ᱡᱚᱛᱚ ᱠᱷᱚᱱᱮᱢ ᱥᱳᱨᱮᱥ ᱟᱢ ᱜᱮ ᱱᱚᱣᱟ ᱢᱤᱨᱛᱤᱠᱟ ᱨᱮ
ᱡᱟᱱᱟᱢ ᱟᱭᱳ ᱛᱳᱣᱟ ᱫᱟᱨᱮ ᱥᱤᱨᱡᱚᱱᱤᱭᱟᱹ ᱟᱢ ᱜᱮ,
ᱟᱨ ᱢᱤᱫ ᱡᱤᱣᱤ ᱥᱤᱨᱡᱚᱱ ᱫᱟᱲᱮ ᱞᱟᱹᱜᱤᱫ ᱦᱚᱸ
ᱡᱚᱛᱚ ᱦᱚᱲ ᱛᱟᱞᱟ ᱠᱷᱚᱱ ᱵᱟᱪᱷᱚᱱ ᱞᱮᱫ ᱢᱮ ᱟᱢ ᱜᱮ ᱾
ᱟᱨᱮ ᱪᱟᱸᱫᱚ ᱦᱟᱹᱵᱤᱡ ᱟᱢᱟᱜ ᱠᱚᱲᱟᱢ ᱠᱩᱠᱷᱤ ᱨᱮ
ᱡᱚᱜᱟᱣ ᱡᱚᱛᱚᱱ ᱫᱚᱦᱚ ᱠᱟᱛᱮ ᱢᱤᱫᱴᱟᱹᱝ ᱡᱤᱣᱤ,
ᱫᱷᱟᱹᱨᱛᱤ ᱨᱮ ᱱᱟᱯᱟᱭ ᱛᱮ ᱥᱮᱯᱮᱧ ᱨᱟᱠᱟᱵ ᱞᱟᱹᱜᱤᱫ
ᱫᱤᱱᱟᱹᱢ ᱡᱚᱛᱚᱱ ᱫᱚᱦᱚᱭ ᱟᱢᱟᱜ ᱦᱚᱲᱢᱚ ᱡᱤᱣᱤ ᱾
ᱦᱟᱭᱼᱦᱟᱹᱥᱩ, ᱠᱚᱥᱴᱚ ᱥᱟᱦᱟᱣ ᱠᱟᱛᱮ ᱨᱮᱦᱚᱸ
ᱨᱤᱞᱟᱹ ᱼ ᱢᱟᱞᱟ ᱱᱚᱣᱟ ᱫᱷᱟᱹᱨᱛᱤ ᱟᱭᱳ ᱛᱟᱞᱟ ᱨᱮ,
ᱥᱟᱹᱨᱤ ᱜᱮ ᱡᱟᱱᱟᱢ ᱟᱭᱳ ᱛᱳᱣᱟ ᱫᱟᱨᱮ
ᱟᱢ ᱜᱮᱢ ᱥᱮᱯᱮᱧ ᱨᱟᱠᱟᱵ ᱞᱤᱫᱤᱧ ᱟᱢᱟᱜ ᱠᱚᱞᱮ ᱨᱮ ᱾
ᱟᱢᱟᱜ ᱠᱚᱞᱮ ᱨᱮᱜᱮ ᱦᱮᱵᱮᱼᱦᱚᱵᱚᱨ ᱠᱟᱛᱮ
ᱪᱚᱜᱼᱪᱮᱨᱮᱡ ᱟᱛᱮ ᱧᱤᱫᱟᱹᱢ ᱡᱟᱹᱯᱤᱫ ᱞᱤᱫᱤᱧ,
ᱨᱟᱜᱼᱨᱚᱫᱚᱱ ᱨᱮ ᱧᱤᱫᱟᱹ ᱡᱟᱹᱯᱤᱫ ᱚᱠᱛᱮᱢ ᱮᱵᱷᱮᱱ ᱠᱚᱜ
ᱟᱹᱰᱤ ᱫᱩᱞᱟᱹᱲ ᱛᱮ ᱤᱧᱮᱢ ᱦᱟᱨᱟᱼ ᱵᱩᱨᱩ ᱞᱤᱫᱤᱧ ᱾
ᱨᱮᱸᱜᱮᱡ ᱼ ᱛᱮᱛᱟᱝ ᱵᱟᱝ ᱮᱢ ᱥᱟᱦᱟᱣ ᱛᱤᱧ
ᱫᱩᱠᱼᱫᱟᱺᱫᱤ ᱠᱷᱚᱱ ᱟᱢ ᱜᱮᱢ ᱚᱣᱟᱨ ᱞᱤᱫᱤᱧ,
ᱞᱚᱞᱚ ᱥᱤᱛᱩᱝ ᱨᱮ ᱛᱟᱨᱟ ᱟᱧᱪᱟᱨ ᱛᱮᱢ ᱩᱢᱩᱞ ᱞᱤᱫᱤᱧ
ᱨᱩᱣᱟᱹᱜᱼᱦᱟᱹᱥᱩ ᱨᱮ ᱟᱢᱟᱜ ᱠᱚᱞᱮ ᱨᱮᱢ ᱜᱩᱸᱜᱩᱫ ᱞᱤᱫᱤᱧ ᱾
ᱟᱹᱠᱤᱞᱼ ᱜᱮᱭᱟᱱ ᱦᱚᱸ ᱯᱩᱭᱞᱩᱢ ᱪᱟᱞ ᱟᱹᱫᱤᱧ
ᱵᱩᱫᱷᱤᱼ ᱫᱤᱥᱟᱹ ᱛᱮ ᱡᱤᱭᱚᱱᱮᱢ ᱢᱟᱨᱥᱟᱞ ᱠᱮᱫ ᱛᱤᱧ,
ᱦᱤᱸᱥᱟᱹ ᱼᱥᱩᱭᱟᱹ ᱠᱷᱚᱱᱮᱢ ᱥᱟᱦᱟ ᱥᱟᱺᱜᱤᱧ ᱞᱤᱫᱤᱧ
ᱧᱚᱞᱦᱟᱫ ᱧᱤᱫᱟᱹ ᱥᱟᱦᱟ ᱠᱟᱛᱮ ᱡᱤᱭᱚᱱᱮᱢ ᱥᱟᱶᱟᱨ ᱛᱤᱧ ᱾
ᱚᱜᱚᱢ ᱫᱚᱨᱭᱟ ᱞᱮᱠᱟ ᱟᱢᱟᱜ ᱱᱤᱨᱞᱟᱹ ᱫᱩᱞᱟᱹᱲ
ᱡᱟᱦᱟᱸ ᱨᱤᱧ ᱛᱟᱦᱮᱱ ᱛᱟᱠᱮᱨᱚᱜ ᱟᱢᱟᱜ ᱥᱤᱵᱤᱞᱼᱥᱚᱲᱚᱢ,
ᱩᱨᱩᱱᱼᱯᱩᱨᱩᱱ ᱞᱤᱫᱤᱧ ᱟᱢᱟᱜ ᱫᱟᱭᱟᱼᱫᱩᱞᱟᱹᱲ ᱛᱮ
ᱤᱧ ᱞᱟᱹᱜᱤᱫ ᱟᱢᱟᱜ ᱫᱩᱞᱟᱹᱲ ᱛᱟᱦᱮᱱ ᱡᱚᱛᱚ ᱠᱷᱚᱱ ᱢᱟᱲᱟᱝ ᱾
***
