ᱨᱟᱭ ᱵᱟᱹᱥᱤᱭᱟᱹ ᱨᱟᱭᱵᱟᱨ ᱦᱚᱛᱮ ᱛᱮᱜᱮ
ᱵᱟᱨᱭᱟ ᱚᱲᱟᱜ ᱠᱚ ᱢᱤᱫᱴᱟᱹᱝ ᱥᱟᱹᱨᱤ ᱜᱮ ᱾
ᱟᱭᱳ ᱵᱟᱵᱟ ᱥᱟᱹᱜᱩᱱ ᱞᱚᱴᱟ ᱫᱟᱜ ᱫᱚᱲᱚᱢ ᱠᱟᱛᱮ
ᱟᱹᱛᱩ ᱢᱚᱲᱮ ᱵᱟᱵᱟ ᱢᱟᱹᱡᱷᱤ ᱜᱚᱰᱮᱛ ᱥᱩᱛᱩᱜ ᱠᱟᱛᱮ ᱾
ᱛᱟᱲᱟᱢ ᱟᱠᱚ ᱱᱟᱶᱟ ᱯᱮᱲᱟ ᱚᱲᱟᱜ
ᱛᱚᱵᱮ ᱮᱱᱟ ᱵᱟᱨᱭᱟ ᱢᱚᱱᱮ ᱡᱚᱲᱟᱣᱜ ᱾
ᱨᱤᱦᱤᱲ ᱵᱤᱫᱤᱲ ᱛᱩᱢᱫᱟᱜ ᱴᱟᱢᱟᱠ ᱥᱟᱰᱮ
ᱰᱤᱜᱽᱞᱟᱹ ᱰᱤᱜᱽᱞᱤ ᱮᱱᱮᱡ ᱟᱠᱚ ᱥᱟᱹᱭ ᱯᱩᱲᱥᱤ ᱚᱸᱰᱮ ᱾
ᱥᱟᱫᱚᱢ ᱪᱮᱛᱟᱱ ᱡᱟᱶᱟᱭ ᱞᱤᱠᱤᱫ ᱞᱤᱠᱤᱫ
ᱫᱟᱹᱣᱲᱟᱹ ᱪᱮᱛᱟᱱ ᱵᱟᱹᱦᱩ ᱴᱩᱴᱩᱨᱤ ᱮᱥᱮᱫ ᱾
ᱤᱛᱩᱫ ᱞᱟᱹᱜᱤᱫ ᱡᱟᱶᱟᱭ ᱦᱟᱨᱮ ᱯᱷᱟᱨᱮ
ᱞᱟᱜᱟᱣ ᱠᱮᱫᱟᱭ ᱥᱤᱸᱫᱩᱨ ᱦᱚᱨᱟᱥᱤ ᱨᱮ ᱾
ᱡᱟᱱᱟᱢ ᱚᱲᱟᱜ ᱠᱷᱚᱱ ᱠᱩᱲᱤ ᱜᱤᱫᱽᱨᱟᱹ ᱫᱚ ᱵᱤᱫᱟᱹᱭᱚᱜ ᱟᱭ
ᱢᱮᱫ ᱯᱮᱨᱮᱡ ᱢᱮᱫ ᱫᱟᱜ ᱟᱛᱮ ᱵᱤᱫᱟᱹᱭ ᱠᱚ ᱮᱢᱟᱭ ᱾
ᱫᱚᱼ ᱵᱟᱹᱴᱤ ᱨᱮ ᱟᱹᱛᱩ ᱢᱚᱲᱮ ᱵᱟᱵᱟ ᱠᱩᱞᱤ ᱠᱤᱱᱟ ᱠᱚ
ᱱᱟᱭ ᱵᱟᱲᱮ ᱱᱟᱯᱟᱭ ᱵᱟᱲᱮ ᱢᱮᱛᱟ ᱠᱤᱱᱟ ᱠᱚ ᱾
ᱨᱤᱞᱟᱹ ᱢᱟᱞᱟ ᱯᱷᱟᱨᱪᱟ ᱢᱚᱱᱮ ᱟᱛᱮ ᱜᱮ
ᱨᱚᱲ ᱡᱚᱝ ᱞᱟᱸᱫᱟ ᱡᱚᱝ ᱵᱤᱱ ᱫᱤᱱᱟᱹᱢ ᱜᱮ ᱾
ᱢᱤᱫ ᱢᱟᱹᱪᱤ ᱢᱤᱫ ᱯᱟᱨᱠᱚᱢ ᱛᱮᱦᱮᱸᱧ ᱠᱷᱚᱱ ᱫᱚ ᱟᱹᱵᱤᱱ
ᱠᱮᱪᱟᱜ ᱦᱟᱹᱴᱤᱧ ᱡᱚᱢ ᱦᱟᱹᱴᱤᱧ ᱜᱮ ᱢᱚᱱᱮ ᱨᱮ ᱥᱩᱠᱷ ᱛᱟᱹᱵᱤᱱ ᱾
ᱩᱞᱮ ᱰᱷᱟᱹᱣᱨᱟᱹᱜ ᱫᱟᱜ ᱛᱮᱵᱤᱱ ᱛᱤᱨᱯᱤ ᱨᱚᱯᱟᱢ ᱟᱠᱟᱱ
ᱢᱤᱫ ᱠᱷᱤᱭᱟᱹ ᱫᱟᱹᱥᱤ ᱥᱩᱛᱟᱹᱢ ᱛᱮᱵᱤᱱ ᱛᱚᱞ ᱢᱤᱫ ᱟᱠᱟᱱ ᱾
ᱥᱚᱱᱮ ᱜᱚᱲ ᱥᱤᱠᱲᱤ ᱛᱮᱵᱤᱱ ᱡᱚᱯᱚᱲᱟᱣ ᱢᱤᱫ ᱮᱱᱟ
ᱡᱩᱨᱤ ᱯᱟᱹᱨᱤ ᱥᱟᱹᱜᱟᱹᱭ ᱛᱮᱵᱤᱱ ᱛᱚᱯᱚᱞ ᱢᱤᱫ ᱮᱱᱟ ᱾
ᱥᱩᱭᱟᱹ ᱜᱟᱰᱟ ᱫᱟᱜ ᱨᱮ ᱱᱚᱶᱟ ᱥᱟᱹᱜᱟᱹᱭ ᱟᱞᱚ ᱵᱤᱱ ᱵᱚᱦᱮᱞ
ᱛᱟᱦᱮᱸ ᱠᱚᱜ ᱵᱤᱱ ᱡᱟᱭ ᱡᱩᱜᱽ ᱡᱤᱣᱤᱫ ᱵᱷᱩᱨ ᱜᱮ ᱛᱚᱞ ᱛᱚᱯᱚᱞ ᱾
***
