ᱥᱩᱵᱷᱟᱥᱤᱥ ᱯᱟᱬᱤᱜᱽᱨᱟᱦᱤ (Subhashish Panigrahi) ᱫᱚ ᱢᱤᱫ ᱧᱩᱢ ᱩᱨᱩᱢ ᱳᱯᱮᱱ ᱠᱟᱞᱪᱚᱨ ᱠᱟᱹᱢᱤᱭᱟ, ᱰᱚᱠᱩᱢᱮᱱᱴᱟᱨᱤ ᱯᱷᱤᱞᱤᱢ ᱥᱟᱯᱲᱟᱣᱤᱭᱟ., ᱟᱨ ᱢᱤᱫ ᱠᱷᱚᱸᱫᱽᱨᱚᱸᱫᱤᱭᱟᱹ ᱠᱟᱱᱟᱭ ᱾
ᱠᱚᱧᱮ ᱮᱥᱤᱭᱟ (South Asia) ᱨᱮᱱᱟᱜ ᱯᱟᱹᱨᱥᱤ ᱠᱚ ᱡᱟᱦᱟᱸ ᱡᱟᱦᱟᱸ ᱠᱚᱫᱚ ᱢᱟᱞᱚᱴ ᱟᱫᱚᱜ ᱦᱚᱨ ᱰᱟᱦᱟᱨ ᱥᱮᱫ ᱢᱚᱦᱰᱟ ᱟᱠᱟᱱᱟ, ᱚᱱᱠᱟᱱ ᱯᱟᱹᱨᱥᱤ ᱠᱚ ᱪᱮᱫ ᱞᱮᱠᱟᱛᱮ ᱵᱟᱧᱪᱟᱣ ᱫᱚᱦᱚᱜᱼᱟ, ᱪᱮᱫ ᱞᱮᱠᱟᱛᱮ ᱱᱚᱶᱟ ᱯᱟᱹᱨᱥᱤ ᱠᱚ ᱰᱤᱡᱤᱴᱟᱞ ᱢᱮᱞᱟᱝᱠᱤ ᱨᱮ ᱦᱚᱠ ᱟᱹᱭᱫᱟᱹᱨ ᱮ ᱧᱟᱢᱟ, ᱟᱨ ᱳᱯᱮᱱ ᱤᱱᱴᱚᱨᱱᱮᱴ ᱢᱳᱢᱮᱴ (Open Internet Movement), ᱱᱚᱶᱟ ᱠᱚᱨᱮ ᱟᱡᱟᱜ ᱠᱟᱹᱢᱤ ᱠᱩᱨᱩᱢᱩᱴᱩ ᱟᱹᱰᱤ ᱞᱟᱯᱷᱟᱝ ᱜᱮᱭᱟ ᱾
ᱱᱚᱶᱟ ᱠᱚ ᱥᱟᱶ ᱥᱟᱶᱛᱮ ᱟᱨ ᱦᱚᱸ ᱛᱤᱱᱟᱹᱝ ᱜᱟᱱ ᱫᱟᱢᱟᱱ ᱟᱨ ᱞᱟᱯᱷᱟᱝ ᱟᱱ ᱠᱟᱹᱢᱤᱦᱚᱨᱟ ᱦᱩᱭᱩᱜ ᱠᱟᱱᱟ – “ᱢᱟᱨᱡᱤᱱᱟᱞᱟᱭᱤᱡᱽᱰ ᱟᱫᱷᱟᱨ” ᱒᱐᱒᱑, (Marginalized Adhaar) ᱡᱟᱦᱟᱸ ᱫᱚ ᱵᱚᱨᱞᱤᱱ ᱨᱮ “re:publica 2021” ᱨᱮ ᱯᱨᱤᱢᱤᱭᱚᱨ ᱮᱱ ᱥᱟᱶᱛᱮ ᱵᱽᱨᱤᱴᱮᱱ (Britain), ᱦᱟᱣᱟᱭᱤ (Hawai), ᱯᱮᱨᱤᱥ (Paris) ᱮᱢᱟᱱ ᱡᱟᱭᱜᱟ ᱨᱮ ᱟᱹᱰᱤ ᱜᱮ ᱪᱟᱨᱪᱟ ᱨᱮ ᱛᱟᱦᱮᱸ ᱟᱠᱟᱱᱟ ᱾
ᱱᱚᱝᱠᱟ ᱨᱮ ᱥᱩᱵᱷᱟᱥᱤᱥ ᱯᱟᱬᱤᱜᱽᱨᱟᱦᱤ ᱫᱚ ᱢᱟᱞᱚᱴᱚᱜ ᱠᱟᱱ ᱯᱟᱹᱨᱥᱤ ᱠᱚ ᱵᱟᱧᱪᱟᱣ ᱫᱚᱦᱚ ᱟᱨ ᱚᱱᱟ ᱨᱮᱱᱟᱜ ᱩᱯᱨᱩᱢ ᱫᱮᱥ ᱵᱤᱫᱮᱥ ᱨᱮ ᱪᱷᱟᱨᱟᱣ ᱯᱟᱥᱱᱟᱣ ᱫᱤᱥᱟᱹ ᱠᱟᱛᱮ ᱟᱹᱰᱤ ᱞᱮᱠᱟᱱ ᱯᱟᱹᱨᱥᱤ ᱪᱮᱛᱟᱱ ᱨᱮ ᱰᱚᱠᱩᱢᱮᱱᱴᱟᱨᱤ ᱯᱷᱤᱞᱤᱢ (Documentary Film) ᱠᱚᱭ ᱵᱮᱱᱟᱣ ᱟᱠᱟᱫᱼᱟ ᱾ ᱚᱱᱟ ᱠᱚ ᱢᱟᱹᱫᱽ ᱨᱮ ᱜᱽᱭᱟᱱᱤ ᱢᱟᱭᱤᱭᱟ (Gyani Maiya – 2019), ᱱᱟᱱᱤ ᱢᱟ (Nani Ma – 2022) ᱱᱚᱶᱟ ᱠᱤᱱ ᱫᱚ International Film & Entertainment Festival Australia (IFEFA) 2022 ᱯᱟᱦᱴᱟ ᱠᱷᱚᱱ ᱢᱟᱹᱱ ᱥᱟᱨᱦᱟᱣ ᱮ ᱟᱢᱮᱴ ᱟᱠᱟᱫᱼᱟ ᱾ ᱚᱱᱟ ᱥᱟᱶᱛᱮ ᱟᱭᱢᱟ International Film Festivals ᱠᱚᱨᱮ ᱦᱚᱸ Official Selection ᱮ ᱧᱟᱢ ᱟᱠᱟᱫᱼᱟ ᱾ ᱟᱨ ᱟᱡᱟᱜ ᱜᱚᱲᱚ ᱟᱨ ᱠᱩᱨᱩᱢᱩᱴᱩ ᱛᱮ ᱢᱟᱞᱚᱴ ᱟᱫᱚᱜ ᱞᱮᱠᱟᱱ ᱯᱟᱹᱨᱥᱤ ᱠᱚ ᱰᱤᱡᱤᱴᱟᱞ ᱫᱩᱱᱤᱭᱟᱹ ᱟᱨᱵᱟᱝ ᱤᱱᱴᱚᱨᱱᱮᱴ ᱠᱚᱨᱮ ᱴᱷᱟᱶ ᱟᱢᱮᱴ ᱚᱪᱚ ᱠᱟᱛᱮ ᱱᱟᱥᱮᱱᱟᱜ ᱩᱯᱨᱩᱢ ᱨᱮᱱᱟᱜ ᱥᱟᱦᱮᱫ, ᱥᱟᱦᱮᱫᱽ ᱞᱟᱹᱜᱤᱫ ᱫᱟᱣ ᱮ ᱮᱢ ᱚᱪᱚ ᱟᱠᱟᱫᱼᱟ ᱾
ᱥᱩᱵᱷᱟᱥᱤᱥ ᱯᱟᱬᱤᱜᱽᱨᱟᱦᱤ ᱫᱚ ᱥᱟᱱᱛᱟᱲᱤ ᱯᱟᱹᱨᱥᱤ ᱰᱤᱡᱤᱴᱟᱞ ᱯᱞᱟᱴᱯᱷᱚᱨᱢ ᱨᱮ ᱴᱷᱟᱶ ᱟᱢᱮᱴ ᱚᱪᱚᱭ ᱨᱮᱱᱟᱜ ᱦᱚᱸ ᱟᱡᱟᱜ ᱞᱟᱯᱷᱟᱝ ᱮᱱᱮᱢ ᱢᱮᱱᱟᱜᱼᱟ ᱾ ᱛᱤᱱᱟᱹᱜ ᱜᱟᱱ ᱠᱟᱹᱢᱤᱦᱚᱨᱟ ᱡᱮᱞᱮᱠᱟ –
᱑ᱹ Santali Keyboard Layout (Sarjom Baha)
᱒ᱹ Ol Chiki Font – Guru Gomke
᱓ᱹ Santali Wiki Workshop Organise ᱮᱢᱟᱱ ᱾
ᱱᱚᱝᱠᱟ ᱜᱮ ᱥᱩᱵᱷᱟᱥᱤᱥ ᱯᱟᱬᱤᱜᱽᱨᱟᱦᱤ ᱫᱚ ᱟᱹᱫᱤᱢ ᱯᱟᱹᱨᱥᱤ ᱠᱚ ᱢᱟᱹᱫᱽᱨᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱥᱟᱶᱛᱮ “ᱦᱳ ᱯᱟᱹᱨᱥᱤ” ᱵᱟᱧᱪᱟᱣ ᱟᱨ ᱡᱮᱜᱮᱛ ᱨᱮ ᱪᱷᱟᱨᱟᱣ ᱨᱮᱱᱟᱜ ᱠᱟᱹᱢᱤ ᱠᱩᱨᱩᱢᱩᱴᱩ ᱦᱚᱸ ᱛᱟᱭ ᱟᱹᱰᱤ ᱫᱟᱢᱟᱱ ᱟᱨ ᱞᱟᱯᱷᱟᱝ ᱜᱮᱭᱟ ᱾
ᱟᱹᱫᱤᱢ ᱡᱟᱹᱛᱤ ᱫᱚ ᱢᱤᱫ ᱟᱹᱰᱤ ᱜᱮ ᱢᱟᱨᱮ ᱡᱟᱹᱛᱤ ᱠᱟᱱᱟ ᱵᱚ ᱾ ᱤᱠᱷᱟᱹᱱ ᱱᱚᱶᱟ ᱫᱷᱟᱹᱨᱛᱤ ᱯᱩᱨᱤ ᱨᱮ ᱥᱮ ᱡᱮᱜᱮᱛ ᱡᱟᱠᱟᱛ ᱨᱮ ᱟᱯᱱᱟᱨᱟᱜ ᱠᱷᱟᱺᱴᱤ ᱩᱯᱨᱩᱢ ᱥᱟᱶᱛᱮ ᱵᱟᱧᱪᱟᱣ ᱛᱟᱦᱮᱸᱱ ᱞᱟᱹᱜᱤᱫ ᱛᱮᱫᱚ ᱟᱯᱱᱟᱨᱟᱜ ᱥᱟᱶᱛᱟ ᱛᱟᱞᱟ ᱥᱩᱢᱩᱝ ᱨᱮ ᱩᱯᱨᱩᱢ ᱥᱩᱢᱩᱝ ᱛᱮᱫᱚ ᱵᱟᱝ ᱯᱩᱨᱩᱱᱚᱜ ᱠᱟᱱᱟ ᱾ ᱡᱮᱜᱮᱛ ᱨᱮ ᱢᱟᱱᱚᱛ ᱩᱯᱨᱩᱢ ᱥᱟᱶᱛᱮ ᱵᱟᱧᱪᱟᱣ ᱛᱟᱦᱮᱸᱱ ᱞᱟᱹᱜᱤᱫ ᱛᱮᱫᱚ ᱟᱯᱱᱟᱨᱟᱜ ᱩᱯᱨᱩᱢ ᱪᱷᱟᱨᱟᱣ ᱯᱟᱥᱱᱟᱣ ᱟᱹᱰᱤ ᱜᱮ ᱞᱟᱹᱠᱛᱤ ᱢᱮᱱᱟᱜᱼᱟ ᱾
ᱟᱢ ᱫᱚᱢ ᱚᱠᱚᱭ ᱠᱟᱱᱟ ?
ᱟᱢᱟᱜ ᱥᱟᱶᱛᱟ ᱫᱚ ᱚᱠᱟ ᱞᱮᱠᱟᱱᱟ ?
ᱟᱨ ᱟᱢᱟᱜ ᱞᱟᱹᱭ ᱞᱟᱠᱪᱟᱨ ᱟᱹᱨᱤᱪᱟᱹᱞᱤ ᱫᱚ ᱪᱮᱫ ᱠᱟᱱᱟ ?
ᱱᱚᱶᱟ ᱡᱤᱱᱤᱥ ᱠᱚ ᱫᱤᱥᱚᱢ ᱟᱨ ᱡᱮᱜᱮᱛ ᱨᱮ ᱚᱞ ᱛᱮ, ᱨᱚᱲ ᱛᱮ ᱟᱨ ᱠᱟᱹᱢᱤ ᱠᱟᱛᱮ ᱩᱫᱩᱜ ᱥᱚᱫᱚᱨ ᱦᱩᱭᱩᱜᱼᱟ ᱾ ᱮᱱ ᱮᱱᱟᱝ ᱮᱴᱟᱜ ᱦᱚᱲ ᱫᱚ ᱟᱢᱟᱜ ᱥᱟᱹᱨᱤ ᱩᱯᱨᱩᱢ ᱮ ᱩᱨᱩᱢ ᱧᱟᱢᱟ ᱾
ᱱᱚᱶᱟ ᱠᱚ ᱞᱮᱠᱟ ᱜᱮ ᱢᱟᱱᱚᱛᱟᱱ ᱥᱩᱵᱷᱟᱥᱤᱥ ᱯᱟᱬᱤᱜᱽᱨᱟᱦᱤ ᱦᱚᱸ ᱟᱡᱟᱜ ᱠᱩᱨᱩᱢᱩᱴᱩ ᱛᱮ ‘ᱦᱳ ᱥᱟᱶᱛᱟ’ ᱟᱨᱵᱟᱝ ‘ᱦᱳ ᱯᱟᱹᱨᱥᱤ’ ᱨᱮᱱᱟᱜ “ᱢᱟᱜᱮ ᱯᱚᱨᱚᱵᱽ” ᱧᱩᱛᱩᱢᱟᱱ ᱢᱤᱫ ᱠᱷᱟᱴᱚ ᱯᱷᱤᱞᱤᱢ ᱮ ᱥᱟᱯᱲᱟᱣ ᱟᱠᱟᱫᱼᱟ ᱾ ᱡᱟᱦᱟᱸ ᱦᱚᱛᱮᱛᱮ ᱱᱚᱶᱟ ᱥᱟᱶᱛᱟ ᱨᱮᱱᱟᱜ, ᱡᱟᱹᱛᱤ ᱨᱮᱱᱟᱜ ᱟᱨ ᱯᱟᱹᱨᱥᱤ ᱨᱮᱱᱟᱜ ᱢᱤᱫ ᱥᱚᱨᱮᱥ ᱩᱯᱨᱩᱢ ᱮ ᱩᱫᱩᱜ ᱥᱚᱫᱚᱨ ᱟᱠᱟᱫᱼᱟ ᱾ ᱡᱟᱦᱟᱸ ᱫᱚ ᱟᱹᱰᱤ ᱜᱮ ᱥᱚᱨᱮᱥ ᱟᱠᱟᱱᱟ ᱾ ᱚᱱᱟ ᱠᱚ ᱨᱮᱱᱟᱜ ᱜᱮ ᱛᱤᱱᱟᱹᱝ ᱜᱟᱱ ᱪᱤᱛᱟᱹᱨ ᱞᱟᱛᱟᱨ ᱨᱮᱵᱚ ᱧᱮᱞ ᱫᱟᱲᱮᱭᱟᱜᱼᱟ ᱾
ᱱᱚᱶᱟ ᱠᱚ ᱪᱤᱛᱟᱹᱨ ᱥᱟᱶ ᱡᱩᱲᱟᱹᱭ ᱟᱠᱟᱱ ᱦᱳ ᱥᱟᱶᱛᱟ ᱨᱮᱱᱟᱜ ᱯᱟᱨᱟᱵᱽ ᱯᱩᱱᱟᱹᱭ ᱤᱫᱤ ᱠᱟᱛᱮ ᱢᱮᱱᱟᱜ ᱵᱷᱤᱰᱤᱭᱳ ᱫᱚ YouTube ᱨᱮ O Foundation, Mage Porob ᱚᱞ ᱠᱟᱛᱮ ᱵᱚ ᱯᱟᱸᱡᱟ ᱫᱟᱲᱮᱭᱟᱜᱼᱟ ᱾
***
