ᱤᱧ ᱫᱚ ᱨᱮᱸᱜᱮᱡ ᱚᱲᱟᱜ ᱨᱮᱱ ᱦᱚᱯᱚᱱ ᱮᱨᱟ,
ᱟᱭᱳ ᱵᱟᱵᱟ ᱵᱟᱝᱠᱤᱱ ᱵᱷᱮᱡᱟ ᱟᱠᱟᱫᱤᱧ ᱤᱛᱩᱱ ᱟᱥᱲᱟ ᱾
ᱢᱤᱫ ᱵᱤᱛᱟᱹ ᱞᱟᱡ ᱵᱷᱟᱛᱟᱣ ᱞᱟᱹᱜᱤᱫᱛᱮ ᱪᱟᱞᱟᱜ ᱟᱹᱠᱤᱱ ᱱᱟᱞᱦᱟ,
ᱚᱵᱷᱟᱵᱽ ᱡᱟᱞᱟᱨᱮ ᱤᱧᱦᱚᱸ ᱠᱤᱱ ᱠᱟᱹᱲᱢᱤ ᱠᱟᱹᱫᱤᱧᱼᱟ ᱾
ᱤᱧᱫᱚ ᱠᱤᱥᱟᱹᱲ ᱠᱚᱨᱮᱱ ᱠᱟᱹᱲᱢᱤ ᱠᱩᱲᱤ,
ᱵᱟᱹᱱᱩᱜ ᱱᱟᱯᱟᱭ ᱦᱚᱨᱚᱜ ᱵᱟᱸᱫᱮ ᱵᱟᱹᱱᱩᱜᱼᱟ ᱱᱟᱯᱟᱭ ᱞᱩᱜᱽᱲᱤ ᱾
ᱰᱟᱦᱟᱨ ᱫᱷᱟᱨᱮ ᱨᱮᱹᱧ ᱜᱩᱯᱤ ᱥᱟᱸᱜᱮ ᱢᱮᱨᱚᱢ ᱵᱷᱤᱰᱤ,
ᱠᱟᱹᱢᱤ ᱠᱚᱛᱤᱧ ᱤᱧᱟᱹᱜ ᱜᱤᱛᱤᱞ ᱜᱷᱟᱥᱟᱣ ᱡᱚᱜ ᱜᱤᱰᱤ ᱾
ᱤᱧ ᱡᱩᱴᱤ ᱜᱤᱫᱽᱨᱟᱹ ᱤᱛᱩᱱ ᱟᱥᱲᱟ ᱛᱮᱠᱚ ᱪᱟᱞᱟᱜ
ᱤᱧᱫᱚ ᱢᱮᱱᱟᱹᱧ ᱜᱟᱨᱚᱡ ᱥᱟᱨᱚᱡ ᱢᱮᱨᱚᱢ ᱵᱷᱤᱰᱤ ᱥᱟᱞᱟᱜ ᱾
ᱪᱟᱞᱟᱜ ᱥᱟᱹᱱᱟᱹᱧ ᱤᱧᱦᱚᱸ ᱩᱱᱠᱩ ᱛᱩᱞᱩᱡ ᱟᱥᱲᱟ,
ᱯᱟᱞᱮ ᱦᱟᱯᱮᱱ ᱚᱞᱚᱜ ᱵᱟᱝᱛᱮ ᱦᱚᱲ ᱠᱚ ᱠᱚ ᱯᱚᱥᱲᱟ ᱾
ᱧᱮᱞᱟᱹᱧ ᱛᱤᱱᱟᱹᱜ ᱞᱮᱠᱟᱱ ᱠᱩᱠᱢᱩ ᱚᱲᱮᱡ ᱯᱟᱹᱴᱣᱟᱹ ᱨᱮ,
ᱦᱚᱸᱡᱟᱝ ᱢᱮᱱᱟᱹᱧ ᱩᱯᱷᱟᱹᱲ ᱛᱚᱯᱟᱜ ᱞᱚᱴᱚᱡ ᱠᱚᱴᱷᱮ ᱜᱷᱟᱧᱡᱞᱚᱝ ᱯᱟᱨᱠᱚᱢ ᱨᱮ ᱾
ᱜᱤᱛᱤᱡ ᱠᱟᱛᱮ ᱱᱟᱱᱟ ᱦᱩᱱᱟᱹᱨ ᱤᱧᱫᱩᱧ ᱩᱭᱦᱟᱹᱨᱟ,
ᱟᱞᱮ ᱫᱚᱞᱮ ᱨᱮᱸᱜᱮᱡ ᱜᱮᱭᱟ ᱤᱧᱫᱚ ᱨᱮᱸᱜᱮᱡ ᱦᱚᱯᱚᱱ ᱮᱨᱟ ᱾
ᱦᱚᱲ ᱠᱚ ᱴᱷᱮᱱ ᱠᱟᱹᱢᱤ ᱠᱟᱹᱢᱤᱛᱮ ᱤᱧᱫᱩᱧ ᱦᱟᱨᱟᱭᱮᱱ,
ᱚᱞᱚᱜ ᱠᱚᱲᱟ ᱠᱤᱥᱟᱹᱲ ᱦᱚᱯᱚᱱ ᱞᱮᱞᱛᱤᱧ ᱡᱟᱸᱣᱟᱭ ᱞᱮᱱ ᱾
ᱛᱷᱟᱹᱭᱟᱹ ᱠᱟᱛᱮ ᱠᱚ ᱛᱩᱫ ᱠᱤᱫᱤᱧ ᱜᱚᱦᱚᱲ ᱠᱤᱫᱤᱧ ᱟᱠᱚ ᱨᱟᱫᱽ ᱨᱟᱫᱽ,
ᱵᱚᱛᱚᱨ ᱥᱞᱛᱞᱟᱜ ᱚᱸᱰᱮ ᱠᱷᱚᱱᱟᱜ ᱤᱧᱢᱟ ᱨᱤᱴᱟᱹᱢ ᱯᱟᱴ ᱾
ᱱᱟᱪᱟᱨ ᱱᱤᱫᱷᱟᱹᱱ ᱫᱚᱥᱟ ᱠᱷᱟᱹᱛᱤᱨ ᱟᱹᱰᱤ ᱜᱮᱞᱮ ᱩᱫᱷᱤᱱ,
ᱦᱟᱨᱠᱮᱛ ᱥᱟᱥᱮᱛ ᱛᱟᱞᱟ ᱛᱮᱜᱮ ᱪᱟᱞᱟᱜ ᱛᱟᱞᱮ ᱫᱤᱱ ᱾
ᱵᱟᱹᱱᱩᱜ ᱛᱟᱞᱮ ᱪᱟᱣᱞᱮ ᱦᱳᱲᱳ ᱵᱟᱹᱱᱩᱜ ᱛᱟᱞᱮ ᱴᱟᱠᱟ,
ᱠᱟᱹᱢᱤ ᱞᱮᱱᱼᱱᱟ ᱧᱟᱢᱚᱜ ᱟᱱᱟᱝ ᱠᱟᱹᱴᱤᱡ ᱫᱟᱜ ᱫᱟᱠᱟ ᱾
ᱛᱤᱨᱮᱱ ᱯᱩᱛᱼᱞᱟᱹ ᱞᱮᱠᱟ ᱜᱮᱪᱮᱧ ᱮᱱᱮᱡ ᱚᱪᱚᱜ ᱠᱟᱱ,
ᱱᱟᱪᱟᱨ ᱱᱤᱫᱷᱟᱹᱱ ᱦᱚᱲᱟᱜ ᱫᱚ ᱦᱟᱭ᱾ ᱢᱟᱹᱱ ᱫᱚ ᱵᱟᱹᱱᱩᱜ ᱟᱱ ᱾
ᱯᱟᱱᱛᱮ ᱟᱹᱱᱤᱧ ᱵᱟᱧᱪᱟᱜ ᱞᱟᱹᱜᱤᱫ ᱟᱹᱯᱟᱹᱥᱩᱞ ᱰᱟᱦᱟᱨ,
ᱴᱤᱯᱤᱱ ᱫᱟᱠᱟ ᱛᱟᱨᱮᱱ ᱨᱮ ᱜᱟᱢᱪᱷᱟ ᱠᱟᱹᱢᱤᱧ ᱪᱟᱞᱟᱜ ᱵᱟᱡᱟᱨ ᱾
***
