ᱪᱷᱩᱴᱠᱤ ᱟᱭᱳ

ᱞᱚᱣᱟᱰᱤ ᱟᱛᱩ ᱨᱤᱱᱤᱡ ᱥᱤᱨᱩ ᱜᱚᱢᱠᱮ ᱫᱚ ᱟᱹᱰᱤ ᱱᱟᱯᱟᱭ ᱦᱚᱲ ᱾ ᱮᱨᱟᱛ ᱫᱷᱚᱱᱢᱩᱱᱤ ᱦᱚᱸ ᱱᱟᱯᱟᱭ ᱵᱮᱵᱷᱟᱨ ᱛᱟᱭ, ᱟᱛᱩ ᱚᱲᱟᱜ ᱦᱚᱲ ᱟᱹᱰᱤ ᱜᱮᱠᱚ ᱠᱩᱥᱤ ᱟᱹᱠᱤᱱᱟ ᱱᱩᱠᱤᱱ ᱡᱩᱨᱤᱡᱚᱛᱟ ᱾ ᱢᱤᱫ ᱦᱚᱯᱚᱱ ᱛᱟᱹᱠᱤᱱ ᱦᱚᱯᱚᱱ ᱛᱮᱫ ᱫᱚ ᱪᱟᱹᱧᱪᱤᱨ ᱜᱷᱩᱴᱩ ᱮᱛᱚᱦᱚᱵ ᱵᱤᱨᱫᱟᱹᱜᱟᱲ ᱨᱮᱭ ᱯᱟᱲᱦᱟᱜ ᱠᱟᱱᱟᱭ ᱾ ᱤᱨᱟᱹᱞ ᱥᱮᱨᱢᱟ ᱩᱢᱮᱨ ᱛᱟᱭ ᱾ ᱥᱤᱨᱩ ᱜᱚᱢᱠᱮ ᱮᱨᱟᱛ ᱟᱨ ᱦᱚᱯᱚᱱ ᱜᱷᱟᱸᱨᱚᱧᱡᱽ ᱨᱮ ᱱᱩᱠᱩ ᱯᱮᱱᱮᱦᱚᱲ ᱜᱮ ᱢᱮᱱᱟᱜ ᱠᱚᱣᱟ ᱾ ᱥᱤᱨᱩ ᱜᱚᱢᱠᱮ ᱛᱮᱠᱚ ᱫᱚ ᱯᱮ ᱵᱚᱭᱦᱟ ᱟᱠᱚ, ᱡᱷᱚᱛᱚ ᱜᱮᱠᱚ ᱵᱷᱤᱱᱟᱹ ᱵᱷᱤᱱᱤ ᱟᱠᱟᱱᱟ᱾ ᱢᱮᱱᱠᱷᱟᱱ ᱵᱚᱭᱦᱟ ᱫᱚ ᱟᱹᱰᱤ ᱱᱟᱯᱟᱭ ᱥᱟᱹᱜᱟᱹᱭ ᱢᱮᱱᱟᱜ ᱠᱚᱣᱟ, ᱡᱷᱚᱛᱚᱣᱟᱜ ᱨᱮ ᱜᱚᱲᱚ ᱜᱚᱯᱚᱲᱚ ᱠᱚ ᱛᱟᱦᱮᱱᱟ ᱾ ᱦᱟᱥᱟ ᱡᱟᱭᱜᱟ ᱛᱮᱫᱚ ᱟᱹᱰᱤ ᱜᱮᱠᱚ ᱠᱤᱥᱟᱹᱬ ᱜᱮᱭᱟ ᱾ ᱡᱚᱢᱟᱜ ᱧᱩᱣᱟᱜ ᱮᱠᱟᱞ ᱜᱮ ᱟᱱᱟᱴ ᱵᱟᱹᱱᱩᱜ ᱟᱱ ᱛᱟᱠᱚᱣᱟ ᱾

ᱥᱤᱨᱩ ᱜᱚᱢᱠᱮᱭᱟᱜ ᱱᱟᱹᱭᱦᱟᱹᱨ ᱨᱤᱱ ᱦᱚᱲ ᱦᱚᱸ ᱟᱹᱰᱤ ᱠᱚ ᱱᱟᱯᱟᱭᱟ ᱾ ᱟᱹᱰᱤ ᱠᱤᱥᱟᱹᱬ ᱦᱚᱲ ᱠᱟᱱᱟ ᱠᱚ ᱟᱛᱩ ᱨᱤᱱ ᱢᱟᱹᱡᱷᱤ ᱦᱚᱲ ᱠᱟᱱᱟ ᱠᱚ᱾ ᱥᱤᱨᱩ ᱮᱨᱟᱛ ᱫᱚ ᱦᱚᱲ ᱪᱮᱛᱟᱱ ᱨᱮ ᱟᱹᱰᱤ ᱡᱩᱨ ᱫᱟᱭᱟ ᱢᱮᱱᱟᱜ ᱛᱟᱭᱟ ᱾ ᱨᱮᱸᱜᱮᱡ ᱱᱟᱪᱟᱨ ᱦᱚᱲ ᱠᱚ ᱚᱲᱟᱜ ᱛᱮ ᱦᱚᱦᱚ ᱠᱟᱛᱮ ᱡᱚᱢ ᱧᱩ ᱮᱢᱟ ᱠᱚᱣᱟᱭ ᱾ ᱚᱱᱟᱛᱮ ᱥᱤᱨᱩ ᱜᱚᱢᱠᱮ ᱟᱹᱰᱤ ᱠᱩᱥᱤ ᱜᱮ ᱟᱹᱭᱠᱟᱹᱣ ᱛᱟᱦᱮᱸᱜ ᱾ ᱱᱚᱣᱟ ᱠᱟᱛᱷᱟ ᱦᱚᱸ ᱮᱨᱟᱛ ᱢᱮᱛᱟᱭ ᱛᱟᱦᱮᱸᱜ ᱼ ᱮ ᱜᱳ ᱨᱮᱸᱜᱮᱡ ᱱᱟᱪᱟᱨ ᱦᱚᱲ ᱮᱢ ᱠᱟᱛᱮ ᱫᱚ ᱵᱟᱝ ᱪᱟᱵᱟᱜᱼᱟ, ᱡᱟᱦᱟᱸ ᱜᱮᱢ ᱫᱟᱲᱮᱭᱟᱜ ᱮᱢᱟ ᱠᱚᱢ ᱾ ᱫᱷᱚᱱᱢᱩᱱᱤ ᱦᱚᱸ ᱮᱢᱚᱜ ᱫᱚ ᱟᱹᱰᱤ ᱨᱟᱹᱥᱠᱟᱹᱭ ᱵᱩᱡᱷᱟᱹᱣ ᱛᱟᱦᱮᱸᱜ᱾ ᱟᱛᱩ ᱚᱲᱟᱜ ᱦᱚᱲ ᱥᱩᱨ ᱥᱟᱰᱜᱮ ᱨᱤᱱ ᱦᱚᱲ ᱠᱚ ᱥᱤᱨᱩ ᱮᱨᱟᱛ ᱫᱚ ᱟᱹᱰᱤ ᱠᱚ ᱠᱩᱥᱤ ᱟᱭᱟ᱾ ᱡᱟᱦᱟᱱᱟᱜ ᱠᱟᱹᱢᱤ ᱜᱮ ᱵᱟᱝ ᱠᱤᱱ ᱟᱱᱟᱴᱚᱜ ᱛᱟᱦᱮᱸᱜ ᱾ ᱟᱹᱰᱤ ᱱᱟᱯᱟᱭ ᱛᱮ ᱦᱮᱥᱮᱡ ᱥᱮᱠᱮᱡ ᱢᱮᱱᱟᱜ ᱠᱤᱱᱟ ᱥᱤᱨᱩ ᱜᱚᱢᱠᱮ ᱟᱨ ᱮᱨᱟᱛ ᱚᱱᱟ ᱥᱟᱶᱛᱮ ᱦᱚᱯᱚᱱ ᱛᱮᱫ ᱥᱤᱵᱩ ᱾ ᱥᱤᱵᱩ ᱫᱚ ᱱᱚᱜᱼᱚᱭ ᱯᱨᱟᱭᱢᱟᱨᱤ ᱤᱥᱠᱩᱞ ᱨᱮ ᱯᱟᱲᱦᱟᱜ ᱠᱟᱱᱟᱭ ᱯᱮ ᱪᱟᱱᱟᱪ ᱨᱮ ᱾ ᱢᱤᱫ ᱫᱤᱱ ᱥᱤᱵᱩ ᱵᱟᱹᱵᱩ ᱮᱸᱜᱟᱛ ᱴᱷᱮᱱ ᱨᱮᱰᱦᱟᱸ ᱠᱟᱱᱟᱭ, ᱟᱭᱳ ᱤᱧ ᱫᱚ ᱢᱟᱢᱚ ᱚᱲᱟᱜ ᱥᱮᱱᱚᱜ ᱵᱩᱡᱷᱟᱹᱣ ᱤᱧ ᱠᱟᱱᱟ ᱜᱟᱯᱟ ᱜᱮ ᱢᱟᱢᱚ ᱚᱲᱟᱜ ᱞᱟᱝ ᱥᱮᱱᱚᱜᱼᱟ ᱾ ᱟᱭᱳ ᱫᱚ ᱵᱮᱴᱟᱭ ᱢᱮᱛᱟᱭ ᱠᱟᱱᱟ ᱵᱮᱴᱟ ᱦᱩᱭ ᱮᱱᱛᱮ ᱟᱢ ᱵᱟᱵᱟ ᱪᱮᱫ ᱞᱟᱹᱭ ᱮᱫᱟᱭ, ᱥᱮᱱᱚᱜ ᱟᱞᱟᱝ ᱵᱟᱨ ᱥᱤᱧ ᱛᱟᱦᱮᱸ ᱠᱟᱛᱮ ᱞᱟᱝ ᱨᱩᱣᱟᱹᱲ ᱦᱤᱡᱩᱜᱼᱟ ᱾ ᱵᱮᱴᱟ ᱢᱚᱱᱮ ᱟᱞᱚᱢ ᱵᱟᱹᱲᱤᱡ ᱛᱟᱢᱟ ᱾ ᱵᱟᱵᱟ ᱦᱟᱴ ᱥᱮᱱ ᱟᱠᱟᱱᱟᱭ ᱨᱩᱣᱟᱹᱲ ᱦᱮᱡ ᱞᱮᱱ ᱜᱮᱭ ᱟᱫᱩᱧ ᱢᱮᱛᱟᱭᱟ ᱦᱩᱭ ᱥᱮ? ᱱᱚᱝᱠᱟ ᱞᱟᱹᱭ ᱵᱟᱲᱟ ᱛᱮᱜᱮ ᱥᱤᱨᱩ ᱜᱚᱢᱠᱮ ᱫᱚ ᱚᱲᱟᱜ ᱛᱮᱭ ᱨᱩᱣᱟᱹᱲ ᱦᱮᱡ ᱮᱱᱟᱭ ᱾ ᱥᱮᱴᱮᱨ ᱛᱚᱨᱟ ᱥᱤᱵᱩ ᱵᱮᱴᱟᱜᱮ ᱢᱮᱱ ᱜᱚᱫ ᱠᱮᱫ ᱟᱭ ᱵᱟᱵᱟ ᱜᱟᱯᱟ ᱜᱮ ᱟᱭᱳ ᱛᱤᱞᱤᱧ ᱢᱟᱢᱚ ᱚᱲᱟᱜ ᱞᱤᱧ ᱥᱮᱱᱚᱜᱼᱟ ᱦᱳᱭ ᱥᱮ? ᱵᱟᱵᱟ ᱟᱫᱚ ᱼ ᱟᱢ ᱫᱚ ᱪᱮᱫ ᱮᱢ ᱢᱮᱱ ᱮᱫᱟ? ᱥᱤᱨᱩ ᱟᱹᱣᱨᱤ ᱛᱮᱞᱟ ᱮᱢ ᱨᱮᱜᱮ ᱫᱷᱚᱱᱢᱩᱱᱤ ᱜᱮ ᱢᱮᱱ ᱜᱚᱫ ᱠᱮᱫᱼᱟᱭ ᱵᱮᱴᱟ ᱵᱟᱯᱮᱥᱮ ᱵᱟᱵᱟ ᱱᱤᱛᱚᱜ ᱜᱮ ᱦᱟᱴ ᱠᱷᱚᱱᱟᱜ ᱨᱩᱣᱟᱹᱲ ᱮᱱᱟᱭ ᱫᱩᱲᱩᱵ ᱡᱤᱨᱟᱹᱣ ᱦᱚᱪᱚ ᱟᱭ ᱢᱮᱥᱮ ᱚᱲᱟᱜ ᱨᱮ ᱢᱮᱱᱟᱭ ᱜᱮᱭᱟᱛᱚ ᱪᱮᱫᱟᱜ ᱩᱱᱟᱹᱜ ᱫᱚᱢ ᱦᱚᱨᱚᱵᱚᱨᱚᱜ ᱠᱟᱱᱟ ᱢᱟᱥᱮ? ᱥᱤᱨᱩ ᱜᱚᱢᱠᱮ ᱫᱚ ᱢᱮᱱ ᱜᱚᱫ ᱠᱮᱫᱼᱟᱭ ᱦᱩᱭ ᱵᱮᱴᱟ ᱦᱩᱭ ᱪᱮᱫᱟᱜ ᱵᱟᱹᱵᱤᱱ ᱥᱮᱱᱚᱜᱼᱟ ᱜᱟᱯᱟᱢ ᱞᱟᱹᱭ ᱮᱫᱟ ᱛᱚ ᱵᱮᱴᱟ ᱱᱟᱯᱟᱭ ᱠᱟᱛᱷᱟ ᱜᱟᱯᱟ ᱜᱮ ᱥᱮᱱᱚᱜ ᱵᱤᱱ ᱾ ᱵᱮᱴᱟ ᱵᱟᱵᱟᱣᱟᱜ ᱠᱟᱛᱷᱟ ᱟᱸᱡᱚᱢ ᱛᱮ ᱨᱟᱹᱥᱠᱟᱹ ᱛᱮ ᱨᱟᱪᱟ ᱨᱮ ᱫᱚᱱ ᱵᱟᱲᱟ ᱜᱚᱫ ᱟᱱᱟᱭ ᱾ ᱥᱟᱹᱨᱤᱜᱮ ᱜᱤᱫᱽᱨᱟᱹ ᱩᱢᱮᱨ ᱫᱚ ᱟᱹᱰᱤ ᱜᱮ ᱱᱟᱯᱟᱭᱟ ᱡᱟᱦᱟᱢ ᱠᱷᱚᱡᱟ ᱚᱱᱟᱢ ᱧᱟᱢ ᱞᱮᱠᱷᱟᱱ ᱟᱹᱰᱤ ᱜᱮ ᱨᱟᱹᱥᱠᱟᱹ ᱫᱚ ᱵᱩᱡᱷᱟᱹᱜᱼᱟ ᱾ ᱚᱱᱠᱟ ᱜᱮ ᱥᱤᱵᱩ ᱵᱟᱹᱵᱩ ᱫᱚ ᱢᱟᱢᱚ ᱚᱲᱟᱜ ᱟᱭᱳ ᱥᱟᱶ ᱜᱟᱯᱟ ᱥᱮᱱᱚᱜ ᱟᱭ, ᱟᱹᱰᱤ ᱨᱟᱹᱥᱠᱟᱹ ᱨᱤᱥᱠᱤ ᱥᱤᱵᱩ ᱵᱮᱴᱟ ᱯᱟᱞᱮᱱ ᱨᱟᱹᱥᱠᱟᱹ ᱛᱮ ᱧᱤᱫᱟᱹ ᱦᱚᱸ ᱵᱟᱝ ᱜᱮᱭ ᱡᱟᱹᱯᱤᱫ ᱫᱟᱲᱮᱭᱟᱜᱼᱟ ᱾ ᱡᱚᱛᱚ ᱦᱚᱲ ᱜᱮ ᱢᱟᱢᱚ ᱚᱲᱟᱜ ᱥᱮᱱᱚᱜ ᱫᱚᱵᱚᱱ ᱨᱟᱹᱥᱠᱟᱹᱜ ᱜᱮᱭᱟ ᱾ ᱢᱟᱢᱚ ᱚᱲᱟᱜ ᱥᱮᱱ ᱫᱚ ᱟᱹᱰᱤ ᱨᱟᱹᱥᱠᱟᱹ ᱜᱮ ᱟᱹᱭᱠᱟᱹᱜᱼᱟ ᱾ ᱱᱚᱣᱟ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱥᱤᱨᱩ ᱮᱨᱟᱛ ᱦᱚᱸ ᱢᱚᱱᱮ ᱢᱚᱱᱮᱛᱮ ᱨᱟᱹᱥᱠᱟᱹ ᱜᱮ ᱟᱹᱭᱠᱟᱹᱣ ᱮᱫᱟᱭ᱾ ᱟᱯᱟ ᱵᱟᱨᱮ ᱚᱲᱟᱜ ᱥᱮᱱᱚᱜ ᱚᱠᱚᱭ ᱵᱟᱭ ᱨᱟᱹᱥᱠᱟᱹᱜ ᱾

ᱫᱚᱥᱟᱨ ᱦᱤᱞᱚᱜ ᱟᱹᱣᱨᱤ ᱵᱮᱲᱟ ᱨᱟᱠᱟᱵ ᱛᱮᱜᱮ ᱥᱤᱵᱩ ᱵᱟᱹᱵᱩ ᱫᱚ ᱵᱮᱨᱮᱫ ᱟᱠᱟᱱᱟᱭ ᱾ ᱵᱮᱨᱮᱫ ᱛᱚᱨᱟ ᱮᱸᱜᱟᱛ ᱛᱮᱫ ᱢᱮᱛᱟᱭ ᱠᱟᱱᱟᱭ ᱦᱮᱸ ᱟᱭᱳ ᱛᱤᱨᱮᱞᱟᱝ ᱥᱮᱱᱚᱜᱼᱟ ᱢᱟᱢᱚ ᱚᱲᱟᱜ ᱫᱚ᱾ ᱟᱭᱳ ᱫᱚ ᱢᱮᱱ ᱜᱚᱫ ᱠᱮᱫ ᱠᱮᱫ ᱟᱭ ᱵᱮᱴᱟ ᱥᱮᱱᱚᱜ ᱜᱮᱭᱟᱞᱟᱝ ᱛᱚ ᱵᱟᱹᱥᱭᱟᱹᱢ ᱫᱟᱠᱟ
ᱡᱚᱢ ᱵᱟᱲᱟ ᱠᱟᱛᱮ ᱾ ᱚᱲᱟᱜ ᱨᱮᱱᱟᱜ ᱥᱟᱱᱟᱢᱟᱜ ᱠᱟᱹᱢᱤ ᱥᱟᱹᱛ ᱵᱟᱲᱟ ᱠᱟᱛᱮ ᱛᱮᱭᱟᱨ ᱮᱱᱟ ᱠᱤᱱ ᱫᱷᱚᱱᱢᱩᱱᱤ ᱟᱨ ᱦᱚᱯᱚᱱ ᱛᱮᱫ ᱾ ᱥᱤᱨᱩ ᱜᱚᱢᱠᱮ ᱢᱚᱴᱚᱨ ᱜᱟᱹᱰᱤ ᱨᱮ ᱫᱮᱡ ᱦᱚᱴᱚ ᱥᱮᱱ ᱮᱱᱟᱭ ᱾ ᱜᱟᱹᱰᱤ ᱨᱮ ᱫᱮᱡ ᱦᱚᱴᱚ ᱠᱟᱛᱮ ᱚᱲᱟᱜ ᱛᱮ ᱨᱩᱣᱟᱹᱲ ᱮᱱᱟᱭ ᱾ ᱫᱷᱚᱱᱢᱩᱱᱤ ᱛᱤᱠᱤᱱ
ᱦᱚᱸ ᱥᱮᱴᱮᱨ ᱮᱱᱟ ᱠᱤᱱ ᱟᱭᱳ ᱵᱟᱵᱟ ᱚᱲᱟᱜ ᱾ ᱥᱤᱵᱩ ᱵᱮᱴᱟ ᱫᱚ ᱟᱹᱰᱤ ᱨᱟᱹᱥᱠᱟᱹ ᱜᱮ ᱟᱹᱭᱠᱟᱹᱣ ᱮᱫᱟᱭ ᱢᱟᱢᱚ ᱚᱲᱟᱜ ᱥᱮᱴᱮᱨ ᱮᱱ ᱠᱷᱟᱱᱮ ᱾ ᱱᱚᱛᱮ ᱢᱟᱢᱚ ᱚᱲᱟᱜ ᱨᱮᱦᱚᱸ ᱡᱷᱚᱛᱚ ᱦᱚᱲ ᱜᱮ ᱨᱟᱹᱥᱠᱟᱹ ᱠᱚ ᱵᱩᱡᱷᱟᱹᱣ ᱮᱫᱟ ᱦᱚᱯᱚᱱ ᱢᱟᱹᱭ ᱫᱷᱚᱱᱢᱩᱱᱤ ᱟᱨ ᱦᱚᱯᱚᱱ ᱛᱮᱫ ᱠᱤᱱ
ᱦᱮᱡ ᱟᱠᱟᱱᱟ ᱱᱚᱛᱮ᱾ ᱫᱷᱚᱱᱢᱩᱱᱤ ᱫᱚ ᱮᱸᱜᱟᱛ ᱛᱮᱫ ᱜᱮ ᱢᱮᱛᱟᱭ ᱠᱟᱱᱟᱭ ᱟᱭᱳ ᱜᱟᱯᱟ ᱛᱟᱦᱮᱸ ᱠᱟᱛᱮ ᱢᱮᱭᱟᱝ ᱜᱮ ᱞᱤᱧ ᱨᱩᱣᱟᱹᱲᱟ ᱾ ᱮᱸᱜᱟᱛ ᱛᱮᱫ ᱢᱮᱱ ᱜᱚᱫᱟᱭ ᱦᱮᱸᱫᱟ ᱵᱤᱴᱤ ᱵᱟᱨᱥᱤᱧ ᱜᱟᱱ ᱵᱟᱝ ᱵᱤᱱ ᱛᱟᱦᱮᱱᱟ ᱾ ᱫᱷᱚᱱᱢᱩᱱᱤ ᱫᱚ ᱢᱮᱢᱮᱱ ᱠᱟᱱᱟᱭ ᱵᱟᱝ ᱟᱭᱳ ᱵᱟᱝ ᱾ ᱵᱟᱝ ᱞᱤᱧ ᱛᱟᱦᱮᱱᱟ ᱾ ᱦᱚᱯᱚᱱᱤᱧᱟᱜ ᱥᱠᱩᱞ ᱢᱮᱱᱟᱜ ᱛᱟᱭᱟ, ᱱᱚᱛᱮ ᱡᱟᱶᱟᱭ ᱦᱚᱸ ᱚᱲᱟᱜ ᱨᱮ ᱟᱹᱰᱤ ᱡᱩᱨ ᱦᱚᱨᱚᱵᱚᱨᱚᱜ ᱟᱭ᱾ ᱦᱚᱯᱚᱱᱤᱧ ᱜᱮ ᱟᱹᱰᱤ ᱡᱩᱨ ᱢᱟᱢᱚ ᱚᱲᱟᱜ ᱦᱤᱡᱩᱜ ᱨᱮᱰᱦᱟᱸ ᱠᱮᱫᱼᱟᱭ, ᱚᱱᱟᱛᱮᱞᱤᱧ ᱦᱮᱡ ᱜᱚᱫ ᱮᱱᱟ ᱾ ᱢᱤᱫ ᱵᱚᱸᱜᱟ ᱛᱟᱭᱚᱢ ᱡᱟᱶᱟᱭ ᱛᱟᱞᱮ ᱟᱨᱦᱚᱸ ᱞᱮ ᱦᱤᱡᱩᱜᱼᱟ ᱾ ᱚᱱᱟ ᱚᱠᱛᱚ ᱫᱚ ᱛᱟᱦᱮᱱ ᱟᱞᱮ ᱜᱮᱞ ᱫᱤᱱ ᱜᱟᱱ ᱾ ᱟᱭᱳ ᱫᱚ ᱱᱚᱣᱟ ᱜᱮ ᱢᱮᱱ ᱜᱚᱫ ᱠᱮᱫᱼᱟᱭ ᱦᱳᱭ ᱛᱚᱵᱮ ᱵᱤᱴᱤ ᱾ ᱡᱟᱶᱟᱭ ᱦᱚᱸ ᱟᱹᱰᱤ ᱫᱤᱱ ᱜᱮ ᱱᱟᱹᱭᱦᱟᱹᱨ ᱛᱮ ᱵᱟᱭ ᱦᱮᱡ ᱟᱠᱟᱱᱟ ᱾ ᱫᱷᱚᱱᱢᱩᱱᱤ ᱛᱤᱠᱤᱱ ᱫᱚ ᱢᱤᱫ ᱫᱤᱱ ᱛᱟᱦᱮᱸ ᱠᱟᱛᱮ ᱜᱮ ᱟᱫᱚ ᱠᱤᱱ ᱨᱩᱣᱟᱹᱲ ᱮᱱᱟ ᱾ ᱟᱠᱚᱣᱟᱜ ᱛᱮ ᱟᱭᱳ ᱵᱟᱵᱟ ᱚᱲᱟᱜ ᱠᱷᱚᱱ ᱨᱩᱣᱟᱹᱲ ᱠᱟᱛᱮ ᱵᱟᱹᱨᱥᱤᱧ ᱦᱳᱭ ᱟᱠᱟᱱᱟ ᱛᱮᱥᱟᱨ ᱫᱤᱱ ᱦᱤᱞᱚᱜ ᱠᱷᱟᱱ ᱜᱮ ᱫᱷᱚᱱᱚᱢᱩᱱᱤ ᱫᱚ ᱨᱩᱣᱟᱹ ᱮᱦᱚᱵ ᱠᱮᱫᱮᱭᱟ ᱾ ᱥᱤᱨᱩ ᱜᱚᱢᱠᱮ ᱮᱨᱟᱛ ᱛᱮᱫ ᱰᱟᱠᱛᱚᱨ ᱚᱲᱟᱜ ᱤᱫᱤ ᱠᱮᱫᱮᱭᱟᱭ ᱾ ᱰᱟᱠᱛᱚᱨ ᱵᱟᱹᱵᱩ ᱢᱟᱭᱟᱝ ᱯᱚᱨᱤᱠᱠᱷᱟ ᱢᱮᱛᱟ ᱫᱮᱭᱟᱭ ᱢᱟᱭᱟᱝ ᱯᱚᱨᱤᱠᱠᱷᱟ ᱠᱟᱛᱮ ᱧᱮᱞ ᱮᱱᱟ ᱴᱟᱭᱯᱷᱚᱭᱮᱰ ᱨᱩᱣᱟᱹ ᱫᱷᱚᱱᱢᱩᱱᱤ ᱫᱚ ᱧᱟᱢ ᱟᱠᱟᱫᱮᱭᱟ ᱾ ᱟᱫᱚ ᱨᱟᱱ ᱦᱚᱸ ᱠᱤᱱ ᱟᱹᱜᱩ ᱛᱚᱨᱟ ᱠᱮᱫᱼᱟ ᱾ ᱨᱟᱱ ᱡᱚᱢ ᱵᱟᱲᱟ ᱠᱟᱛᱮ ᱫᱷᱚᱱᱢᱩᱱᱤ ᱫᱚ ᱱᱟᱯᱟᱭ ᱜᱮ ᱟᱹᱭᱠᱟᱹᱣ ᱮᱫᱟᱭ ᱢᱮᱱ ᱫᱚ ᱨᱩᱣᱟᱹ ᱪᱟᱵᱟ ᱟᱠᱟᱱ ᱛᱟᱭᱟ ᱾ ᱢᱮᱱᱠᱷᱟᱱ ᱪᱮᱫ ᱮᱢ ᱞᱟᱹᱭᱟ ᱢᱚᱬᱮ ᱛᱩᱨᱩᱭ ᱢᱟᱦᱟ ᱛᱟᱭᱚᱢ ᱠᱷᱟᱱ ᱟᱨᱦᱚᱸ ᱨᱩᱣᱟᱹ ᱧᱟᱢ ᱠᱮᱫᱮᱭᱟ ᱾ ᱟᱨᱦᱚᱸ ᱫᱷᱚᱱᱢᱩᱱᱤ ᱫᱚ ᱰᱟᱠᱛᱟᱨ ᱚᱲᱟᱜ ᱤᱫᱤ ᱠᱮᱫᱮᱭᱟᱭ ᱥᱤᱨᱩ ᱜᱚᱢᱠᱮ ᱾ ᱰᱟᱠᱛᱟᱨ ᱧᱮᱞ ᱵᱟᱲᱟ ᱠᱟᱛᱮ ᱨᱟᱱ ᱢᱩᱨᱜᱟᱹᱱ ᱮᱢᱟ ᱫᱮᱭᱟᱭ ᱱᱚᱣᱟ ᱠᱟᱛᱷᱟ ᱦᱚᱸ ᱰᱟᱠᱛᱟᱨ ᱵᱟᱹᱵᱩ ᱢᱮᱱᱮᱱ ᱠᱟᱱᱟᱭ ᱱᱤᱭᱟᱹ ᱨᱟᱱ ᱛᱮᱜᱮ ᱵᱮᱥᱚᱜᱼᱟᱭ ᱾ ᱰᱟᱠᱛᱟᱨᱟᱜ ᱱᱚᱣᱟ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱥᱤᱨᱩ ᱜᱚᱢᱠᱮ ᱱᱟᱯᱟᱭ ᱜᱮ ᱟᱹᱭᱠᱟᱹᱣ ᱠᱮᱫᱼᱟᱭ ᱾ ᱪᱮᱫᱟᱜ ᱵᱟᱝᱢᱟ ᱮᱨᱟᱛᱟᱭ ᱟᱜ ᱱᱚᱝᱠᱟ ᱨᱩᱣᱟᱹ ᱠᱷᱟᱹᱛᱤᱨ ᱟᱹᱰᱤ ᱩᱭᱦᱟᱹᱨ ᱨᱮ ᱛᱟᱦᱮᱸ ᱠᱟᱱᱟᱭ ᱾ ᱱᱤᱛ ᱫᱚ ᱰᱟᱠᱛᱚᱨ ᱵᱟᱹᱵᱩᱣᱟᱜ ᱠᱟᱛᱷᱟ ᱟᱸᱡᱚᱢ ᱛᱮ ᱢᱚᱱᱮ ᱨᱮ ᱠᱟᱹᱴᱤᱡ ᱫᱟᱲᱮ ᱧᱟᱢ ᱠᱮᱫᱼᱟᱭ ᱾ ᱰᱟᱠᱛᱚᱨ ᱚᱲᱟᱜ ᱠᱷᱚᱱᱟᱜ ᱨᱩᱣᱟᱹᱲ ᱠᱟᱛᱮ ᱥᱤᱨᱩ ᱜᱚᱢᱠᱮ ᱫᱚ ᱮᱨᱟᱛ ᱛᱮᱫ ᱢᱮᱛᱟᱭ ᱠᱟᱱᱟᱭ ᱮᱜᱳ ᱱᱤᱛᱚᱜ ᱫᱚ ᱪᱮᱫ ᱦᱚᱸ ᱟᱞᱚᱢ ᱠᱟᱹᱢᱤᱭᱟ ᱾ ᱵᱟᱹᱨᱥᱤᱧ ᱜᱟᱱ ᱦᱟᱯᱮ ᱡᱤᱨᱟᱹᱣ ᱞᱮᱱ ᱢᱮ ᱵᱟᱝᱠᱷᱟᱱ ᱟᱨᱦᱚᱸ ᱨᱩᱣᱟᱹᱲ ᱦᱮᱡ ᱞᱮᱱᱠᱷᱟᱱ ᱟᱹᱰᱤ ᱢᱩᱥᱠᱤᱞᱟ ᱾ ᱚᱱᱟᱛᱮ ᱥᱤᱨᱩ ᱜᱚᱢᱠᱮ ᱱᱟᱹᱭᱦᱟᱹᱨ ᱛᱮ ᱠᱷᱚᱵᱚᱨ ᱵᱷᱮᱡᱟ ᱠᱮᱫᱼᱟᱭ ᱾ ᱥᱤᱨᱩ ᱦᱟᱱᱟᱨᱛᱮᱫ ᱵᱩᱰᱷᱤ ᱦᱚᱧᱦᱟᱨ ᱛᱮᱫ ᱦᱟᱲᱟᱢ ᱠᱤᱱ ᱦᱮᱡ ᱮᱱᱟ ᱫᱷᱚᱱᱢᱩᱱᱤ ᱛᱮᱠᱚ ᱚᱲᱟᱜ ᱾ ᱟᱭᱳ ᱵᱟᱵᱟ ᱛᱤᱠᱤᱱ ᱦᱮᱡ ᱠᱟᱛᱮ ᱥᱤᱨᱩ ᱟᱨ ᱫᱷᱚᱱᱢᱩᱱᱤ ᱫᱚ ᱟᱹᱰᱤ ᱱᱟᱯᱟᱭ ᱠᱤᱱ ᱟᱹᱭᱠᱟᱹᱣ ᱠᱮᱫᱼᱟ ᱾ ᱱᱚᱣᱟ ᱫᱚ ᱥᱟᱹᱨᱤᱭᱟᱜ ᱠᱟᱱᱟ ᱨᱩᱣᱟᱹ ᱨᱟᱵᱟᱝ ᱨᱮ ᱡᱟᱦᱟᱭ ᱜᱮ ᱥᱩᱨ ᱨᱮᱠᱚ ᱛᱟᱦᱮᱱ ᱠᱷᱟᱱ ᱟᱹᱰᱤ ᱱᱟᱯᱟᱭ ᱟᱴᱠᱟᱨᱚᱜᱼᱟ ᱾ ᱢᱚᱱᱮ ᱨᱮ ᱟᱹᱰᱤ ᱫᱟᱲᱮ ᱟᱹᱭᱠᱟᱹᱜᱼᱟ ᱾ ᱚᱱᱠᱟ ᱜᱮ ᱥᱤᱨᱩ ᱛᱤᱠᱤᱱ ᱦᱚᱸ ᱟᱹᱭᱠᱟᱹᱣ ᱮᱫᱟ ᱾

ᱫᱷᱚᱱᱢᱩᱱᱤ ᱮᱸᱜᱟᱛ ᱟᱯᱟᱛ ᱦᱮᱡ ᱠᱟᱛᱮ ᱯᱮᱼᱯᱩᱱ ᱢᱟᱦᱟ ᱦᱩᱭ ᱜᱚᱫ ᱮᱱᱟ ᱢᱮᱱᱠᱷᱟᱱ ᱱᱤᱛ ᱦᱚᱸ ᱫᱷᱚᱱᱢᱩᱱᱤ ᱱᱟᱯᱟᱭ ᱫᱚ ᱵᱟᱝᱜᱮᱭ ᱵᱩᱡᱷᱟᱹᱣ ᱮᱫᱟ ᱾ ᱨᱩᱣᱟᱹ ᱫᱚ ᱪᱟᱵᱟ ᱟᱠᱟᱱ ᱛᱟᱭᱟ ᱢᱮᱱᱠᱷᱟᱱ ᱟᱹᱰᱤ ᱡᱩᱨ ᱞᱟᱸᱜᱟ ᱜᱮ ᱟᱹᱭᱠᱟᱹᱣ ᱮᱫᱟᱭ ᱾ ᱥᱤᱨᱩ ᱜᱚᱢᱠᱮ ᱦᱚᱸ ᱪᱮᱫᱟᱜ
ᱪᱚ ᱢᱚᱱᱮ ᱨᱮ ᱵᱮᱥ ᱜᱮ ᱵᱟᱝ ᱮ ᱟᱹᱭᱠᱟᱹᱣ ᱮᱫᱟ ᱾ ᱢᱤᱫ ᱫᱤᱱ ᱫᱚ ᱧᱤᱫᱟᱹ ᱵᱮᱲᱟ ᱡᱷᱚᱛᱚ ᱠᱚ ᱡᱟᱹᱯᱤᱫ ᱟᱠᱟᱫᱟ ᱟᱪᱠᱟ ᱜᱮ ᱫᱷᱚᱱᱢᱩᱱᱤᱭᱟᱜ ᱟᱲᱟᱝ ᱟᱸᱡᱚᱢ ᱮᱱᱟ ᱥᱤᱨᱩ ᱜᱮ ᱟᱸᱡᱚᱢ ᱠᱮᱫᱼᱟᱭ, ᱥᱤᱨᱩ ᱫᱚ ᱩᱥᱟᱹᱨᱟ ᱜᱮ ᱵᱮᱨᱮᱫ ᱠᱟᱛᱮ ᱧᱮᱞᱮ ᱫᱚᱭ ᱫᱷᱚᱱᱢᱩᱱᱤ ᱛᱤᱻ ᱡᱟᱸᱜᱟ ᱨᱮᱭᱟᱲ ᱟᱠᱟᱱ ᱛᱟᱭᱟ, ᱱᱚᱛᱮ ᱦᱚᱲᱢᱚ ᱛᱤᱻ ᱡᱟᱸᱜᱟ ᱦᱚᱸ ᱚᱨ ᱮᱫ ᱛᱟᱭᱟᱭ ᱾ ᱢᱤᱨᱩ ᱜᱚᱢᱠᱮ ᱫᱚ ᱪᱮᱫ ᱪᱤᱠᱟᱹᱭᱟᱭ ᱫᱤᱥ ᱦᱩᱫᱤᱥ ᱟᱫ ᱮᱱ ᱛᱟᱭᱟ ᱾ ᱢᱮᱱᱠᱷᱟᱱ ᱡᱟᱸᱦᱟ ᱜᱮ ᱪᱤᱠᱟᱹ ᱦᱩᱭᱩᱜ ᱛᱟᱭᱟ ᱾ ᱟᱛᱩ ᱨᱤᱱ ᱠᱚᱲᱟ ᱠᱚ ᱦᱚᱦᱚ ᱠᱟᱛᱮ ᱦᱟᱥᱯᱟᱛᱟᱞ ᱤᱫᱤ ᱨᱮᱱᱟᱜ ᱠᱚ ᱠᱩᱨᱩᱢᱩᱴᱩ ᱠᱮᱫᱼᱟ ᱟᱫᱚ ᱦᱟᱥᱯᱟᱛᱟᱞ ᱠᱚ ᱤᱫᱤ ᱮ ᱠᱟᱱᱟ ᱢᱮᱱᱠᱷᱟᱱ ᱦᱟᱥᱯᱟᱛᱟᱞ ᱟᱹᱣᱨᱤ ᱥᱮᱴᱮᱨ ᱛᱮᱜᱮ ᱫᱷᱚᱱᱢᱩᱱᱤ ᱟᱸᱡᱮᱫ ᱮᱱᱟᱭ ᱾ ᱦᱟᱥᱯᱟᱛᱟᱞ ᱠᱚ ᱤᱫᱤ ᱥᱮᱴᱮᱨ ᱠᱮᱫᱮᱭᱟ, ᱰᱟᱠᱛᱚᱨ ᱵᱟᱹᱵᱩ ᱧᱮᱞ ᱠᱟᱛᱮ ᱱᱚᱣᱟ ᱜᱮ ᱢᱮᱱ ᱠᱮᱫᱼᱟᱭ ᱪᱮᱫ ᱦᱚᱸ ᱪᱤᱠᱟᱹ ᱛᱮᱱᱟᱜ ᱵᱟᱹᱱᱩᱜᱼᱟ ᱾ ᱥᱤᱨᱩ ᱜᱚᱢᱠᱮ ᱛᱤᱻ ᱡᱟᱸᱜᱟ ᱧᱩᱨᱩᱜ ᱞᱮᱠᱟᱭ ᱟᱹᱭᱠᱟᱹᱣ ᱮᱫᱟ, ᱢᱮᱱᱠᱷᱟᱱ ᱚᱠᱚᱭ ᱪᱮᱫ ᱮᱢ ᱢᱮᱛᱟᱭᱟ? ᱥᱤᱨᱩ ᱜᱚᱢᱠᱮᱭᱟᱜ ᱫᱚ ᱪᱮᱫ ᱦᱚᱸ ᱦᱩᱲᱟᱹᱜ ᱵᱟᱹᱱᱩᱜ ᱟᱱ ᱛᱟᱭᱟ ᱾ ᱰᱟᱠᱛᱚᱨ ᱴᱷᱮᱱ ᱫᱚᱭ ᱧᱮᱞ ᱦᱚᱪᱚ ᱟᱠᱟᱫᱮᱭᱟ ᱾ ᱥᱤᱨᱩ ᱜᱚᱢᱠᱮ ᱢᱟ ᱟᱹᱰᱤ ᱱᱟᱯᱟᱭ ᱦᱚᱲ ᱠᱟᱱᱟᱭ, ᱡᱩᱨᱤᱡᱚᱛᱟ ᱦᱚᱸ ᱟᱹᱰᱤ ᱱᱟᱯᱟᱭ ᱠᱤᱱ ᱛᱟᱦᱮᱸ ᱠᱟᱱᱟ ᱦᱮᱥᱮᱡ ᱥᱮᱠᱮᱡ ᱾ ᱱᱮᱣ ᱠᱷᱟᱹᱯᱟᱹᱨᱤ ᱦᱚᱸ ᱵᱟᱝᱠᱤᱱ ᱵᱟᱰᱟᱭ ᱛᱟᱦᱮᱸᱫ, ᱱᱩᱱᱟᱹᱜ ᱱᱟᱯᱟᱭ ᱥᱚᱦᱟᱜᱽ ᱫᱩᱞᱟᱹᱲ ᱠᱷᱚᱱᱟᱜ ᱪᱟᱸᱫᱚᱭ ᱨᱟᱪᱟᱜ ᱪᱷᱟᱲᱟᱣ ᱤᱫᱤ ᱠᱮᱫᱮᱭᱟ ᱟᱹᱰᱤ ᱫᱩᱠ ᱨᱮᱱᱟᱜ ᱠᱟᱛᱷᱟ ᱾ ᱟᱛᱩ ᱚᱲᱟᱜ ᱦᱚᱲ ᱟᱹᱰᱤ ᱫᱩᱠ ᱜᱮᱠᱚ ᱟᱴᱠᱟᱨ ᱮᱫᱟ ᱾ ᱫᱷᱚᱱᱢᱩᱭᱟᱜ ᱵᱮᱵᱷᱟᱨ ᱵᱟᱝ ᱠᱚ ᱦᱤᱲᱤᱧ ᱫᱟᱲᱮᱟᱜ ᱠᱟᱱᱟ ᱾

ᱱᱤᱛᱚᱜ ᱫᱚ ᱥᱤᱨᱩ ᱜᱚᱢᱠᱮ ᱟᱨ ᱦᱚᱯᱚᱱ ᱛᱮᱫ ᱥᱤᱵᱩ ᱟᱹᱰᱤ ᱜᱮ ᱠᱤᱱ ᱮᱥᱠᱟᱨ ᱮᱱᱟ ᱾ ᱢᱮᱱᱠᱷᱟᱱ ᱦᱟᱱᱟᱨ ᱛᱮᱫ ᱵᱩᱰᱷᱤ ᱦᱚᱧᱦᱟᱨ ᱛᱮᱫ ᱦᱟᱲᱟᱢ ᱪᱤᱠᱟᱹ ᱠᱤᱱ ᱵᱟᱹᱜᱤ ᱟᱹᱠᱤᱱᱟ ᱜᱚᱲᱚᱢ ᱠᱚᱲᱟᱼᱡᱟᱶᱟᱭ ᱜᱚᱢᱠᱮ ᱟᱹᱰᱤ ᱩᱭᱦᱟᱹᱨ ᱵᱷᱟᱹᱵᱤᱛ ᱨᱮ ᱢᱮᱱᱟᱜ ᱠᱤᱱᱟ ᱦᱟᱲᱟᱢ
ᱵᱩᱰᱷᱤ ᱾ ᱪᱤᱠᱟᱹ ᱠᱤᱱ ᱥᱮᱱᱚᱜᱼᱟ ᱱᱩᱠᱤᱱ ᱵᱟᱹᱜᱤ ᱠᱟᱛᱮ ᱾ ᱪᱮᱫ ᱠᱤᱱ ᱩᱯᱟᱹᱭᱟ ᱵᱟᱝ ᱠᱤᱱ ᱫᱤᱥᱟᱹ ᱵᱟᱥᱟ ᱫᱟᱲᱮᱭᱟᱜ ᱠᱟᱱᱟ ᱾ ᱧᱮᱞ ᱧᱮᱞ ᱛᱮ ᱚᱠᱛᱚ ᱢᱟ ᱯᱟᱨᱚᱢ ᱤᱫᱤᱜ ᱠᱟᱱ ᱦᱩᱭ ᱜᱚᱫ ᱮᱱᱟ ᱢᱤᱫ ᱵᱚᱸᱜᱟ ᱜᱟᱱ ᱮᱱ ᱦᱚᱸᱜᱮ ᱵᱟᱝ ᱠᱤᱱ ᱞᱟᱹᱭ ᱫᱟᱲᱮᱭᱟᱜ ᱠᱟᱱᱟ ᱡᱟᱶᱟᱭ
ᱜᱚᱢᱠᱮᱛ ᱥᱤᱨᱩ ᱴᱷᱮᱱ ᱾ ᱥᱤᱨᱩᱣᱟᱜ ᱫᱚᱥᱟ ᱢᱟ ᱪᱮᱫ ᱮᱢ ᱞᱟᱹᱭᱟ ᱦᱟᱱᱟᱨ ᱟᱭᱳ ᱦᱚᱧᱦᱟᱨ ᱦᱟᱲᱟᱢ ᱢᱮᱱᱟᱜ ᱠᱤᱱᱛᱮ ᱱᱟᱥᱮ ᱱᱟᱯᱟᱭᱮ ᱟᱹᱭᱠᱟᱹᱣ ᱮᱫᱟ ᱾ ᱥᱤᱵᱩ ᱵᱮᱴᱟᱣᱟᱜ ᱠᱟᱛᱷᱟ ᱞᱟᱹᱭ ᱜᱮ ᱵᱟᱝ ᱜᱟᱱᱚᱜᱼᱟ ᱟᱭᱳ ᱵᱮᱜᱚᱨ ᱢᱤᱫᱴᱟᱝ ᱞᱮᱴᱠᱟ ᱚᱠᱟ ᱞᱮᱠᱟᱭ ᱛᱟᱦᱮᱱᱟ?
ᱡᱟᱦᱟᱸᱭ ᱜᱮ ᱟᱹᱭᱠᱟᱹᱣ ᱫᱟᱲᱮᱭᱟᱜᱼᱟᱭ ᱾ ᱥᱤᱨᱩ ᱜᱚᱢᱠᱮ ᱦᱚᱸ ᱩᱭᱦᱟᱹᱨ ᱵᱷᱟᱵᱽᱱᱟ ᱛᱮ ᱨᱚᱦᱚᱲ ᱜᱚᱥᱚ ᱪᱟᱵᱟᱜ ᱠᱟᱱᱟᱭ ᱾ ᱥᱤᱨᱩ ᱜᱚᱢᱠᱮ ᱧᱮᱞ ᱛᱮ ᱟᱛᱩ ᱚᱲᱟᱜ ᱦᱚᱲ ᱫᱚ ᱟᱹᱰᱤ ᱡᱩᱨ ᱫᱩᱠ ᱜᱮᱠᱚ ᱟᱴᱠᱟᱨ ᱮᱫᱟ ᱾ ᱥᱟᱹᱨᱤᱭᱟᱜ ᱠᱟᱛᱷᱟ ᱠᱟᱱᱟ ᱱᱚᱣᱟ ᱫᱩᱠ ᱨᱮᱱᱟᱜ ᱠᱟᱛᱷᱟ
ᱚᱠᱚᱭ ᱴᱷᱮᱱᱮᱢ ᱞᱟᱹᱭᱟ ᱾ ᱡᱤᱭᱚᱱ ᱨᱮᱱᱟᱜ ᱥᱟᱱᱟᱢᱟᱜ ᱪᱟᱵᱟ ᱮᱱ ᱞᱮᱠᱟ ᱜᱮ ᱥᱤᱨᱩ ᱜᱚᱢᱠᱮ ᱟᱹᱭᱠᱟᱹᱣ ᱮᱫᱟᱭ᱾ ᱯᱮᱲᱟ ᱯᱟᱹᱬᱦᱟᱹ ᱛᱤᱱᱟᱹᱜ ᱠᱚ ᱵᱩᱡᱷᱟᱹᱣ ᱮ ᱠᱟᱱᱟ ᱮᱱᱛᱮ ᱨᱮᱦᱚᱸ ᱥᱤᱨᱩ ᱜᱚᱢᱠᱮ ᱪᱮᱫᱟᱜ ᱪᱚ ᱵᱚᱦᱚᱜ ᱵᱟᱝᱜᱮ ᱠᱟᱹᱢᱤᱭᱮᱫ ᱛᱟᱭᱟ ᱾ ᱫᱷᱚᱱᱢᱩᱱᱤ ᱱᱚᱣᱟ ᱫᱷᱩᱲᱤ
ᱫᱷᱟᱹᱨᱛᱤ ᱨᱮ ᱵᱟᱹᱱᱩᱜ ᱮᱭᱟ ᱩᱭᱦᱟᱹᱨ ᱛᱮᱦᱚᱸ ᱵᱟᱝᱜᱮᱭ ᱩᱭᱦᱟᱹᱨ ᱛᱤᱭᱩᱜ ᱫᱟᱲᱮᱭᱟᱜ ᱠᱟᱱᱟ ᱾ ᱢᱤᱫ ᱫᱤᱱ ᱥᱤᱨᱩ ᱦᱚᱧᱦᱟᱨ ᱛᱮᱫ ᱦᱟᱲᱟᱢ ᱦᱟᱱᱟᱨ ᱛᱮᱫ ᱵᱩᱰᱷᱤ ᱡᱟᱶᱟᱭ ᱜᱚᱢᱠᱮᱛ ᱱᱟᱹᱭᱦᱟᱹᱨ ᱥᱮᱱᱚᱜ ᱨᱮᱱᱟᱜ ᱠᱟᱛᱷᱟ ᱠᱤᱱ ᱢᱮᱛᱟᱭ ᱠᱟᱱᱟ ᱥᱟᱶᱛᱮ ᱜᱚᱲᱚᱢ ᱠᱚᱲᱟ ᱦᱚᱸ ᱾
ᱥᱤᱨᱩ ᱜᱚᱢᱠᱮ ᱫᱚ ᱦᱟᱱᱟᱨ ᱦᱚᱧᱦᱟᱨᱟᱜ ᱠᱟᱛᱷᱟ ᱵᱟᱝᱜᱮᱭ ᱜᱤᱰᱤ ᱞᱮᱫᱼᱟ, ᱱᱟᱹᱭᱦᱟᱨ ᱛᱮ ᱥᱮᱱᱚᱜ ᱨᱮᱵᱮᱱ ᱮᱱᱟᱭ ᱾ ᱦᱚᱧᱦᱟᱨ ᱛᱮᱫ ᱦᱟᱲᱟᱢ ᱦᱟᱱᱟᱨ ᱛᱮᱫ ᱵᱩᱰᱷᱤ ᱱᱚᱣᱟ ᱠᱟᱛᱷᱟ ᱸᱡᱚᱢ ᱠᱟᱛᱮ ᱨᱟᱹᱥᱠᱟᱹ ᱜᱮ ᱠᱤᱱ ᱟᱴᱠᱟᱨ ᱠᱮᱫᱼᱟ ᱾ ᱪᱮᱫᱟᱜ ᱵᱟᱝᱢᱟ ᱡᱟᱶᱟᱭ ᱜᱚᱢᱠᱮᱛ
ᱟᱠᱚ ᱚᱲᱟᱜ ᱠᱤᱱ ᱤᱫᱤ ᱞᱮᱠᱷᱟᱱ ᱡᱤᱣᱤ ᱨᱮ ᱯᱟᱞᱮᱱ ᱟᱹᱰᱤ ᱡᱩᱨ ᱥᱟᱹᱱᱛᱤ ᱠᱤᱱ ᱧᱟᱢᱟ ᱾ ᱱᱚᱛᱮ ᱜᱚᱲᱚᱢ ᱛᱮᱫ ᱠᱚᱲᱟ ᱦᱚᱸ ᱢᱟᱢᱚ ᱚᱲᱟᱜ ᱥᱮᱱ ᱠᱟᱛᱮ ᱯᱟᱞᱮᱱ ᱱᱟᱥᱮ ᱫᱚ ᱱᱟᱯᱟᱭ ᱜᱮᱭ ᱟᱹᱭᱠᱟᱹᱣᱟ ᱾ ᱚᱱᱟᱛᱮ ᱫᱚᱥᱟᱨ ᱦᱤᱞᱚᱜ ᱜᱮᱠᱚ ᱥᱮᱱ ᱮᱱᱟ ᱾ ᱟᱭᱳ ᱵᱟᱵᱟ ᱫᱚ ᱟᱭᱢᱟ ᱞᱮᱠᱟᱱᱟᱜ ᱠᱚ ᱩᱭᱦᱟᱹᱨᱟ, ᱜᱤᱫᱽᱨᱟᱹ ᱠᱚ ᱱᱟᱯᱟᱭ ᱛᱟᱦᱮᱱ ᱞᱟᱹᱜᱤᱫ ᱾ ᱦᱚᱯᱚᱱ ᱮᱨᱟᱛ ᱫᱷᱚᱱᱢᱩᱱᱤ ᱵᱟᱹᱱᱩᱜ ᱮᱭᱟ ᱱᱚᱣᱟ ᱫᱷᱩᱲᱤ ᱫᱷᱟᱹᱨᱛᱤ ᱨᱮ, ᱮᱱᱛᱮ ᱨᱮᱦᱚᱸ ᱱᱩᱠᱤᱱ ᱟᱭᱳ ᱵᱟᱵᱟ ᱡᱟᱶᱟᱭ ᱜᱚᱢᱠᱮᱛ ᱫᱚ ᱟᱯᱱᱟᱨ ᱤᱡ ᱦᱚᱯᱚᱱ ᱞᱮᱠᱟ ᱜᱮᱠᱤᱱ ᱫᱩᱞᱟᱹᱲ ᱟᱭᱟ ᱾ ᱥᱤᱨᱩ ᱜᱚᱢᱠᱮ ᱦᱚᱸ ᱦᱚᱧᱦᱟᱨ ᱛᱮᱫ ᱦᱟᱲᱟᱢ ᱦᱟᱱᱟᱨ ᱛᱮᱫ ᱵᱩᱰᱷᱤ ᱛᱤᱠᱤᱱ ᱟᱹᱰᱤ ᱟᱴ ᱢᱟᱱᱚᱛ ᱟᱹᱠᱤᱱᱟᱭ ᱾

ᱱᱟᱹᱭᱦᱟᱹᱨ ᱨᱮ ᱵᱟᱨ ᱦᱟᱯᱛᱟ ᱜᱟᱱ ᱛᱟᱦᱮᱸ ᱠᱟᱛᱮ ᱟᱫᱚ ᱥᱤᱨᱩ ᱜᱚᱢᱠᱮ ᱟᱨ ᱦᱚᱯᱚᱱ ᱛᱮᱫ ᱟᱠᱚ ᱚᱲᱟᱜ ᱛᱮᱠᱚ ᱤᱫᱤ ᱥᱮᱴᱮᱨ ᱠᱟᱫ ᱠᱤᱱᱟ ᱾ ᱢᱚᱬᱮ ᱛᱩᱨᱩᱭ ᱵᱚᱸᱜᱟ ᱛᱟᱭᱚᱢ ᱠᱷᱟᱱ ᱜᱮ ᱥᱤᱨᱩ ᱮᱨᱟᱛᱟᱭᱟᱜ ᱵᱷᱟᱸᱰᱟᱱ ᱠᱟᱹᱢᱤ ᱠᱚ ᱪᱩᱠᱟᱹᱣ ᱠᱮᱫᱼᱟ ᱾ ᱱᱚᱣᱟ ᱛᱟᱭᱚᱢ ᱠᱷᱟᱱ ᱜᱮ
ᱱᱟᱹᱭᱦᱟᱹᱨ ᱨᱤᱱ ᱥᱟᱱᱟᱢ ᱠᱚ ᱜᱮᱠᱚ ᱢᱮᱢᱮᱱ ᱠᱟᱱᱟ ᱪᱷᱩᱴᱠᱤ ᱟᱹᱜᱩ ᱞᱟᱹᱜᱤᱫ ᱢᱮᱱᱠᱷᱟᱱ ᱥᱤᱨᱩ ᱜᱚᱢᱠᱮ ᱫᱚ ᱵᱟᱝᱜᱮᱭ ᱨᱮᱵᱮᱱ ᱠᱟᱱᱟ ᱾ ᱟᱛᱩ ᱚᱲᱟᱜ ᱦᱚᱲ ᱦᱚᱸ ᱢᱮᱢᱮᱱ ᱠᱟᱱ ᱜᱮᱭᱟ ᱠᱚ ᱾ ᱟᱫᱚ ᱵᱟᱝᱠᱷᱟᱱ ᱪᱤᱠᱟᱹ ᱛᱮ ᱱᱚᱣᱟ ᱜᱷᱟᱸᱨᱚᱧᱡᱽ ᱱᱟᱯᱟᱭ ᱛᱮ ᱛᱟᱦᱮᱱᱟ ᱾ ᱱᱚᱣᱟ ᱠᱚ ᱵᱩᱡᱷᱟᱹ ᱵᱩᱡᱷᱤ ᱵᱟᱲᱟ ᱠᱟᱛᱮ ᱥᱤᱨᱩ ᱜᱚᱢᱠᱮ ᱠᱚ ᱨᱮᱵᱮᱱ ᱦᱚᱪᱚ ᱠᱮᱫᱮᱭᱟ ᱾ ᱥᱤᱨᱩ ᱜᱚᱢᱠᱮᱭ ᱨᱮᱵᱮᱱ ᱮᱱᱠᱷᱟᱱ ᱱᱟᱹᱭᱦᱟᱨ ᱯᱟᱦᱴᱟ ᱨᱤᱱ ᱥᱟᱱᱟᱢ ᱠᱚᱜᱮ ᱟᱹᱰᱤ ᱨᱟᱹᱥᱠᱟᱹ ᱠᱚ ᱟᱴᱠᱟᱨ ᱠᱮᱫᱼᱟ, ᱟᱫᱚ ᱟᱠᱚ ᱜᱮ ᱵᱟᱹᱦᱩ ᱧᱮᱧᱮᱞ ᱠᱚ ᱪᱷᱩᱴᱟᱹᱣ ᱮᱱᱟ ᱾ ᱱᱚᱛᱮ ᱚᱲᱟᱜ ᱨᱤᱱ ᱵᱚᱠᱚ ᱵᱚᱭᱦᱟ ᱦᱚᱸ ᱥᱤᱨᱩ ᱜᱚᱢᱠᱮ ᱞᱟᱹᱜᱤᱫ ᱟᱹᱰᱤ ᱱᱟᱯᱟᱭ ᱠᱩᱲᱤ ᱜᱤᱫᱽᱨᱟᱹ ᱠᱚ ᱧᱟᱢ ᱠᱮᱫᱮᱭ, ᱵᱟᱱᱟᱨ ᱯᱟᱦᱴᱟ ᱠᱷᱚᱱ ᱜᱮ ᱠᱩᱥᱤ ᱵᱟᱹᱥᱤ ᱦᱩᱭ ᱮᱱᱟ ᱾ ᱟᱫᱚ ᱯᱮᱲᱟ ᱞᱮᱠᱟ ᱜᱮ ᱟᱹᱜᱩ ᱠᱟᱛᱮ ᱵᱟᱦᱟᱥᱟᱶᱦᱟ ᱠᱮᱫ ᱠᱤᱱ ᱟᱠᱚ ᱾

ᱥᱤᱨᱩ ᱜᱚᱢᱠᱮᱭᱟᱜ ᱡᱤᱣᱤ ᱨᱮ ᱵᱚᱛᱚᱨ ᱫᱚ ᱢᱮᱱᱟᱜ ᱜᱮᱭᱟ, ᱮᱱᱛᱮ ᱨᱮᱦᱚᱸ ᱪᱮᱫᱟᱜ ᱪᱚ ᱩᱭᱦᱟᱹᱨ ᱦᱮᱡ ᱜᱚᱫᱚᱜ ᱛᱟᱭᱟ ᱱᱚᱝᱠᱟ! ᱥᱟᱹᱨᱤ ᱜᱮ ᱱᱩᱭ ᱠᱩᱲᱤ ᱜᱤᱫᱽᱨᱟᱹ ᱦᱚᱸ ᱫᱷᱚᱱᱢᱩᱱᱤ ᱞᱮᱠᱟ ᱜᱮ ᱯᱟᱞᱮᱱ ᱪᱮᱫᱟᱜ ᱵᱟᱝᱢᱟ ᱼ ᱟᱛᱩ ᱦᱚᱲ, ᱚᱲᱟᱜ ᱦᱚᱲ, ᱚᱱᱟ ᱥᱟᱶᱛᱮ ᱯᱮᱲᱟ ᱦᱚᱲ
ᱠᱚ ᱥᱟᱶ ᱦᱚᱸ ᱟᱹᱰᱤ ᱡᱩᱨ ᱢᱮᱥᱟᱜ ᱠᱟᱱᱟᱭ ᱾ ᱡᱷᱚᱛᱚ ᱦᱚᱲ ᱥᱟᱶ ᱜᱮ ᱞᱟᱸᱫᱟ ᱠᱟᱛᱮ ᱜᱮ ᱨᱚᱲᱟᱭ ᱾ ᱚᱱᱟᱛᱮ ᱟᱛᱩ ᱦᱚᱲ ᱠᱚ ᱚᱲᱟᱜ ᱦᱚᱲ ᱠᱚ ᱱᱚᱣᱟ ᱠᱟᱛᱷᱟ ᱜᱮ ᱞᱟᱹᱭ ᱮᱫᱟ ᱠᱚ ᱫᱷᱚᱱᱢᱩᱱᱤ ᱵᱟᱹᱦᱩ ᱜᱮ ᱯᱟᱞᱮᱱ ᱦᱮᱡ ᱨᱩᱣᱟᱹᱲ ᱮᱱᱟᱭ ᱱᱚᱣᱟ ᱚᱲᱟᱜ ᱛᱮᱫᱚ ᱾ ᱡᱷᱚᱛᱚ ᱠᱷᱚᱱᱟᱜ ᱢᱟᱨᱟᱝ ᱠᱟᱛᱷᱟ ᱫᱚ ᱵᱮᱴᱟ ᱥᱤᱵᱩ ᱟᱹᱰᱤ ᱜᱮ ᱫᱩᱞᱟᱹᱲᱮ ᱠᱟᱱᱟᱭ ᱾ ᱡᱟᱦᱟᱸ ᱫᱚ ᱟᱭᱳ ᱜᱮ ᱚᱱᱠᱟᱭ ᱫᱩᱞᱟᱹᱲ ᱥᱟᱹᱨᱤ ᱟᱭᱟ ᱾ ᱥᱟᱱᱟᱢ ᱦᱚᱲ ᱜᱮ ᱟᱹᱰᱤ ᱦᱟᱦᱟᱲᱟ ᱜᱮᱠᱚ ᱟᱹᱭᱠᱟᱹᱣ ᱮᱫᱟ ᱾ ᱱᱚᱛᱮ ᱥᱤᱵᱩ ᱵᱟᱹᱵᱩ ᱦᱚᱸ ᱱᱟᱣᱟ ᱟᱭᱳᱣᱟᱜ ᱫᱩᱞᱟᱹᱲ ᱛᱮ ᱟᱹᱰᱤ ᱡᱩᱨ ᱠᱩᱥᱤ ᱨᱟᱹᱥᱠᱟᱹ ᱨᱮᱢᱮᱱᱟᱭᱟ ᱾ ᱢᱤᱫ ᱵᱟᱨ ᱵᱚᱸᱜᱟ ᱛᱮᱜᱮ ᱥᱤᱨᱩ ᱜᱚᱢᱠᱮᱭᱟᱜ ᱜᱷᱟᱸᱨᱚᱧᱡᱽ ᱨᱮ ᱦᱮᱥᱮᱡ ᱥᱮᱠᱮᱡ ᱜᱮ ᱟᱹᱭᱠᱟᱹᱜ ᱠᱟᱱᱟ᱾ ᱚᱱᱟ ᱫᱚ ᱥᱤᱨᱩ ᱜᱚᱢᱠᱮ ᱦᱚᱸ ᱱᱟᱯᱟᱭ ᱛᱮ ᱟᱹᱭᱠᱟᱹᱣ ᱫᱟᱲᱮᱭᱟᱜ ᱠᱟᱱᱟᱭ ᱾ ᱜᱷᱟᱸᱨᱚᱧᱡᱽ ᱨᱮ ᱛᱤᱨᱞᱟᱹ ᱦᱚᱯᱚᱱ ᱵᱟᱝ ᱛᱟᱦᱮᱱ ᱠᱷᱟᱱ ᱚᱠᱟ ᱞᱮᱠᱟ ᱟᱴᱠᱟᱨᱚᱜᱼᱟ, ᱚᱱᱟ ᱫᱚ ᱥᱤᱨᱩ ᱜᱚᱢᱠᱮ ᱥᱟᱹᱨᱤ ᱜᱮ ᱟᱹᱭᱠᱟᱹᱣ ᱠᱮᱫᱼᱟᱭ ᱾ ᱪᱷᱩᱴᱠᱤ ᱮᱨᱟ ᱫᱩᱞᱟᱹᱨᱤ ᱢᱟᱹᱭ ᱥᱟᱹᱨᱤᱜᱮ ᱟᱹᱰᱤ ᱱᱟᱯᱟᱭ ᱩᱭᱦᱟᱹᱨ ᱛᱟᱭ, ᱟᱹᱰᱤ ᱱᱟᱯᱟᱭ ᱢᱚᱱᱮ ᱛᱟᱭ᱾ ᱵᱮᱴᱟ ᱥᱤᱵᱩ ᱫᱚ ᱟᱡ ᱤᱡ ᱡᱟᱱᱟᱢ ᱜᱤᱫᱽᱨᱟᱹ ᱞᱮᱠᱟ ᱜᱮ ᱫᱩᱠᱟᱹᱲᱮ ᱠᱟᱱᱟᱭ ᱾ ᱚᱱᱟᱛᱮ ᱥᱟᱱᱟᱢ ᱦᱚᱲ ᱜᱮ ᱫᱩᱞᱟᱹᱨᱤ ᱪᱷᱩᱴᱠᱤ ᱮᱨᱟ ᱫᱚ ᱟᱹᱰᱤ ᱜᱮᱠᱚ ᱫᱩᱞᱟᱹᱲᱮ ᱠᱟᱱᱟ ᱾ ᱥᱤᱨᱩ ᱜᱚᱢᱠᱮ ᱦᱚᱸ ᱟᱹᱰᱤ ᱨᱟᱹᱥᱠᱟᱹ ᱨᱮ ᱢᱮᱱᱟᱭᱟ ᱾

ᱱᱚᱛᱮ ᱵᱮᱴᱟ ᱥᱤᱵᱩ ᱦᱚᱸ ᱯᱨᱟᱭᱢᱟᱨᱤ ᱥᱠᱩᱞ ᱠᱷᱚᱱᱟᱜ ᱦᱟᱭ ᱥᱠᱩᱞ ᱨᱮ ᱠᱤᱱ ᱵᱷᱚᱨᱛᱤ ᱠᱮᱫᱮᱭᱟ ᱟᱨ ᱰᱩᱞᱩᱝ ᱜᱟᱹᱰᱤ ᱠᱤᱱ ᱠᱤᱨᱤᱧ ᱟᱫᱮᱭᱟ ᱾ ᱚᱱᱟ ᱰᱩᱞᱩᱝ ᱜᱟᱹᱰᱤ ᱛᱮᱜᱮ ᱥᱠᱩᱞ ᱫᱚᱭ ᱦᱤᱡᱩᱜ ᱥᱮᱱᱚᱜ ᱠᱟᱱᱟ ᱥᱤᱵᱩ ᱵᱮᱴᱟ ᱫᱚ᱾ ᱟᱨᱦᱚᱸ ᱨᱟᱹᱥᱠᱟᱹ ᱨᱮᱱᱟᱜ ᱠᱟᱛᱷᱟ ᱫᱩᱞᱟᱹᱨᱤ ᱦᱚᱸ ᱦᱟᱢᱟᱞ ᱦᱚᱲᱢᱚ ᱢᱮᱱᱟᱭᱟ ᱾ ᱵᱩᱲᱠᱤ ᱮᱨᱟ ᱵᱚᱸᱜᱟ ᱛᱟᱞᱟ ᱟᱠᱟᱱ ᱫᱷᱚᱱᱢᱩᱱᱤ ᱨᱤᱱ ᱟᱭᱳ ᱵᱟᱵᱟ ᱦᱚᱸ ᱞᱚᱜᱚᱱ ᱞᱚᱜᱚᱱ ᱜᱮ ᱦᱤᱨᱤ ᱠᱤᱱ ᱦᱮᱡ ᱜᱚᱫᱚᱜᱼᱟ ᱾ ᱫᱩᱞᱟᱹᱨᱤ ᱢᱟᱹᱭ ᱦᱚᱸ ᱟᱹᱰᱤ ᱡᱩᱨ ᱠᱩᱥᱤ ᱜᱮ ᱟᱹᱭᱠᱟᱹᱣ ᱟᱭ ᱟᱨ ᱱᱩᱠᱤᱱ ᱟᱭᱳ ᱵᱟᱵᱟ ᱦᱚᱸ ᱚᱱᱠᱟ ᱜᱮ ᱾ ᱱᱚᱛᱮ ᱥᱤᱵᱩ ᱵᱮᱴᱟᱣᱟᱜ ᱠᱟᱛᱷᱟ ᱢᱟ ᱞᱟᱹᱭ ᱜᱮ ᱵᱟᱝ ᱜᱟᱱᱚᱜᱼᱟ ᱾ ᱵᱟᱨᱭᱟ ᱵᱟᱨᱭᱟ ᱢᱟᱢᱚ ᱚᱲᱟᱜ ᱨᱮᱱᱟᱜ ᱫᱩᱞᱟᱹᱲ, ᱥᱟᱹᱨᱤ ᱜᱮ ᱫᱷᱚᱱᱢᱩᱱᱤ ᱱᱚᱣᱟ ᱫᱷᱩᱲᱤ ᱫᱷᱟᱹᱨᱛᱤ ᱨᱮ ᱵᱟᱹᱱᱩᱜ ᱮᱭᱟ ᱢᱮᱱᱠᱷᱟᱱ ᱫᱷᱚᱱᱢᱩᱱᱤ ᱫᱚ ᱡᱷᱚᱛᱚᱢᱟᱜ ᱜᱮᱭ ᱵᱟᱹᱜᱤ ᱦᱚᱴᱚ ᱟᱠᱟᱣᱫᱟ ᱾ ᱫᱩᱞᱟᱹᱨᱤ ᱦᱚᱸ ᱧᱟᱢ ᱟᱠᱟᱫᱟᱭ ᱵᱟᱨᱭᱟ ᱵᱟᱨᱭᱟ ᱟᱭᱳ ᱵᱟᱵᱟ, ᱵᱚᱠᱚ ᱵᱚᱭᱦᱟ ᱚᱲᱟᱜ ᱾ ᱥᱤᱨᱩ ᱜᱚᱢᱠᱮ ᱦᱚᱸ ᱵᱟᱵᱟᱨᱭᱟ ᱱᱟᱹᱭᱦᱟᱹᱨ ᱟᱭᱢᱟ ᱫᱩᱞᱟᱹᱲ᱾ ᱵᱟᱨᱭᱟ ᱱᱟᱹᱭᱦᱟᱹᱨ ᱨᱤᱱ ᱥᱟᱱᱟᱢ ᱠᱚᱜᱮ ᱠᱚ ᱦᱤᱨᱤ ᱦᱤᱯᱤᱨᱤᱜᱼᱟ, ᱟᱹᱰᱤ ᱱᱟᱯᱟᱭ ᱥᱟᱹᱜᱟᱹᱭ ᱛᱮᱠᱚ ᱛᱚᱞ ᱟᱠᱟᱱᱟ ᱾ ᱱᱚᱝᱠᱟ ᱦᱚᱸ ᱢᱚᱱᱮ ᱨᱮ ᱦᱮᱡ ᱜᱚᱫᱚᱜᱼᱟ ᱯᱟᱞᱮᱱ ᱪᱚᱴ ᱪᱟᱸᱫᱳᱭ ᱥᱮᱯᱮᱧ ᱟᱠᱟᱫ ᱠᱚᱣᱟ ᱾ ᱫᱷᱚᱱᱢᱩᱱᱤ ᱨᱤᱱ ᱟᱭᱳ ᱵᱟᱵᱟ, ᱵᱚᱠᱚ ᱵᱚᱭᱦᱟ, ᱦᱤᱞᱤ ᱥᱟᱱᱟᱢ ᱠᱚᱜᱮ ᱫᱩᱞᱟᱹᱨᱤ ᱢᱟᱹᱭ ᱫᱚ ᱟᱹᱰᱤ ᱜᱮᱠᱚ ᱫᱩᱞᱟᱹᱲ ᱟᱭᱟ ᱾ ᱚᱱᱟᱛᱮ ᱫᱩᱞᱟᱹᱨᱤ ᱢᱟᱹᱭ ᱦᱚᱸ ᱞᱚᱜᱚᱱ ᱞᱚᱜᱚᱱ ᱜᱮ ᱦᱤᱨᱤ ᱫᱚᱭ ᱥᱮᱱ ᱜᱚᱫᱚᱜᱼᱟ ᱾ ᱫᱩᱞᱟᱹᱨᱤ ᱢᱟᱹᱭ ᱟᱜ ᱵᱮᱵᱷᱟᱨ ᱛᱮ ᱫᱷᱚᱱᱢᱩᱱᱤ ᱢᱮᱱᱟᱭ ᱞᱮᱠᱟ ᱜᱮᱠᱚ ᱟᱹᱭᱠᱟᱹᱣᱟ᱾ ᱫᱩᱞᱟᱹᱨᱤ ᱢᱟᱹᱭ ᱦᱚᱸ ᱚᱸᱰᱮ ᱜᱮ ᱡᱟᱱᱟᱢ ᱚᱲᱟᱜ ᱞᱮᱠᱟᱭ ᱟᱹᱭᱠᱟᱹᱣᱟ ᱾ ᱥᱟᱹᱨᱤ ᱜᱮ ᱱᱚᱣᱟ ᱫᱷᱟᱹᱨᱛᱤ ᱨᱮ ᱫᱩᱞᱟᱹᱲ, ᱥᱩᱞᱩᱠ, ᱱᱤᱨᱟᱹᱭ ᱛᱟᱦᱮᱱ ᱜᱮ ᱯᱟᱞᱮᱱ ᱱᱟᱯᱟᱭᱟ ᱾ ᱫᱩᱞᱟᱹᱨᱤ ᱫᱚ ᱱᱩᱱᱟᱹᱜ ᱜᱮ ᱱᱟᱯᱟᱭ ᱩᱭᱦᱟᱹᱨ ᱛᱟᱭ ᱱᱟᱯᱟᱭ ᱵᱮᱵᱷᱟᱨ ᱛᱟᱭ, ᱯᱮᱭᱟ ᱚᱲᱟᱜ ᱫᱚ ᱫᱤᱫ ᱜᱮ ᱫᱚᱦᱚ ᱟᱠᱟᱫᱟᱭ ᱾

ᱫᱩᱞᱟᱹᱨᱤ ᱦᱟᱢᱟᱞ ᱦᱚᱲᱢᱚ ᱠᱷᱚᱱᱟᱜ ᱟᱬᱜᱳ ᱮᱱᱟᱭ ᱵᱤᱴᱤ ᱜᱮ ᱦᱮᱢ ᱦᱚᱵᱚᱨ ᱟᱱᱟᱭ᱾ ᱥᱤᱨᱩ ᱜᱚᱢᱠᱮ ᱟᱜ ᱚᱲᱟᱜ ᱫᱚ ᱟᱨᱦᱚᱸ ᱢᱟᱨᱥᱟᱞ ᱮᱱ ᱞᱮᱠᱟ ᱟᱹᱭᱠᱟᱹᱣᱚᱜ ᱠᱟᱱᱟ ᱾ ᱥᱟᱱᱟᱢ ᱦᱚᱲ ᱜᱮ ᱟᱹᱰᱤ ᱨᱟᱹᱥᱠᱟᱹ ᱨᱮ ᱢᱮᱱᱟᱜ ᱠᱚᱣᱟ᱾ ᱵᱟᱱᱟᱨ ᱯᱟᱦᱴᱟ ᱨᱤᱱ ᱟᱭᱳ ᱵᱟᱵᱟ ᱠᱤᱱ ᱥᱮᱴᱮᱨ ᱮᱱᱟ᱾ ᱪᱮᱫ ᱛᱮᱦᱚᱸ ᱮᱴᱠᱮᱴᱚᱬᱮ ᱵᱟᱹᱱᱩᱜᱼᱟ, ᱛᱤᱱᱟᱹᱜ ᱨᱟᱹᱥᱠᱟᱹ ᱨᱮᱱᱟᱜ ᱠᱟᱛᱷᱟ ᱾ ᱫᱩᱞᱟᱹᱨᱤ ᱢᱟᱹᱭ ᱢᱚᱱᱮ ᱢᱚᱱᱮᱛᱮ ᱩᱭᱦᱟᱹᱨ ᱮᱫᱟᱭ ᱪᱮᱫ ᱫᱩᱠᱷ ᱜᱮ ᱵᱟᱝᱠᱚ ᱟᱹᱭᱠᱟᱹᱣ ᱦᱚᱪᱚ ᱞᱤᱫᱤᱧᱟ ᱵᱟᱱᱟᱨ ᱯᱟᱦᱴᱟ ᱟᱭᱳ ᱵᱟᱵᱟ ᱚᱲᱟᱜ ᱠᱷᱚᱱᱟᱜ ᱾ ᱫᱩᱞᱟᱹᱨᱤ ᱥᱟᱶᱛᱮ ᱥᱤᱨᱩ ᱜᱚᱢᱠᱮ, ᱥᱤᱵᱩ ᱵᱮᱴᱟ ᱱᱩᱠᱩᱣᱟᱜ ᱢᱚᱞᱚᱝ ᱫᱚ ᱟᱹᱰᱤ ᱱᱟᱯᱟᱭᱟ ᱾ ᱥᱤᱨᱩ ᱜᱚᱢᱠᱮ ᱱᱚᱝᱠᱟᱱ ᱪᱷᱩᱴᱠᱤ ᱮᱨᱟᱭ ᱧᱟᱢ ᱡᱚᱝᱟ ᱩᱭᱦᱟᱹᱨ ᱛᱮᱦᱚᱸ ᱵᱟᱝᱜᱮᱭ ᱩᱭᱦᱟᱹᱨ ᱛᱤᱭᱩᱜ ᱫᱟᱲᱮᱭᱟᱜ ᱠᱟᱱᱟ ᱾ ᱱᱚᱛᱮ ᱵᱟᱵᱟᱨᱭᱟ ᱱᱟᱹᱭᱦᱟᱹᱨ ᱦᱚᱸ ᱚᱱᱠᱟ ᱜᱮ ᱱᱟᱯᱟᱭ ᱾ ᱫᱷᱟᱹᱨᱛᱤ ᱨᱮ ᱱᱚᱝᱠᱟᱱ ᱦᱟᱱᱟᱨ ᱵᱩᱰᱷᱤ ᱦᱚᱧᱦᱟᱨ ᱦᱟᱲᱟᱢ ᱢᱮᱱᱟᱜ ᱠᱚᱣᱟ ᱹ ᱹ ᱹ ᱹ ᱹ ᱡᱟᱦᱟᱸ ᱫᱩᱠ ᱢᱩᱦᱤᱢ ᱨᱤᱧ ᱛᱟᱦᱮᱸ ᱠᱟᱱᱟ ᱚᱱᱟ ᱫᱩᱠ ᱫᱚᱨᱭᱟ ᱠᱷᱚᱱᱟᱜ ᱱᱟᱹᱭᱦᱟᱹᱨ ᱯᱟᱦᱴᱟ ᱱᱚᱛᱮ ᱪᱷᱩᱴᱠᱤ ᱮᱨᱟ ᱫᱩᱞᱟᱹᱨᱤᱭᱟᱜ ᱢᱚᱞᱚᱝ ᱡᱚᱥ ᱛᱮ ᱯᱟᱞᱮᱱ ᱥᱟᱱᱟᱢᱟᱜ ᱜᱮ ᱥᱟᱹᱜᱩᱱ ᱟᱠᱟᱱᱟ ᱾

ᱥᱤᱵᱩ ᱵᱮᱴᱟ ᱦᱚᱸ ᱜᱮᱞᱵᱟᱨ ᱪᱟᱱᱟᱪ ᱯᱟᱥ ᱠᱟᱛᱮ ᱱᱤᱛᱚᱜ ᱪᱚᱞᱞᱮᱜᱮ ᱨᱮ ᱠᱤᱱ ᱵᱷᱚᱨᱛᱤ ᱠᱮᱫᱮᱭᱟ ᱾ ᱟᱹᱰᱤ ᱱᱟᱯᱟᱭ ᱛᱮ ᱚᱞᱚᱜ ᱯᱟᱲᱦᱟᱜ ᱠᱟᱱᱟᱭ᱾ ᱫᱩᱞᱟᱹᱨᱤ ᱟᱨ ᱥᱤᱨᱩ ᱜᱚᱢᱠᱮ ᱟᱹᱰᱤ ᱦᱮᱥᱮᱡ ᱥᱮᱠᱮᱡ ᱢᱮᱱᱟᱜ ᱠᱤᱱᱟ᱾ ᱵᱤᱴᱤ ᱦᱚᱸ ᱢᱟᱨᱟᱝ ᱤᱫᱤ ᱮᱱᱟᱭ, ᱯᱮ ᱥᱮᱨᱢᱟ ᱩᱢᱮᱨ ᱦᱩᱭ ᱮᱱ ᱛᱟᱭᱟ ᱾ ᱫᱩᱞᱟᱹᱨᱤᱭᱟᱜ ᱱᱚᱣᱟ ᱜᱮ ᱩᱭᱦᱟᱹᱨ ᱢᱮᱱᱟᱜ ᱛᱟᱭᱟ ᱢᱤᱫᱴᱟᱝ ᱵᱮᱴᱟ ᱟᱨ ᱢᱤᱫᱴᱟᱝ ᱵᱤᱴᱤ ᱟᱫᱚ ᱜᱷᱟᱸᱨᱚᱧᱡᱽ ᱵᱟᱝᱞᱤᱧ ᱢᱟᱨᱟᱝᱟ ᱾ ᱪᱮᱫᱟᱜ ᱵᱟᱝ ᱥᱮ ᱱᱩᱠᱤᱱ ᱜᱤᱫᱽᱨᱟᱹ ᱱᱟᱯᱟᱭ ᱛᱮ ᱚᱞᱚᱜ ᱯᱟᱲᱦᱟᱣ ᱥᱮᱬᱟ ᱦᱚᱪᱚ ᱠᱤᱱᱟ᱾ ᱦᱩᱲᱩ ᱪᱟᱣᱞᱮ ᱟᱹᱠᱷᱨᱤᱧ ᱠᱟᱛᱮ ᱚᱞᱚᱜ ᱥᱮᱬᱟ ᱦᱚᱪᱚ ᱫᱚ ᱟᱹᱰᱤ ᱟᱱᱟᱴᱟ ᱾ ᱚᱱᱟ ᱫᱚ ᱥᱤᱨᱩ ᱜᱚᱢᱠᱮ ᱟᱨ ᱫᱩᱞᱟᱹᱨᱤᱭᱟᱜ ᱩᱭᱦᱟᱹᱨ ᱢᱮᱱᱟᱜ ᱛᱟᱹᱠᱤᱱᱟ ᱾ ᱧᱮᱞ ᱧᱮᱞ ᱛᱮᱜᱮ ᱵᱮᱴᱟ ᱦᱚᱸ ᱠᱚᱞᱮᱡᱽ ᱠᱷᱟᱱᱟᱜ ᱵᱤᱹ ᱮᱹ ᱯᱟᱥ ᱠᱟᱛᱮ ᱩᱰᱩᱠ ᱮᱱᱟᱭ ᱾ ᱥᱤᱨᱩ ᱜᱚᱢᱠᱮᱭᱟᱜ ᱩᱭᱦᱟᱹᱨ ᱢᱮᱱᱟᱜ ᱛᱟᱭᱟ ᱥᱤᱵᱩ ᱵᱮᱴᱟ ᱵᱤᱹ ᱮᱰᱹ ᱯᱟᱲᱦᱟᱣ ᱦᱚᱪᱚ ᱨᱮᱱᱟᱜ ᱾ ᱢᱚᱱᱮ ᱩᱨᱤᱡ ᱠᱟᱛᱮ ᱵᱷᱚᱨᱛᱤ ᱠᱮᱫᱮᱭᱟᱭ ᱵᱤᱹ ᱮᱰᱹ ᱠᱚᱞᱮᱡᱽ ᱨᱮ ᱾ ᱱᱚᱛᱮ ᱵᱤᱴᱤ ᱦᱚᱸ ᱦᱟᱭ ᱥᱠᱩᱞ ᱨᱮ ᱯᱟᱲᱦᱟᱜ ᱠᱟᱱᱟᱭ ᱾ ᱵᱟᱨᱭᱟ ᱜᱤᱫᱽᱨᱟᱹ ᱟᱨ ᱡᱩᱨᱤ ᱡᱚᱛᱟ ᱱᱟᱭ ᱛᱮ ᱱᱟᱯᱟᱭ ᱛᱮ ᱢᱮᱱᱟᱜ ᱠᱚᱣᱟ ᱾ ᱥᱤᱵᱩ ᱵᱮᱴᱟ ᱫᱚ ᱛᱤᱥ ᱦᱚᱸ ᱟᱭᱳᱣᱟᱜ ᱚᱵᱷᱟᱵᱽ ᱵᱟᱝᱜᱮᱭ ᱟᱹᱭᱠᱟᱹᱣ ᱞᱮᱫᱼᱟ ᱾ ᱟᱭᱳ ᱵᱟᱵᱟᱣᱟᱜ ᱫᱩᱞᱟᱹᱲ ᱨᱮᱭ ᱦᱟᱨᱟ ᱵᱩᱨᱩ ᱮᱱᱟ ᱾ ᱵᱤᱹ ᱮᱰᱹ ᱯᱟᱥ ᱠᱟᱛᱮ ᱦᱚᱸ ᱩᱰᱩᱠ ᱮᱱᱟᱭ ᱾ ᱛᱤᱥ ᱠᱚᱨᱮᱪᱚ ᱵᱟᱨ ᱥᱮᱨᱢᱟ ᱯᱟᱨᱚᱢ ᱮᱱᱟ ᱥᱤᱵᱩ ᱵᱮᱴᱟ ᱫᱚ ᱚᱠᱟ ᱦᱚᱸ ᱵᱟᱝ ᱜᱮᱭ ᱵᱩᱡᱷᱟᱹᱣ ᱞᱮᱫᱼᱟ ᱾ ᱱᱚᱣᱟ ᱫᱚ ᱥᱟᱹᱨᱤ ᱠᱟᱛᱷᱟ ᱠᱟᱱᱟ ᱨᱟᱹᱥᱠᱟᱹ ᱥᱮ ᱱᱟᱯᱟᱭ ᱚᱠᱛᱚ ᱫᱚ ᱟᱹᱰᱤ ᱞᱚᱜᱚᱱ ᱜᱮ ᱯᱟᱨᱚᱢᱚᱜᱼᱟ, ᱢᱮᱱᱠᱷᱟᱱ ᱫᱩᱠ ᱦᱟᱨᱠᱮᱛ ᱥᱮ ᱵᱟᱹᱲᱤᱡ ᱚᱠᱛᱚ ᱫᱚ ᱵᱟᱝ ᱜᱮ ᱯᱟᱨᱚᱢ ᱞᱟᱹᱜᱤᱫᱚᱜᱼᱟ ᱾ ᱚᱱᱠᱟ ᱜᱮ ᱥᱤᱵᱩ ᱵᱮᱴᱟ ᱦᱚᱸ ᱱᱟᱯᱟᱭ ᱜᱮ ᱯᱟᱲᱦᱟᱜ ᱠᱟᱱᱛᱮ ᱵᱟᱨ ᱥᱮᱨᱢᱟ ᱫᱚ ᱵᱟᱝ ᱜᱮᱭ ᱟᱹᱭᱠᱟᱹᱣ ᱫᱟᱲᱮᱭᱟᱜ ᱠᱟᱱᱟ ᱾ ᱱᱤᱛᱚᱜ ᱫᱚ ᱥᱤᱵᱩ ᱵᱟᱹᱵᱩ ᱪᱟᱹᱠᱨᱤ ᱨᱮᱱᱟᱜ ᱯᱷᱚᱨᱢ ᱠᱚᱜᱮᱭ ᱯᱷᱤᱞᱟᱯ ᱵᱟᱲᱟ ᱮᱫᱟ᱾ ᱥᱟᱹᱨᱤ ᱜᱮ ᱥᱤᱵᱩ ᱵᱮᱴᱟ ᱫᱚ ᱢᱤᱫ ᱥᱮᱨᱢᱟ ᱛᱟᱭᱚᱢ ᱠᱷᱟᱱ ᱜᱮ ᱢᱟᱪᱮᱫ ᱪᱟᱹᱠᱨᱤ ᱧᱟᱢ ᱠᱮᱫᱼᱟᱭ ᱾ ᱚᱱᱟ ᱫᱚ ᱦᱟᱭ ᱥᱠᱩᱞ ᱨᱮ ᱾

ᱱᱚᱣᱟ ᱪᱟᱹᱠᱨᱤ ᱧᱟᱢ ᱠᱟᱛᱮ ᱟᱭᱳ ᱵᱟᱵᱟ ᱟᱹᱰᱤ ᱡᱩᱨ ᱠᱩᱥᱤ ᱨᱟᱹᱥᱠᱟᱹ ᱜᱮ ᱠᱤᱱ ᱟᱴᱠᱟᱨ ᱠᱮᱫᱼᱟ ᱾ ᱱᱚᱛᱮ ᱥᱤᱵᱩ ᱵᱮᱴᱟ ᱦᱚᱸ ᱱᱚᱣᱟ ᱪᱟᱹᱠᱨᱤ ᱦᱩᱭ ᱟᱠᱟᱱ ᱨᱮᱱᱟᱜ ᱵᱮᱣᱨᱟ ᱟᱸᱡᱚᱢ ᱠᱟᱛᱮ ᱥᱤᱵᱩ ᱵᱮᱴᱟ ᱫᱚ ᱟᱭᱳ ᱜᱮ ᱞᱟᱦᱟᱭ ᱢᱮᱛᱟᱭ ᱠᱟᱱᱟ ᱾ ᱢᱮᱱᱠᱷᱟᱱ ᱱᱚᱣᱟ ᱠᱷᱚᱵᱚᱨ
ᱫᱚ ᱥᱤᱨᱩ ᱜᱚᱢᱠᱮ ᱜᱮᱭ ᱢᱮᱛᱟ ᱫᱮ ᱛᱟᱦᱮᱸᱜ ᱫᱩᱞᱟᱹᱨᱤ ᱫᱚ ᱱᱤᱛᱚ ᱫᱚ ᱵᱮᱴᱟᱣᱟᱜ ᱢᱚᱪᱟ ᱠᱷᱚᱱ ᱟᱸᱡᱚᱢ ᱮᱫᱟᱭ ᱮᱸᱜᱟᱛ ᱛᱮᱫ ᱫᱩᱞᱟᱹᱨᱤ ᱾ ᱟᱭᱳ ᱟᱭᱳ ᱵᱟᱰᱟᱭᱟᱢ ᱤᱧᱟᱜ ᱢᱟᱪᱮᱫ ᱪᱟᱹᱠᱨᱤ ᱦᱩᱭ ᱟᱠᱟᱱ ᱛᱤᱧᱟ ᱨᱟᱹᱥᱠᱟᱹ ᱵᱟᱢ ᱵᱩᱡᱷᱟᱹᱣ ᱮᱫᱟ? ᱱᱚᱣᱟ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱟᱭᱳᱣᱟᱜ ᱢᱮᱫ ᱨᱮ ᱢᱮᱫ ᱫᱟᱜ ᱼ ᱪᱮᱫ ᱠᱷᱟᱹᱛᱤᱨ? ᱥᱤᱵᱩ ᱵᱮᱴᱟ ᱦᱚᱸ ᱵᱟᱝᱜᱮᱭ ᱟᱴᱠᱟᱨ ᱫᱟᱲᱮᱭᱟᱜ ᱠᱟᱱ ᱛᱟᱦᱮᱸᱜ? ᱥᱤᱵᱩ ᱵᱟᱹᱵᱩ ᱟᱭᱳᱣᱟᱜ ᱢᱮᱫ ᱫᱟᱜ ᱡᱚᱨᱚ ᱧᱮᱞ ᱛᱮ ᱫᱩᱲᱩᱵ ᱛᱷᱤᱨ ᱮᱱᱟᱭ ᱾ ᱥᱤᱵᱩ ᱵᱮᱴᱟ ᱟᱭᱳᱭᱟᱜ ᱛᱤᱨᱮ ᱥᱟᱵ ᱠᱟᱛᱮ ᱠᱩᱞᱤᱭᱮ ᱠᱟᱱᱟᱭ ᱦᱮᱸ ᱟᱭᱳ ᱤᱧᱟᱜ ᱪᱟᱹᱠᱨᱤ ᱦᱩᱭ ᱠᱟᱱᱟ ᱱᱚᱣᱟ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱟᱢᱟᱜ ᱢᱮᱫ ᱨᱮ ᱢᱮᱫ ᱫᱟᱜ ᱪᱮᱫᱟᱜ? ᱦᱮᱸᱫᱟ ᱟᱭᱳ ᱱᱚᱣᱟ ᱥᱟᱹᱜᱩᱱ ᱵᱮᱣᱨᱟ ᱛᱮ ᱵᱟᱢ ᱠᱩᱥᱤ ᱞᱮᱱᱟ ᱟᱭᱳ ᱯᱟᱞᱮᱱ ᱵᱟᱢ ᱠᱩᱥᱤ ᱟᱠᱟᱱᱟ ᱟᱭᱳ ᱦᱮᱸᱥᱮ? ᱱᱚᱣᱟ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱮᱸᱜᱟᱛ ᱛᱮᱫ ᱟᱨᱦᱚᱸ ᱡᱩᱨ ᱛᱮ ᱨᱟᱜ ᱠᱮᱫᱼᱟᱭ ᱾ ᱟᱫᱚ ᱱᱚᱣᱟ ᱠᱟᱛᱷᱟ ᱜᱮ ᱟᱭᱳ ᱫᱚ ᱢᱮᱱ ᱠᱮᱫᱼᱟᱭ ᱵᱮᱴᱟ ᱟᱢ ᱟᱨ ᱦᱚᱯᱚᱱ ᱢᱟᱹᱭ ᱞᱟᱹᱜᱤᱫ ᱛᱮ ᱥᱤᱧ ᱧᱤᱫᱟᱹ ᱪᱚᱴ ᱪᱟᱸᱫᱳ ᱴᱷᱮᱱᱤᱧ ᱜᱚᱰ ᱡᱚᱦᱟᱨ ᱮᱫᱟ ᱟᱹᱠᱷᱤᱨ ᱟᱹᱵᱤᱱᱟᱜ ᱢᱟᱨᱥᱟᱞᱚᱜ ᱢᱟ ᱾ ᱛᱮᱦᱮᱧ ᱤᱧᱟᱜ ᱠᱩᱠᱢᱩ ᱥᱟᱹᱨᱤ ᱮᱱᱟ ᱵᱮᱴᱟ ᱡᱤᱣᱤ ᱨᱮ ᱟᱹᱰᱤ ᱡᱩᱨ ᱥᱟᱹᱱᱛᱤᱧ ᱧᱟᱢ ᱠᱮᱫᱼᱟ ᱵᱮᱴᱟ᱾ ᱤᱧᱟᱜ ᱡᱟᱦᱟᱸ ᱠᱩᱠᱢᱩ ᱛᱟᱦᱮᱸ ᱠᱟᱱᱟ ᱵᱮᱴᱟ ᱥᱟᱹᱨᱤ ᱮᱱᱟ ᱵᱮᱴᱟ ᱥᱟᱹᱨᱤ ᱮᱱᱟ ᱾ ᱱᱚᱣᱟ ᱫᱚ ᱤᱧᱟᱜ ᱫᱩᱠ ᱨᱮᱱᱟᱜ ᱢᱮᱫ ᱫᱟᱜ ᱵᱟᱝ ᱠᱟᱱᱟ ᱵᱮᱴᱟ, ᱨᱟᱹᱥᱠᱟᱹ ᱛᱮ ᱤᱧᱟᱜ ᱢᱮᱫ ᱫᱟᱜ ᱡᱚᱨᱚᱜ ᱠᱟᱱᱟ ᱵᱮᱴᱟ ᱾

ᱱᱚᱣᱟ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱥᱤᱵᱩ ᱵᱮᱴᱟ ᱦᱚᱸ ᱟᱹᱰᱤ ᱢᱟᱨᱟᱝ ᱛᱮ ᱨᱟᱜ ᱜᱚᱫ ᱠᱮᱫᱼᱟᱭ ᱾ ᱟᱫᱚ ᱟᱭᱳ ᱴᱷᱮᱱ ᱦᱟᱹᱲᱩᱵ ᱜᱚᱫ ᱮᱱᱟᱭ ᱾ ᱥᱤᱵᱩ ᱵᱮᱴᱟ ᱦᱚᱸ ᱨᱟᱜ ᱛᱩᱞᱩᱡ ᱜᱮ ᱮᱸᱜᱟᱛ ᱛᱮᱫ ᱢᱮᱛᱟᱭ ᱠᱟᱱᱟᱭ, ᱟᱭᱳ ᱟᱢ ᱫᱚ ᱤᱧᱤᱡ ᱪᱷᱩᱴᱠᱤ ᱟᱭᱳ ᱠᱟᱱᱟᱢ ᱥᱟᱹᱨᱤ ᱜᱮ, ᱢᱮᱱᱠᱷᱟᱱ ᱟᱭᱳ ᱟᱢ ᱫᱚ ᱤᱧ ᱴᱷᱮᱱ ᱪᱷᱩᱴᱠᱤ ᱟᱭᱳ ᱫᱚ ᱵᱟᱝ ᱠᱟᱱᱟᱢ ᱟᱭᱳ ᱾ ᱦᱩᱰᱤᱧ ᱦᱩᱰᱤᱧ ᱠᱷᱚᱱᱮᱢ ᱦᱟᱺᱵᱩᱫ ᱦᱟᱨᱟ ᱠᱤᱫᱤᱧᱟ, ᱫᱟᱜ ᱫᱟᱠᱟᱢ ᱟᱡᱚ ᱟᱫᱤᱧᱟ, ᱩᱢ ᱚᱡᱚᱜ ᱨᱮ ᱛᱤᱥ ᱦᱚᱸ ᱵᱟᱢ ᱦᱤᱲᱤᱧ ᱟᱠᱟᱫᱤᱧᱟ, ᱤᱧᱟᱜ ᱛᱚᱦᱚᱫ ᱦᱟᱲᱟᱜ ᱨᱮ ᱟᱭᱳ ᱟᱢᱟᱜ ᱢᱮᱫ ᱫᱟᱜ ᱡᱚᱨᱚ ᱟᱠᱟᱱᱟ
ᱟᱹᱰᱤ ᱫᱩᱞᱟᱹᱲ ᱨᱮᱢ ᱫᱚᱦᱚ ᱟᱠᱟᱫᱤᱧᱟ ᱟᱭᱳ, ᱟᱢᱟᱜ ᱱᱚᱣᱟ ᱫᱩᱞᱟᱹᱲ ᱨᱮᱱᱟᱜ ᱚᱨᱡᱚ ᱜᱮ ᱛᱮᱦᱮᱧ ᱫᱚ ᱥᱟᱹᱨᱤ ᱮᱱᱟ ᱟᱭᱳ᱾ ᱱᱚᱣᱟ ᱫᱷᱩᱲᱤ ᱫᱷᱟᱹᱨᱛᱤ ᱨᱮ ᱥᱟᱱᱟᱢ ᱜᱤᱫᱽᱨᱟᱹ ᱠᱚ ᱤᱧ ᱞᱮᱠᱟᱱ ᱟᱭᱳ ᱠᱚ ᱧᱟᱢ ᱟᱱᱠᱷᱟᱱ ᱯᱟᱞᱮᱱ ᱤᱧ ᱞᱮᱠᱟ ᱜᱮᱠᱚ ᱦᱟᱨᱟ ᱵᱩᱨᱩᱜᱼᱟ ᱾ ᱟᱫᱚ ᱟᱭᱳ
ᱟᱨ ᱦᱚᱯᱚᱱ ᱛᱮ ᱠᱤᱱ ᱞᱟᱸᱫᱟ ᱢᱤᱫ ᱟᱱᱟ ᱾

ᱱᱚᱛᱮ ᱥᱤᱨᱩ ᱜᱚᱢᱠᱮ ᱦᱚᱸ ᱫᱟᱱᱟᱝ ᱨᱮᱭ ᱛᱤᱸᱜᱩ ᱞᱮᱱ ᱛᱟᱦᱮᱫ, ᱫᱟᱱᱟᱝ ᱠᱷᱚᱱᱟᱜ ᱱᱚᱣᱟ ᱠᱟᱛᱷᱟ ᱠᱚ ᱟᱸᱡᱚᱢ ᱠᱟᱛᱮ ᱥᱤᱨᱩ ᱜᱚᱢᱠᱮᱭᱟᱜ ᱦᱤᱰᱤᱨ ᱦᱤᱰᱤᱨ ᱢᱮᱫ ᱫᱟᱜ ᱡᱚᱨᱚᱜ ᱠᱟᱱ ᱛᱟᱭᱟ᱾ ᱛᱟᱦᱟᱣ ᱛᱟᱦᱟᱣ ᱛᱮ ᱥᱤᱨᱩ ᱜᱚᱢᱠᱮ ᱥᱟᱢᱟᱝ ᱥᱮᱫ ᱦᱮᱡ ᱮᱱᱟᱭ, ᱟᱫᱚᱭ ᱢᱮᱱ ᱜᱚᱫ
ᱠᱮᱫᱼᱟ, ᱱᱚᱜᱼᱭ ᱱᱚᱝᱠᱟ, ᱥᱟᱹᱨᱤᱜᱮ ᱜᱳ ᱵᱟᱹᱵᱩ ᱮᱸᱜᱟᱛ ᱟᱢ ᱫᱚ ᱢᱟᱹᱱᱢᱤ ᱪᱤᱱᱛᱮ ᱪᱟᱸᱫᱳ ᱵᱚᱸᱜᱟ ᱯᱟᱞᱮᱱ ᱱᱚᱣᱟ ᱚᱲᱟᱜ ᱨᱮ ᱵᱚᱸᱜᱟ ᱜᱮᱭ ᱵᱷᱮᱡᱟ ᱟᱠᱟᱫ ᱢᱮᱭᱟ ᱾ ᱟᱢᱟᱜ ᱱᱚᱣᱟ ᱮᱱᱮᱢ ᱫᱚ ᱛᱤᱥ ᱦᱚᱸ ᱵᱟᱝ ᱜᱤᱧ ᱦᱤᱲᱤᱧ ᱠᱮᱭᱟ ᱟᱨ ᱱᱚᱣᱟ ᱨᱤᱱ ᱫᱚ ᱡᱤᱣᱤᱫ ᱵᱷᱩᱨ ᱫᱚ ᱚᱦᱚᱜᱤᱧ ᱦᱟᱞᱟ ᱨᱩᱣᱟᱹᱲ ᱠᱮᱢᱟ ᱾ ᱤᱧ ᱴᱷᱮᱱ ᱟᱢ ᱫᱚ ᱵᱚᱸᱜᱟ ᱵᱟᱨᱟ ᱵᱟᱹᱨᱤ ᱠᱟᱱᱟᱢ ᱾ ᱥᱟᱱᱟᱢ ᱛᱤᱨᱞᱟᱹ ᱦᱚᱯᱚᱱ ᱠᱚᱣᱟᱜ ᱩᱭᱦᱟᱹᱨ ᱟᱢ ᱞᱮᱠᱟ ᱜᱮ ᱦᱩᱭ ᱠᱚᱜ ᱢᱟ ᱵᱟᱲᱮ᱾ ᱥᱤᱨᱩ ᱮᱨᱟᱛ ᱦᱚᱸ ᱢᱮᱱ ᱜᱚᱫ ᱠᱮᱫᱼᱟᱭ ᱮᱜᱳ ᱼ ᱵᱟᱹᱵᱩ ᱟᱯᱟᱛ ᱤᱧᱟᱜ ᱢᱚᱞᱚᱝ ᱫᱚ ᱥᱟᱹᱨᱤ ᱜᱮ ᱟᱹᱰᱤ ᱱᱟᱯᱟᱭᱟ, ᱟᱢ ᱞᱮᱠᱟᱱ ᱵᱚᱸᱜᱟ ᱵᱟᱨᱟ ᱵᱟᱹᱨᱤ ᱦᱚᱲ ᱥᱟᱶ ᱜᱷᱟᱸᱨᱚᱧᱡᱽ ᱥᱤᱠᱲᱤ ᱨᱤᱧ ᱛᱚᱞ ᱟᱠᱟᱱᱟ ᱾ ᱟᱨᱦᱚᱸ ᱡᱚᱛᱚ ᱠᱷᱚᱱᱟᱜ ᱡᱤᱣᱤ ᱨᱮᱱᱟᱜ ᱢᱟᱨᱟᱝ ᱨᱟᱹᱥᱠᱟᱹ ᱛᱤᱧ ᱥᱤᱵᱩ ᱵᱮᱴᱟ ᱞᱮᱠᱟᱱ ᱞᱮᱴᱠᱟ ᱪᱟᱸᱫᱳ ᱵᱚᱸᱜᱟ ᱤᱧᱟᱜ ᱠᱚᱞᱮ ᱨᱮ ᱪᱟᱞ ᱟᱠᱟᱣ ᱫᱤᱧᱟᱭ ᱾ ᱛᱤᱥ ᱦᱚᱸ ᱵᱟᱝ ᱤᱧ ᱩᱭᱦᱟᱹᱨ ᱞᱮᱫ ᱛᱟᱦᱮᱸᱫ ᱢᱮᱱᱠᱷᱟᱱ ᱛᱮᱦᱮᱧ ᱫᱚ ᱨᱟᱹᱥᱠᱟᱹ ᱛᱮ ᱢᱮᱫ ᱫᱟᱜ ᱡᱚᱨᱚᱜ ᱠᱟᱱ ᱛᱤᱧᱟ ᱵᱟᱹᱵᱩ ᱟᱯᱟᱛ ᱾ ᱤᱧᱟᱜ ᱢᱚᱞᱚᱝ ᱥᱟᱹᱨᱤ ᱜᱮ ᱟᱹᱰᱤ ᱱᱟᱭᱟ ᱟᱹᱰᱤ ᱱᱟᱯᱟᱭᱟ ᱾

***