ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ, ᱡᱟᱦᱮᱨ ᱟᱭᱳ !!!
ᱞᱟᱥᱟᱬᱦᱮᱫ ᱜᱮ ᱫᱷᱚᱨᱢᱚ ᱞᱟᱥᱟᱬᱦᱮᱫ ᱜᱮ
ᱟᱢᱟᱜ ᱢᱟᱭᱟ ᱢᱟᱦᱬᱟ ᱫᱷᱚᱨᱢᱚ ᱞᱟᱥᱟᱬᱦᱮᱫ ᱜᱮ !!!
ᱛᱤᱱᱟᱹᱝ ᱦᱟᱦᱟᱲᱟ ᱜᱮᱭᱟ ᱱᱚᱶᱟ ᱚᱣᱟᱝ ᱟᱨ ᱞᱮᱞᱮᱝᱜᱮᱫ ᱫᱷᱟᱹᱨᱛᱤ ᱯᱩᱨᱤ ᱾ ᱱᱚᱶᱟ ᱫᱷᱟᱹᱨᱛᱤ ᱯᱩᱨᱤ ᱥᱟᱡᱟᱣ ᱥᱚᱵᱷᱟᱭ ᱞᱟᱹᱜᱤᱫ ᱛᱮ ᱢᱟᱱᱣᱟ ᱟᱨ ᱡᱟᱱᱣᱟ ᱠᱚᱣᱟᱜ ᱡᱟᱱᱟᱢ ᱾ ᱥᱟᱹᱨᱤ ᱜᱮ, ᱛᱤᱱᱟᱹᱝ ᱥᱚᱨᱮᱥ ᱟᱨ ᱛᱤᱱᱟᱹᱝ ᱞᱟᱥᱟᱬᱦᱮᱫ ᱜᱮ ᱥᱤᱨᱡᱚᱱᱤᱭᱟᱹ ᱟᱜ ᱜᱟᱜ ᱜᱟᱵᱟᱱ ᱟᱨ ᱜᱚᱲᱦᱚᱱ ᱾
ᱱᱚᱶᱟ ᱫᱷᱟᱹᱨᱛᱤ ᱯᱩᱨᱤ ᱨᱮ ᱢᱟᱹᱱᱢᱤᱭᱟᱜ ᱡᱟᱱᱟᱢ ᱞᱮᱠᱟᱛᱮ ᱠᱩᱲᱤ ᱟᱨ ᱠᱚᱲᱟᱦᱟᱜ ᱡᱟᱱᱟᱢ ᱫᱚ ᱢᱤᱫ ᱜᱮᱭᱟ ᱾ ᱚᱠᱚᱭ ᱦᱚᱸ ᱚᱠᱚᱭ ᱠᱷᱚᱱ ᱵᱟᱝ ᱠᱤᱱ ᱦᱩᱰᱤᱧ ᱢᱟᱨᱟᱝᱟ ᱾ ᱥᱤᱨᱡᱚᱱᱤᱭᱟᱹᱦᱟᱜ ᱥᱤᱨᱡᱚᱱ ᱞᱮᱠᱟᱛᱮ ᱥᱤᱨᱡᱚᱱ ᱵᱟᱧᱪᱟᱣ ᱫᱚᱦᱚᱭ ᱞᱟᱹᱜᱤᱫ ᱠᱩᱲᱤ ᱟᱨ ᱠᱚᱲᱟ ᱛᱟᱞᱟᱨᱮ ᱩᱞᱴᱟᱹ ᱨᱩᱯ ᱨᱮᱱᱟᱜ ᱜᱚᱲᱦᱚᱱ ᱾ ᱢᱟᱹᱱᱢᱤ ᱫᱚ ᱥᱟᱶᱛᱟ ᱨᱮᱵᱚ ᱛᱟᱦᱮᱸᱱᱟ ᱾ ᱥᱟᱶᱛᱟ ᱪᱟᱞᱟᱣ ᱞᱟᱹᱜᱤᱫ ᱛᱮ ᱠᱷᱟᱱ ᱞᱮᱠᱟᱱ ᱞᱮᱠᱟᱱ ᱨᱟᱭᱨᱤᱛ ᱦᱚᱸ ᱚᱞᱼᱛᱚᱞ ᱟᱠᱟᱱᱟ ᱾ ᱡᱟᱦᱟᱸ ᱠᱷᱟᱹᱛᱤᱨ ᱜᱷᱟᱨᱚᱸᱡᱽ ᱨᱮᱱᱟᱜ ᱠᱟᱹᱢᱤ ᱥᱮ ᱥᱟᱶᱛᱟ ᱨᱮᱱᱟᱜ ᱠᱟᱹᱢᱤ ᱫᱚ ᱠᱩᱲᱤ ᱟᱨ ᱠᱚᱲᱟ ᱛᱟᱞᱟ ᱨᱮ ᱦᱟᱹᱴᱤᱧ ᱟᱠᱟᱱᱟ ᱾ ᱟᱸᱴ ᱠᱟᱹᱢᱤ ᱠᱚᱫᱚ ᱠᱚᱲᱟ ᱦᱚᱯᱚᱱ ᱠᱚ ᱟᱨ ᱟᱞᱜᱟ ᱠᱟᱹᱢᱤ ᱠᱚᱫᱚ ᱠᱩᱲᱤ ᱦᱚᱯᱚᱱ ᱠᱚ ᱾ ᱪᱮᱫᱟᱜ ᱥᱮ ᱢᱤᱫ ᱥᱟᱶᱛᱟ ᱨᱮ ᱢᱤᱫ ᱜᱷᱟᱨᱚᱸᱡᱽ ᱞᱮᱠᱟ ᱜᱮᱵᱚ ᱛᱟᱦᱮᱸᱱ ᱠᱟᱱ ᱠᱷᱟᱹᱛᱤᱨ ᱟᱵᱚ ᱵᱷᱤᱛᱨᱤ ᱨᱮ ᱟᱸᱴ ᱟᱨ ᱟᱞᱜᱟ ᱠᱟᱹᱢᱤ ᱫᱚ ᱦᱟᱹᱴᱤᱧ ᱟᱠᱟᱱᱟ ᱾ ᱠᱩᱲᱤ ᱦᱚᱯᱚᱱᱟᱜ ᱦᱚᱲᱢᱚ ᱜᱚᱲᱦᱚᱱ ᱞᱮᱠᱟᱛᱮ ᱜᱷᱟᱨᱚᱸᱡᱽ ᱥᱮ ᱥᱟᱶᱛᱟ ᱨᱮᱱᱟᱜ ᱛᱤᱱᱟᱹᱝ ᱜᱟᱱ ᱟᱸᱴ ᱠᱟᱹᱢᱤ ᱠᱚᱫᱚ ᱠᱩᱲᱤ ᱦᱚᱯᱚᱱ ᱠᱚ ᱵᱟᱨᱚᱱ ᱮᱱᱟ ᱾ ᱡᱮᱞᱮᱠᱟ – ᱱᱟᱦᱮᱞ ᱥᱟᱵ, ᱥᱟᱹᱲᱤᱢ ᱫᱮᱡᱚᱜ, ᱱᱚᱶᱟ ᱠᱚᱫᱚ ᱟᱸᱴ ᱠᱟᱹᱢᱤ ᱠᱟᱱᱟ ᱾ ᱤᱠᱷᱟᱹᱱ ᱵᱚᱸᱜᱟ ᱛᱷᱟᱱ ᱨᱮ ᱠᱩᱲᱤ ᱦᱚᱯᱚᱱ ᱠᱚᱣᱟᱜ ᱫᱩᱲᱩᱵ, ᱵᱤᱪᱟᱹᱨ ᱫᱚᱨᱵᱟᱨ ᱨᱮ ᱫᱩᱲᱩᱵ ᱢᱮᱥᱟᱜ, ᱱᱚᱶᱟ ᱠᱚᱫᱚ ᱟᱞᱜᱟ ᱠᱟᱹᱢᱤ ᱠᱟᱱ ᱨᱮᱦᱚᱸ ᱠᱩᱲᱤ ᱦᱚᱯᱚᱱᱟᱜ ᱦᱚᱲᱢᱚ ᱜᱚᱲᱦᱚᱱ ᱨᱮᱱᱟᱜ ᱮᱴᱠᱮᱴᱚᱬᱮ ᱠᱷᱟᱹᱛᱤᱨ ᱥᱩᱨᱩᱜ ᱠᱚ ᱵᱟᱨᱚᱱ ᱮᱱᱟ ᱾ ᱪᱮᱫᱟᱜ ᱥᱮ ᱜᱷᱟᱨᱚᱸᱡᱽ ᱨᱮ ᱥᱟᱶᱛᱟ ᱨᱮ ᱵᱟᱵᱟ ᱵᱟᱨᱮ ᱢᱮᱱᱟᱜ ᱠᱚ ᱛᱩᱞᱩᱡ ᱟᱭᱳ ᱢᱤᱨᱥᱟ ᱠᱚ ᱟᱨ ᱪᱮᱫᱟᱜ ᱠᱚ ᱦᱟᱨᱠᱮᱛᱚᱜᱼᱟ ᱢᱮᱱ ᱠᱟᱛᱮ ᱾ ᱱᱚᱶᱟ ᱫᱚ ᱢᱤᱫ ᱜᱷᱟᱨᱚᱸᱡᱽ ᱨᱮᱱᱟᱜ ᱫᱩᱞᱟᱹᱲ ᱞᱮᱠᱟᱛᱮ ᱠᱟᱹᱢᱤ ᱦᱟᱹᱴᱤᱧ ᱠᱟᱱᱟ ᱾ ᱟᱨ ᱟᱵᱚ ᱨᱤᱱ ᱦᱟᱯᱲᱟᱢ ᱵᱤᱫᱟᱹᱞ ᱫᱚ ᱱᱚᱶᱟ ᱠᱚ ᱢᱟᱱᱟᱣ ᱵᱟᱛᱟᱣ ᱟᱹᱰᱤ ᱜᱮ ᱥᱚᱱᱚᱛ ᱟᱨ ᱢᱟᱹᱱ ᱢᱟᱱᱚᱛ ᱛᱟᱦᱮᱸ ᱠᱟᱱᱟ ᱾
ᱤᱠᱷᱟᱹᱱ ᱡᱩᱜᱽ ᱛᱟᱭᱚᱢ ᱡᱩᱜᱽ ᱢᱟᱹᱱᱢᱤᱭᱟᱜ ᱢᱚᱱᱮ ᱨᱮᱱᱟᱜ ᱩᱭᱦᱟᱹᱨ ᱦᱚᱸ ᱟᱹᱨᱩᱯᱷᱮᱨᱟᱣ ᱤᱫᱤᱭᱮᱱᱟ ᱾ ᱱᱤᱛᱚᱜ ᱫᱚ ᱱᱚᱶᱟ ᱠᱩᱲᱤ ᱦᱚᱯᱚᱱ ᱞᱟᱹᱜᱤᱫ ᱚᱞᱼᱛᱚᱞ ᱟᱠᱟᱱ ᱨᱟᱭᱨᱤᱛ ᱠᱚᱫᱚ ᱠᱩᱲᱤ ᱦᱚᱯᱚᱱᱟᱜ ᱞᱤᱪᱟᱹᱲ ᱞᱮᱠᱟ ᱧᱮᱞᱚᱜᱚᱜ ᱠᱟᱱᱟ ᱟᱨ ᱚᱱᱟ ᱞᱮᱠᱟᱛᱮ ᱥᱟᱶᱛᱟ ᱨᱮ ᱠᱩᱲᱤ
ᱦᱚᱯᱚᱱ ᱠᱚ ᱯᱚᱥᱲᱟ ᱢᱟᱜᱟᱞᱚᱜ ᱠᱟᱱᱟ ᱾ ᱚᱠᱛᱚ ᱥᱟᱶᱛᱮ ᱱᱚᱶᱟ ᱦᱚᱸ ᱧᱮᱞᱚᱜ ᱠᱟᱱᱟ, ᱱᱤᱛᱚᱜ ᱞᱮᱠᱟᱱ ᱥᱤᱠᱷᱤᱛ ᱡᱩᱜᱽ ᱨᱮ ᱟᱭᱳ ᱦᱚᱲ ᱠᱚᱣᱟᱜ ᱴᱷᱟᱹᱣᱠᱟᱹ ᱥᱮᱪᱮᱫ ᱥᱤᱠᱷᱱᱟᱹᱛ ᱵᱟᱝᱛᱮ ᱦᱚᱱ ᱦᱚᱯᱚᱱ ᱠᱚᱦᱚᱸ ᱴᱷᱤᱠ ᱴᱷᱟᱹᱣᱠᱟᱹ ᱥᱟᱹᱦᱤᱸᱡ ᱥᱮᱪᱮᱫ ᱵᱟᱝ ᱠᱚ ᱟᱢᱮᱴ
ᱫᱟᱲᱮᱭᱟᱜ ᱠᱟᱱᱟ ᱾ ᱡᱟᱦᱟᱸ ᱠᱷᱟᱹᱛᱤᱨ ᱥᱮᱪᱮᱫ ᱥᱤᱠᱷᱱᱟᱹᱛ ᱴᱚᱴᱷᱟᱨᱮ ᱟᱵᱚ ᱨᱤᱱ ᱜᱤᱫᱽᱨᱟᱹ ᱯᱤᱫᱽᱨᱟᱹ ᱠᱚᱫᱚ ᱠᱚ ᱛᱟᱭᱚᱢ ᱫᱚᱦᱚᱜ ᱠᱟᱱ ᱜᱮᱭᱟ ᱟᱨ ᱥᱟᱶᱛᱟ ᱥᱟᱶᱦᱮᱫ ᱥᱟᱶ ᱟᱭᱳ ᱠᱚᱣᱟᱜ ᱡᱚᱯᱚᱲᱟᱣ ᱵᱟᱝ ᱛᱟᱦᱮᱸᱱ ᱠᱟᱱ ᱠᱷᱟᱹᱛᱤᱨ ᱟᱵᱚ ᱨᱤᱱ ᱦᱚᱱ ᱜᱟᱬᱟ ᱠᱚ ᱟᱵᱚᱣᱟᱜ
ᱨᱟᱭᱨᱤᱛ, ᱟᱹᱨᱤᱪᱟᱹᱞᱤ ᱤᱫᱤ ᱠᱟᱛᱮ ᱴᱷᱟᱹᱣᱠᱟᱹ ᱥᱟᱹᱦᱤᱸᱡ ᱵᱟᱝ ᱠᱚ ᱴᱷᱤᱠᱟᱹ ᱛᱤᱭᱩᱜ ᱫᱟᱲᱮ ᱡᱚᱝ ᱠᱟᱱᱟ ᱾ ᱚᱱᱮ ᱠᱟᱛᱷᱟ ᱨᱮ ᱢᱮᱱᱟᱜᱼᱟ, “ᱟᱭᱳᱣᱟᱜ ᱥᱮᱪᱮᱫ ᱵᱮᱜᱚᱨ ᱦᱚᱯᱚᱱᱟᱜ ᱥᱮᱪᱮᱫ ᱚᱠᱟ ᱠᱷᱚᱱ ᱦᱤᱡᱩᱜᱼᱟ?” ᱱᱚᱶᱟ ᱠᱚᱫᱚ ᱟᱵᱚᱣᱟᱜ ᱥᱟᱶᱛᱟ ᱵᱷᱤᱛᱨᱤ ᱨᱮᱭᱟᱜ ᱠᱟᱛᱷᱟ ᱠᱟᱱᱟ ᱾
ᱤᱠᱷᱟᱹᱱ ᱱᱤᱛᱚᱜ ᱟᱵᱚ ᱢᱟᱹᱱᱢᱤᱭᱟᱜ ᱡᱤᱭᱚᱱ, ᱥᱩᱢᱩᱝ ᱟᱵᱚᱣᱟᱜ ᱥᱟᱶᱛᱟ ᱵᱷᱤᱛᱨᱤ ᱨᱮᱫᱚ ᱵᱟᱝ ᱛᱟᱦᱮᱸ ᱫᱚᱦᱚ ᱟᱠᱟᱱᱟ ᱾ ᱱᱤᱛᱚᱜ ᱫᱚ ᱟᱵᱚ ᱡᱤᱣᱤᱫᱚᱜ ᱞᱟᱹᱜᱤᱫ ᱵᱟᱦᱨᱮ ᱦᱚᱲ ᱥᱟᱶ, ᱵᱟᱦᱨᱮ ᱥᱟᱶᱛᱟ ᱥᱟᱶ, ᱵᱟᱦᱨᱮ ᱯᱚᱱᱚᱛ ᱥᱟᱶ ᱟᱨ ᱵᱟᱦᱨᱮ ᱫᱮᱥ ᱫᱩᱱᱤᱭᱟᱹ ᱥᱟᱶ ᱦᱮᱯᱨᱟᱣ ᱦᱩᱭ ᱟᱵᱚ ᱠᱟᱱᱟ ᱾ ᱥᱮᱪᱮᱫ ᱞᱟᱹᱜᱤᱫ ᱦᱩᱭᱩᱜ, ᱪᱟᱹᱠᱨᱤ ᱞᱟᱹᱜᱤᱫ ᱦᱩᱭᱩᱜ, ᱩᱛᱱᱟᱹᱣ ᱞᱟᱹᱜᱤᱫ ᱟᱨ ᱥᱟᱢᱮᱞᱟᱭ ᱛᱮ ᱧᱮᱞ ᱞᱮᱠᱷᱟᱱ ᱱᱚᱶᱟ ᱫᱷᱟᱹᱨᱛᱤ ᱯᱩᱨᱤ ᱨᱮ ᱵᱟᱧᱪᱟᱣ ᱛᱟᱦᱮᱸᱱ ᱞᱟᱹᱜᱤᱫ ᱾ ᱡᱟᱦᱟᱸ ᱠᱷᱟᱹᱛᱤᱨ ᱱᱤᱛᱚᱜ ᱞᱮᱠᱟᱱ ᱦᱮᱯᱨᱟᱣ ᱡᱩᱜᱽ ᱨᱮᱫᱚ ᱠᱩᱲᱤ ᱦᱚᱯᱚᱱ ᱠᱚᱦᱚᱸ ᱥᱟᱶᱛᱟ ᱥᱟᱶᱦᱮᱫ ᱥᱟᱞᱟᱜ ᱥᱟᱹᱜᱟᱹᱭ ᱫᱚᱦᱚᱭ ᱟᱹᱰᱤ ᱜᱮ ᱞᱟᱹᱠᱛᱤ ᱯᱟᱲᱟᱣ ᱟᱠᱟᱱᱟ ᱾ ᱵᱟᱵᱟ ᱠᱷᱚᱱ ᱵᱟᱹᱲᱛᱤ ᱟᱭᱳ ᱠᱚᱣᱟᱜ ᱥᱤᱠᱷᱱᱟᱹᱛᱚᱜ ᱰᱟᱦᱟᱨ ᱟᱨ ᱞᱟᱹᱭ ᱞᱟᱠᱪᱟᱨ ᱟᱹᱨᱤᱪᱟᱹᱞᱤ ᱵᱟᱰᱟᱭ ᱠᱟᱜ ᱨᱮᱱᱟᱜ ᱞᱟᱹᱠᱛᱤ ᱯᱟᱲᱟᱣ ᱟᱠᱟᱱᱟ ᱾ ᱛᱚᱵᱮ ᱮᱱᱟᱝ ᱦᱚᱱ ᱦᱚᱯᱚᱱ ᱠᱚ ᱫᱮᱥ ᱫᱤᱥᱚᱢ ᱨᱮᱱᱟᱜ ᱞᱟᱹᱠᱛᱤ ᱞᱮᱠᱟ ᱥᱮᱪᱮᱫ ᱠᱚ ᱟᱢᱮᱴ ᱫᱟᱲᱮᱭᱟᱜᱼᱟ ᱟᱨ ᱡᱤᱭᱚᱱ ᱦᱮᱯᱨᱟᱣ ᱨᱮ ᱢᱟᱬᱟᱝ ᱛᱮᱠᱚ ᱞᱟᱦᱟ ᱫᱟᱲᱮᱭᱟᱜᱼᱟ ᱾ ᱡᱟᱦᱟᱸ ᱠᱷᱟᱹᱛᱤᱨ ᱱᱤᱛᱚᱜ ᱞᱮᱠᱟᱱ ᱡᱩᱜᱽ ᱨᱮ ᱠᱩᱲᱤ ᱦᱚᱯᱚᱱ ᱠᱚᱦᱚᱸ ᱥᱟᱶᱦᱮᱫ ᱪᱟᱨᱪᱟ ᱨᱮᱱᱟᱜ ᱫᱚ ᱟᱹᱰᱤ ᱜᱮ ᱞᱟᱹᱠᱛᱤ ᱯᱟᱲᱟᱣ
ᱟᱠᱟᱱᱟ ᱾
ᱢᱟᱹᱱᱤᱡ ᱢᱟᱭᱱᱚ ᱴᱩᱰᱩ,
ᱫᱮᱣᱥᱳᱲ, ᱢᱚᱭᱩᱨᱵᱷᱚᱸᱡᱽ, ᱳᱰᱤᱥᱟ
***
