ᱪᱤᱨᱜᱟᱹᱞ

“ᱫᱤᱫᱤ, ᱮ ᱫᱟᱹᱭ! ᱫᱟᱹᱭ! ᱵᱮᱨᱮᱫ ᱢᱮᱥᱮ, ᱚᱠᱚᱭ ᱪᱚ ᱥᱤᱞᱯᱤᱧ ᱠᱚ ᱴᱷᱮᱞᱟᱣ ᱮᱫᱟ ᱾ ”ᱫᱷᱟᱲᱯᱟᱲᱟᱣ ᱵᱮᱨᱮᱫ ᱮᱱᱟᱭ ᱥᱚᱵᱷᱟ ᱫᱟᱹᱭ, ᱨᱟᱱᱤᱭᱟᱜ ᱠᱷᱟᱭ ᱠᱷᱚᱭ ᱦᱚᱦᱚᱛᱮ ᱾ ᱵᱟᱦᱨᱮ ᱨᱮ ᱡᱷᱤᱯᱤᱨ ᱡᱷᱤᱯᱤᱨ ᱢᱤᱫ ᱟᱛᱚᱢ ᱫᱟᱜ ᱾ ᱥᱚᱵᱷᱟ ᱯᱷᱳᱱ ᱨᱟᱲᱟ ᱠᱟᱛᱮᱭ ᱧᱮᱞᱟ,
ᱧᱤᱫᱟᱹ ᱵᱟᱨ ᱥᱟᱰᱮ ᱠᱟᱱᱟ ᱾ ᱵᱟᱲᱜᱮ ᱫᱷᱟᱨᱮ ᱦᱩᱰᱤᱧ ᱡᱟᱱᱟᱞᱟ ᱦᱟᱱᱟ ᱫᱷᱟᱨᱮ ᱨᱮᱱᱟᱜ ᱥᱟᱯᱟᱨᱚᱢ ᱥᱟᱠᱟᱢ ᱠᱷᱚᱱ ᱞᱤᱸᱜᱤ ᱫᱟᱜ ᱞᱟᱛᱟᱨ ᱨᱮ ᱟᱴᱮᱫ ᱟᱠᱟᱱ ᱜᱷᱳᱸᱜᱳ ᱚᱲᱮᱡ ᱨᱮ ᱡᱚᱨᱚᱜ ᱠᱟᱱᱟ, ᱴᱚᱲᱚᱜ~ ᱴᱚᱲᱚᱜ~ ᱴᱚᱲᱚᱜ ᱾

ᱥᱤᱞᱯᱤᱧ ᱟᱨᱦᱚᱸ ᱢᱤᱫ ᱫᱷᱟᱣ ᱞᱟᱲᱟᱣ ᱮᱱᱟ ᱾ ᱥᱚᱱᱛᱚᱨ ᱠᱟᱛᱮ ᱥᱚᱵᱷᱟ ᱚᱱᱛᱮ ᱠᱚᱭᱚᱜ ᱠᱟᱛᱮ ᱩᱭᱦᱟᱹᱨ ᱠᱮᱫᱟᱭ, ᱚᱠᱚᱭ ᱫᱚ ᱩᱱᱟᱹᱜ ᱧᱤᱫᱟᱹ! ᱠᱟᱹᱡ ᱫᱷᱟᱫᱚᱥ ᱦᱚᱸᱭ ᱫᱷᱟᱫᱚᱥ ᱮᱱᱟ ᱾ ᱢᱳᱵᱟᱭᱤᱞ ᱯᱷᱳᱱ ᱨᱮᱱᱟᱜ ᱨᱟᱣᱟᱞ ᱢᱟᱨᱥᱟᱞ ᱛᱮ ᱯᱟᱹᱴᱭᱟᱹ ᱞᱟᱛᱟᱨ ᱨᱮᱱᱟᱜ ᱦᱮᱸᱥᱳ ᱟᱨ ᱦᱟᱯᱟᱭ ᱳᱰᱳᱝ ᱠᱮᱫᱟ ᱾ ᱚᱛ ᱨᱮᱜᱮ ᱟᱭᱟᱜ ᱵᱤᱪᱷᱱᱟᱹ ᱠᱷᱚᱱ ᱦᱟᱱᱟᱥᱟ ᱨᱮ ᱢᱟᱨᱟᱝ ᱵᱤᱪᱷᱱᱟᱹ ᱨᱮ ᱥᱟᱨ ᱥᱟᱨ ᱡᱟ.ᱯᱤᱫ ᱠᱟᱛᱮ ᱠᱚ ᱚᱪᱮᱛ ᱟᱠᱟᱱᱟ ᱢᱩᱱᱤ, ᱦᱤᱸᱥᱤ, ᱠᱟᱹᱨᱢᱤ, ᱡᱷᱟᱱᱳ, ᱢᱟᱭᱱᱚ ᱾ ᱥᱤᱛᱟᱹᱨᱟᱢᱯᱩᱨ ᱚᱞᱚᱜ ᱟᱠᱷᱲᱟ ᱨᱮᱱ ᱜᱮᱞ ᱠᱷᱚᱱ ᱜᱮᱞ ᱢᱚᱬᱮ ᱥᱮᱨᱢᱟ ᱨᱮᱱ ᱦᱩᱰᱤᱧ ᱦᱩᱰᱤᱧ ᱯᱟᱹᱴᱷᱩᱣᱟᱹ ᱠᱩᱲᱤ ᱜᱤᱫᱽᱨᱟᱹ ᱠᱚ ᱾

ᱚᱱᱟ ᱛᱟᱞᱟᱨᱮ ᱟᱨ ᱢᱤᱫ ᱫᱷᱟᱣ ᱥᱤᱞᱯᱤᱧ ᱞᱟᱲᱟᱣ ᱮᱱᱟ ᱾ ᱠᱷᱟᱱ ᱥᱚᱵᱷᱟ ᱫᱚ ᱨᱟᱱᱤ ᱦᱟᱯᱟᱭ ᱮᱢᱟᱫᱮᱛᱮ ᱠᱷᱟᱭ ᱠᱷᱚᱭᱮ ᱢᱮᱛᱟᱫᱮᱭᱟ “ᱪᱚᱞᱚ ᱥᱮ ᱾’’ ᱫᱩᱣᱟᱹᱨ ᱥᱳᱨ ᱨᱮᱠᱤᱱ ᱛᱤᱸᱜᱩᱭᱮᱱ ᱛᱮ ᱥᱚᱵᱷᱟᱭ ᱦᱚᱦᱚ ᱠᱮᱫᱟ ‘ᱚᱠᱚᱭ?’
ᱪᱮᱫ ᱛᱮᱞᱟ ᱦᱚᱸ ᱵᱟ.ᱱᱩᱜ-ᱟ ᱾ ᱟᱨ ᱢᱤᱫ ᱫᱷᱟᱣ ᱥᱤᱞᱯᱤᱧ ᱞᱟᱛᱟᱨ ᱥᱮᱫ ᱨᱮ ᱰᱷᱟᱠᱟᱭᱮᱱᱟ ᱾

ᱥᱚᱵᱷᱟ ᱟᱨ ᱦᱚᱸ ᱡᱳᱨ ᱛᱮᱭ ᱦᱚᱦᱚ ᱠᱮᱫᱟ ‘ᱚᱠᱚᱭ ᱫᱚ?’ ᱟᱨ ᱦᱚᱸ ᱛᱷᱤᱨ ᱛᱷᱟᱨ ᱾ ᱱᱤᱡᱷᱩᱢ ᱾

ᱟᱫᱚ ᱵᱟᱹᱭ ᱵᱟᱹᱭ ᱛᱮ ᱥᱚᱵᱷᱟ ᱥᱤᱞᱯᱤᱧ ᱮ ᱡᱷᱤᱡ ᱞᱮᱠᱷᱟᱱ ᱨᱟᱱᱤ ᱫᱚ ᱠᱟᱭᱫᱷᱤ ᱫᱟᱞ ᱞᱟᱹᱜᱤᱫ ᱦᱟᱯᱟᱭ ᱛᱩᱞ ᱠᱮᱫᱟ ᱟ.ᱰᱤ ᱡᱳᱨ ᱛᱮ ᱾ᱧᱮᱞᱮᱭᱟᱠᱤᱱ ᱢᱤᱫᱴᱟᱹᱝ ᱦᱮᱸᱫᱮ ᱥᱮᱛᱟ ᱾ ᱞᱚᱦᱚᱫ ᱥᱚᱨᱮᱡ ᱯᱚᱴᱮᱡ ᱟᱠᱟᱱᱟᱭ ᱾ ᱟ.ᱠᱤᱱ ᱧᱮᱞ ᱛᱮ ᱢᱮᱞᱟ ᱯᱤᱸᱰᱟᱹ ᱥᱮᱫ ᱮ ᱞᱟᱦᱟ ᱪᱟᱞᱟᱣ ᱮᱱᱟ ᱾ ᱥᱚᱵᱷᱟ ᱛᱟᱹᱠᱤᱱᱟᱜ ᱠᱚᱲᱟᱢ ᱠᱷᱚᱱ ᱫᱷᱤᱨᱤ ᱦᱚᱸᱥᱚᱨ ᱧᱩᱨᱮᱱᱟ ᱢᱤᱫᱴᱟᱝ ᱾

ᱚᱵᱤᱥᱥᱤ ᱵᱚᱛᱚᱨ ᱨᱮᱱᱟᱜ ᱜᱮ ᱠᱟᱛᱷᱟ ᱾ ᱥᱚᱵᱷᱟ ᱢᱮᱱᱮᱛ ᱥᱚᱵᱷᱟ ᱥᱚᱨᱮᱱ ᱫᱚ ᱡᱟᱶᱟᱭᱟᱭ ᱚᱲᱟᱜ ᱠᱷᱚᱱ ᱳᱰᱳᱝ ᱵᱟᱦᱮᱨ ᱠᱩᱲᱤ ᱦᱚᱯᱚᱱ ᱾ ᱵᱟᱝ ᱟ! ᱚᱲᱟᱜ ᱠᱷᱚᱱ ᱳᱰᱳᱠ ᱧᱤᱨ ᱨᱮᱱᱟᱜ ᱡᱟᱸᱦᱟ ᱚᱡᱮ ᱠᱚ ᱥᱟᱶᱛᱟ ᱨᱮ ᱛᱟᱸᱦᱮᱱᱼᱡᱮᱞᱮᱠ ᱦᱟᱱᱦᱟᱨ ᱦᱚᱧᱦᱟᱨ ᱜᱚᱲᱚᱢ ᱥᱩᱠ ᱵᱟᱝ ᱮᱢ
ᱫᱟᱲᱮ ᱨᱮᱱᱟᱜ ᱠᱟᱹᱭ, ᱥᱮ ᱢᱟᱛᱟᱞ ᱡᱟᱶᱟᱭᱟᱭ, ᱚᱲᱟᱜ ᱨᱮ ᱫᱟᱞ ᱛᱚᱞ, ᱵᱟᱝᱠᱷᱟᱱ ᱱᱤᱡᱮᱨ ᱡᱟᱶᱟᱭ ᱮ ᱛᱟᱸᱦᱮᱱ ᱛᱩᱞᱩᱡ ᱮᱴᱟᱜ ᱠᱚᱲᱟ ᱥᱟᱞᱟᱜ ᱥᱚᱞᱚᱢ ᱞᱚᱴᱚᱢᱼᱥᱚᱵᱷᱟ ᱟᱜ ᱡᱤᱭᱚᱱᱨᱮ ᱚᱱᱟ ᱠᱚᱫᱚ ᱪᱮᱫ ᱦᱚᱸ ᱵᱟᱝ ᱾

ᱴᱮᱠᱥᱴᱟᱭᱤᱞ ᱤᱱᱡᱤᱱᱤᱭᱟᱨᱤᱝ ᱥᱮᱪᱮᱫ ᱛᱮ ᱥᱮᱪᱮᱫ ᱟᱠᱟᱱ ᱥᱚᱵᱷᱟ ᱡᱚᱠᱷᱮᱡ ᱵᱟᱯᱞᱟ ᱠᱟᱛᱮ ᱤᱱᱠᱟᱢ ᱴᱮᱠᱥ ᱚᱯᱷᱤᱥᱟᱨ ᱡᱟᱶᱟᱭ ᱠᱚᱲᱟ ᱢᱟᱨᱟᱝ ᱵᱟᱡᱟᱨ ᱛᱮᱭ ᱵᱟᱹᱱᱤᱡ ᱤᱫᱤ ᱠᱮᱫᱮᱭᱟ, ᱩᱱ ᱫᱚ ᱯᱮᱲᱟ ᱯᱟᱹᱲᱦᱟᱹ ᱥᱟᱨᱦᱟᱣ ᱥᱟᱨᱦᱟᱣ ᱞᱮᱫᱟ ᱠᱚ ᱾ ᱥᱟᱹᱨᱤ ᱜᱮ ᱢᱟᱹᱭ ᱟᱜ ᱢᱚᱞᱚᱝ ᱠᱟᱱᱟ ᱵᱚᱴᱷᱮ!

ᱥᱚᱵᱷᱟ ᱛᱟᱹᱠᱤᱱᱟᱜ ᱥᱤᱼᱯᱩᱨᱩᱥ ᱥᱟᱹᱜᱟᱹᱭ ᱦᱚᱸ ᱟᱹᱰᱤ ᱱᱟᱯᱟᱭ ᱾ ᱫᱤᱱᱟᱹᱢᱠᱟᱨ ᱡᱤᱭᱚᱱ ᱨᱮ ᱛᱟᱸᱦᱮ ᱠᱟᱛᱮ ᱞᱟᱵᱷ ᱞᱚᱠᱥᱟᱱ ᱦᱤᱥᱟᱹᱵᱽ ᱱᱤᱠᱟᱹᱥ ᱨᱮᱱᱟᱜ ᱜᱷᱟᱹᱰᱨᱤ ᱨᱮᱫᱚ ᱵᱟ.ᱠᱤᱱ ᱟᱹᱪᱩᱨᱚᱜ-ᱟ ᱮᱠᱮᱱ ᱾ ᱟᱠᱤᱱᱟᱜ ᱫᱩᱞᱟᱹᱲ ᱥᱟᱹᱜᱟᱹᱭ ᱡᱮᱣᱭᱮᱫ ᱫᱚᱦᱚᱭ ᱞᱟ.ᱜᱤᱫ ᱵᱟᱱᱟ ᱦᱚᱲ
ᱵᱟᱱᱟ ᱦᱚᱲ ᱞᱟ.ᱜᱤᱫ ᱚᱠᱛᱚ ᱠᱤᱱ ᱦᱟ.ᱴᱤᱧ ᱠᱟᱜ-ᱟ ᱮᱠᱟᱞ ᱾ ᱚᱱᱟ ᱚᱠᱛᱚ ᱫᱚᱠᱤᱱ ᱠᱷᱟᱸᱰᱟᱣᱟ, ᱟᱠᱤᱱ ᱯᱟᱱᱛᱮ ᱯᱟᱱᱛᱮ ᱫᱩᱲᱩᱵ ᱠᱟᱛᱮᱼ ᱫᱟᱸᱲᱟᱱ ᱪᱟᱞᱟᱣ ᱠᱟᱛᱮᱼ ᱥᱳᱨ ᱨᱮ ᱥᱟ:ᱜᱤᱧ ᱨᱮ ᱾

ᱚᱱᱠᱟ ᱜᱮ ᱢᱤᱫᱴᱟᱝ ᱫᱟᱸᱲᱟᱱ ᱨᱮᱱᱟᱜ ᱜᱷᱚᱴᱚᱱ ᱵᱟᱠᱤᱱ ᱦᱤᱲᱤᱧ ᱫᱟᱲᱮᱭᱟᱜ-ᱟ ᱡᱟ ᱡᱩᱜᱽ ᱾ ᱹᱹ ᱳᱲᱤᱥᱟ ᱯᱚᱱᱚᱛ ᱨᱮᱱᱟᱝ ᱢᱤᱫ ᱜᱟ:ᱦᱤᱨ ᱥᱟᱨᱡᱚᱢ ᱵᱤᱨ ᱾ ᱛᱟᱞᱟᱨᱮ ᱥᱳᱜᱷᱳᱲ ᱢᱤᱫ ᱫᱟᱜ ᱫᱩᱞᱩᱱ ᱾ ᱚᱱᱟ ᱦᱤᱞᱚᱜ ᱥᱚᱵᱷᱟ ᱛᱟᱠᱤᱱ ᱚᱱᱟ ᱵᱤᱨ ᱧᱮᱞ ᱧᱮᱞ ᱛᱮ ᱵᱤᱨ ᱛᱟᱞᱟᱛᱮ ᱥᱩᱲᱩᱠᱩᱡ ᱦᱚᱨ ᱛᱮ ᱯᱟᱱᱛᱮ ᱛᱮᱠᱤᱱ ᱛᱟᱲᱟᱢ ᱟᱠᱟᱫᱟ ᱾ ᱥᱳᱨ ᱥᱳᱨ ᱡᱮᱯᱮᱫ ᱛᱤᱸᱜᱩ ᱫᱟᱨᱮ ᱨᱮᱱᱟᱜ ᱩᱨᱜᱩᱢ ᱥᱟᱦᱮᱫ ᱡᱮᱞᱮᱠᱟ ᱟ.ᱠᱤᱱᱟᱜ ᱢᱚᱱᱮ ᱨᱮᱱᱟᱜ ᱩᱨᱜᱩᱢᱮ ᱜᱟ.ᱭᱩᱡ ᱢᱮᱥᱟᱭᱮᱫᱟ ᱾ ᱛᱟᱲᱟᱢ ᱛᱩᱞᱩᱡ ᱠᱤᱱ ᱧᱮᱞᱟ ᱞᱟᱦᱟ ᱥᱮᱫ ᱨᱮ ᱛᱩᱨᱩᱭ ᱮᱭᱟᱭ ᱥᱮᱨᱢᱟ ᱨᱮᱱ ᱜᱤᱫᱽᱨᱟᱹ ᱠᱚᱠᱚ ᱫᱩᱲᱩᱵ ᱟᱠᱟᱱᱟ ᱾ ᱢᱤᱫᱴᱟᱝ ᱩᱥᱩᱞ ᱫᱟᱨᱮ ᱨᱮᱱᱟᱜ ᱢᱚᱴᱟ ᱞᱟᱰᱮ ᱨᱮᱦᱮᱫ ᱨᱮ ᱾ ᱡᱷᱟᱯᱟᱨ ᱡᱷᱩᱯᱩᱨ ᱩᱵ, ᱵᱩᱛᱟᱹᱢ ᱛᱚᱯᱟᱜ ᱚᱲᱮᱡ ᱚᱲᱮᱡ ᱡᱟᱢᱟ ᱾ ᱟᱠᱚ ᱛᱟᱞᱟᱨᱮ ᱨᱚᱲ ᱯᱤᱪᱷᱩ ᱦᱤ~ᱦᱤ ᱠᱚ ᱞᱟᱸᱫᱟᱭᱮᱫᱟ ᱾ ᱡᱟᱸᱦᱟᱭ ᱡᱟᱸᱦᱟᱭ ᱫᱚ ᱡᱷᱤᱞᱟᱹᱝ ᱟᱠᱟᱱ ᱦᱟᱱᱟ ᱱᱟ.ᱲᱤ ᱠᱷᱚᱱ ᱱᱚᱣᱟ ᱱᱟ.ᱲᱤ ᱠᱚ ᱟᱠᱟ ᱵᱟᱲᱟᱜ ᱠᱟᱱᱟ ᱾ ᱮᱰᱜᱟᱨ ᱨᱟᱭᱤᱡ ᱵᱳᱨᱳᱡ ᱨᱮᱱ ᱦᱩᱰᱤᱧ ᱴᱟᱨᱡᱟᱱ ᱞᱮᱠᱟ ᱾ ᱩᱱᱠᱩ ᱜᱤᱫᱽᱨᱟᱹ ᱫᱚ ᱟᱫᱚ ᱴᱟᱴᱠᱟ ᱟ.ᱠᱤᱱ ᱞᱟᱦᱟ ᱨᱮᱱ ᱢᱤᱫ ᱟ.ᱰᱤ ᱮᱥᱮᱞ ᱮᱥᱮᱞ ᱫᱤᱠᱩ ᱥᱟᱸᱜᱮ ᱜᱷᱟᱨᱚᱸᱡᱽ ᱞᱟᱦᱟ ᱨᱮᱠᱚ ᱛᱤᱸᱜᱩᱭᱮᱱᱟ ᱾ “ᱯᱩᱭᱥᱟᱹ ᱫᱮᱱ, ᱯᱩᱭᱥᱟᱹ ᱫᱮᱱ” ᱞᱟᱹᱭ ᱠᱟᱛᱮ ᱪᱮᱨᱚ ᱵᱮᱨᱚ ᱠᱚ ᱪᱷᱩᱴᱟᱹᱣ ᱮᱱᱟ ᱾ ᱚᱱᱟ ᱜᱟᱫᱮᱞ ᱨᱮᱱ ᱢᱩᱲᱩᱫ ᱦᱚᱲ ᱫᱚ ᱦᱤᱨᱠᱟᱹ ᱥᱟᱞᱟᱜ ᱯᱟᱨᱥ ᱠᱷᱚᱱ ᱢᱚᱬᱮ ᱜᱚᱴᱟᱝ ᱜᱮᱞ ᱴᱟᱠᱟ ᱨᱮᱱᱟᱜ ᱠᱷᱩᱪᱨᱟᱹᱭ ᱪᱟᱯᱟᱫ ᱟᱫ ᱠᱚᱣᱟ ᱾ ᱚᱱᱟ ᱯᱩᱭᱥᱟᱹ ᱦᱟᱞᱟᱝ ᱧᱟᱢ ᱠᱟᱛᱮ ᱪᱮᱫ ᱛᱟᱠᱚ ᱨᱟᱹᱥᱠᱟᱹ ᱜᱳᱞᱢᱟᱞ ᱾ ᱥᱚᱵᱷᱟ ᱛᱟ.ᱠᱤᱱ ᱦᱚᱸ ᱟᱠᱚ ᱥᱟᱢᱟᱝ ᱨᱮᱠᱤᱱ ᱥᱮᱱ ᱥᱳᱨ ᱮᱱ ᱠᱷᱟᱱ ᱩᱱᱠᱤᱱ ᱯᱟᱨᱤ ᱠᱚ ᱡᱷᱳᱞᱮ ᱡᱷᱳᱞᱮᱭᱟᱫ ᱠᱤᱱᱟ ᱾ ᱥᱚᱵᱷᱟ ᱢᱤᱫ ᱜᱤᱫᱽᱨᱟᱹ ᱟᱜ ᱛᱤᱭ ᱥᱟᱵ ᱠᱮᱫ ᱛᱮ ᱢᱮᱛᱟ ᱫᱮᱭᱟᱭ ‘ᱮᱭ, ᱪᱮᱫᱟᱜ ᱯᱩᱭᱥᱟᱹ ᱯᱮ ᱠᱷᱚᱡᱚᱜ ᱠᱟᱱᱟ?’

ᱩᱱᱤ ᱜᱤᱫᱽᱨᱟᱹ ᱥᱚᱵᱷᱟ ᱟᱜ ᱪᱩᱯᱩᱫ ᱠᱷᱚᱱ ᱟᱭᱟᱜ ᱛᱤ ᱯᱮᱴᱮᱨ ᱪᱷᱟᱲᱟᱣ ᱪᱷᱟᱲᱟᱣ ᱮ ᱢᱮᱱ ᱠᱮᱫᱟ “ᱞᱟ.ᱰᱩ ᱡᱚᱢ ᱞᱟ.ᱜᱤᱫ ᱾”

ᱼ“ ᱞᱟ.ᱰᱩ ᱡᱚᱢ ᱞᱟ.ᱜᱤᱫ ᱦᱚᱲ ᱴᱷᱮᱱ ᱯᱩᱭᱥᱟᱹ ᱠᱚᱭ ᱦᱳᱭᱳᱜ-ᱟ?”

ᱤᱱᱟᱹ ᱛᱟᱞᱟᱨᱮ ᱥᱚᱵᱷᱟ ᱨᱮᱱ ᱚᱲᱟᱜ ᱦᱚᱲ ᱥᱩᱨᱮᱥ ᱥᱚᱵᱷᱟᱭ ᱦᱚᱦᱚ ᱟᱫᱮ ᱠᱷᱟᱱ ᱵᱩᱸᱫᱤ ᱜᱤᱫᱽᱨᱟᱹ ᱠᱟᱹᱡ ᱮ ᱛᱷᱤᱨ ᱮᱱᱛᱮ ᱥᱚᱵᱷᱟ ᱥᱮᱫ ᱠᱚᱭᱚᱜ ᱠᱟᱛᱮ ᱥᱟᱱᱛᱟᱲ ᱛᱮ ᱠᱩᱞᱤ ᱠᱮᱫᱮᱭᱟᱭ “ᱟᱢ ᱫᱚ ᱥᱟᱱᱛᱟᱲ ᱠᱟᱱᱟᱢ?” ᱥᱚᱵᱷᱟ ᱦᱚᱸ ᱩᱱᱟᱹᱜ ᱜᱮ ᱦᱟᱦᱟᱲᱟ ᱠᱟᱛᱮᱭ ᱠᱩᱞᱤ
ᱠᱮᱫᱮᱭᱟ, “ᱟᱢ ᱦᱚᱸ ᱥᱟᱱᱛᱟᱲ ᱜᱤᱫᱽᱨᱟᱹ? ᱪᱮᱫ ᱛᱟᱢ ᱧᱩᱛᱩᱢ?”

ᱤᱱᱟᱹ ᱚᱠᱛᱮ ᱛᱟᱭᱚᱢ ᱥᱮᱫ ᱠᱷᱚᱱ ᱟᱨ ᱢᱤᱫ ᱜᱟᱫᱮᱞ ᱫᱟᱸᱲᱟᱱᱤᱭᱟᱹ ᱠᱚ ᱦᱤᱡᱩᱜ ᱠᱟᱱ ᱠᱷᱟᱱ ᱡᱷᱚᱛᱚ ᱜᱤᱫᱽᱨᱟᱹ ᱥᱟᱞᱟᱜ ᱥᱚᱵᱷᱟ ᱟᱜ ᱛᱤ ᱨᱮ ᱵᱩᱸᱫᱤ ᱟᱠᱟᱱ ᱜᱤᱫᱽᱨᱟᱹ ᱦᱚᱸ ᱛᱤ ᱛᱟᱭ ᱪᱷᱟᱲᱟᱣ ᱠᱟᱛᱮᱭ ᱫᱟᱹᱲ ᱠᱮᱫᱟ ᱾ ᱫᱟᱹᱲ ᱫᱟᱹᱲ ᱛᱮ ᱠᱤᱠᱭᱟᱹᱣ ᱟᱛᱮ ᱥᱚᱵᱷᱟ ᱟᱜ ᱠᱟᱛᱷᱟ
ᱨᱮᱱᱟᱜ ᱛᱮᱞᱟᱭ ᱮᱢ ᱠᱮᱫᱟ “ᱢᱤᱼᱞᱚᱱ”᱾

ᱚᱱᱟ ᱦᱤᱞᱚᱜ ᱥᱚᱵᱷᱟ ᱫᱚ ᱫᱟᱸᱲᱟᱱ ᱠᱷᱚᱱᱟᱜ ᱛᱤᱱᱟᱹᱜ ᱛᱤᱱᱟᱹᱜ ᱦᱟᱨᱠᱮᱛ ᱮ ᱜᱩᱜᱩ ᱟ.ᱜᱩ ᱞᱮᱫᱟ ᱾ ᱚᱱᱟ ᱦᱤᱞᱚᱜ ᱠᱷᱚᱱ ᱥᱩᱨᱮᱥ ᱥᱚᱵᱷᱟ ᱛᱤᱱᱟᱹᱜ ᱮ ᱵᱩᱡᱷᱟᱹ ᱵᱩᱡᱷᱤ ᱟᱠᱟᱫᱮᱭᱟ ᱾ “ᱥᱚᱵᱷᱟ, ᱥᱚᱱᱟᱛᱤᱧ, ᱚᱱᱠᱟ ᱫᱚ ᱵᱟᱠᱚ ᱩᱭᱦᱟᱹᱨᱟ ᱾ ᱫᱤᱥᱚᱢ ᱨᱮ ᱥᱟᱥᱟᱭ ᱜᱤᱫᱽᱨᱟᱹ ᱚᱱᱠᱟ
ᱦᱟᱞᱚᱛ ᱨᱮ ᱢᱮᱱᱟᱜ ᱠᱚᱣᱟ ᱾ ᱡᱷᱚᱛᱚᱢ ᱮᱢ ᱦᱟᱞᱟᱝ ᱥᱟᱢᱴᱟᱣ ᱫᱟᱲᱮᱭᱟᱠᱚᱣᱟ? ᱪᱤᱠᱟᱹᱭ ᱟᱠᱚ, ᱟᱭᱳ ᱵᱟᱵᱟ ᱨᱳᱡᱽᱜᱟᱨ ᱞᱟ.ᱜᱤᱫ ᱵᱤᱨ ᱨᱮ ᱫᱷᱤᱨᱤ ᱨᱟ.ᱯᱩᱫ ᱵᱟᱝ ᱠᱷᱟᱱ ᱥᱟᱦᱟᱱ ᱫᱤᱯᱤᱞ ᱾ ᱟᱠᱳ ᱫᱚ ᱱᱚᱣᱟ ᱠᱚᱨᱮ ᱾ ᱟᱠᱚ ᱟᱛᱳ ᱠᱚᱨᱮ ᱚᱱᱠᱟᱱ ᱵᱤᱨᱫᱟᱹᱜᱟᱲ ᱦᱚᱸ ᱵᱟᱱᱩᱜ-ᱟ
ᱡᱟ.ᱱᱤᱡ ᱾ ᱥᱤᱠᱷᱱᱟᱹᱛ ᱰᱟᱦᱟᱨ ᱛᱮ ᱟ.ᱪᱩ ᱞᱮᱠᱟᱱ ᱦᱚᱲ ᱦᱚᱸ ᱵᱟ.ᱱᱩᱜ ᱠᱳᱣᱟ ᱾ ᱛᱟᱞᱟᱨᱮ ᱵᱟᱦᱨᱮ ᱠᱷᱚᱱᱟᱜ ᱠᱤᱸᱥᱟᱹᱲ ᱫᱟᱸᱲᱟᱱᱤᱭᱟᱹ ᱠᱚ ᱟᱠᱳᱣᱟᱜ ᱵᱟᱞᱮ ᱨᱤᱫᱚᱭ ᱨᱮ ᱞᱟᱞᱚᱪ ᱠᱚ ᱨᱚᱦᱚᱭ ᱦᱚᱴᱚ ᱠᱟᱜ ᱠᱟᱱᱟ ᱾

ᱥᱚᱵᱷᱟ ᱨᱤᱫᱚᱭ ᱟᱛᱮᱭ ᱩᱢᱟᱹᱱᱟ, ᱥᱤᱠᱷᱱᱟᱹᱛ ᱛᱮ, ᱜᱮᱭᱟᱱ ᱛᱮ ᱟᱭᱳ ᱵᱟᱵᱟ ᱠᱚ ᱪᱮᱸᱜᱷᱟᱣ ᱞᱮᱱ ᱠᱷᱟᱱ ᱜᱤᱫᱽᱨᱟᱹ ᱠᱚᱣᱟᱜ ᱦᱩᱱᱟᱹᱝ ᱱᱚᱣᱟ ᱦᱟᱞᱚᱛ ᱫᱚ ᱵᱟᱝ ᱦᱳᱭ ᱠᱚᱜ ᱛᱟᱠᱚᱭᱟ ᱾

ᱥᱚᱵᱷᱟ ᱫᱚ ᱵᱤᱠᱩᱞ ᱨᱟᱦᱟ ᱛᱮᱭ ᱞᱟᱹᱭᱟ, “ᱛᱚᱵᱮ ᱟᱵᱚ ᱟᱜ ᱠᱤ ᱡᱟᱸᱦᱟ ᱪᱮᱫ ᱠᱟᱹᱢᱤ ᱨᱮᱱᱟᱜ ᱵᱟᱱᱩᱜ-ᱟ ᱜᱳ?”
ᱼ ᱪᱤᱠᱟᱹᱭᱟᱢ ᱟᱫᱚ? ᱼ ᱥᱩᱨᱮᱥ ᱡᱮᱸᱞᱮᱧ ᱧᱚᱜ ᱥᱟᱦᱮᱫ ᱠᱟᱛᱮᱭ ᱞᱟᱹᱭ ᱠᱮᱫᱟ ᱾
ᱼ ᱡᱩᱫᱤ ᱚᱱᱠᱟᱱ ᱚᱱᱟ ᱠᱚ ᱟᱛᱳ ᱛᱟᱞᱟᱨᱮ ᱵᱤᱨᱫᱟᱹᱜᱟᱲ ᱵᱮᱱᱟᱣ ᱠᱟᱛᱮ ᱱᱤᱡᱮ ᱛᱮᱜᱮ ᱩᱱᱠᱩ ᱥᱤᱠᱷᱱᱟᱹᱛ ᱠᱟᱠᱚ?
ᱼ ᱚᱠᱚᱭᱮ ᱠᱟ.ᱢᱤᱭᱟ?
ᱼ ᱤᱧ!ᱟᱞᱟᱝ!
ᱼ ᱠᱷᱤᱯᱤ!ᱚᱱᱟ ᱠᱚᱫᱚ ᱠᱤ ᱤᱧ ᱟᱢᱟᱜ ᱠᱟ.ᱢᱤ? ᱚᱱᱟ ᱫᱚ ᱥᱚᱨᱠᱟᱨᱟᱜ ᱠᱟ.ᱢᱤ ᱾ ᱟᱹᱰᱤ ᱡᱮᱞᱮᱧ ᱯᱨᱚᱥᱮᱥ᱾ ᱼᱥᱩᱨᱮᱥ ᱞᱟᱸᱫᱟ ᱠᱟᱛᱮᱭ ᱞᱟᱹᱭ ᱠᱮᱫᱟ ᱾ “ᱪᱚᱞᱚ, ᱛᱮᱦᱮᱧ ᱥᱤᱴᱤ ᱥᱮᱱᱴᱟᱨ ᱞᱟᱝ ᱪᱟᱞᱟᱜ-ᱟ ᱾ ᱟ.ᱰᱤ ᱢᱟᱦᱟ ᱵᱟᱞᱟᱝ ᱪᱟᱞᱟᱣ ᱟᱠᱟᱱᱟ ᱾”

ᱢᱤᱫ ᱡᱷᱚᱴᱠᱟ ᱛᱮ ᱥᱚᱵᱷᱟ ᱨᱟ.ᱜᱤ ᱠᱟᱛᱮ ᱥᱟᱦᱟᱭᱮᱱ ᱛᱮᱭ ᱞᱟᱹᱭ ᱠᱮᱫᱟ, “ᱵᱟᱝ ᱾” ᱟᱫᱚ ᱞᱚᱦᱚᱫ ᱨᱟᱦᱟᱛᱮᱭ ᱨᱚᱲ ᱤᱫᱤ ᱠᱮᱫᱟ, “ᱵᱟᱝ ᱟ ᱜᱳ, ᱤᱧ ᱫᱚᱧ ᱚᱦᱚ ᱠᱮᱭᱟ ᱾ ᱱᱚᱣᱟ ᱞᱳᱜᱳᱫ ᱵᱤᱪᱷᱱᱟᱹ ᱡᱮᱞᱮᱠᱟ ᱤᱧᱫᱚ ᱥᱤᱠᱤᱲᱤᱧ ᱠᱟᱱᱟ, ᱚᱱᱠᱟ ᱜᱮ ᱢᱟᱨᱟᱝ ᱵᱟᱡᱟᱨ ᱨᱮᱱᱟᱜ ᱞᱤᱞ
ᱢᱟᱨᱥᱟᱞ ᱛᱮᱸᱦᱚ ᱤᱧ ᱫᱩᱧ ᱟᱸᱫᱷᱟᱜ ᱠᱟᱱᱟ ᱾ ᱟᱢ ᱫᱚ ᱪᱮᱫᱟᱜ ᱛᱮᱦᱮᱧ ᱦᱚᱸ ᱵᱟᱢ ᱵᱩᱡᱽ ᱫᱟᱲᱮᱭᱟᱜ ᱠᱟᱱᱟ, ᱢᱤᱞᱚᱱ ᱛᱟᱠᱚᱭᱟᱜ ᱚᱱᱠᱟ ᱟᱭᱢᱟ ᱰᱚᱭᱢᱟ ᱵᱟᱲᱟᱭ, ᱩᱱᱠᱩᱣᱟᱜ ᱚᱥᱤᱠᱷᱱᱟᱹᱛ, ᱩᱱᱠᱩᱣᱟᱜ ᱵᱮ ᱦᱤᱨᱞᱟᱹ ᱤᱧ ᱫᱚ ᱵᱟᱭ ᱡᱟᱹᱯᱤᱫ ᱦᱚᱪᱚ ᱤᱧ ᱠᱟᱱᱟ ᱾”

ᱢᱤᱫ ᱫᱤᱱ ᱥᱟ.ᱨᱤ ᱥᱟ.ᱨᱤ ᱜᱮ ᱢᱤᱫᱴᱟᱝ ᱥᱮᱛᱟᱜ ᱨᱮ ᱥᱚᱵᱷᱟ ᱢᱤᱫ ᱜᱮᱫᱟᱜ ᱛᱮᱭ ᱳᱰᱳᱝ ᱵᱟᱦᱮᱨ ᱞᱮᱱ ᱛᱟᱸᱦᱮ ᱾ ᱳᱰᱳᱝ ᱢᱟᱲᱟᱝ ᱦᱤᱞᱚᱜ ᱧᱤᱫᱟᱹ ᱟᱹᱰᱤ ᱡᱳᱨ ᱠᱤᱱ ᱠᱷᱟᱹᱯᱟᱹᱨᱤ ᱞᱮᱱᱟ ᱾ ᱥᱩᱨᱮᱥ ᱠᱤᱠᱭᱟᱹᱣ ᱠᱟᱛᱮᱭ ᱞᱟᱹᱭ ᱞᱮᱫᱟ, “ᱥᱚᱵᱷᱟ ᱤᱧ ᱫᱚ ᱟ.ᱰᱤ ᱢᱟᱦᱟ ᱠᱷᱚᱱᱟᱜ
ᱟᱢᱟᱜ ᱱᱚᱝᱠᱟᱱ ᱥᱟᱱᱟ ᱠᱚᱧ ᱟᱸᱡᱚᱢ ᱥᱟᱦᱟᱣ ᱟ.ᱜᱩᱭᱮᱫ ᱛᱟᱢᱟ ᱾ ᱟᱫᱚ ᱥᱟᱦᱟᱣ ᱨᱮᱱᱟᱜ ᱥᱤᱢᱟᱹᱭ ᱯᱟᱨᱚᱢ ᱠᱮᱫᱟ ᱾ ᱤᱧ ᱫᱚ ᱤᱧᱟᱜ ᱚᱲᱟᱜ ᱥᱟᱢᱴᱟᱣ ᱞᱟ.ᱜᱤᱫ, ᱥᱟᱡᱟᱣ ᱞᱟ.ᱜᱤᱫ ᱤᱧ ᱵᱟᱯᱞᱟ ᱟ.ᱜᱩ ᱟᱠᱟᱫ ᱢᱮᱭᱟ ᱾ ᱫᱤᱥᱚᱢ ᱥᱩᱥᱟᱹᱨ ᱞᱟ.ᱜᱤᱫ ᱫᱚ ᱵᱟᱝ ᱾ ᱱᱚᱝᱠᱟᱱ
ᱩᱫᱩᱠᱷᱩᱞᱤᱭᱟᱹ ᱥᱟᱱᱟ ᱢᱟ ᱤᱧ ᱫᱚ ᱚᱦᱚᱧ ᱵᱟᱛᱟᱣ ᱠᱮᱭᱟ ᱾ ᱳᱰᱳᱠᱚᱜ ᱢᱮᱥᱮ ᱫᱩ ᱴᱟᱠᱟ ᱠᱟᱣᱰᱤ ᱨᱮᱱᱟᱜ ᱴᱟᱱ ᱯᱟᱲᱟᱣ ᱞᱮᱠᱷᱟᱱ, ᱢᱤᱫ ᱵᱮᱲᱟ ᱡᱚᱢ,ᱚᱲᱮᱡ ᱯᱟᱹᱴᱤᱭᱟᱹ ᱨᱮ ᱜᱤᱛᱤᱡ ᱼ ᱵᱟᱨ ᱥᱤᱧ ᱛᱮᱜᱮ ᱥᱩᱥᱟᱹᱨ ᱠᱟᱹᱢᱤ ᱜᱷᱩᱪᱟᱹᱜ ᱛᱟᱢᱟ ᱾”

ᱳᱰᱳᱝ ᱞᱮᱱᱟᱭ ᱥᱚᱵᱷᱟ, ᱪᱷᱟᱛᱟ ᱫᱟᱨᱮ ᱫᱩᱞᱟᱹᱲ ᱵᱟ.ᱜᱤ ᱦᱚᱴᱚ ᱠᱟᱛᱮ, ᱥᱚᱝᱥᱟᱨ ᱥᱩᱠ ᱵᱟ.ᱜᱤ ᱦᱚᱴᱚ ᱠᱟᱛᱮ ᱾ ᱚᱱᱤᱪᱤᱛ ᱟᱨ ᱧᱩᱛᱟᱹᱛ ᱨᱮᱱᱟᱜ ᱦᱚᱨ ᱨᱮ ᱾ ᱩᱱᱦᱚᱸ ᱵᱟᱭ ᱵᱟᱲᱟᱭᱟ ᱪᱮᱫ ᱞᱮᱠᱟᱛᱮ, ᱪᱮᱫ ᱮ ᱠᱟᱹᱢᱤᱭᱟ ᱾ ᱠᱷᱟᱹᱞᱤ ᱠᱟᱹᱢᱤ ᱨᱮᱱᱟᱜ ᱵᱩᱴᱩᱧ ᱦᱟᱥᱳ ᱨᱤᱫᱚᱭ ᱨᱮᱛᱟᱭ᱾

ᱚᱲᱟᱜ ᱠᱷᱚᱱ ᱳᱰᱳᱝ ᱠᱟᱛᱮ ᱢᱤᱫ ᱥᱤᱧ ᱦᱟᱱᱛᱮ ᱱᱟᱛᱮ ᱟᱹᱛᱷᱟᱹᱲᱤᱭ ᱫᱟᱸᱲᱟ ᱵᱟᱲᱟ ᱠᱮᱫᱛᱮ ᱯᱩᱨᱩᱞᱤᱭᱟᱹ ᱡᱤᱞᱟᱹ ᱨᱮᱱᱟᱜ ᱵᱩᱨᱩ ᱠᱷᱚᱪᱞᱟᱜ ᱢᱤᱫ ᱟᱛᱳ ᱥᱤᱛᱟᱹᱨᱟᱢ ᱯᱩᱨ ᱮ ᱪᱟᱞᱟᱣ ᱮᱱᱟ ᱾ ᱯᱮᱲᱟ ᱥᱟᱹᱜᱟᱹᱭ ᱦᱟᱛᱚᱢ ᱴᱷᱮᱱ ᱾ ᱦᱟᱛᱚᱢ ᱫᱚ ᱮᱠᱞᱟ ᱦᱚᱲ ᱾ ᱜᱤᱫᱽᱨᱟᱹ ᱯᱤᱫᱽᱨᱟᱹ ᱵᱟᱹᱱᱩᱜ ᱠᱚ ᱛᱟᱭᱟ ᱾ ᱠᱩᱢᱟᱹᱝ ᱟᱰᱤ ᱢᱟᱦᱟ ᱨᱮᱭ ᱜᱚᱡ ᱵᱟᱹᱜᱤ ᱠᱟᱣᱫᱮᱭᱟ ᱾ ᱱᱤᱛ ᱫᱚ ᱯᱮᱲᱟ ᱯᱟᱹᱲᱦᱟᱹ ᱪᱷᱟᱲᱟ ᱚᱝᱥᱚ ᱵᱚᱝᱥᱚ ᱪᱮᱞᱮ ᱦᱚᱸ ᱵᱟᱱᱩᱜ ᱠᱚᱣᱟ ᱾ ᱵᱚᱭᱮᱥ ᱟᱠᱟᱱᱟᱭ ᱾ ᱞᱩᱛᱩᱨ ᱛᱮᱦᱚ ᱠᱟᱹᱡ ᱜᱮᱭ ᱟᱸᱡᱚᱢᱟ ᱱᱮ ᱫᱚ ᱾ ᱦᱟᱛᱚᱢ ᱫᱚ ᱦᱚᱢᱚᱱ ᱛᱮᱫ ᱥᱚᱵᱷᱟ ᱧᱮᱞ ᱠᱟᱛᱮ ᱟᱰᱤ ᱠᱩᱥᱤ ᱾ ᱛᱚᱵᱮ ᱮᱠᱞᱟ ᱡᱟᱶᱭᱟᱭ ᱪᱷᱟᱲᱟ ᱦᱤᱨᱤ ᱦᱮᱡ ᱨᱮᱱᱟᱜ ᱚᱡᱮ ᱫᱚᱭ ᱵᱩᱡᱽ ᱠᱮᱫᱟ ᱵᱟᱨ ᱥᱤᱧ ᱯᱮ ᱢᱟᱦᱟ ᱛᱟᱭᱚᱢ ᱾ ᱟᱸᱡᱚᱢ ᱠᱟᱛᱮ ᱟᱰᱤᱭ ᱵᱩᱡᱷᱟᱹ ᱵᱩᱡᱷᱤ ᱠᱮᱫᱮᱭᱟ ᱾ ᱟᱠᱷᱤᱨᱮ ᱩᱭᱦᱟᱹᱨᱟᱫᱮᱭᱟ ᱾ “ᱠᱩᱲᱤ ᱦᱚᱯᱚᱱ ᱫᱚ ᱡᱟᱶᱟᱭ ᱟᱛᱮ ᱜᱮᱠᱚ ᱥᱚᱵᱷᱟᱜ-ᱟ ᱢᱟᱹᱭ ᱾ ᱚᱲᱟᱜ ᱨᱩᱭᱟᱹᱲ ᱪᱟᱞᱟᱜ ᱢᱮ ᱫᱩ ᱾”

ᱢᱤᱫ ᱫᱤᱱ ᱚᱲᱟᱜ ᱠᱷᱚᱱ ᱥᱚᱵᱷᱟ ᱨᱮᱱ ᱠᱤᱸᱥᱟᱹᱲ ᱟᱭᱳ ᱵᱟᱵᱟ ᱠᱚ ᱦᱮᱡ ᱮᱱᱟ ᱾ ᱦᱟᱱᱦᱟᱨ ᱦᱚᱧᱦᱟᱨ ᱦᱚᱸ ᱾ ᱤᱫᱤ ᱞᱟᱜᱤᱫ ᱾ ᱥᱚᱵᱷᱟ ᱟᱡ ᱟᱭᱳ ᱦᱤᱰᱤᱨ ᱦᱤᱰᱤᱨ ᱨᱟᱜ ᱠᱟᱛᱮᱭ ᱞᱟᱹᱭ ᱠᱮᱫᱟ, “ᱟᱞᱮᱭᱟᱜ ᱢᱟᱹᱱ ᱥᱚᱱᱢᱟᱱ ᱫᱚ ᱫᱷᱩᱲᱤ ᱨᱮ ᱟᱞᱚᱢ ᱞᱳᱥᱳ ᱯᱳᱰᱳᱭ ᱛᱟᱞᱮᱭᱟ ᱵᱤᱴᱤ ᱾” ᱥᱚᱵᱷᱟ ᱟᱜ ᱢᱤᱫᱴᱟᱝ ᱠᱟᱛᱷᱟ, “ᱤᱧ ᱫᱚ ᱚᱦᱚᱧ ᱥᱚᱝᱥᱟᱨ ᱠᱮᱭᱟ ᱾” ᱯᱮᱲᱟ ᱯᱟᱹᱲᱦᱟᱹ ᱟᱜ ᱚᱱᱚᱨ ᱜᱚᱱᱚᱨ ᱢᱤᱫ ᱚᱠᱛᱮ ᱢᱩᱪᱟᱹᱫᱮᱱ ᱠᱷᱟᱱ ᱟᱹᱰᱤ ᱥᱟᱱᱛᱤᱭ ᱵᱩᱡᱷᱟᱹᱣ ᱠᱮᱫᱟ ᱥᱚᱵᱷᱟ ᱾

ᱥᱚᱵᱷᱟ ᱠᱚᱴᱟ ᱢᱟᱦᱟ ᱚᱱᱦᱮᱲᱟ ᱥᱟᱹᱦᱤᱡ ᱠᱩᱝᱠᱤ ᱞᱮᱠᱟ ᱦᱟᱛᱚᱢ ᱛᱟᱠᱚ ᱟᱛᱳᱭ ᱫᱟᱸᱲᱟ ᱵᱟᱲᱟ ᱠᱮᱫᱟ ᱾ ᱦᱟᱛᱚᱢ ᱛᱟᱠᱚ ᱟᱜ ᱦᱩᱰᱤᱧ ᱦᱩᱰᱤᱧ ᱟᱛᱳ ᱾ ᱟᱛᱳ ᱛᱟᱭᱚᱢ ᱯᱟᱪᱷᱮ ᱵᱤᱨ ᱟᱨ ᱵᱤᱨ ᱾ ᱵᱟᱨ ᱜᱮᱞ ᱯᱮ ᱜᱟᱱ ᱚᱲᱟᱜ ᱾ ᱚᱱᱠᱟ ᱜᱮ ᱪᱩᱢᱠᱟᱹᱜ ᱪᱩᱢᱠᱟᱹᱜ ᱟᱛᱳ ᱢᱮᱱᱟᱜ-ᱟ
ᱰᱩᱝᱨᱤ ᱦᱟᱱᱟ ᱫᱷᱟᱨᱮ ᱱᱚᱣᱟ ᱫᱷᱟᱨᱮ ᱾ ᱵᱤᱨ ᱦᱟᱱᱟᱥᱟ ᱱᱚᱣᱟᱥᱟ ᱾ ᱵᱟᱡᱟᱨ ᱦᱟᱴ, ᱨᱟᱱ ᱢᱩᱨᱜᱟᱹᱱ, ᱤᱥᱠᱩᱞ ᱠᱚ, ᱦᱟᱥᱯᱟᱛᱟᱞ ᱠᱚᱫᱚ ᱰᱩᱝᱨᱤ ᱯᱟᱨᱚᱢ ᱢᱚᱬᱮ ᱛᱩᱨᱩᱭ ᱜᱚᱴᱟᱝ ᱟᱛᱳ ᱯᱟᱨᱚᱢ ᱠᱟᱛᱮ ᱾ ᱦᱩᱰᱤᱧ ᱤᱛᱩᱱ ᱟᱥᱲᱟ ᱢᱮᱱᱟᱜ ᱨᱮᱸᱦᱚ ᱵᱟᱨ ᱯᱮ ᱟᱛᱳ ᱛᱟᱞᱟᱨᱮ ᱾ ᱚᱞᱚᱜ ᱥᱮᱱᱚᱜ ᱨᱟᱹᱥᱠᱟᱹ ᱫᱚ ᱵᱟᱱᱩᱜ ᱛᱟᱠᱚ ᱜᱤᱫᱽᱨᱟᱹ ᱟᱜ, ᱡᱟᱸᱦᱟ ᱛᱤᱱᱟᱹᱜ ᱪᱮᱬᱮ ᱥᱮᱸᱫᱽᱨᱟ ᱨᱮ ᱢᱮᱱᱟᱜ ᱛᱟᱠᱚ ᱾ ᱜᱤᱫᱽᱨᱟᱹ ᱠᱚ ᱵᱩᱡᱽ ᱠᱚ ᱥᱮᱸᱲᱟ ᱞᱮᱠᱷᱟᱱ ᱢᱮᱨᱚᱢ ᱜᱩᱯᱤ ᱟᱨ ᱵᱟᱝᱠᱷᱟᱱ ᱠᱩᱞᱦᱤ ᱢᱩᱪᱟᱹᱫ ᱢᱟᱪᱟ ᱟᱡᱟᱨᱮ ᱾ ᱛᱚᱵᱮ ᱨᱟᱯᱩᱫ ᱨᱟᱯᱩᱫ ᱯᱤᱪ ᱰᱟᱦᱟᱨ ᱫᱚ ᱟᱠᱚ ᱟᱛᱳ
ᱛᱟᱞᱟᱛᱮ ᱯᱟᱨᱚᱢ ᱪᱟᱞᱟᱣ ᱟᱠᱟᱱᱟ ᱢᱤᱫᱴᱟᱝ ᱾ ᱚᱱᱟ ᱥᱟᱝ ᱛᱮ ᱚᱪᱪᱷᱮ ᱵᱷᱟᱨᱚᱛ ᱫᱤᱥᱚᱢ ᱟᱨ ᱰᱤᱡᱤᱴᱟᱞ ᱵᱷᱟᱨᱚᱛ ᱫᱤᱥᱚᱢ ᱾ ᱟᱛᱳ ᱨᱮ ᱯᱮ ᱯᱳᱱᱭᱟ ᱥᱢᱟᱨᱴ ᱯᱷᱳᱱ ᱾ ᱚᱱᱟ ᱥᱢᱟᱨᱴ ᱯᱷᱳᱱ ᱡᱤᱣᱤ ᱩᱨᱤᱡ ᱠᱟᱛᱮᱭ ᱨᱤᱠᱟᱹᱭᱟ ᱟᱛᱳ ᱨᱮᱱ ᱡᱚᱝᱞᱤ ᱦᱚᱲ ᱠᱚ ᱥᱢᱟᱨᱴ ᱠᱚ ᱞᱟᱜᱤᱫ ᱾

ᱥᱚᱵᱷᱟ ᱢᱚᱱᱮᱭ ᱜᱚᱴᱟ ᱩᱛᱟᱹᱨ ᱠᱮᱫ ᱛᱟᱭᱟ ᱯᱮ ᱯᱳᱱ ᱢᱟᱦᱟ ᱵᱷᱤᱛᱟᱹᱨ ᱨᱮᱜᱮ ᱾ ᱟᱭᱟᱜ ᱵᱟᱯᱞᱟ ᱨᱮ ᱧᱟᱢ ᱥᱚᱱᱟ ᱨᱮᱱᱟᱜ ᱡᱷᱩᱢᱠᱟᱹ ᱯᱟᱥᱟ ᱟᱠᱷᱨᱤᱧ ᱠᱟᱛᱮ ᱚᱱᱟ ᱠᱟᱹᱴᱤᱡ ᱴᱟᱠᱟ ᱛᱮᱭ ᱮᱦᱚᱵ ᱠᱮᱫᱟ ᱟᱭᱟᱜ ᱛᱟᱲᱟᱢ ᱾ ᱟᱛᱳ ᱨᱮᱱ ᱦᱩᱰᱤᱧ ᱦᱩᱰᱤᱧ ᱜᱤᱫᱽᱨᱟ. ᱠᱚ ᱟᱛᱮ ᱟᱭᱟᱜ ᱚᱞᱚᱜ ᱟᱠᱷᱲᱟ ᱮᱦᱚᱵ ᱮᱱ ᱛᱟᱭᱟ ᱟᱹᱰᱤ ᱨᱟᱹᱥᱠᱟᱹ ᱥᱟᱞᱟᱜ ᱾ ᱥᱮᱛᱟᱜ ᱟ.ᱭᱩᱵ ᱦᱟᱛᱚᱢ ᱟᱜ ᱦᱩᱰᱤᱧ ᱪᱷᱟᱴᱠᱟ ᱯᱮᱨᱮᱡ ᱠᱚᱜ ᱛᱟᱭᱟ ,ᱚ ,ᱚᱛ, ᱚᱜ, ᱚᱝ, ᱚᱞ ᱾ ᱮ, ᱵᱤ, ᱥᱤ, ᱰᱤ ᱾ ᱚ, ᱟ ᱨᱮᱱᱟᱜ ᱪᱮᱨᱚ ᱵᱮᱨᱚ ᱟᱲᱟᱝ ᱛᱮ ᱾

ᱥᱚᱵᱷᱟ ᱫᱚ ᱟᱛᱳ ᱨᱮᱱ ᱦᱩᱰᱤᱧ ᱜᱤᱫᱽᱨᱟᱹ ᱠᱚᱭ ᱯᱟᱲᱦᱟᱣ ᱠᱚᱣᱟ ᱾ ᱛᱚᱵᱮ ᱯᱩᱭᱞᱩ ᱨᱮ ᱜᱤᱫᱽᱨᱟᱹ ᱯᱟᱸᱡᱟ ᱟ.ᱜᱩ ᱛᱮ ᱟᱹᱰᱤ ᱦᱟᱨᱠᱮᱛ ᱞᱮᱱᱟᱭ ᱾ ᱟᱛᱳ ᱚᱲᱟᱜ ᱨᱮ ᱢᱚᱬᱮ ᱛᱩᱨᱩᱭ ᱥᱮᱨᱢᱮ ᱩᱢᱮᱨ ᱨᱮᱱ ᱜᱤᱫᱽᱨᱟ. ᱚᱲᱟᱜ ᱨᱮᱱᱟᱜ ᱠᱟᱹᱢᱤ ᱟᱨ ᱟᱡ ᱨᱮᱱ ᱦᱩᱰᱤᱧ ᱵᱚᱭᱦᱟ ᱵᱩᱦᱤᱱ ᱵᱩᱞᱟᱹᱣ ᱠᱟᱹᱢᱤ ᱵᱟ.ᱜᱤ ᱠᱟᱛᱮ ᱚᱞᱚᱜ ᱞᱮᱠᱟᱱᱟᱜ ᱢᱟᱜᱱᱟ ᱠᱟᱹᱢᱤᱨᱮ ᱪᱮᱫᱟᱜ ᱠᱚ ᱠᱳᱞ ᱠᱚᱣᱟ ᱾ ᱮᱱ ᱦᱚᱸ ᱢᱩᱪᱟᱹᱫ ᱦᱟᱹᱵᱤᱡ ᱥᱚᱵᱷᱟ ᱟ.ᱜᱩ ᱫᱟᱲᱮ ᱟᱠᱟᱫ ᱠᱚᱣᱟᱭ ᱾ ᱚᱞᱚᱜ ᱨᱮᱱᱟᱜ ᱥᱮ ᱥᱤᱠᱷᱱᱟᱹᱛ ᱨᱮᱱᱟᱜ ᱜᱚᱱᱚᱝ ᱪᱮᱫ ᱚᱱᱟᱭ ᱵᱩᱡᱷᱟᱹᱣ ᱚᱪᱚ ᱫᱟᱲᱮ ᱟᱠᱟᱫ ᱠᱚᱣᱟ ᱟᱛᱳ ᱦᱚᱲ ᱾ ᱵᱟᱝ ᱦᱤᱡᱩᱜ ᱜᱤᱫᱽᱨᱟ. ᱠᱚᱫᱚ ᱞᱟ.ᱰᱩ ᱢᱤᱴᱷᱟᱹᱭ ᱮᱢ ᱠᱟᱛᱮ ᱦᱚᱸᱭ ᱵᱷᱩᱞᱟᱹᱣ ᱟ.ᱜᱩ ᱠᱚᱣᱟ ᱾ ᱠᱟᱹᱡ ᱢᱟᱨᱟᱝ ᱥᱮ ᱚᱞᱚᱜ ᱵᱟ.ᱜᱤ ᱠᱚᱫᱚ ᱵᱤᱨᱫᱟᱹᱜᱟᱲ ᱛᱮ ᱪᱟᱞᱟᱜ ᱮ ᱵᱤᱱᱛᱤ ᱟᱠᱚᱭᱟ ᱾ ᱤᱫᱤ ᱦᱚᱴᱚ ᱠᱟᱠᱚᱭᱟᱭ ᱾ ᱴᱷᱟᱠᱮᱫᱚᱜ ᱴᱷᱮᱱ ᱫᱚ ᱞᱟᱹᱭ ᱜᱚᱲᱚ ᱟᱠᱚᱭᱟᱭ ᱾ ᱜᱤᱫᱽᱨᱟᱹ ᱟᱜ ᱱᱚᱱᱚᱞ ᱞᱟᱪᱷᱟ ᱡᱚᱜᱟᱲ ᱨᱮᱱᱟᱜ ᱫᱟᱭᱤᱛ ᱫᱚ ᱥᱚᱵᱷᱟ ᱟᱜ ᱜᱮ ᱾

ᱢᱟᱦᱟ ᱢᱟᱦᱟᱛᱮ ᱥᱚᱵᱷᱟ ᱟᱜ ᱚᱞᱚᱜ ᱟᱠᱷᱲᱟ ᱨᱮ ᱯᱟᱹᱴᱷᱩᱭᱟᱹ ᱟᱹᱰᱤ ᱠᱚ ᱵᱟ.ᱲᱛᱤᱜ ᱠᱟᱱᱟ ᱾ ᱪᱮᱫᱟᱜ ᱥᱮ ᱱᱟᱦᱟᱜ ᱫᱚ ᱥᱚᱵᱷᱟ ᱴᱩᱣᱟᱹᱨ ᱥᱟᱱᱛᱟᱲ ᱜᱤᱫᱽᱨᱟᱹ ᱠᱚ ᱞᱟ.ᱜᱤᱫ ᱟᱡ ᱴᱷᱮᱱ ᱛᱟᱸᱦᱮ ᱠᱟᱛᱮ ᱯᱟᱲᱦᱟᱣ ᱥᱮᱪᱮᱫ ᱨᱮᱱᱟᱜ ᱮ ᱵᱚᱱᱫᱮᱡ ᱟᱠᱟᱫᱟ ᱾ ᱟᱲᱮ ᱯᱟᱥᱮ ᱟᱛᱳ ᱢᱟ ᱦᱮᱸᱜᱮ ᱥᱟ:ᱜᱤᱧ ᱟᱛᱳ ᱠᱷᱚᱱ ᱦᱚᱸᱭ ᱯᱟᱸᱡᱟ ᱟ.ᱜᱩ ᱠᱚᱣᱟ ᱚᱱᱠᱟᱱ ᱜᱤᱫᱽᱨᱟᱹ ᱾ ᱩᱱᱠᱩ ᱛᱟᱸᱦᱮᱱ ᱞᱟ.ᱜᱤᱫ ᱦᱟᱛᱚᱢᱟᱜ ᱠᱩᱰᱟᱹᱢ ᱫᱷᱟᱨᱮ ᱟᱨ ᱵᱟᱨᱭᱟ ᱜᱟᱱ ᱪᱷᱤᱴᱟᱹ ᱵᱮᱲᱟ ᱚᱲᱟᱜ ᱮ ᱵᱟ.ᱲᱛᱤ ᱟᱠᱟᱫᱟ ᱾ ᱥᱚᱵᱷᱟ ᱟᱜ ᱱᱚᱣᱟ ᱞᱟᱹᱲᱦᱟᱹᱭ ᱧᱮᱞ ᱠᱟᱛᱮ ᱦᱟᱛᱚᱢᱟᱜ ᱨᱤᱫᱚᱭ ᱨᱮᱱᱟᱜ ᱢᱤᱫᱴᱟᱝ ᱯᱟᱦᱴᱟ ᱡᱷᱤᱡ ᱞᱮᱱᱟ ᱾ ᱦᱟᱛᱚᱢ ᱪᱮᱫ ᱮ ᱵᱩᱡᱽ ᱠᱮᱫᱟ ᱦᱮᱸ ᱪᱚ ᱟᱭᱟᱜ ᱥᱟᱱᱟᱢ ᱥᱚᱢᱯᱚᱛᱤ ᱥᱚᱵᱷᱟ ᱟᱜ ᱠᱟᱹᱢᱤ ᱨᱮᱭ ᱫᱟᱱ ᱟᱠᱟᱫᱟ ᱾ ᱜᱤᱫᱽᱨᱟᱹ ᱠᱚᱣᱟᱜ ᱚᱞᱚᱜ ᱠᱷᱚᱨᱚᱪ ᱛᱮᱭᱟᱨ ᱞᱟ.ᱜᱤᱫ ᱛᱮ ᱦᱟᱛᱚᱢ ᱥᱟᱞᱟᱜ ᱚᱯᱥᱚᱨ ᱚᱜ ᱚᱠᱛᱚ ᱨᱮ ᱠᱷᱟᱲᱟᱝ ᱡᱚᱱᱚᱜ ᱠᱤᱛᱟᱹ ᱯᱟᱹᱴᱭᱟᱹ ᱵᱮᱱᱟᱣ ᱟᱭ ᱾ ᱵᱟᱡᱟᱨ ᱫᱤᱠᱩ ᱱᱚᱝᱠᱟᱱᱟᱜ ᱤᱭᱩᱱᱤᱠ ᱡᱤᱱᱤᱥ ᱟ.ᱰᱤ ᱫᱟᱢ ᱟᱛᱮᱠᱚ ᱦᱟᱛᱟᱣᱟ ᱾ ᱤᱱᱟᱹ ᱵᱮᱜᱚᱨ ᱥᱚᱵᱷᱟ ᱠᱚᱞᱠᱟᱛᱟ ᱨᱮᱱᱟᱜ ᱢᱤᱫ ᱵᱟᱨ ᱵᱩᱴᱤᱠ ᱨᱮᱱ ᱠᱚᱱᱥᱟᱞᱴᱮᱱᱴ ᱦᱤᱥᱟᱹᱵᱽ ᱛᱮᱭ ᱠᱟᱹᱢᱤᱭᱟ ᱾ ᱦᱟᱛᱚᱢᱟᱜ ᱚᱲᱟᱜ ᱨᱮᱱᱟᱜ ᱵᱟᱲᱜᱮ ᱨᱮ ᱡᱚᱢ ᱞᱟ.ᱜᱤᱫ ᱟᱲᱟᱜ ᱥᱟᱠᱟᱢ ᱟᱨ ᱥᱮᱨᱢᱟ ᱨᱮ ᱢᱤᱫ ᱫᱷᱟᱣ ᱟᱨᱡᱟᱣ ᱦᱳᱲᱳ ᱛᱮᱜᱮ ᱵᱮᱥ ᱪᱟᱞᱟᱜᱼᱟ ᱾ ᱛᱚᱵᱮ ᱡᱟ ᱥᱩᱠ ᱛᱮ ᱦᱟᱨᱟ ᱟᱠᱟᱱ ᱥᱚᱵᱷᱟ ᱚᱱᱟ ᱟᱨᱡᱟᱣ ᱠᱟᱹᱢᱤ ᱨᱮᱫᱚ ᱟᱹᱰᱤ ᱦᱟᱨᱠᱮᱛ ᱛᱟᱞᱟ ᱛᱮᱜᱮ ᱯᱟᱹᱨᱠᱟᱹᱣ ᱦᱳᱭ ᱟᱠᱟᱱ ᱛᱟᱭᱟ ᱾

ᱟᱛᱳ ᱨᱮᱱ ᱥᱟᱱᱟᱢ ᱦᱚᱲ ᱥᱚᱵᱷᱟ ᱟᱜ ᱥᱮᱵᱮᱞ ᱵᱮᱵᱷᱟᱨ ᱛᱮ ᱟᱹᱰᱤ ᱠᱚ ᱠᱩᱥᱤ ᱠᱟᱣ ᱫᱮᱭᱟ ᱾ ᱥᱚᱵᱷᱟ ᱩᱱᱠᱩ ᱥᱟᱞᱟᱜ ᱠᱷᱟᱨᱥᱟᱞᱟᱜ ᱢᱚᱱᱮ ᱛᱮᱭ ᱜᱟᱞ ᱢᱟᱨᱟᱣᱟ ᱚᱞᱚᱜ ᱯᱚᱲᱦᱚᱱ ᱨᱮᱱᱟᱜ ᱠᱟᱛᱷᱟ ᱠᱚᱢᱟ ᱦᱮᱸᱜᱮ, ᱥᱚᱨᱠᱟᱨᱟᱜ ᱠᱟᱛᱷᱟ ᱠᱚ, ᱩᱱᱠᱩᱣᱟᱜ ᱠᱟᱹᱢᱤ ᱠᱚ, ᱟᱭᱤᱱ ᱠᱚ, ᱟᱯᱱᱟᱨᱟᱜ ᱟᱹᱭᱫᱟᱹᱨ ᱠᱚ ᱾ ᱟᱨᱮ ᱢᱮᱛᱟ ᱠᱚᱣᱟ ᱡᱩᱢᱤᱫᱚᱜ ᱞᱟᱹᱜᱤᱫ ᱾ ᱵᱤᱨ ᱵᱩᱨᱩ ᱫᱟᱨᱮ ᱱᱟᱹᱲᱤ ᱵᱟᱧᱪᱟᱣ ᱫᱚᱦᱚ, ᱟᱨ ᱵᱟᱦᱨᱮ ᱫᱤᱠᱩ ᱴᱷᱮᱱ ᱟᱯᱱᱟᱨᱟᱜ ᱫᱚᱨ ᱵᱟᱲᱦᱟᱣ ᱾ ᱚᱱᱠᱟ ᱜᱮ ᱟᱛᱳ ᱨᱮᱱ ᱵᱟᱨ ᱦᱚᱲ ᱠᱟᱹᱡ ᱥᱤᱠᱷᱱᱟᱹᱛ ᱠᱚᱲᱟ ᱜᱤᱫᱽᱨᱟᱹ ᱥᱚᱵᱷᱟ ᱟᱜ ᱠᱟᱹᱢᱤ ᱨᱮ ᱜᱚᱲᱚ ᱞᱮᱠᱟ ᱟᱨᱟᱬ ᱠᱤᱱ ᱜᱚᱜ ᱟᱠᱟᱫᱟ ᱾ ᱦᱩᱰᱤᱧ ᱜᱤᱫᱽᱨᱟᱹ ᱠᱤᱱ ᱯᱟᱲᱦᱟᱣ ᱠᱚᱣᱟ ᱾ ᱩᱱᱠᱤᱱ ᱪᱮᱛᱟᱱ ᱥᱚᱵᱷᱟ ᱮᱢᱚᱱ ᱚᱨᱥᱚᱝ ᱮ ᱜᱤᱰᱤ ᱟᱠᱟᱫᱟ ᱥᱚᱵᱷᱟ ᱫᱟᱹᱭ ᱡᱟᱸᱦᱟᱱᱟᱜ ᱮ ᱞᱟᱹᱭ ᱞᱮᱠᱷᱟᱱ ᱜᱮ ᱡᱤᱣᱤ ᱩᱨᱤᱡ ᱟᱛᱮ ᱠᱤᱱ ᱠᱟᱹᱢᱤᱭᱟ ᱾ ᱦᱟᱱᱟ ᱟᱯᱤᱥ ᱱᱚᱣᱟ ᱟᱯᱤᱥ ᱡᱟᱸᱦᱟ ᱫᱚᱨᱠᱟᱨ ᱛᱮ ᱪᱟᱞᱟᱣ ᱠᱚᱭ ᱟ.ᱪᱩ ᱵᱟᱲᱟ ᱠᱤᱱᱟ ᱾ ᱟᱹᱠᱤᱱ ᱦᱚᱸ ᱱᱟᱣᱟ ᱠᱟᱛᱮ ᱞᱟᱯᱷᱟᱝ ᱥᱮᱪᱮᱫ ᱟᱢᱮᱴ ᱨᱮᱱᱟᱜ ᱠᱤᱱ ᱠᱩᱨᱩᱢᱩᱴᱩ ᱟᱠᱟᱫᱟ ᱾ ᱢᱤᱫ ᱫᱤᱱ ᱟᱹᱰᱤ ᱦᱚᱨᱚᱵᱚᱨᱚ ᱠᱟᱛᱮ ᱦᱮᱡ ᱮᱱᱛᱮ ᱠᱤᱱ ᱞᱟᱹᱭ ᱠᱮᱫᱟ, “ᱮ ᱫᱟᱹᱭ, ᱵᱷᱟᱨᱚᱛ ᱫᱤᱥᱚᱢ ᱨᱮᱱᱟᱜ ᱡᱷᱚᱛᱚ ᱠᱷᱚᱱ ᱪᱮᱛᱟᱱ ᱢᱟᱹᱪᱤ ᱨᱮᱫᱚ ᱥᱟᱱᱛᱟᱲ ᱦᱚᱲᱮ ᱫᱩᱲᱩᱵ ᱮᱱ ᱫᱚ ᱾………ᱹᱟᱫᱚ ᱟᱵᱚ ᱥᱟᱱᱛᱟᱲ ᱵᱟᱵᱚ ᱦᱟᱨᱠᱮᱛᱚᱜ-ᱟ ᱦᱮᱸᱥᱮ ᱾” ᱥᱚᱵᱷᱟ ᱚᱱᱟ ᱦᱤᱞᱳᱜ ᱪᱮᱫ ᱦᱚᱸ ᱵᱟᱝ ᱞᱟᱹᱭ ᱠᱟᱛᱮ ᱞᱟᱸᱫᱟ ᱞᱮᱫᱟᱭ ᱾ ᱥᱟᱹᱨᱤ ᱜᱮᱛᱚ ᱥᱚᱨᱠᱟᱨᱟᱜ ᱢᱟᱨᱟᱝ ᱢᱟᱨᱟᱝ ᱦᱩᱫᱟᱹ ᱨᱮᱫᱚ ᱛᱤᱱᱟᱹᱜ ᱛᱤᱱᱟᱹᱜ ᱥᱟᱱᱛᱟᱲ ᱠᱚ ᱦᱚᱸ ᱢᱮᱱᱟᱜ ᱠᱚᱣᱟ ᱾

ᱥᱚᱵᱷᱟ ᱥᱟᱞᱟᱜ ᱟᱨ ᱢᱮᱱᱟᱭᱟ ᱨᱟᱱᱤ ᱾ ᱪᱷᱟᱰᱣᱤ ᱠᱩᱲᱤ ᱜᱤᱫᱽᱨᱟᱹ ᱾ ᱦᱤᱨᱚᱢ ᱥᱤᱠᱤᱲ ᱵᱟᱭ ᱥᱟᱦᱟᱣ ᱫᱟᱲᱮ ᱟᱠᱟᱫ ᱛᱮ ᱳᱰᱳᱝ ᱦᱮᱡ ᱟᱠᱟᱱᱟᱭ ᱾ ᱥᱚᱵᱷᱟ ᱟᱹᱰᱤ ᱡᱚᱛᱚᱱ ᱛᱮ ᱫᱚᱨᱚᱫᱽ ᱛᱮ ᱟᱥᱨᱟᱭ ᱮᱢ ᱠᱟᱣ ᱫᱮᱭᱟ ᱾ ᱥᱚᱵᱷᱟ ᱨᱮᱱ ᱩᱢᱩᱞ ᱞᱮᱠᱟ ᱥᱟᱶ ᱥᱟᱶ ᱨᱮᱭ ᱛᱟᱸᱦᱮᱱᱟ ᱾

ᱥᱚᱵᱷᱟ ᱟᱜ ᱠᱩᱠᱢᱩ ᱛᱟᱭ ᱟᱭᱟᱜ ᱱᱚᱣᱟ ᱚᱞᱚᱜ ᱟᱠᱷᱲᱟ ᱨᱮᱡᱤᱥᱴᱨᱮᱥᱚᱱ ᱮ ᱧᱟᱢᱟ ᱢᱤᱫ ᱫᱤᱱ ᱵᱤᱨᱫᱟᱹᱜᱟᱲ ᱞᱮᱠᱟᱛᱮ ᱾ ᱯᱨᱟᱛᱷᱚᱢᱤᱠ ᱥᱤᱠᱠᱷᱟ ᱫᱚᱯᱛᱚᱨ ᱨᱮ ᱟᱭᱤᱡ ᱜᱟᱛᱮ ᱥᱩᱥᱤᱞᱟᱭ ᱪᱟ.ᱠᱨᱤᱭᱟ ᱾ ᱫᱟᱭᱤᱛ ᱮ ᱦᱟᱛᱟᱣ ᱟᱠᱟᱫᱟ ᱥᱚᱵᱷᱟ ᱟᱜ ᱠᱩᱠᱢᱩ ᱯᱩᱨᱟᱹᱣ ᱨᱮᱱᱟᱜ ᱾ ᱴᱟᱠᱟ ᱯᱩᱭᱥᱟᱹ ᱞᱟᱹᱜᱤᱫ ᱫᱤᱠᱩ ᱜᱟᱛᱮ ᱠᱚᱛᱟᱭ ᱮ ᱞᱟᱹᱭ ᱵᱟᱲᱟ ᱟᱠᱳᱣᱟ ᱾ ᱠᱷᱮᱯᱟ ᱠᱷᱮᱯᱤ ᱥᱟᱶᱛᱟ ᱥᱩᱥᱟᱹᱨᱤᱭᱟᱹ ᱠᱚ ᱢᱮᱱᱟᱜ ᱠᱚᱣᱟ ᱾ᱦᱟᱯᱛᱟ ᱨᱮ ᱦᱮᱡ ᱠᱟᱛᱮ ᱢᱤᱫ ᱵᱟᱨᱥᱤᱧ ᱠᱚ ᱜᱚᱲᱚ ᱟᱭᱟ ᱾ ᱮᱱᱹᱡᱤᱹᱣᱳ ᱛᱟᱞᱟ ᱛᱮᱦᱚ ᱜᱚᱲᱚᱭ ᱧᱟᱢ ᱜᱮᱭᱟ ᱟᱹᱰᱤ ᱾ ᱤᱱᱰᱤᱵᱷᱤᱡᱩᱣᱟᱞ ᱦᱚᱸ ᱾ ᱢᱤᱫ ᱞᱚ ᱤᱭᱟᱨ ᱜᱟᱛᱮ ᱦᱚᱸ ᱢᱮᱱᱟᱭ ᱛᱟᱭᱟ ᱾ ᱟᱭᱤᱱ ᱠᱚᱭ ᱵᱤᱱᱛᱤ ᱵᱟᱲᱟ ᱟᱭᱟ ᱾ ᱥᱟᱹᱨᱤᱜᱮ ᱪᱤᱠᱟᱹ ᱞᱮᱠᱟᱛᱮᱪᱚ ᱛᱤᱱᱟᱹᱜ ᱨᱟᱣᱟᱞ ᱥᱟᱹᱦᱤᱡ ᱥᱟᱱᱟᱢ ᱠᱟᱹᱢᱤ ᱠᱚ ᱞᱟᱦᱟ ᱪᱟᱞᱟᱜ ᱠᱟᱱᱟ ᱥᱚᱵᱷᱟ ᱦᱚᱸ ᱵᱟᱭ ᱵᱩᱡᱽ ᱫᱟᱲᱮᱭᱟᱜ ᱠᱟᱱᱟ ᱾ ᱟᱡ ᱦᱚᱸ ᱠᱤᱨᱭᱟᱹᱭ ᱦᱟᱛᱟᱣ ᱟᱠᱟᱫᱟ ᱱᱚᱣᱟ ᱴᱚᱴᱷᱟ ᱢᱤᱫ ᱫᱤᱱ ᱥᱤᱠᱷᱱᱟᱹᱛ ᱛᱮᱭ ᱟᱸᱫᱳᱲᱟ ᱾

ᱦᱟᱛᱚᱢ ᱢᱤᱫ ᱫᱤᱱᱮ ᱜᱚᱛᱚᱭᱮᱱᱟ ᱾ ᱥᱚᱵᱷᱟ ᱟᱹᱰᱤ ᱯᱷᱟᱸᱠ ᱯᱷᱟᱸᱠ ᱮ ᱵᱩᱡᱽ ᱠᱮᱫᱟ ᱾ ᱟᱭᱟᱜ ᱵᱚᱦᱚᱜ ᱪᱮᱛᱟᱱ ᱠᱷᱚᱱ ᱫᱳᱜ ᱫᱟᱨᱟᱢ ᱨᱮᱱᱟᱜ ᱪᱷᱟᱛᱟ ᱥᱟᱦᱟᱭᱮᱱ ᱞᱮᱠᱟᱭ ᱵᱩᱡᱷᱟᱹᱣ ᱠᱮᱫᱟ ᱾ ᱟᱨ ᱡᱟᱸᱦᱟᱭ ᱠᱚᱲᱟ ᱦᱚᱲ ᱠᱚ ᱮᱠᱞᱟ ᱠᱩᱲᱤ ᱦᱚᱯᱚᱱ ᱧᱮᱞ ᱞᱮᱠᱷᱟᱱ ᱜᱮ ᱫᱩᱞᱟᱹᱲᱤᱭᱟᱹᱜ ᱥᱟᱱᱟ ᱠᱚᱣᱟ, ᱪᱷᱟᱛᱟᱨ ᱩᱢᱩᱞ ᱟᱴᱮᱫ ᱥᱟᱱᱟ ᱠᱚᱣᱟ, ᱩᱱᱠᱩ ᱫᱚ ᱟᱨ ᱦᱚᱸ ᱠᱚ ᱥᱟᱥᱛᱟᱭᱮᱱᱟ ᱾ ᱟᱭᱟᱜ ᱮᱞᱟᱠ ᱨᱮᱱ ᱢᱟᱛᱚ ᱦᱮᱸ ᱜᱮ ᱾ ᱵᱟᱦᱨᱮ ᱠᱚᱨᱮᱱ ᱦᱚᱸ ᱱᱮᱛᱟ ᱠᱚ ᱢᱚᱱᱛᱤᱨᱤ ᱠᱚᱨᱮᱱ ᱜᱤᱫᱽᱨᱟᱹ ᱠᱚ ᱥᱚᱵᱷᱟ ᱠᱮᱴᱮᱡ ᱨᱟᱦᱟ ᱛᱮᱭ ᱢᱮᱛᱟ ᱠᱚᱣᱟ, “ᱤᱧ ᱠᱤ ᱱᱚᱣᱟ ᱟᱸᱥ ᱛᱮᱜᱮ ᱚᱲᱟᱜ ᱫᱩᱭᱟᱹᱨ ᱵᱟᱹᱜᱤ ᱠᱟᱛᱮ ᱱᱤᱱ ᱥᱟ:ᱜᱤᱧ ᱨᱮ ᱢᱤᱱᱟᱹᱧᱟ ᱾ ᱱᱩᱠᱩ ᱜᱤᱫᱽᱨᱟᱹ ᱟᱜ ᱫᱟᱭᱤᱛ ᱦᱟᱛᱟᱣ ᱯᱮᱥᱮ ᱧᱮᱞ ᱯᱤᱭᱟᱹᱧ ᱪᱮᱫ ᱞᱮᱠᱟ ᱯᱮ ᱠᱚᱲᱟ ᱟᱠᱟᱱᱟ ᱾” ᱮᱱᱦᱚᱸ ᱧᱩᱛ ᱧᱤᱫᱟᱹ ᱥᱤᱞᱯᱤᱧ ᱴᱷᱮᱞᱟᱣ ᱵᱟᱲᱟᱭ ᱾ ᱦᱚᱨ ᱵᱤᱨ ᱨᱮ ᱜᱷᱮᱨᱟᱣ ᱵᱟᱲᱟᱭ ᱾ ᱩᱱᱠᱩ ᱫᱚ ᱢᱤᱫ ᱮᱠᱞᱟ ᱠᱩᱲᱤ ᱦᱚᱯᱚᱱᱟᱜ ᱮᱠᱞᱟ ᱛᱟᱸᱦᱮ ᱟᱥᱯᱚᱨᱫᱷᱟᱛᱮ ᱦᱟᱦᱟᱲᱟ ᱠᱚ ᱵᱩᱡᱷᱟᱹᱣᱟ ᱾

ᱢᱤᱫᱴᱟᱝ ᱛᱤᱠᱤᱱ ᱨᱮ ᱥᱚᱵᱷᱟ ᱢᱮᱞᱟ ᱯᱤᱸᱰᱟᱹᱨᱮ ᱫᱩᱲᱩᱵ ᱠᱟᱛᱮ ᱢᱤᱫᱴᱟᱜ ᱜᱮᱸᱫᱟᱜ ᱨᱮ ᱥᱩᱛᱟᱹᱢ ᱛᱮ ᱵᱟᱦᱟ ᱱᱟᱹᱲᱤᱭ ᱨᱟᱠᱟᱵ ᱮᱫᱟ ᱾ ᱨᱟᱹᱱᱤ ᱫᱚ ᱚᱲᱟᱜ ᱵᱷᱤᱛᱟᱹᱨ ᱥᱮᱫ ᱨᱮ ᱪᱮᱫ ᱠᱚᱛᱮ ᱪᱚᱭ ᱡᱚᱦᱚᱲ ᱟᱠᱟᱱᱟ ᱾ ᱜᱤᱫᱽᱨᱟᱹ ᱠᱚᱫᱚ ᱚᱲᱟᱜ ᱥᱮᱫ ᱨᱮᱠᱚ ᱠᱷᱮᱞ ᱵᱟᱲᱟᱭᱮᱫᱟ ᱡᱟ.ᱱᱤᱡ! ᱢᱤᱫ ᱜᱟ.ᱰᱤ ᱯᱩᱞᱤᱥ ᱥᱚᱵᱷᱟ ᱟᱜ ᱪᱷᱟᱴᱠᱟ ᱨᱮᱠᱚ ᱛᱤᱸᱜᱩᱭᱮᱱᱟ ᱾ ᱢᱤᱫ ᱯᱩᱞᱤᱥ ᱥᱚᱵᱷᱟ ᱟᱜ ᱩᱯᱩᱨᱩᱢ ᱵᱟᱲᱟᱭ ᱠᱟᱛᱮ ᱢᱮᱛᱟᱫᱮᱭᱟᱭ, “ᱟᱢ ᱧᱩᱛᱩᱢ ᱛᱮ ᱜᱤᱫᱽᱨᱟᱹ ᱟᱠᱷᱨᱤᱧ ᱨᱮᱱᱟᱜ ᱞᱟᱞᱤᱥ ᱢᱮᱱᱟᱜ-ᱟ᱾” ᱥᱚᱵᱷᱟ ᱛᱷᱤᱨ ᱢᱮᱫᱦᱟ ᱩᱱᱠᱩ ᱥᱮᱫ ᱮ ᱟᱴᱮᱫ ᱠᱮᱫ ᱛᱮ ᱰᱟᱴᱟ ᱛᱮ ᱥᱩᱛᱟᱹᱢᱮ ᱜᱟ:ᱰᱤᱡ ᱠᱮᱫ ᱛᱮ ᱵᱟᱹᱭ ᱵᱟᱹᱭ ᱛᱮᱭ ᱞᱟᱹᱭ ᱠᱮᱫᱟ, “ᱚ! ᱵᱷᱟᱜᱮ ᱜᱮ, ᱯᱚᱨᱢᱟᱱ ᱩᱫᱩᱜᱽ ᱯᱮ ᱾ ᱞᱟᱹᱭ ᱯᱮ ᱛᱤᱥ ᱚᱠᱚᱭ ᱨᱮᱱ ᱜᱤᱫᱽᱨᱟ. ᱠᱳᱢᱲᱳ ᱠᱟᱛᱮᱧ ᱟᱹᱠᱷᱨᱤᱧ ᱟᱠᱟᱫ ᱠᱚᱣᱟ ᱾”

ᱼ ᱦᱮᱸ ᱯᱚᱨᱢᱟᱱ ᱢᱟᱞᱮ ᱮᱢᱟᱢ ᱜᱮ ᱾ ᱟᱨ ᱢᱤᱫᱴᱟᱝ ᱠᱟᱛᱷᱟ, ᱟᱢ ᱫᱚ ᱚᱠᱚᱭ ᱞᱟᱹᱭ ᱛᱮ ᱥᱮ ᱚᱠᱚᱭ ᱦᱚᱠᱩᱢ ᱛᱮ ᱱᱚᱣᱟ ᱵᱤᱨ ᱟᱜ ᱴᱚᱴᱷᱟ ᱥᱮᱫ ᱵᱟᱲᱜᱮᱢ ᱵᱟ.ᱲᱛᱤᱭᱮᱫᱟ ᱾ ᱡᱚᱫᱤᱭᱳ ᱱᱚᱣᱟ ᱟᱛᱳ ᱨᱮᱱ ᱥᱟᱱᱟᱢ ᱦᱚᱲ ᱜᱮ ᱵᱤᱨ ᱟᱜ ᱴᱚᱴᱷᱟ ᱨᱮ ᱢᱮᱱᱟᱜ ᱯᱮᱭᱟ ᱾ ᱟᱹᱰᱤ ᱞᱚᱜᱚᱱ ᱯᱟᱴᱟ ᱠᱚ ᱥᱚᱫᱚᱨ ᱯᱮ ᱾ ᱵᱟ.ᱱᱩᱜ ᱠᱷᱟᱱ ᱵᱤᱨ ᱟᱭᱟᱜ ᱴᱚᱴᱷᱟᱭ ᱦᱟᱛᱟᱣ ᱨᱩᱭᱟᱹᱲᱟ ᱾ ᱥᱚᱵᱷᱟ ᱚᱱᱠᱟ ᱜᱮ ᱢᱤᱫ ᱢᱚᱱᱮᱛᱮ ᱠᱟᱹᱢᱤ ᱠᱟᱹᱢᱤᱛᱮᱭ ᱛᱮᱞᱟ ᱠᱮᱫᱟ, “ᱦᱩᱢ ᱾” ᱯᱩᱞᱤᱥ ᱠᱚ ᱨᱩᱭᱟᱹᱲᱮᱱᱟ ᱥᱟᱱᱟᱢᱟᱜ ᱧᱮᱞ ᱵᱟᱲᱟ ᱠᱟᱛᱮ ᱾ ᱥᱚᱵᱷᱟ ᱫᱚ ᱟᱛᱳ ᱢᱟ.ᱡᱷᱤ ᱠᱚᱴᱷᱮᱱ ᱮ ᱛᱷᱩᱛᱤ ᱵᱟᱲᱟ ᱠᱮᱫᱟ ᱾

ᱢᱟ.ᱡᱷᱤ ᱦᱟᱲᱟᱢ ᱟᱥᱳᱣᱟᱥ ᱠᱟᱛᱮ ᱞᱟᱹᱭ ᱠᱮᱫᱟᱭ, “ᱵᱟᱝᱟ ᱢᱟᱹᱭ, ᱩᱱᱟᱹᱜ ᱥᱳᱡᱷᱮ ᱠᱟᱱᱛᱮ ᱾ ᱟᱞᱮ ᱫᱚ ᱮᱭᱟᱭ ᱯᱤᱲᱦᱤ ᱛᱟᱸᱦᱮ ᱦᱚᱲ ᱱᱚᱣᱟ ᱵᱷᱤᱴᱟᱹ ᱵᱚᱥᱢᱚᱛᱟ ᱨᱮ ᱾ ᱟᱞᱮ ᱨᱟᱠᱟᱵ ᱠᱤ ᱩᱱᱟᱹᱜ ᱥᱳᱡᱷᱮ ᱾ ᱵᱤᱨ ᱵᱩᱨᱩ ᱢᱟᱜ ᱯᱷᱟᱨᱪᱟ ᱠᱟᱛᱮ ᱟᱛᱳ ᱞᱮ ᱵᱮᱨᱮᱫ ᱟᱠᱟᱫᱟ ᱾ᱟᱞᱮᱫᱚ ᱯᱟᱴᱟ ᱨᱮᱱᱟᱜ ᱫᱷᱟᱨ ᱵᱟᱞᱮ ᱫᱷᱟᱨᱟᱣᱟ ᱾ ᱩᱱ ᱫᱚ ᱱᱚᱰᱮ ᱥᱚᱨᱠᱟᱨ ᱱᱟᱹᱭ, ᱪᱮᱞᱮ ᱱᱟᱹᱭ! ᱵᱤᱨ ᱜᱟᱡᱟᱲ! ᱚᱠᱚᱭ ᱫᱚ ᱯᱟᱴᱟᱢ ᱠᱚᱭᱮᱭᱟ᱾”

ᱮᱱᱦᱚᱸ ᱥᱚᱵᱷᱟ, ᱵᱤᱥᱮᱥ ᱠᱟᱭᱛᱮ ᱠᱩᱲᱤ ᱦᱚᱯᱚᱱ ᱠᱚ ᱥᱚᱱᱛᱚᱨ ᱮ ᱢᱮᱛᱟᱫ ᱠᱚᱣᱟ ᱾ ᱪᱮᱫᱟᱜ ᱥᱮ ᱠᱩᱲᱤ ᱦᱚᱯᱚᱱ ᱫᱚ ᱩᱱᱟᱹᱜ ᱞᱚᱜᱚᱱ ᱵᱟᱠᱚ ᱪᱤᱠᱟᱹ ᱠᱚᱣᱟ ᱯᱩᱞᱤᱥ ᱾ ᱟᱨ ᱦᱚᱸ ᱜᱷᱟᱱᱮ ᱫᱚ ᱮᱲᱮ ᱜᱮᱭ ᱢᱚᱱᱮ ᱜᱚᱫᱟ ᱾ ᱛᱚᱵᱮ ᱯᱩᱨᱟᱹ ᱮᱲᱮ ᱜᱮ ᱡᱮ ᱵᱟᱝ ᱠᱟᱱᱟ ᱚᱱᱟᱫᱚ ᱵᱩᱡᱷᱟᱹᱣ ᱮᱱᱟ ᱵᱟᱨ ᱥᱤᱧ ᱯᱮ ᱢᱟᱦᱟ ᱛᱟᱭᱚᱢ ᱾ ᱟᱛᱳᱨᱮ ᱵᱟᱨ ᱜᱟ.ᱰᱤ ᱯᱩᱞᱤᱥ ᱠᱚ ᱵᱚᱞᱚᱭᱮᱱᱟ ᱾ ᱯᱩᱞᱤᱥ ᱠᱚ ᱞᱟᱹᱭ ᱠᱮᱫᱟ, “ᱵᱤᱨ ᱟᱜ ᱱᱚᱣᱟ ᱴᱚᱴᱷᱟ ᱨᱮ ᱫᱟᱨᱮ ᱠᱚ ᱨᱚᱦᱚᱭ ᱦᱳᱭᱳᱜ-ᱟ ᱾ ᱥᱚᱨᱠᱟᱨᱟᱜ ᱦᱚᱠᱩᱢ ᱾ ᱡᱟᱦᱟᱭᱟᱜ ᱠᱟᱜᱚᱡᱽ ᱯᱚᱛᱚᱨ ᱢᱮᱱᱟᱜ-ᱟ ᱟ.ᱜᱩᱭ ᱛᱟᱯᱮ ᱾ ᱟᱨ ᱵᱟᱝ ᱠᱷᱟᱱ ᱚᱲᱟᱜ ᱟᱲᱟᱜᱽ ᱯᱮ ᱾” ᱢᱮᱱᱠᱷᱟᱱ ᱟᱛᱳ ᱨᱮᱱ ᱟᱭᱳ ᱦᱚᱲ ᱠᱚ ᱦᱚᱨ ᱠᱚ ᱮᱥᱮᱫ ᱠᱮᱫᱟ ᱾ ᱟᱛᱳ ᱵᱷᱤᱛᱤᱨ ᱵᱟᱝ ᱠᱚ ᱵᱚᱞᱚ ᱦᱚᱪᱚᱣᱟᱜ-ᱟ ᱢᱮᱱᱛᱮ ᱾ ᱞᱟᱦᱟ ᱨᱮᱭ ᱛᱤᱸᱜᱩ ᱟᱠᱟᱱᱟ ᱥᱚᱵᱷᱟ ᱾ ᱦᱟᱱᱟ ᱱᱚᱣᱟ ᱡᱩᱠᱛᱤ ᱛᱮᱭ ᱪᱷᱟᱸᱫᱟᱭᱮᱫ ᱠᱚᱣᱟ ᱾

ᱢᱤᱫ ᱜᱷᱟᱲᱤ ᱛᱮ ᱪᱮᱫ ᱪᱚ ᱪᱤᱠᱟᱹᱭᱮᱱ! ᱢᱤᱫ ᱯᱩᱞᱤᱥ ᱦᱚᱲ ᱫᱚ ᱥᱚᱵᱷᱟ ᱟᱜ ᱩᱵ ᱨᱮ ᱥᱟᱵ ᱠᱟᱛᱮ ᱫᱷᱟᱠᱞᱟᱣ ᱥᱟᱦᱟ ᱠᱮᱫᱮᱭᱟᱭ ᱾ ᱨᱳᱦᱮᱫ ᱠᱟᱛᱮᱭ ᱞᱟᱹᱭ ᱠᱮᱫᱟ, “ᱢᱮᱱ, ᱥᱩᱥᱟᱹᱨᱤᱭᱟᱜ ᱠᱟᱱᱟᱭ! ᱥᱩᱥᱟᱹᱨᱤᱭᱟ.!ᱚᱱᱟ ᱦᱚᱸ ᱦᱚᱲᱟᱜ ᱴᱚᱴᱷᱟ ᱨᱮ!” ᱟᱨ ᱢᱤᱫ ᱯᱩᱞᱤᱥ ᱫᱚ ᱜᱮᱸᱫᱟᱜ ᱮ ᱥᱟᱵ ᱧᱟᱢ ᱠᱮᱫ ᱛᱟᱭ ᱛᱮ ᱟᱧᱪᱟᱨᱮ ᱜᱚᱦᱚᱲ ᱧᱩᱨ ᱠᱮᱫ ᱛᱟᱭᱟ ᱦᱚᱲᱢᱚ ᱠᱷᱚᱱ ᱾ ᱟᱫᱚ ᱟᱡ ᱛᱟᱞᱚᱢ ᱯᱟᱨᱚᱢ ᱠᱟᱛᱮ ᱦᱩᱫᱽ ᱦᱩᱫᱽ ᱞᱟᱦᱟ ᱥᱮᱫ ᱠᱚ ᱵᱚᱞᱚ ᱪᱟᱞᱟᱣ ᱮᱱᱟ ᱾ ᱥᱟᱢᱟᱝ ᱨᱮᱜᱮ ᱥᱚᱵᱷᱟ ᱟᱜ ᱚᱞᱚᱜ ᱟᱥᱲᱟ ᱾ ᱚᱸᱰᱮ ᱵᱚᱞᱚ ᱠᱟᱛᱮ ᱚᱲᱟᱜ ᱠᱷᱚᱱᱟᱜ ᱛᱷᱟ.ᱨᱤ ᱵᱟᱹᱴᱤ ᱠᱚ, ᱜᱤᱫᱽᱨᱟᱹ ᱟᱜ ᱱᱚᱱᱚᱞ ᱞᱟᱪᱷᱟ ᱠᱚ, ᱵᱟᱦᱨᱮ ᱠᱚ ᱪᱟᱯᱟᱫ ᱳᱰᱳᱝ ᱠᱮᱫᱟ ᱾ ᱚᱲᱟᱜ ᱞᱚᱱᱰᱚᱼ ᱵᱷᱚᱱᱰᱚ ᱠᱚ ᱫᱷᱩᱨᱟᱹᱣ ᱮᱱᱟ ᱾ ᱚᱱᱟ ᱠᱚ ᱧᱮᱞ ᱠᱟᱛᱮ ᱜᱤᱫᱽᱨᱟᱹ ᱠᱚ ᱵᱚᱛᱚᱨ ᱛᱮ ᱨᱟᱼ ᱨᱟᱜ ᱠᱚ ᱪᱷᱩᱴᱟᱹᱣ ᱮᱱᱟ ᱾ ᱟᱪᱠᱟ ᱜᱷᱚᱴᱚᱱ ᱛᱮ ᱥᱚᱵᱷᱟ ᱪᱮᱫ ᱮ ᱪᱤᱠᱟᱹᱭᱟ ᱵᱟᱭ ᱵᱩᱡᱽ ᱫᱟᱲᱮᱭᱟᱫᱟ ᱾ ᱟᱫᱚ ᱮᱵᱷᱮᱱᱮᱱ ᱞᱮᱠᱟᱭ ᱫᱟᱹᱲ ᱪᱟᱞᱟᱣ ᱮᱱᱛᱮ ᱪᱟᱯᱟᱫ ᱜᱤᱰᱤ ᱫᱩᱨᱤᱵᱽ ᱠᱚ ᱵᱟᱧᱪᱟᱣ ᱮ ᱫᱷᱩᱨᱟᱹᱣ ᱮᱱᱟ ᱾ ᱢᱤᱫ ᱯᱩᱞᱤᱥ ᱫᱚ ᱥᱚᱵᱷᱟ ᱜᱚᱦᱚᱲ ᱨᱩᱭᱟᱹᱲ ᱠᱟᱛᱮ ᱠᱚᱲᱟᱢ ᱨᱮᱱᱟᱜ ᱫᱟᱯᱟᱞ ᱦᱚᱸᱭ ᱜᱚᱦᱚᱲ ᱚᱲᱮᱡ ᱠᱮᱫ ᱛᱟᱭᱟ ᱾ᱦᱚᱯᱚᱨᱚᱜ ᱜᱮᱸᱫᱟᱜ ᱮ ᱜᱚᱦᱚᱲ ᱚᱲᱮᱡ ᱠᱮᱫ ᱛᱟᱭᱟ ᱾ ᱦᱚᱲᱢᱚᱨᱮ ᱥᱟᱭᱟ ᱟᱨ ᱚᱲᱮᱡ ᱵᱞᱟᱭᱩᱡᱽ ᱟᱛᱮ ᱜᱮ ᱥᱚᱵᱷᱟ ᱠᱤᱠᱭᱟᱹᱣ ᱠᱤᱠᱭᱟᱹᱣ ᱛᱮ ᱜᱤᱫᱽᱨᱟ. ᱠᱚᱣᱟᱜ ᱚᱞᱚᱜ ᱫᱩᱨᱤᱵᱽ ᱠᱚ ᱦᱟᱞᱟᱝ ᱥᱟᱢᱴᱟᱣ ᱠᱟᱛᱮ ᱠᱚᱲᱟᱢ ᱨᱮᱭ ᱦᱟ.ᱲᱩᱵ ᱡᱟᱣᱨᱟᱭᱮᱫᱟ ᱾

ᱥᱚᱵᱷᱟ ᱟᱜ ᱦᱟᱞᱚᱛ ᱧᱮᱞ ᱠᱟᱛᱮ ᱟᱨ ᱠᱚ ᱟᱛᱳ ᱨᱮᱱ ᱠᱩᱲᱤ ᱦᱚᱯᱚᱱ ᱠᱚ ᱠᱚ ᱞᱟᱦᱟ ᱦᱤᱡᱩᱜ ᱠᱟᱱ ᱠᱷᱟᱱ ᱢᱤᱫ ᱯᱩᱞᱤᱥ ᱫᱚᱭ ᱞᱟᱹᱭ ᱠᱮᱫᱟ, “ᱢᱳᱴᱮ ᱟᱞᱚ ᱯᱮ ᱦᱤᱡᱩᱜ-ᱟ ᱾ ᱵᱟᱝ ᱠᱷᱟᱱ ᱟᱯᱮᱭᱟᱜ ᱦᱚᱸ ᱱᱚᱣᱟ ᱦᱟᱞᱚᱛ ᱦᱳᱭᱳᱜ ᱛᱟᱯᱮᱭᱟ ᱾” ᱥᱚᱵᱷᱟ ᱫᱚ ᱨᱟᱜ ᱨᱟᱜ ᱛᱮ ᱚᱱᱟ ᱠᱚᱭ ᱜᱚᱦᱚᱲ ᱥᱟᱢᱴᱟᱣ ᱮᱫᱟ ᱾ ᱦᱟ.ᱲᱩᱵ ᱩᱠᱩᱭᱮᱫᱟᱭ ᱡᱤᱣᱤ ᱩᱨᱤᱡ ᱠᱟᱛᱮ ᱾ ᱥᱚᱵᱷᱟ ᱟᱜ ᱚᱱᱟ ᱠᱟᱹᱢᱤ ᱠᱚ ᱟᱠᱚᱴ ᱞᱟ.ᱜᱤᱫ ᱠᱚᱲᱟ ᱯᱩᱞᱤᱥᱟᱜ ᱚᱸᱡᱚᱨᱟ ᱛᱤ ᱠᱚᱠᱚ ᱫᱟᱸᱲᱟ ᱵᱟᱲᱟ ᱠᱮᱫᱟ ᱥᱚᱵᱷᱟ ᱟᱜ ᱦᱚᱲᱢᱚ ᱠᱚᱨᱮ ᱾ ᱮᱱᱦᱚᱸ ᱠᱚᱲᱟᱢ ᱠᱷᱚᱱ ᱵᱟᱭ ᱜᱤᱰᱤᱭᱮᱫᱟ ᱥᱚᱵᱷᱟ ᱟᱡ ᱨᱮᱱ ᱫᱩᱞᱟᱹᱲ ᱨᱮᱱ ᱯᱟᱹᱴᱷᱩᱣᱟᱹ ᱠᱚᱣᱟᱜ ᱱᱚᱱᱚᱞ, ᱞᱟᱪᱷᱟ, ᱯᱚᱛᱚᱵ ᱾ ᱛᱟᱨᱟ ᱜᱷᱚᱱᱴᱟ ᱜᱟᱱ ᱞᱚᱱᱰᱚ ᱵᱷᱚᱱᱰᱚ ᱠᱟᱹᱢᱤ ᱠᱟᱛᱮ ᱯᱩᱞᱤᱥ ᱠᱚ ᱨᱩᱭᱟᱹᱲᱮᱱᱟ ᱾ ᱛᱤᱸᱜᱩ ᱟᱠᱟᱱ ᱠᱩᱲᱤ ᱦᱚᱯᱚᱱ ᱥᱮᱫ ᱠᱚᱭᱚᱜ ᱠᱟᱛᱮ ᱠᱚ ᱞᱟᱹᱭ ᱛᱚᱨᱟ ᱠᱮᱫᱟ, “ᱟᱯᱮ ᱯᱟ.ᱨᱤ ᱟᱨ ᱢᱤᱫ ᱫᱤᱱ ᱾ ᱠᱟᱜᱚᱡᱽ ᱠᱚ ᱡᱚᱜᱟᱲ ᱯᱮ ᱾”

ᱥᱚᱵᱷᱟ ᱮᱠᱞᱟ ᱨᱟᱪᱟ ᱨᱮ ᱫᱩᱲᱩᱵ ᱟᱠᱟᱱᱟᱭ ᱟ.ᱛᱩ ᱜᱤᱰᱤ ᱢᱮᱲ ᱞᱮᱠᱟ ᱾ ᱢᱮᱫ ᱠᱷᱚᱱᱟᱜ ᱢᱮᱫ ᱫᱟᱜ ᱡᱚᱨᱚᱜ ᱠᱟᱱ ᱛᱟᱭᱟ ᱦᱤᱰᱤᱨ ᱦᱤᱰᱤᱨ ᱾ ᱜᱤᱫᱽᱨᱟᱹ ᱠᱚ ᱠᱷᱩᱱᱴᱤ ᱨᱮ ᱡᱟᱯᱟᱜ ᱠᱟᱛᱮ ᱠᱚ ᱨᱟᱜ ᱮᱫᱟ ᱾ ᱨᱟᱱᱤ ᱫᱟᱹᱲ ᱦᱮᱡ ᱮᱱ ᱛᱮᱭ ᱢᱤᱫᱴᱟᱝ ᱜᱮᱸᱫᱟᱜ ᱛᱮᱭ ᱯᱚᱴᱚᱢ ᱠᱮᱫᱮᱛᱮᱭ ᱵᱮᱨᱮᱫ ᱠᱮᱫᱮᱭᱟ, “ᱚᱲᱟᱜ ᱪᱚᱞᱚ ᱫᱟᱹᱭ, ᱦᱚᱲ ᱠᱚ ᱦᱤᱡᱩᱜ ᱠᱟᱱᱟ, ᱠᱚᱭᱚᱜ ᱟᱠᱟᱫ ᱟᱠᱚ ᱾”

ᱥᱚᱵᱷᱟ, ᱠᱟᱞᱚᱜ ᱵᱟᱞᱚᱜ ᱥᱚᱵᱷᱟ ᱨᱚᱲ ᱠᱮᱫᱟᱭ, “ᱪᱮᱫ ᱨᱮᱱᱟᱜ ᱞᱟᱡᱟᱣ ᱤᱧᱟᱜ ᱨᱟᱹᱱᱤ ᱾ ᱫᱤᱠᱩ ᱴᱷᱮᱱ ᱤᱧ ᱳᱫᱳᱲ ᱮᱱ ᱛᱮ………ᱩᱱᱠᱩ ᱫᱤᱥᱚᱢ ᱨᱮᱱ ᱪᱮᱛᱟᱱ ᱢᱟᱪᱤᱨᱮ ᱡᱟᱸᱦᱟᱭ ᱠᱚ ᱫᱩᱲᱩᱵ ᱟᱠᱟᱱᱟ, ᱤᱧ ᱨᱮᱱ ᱜᱮ ᱫᱟᱹᱭ, ᱤᱧ ᱨᱮᱱ ᱜᱮ ᱢᱟᱹᱭ, ᱤᱧᱟᱜ ᱢᱟᱭᱟᱢ ᱵᱳᱦᱮᱞᱚᱜ ᱠᱟᱱᱟ ᱩᱱᱠᱩᱭᱟᱜ ᱦᱚᱲᱢᱚ ᱨᱮ ᱾ ᱩᱱᱠᱩ ᱫᱚ ᱛᱮᱦᱮᱧ ᱵᱟᱠᱚ ᱳᱫᱳᱲᱮᱱ ᱛᱮ! ᱞᱟᱹᱭ ᱢᱮ ᱨᱟᱹᱱᱤ ᱵᱟᱠᱚ ᱳᱫᱳᱲᱮᱱ ᱛᱮ ᱾”
**