮ ᱠᱟᱹᱢᱤᱭᱟ ᱟᱨ ᱰᱮᱦᱮᱨ ᱮ ᱪᱷᱩᱴᱟᱹᱣᱼᱟ ᱧᱮᱞ ᱚᱪᱚᱜ ᱞᱟᱹᱜᱤᱫ ᱜᱮ ᱠᱤᱱ ᱠᱩᱨᱩᱢᱩᱴᱩ ᱮᱫ ᱞᱮᱠᱟ ᱾ ᱡᱟᱦᱟᱸᱛᱮ ᱫᱚᱠᱟᱱ ᱢᱟᱹᱞᱤᱠ ᱠᱩᱥᱤ ᱚᱪᱚ ᱠᱟᱛᱮᱱ ᱩᱱᱤ ᱴᱷᱮᱱ ᱠᱷᱚᱱᱟᱜ ᱥᱟᱵᱟᱥ ᱧᱟᱢ ᱵᱟᱠᱷᱨᱟ ᱾ ᱤᱠᱷᱟᱹᱱ ᱱᱚᱣᱟ ᱫᱚᱠᱟᱱᱨᱮ ᱠᱟᱹᱢᱤ ᱠᱷᱚᱸᱡᱟᱜ ᱢᱟᱲᱟᱝ ᱫᱚ ᱱᱩᱠᱤᱱ ᱵᱟᱱᱟ ᱦᱚᱲ ᱟᱹᱰᱤ ᱡᱚᱴᱟᱣ ᱯᱚᱴᱟᱣ ᱠᱤᱱ ᱛᱟᱦᱮᱸᱭᱟ ᱾ ᱦᱟᱴ ᱵᱟᱡᱟᱨ, ᱯᱟᱛᱟ, ᱡᱟᱛᱨᱟ ᱫᱟᱬᱟᱱ ᱛᱟᱭ ᱟᱨ ᱯᱷᱩᱴ ᱵᱚᱞ ᱮᱱᱮᱡ ᱯᱩᱲᱤᱭᱟᱹ ᱠᱚᱨᱮ ᱦᱚᱸ ᱟᱹᱠᱤᱱ ᱫᱚ ᱟᱹᱠᱤᱱ ᱜᱮ ᱡᱚᱯᱚᱨ ᱡᱚᱞᱮ ᱾
ᱢᱤᱫ ᱫᱤᱱ ᱦᱤᱞᱚᱜ ᱫᱚᱠᱟᱱ ᱢᱟᱹᱞᱤᱠ ᱵᱮᱣᱨᱟ ᱥᱟᱠᱟᱢ ᱰᱷᱟᱞ ᱠᱟᱛᱮᱱ ᱟᱹᱰᱤ ᱢᱚᱱ ᱞᱟᱜᱟᱣ ᱟᱛᱮᱫ ᱯᱟᱲᱦᱟᱣᱜ ᱠᱟᱱᱟᱭ ᱚᱠᱟ ᱥᱮᱫ ᱦᱚᱸ ᱵᱟᱝ ᱫᱷᱮᱭᱟᱱ ᱵᱟᱲᱟ ᱠᱟᱛᱮᱱ ᱡᱮᱢᱚᱱ ᱠᱚᱱᱚ ᱵᱤᱱᱤᱰ ᱮᱢ ᱵᱟᱠᱷᱨᱟ ᱥᱟᱯᱲᱟᱣᱜ ᱠᱟᱱ ᱞᱮᱠᱟᱭ ᱾ ᱯᱚᱨᱮᱥ ᱫᱚᱠᱟᱱ ᱨᱮᱱᱟᱜ ᱢᱟᱞ ᱠᱚ ᱥᱟᱡᱟᱣ ᱥᱟᱢᱴᱷᱟᱣ ᱵᱟᱲᱟ ᱮᱫᱼᱟᱭ ᱾ ᱢᱟᱨᱟᱝ ᱦᱚᱲᱟᱜ ᱟᱨ ᱠᱟᱹᱡ ᱜᱤᱫᱽᱨᱟᱹ ᱦᱟᱜ ᱞᱩᱜᱽᱲᱤ ᱞᱟᱯᱚ ᱠᱚ ᱵᱷᱤᱱᱟᱹ ᱵᱷᱤᱱᱟᱹ ᱛᱷᱟᱹᱠᱤ ᱨᱮ ᱫᱚᱦᱚ ᱠᱟᱜ ᱠᱟᱱᱟᱭ ᱾ ᱥᱟᱹᱲᱤ, ᱥᱟᱭᱟ, ᱟᱨ ᱡᱟᱹᱠᱤᱴ ᱠᱚᱦᱚᱸ ᱮᱴᱟᱜ ᱮᱴᱟᱜ ᱛᱷᱟᱹᱠᱤ ᱨᱮ ᱾ ᱫᱷᱩᱛᱤ, ᱜᱟᱢᱪᱷᱟ ᱠᱚ ᱟᱨ ᱢᱤᱫ ᱥᱮᱫ ᱨᱮ ᱾ ᱫᱷᱚᱨᱢᱮᱥ ᱫᱚ ᱫᱚᱠᱟᱱ ᱥᱟᱢᱟᱝ ᱴᱷᱮᱱ ᱨᱟᱢᱯᱟᱲ ᱡᱚᱱᱚᱜ ᱛᱮ ᱥᱟᱨᱟᱲ ᱥᱟᱨᱟᱲ ᱡᱚᱜ ᱦᱩᱭ ᱠᱟᱛᱮ ᱜᱮᱸᱫᱽᱲᱟᱜ ᱛᱮ ᱯᱟᱹᱨᱤ ᱫᱚᱠᱟᱱ ᱨᱮᱱᱟᱜ ᱥᱤᱞᱯᱤᱧ, ᱪᱤᱭᱟᱹᱨ ᱟᱨ ᱤᱥᱴᱩᱞ ᱠᱚᱭ ᱡᱚᱫ ᱥᱟᱯᱷᱟ ᱵᱟᱲᱟ ᱮᱫᱼᱟ ᱾ ᱴᱷᱤᱠ ᱩᱱ ᱡᱷᱚᱜ ᱟᱭᱳ ᱵᱟᱵᱟ ᱟᱨ ᱟᱹᱠᱤᱱ ᱨᱤᱱ ᱦᱚᱯᱚᱱ ᱮᱨᱟ ᱯᱮ ᱦᱚᱲ ᱜᱩᱭᱩᱨ ᱜᱩᱭᱩᱨ ᱫᱚᱠᱟᱱ ᱛᱮ ᱞᱩᱜᱽᱲᱤ ᱠᱤᱨᱤᱧ ᱠᱚ ᱵᱚᱞᱚ ᱮᱱᱟ ᱾ ᱟᱭᱳ ᱦᱚᱲ ᱦᱚᱯᱚᱱ ᱮᱨᱟ ᱛᱟᱭ ᱢᱮᱛᱟᱭᱟ “ᱢᱟ ᱢᱟᱹᱭ ᱚᱠᱟ ᱞᱮᱠᱟᱱ ᱫᱚᱛᱚ ᱠᱷᱚᱡᱚᱜ ᱠᱟᱱᱟᱢ ᱢᱟ ᱠᱚᱭ ᱠᱚᱢ ᱾ ᱯᱷᱮᱥᱚᱱ ᱪᱮ ᱪᱮᱫ ᱦᱟᱸᱠᱚ ᱢᱮᱛᱟᱜ ᱠᱟᱱᱟ ᱚᱱᱟ ᱫᱚ ᱾“ ᱮᱱᱠᱷᱟᱱ ᱯᱚᱨᱮᱥ ᱢᱮᱱ ᱨᱩᱣᱟᱹᱲᱟᱭ “ᱯᱷᱮᱥᱚᱱ ᱫᱚ ᱵᱟᱝᱼᱟ ᱾ ᱯᱷᱮᱱᱥᱤ ᱞᱩᱜᱽᱲᱤ ᱠᱚ ᱢᱮᱛᱟᱜᱼᱟ ᱾” ᱟᱭᱳ ᱦᱚᱲᱮ ᱢᱮᱱᱟ ᱦᱚᱭ ᱦᱚᱭ ᱚᱱᱟ ᱜᱮᱞᱮ ᱠᱷᱚᱡᱚᱜ ᱠᱟᱱᱟ ᱾
ᱫᱷᱚᱨᱢᱮᱥ ᱜᱮᱸᱫᱽᱲᱟᱜ ᱫᱚᱦᱚ ᱜᱤᱰᱤ ᱠᱟᱛᱮ ᱵᱚᱛᱚᱞ ᱨᱮᱱᱟᱜ ᱫᱟᱜ ᱛᱮ ᱱᱟᱥᱮ ᱱᱟᱜ ᱫᱩᱞ ᱡᱚᱝ ᱟᱭ ᱛᱤᱼᱨᱮ ᱟᱨ ᱠᱷᱟᱲᱮᱭᱟ ᱠᱷᱩᱲᱭᱩ ᱟᱹᱨᱩᱵ ᱜᱚᱫ ᱠᱟᱛᱮ ᱩᱨᱢᱟᱹᱞ ᱛᱮ ᱛᱤ ᱡᱚᱫᱚᱜ ᱛᱩᱞᱩᱡ ᱢᱮᱱᱟᱭ “ᱪᱤᱢᱤᱱ ᱫᱟᱢ ᱨᱮᱱᱟᱝ ᱯᱮ ᱱᱮᱞᱟ ᱾ ᱢᱟᱨ ᱠᱟᱡᱤ ᱯᱮ ᱤᱢᱤᱱ ᱫᱟᱢ ᱵᱟᱞᱟ ᱵᱟᱬᱤᱭᱟ ᱛᱮᱭᱟᱜ ᱫᱮᱠᱷᱟᱣ ᱟᱯᱮᱭᱟᱧ ᱾” ᱟᱭᱳ ᱦᱚᱲ ᱢᱮᱱᱟᱭ ᱵᱟᱯᱞᱟ ᱚᱲᱟᱜ ᱞᱮ ᱪᱟᱞᱟᱜ ᱞᱟᱹᱜᱤᱫ ᱫᱚ ᱱᱟᱯᱟᱭᱟᱜ ᱜᱮᱞᱮ ᱤᱫᱤᱭᱟ ᱵᱟᱹᱵᱩ ᱾ ᱵᱟᱵᱟ ᱦᱚᱲ ᱢᱮᱱᱟᱭ ᱢᱚᱬᱮ ᱥᱟᱭ ᱠᱷᱚᱱ ᱦᱟᱡᱟᱨ ᱴᱟᱠᱟ ᱵᱷᱤᱛᱟᱹᱨ ᱨᱮᱱᱟᱜ ᱞᱩᱜᱽᱲᱤ ᱩᱫᱩᱜ ᱟᱞᱮ ᱵᱤᱱ ᱾” ᱱᱚᱜ ᱱᱚᱝᱠᱟ ᱥᱟᱱᱛᱟᱲ ᱟᱨ ᱢᱩᱸᱰᱟ ᱢᱮᱥᱟᱢᱤᱥᱤ ᱛᱮ ᱜᱟᱯᱟᱞᱢᱟᱨᱟᱣ ᱟᱹᱰᱤ ᱵᱷᱟᱹᱜᱤ ᱟᱹᱰᱤ ᱯᱚᱦᱚ ᱠᱚ ᱜᱟᱱ ᱠᱮᱫᱼᱟ ᱾
ᱯᱚᱨᱮᱥ ᱛᱷᱟᱹᱠᱤ ᱠᱷᱚᱱ ᱫᱚᱛᱚ ᱠᱚ ᱚᱰᱚᱠ ᱠᱮᱫᱟᱭ ᱟᱨ ᱫᱷᱚᱨᱢᱮᱥ ᱫᱚ ᱢᱤᱢᱤᱫᱴᱟᱹᱝ ᱩᱫᱩᱜ ᱠᱟᱛᱮᱱ ᱫᱮᱠᱷᱟᱣ ᱟᱫ ᱠᱚᱣᱟᱭ ᱾ ᱟᱹᱰᱤ ᱟᱹᱰᱤ ᱨᱚᱠᱚᱢ ᱟᱨ ᱰᱤᱡᱟᱭᱤᱱ ᱨᱮᱱᱟᱝ ᱵᱟᱨᱚᱵᱚᱨᱚᱱ ᱨᱚᱝᱼᱟ ᱫᱚᱛᱚ ᱾ ᱩᱱᱤ ᱢᱟᱹᱭ ᱠᱩᱲᱤ ᱦᱟᱱᱟ ᱯᱟᱹᱨᱤ ᱱᱚᱣᱟ ᱯᱟᱹᱨᱤ ᱧᱮᱞ ᱧᱚᱜ ᱥᱟᱵ ᱥᱟᱵ ᱠᱟᱛᱮᱱ ᱫᱚᱦᱚ ᱨᱩᱣᱟᱹᱲ ᱠᱟᱜ ᱟᱭ ᱾ ᱫᱚᱛᱚ ᱨᱮ ᱞᱟᱜᱟᱣ ᱟᱠᱟᱱ ᱫᱟᱢ ᱨᱮᱱᱟᱜ ᱴᱚᱰᱚᱨ ᱴᱷᱮᱱ ᱩᱭᱩᱝ ᱞᱤᱜᱷᱟᱹ ᱟᱨ ᱞᱩᱜᱽᱲᱤ ᱪᱟᱹᱯᱩ ᱵᱤᱰᱟᱹᱣ ᱠᱟᱛᱮᱱ ᱾ ᱚᱠᱟᱴᱟᱝ ᱪᱚᱨᱚᱠ ᱧᱮᱞ ᱛᱮ ᱠᱩᱥᱤᱭᱟᱜ ᱠᱟᱱ ᱠᱷᱟᱱᱮ ᱫᱚᱨᱫᱟᱢ ᱧᱮᱞ ᱛᱮ ᱟᱨᱦᱚᱸᱭ ᱫᱚᱦᱚ ᱨᱩᱣᱟᱹᱲ ᱠᱟᱜ ᱠᱟᱱᱟ ᱾ ᱢᱟᱹᱭ ᱠᱩᱲᱤᱭᱟᱜ ᱱᱚᱝᱠᱟ ᱫᱷᱚᱣᱟ ᱵᱚᱣᱟ ᱧᱮᱞᱛᱮ ᱫᱷᱚᱨᱢᱮᱥ ᱢᱮᱱᱟᱭ “ᱢᱟᱨ ᱜᱚ ᱥᱟᱵᱤᱱᱚ ᱛᱮ ᱥᱟᱞᱟᱭ ᱯᱮ ᱾ ᱚᱠᱚᱱᱟᱜ ᱯᱮ ᱯᱚᱥᱚᱱᱫᱚᱭᱟ ᱮᱱᱜᱟᱜᱮ ᱤᱫᱼᱯᱮ ᱾”
ᱯᱚᱨᱮᱥ ᱫᱚ ᱥᱟᱱᱛᱟᱲᱤ ᱯᱟᱹᱨᱥᱤ ᱛᱮ ᱦᱚᱸ ᱟᱹᱰᱤ ᱵᱷᱟᱹᱜᱤ ᱨᱚᱲᱮ ᱵᱟᱰᱟᱭᱟ ᱾ ᱚᱱᱟᱛᱮ ᱩᱱᱨᱮ ᱱᱚᱝᱠᱟᱭ ᱢᱮᱱᱟ “ᱡᱚᱢ ᱡᱤᱱᱤᱥ ᱫᱚ ᱡᱚᱛᱚ ᱦᱚᱲ ᱜᱮ ᱮᱠᱟᱞ ᱟᱯᱟᱱ ᱟᱹᱯᱤᱱ ᱠᱩᱥᱤᱭᱟᱜ ᱞᱮᱠᱟᱱᱟᱜ ᱜᱮᱵᱚᱱ ᱡᱚᱢ ᱧᱩᱭᱟ ᱾ ᱤᱠᱷᱟᱹᱱ ᱞᱩᱜᱽᱲᱤ ᱦᱚᱨᱚᱜ ᱵᱟᱸᱫᱮ ᱡᱷᱚᱜ ᱫᱚ ᱮᱴᱟᱜ ᱦᱚᱲᱟᱜ ᱯᱚᱥᱚᱸᱫᱽ, ᱠᱩᱥᱤ ᱛᱮ ᱦᱚᱨᱚᱜ ᱵᱟᱸᱫᱮ ᱞᱮᱱᱠᱷᱟᱱ ᱟᱨ ᱠᱟᱹᱡ ᱛᱟᱹᱦᱩᱸ ᱪᱚᱨᱚᱠ ᱪᱮᱦᱨᱟ ᱧᱮᱧᱮᱞᱟ ᱾ ᱚᱱᱟ ᱛᱮᱧ ᱢᱮᱱ ᱮᱫᱼᱟ ᱵᱩᱰᱤ ᱫᱚ ᱢᱟᱨ ᱟᱹᱵᱤᱱ ᱜᱮ ᱥᱟᱞᱟ ᱵᱟᱪᱷᱟᱣ ᱜᱚᱲᱚ ᱟᱭ ᱵᱤᱱ ᱾” ᱵᱟᱵᱟ ᱦᱚᱲ ᱢᱮᱱᱟᱭ “ᱡᱟᱦᱟᱸ ᱞᱮ ᱠᱩᱥᱤᱭᱟᱜ ᱠᱟᱱᱟ ᱚᱱᱟ ᱢᱟ ᱰᱮᱦᱮᱨ ᱫᱚᱨ ᱮᱫ ᱞᱮᱭᱟ ᱾” ᱟᱡ ᱟᱭᱳ ᱠᱟᱛᱷᱟ ᱛᱮᱞᱟ ᱠᱟᱛᱮ ᱢᱮᱱᱟᱭ “ᱡᱟᱦᱟᱸ ᱛᱤᱱᱟᱹᱜ ᱫᱚᱨ ᱛᱮᱢ ᱠᱤᱨᱤᱧ ᱠᱟᱜ ᱨᱮᱦᱚᱸ ᱞᱩᱜᱽᱲᱤ, ᱢᱤᱫ ᱫᱷᱟᱣ ᱮᱢ ᱦᱚᱨᱚᱜ ᱮᱱᱠᱷᱟᱱ ᱢᱟᱨᱮ ᱮᱱᱜᱮ ᱾ ᱟᱨ ᱜᱮ ᱟᱹᱰᱤ ᱫᱟᱢ ᱞᱩᱜᱽᱲᱤ ᱠᱟᱱᱟ ᱢᱮᱱᱛᱮ ᱢᱤᱫᱴᱟᱝ ᱞᱩᱜᱽᱲᱤ ᱢᱤᱫᱴᱟᱝ ᱴᱷᱟᱶ ᱛᱮ ᱟᱹᱰᱤ ᱫᱷᱟᱣ ᱦᱚᱨᱚᱜ ᱠᱟᱛᱮ ᱦᱚᱸ ᱵᱟᱝ ᱪᱟᱞᱟᱣ ᱥᱟᱜᱼᱱᱟ ᱦᱟ ᱾ ᱚᱱᱟᱛᱮ ᱞᱩᱜᱽᱲᱤ ᱞᱟᱯᱚ ᱫᱚ ᱢᱤᱫ ᱱᱟᱶᱟ ᱥᱩᱛᱟᱹᱢ ᱠᱷᱟᱱ ᱜᱮ ᱦᱩᱭ ᱮᱱᱟ ᱾”
ᱦᱚᱯᱚᱱ ᱮᱨᱟᱛ ᱟᱨ ᱟᱭᱳ ᱦᱚᱲ ᱥᱟᱞᱟ ᱵᱟᱪᱷᱟᱣ ᱠᱟᱛᱮᱫ ᱢᱤᱫᱴᱟᱝ ᱫᱚᱛᱚ ᱠᱤᱱ ᱠᱩᱥᱤᱭᱟᱜᱼᱟ ᱾ ᱟᱭᱳ ᱦᱚᱲ ᱢᱮᱱᱟᱭ “ᱫᱚᱨ ᱫᱟᱢ ᱜᱮ ᱦᱟᱸᱜ ᱱᱩᱭ ᱫᱚᱠᱟᱱ ᱢᱟᱹᱞᱤᱠ ᱟᱸᱬᱜᱚᱱᱟᱭ ᱪᱮ ᱵᱟᱝ ᱵᱟᱠᱷᱟᱱ ᱮᱴᱟᱜ ᱫᱚᱠᱟᱱ ᱨᱮ ᱯᱟᱹᱨᱤ ᱞᱮ ᱧᱮᱞᱟ ᱾” ᱯᱚᱨᱮᱥ ᱚᱱᱟ ᱫᱚᱛᱚ ᱢᱟᱹᱞᱤᱠ ᱴᱷᱮᱱ ᱤᱫᱤ ᱠᱟᱛᱮ ᱢᱮᱱᱟᱭ “ᱜᱚᱢᱠᱮ ᱱᱩᱠᱩ ᱠᱚ ᱢᱮᱱ ᱮᱫᱼᱟ ᱱᱚᱶᱟ ᱫᱚᱠᱟᱱ ᱨᱤᱱ ᱢᱟᱹᱞᱤᱠ ᱟᱜ ᱧᱩᱛᱩᱢ ᱟᱸᱡᱚᱢ ᱠᱟᱛᱮ ᱜᱮᱞᱮ ᱦᱮᱡ ᱟᱠᱟᱱᱟ ᱾ ᱟᱹᱰᱤ ᱵᱮᱥ ᱟᱭ ᱟᱨ ᱫᱚᱨ ᱠᱚᱦᱚᱸᱭ ᱟᱸᱬᱜᱚᱭᱟ ᱢᱮᱱᱛᱮ ᱞᱮ ᱵᱟᱰᱟᱭᱟ ᱾” ᱮᱱᱠᱷᱟᱱ ᱢᱟᱹᱞᱤᱠ ᱫᱚᱛᱚ ᱨᱮᱱᱟᱜ ᱫᱟᱢ ᱧᱮᱞ ᱠᱟᱛᱮ ᱚᱱᱟ ᱠᱷᱚᱱ ᱠᱤᱪᱷᱤ ᱴᱟᱠᱟ ᱠᱚᱢ ᱠᱟᱛᱮ ᱫᱚᱨ ᱞᱟᱹᱭ ᱟᱠᱚ ᱠᱷᱟᱱ ᱠᱩᱥᱤ ᱠᱩᱥᱤᱛᱮ ᱠᱤᱨᱤᱧ ᱠᱟᱛᱮ ᱩᱱᱠᱩ ᱫᱚᱠᱟᱱ ᱠᱷᱚᱱ ᱠᱚ ᱨᱩᱣᱟᱲᱟ ᱾
ᱩᱱᱠᱩ ᱠᱚ ᱪᱟᱞᱟᱣ ᱥᱟᱹᱛ ᱮᱱᱠᱷᱟᱱ ᱫᱷᱚᱨᱢᱮᱥ ᱢᱟᱹᱞᱤᱠ ᱥᱮᱫ ᱠᱚᱭᱚᱜ ᱠᱟᱛᱮ ᱢᱮᱱᱟᱭ “ᱜᱚᱢᱠᱮ ᱩᱱᱤ ᱟᱭᱳ ᱦᱚᱲ ᱫᱚ ᱱᱚᱶᱟ ᱫᱚᱠᱟᱱ ᱯᱷᱚᱠᱟᱱ ᱧᱩᱛᱩᱢ ᱟᱸᱡᱚᱢ ᱠᱟᱛᱮ ᱠᱚ ᱦᱮᱡ ᱟᱠᱟᱱ ᱠᱟᱛᱷᱟ ᱫᱚ ᱢᱚᱴᱷᱮ ᱢᱮᱱ ᱜᱮ ᱵᱟᱭ ᱢᱮᱱ ᱟᱠᱟᱫᱟ ᱪᱮ ᱱᱩᱭ ᱢᱟᱹᱞᱤᱠ ᱟᱹᱰᱤ ᱵᱮᱥ ᱟᱭ ᱢᱮᱱᱛᱮ ᱠᱟᱛᱷᱟ ᱦᱚᱸ ᱵᱟᱭ ᱢᱮᱱ ᱟᱠᱟᱫᱟ ᱾ ᱩᱱᱤ ᱟᱭᱳ ᱦᱚᱲ ᱢᱟ ᱟᱨ ᱦᱚᱸᱭ ᱢᱮᱱ ᱮᱫ ᱛᱟᱦᱮᱸᱱ ᱫᱚᱨ ᱫᱟᱢ ᱠᱚ ᱵᱟᱞᱮ ᱯᱚᱴᱟᱣᱜ ᱠᱷᱟᱱ ᱮᱴᱟᱜ ᱫᱚᱠᱟᱱ ᱨᱮᱞᱮ ᱧᱮᱞᱟ ᱟᱨ ᱞᱮ ᱠᱤᱨᱤᱧᱟ ᱢᱮᱱᱛᱮ ᱾”
ᱫᱷᱚᱨᱢᱮᱥᱟᱜ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱫᱚᱠᱟᱱ ᱢᱟᱹᱞᱤᱠ ᱠᱟᱹᱴᱤᱡ ᱦᱚᱸ ᱵᱟᱭ ᱦᱟᱦᱟᱲᱟ ᱵᱟᱲᱟᱜᱼᱟ ᱾ ᱵᱤᱪᱠᱚᱢ ᱨᱚᱠᱼᱴᱷᱚᱠ ᱫᱷᱚᱨᱢᱮᱥ ᱮ ᱢᱮᱛᱟᱭᱟ “ᱫᱷᱚᱨᱢᱮᱥ ᱟᱢᱟᱜ ᱡᱩᱨᱩᱞ ᱡᱩᱨᱩᱞ ᱡᱩᱞᱩᱜ ᱪᱟᱸᱫᱚ ᱞᱮᱠᱟᱱ ᱥᱟᱹᱨᱤ ᱥᱚᱛᱚ ᱠᱟᱛᱷᱟ ᱠᱷᱚᱱᱟᱜ ᱯᱚᱨᱮᱥᱟᱜ ᱥᱤᱵᱤᱞ ᱥᱚᱲᱚᱢ ᱮᱲᱮ ᱨᱚᱲ ᱥᱟᱭ ᱥᱟᱭ ᱜᱩᱱ ᱰᱮᱦᱮᱨ “ᱜᱚᱱᱚᱝ” ᱟᱱᱟ ᱾ ᱵᱟᱰᱟᱭᱟᱢ ᱪᱮᱫᱟᱜ? ᱪᱮᱫᱟᱜ ᱥᱮ ᱩᱱᱤ ᱠᱩᱲᱤ ᱜᱤᱫᱽᱨᱟᱹ ᱦᱟᱜ ᱢᱚᱱᱮ ᱟᱞᱚ ᱨᱟᱹᱯᱩᱫᱚᱜ ᱢᱟ ᱥᱟᱶᱛᱮ ᱱᱚᱣᱟ ᱫᱚᱠᱟᱱ ᱠᱷᱚᱱ ᱜᱚᱦᱨᱟᱠ ᱮᱠᱷᱮᱱ ᱛᱤ ᱛᱮ ᱟᱞᱚ ᱠᱚ ᱨᱩᱣᱟᱹᱲ ᱢᱟ ᱢᱮᱱᱛᱮ ᱜᱮ ᱯᱚᱨᱮᱥ ᱫᱚ ᱱᱚᱝᱠᱟᱭ ᱢᱮᱱ ᱟᱠᱟᱫᱼᱟ ᱾ ᱤᱧ ᱥᱟᱱᱛᱟᱲ ᱯᱟᱹᱨᱥᱤ ᱵᱟᱹᱧ ᱵᱟᱰᱟᱭ ᱨᱮᱦᱚᱸ ᱪᱮ ᱵᱟᱹᱧ ᱵᱩᱡᱷᱟᱹᱣ ᱫᱟᱲᱮᱭᱟᱜ ᱠᱟᱱ ᱨᱮᱦᱚᱸ ᱪᱮᱫ ᱪᱮᱠᱟ ᱮᱱᱟ ? ᱨᱚᱲ ᱟᱲᱟᱝ ᱨᱮᱱᱟᱜ ᱨᱟᱦᱟ ᱟᱨ ᱢᱮᱫᱼᱟᱦᱟ ᱨᱮᱱᱟᱝ ᱦᱟᱵᱽᱼᱵᱷᱟᱵᱽ ᱢᱟᱹᱧ ᱵᱩᱡᱷᱟᱹᱣ ᱫᱟᱲᱮᱭᱟᱜ ᱠᱟᱱ ᱜᱮᱭᱟ ᱾ ᱟᱨ ᱱᱚᱶᱟ ᱦᱚᱸ ᱵᱮᱥ ᱴᱷᱤᱠ ᱤᱧ ᱵᱟᱰᱟᱭ ᱫᱟᱲᱮᱭᱟᱜ ᱠᱟᱱᱟ ᱟᱢᱟᱜ ᱢᱚᱱᱮᱨᱮ ᱯᱚᱨᱮᱥ ᱞᱟᱹᱜᱤᱫ ᱢᱮᱱᱟᱜ ᱦᱤᱸᱥᱟᱹ ᱟᱨ ᱡᱚᱞᱚᱱ ᱠᱷᱟᱹᱛᱤᱨ ᱜᱮᱢ ᱞᱟᱹᱭ ᱠᱟᱭ ᱠᱟᱱᱟ ᱤᱧ ᱴᱷᱮᱱ ᱫᱚ ᱾ ᱤᱱᱟᱹ ᱫᱚ ᱟᱢᱟᱜ ᱩᱭᱦᱟᱹᱨ ᱛᱮ ᱟᱡᱟᱜ ᱮᱲᱮ ᱞᱟᱹᱜᱤᱫ ᱤᱧ ᱨᱩᱦᱤᱫ ᱮᱢᱟ ᱟᱨ ᱟᱢᱟᱜ ᱥᱟᱹᱨᱤ ᱥᱚᱛᱚ ᱠᱟᱛᱷᱟ ᱞᱟᱹᱭ ᱞᱟᱹᱜᱤᱫ ᱫᱚᱧ ᱥᱟᱵᱟᱥ ᱥᱟᱨᱦᱟᱣ ᱟᱢ ᱢᱟ ᱢᱮᱱᱛᱮ ᱾” ᱯᱚᱨᱮᱥ ᱟᱨ ᱫᱷᱚᱨᱢᱮᱥ ᱵᱟᱱᱟ ᱦᱚᱲ ᱠᱤᱱ ᱛᱷᱤᱨᱛᱷᱟᱨ ᱪᱩᱯᱪᱟᱯ ᱠᱚᱜ ᱠᱷᱟᱱ ᱫᱚᱠᱟᱱ ᱢᱟᱹᱞᱤᱠ ᱟᱨᱦᱚᱸᱭ ᱢᱮᱱᱟ “ ᱟᱹᱵᱤᱱ ᱢᱟ ᱵᱟᱱᱟ ᱦᱚᱲ ᱢᱤᱫ ᱫᱷᱟᱣ ᱛᱮ ᱱᱚᱶᱟ ᱫᱚᱠᱟᱱ ᱠᱟᱹᱢᱤ ᱨᱮᱵᱤᱱ ᱠᱷᱚᱸᱡᱟ ᱞᱮᱱᱟ ᱾ ᱱᱤᱱᱟᱹᱜ ᱫᱤᱱ ᱵᱷᱤᱛᱨᱟᱹ ᱨᱮ ᱯᱚᱨᱮᱥ ᱠᱷᱟᱱ ᱫᱚᱭ ᱪᱮᱫ ᱪᱟᱵᱟ ᱠᱮᱫᱼᱟ ᱜᱚᱦᱨᱟᱠ ᱥᱟᱶ ᱪᱮᱫ ᱞᱮᱠᱟ ᱜᱟᱯᱟᱞᱢᱟᱨᱟᱣ ᱦᱩᱭᱩᱜᱼᱟ ᱾ ᱪᱮᱫ ᱞᱮᱠᱟ ᱠᱷᱟᱱ ᱜᱚᱦᱨᱟᱠ ᱟᱨ ᱫᱩᱥᱨᱟᱹ ᱱᱚᱸᱰᱮ ᱠᱤᱜᱼᱨᱤᱧ ᱠᱚ ᱦᱤᱡᱩᱜᱼᱟ ᱾ ᱚᱱᱟᱛᱮ ᱢᱤᱢᱤᱫ ᱫᱷᱟᱣ ᱫᱚᱠᱟᱱ ᱯᱚᱨᱮᱥ ᱵᱚᱨᱥᱟ ᱨᱮ ᱵᱟᱹᱜᱤ ᱚᱴᱚ ᱠᱟᱛᱮ ᱡᱟᱦᱟᱸ ᱥᱮᱫ ᱦᱚᱧ ᱪᱟᱞᱟᱣ ᱵᱟᱲᱟᱜ ᱠᱟᱱᱟ ᱾ ᱟᱨ ᱟᱢ ᱫᱚ ᱫᱷᱚᱨᱢᱮᱥ ᱩᱱ ᱫᱤᱱ ᱠᱷᱚᱱ ᱡᱚᱱᱚᱜ ᱛᱮ ᱡᱚᱜ ᱵᱟᱲᱟ, ᱜᱮᱸᱫᱽᱲᱟᱜ ᱛᱮ ᱯᱩᱪᱷᱟᱹᱯᱩᱪᱷᱤ ᱥᱟᱯᱷᱟ ᱥᱟᱹᱯᱷᱤ ᱟᱨ ᱫᱟᱜ ᱟᱹᱜᱩ ᱠᱟᱹᱢᱤ ᱠᱚᱜᱮᱢ ᱜᱟᱱᱚᱜ ᱠᱟᱱᱟ ᱾”
ᱫᱚᱠᱟᱱ ᱢᱟᱹᱞᱤᱠ ᱯᱚᱨᱮᱥ ᱟᱨ ᱫᱷᱚᱨᱢᱮᱥ ᱵᱟᱱᱟ ᱦᱚᱲᱟᱜ ᱪᱟᱹᱞᱤᱼᱪᱚᱞᱚᱱ ᱥᱟᱶᱛᱮ ᱢᱚᱱᱮ ᱨᱮᱱᱟᱜ ᱠᱟᱛᱷᱟ ᱠᱚᱭ ᱨᱚᱲ ᱥᱟᱢᱟᱝ ᱥᱚᱫᱚᱨ ᱟᱫ ᱠᱤᱱ ᱠᱷᱟᱱ ᱵᱟᱱᱟ ᱦᱚᱲ ᱵᱚᱦᱚᱜ ᱛᱤᱨᱩᱵ ᱠᱟᱛᱮ ᱠᱤᱱ ᱛᱤᱸᱜᱩ ᱛᱷᱤᱨ ᱠᱚᱜᱼᱟ ᱾ ᱴᱷᱤᱠ ᱩᱱ ᱡᱷᱚᱜ ᱜᱮ ᱮᱴᱟᱜ ᱜᱚᱦᱨᱟᱠ ᱠᱚ ᱥᱮᱴᱮᱨᱚᱜ ᱠᱷᱟᱱ ᱯᱚᱨᱮᱥ ᱟᱨ ᱫᱷᱚᱨᱢᱮᱥ ᱢᱤᱫ ᱫᱷᱟᱣ ᱛᱮᱠᱤᱱ ᱢᱮᱱ ᱜᱚᱫᱟ “ᱪᱮᱫ ᱞᱮᱠᱟᱱ ᱞᱩᱜᱽᱲᱤ ᱯᱮ ᱧᱮᱞᱟ ?”
***
