ᱵᱟᱹᱲᱛᱤ ᱜᱮᱢ ᱠᱟᱹᱢᱤ ᱨᱮᱦᱚᱸ
ᱟᱢᱟᱜ ᱠᱟᱛᱷᱟ ᱫᱚ ᱵᱟᱝ ᱠᱚ ᱵᱩᱡᱷᱟᱹᱣᱼᱟ
ᱟᱭᱳ ᱵᱟᱵᱟ ᱚᱲᱟᱜ ᱨᱮᱦᱚᱸ ᱵᱟᱝ
ᱡᱟᱶᱟᱭ ᱚᱲᱟᱜ ᱨᱮᱦᱚᱸ ᱵᱟᱝᱟ
ᱪᱮᱫᱟᱜ ᱥᱮ ᱟᱢ ᱫᱚᱢ ᱛᱤᱨᱞᱟᱹ ᱠᱟᱱᱟ ᱾
ᱥᱮᱛᱟᱜ ᱠᱷᱚᱱ ᱟᱹᱭᱩᱵ ᱫᱷᱟᱹᱵᱤᱡ
ᱟᱢ ᱫᱚᱢ ᱠᱷᱟᱴᱟᱣᱜᱼᱟ
ᱡᱤᱨᱟᱹᱣ ᱧᱚᱜᱚᱜ ᱢᱮ ᱦᱚᱸ ᱵᱟᱝ ᱠᱚ ᱢᱮᱛᱟᱢ
ᱟᱨ ᱦᱚᱸ ᱵᱚᱨᱚᱢ ᱠᱟᱹᱢᱤ ᱜᱮᱠᱚ ᱩᱫᱩᱜ ᱟᱢᱟ
ᱪᱮᱫᱟᱜ ᱥᱮ ᱟᱢ ᱫᱚᱢ ᱛᱤᱨᱞᱟᱹ ᱠᱟᱱᱟ ᱾
ᱠᱟᱹᱢᱤ ᱡᱚᱛᱚᱣᱟᱜ ᱮᱢ ᱪᱟᱵᱟ ᱠᱟᱜ ᱨᱮᱦᱚᱸ
ᱢᱮᱛᱟᱢ ᱟᱠᱚ ᱚᱲᱟᱜ ᱨᱮ ᱪᱮᱫ ᱪᱚᱢ ᱠᱟᱹᱢᱤ ᱠᱟᱱᱟ
ᱠᱟᱹᱢᱤ ᱨᱮᱭᱟᱜ ᱫᱚ ᱞᱮᱠᱷᱟ ᱜᱮᱛᱟᱢ ᱵᱟᱹᱱᱩᱜ
ᱥᱟᱨᱟ ᱠᱷᱚᱱ ᱠᱷᱩᱴᱩᱨ ᱼ ᱠᱷᱩᱴᱩᱨ ᱮᱢ ᱪᱷᱩᱴᱟᱹᱣ ᱠᱚᱜᱼᱟ
ᱪᱮᱫᱟᱜ ᱥᱮ ᱟᱢ ᱫᱚᱢ ᱛᱤᱨᱞᱟᱹ ᱠᱟᱱᱟ ᱾
ᱡᱟᱦᱟᱸᱱᱟᱜ ᱜᱮ ᱦᱚᱲ ᱠᱚ ᱨᱚᱲ ᱟᱢᱟ
ᱨᱚᱨᱚᱲ ᱛᱩᱞᱩᱡ ᱠᱚ ᱨᱚᱦᱮᱫ ᱢᱮᱭᱟ
ᱛᱮᱞᱟ ᱨᱚᱲ ᱫᱚ ᱟᱞᱚᱢ ᱨᱩᱣᱟᱹᱲᱟ
ᱡᱚᱵᱟᱵᱽ ᱠᱷᱟᱱ ᱫᱚᱢ ᱵᱟᱹᱲᱤᱡ ᱠᱚ ᱢᱮᱛᱟᱢᱟ
ᱪᱮᱫᱟᱜ ᱥᱮ ᱟᱢ ᱫᱚᱢ ᱛᱤᱨᱞᱟᱹ ᱠᱟᱱᱟ ᱾
ᱡᱟᱦᱟᱸ ᱨᱮᱜᱮᱢ ᱛᱟᱦᱮᱸᱱ ᱟᱥᱨᱟ ᱫᱚᱢ ᱠᱷᱚᱡᱚᱜᱼᱟ
ᱱᱟᱹᱲᱤ ᱠᱟᱱᱟᱢ ᱥᱮᱬᱟ ᱫᱟᱨᱮ ᱦᱚᱸᱢ ᱞᱟᱹᱠᱛᱤᱜᱼᱟ
ᱵᱤᱱ ᱡᱷᱟᱴᱟ ᱛᱮ ᱚᱦᱚᱜᱮᱢ ᱦᱟᱨᱟ ᱠᱮᱭᱟ
ᱫᱟᱨᱮ ᱨᱮᱱᱟᱝ ᱩᱢᱩᱞ ᱦᱚᱢ ᱠᱷᱚᱡᱽ ᱜᱮᱭᱟ
ᱪᱮᱫᱟᱜ ᱥᱮ ᱟᱢ ᱫᱚᱢ ᱛᱤᱨᱞᱟᱹ ᱠᱟᱱᱟ ᱾
ᱡᱤᱣᱤ ᱛᱟᱢ ᱫᱚ ᱞᱚᱜ ᱨᱮᱦᱚᱸ
ᱞᱚ ᱠᱟᱛᱮᱱ ᱛᱚᱨᱚᱡᱚᱜ ᱨᱮᱦᱚᱸ
ᱚᱱᱛᱚᱨ ᱢᱚᱱ ᱛᱟᱢᱮ ᱨᱟᱜᱽ ᱨᱮᱦᱚᱸ
ᱦᱚᱲ ᱥᱟᱢᱟᱝ ᱨᱮᱫᱚ ᱞᱟᱸᱫᱟ ᱠᱟᱛᱮ ᱜᱮ ᱨᱚᱲ ᱢᱮ
ᱪᱮᱫᱟᱜ ᱥᱮ ᱟᱢ ᱫᱚᱢ ᱛᱤᱨᱞᱟᱹ ᱠᱟᱱᱟ ᱾
ᱛᱤᱱᱟᱹᱜ ᱫᱤᱱ ᱱᱚᱝᱠᱟ ᱫᱚᱢ ᱛᱷᱤᱨ ᱠᱚᱜᱼᱟ
ᱛᱤᱥᱮᱢ ᱠᱮᱴᱮᱡᱟ ᱞᱤᱪᱟᱹᱲ ᱢᱚᱱᱮ ᱛᱟᱢ
ᱫᱤᱥᱚᱢ ᱛᱮ ᱫᱚ ᱡᱤᱣᱤ ᱛᱟᱢ ᱞᱚ ᱛᱚᱨᱚᱡᱚᱜᱼᱟ
ᱦᱚᱲᱢᱚ ᱥᱟᱱᱟᱢ ᱛᱟᱢ ᱜᱚᱥᱚ ᱢᱚᱥᱚᱫᱚᱜᱼᱟ
ᱪᱮᱫᱟᱜ ᱥᱮ ᱟᱢ ᱫᱚᱢ ᱛᱤᱨᱞᱟᱹ ᱠᱟᱱᱟ ᱾
ᱟᱞᱚᱢ ᱵᱚᱛᱚᱨ ᱞᱟᱡᱟᱣᱚᱜ ᱠᱟᱹᱢᱤ ᱤᱫᱤ ᱢᱮ
ᱠᱚᱲᱟ ᱥᱟᱶ ᱦᱚᱠ ᱦᱚᱸᱛᱟᱢ ᱢᱮᱱᱟᱜ ᱜᱮ
ᱛᱤᱥ ᱦᱚᱸ ᱞᱤᱪᱟᱹᱲ ᱟᱞᱚᱢ ᱩᱣᱦᱟᱹᱨᱚᱜᱼᱟ
ᱫᱤᱞ ᱵᱷᱚᱨᱥᱟ ᱥᱟᱦᱟᱥ ᱛᱟᱢ
ᱦᱟᱯᱮᱱ ᱵᱤᱫᱟᱹᱞ ᱨᱮ ᱟᱢ ᱛᱮᱜᱮ
ᱢᱟᱬᱟᱝ ᱥᱮᱫ ᱮᱢ ᱞᱟᱦᱟᱜᱼᱟ
ᱪᱮᱫᱟᱜ ᱥᱮ ᱟᱢ ᱫᱚᱢ ᱛᱤᱨᱞᱟᱹ ᱠᱟᱱᱟ ᱾
***
