ᱡᱟᱦᱟᱸ ᱛᱤᱱᱟᱹᱜ ᱞᱟᱹᱠᱛᱤ !!!

ᱡᱟᱦᱟᱸᱱᱟᱜ ᱜᱮ ᱡᱟᱦᱟᱸ ᱛᱤᱱᱟᱹᱜ ᱞᱟᱹᱠᱛᱤᱭᱟ, ᱤᱱᱟᱹᱜ ᱜᱮ ᱠᱟᱹᱢᱤ ᱨᱮ ᱡᱩᱛ ᱥᱮ ᱥᱚᱵᱷᱟ ᱟᱹᱭᱠᱟᱹᱣᱜᱼᱟ ᱾ ᱞᱟᱹᱠᱛᱤ ᱠᱷᱚᱱ ᱵᱟᱹᱲᱛᱤ ᱠᱟᱹᱢᱤ ᱞᱮᱠᱷᱟᱱ ᱚᱠᱟ ᱦᱚᱸ ᱡᱩᱛ ᱥᱮ ᱥᱚᱵᱷᱟ ᱫᱚ ᱵᱟᱝ ᱟᱹᱭᱠᱟᱹᱣᱜᱼᱟ ᱾

ᱞᱟᱹᱠᱛᱤ ᱠᱷᱚᱱ ᱵᱟᱹᱲᱛᱤ ᱨᱚᱲ ᱞᱮᱠᱷᱟᱱ, ᱩᱱᱤ ᱦᱚᱲᱟᱜ ᱜᱩᱱ ᱦᱮᱱᱚᱛᱚᱜᱼᱟ ᱟᱨ ᱟᱡ ᱥᱟᱶ ᱢᱮᱱᱟᱜ ᱥᱟᱹᱜᱟᱹᱭ ᱥᱟᱦᱟᱜᱼᱟ ᱾ ᱢᱤᱫ ᱦᱚᱲᱟᱜ ᱨᱚᱲ ᱟᱲᱟᱝ ᱛᱮ ᱢᱤᱫ ᱦᱚᱲ ᱩᱫᱽᱜᱟᱹᱣ ᱧᱟᱢ ᱠᱟᱛᱮ ᱢᱟᱨᱟᱝ ᱠᱷᱚᱱ ᱢᱟᱨᱟᱝ ᱦᱚᱲ ᱮ ᱵᱮᱱᱟᱣ ᱫᱟᱲᱮᱭᱟᱜᱼᱟ ᱾ ᱟᱨᱵᱟᱝ ᱠᱷᱟᱱ ᱵᱟᱝ ᱜᱟᱱ ᱟᱠᱟᱫ ᱨᱚᱲ ᱛᱮᱫᱚ ᱢᱤᱫ ᱦᱚᱲ ᱨᱟᱹᱯᱩᱫ ᱦᱚᱸᱭ ᱨᱟᱹᱯᱩᱫ ᱫᱟᱲᱮᱭᱟᱜᱼᱟ ᱾

ᱞᱟᱹᱠᱛᱤ ᱠᱷᱚᱱ ᱵᱟᱹᱲᱛᱤ ᱡᱚᱢ ᱦᱚᱸ ᱵᱟᱝ ᱵᱩᱜᱤᱭᱟ ᱾ ᱡᱟᱦᱟᱸ ᱛᱤᱱᱟᱹᱜ ᱛᱮ ᱞᱟᱡ ᱵᱤ ᱟᱹᱭᱠᱟᱹᱣᱜᱼᱟ, ᱢᱚᱱᱮ ᱠᱩᱥᱤ ᱵᱩᱡᱷᱟᱹᱣᱜᱼᱟ, ᱤᱱᱟᱹᱜ ᱜᱮ ᱡᱚᱢ ᱞᱮᱠᱷᱟᱱ ᱡᱚᱢ ᱨᱮᱱᱟᱜ ᱥᱤᱵᱤᱞ ᱟᱨ ᱠᱩᱥᱤ ᱵᱩᱡᱷᱟᱹᱣᱜᱼᱟ ᱾

ᱱᱚᱝᱠᱟ ᱜᱮ ᱥᱟᱱᱟᱢᱟᱜ ᱠᱟᱹᱢᱤᱦᱚᱨᱟ ᱨᱮᱜᱮ, ᱡᱮᱞᱮᱠᱟ ᱼ

ᱦᱟᱺᱰᱤ ᱫᱚ ᱟᱵᱚᱣᱟᱜ ᱵᱚᱸᱜᱟ ᱵᱳᱨᱳ ᱴᱷᱮᱱ ᱢᱟᱝ ᱨᱮᱱᱟᱜ, ᱥᱟᱢᱟᱝ ᱨᱮᱱᱟᱜ ᱢᱤᱫ ᱫᱷᱚᱨᱚᱢ ᱡᱟᱭ ᱠᱟᱱᱟ ᱾ ᱱᱚᱶᱟ ᱨᱮᱱᱟᱜ ᱵᱮᱵᱷᱟᱨ ᱡᱩᱫᱤ ᱟᱵᱚ ᱵᱚ ᱜᱟᱱᱟ, ᱮᱱᱠᱷᱟᱱ ᱟᱹᱰᱤ ᱜᱮ ᱥᱚᱨᱮᱥ ᱜᱮᱭᱟ ᱾ ᱡᱟᱦᱟᱸ ᱞᱮᱠᱟ ᱚᱞ ᱜᱩᱨᱩ ᱯᱚᱸᱰᱮᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ, ᱞᱟᱠᱪᱟᱨ ᱥᱮᱨᱮᱧ ᱯᱩᱛᱷᱤ ᱨᱮᱭ ᱚᱞ ᱚᱴᱚ ᱟᱠᱟᱫᱼᱟ –

ᱫᱷᱚᱨᱚᱢ ᱨᱮᱭᱟᱜ ᱦᱟᱺᱰᱤ
ᱧᱩ ᱫᱚᱵᱚ ᱧᱩᱭ ᱜᱮ
ᱟᱹᱛᱷᱟᱹᱣᱲᱤ ᱧᱩ ᱫᱚ ᱢᱮᱱᱠᱷᱟᱱ
ᱵᱟᱝ ᱜᱮ ᱵᱩᱜᱤᱭᱟ,
ᱡᱤᱣᱤ ᱨᱮ ᱦᱚᱲᱢᱚ ᱨᱮ
ᱵᱤᱥ ᱞᱮᱠᱟᱭ ᱠᱟᱹᱢᱤ
ᱡᱚᱠᱷᱟ ᱡᱟᱹᱱᱤ ᱨᱟᱱ ᱞᱮᱠᱟ
ᱧᱩ ᱜᱮ ᱵᱩᱜᱤᱭᱟ ᱾

ᱟᱨ ᱦᱚᱸ ᱢᱤᱫ ᱠᱟᱛᱷᱟ ᱢᱮᱱᱟᱜᱼᱟ, ᱦᱟᱺᱰᱤ ᱫᱚ ᱯᱟᱨᱟᱵᱽ ᱯᱩᱱᱟᱹᱭ ᱨᱮᱜᱮ ᱵᱟᱨ ᱠᱟᱴᱷᱟ ᱜᱟᱱ ᱪᱟᱣᱞᱮ ᱨᱮᱱᱟᱜ ᱵᱚ ᱫᱚᱦᱚᱭᱟ, ᱵᱚᱸᱜᱟ ᱵᱳᱨᱳ ᱠᱟᱛᱮ ᱵᱚᱸᱜᱟ ᱥᱟᱨᱮᱡ ᱯᱷᱩᱲᱩᱜ ᱯᱟᱹᱴᱤ ᱟᱠᱟᱱ ᱪᱟᱨᱮᱡ ᱠᱷᱚᱱ ᱞᱟᱛᱟᱨ ᱛᱮ ᱡᱟᱦᱟᱸ ᱜᱮ ᱦᱟᱺᱰᱤ ᱥᱟᱦᱟᱵᱼᱟ, ᱤᱱᱟᱹᱜ ᱠᱟᱛᱮ ᱜᱮ ᱧᱩ ᱦᱟᱹᱴᱤᱧ ᱠᱟᱛᱮ ᱤᱱᱟᱹᱜ ᱨᱮᱜᱮ ᱦᱟᱺᱰᱤ ᱧᱩ ᱫᱚ ᱛᱷᱩᱠᱟᱹᱢ ᱞᱟᱹᱠᱛᱤ ᱾ ᱚᱱᱟ ᱠᱷᱚᱱ ᱵᱟᱹᱲᱛᱤ ᱧᱩ ᱞᱮᱠᱷᱟᱱ ᱵᱩᱵᱩᱞᱟ ᱟᱨ ᱢᱟᱹᱱᱢᱤᱭᱟᱜ ᱫᱤᱥᱟᱹ ᱟᱫᱚᱜᱼᱟ ᱾ ᱵᱟᱹᱲᱤᱡ ᱠᱟᱹᱢᱤ ᱥᱤᱨᱡᱟᱹᱣᱜᱼᱟ ᱟᱨ ᱱᱮᱭᱟᱣ ᱠᱷᱟᱹᱯᱟᱹᱨᱤᱭᱟᱹᱣ ᱥᱟᱦᱟᱨᱚᱜᱼᱟ ᱾ ᱚᱱᱟᱛᱮ ᱡᱟᱦᱟᱸ ᱛᱤᱱᱟᱹᱝ ᱜᱮ ᱫᱷᱚᱨᱚᱢ ᱨᱮᱭᱟᱜ ᱦᱩᱭ ᱠᱚᱜ, ᱵᱮᱵᱷᱟᱨ ᱵᱟᱝ ᱜᱟᱱ ᱴᱷᱮᱱ ᱫᱚ ᱚᱱᱟ ᱦᱚᱸ ᱵᱟᱹᱲᱤᱡᱚᱜ ᱜᱮᱭᱟ ᱾

ᱡᱟᱦᱟᱸ ᱠᱷᱟᱹᱛᱤᱨ ᱱᱤᱛᱚᱜ ᱟᱵᱚ, ᱟᱵᱚᱣᱟᱜ ᱥᱟᱶᱛᱟ ᱨᱮᱠᱚ ᱧᱮᱞᱮᱫᱼᱟ, ᱦᱟᱺᱰᱤ ᱵᱮᱵᱷᱟᱨ ᱨᱮ ᱟᱹᱰᱤᱜᱟᱱ ᱵᱤᱵᱟᱹᱫᱽ ᱧᱮᱞᱚᱜᱼᱟ ᱾ ᱟᱵᱚ ᱥᱟᱶᱛᱟ ᱨᱤᱱ ᱦᱚᱲ, ᱟᱫᱷᱟᱱ ᱫᱚᱠᱚ ᱢᱮᱱᱟ – ᱦᱟᱺᱰᱤ ᱵᱮᱵᱷᱟᱨ ᱵᱚ ᱵᱟᱹᱜᱤ ᱩᱛᱟᱹᱨᱟ ᱾ ᱦᱟᱺᱰᱤ ᱜᱮ ᱟᱵᱚᱣᱟᱜ ᱩᱛᱱᱟᱹᱣ ᱦᱚᱨ ᱨᱮ ᱡᱟᱸᱜᱮ ᱫᱚ ᱾ ᱟᱨ ᱦᱚᱸ ᱟᱫᱷᱟᱱ ᱦᱚᱲ ᱫᱚᱠᱚ ᱢᱮᱱ ᱛᱟᱵᱚᱱᱟ, ᱦᱟᱺᱰᱤ ᱫᱚ ᱫᱷᱚᱨᱚᱢ ᱨᱮᱱᱟᱜ ᱡᱟᱭ ᱠᱟᱱ ᱛᱟᱵᱚᱱᱟ, ᱚᱱᱟ ᱵᱮᱵᱷᱟᱨ ᱵᱚ ᱵᱟᱹᱜᱤ ᱞᱮᱠᱷᱟᱱ ᱟᱵᱚ ᱜᱮᱵᱚ ᱢᱩᱪᱟᱹᱫ ᱩᱛᱟᱹᱨᱚᱜᱼᱟ ᱾ ᱱᱚᱝᱠᱟᱱ ᱵᱮᱲᱟ ᱨᱮᱫᱚ ᱱᱚᱶᱟ ᱢᱮᱱ ᱜᱮ ᱵᱩᱜᱤᱭᱟ, ᱢᱩᱪᱟᱫ ᱦᱚᱸ ᱪᱮᱫᱟᱜ ᱮᱢ ᱢᱩᱪᱟᱹᱫ ᱩᱛᱟᱹᱨᱟ ᱥᱮ ᱞᱟᱹᱠᱛᱤ ᱠᱷᱚᱱ ᱵᱟᱹᱲᱛᱤ ᱦᱚᱸ ᱪᱮᱫᱟᱜ ᱮᱢ ᱵᱮᱵᱷᱟᱨᱟ ᱾ ᱯᱟᱨᱟᱵᱽ ᱯᱩᱱᱟᱹᱭ ᱨᱮ ᱵᱚᱸᱜᱟ ᱥᱩᱢᱩᱝ ᱞᱟᱹᱜᱤᱫ ᱫᱚᱦᱚᱭ ᱢᱟ, ᱵᱚᱸᱜᱟ ᱵᱳᱨᱳ ᱴᱷᱮᱱ ᱪᱚᱰᱚᱨ ᱠᱟᱛᱮ ᱵᱚᱸᱜᱟ ᱥᱟᱨᱮᱡ ᱚᱲᱟᱜ ᱦᱚᱲ ᱨᱟᱱ ᱞᱮᱠᱟ ᱧᱩ ᱦᱟᱹᱴᱤᱧ ᱠᱟᱛᱮ ᱟᱨ ᱮᱴᱟᱜ ᱫᱤᱱ ᱫᱚ ᱵᱟᱝ ᱫᱚᱦᱚ ᱞᱮᱠᱷᱟᱱ ᱜᱮ ᱦᱩᱭ ᱮᱱᱟ ᱾ ᱱᱚᱝᱠᱟ ᱛᱮ ᱫᱷᱚᱨᱚᱢ ᱨᱮᱱᱟᱜ ᱡᱟᱭ ᱦᱚᱸ ᱵᱟᱧᱪᱟᱣ ᱛᱟᱦᱮᱸᱱᱟ ᱟᱨ ᱱᱚᱶᱟ ᱛᱮ ᱥᱟᱶᱛᱟ ᱦᱚᱸ ᱵᱟᱝ ᱰᱟᱢᱟᱰᱩᱞᱚᱜᱼᱟ ᱾

ᱟᱵᱚ ᱥᱟᱶᱛᱟ ᱨᱮᱱᱟᱜ ᱮᱱᱮᱡ ᱾ ᱮᱱᱮᱡ ᱦᱚᱸ ᱢᱤᱫ ᱵᱚᱸᱜᱟ ᱵᱳᱨᱳ ᱠᱚᱣᱟᱜ ᱠᱟᱹᱢᱤᱦᱚᱨᱟ ᱜᱮ ᱠᱟᱱᱟ ᱾ ᱥᱤᱸᱜᱟᱹᱲ ᱞᱟᱜᱽᱬᱮ ᱮᱱᱮᱡ ᱞᱮᱠᱷᱟᱱ ᱥᱮᱨᱢᱟ ᱫᱟᱜ ᱮ ᱡᱟᱹᱲᱤᱭᱟᱹ ᱱᱚᱶᱟ ᱫᱚ ᱟᱹᱰᱤ ᱜᱮ ᱥᱟᱹᱨᱤᱭᱟ ᱢᱮᱱᱛᱮ ᱟᱹᱰᱤ ᱯᱟᱹᱦᱤᱞ ᱠᱷᱚᱱ ᱯᱟᱹᱛᱭᱟᱹᱣ ᱢᱮᱱᱟᱜ ᱛᱟᱵᱚᱱᱟ ᱾ ᱚᱱᱠᱟ ᱜᱮ ᱟᱵᱚ ᱫᱚ ᱵᱚᱸᱜᱟ ᱵᱳᱨᱳ ᱥᱟᱶ ᱜᱟᱹᱦᱤᱸᱨ ᱥᱟᱹᱜᱟᱹᱭ ᱵᱚ ᱯᱟᱹᱛᱭᱟᱹᱣ ᱠᱷᱟᱹᱛᱤᱨ ᱟᱹᱰᱤᱜᱟᱱ ᱥᱟᱶᱛᱟᱨᱤ ᱠᱟᱹᱢᱤᱦᱚᱨᱟ ᱨᱮ ᱮᱱᱮᱡ ᱥᱮᱨᱮᱧ ᱨᱮᱱᱟᱜ ᱨᱤᱛ ᱵᱤᱦᱤᱛ ᱢᱮᱱᱟᱜ ᱛᱟᱵᱚᱱᱟ ᱾ ᱪᱷᱟᱹᱴᱭᱟᱹᱨ ᱨᱮ, ᱵᱟᱯᱞᱟ ᱨᱮ, ᱵᱷᱟᱸᱰᱟᱱ ᱨᱮᱵᱚ ᱮᱱᱮᱡ ᱥᱮᱨᱮᱧᱟ ᱾ ᱚᱱᱠᱟ ᱜᱮ ᱟᱹᱰᱤᱜᱟᱱ ᱯᱟᱨᱟᱵᱽ ᱯᱩᱱᱟᱹᱭ ᱨᱮ, ᱡᱮᱞᱮᱠᱟ – ᱵᱟᱦᱟ ᱵᱚᱸᱜᱟ, ᱢᱟᱜᱢᱚᱬᱮ, ᱫᱟᱥᱟᱸᱭ, ᱥᱚᱦᱨᱟᱭ, ᱥᱟᱠᱨᱟᱛ, ᱜᱚᱢᱦᱟ ᱮᱢᱟᱱ ᱠᱚᱨᱮ ᱮᱱᱮᱡ ᱥᱟᱸᱜᱮ ᱨᱮᱱᱟᱜ ᱨᱟᱭ ᱢᱮᱱᱟᱜ ᱛᱟᱵᱚᱱᱟ ᱾ ᱱᱤᱱᱟᱹᱜ ᱫᱷᱟᱹᱵᱤᱡ ᱫᱚ ᱞᱟᱠᱪᱟᱨ ᱟᱨ ᱞᱟᱹᱠᱛᱤ ᱨᱮᱱᱟᱜ ᱠᱟᱱᱟ ᱾ ᱤᱠᱷᱟᱹᱱ ᱞᱟᱹᱠᱛᱤ ᱠᱷᱚᱱ ᱵᱟᱹᱲᱛᱤ ᱨᱟᱹᱥᱠᱟᱹ ᱥᱚᱫᱚᱨ ᱠᱟᱛᱮ ᱵᱟᱝ ᱜᱟᱱᱚᱜ ᱴᱷᱟᱶ ᱠᱚᱨᱮ ᱦᱚᱸ ᱡᱩᱫᱤ ᱮᱱᱮᱡ ᱥᱮᱨᱮᱧ ᱧᱮᱞᱚᱜᱼᱟ ᱮᱱᱠᱷᱟᱱ ᱫᱚ ᱥᱟᱶᱛᱟ ᱵᱚᱭᱟᱱᱚᱜᱼᱟ ᱟᱨ ᱞᱟᱠᱪᱟᱨ ᱵᱟᱝ ᱥᱚᱵᱷᱟ ᱟᱹᱭᱠᱟᱹᱣᱜᱼᱟ ᱾

ᱟᱵᱚ ᱥᱟᱶᱛᱟ ᱨᱮ ᱮᱱᱮᱡ ᱥᱮᱨᱮᱧ ᱨᱮᱱᱟᱜ ᱨᱤᱛ ᱢᱮᱱᱟᱜᱼᱟ ᱢᱮᱱᱛᱮ, ᱟᱹᱛᱷᱟᱹᱣᱲᱤ ᱮᱱᱮᱡ ᱥᱮᱨᱮᱧ ᱫᱚ ᱵᱟᱝ ᱜᱮ ᱵᱩᱜᱤᱭᱟ ᱾ ᱡᱚᱛᱚ ᱠᱟᱹᱢᱤᱦᱚᱨᱟ ᱥᱚᱫᱚᱨ ᱥᱟᱢᱟᱝ ᱞᱟᱹᱜᱤᱫ ᱜᱮ ᱚᱠᱛᱚ ᱟᱨ ᱴᱷᱟᱶ ᱨᱮᱱᱟᱜ ᱴᱷᱟᱹᱣᱠᱟᱹ ᱛᱟᱦᱮᱸᱱ ᱫᱚ ᱟᱹᱰᱤ ᱜᱮ ᱞᱟᱹᱠᱛᱤ ᱢᱮᱱᱟᱜ ᱾ ᱡᱟᱦᱟᱸ ᱛᱤᱱᱟᱹᱝ ᱥᱚᱱᱚᱛ ᱟᱨ ᱥᱚᱨᱮᱥ ᱠᱟᱹᱢᱤᱦᱚᱨᱟ ᱜᱮ ᱦᱩᱭ ᱠᱚᱜ, ᱚᱱᱟ ᱥᱚᱫᱚᱨ ᱞᱟᱹᱜᱤᱫ ᱚᱠᱛᱚ ᱟᱨ ᱴᱷᱟᱶ ᱦᱩᱲᱟᱹᱜ ᱮᱱᱠᱷᱟᱱ ᱜᱮ ᱥᱟᱱᱟᱢᱟᱜ ᱦᱩᱲᱟᱹᱜ ᱟᱹᱭᱠᱟᱹᱣᱜᱼᱟ ᱾ ᱡᱟᱦᱟᱸ ᱠᱷᱟᱹᱛᱤᱨ ᱟᱵᱚ ᱥᱟᱶᱛᱟ ᱨᱮ ᱱᱤᱛᱚᱜ ᱧᱮᱞᱚᱜ ᱠᱟᱱᱟ, ᱮᱱᱮᱡ ᱥᱮᱨᱮᱧ ᱞᱟᱹᱜᱤᱫ ᱦᱚᱸ ᱢᱤᱫ ᱞᱮᱠᱟᱱ ᱵᱤᱵᱟᱹᱫᱽ ᱥᱤᱨᱡᱟᱹᱣ ᱟᱠᱟᱱᱟ ᱾

ᱟᱵᱚ ᱨᱤᱱ ᱛᱤᱱᱟᱹᱝ ᱜᱟᱱ ᱜᱟᱹᱠᱷᱩᱲ ᱜᱚᱢᱠᱮ ᱠᱚᱠᱚ ᱢᱮᱱᱟ, ᱮᱱᱮᱡ ᱥᱮᱨᱮᱧ ᱫᱚ ᱵᱟᱹᱜᱤ ᱢᱟ ᱾ ᱱᱚᱝᱠᱟ ᱢᱮᱱ ᱨᱮᱱᱟᱜ ᱢᱮᱱᱮᱛ ᱱᱚᱶᱟ ᱫᱚ ᱵᱟᱝ ᱠᱟᱱᱟ ᱡᱮ, ᱥᱟᱶᱛᱟ ᱨᱮᱱᱟᱜ ᱥᱟᱱᱟᱢ ᱞᱮᱠᱟᱱ ᱮᱱᱮᱡ ᱥᱮᱨᱮᱧ ᱵᱚ ᱵᱟᱹᱜᱤᱭᱟ ᱾ ᱱᱚᱝᱠᱟ ᱢᱮᱱ ᱨᱮᱱᱟᱜ ᱢᱮᱱᱮᱛ ᱫᱚ ᱱᱚᱶᱟ ᱠᱟᱱᱟ – ᱡᱟᱦᱟᱸ ᱮᱱᱮᱡ ᱛᱮ ᱥᱟᱶᱛᱟ ᱰᱟᱢᱟᱰᱩᱞᱚᱜ ᱠᱟᱱᱟ, ᱡᱮᱞᱮᱠᱟ, ᱞᱟᱹᱠᱛᱤ ᱠᱷᱚᱱ ᱵᱟᱹᱲᱛᱤ ᱡᱟᱛᱨᱟ ᱯᱟᱛᱟ ᱨᱮ ᱮᱱᱮᱡ, ᱨᱟᱡᱽᱟᱹᱨᱤ ᱯᱮᱲᱟ ᱫᱟᱨᱟᱢ ᱦᱚᱨ ᱰᱟᱦᱟᱨ ᱨᱮ ᱮᱱᱮᱡ, ᱩᱥᱟᱹᱫ ᱵᱮᱲᱟᱨᱮ ᱨᱮᱦᱬᱟ ᱵᱮᱲᱟᱨᱮ ᱮᱱᱮᱡ ᱥᱮᱨᱮᱧ, ᱨᱟᱹᱥᱠᱟᱹ ᱡᱟᱞᱟᱛᱮ ᱨᱮᱞ ᱞᱟᱹᱭᱤᱱ, ᱩᱰᱟᱹᱱ ᱟᱰᱟ ᱨᱮ ᱮᱱᱮᱡ, ᱮᱴᱟᱜ ᱦᱚᱲ ᱞᱟᱹᱜᱤᱫ ᱮᱨᱟ, ᱦᱚᱯᱚᱱ ᱮᱨᱟ ᱠᱟᱹᱣᱰᱤ ᱛᱮ ᱟᱹᱠᱷᱨᱤᱧ ᱠᱟᱛᱮ ᱯᱚᱱᱚᱛ ᱯᱟᱨᱚᱢ ᱯᱚᱱᱚᱛ ᱵᱷᱟᱲᱟ ᱤᱫᱤ ᱠᱟᱛᱮ ᱮᱱᱮᱡ ᱚᱪᱚ ᱾ ᱱᱚᱶᱟ ᱠᱚᱫᱚ ᱥᱟᱶᱛᱟ ᱨᱮᱭᱟᱜ ᱨᱟᱭᱨᱤᱛ ᱮᱱᱮᱡ ᱥᱮᱨᱮᱧ ᱫᱚ ᱵᱟᱝ ᱠᱟᱱᱟ ᱾ ᱱᱚᱝᱠᱟ ᱮᱱᱮᱡ ᱥᱮᱨᱮᱧ ᱞᱮᱠᱷᱟᱱ ᱵᱟᱹᱭᱨᱤ ᱴᱷᱮᱱᱮᱢ ᱯᱚᱥᱲᱟ ᱢᱟᱜᱟᱞ ᱚᱪᱚᱜᱼᱟ, ᱥᱮᱪᱮᱫ ᱟᱨ ᱩᱛᱱᱟᱹᱣ ᱠᱷᱚᱱᱮᱢ ᱥᱟᱦᱟ ᱥᱟᱺᱜᱤᱧᱚᱜᱼᱟ ᱾ ᱵᱟᱹᱭᱨᱤ ᱴᱷᱮᱱ ᱵᱟᱝ ᱯᱚᱥᱲᱟ ᱚᱪᱚᱜ ᱮᱢ ᱠᱷᱚᱡᱽ ᱠᱟᱱ ᱠᱷᱟᱱ, ᱡᱟᱦᱟᱸ ᱵᱟᱢ ᱠᱟᱹᱢᱤ ᱨᱮᱦᱚᱸᱢ ᱡᱤᱣᱤᱫᱚᱜ ᱜᱮᱭᱟ, ᱚᱱᱠᱟᱱᱟᱜ ᱫᱚ ᱵᱟᱝ ᱠᱟᱹᱢᱤ ᱜᱮ ᱟᱹᱠᱤᱞᱢᱟᱱ ᱫᱚ ᱾ ᱚᱱᱟᱛᱮ ᱛᱤᱱᱟᱹᱝ ᱜᱟᱱ ᱦᱚᱲ ᱫᱚ ᱱᱚᱝᱠᱟᱱ ᱮᱱᱮᱡ ᱥᱮᱨᱮᱧ ᱜᱮ ᱵᱟᱝ ᱛᱚᱨᱟᱣ ᱞᱟᱹᱜᱤᱫ ᱠᱚ ᱢᱟᱱᱟᱭᱟ ᱾

ᱚᱱᱠᱟ ᱜᱮ ᱟᱨ ᱦᱚᱸ ᱛᱤᱱᱟᱹᱝ ᱜᱟᱱ ᱜᱟᱹᱠᱷᱩᱲ ᱜᱚᱢᱠᱮ ᱠᱚᱫᱚ ᱠᱚ ᱢᱮᱱᱟ – “ᱮᱱᱮᱡ ᱫᱚ ᱟᱞᱚ ᱯᱮ ᱵᱟᱹᱜᱤᱭᱟ ᱾” ᱱᱚᱝᱠᱟ ᱢᱮᱱ ᱨᱮᱱᱟᱜ ᱢᱮᱱᱮᱛ ᱫᱚ ᱱᱚᱶᱟ ᱠᱟᱱᱟ, ᱥᱟᱶᱛᱟ ᱨᱮ ᱡᱟᱦᱟᱸ ᱮᱱᱮᱡ ᱥᱮᱨᱮᱧ ᱟᱹᱨᱤᱪᱟᱹᱞᱤ ᱞᱮᱠᱟᱛᱮ ᱦᱮᱡ ᱟᱹᱜᱩ ᱟᱠᱟᱱᱟ, ᱡᱮᱞᱮᱠᱟ – ᱵᱟᱦᱟ, ᱢᱟᱜᱢᱚᱬᱮ ᱨᱮᱱᱟᱜ ᱵᱚᱸᱜᱟ ᱮᱱᱮᱡ ᱥᱮᱨᱮᱧ, ᱵᱟᱯᱞᱟ ᱨᱮ ᱮᱱᱮᱡ ᱥᱮᱨᱮᱧ, ᱫᱟᱥᱟᱸᱭ, ᱥᱚᱦᱨᱟᱭ ᱨᱮ ᱮᱱᱮᱡ ᱥᱮᱨᱮᱧ, ᱱᱚᱶᱟ ᱠᱚᱨᱮ ᱦᱚᱸ ᱱᱟᱦᱟᱜ ᱫᱚ ᱩᱱᱟᱹᱜ ᱮᱱᱮᱡ ᱥᱮᱨᱮᱧ ᱵᱟᱝ ᱧᱮᱞᱚᱜ ᱠᱟᱱᱟ ᱾ ᱵᱚᱨᱚᱢ ᱢᱤᱼᱢᱤᱫ ᱴᱷᱟᱶ ᱨᱮᱫᱚ ᱰᱤᱡᱮ ᱰᱤᱥᱠᱚ ᱠᱟᱛᱮ ᱠᱚ ᱮᱱᱮᱡ ᱥᱮᱨᱮᱧ ᱠᱟᱱᱟ ᱾ ᱱᱚᱝᱠᱟᱱ ᱵᱮᱲᱟ ᱨᱮᱜᱮ ᱟᱵᱚ ᱨᱤᱱ ᱯᱩᱨᱩᱫᱷᱩᱞ ᱜᱚᱢᱠᱮ ᱠᱚᱠᱚ ᱢᱮᱱᱟ ᱡᱮ ᱮᱱᱮᱡ ᱫᱚ ᱟᱞᱚ ᱯᱮ ᱵᱟᱹᱜᱤᱭᱟ ᱾ ᱟᱫᱚ ᱟᱵᱚ ᱨᱤᱱ ᱵᱤᱱᱼᱟᱹᱠᱤᱞᱟᱱ ᱟᱹᱠᱤᱞᱢᱟᱱ ᱥᱟᱶᱛᱟ ᱥᱩᱥᱟᱹᱨᱤᱭᱟᱹ ᱦᱚᱲ ᱫᱚᱠᱚ ᱵᱩᱡᱷᱟᱹᱣᱟ, ᱵᱟᱝ ᱢᱟ ᱨᱟᱛ ᱜᱟᱹᱰᱤ ᱜᱚᱦᱚᱲ ᱢᱟᱬᱟᱝ ᱛᱮ ᱮᱱᱮᱡ, ᱫᱤᱠᱩ ᱢᱩᱫᱽᱨᱤ ᱨᱮ ᱮᱱᱮᱡ, ᱮᱨᱟ ᱜᱤᱫᱽᱨᱟᱹ ᱵᱷᱟᱲᱟ ᱤᱫᱤ ᱠᱟᱛᱮ ᱯᱚᱱᱚᱛ ᱯᱟᱨᱚᱢ ᱯᱚᱱᱚᱛ ᱨᱮ ᱮᱱᱮᱡ ᱚᱪᱚ, ᱨᱟᱡᱽᱟᱹᱨᱤ ᱫᱤᱠᱩ ᱯᱮᱲᱟ ᱫᱟᱨᱟᱢ ᱨᱮ ᱮᱱᱮᱡ, ᱥᱚᱨᱠᱟᱨ ᱴᱷᱮᱱ ᱨᱮᱦᱬᱟᱜ ᱨᱮ ᱮᱱᱮᱡ, ᱱᱚᱶᱟ ᱠᱚ ᱮᱱᱮᱡ ᱦᱚᱸ ᱯᱟᱞᱮ ᱠᱚ ᱩᱫᱽᱜᱟᱹᱣ ᱮᱫ ᱵᱚᱱ ᱜᱮᱭᱟ ᱾

ᱫᱷᱟᱹᱨᱛᱤ ᱯᱩᱨᱤ ᱨᱮ ᱡᱤᱣᱤᱫᱚᱜ ᱫᱚ, ᱟᱢ ᱥᱩᱢᱩᱝ ᱟᱜ ᱫᱚ ᱛᱤᱥ ᱦᱚᱸ ᱟᱞᱚᱢ ᱩᱭᱦᱟᱹᱨᱟ ᱾ ᱩᱭᱦᱟᱹᱨ ᱛᱮ ᱦᱩᱭ ᱟᱢᱟ ᱩᱱᱠᱩᱣᱟᱜ ᱠᱟᱛᱷᱟ ᱦᱚᱸ, ᱡᱟᱦᱟᱸᱭ ᱫᱚ ᱟᱢ ᱥᱩᱨ ᱥᱩᱯᱩᱨ ᱨᱮᱠᱚ ᱛᱟᱦᱮᱸᱱ ᱠᱟᱱᱟ ᱾ ᱩᱭᱦᱟᱹᱨ ᱫᱚ ᱚᱱᱟ ᱦᱚᱸ ᱦᱩᱭᱩᱜ ᱜᱮᱭᱟ, ᱚᱱᱠᱟᱱᱟᱜ ᱟᱞᱚᱢ ᱠᱟᱹᱢᱤᱭᱟ, ᱡᱟᱦᱟᱸ ᱛᱮ ᱵᱟᱹᱭᱨᱤ ᱢᱮᱫ ᱨᱮ ᱞᱤᱪᱟᱹᱲ ᱮᱢ ᱧᱮᱞᱚᱜᱼᱟ ᱾ ᱡᱟᱦᱟᱸᱱᱟᱜ ᱡᱤᱱᱤᱥ ᱜᱮ ᱟᱢᱟᱜ ᱠᱟᱱ ᱨᱮᱦᱚᱸ, ᱚᱱᱟ ᱠᱟᱹᱢᱤ ᱠᱟᱛᱮ ᱟᱢᱟᱜ ᱥᱟᱶᱛᱟ ᱛᱟᱞᱟᱨᱮ ᱟᱨ ᱮᱴᱟᱜ ᱦᱚᱲᱟᱜ ᱢᱮᱫ ᱛᱮ ᱛᱤᱱᱟᱹᱝ ᱥᱚᱵᱷᱟᱢ ᱧᱮᱞᱚᱜ ᱠᱟᱱᱟ, ᱚᱱᱟ ᱦᱚᱸ ᱩᱭᱦᱟᱹᱨ ᱦᱩᱭᱩᱜᱼᱟ ᱾ ᱯᱟᱞᱮ ᱟᱢᱟᱜ ᱠᱟᱹᱢᱤ ᱛᱮ ᱟᱢᱮᱢ ᱞᱤᱪᱟᱹᱲᱚᱜ ᱠᱟᱱᱛᱮ ᱦᱚᱲ ᱠᱚ ᱯᱚᱥᱲᱟ ᱮᱫ ᱢᱮᱭᱟ ᱾ ᱡᱟᱦᱟᱸ ᱠᱷᱟᱹᱛᱤᱨ ᱥᱟᱱᱟᱢ ᱞᱮᱠᱟᱱ ᱥᱚᱨᱠᱟᱨ ᱡᱩᱲᱩ ᱟᱨ ᱦᱚᱠ ᱟᱹᱭᱫᱟᱹᱨ ᱞᱟᱹᱜᱤᱫ ᱦᱚᱸ ᱟᱢᱟᱜ ᱨᱟᱜ, ᱨᱮᱦᱬᱟ ᱫᱚ ᱚᱠᱚᱭ ᱦᱚᱸ ᱵᱟᱝ ᱠᱚ ᱟᱸᱡᱚᱢ ᱞᱟᱹᱜᱤᱫᱚᱜ ᱠᱟᱱᱟ ???

ᱚᱱᱟᱛᱮ, ᱡᱟᱦᱟᱸᱱᱟᱜ ᱨᱮᱜᱮ, ᱡᱟᱦᱟᱸ ᱛᱤᱱᱟᱹᱜ ᱞᱟᱹᱠᱛᱤᱭᱟ ᱤᱱᱟᱹᱜ ᱜᱮ ᱵᱩᱜᱤᱭᱟ ᱾ ᱞᱟᱹᱠᱛᱤ ᱠᱷᱚᱱ ᱵᱟᱹᱲᱛᱤ ᱫᱚ ᱵᱩᱰᱟᱹᱣ ᱠᱟᱱᱟ ᱾

***