ᱟᱭᱳ ᱵᱟᱵᱟ ᱛᱟᱦᱮᱸᱱ ᱛᱩᱞᱩᱡ
ᱤᱧ ᱫᱚᱢ ᱴᱩᱣᱟᱹᱨ ᱠᱮᱫᱤᱧ
ᱦᱟᱱᱦᱟᱨ ᱦᱚᱧᱦᱟᱨ ᱛᱟᱦᱮᱸ ᱠᱟᱛᱮ
ᱤᱧ ᱫᱚᱢ ᱱᱟᱪᱟᱨ ᱠᱮᱫᱤᱧ
ᱦᱟᱭᱨᱮ ᱪᱟᱸᱫᱚ ᱵᱚᱸᱜᱟ ᱱᱚᱶᱟ ᱫᱚ
ᱪᱮᱫ ᱞᱮᱠᱟᱱ ᱥᱤᱨᱡᱚᱱ ᱛᱟᱢ ᱾
ᱡᱟᱱᱟᱢ ᱚᱲᱟᱜ ᱫᱩᱣᱟᱹᱨ ᱨᱮᱢᱟ
ᱤᱧ ᱢᱟ ᱠᱮᱱᱮᱠᱚᱛᱮ
ᱛᱳᱣᱟ ᱛᱟᱵᱮᱱ ᱠᱩᱞᱦᱤ ᱫᱷᱩᱲᱤ
ᱮᱱᱮᱡ ᱥᱮᱨᱮᱧ ᱟᱹᱰᱤ ᱫᱩᱞᱟᱹᱲ ᱛᱮ
ᱤᱧᱤᱧ ᱦᱟᱨᱟ ᱮᱱᱟ ᱤᱧᱤᱧ ᱵᱩᱨᱩ ᱮᱱᱟ
ᱦᱟᱱᱦᱟᱨ ᱦᱚᱧᱦᱟᱨ ᱚᱲᱟᱜ ᱫᱩᱣᱟᱹᱨ
ᱤᱧ ᱫᱩᱧ ᱡᱚᱜᱟᱣ ᱡᱚᱛᱚᱱ ᱠᱮᱫ ᱾
ᱤᱥᱤᱱ ᱫᱟᱠᱟ ᱵᱟᱹᱴᱤᱨᱮ
ᱢᱮᱫ ᱫᱟᱜ ᱡᱚᱨᱚᱜ ᱛᱤᱧ
ᱦᱟᱭᱨᱮ ᱪᱟᱸᱫᱚ ᱵᱚᱸᱜᱟ ᱱᱚᱶᱟ ᱫᱚ
ᱪᱮᱫ ᱞᱮᱠᱟᱱ ᱥᱤᱨᱡᱚᱱ ᱛᱟᱢ ᱾
ᱟᱢᱟᱜ ᱫᱟᱭᱟ ᱫᱩᱞᱟᱹᱲ ᱛᱮ
ᱱᱩᱱᱟᱹᱝ ᱢᱟᱨᱟᱝ ᱫᱷᱟᱹᱨᱛᱤ ᱨᱮ
ᱥᱤᱧ ᱮᱫᱼᱟᱢ ᱧᱤᱫᱟᱹ ᱮᱫᱼᱟᱢ ᱪᱟᱸᱫᱚ
ᱟᱢᱟᱜ ᱫᱟᱭᱟ ᱫᱩᱞᱟᱹᱲ ᱛᱮ
ᱢᱟᱹᱱᱢᱤ ᱟᱜ ᱡᱤᱭᱚᱱ ᱮᱢ ᱥᱤᱨᱡᱚᱱ ᱮᱫᱼᱟ
ᱪᱮᱫᱟᱜ ᱪᱟᱸᱫᱚ ᱱᱚᱝᱠᱟᱢ ᱥᱤᱨᱡᱚᱱ ᱠᱮᱫᱤᱧ
ᱤᱧ ᱫᱚ ᱠᱩᱲᱤ ᱦᱚᱯᱚᱱ ᱡᱟᱱᱟᱢ ᱾
ᱱᱤᱛ ᱤᱧ ᱩᱭᱦᱟᱹᱨ ᱡᱚᱝ ᱱᱤᱛ ᱤᱧ ᱵᱩᱡᱷᱟᱹᱣ ᱠᱮᱫ
ᱟᱭᱳ ᱵᱟᱵᱟ ᱥᱚᱦᱟᱜᱽ ᱫᱩᱞᱟᱹᱲ
ᱠᱩᱲᱤ ᱜᱤᱫᱽᱨᱟᱹ ᱡᱚᱱᱚᱢ ᱫᱷᱟᱹᱵᱤᱡ
ᱤᱧᱟᱜ ᱢᱚᱱᱮ ᱵᱩᱡᱷᱟᱹᱣ ᱞᱟᱹᱜᱤᱫ ᱫᱷᱟᱹᱨᱛᱤ ᱯᱩᱨᱤ ᱨᱮ
ᱟᱭᱳ ᱵᱟᱵᱟ ᱱᱤᱛ ᱫᱚ ᱵᱟᱹᱱᱩᱜ ᱵᱤᱱ ᱾
ᱠᱩᱲᱤ ᱦᱚᱯᱚᱱ ᱡᱟᱱᱟᱢ ᱫᱚ
ᱮᱴᱟᱜ ᱚᱲᱟᱜ ᱫᱩᱣᱟᱹᱨ ᱜᱮ
ᱢᱤᱫ ᱴᱤᱰᱟᱹᱜ ᱥᱤᱸᱫᱩᱨ ᱛᱮᱜᱮ
ᱡᱟᱱᱟᱢ ᱯᱟᱹᱨᱤᱥ ᱫᱚ ᱵᱚᱫᱚᱞᱚᱜ
ᱚᱲᱟᱜ ᱠᱮᱫ ᱟᱹᱧ ᱫᱩᱣᱟᱹᱨ ᱠᱮᱫ ᱟᱹᱧ
ᱥᱚᱝᱥᱟᱨ ᱛᱟᱞᱟᱨᱮ ᱛᱚᱞ ᱮᱱᱟᱹᱧ ᱾
ᱛᱤᱨᱤ ᱡᱩᱨᱤ ᱪᱷᱟᱛᱟ ᱫᱟᱨᱮ ᱩᱢᱩᱞ ᱛᱮ
ᱤᱧ ᱫᱩᱧ ᱫᱟᱱᱟᱝ ᱮᱱᱟ
ᱦᱟᱱᱦᱟᱨ ᱦᱚᱧᱦᱟᱨ ᱜᱤᱫᱟᱹᱨ ᱯᱤᱫᱟᱹᱨ
ᱡᱚᱜᱟᱣ ᱡᱚᱛᱚᱱ ᱤᱧ ᱫᱩᱧ ᱛᱟᱦᱮᱸ ᱮᱱᱟ ᱾
ᱚᱱᱟ ᱛᱮᱜᱮ ᱡᱟᱶᱟᱭ ᱚᱲᱟᱜ ᱵᱚᱸᱜᱟ ᱵᱳᱨᱳ
ᱤᱧ ᱫᱩᱧ ᱫᱮᱵᱟ ᱥᱮᱵᱟ ᱠᱚ
ᱱᱤᱛ ᱫᱚ ᱪᱟᱸᱫᱚ ᱵᱚᱸᱜᱟ ᱟᱢᱟᱜ ᱥᱤᱨᱡᱚᱱ ᱛᱟᱞᱟᱨᱮ
ᱤᱧ ᱜᱮ ᱛᱤᱨᱞᱟᱹ ᱦᱚᱯᱚᱱ ᱾
***
