ᱥᱮᱛᱟᱜ ᱥᱤᱥᱤᱨ ᱥᱤᱧ ᱪᱟᱸᱫᱚ ᱛᱟᱨᱟᱥ ᱛᱮ
ᱡᱷᱟᱞᱠᱟᱣᱜ ᱡᱷᱤᱞᱤ ᱢᱤᱞᱤ,
ᱟᱹᱧᱪᱤᱨ ᱯᱟᱹᱧᱪᱤᱨ ᱪᱟᱛᱚᱢ ᱚᱲᱟᱜ ᱠᱷᱚᱱ
ᱥᱩᱯᱟᱹᱲᱤ ᱦᱮᱨᱢᱮᱫ ᱫᱤᱯᱤᱞ ᱚᱰᱚᱠ ᱮᱱᱟᱭ ᱦᱤᱞᱤ ᱾
ᱥᱚᱠᱚᱲ ᱵᱚᱠᱚᱲ ᱟᱹᱛᱩ ᱢᱩᱪᱟᱹᱫ ᱜᱟᱰᱟ,
ᱨᱤᱞᱟᱹᱢᱟᱞᱟ ᱞᱤᱞ ᱫᱟᱜ,
ᱪᱷᱮᱢᱮᱠ ᱪᱷᱮᱢᱮᱠ ᱯᱟᱹᱭᱬᱤ ᱥᱟᱰᱮ
ᱦᱤᱞᱤ ᱨᱩᱣᱟᱹᱲᱟᱭ ᱦᱮᱨᱢᱮᱫ ᱨᱮᱛᱟᱭ ᱞᱩ ᱫᱟᱜ ᱾
ᱮᱱᱮᱡ ᱡᱚᱝ ᱟᱠᱚ ᱞᱮᱴᱠᱟ
ᱠᱩᱞᱦᱤ ᱫᱷᱩᱲᱤ ᱨᱮ ᱰᱤᱜᱽᱞᱟᱹ ᱰᱤᱜᱽᱞᱤ,
ᱠᱩᱴᱩᱢ ᱥᱟᱹᱦᱤᱸᱡ ᱵᱟᱸᱫᱮ ᱟᱛᱮ
ᱞᱚᱜᱚᱱ ᱞᱚᱜᱚᱱᱮ ᱛᱟᱲᱟᱢᱟ ᱦᱤᱞᱤ ᱾
ᱦᱚᱴᱚᱜ ᱨᱮᱛᱟᱭ ᱦᱟᱨ ᱢᱟᱞᱟ
ᱥᱟᱶᱛᱮ ᱴᱟᱠᱟ ᱢᱚᱦᱚᱨ,
ᱢᱩ ᱞᱩᱞᱩᱠ ᱢᱚᱪᱟ ᱫᱷᱟᱹᱵᱤᱡ
ᱟᱬᱜᱚ ᱠᱚᱜᱼᱟ ᱡᱚᱦᱚᱨ ᱾
ᱛᱮᱞ ᱥᱟᱶᱟᱨ ᱦᱚᱲᱢᱚ ᱨᱮᱛᱟᱭ ᱠᱷᱚᱫᱟ
ᱦᱮᱸᱫᱮ ᱜᱮ ᱟᱹᱰᱤ ᱱᱟᱯᱟᱭ, ᱥᱩᱯᱩ ᱨᱮ ᱵᱟᱹᱡᱩ,
ᱨᱚᱫ ᱨᱮ ᱯᱟᱱ ᱠᱟᱱᱴᱟ
ᱥᱟᱺᱜᱤᱧ ᱠᱷᱚᱱ ᱜᱮ ᱞᱟᱸᱫᱟᱭ ᱾
ᱯᱟᱹᱴᱭᱟᱹ ᱜᱟᱞᱟᱝ ᱢᱟᱛᱠᱚᱢ ᱦᱟᱞᱟᱝ,
ᱥᱮᱱ ᱜᱮ ᱢᱚᱦᱚᱸᱰᱟ ᱩᱨᱤᱡᱚᱜᱼᱟᱭ,
ᱫᱚᱝ ᱞᱟᱜᱽᱬᱮ ᱮᱱᱮᱡ ᱟᱠᱷᱲᱟ ᱠᱚᱨᱮ ᱦᱚᱸ
ᱞᱟᱦᱟ ᱨᱮᱜᱮ ᱫᱟᱨᱟᱭ ᱾
ᱥᱮᱫᱟᱭ ᱥᱮᱨᱮᱧ ᱢᱚᱪᱟ ᱨᱮᱜᱮ
ᱥᱮᱨᱮᱧᱮ ᱛᱮᱞᱟᱭ ᱧᱚᱦᱚᱬ ᱧᱚᱦᱚᱬ,
ᱛᱟᱨᱠᱚᱜ ᱠᱚᱲᱟᱢ ᱠᱚᱞᱮ ᱨᱮᱜᱮ ᱴᱟᱢᱟᱠ ᱛᱩᱢᱫᱟᱜ
ᱥᱟᱰᱮ ᱥᱟᱶᱛᱮ ᱢᱚᱱᱮᱨ ᱠᱚᱬ ᱾
ᱵᱷᱤᱛ ᱯᱤᱸᱰᱟᱹ ᱥᱤᱨᱟᱜᱼᱟᱭ
ᱵᱮᱸᱜᱮᱫ ᱩᱨᱤᱡ ᱟᱛᱮ ᱡᱮᱨᱮᱲᱟᱭ,
ᱵᱟᱦᱟ ᱰᱟᱹᱨ, ᱥᱟᱠᱟᱢ, ᱪᱮᱬᱮ, ᱵᱷᱤᱛ ᱨᱮ
ᱛᱤᱛᱮ ᱯᱚᱛᱟᱣ ᱠᱚᱣᱟᱭ ᱾
ᱯᱮ ᱫᱤᱱ ᱢᱟᱬᱟᱝ ᱦᱟᱺᱰᱤ ᱫᱟᱠᱟᱭ ᱤᱥᱤᱱ
ᱯᱟᱨᱟᱵᱽ ᱢᱟᱬᱟᱝ ᱠᱷᱚᱱᱼᱮ ᱥᱟᱯᱲᱟᱣᱜ,
ᱚᱠᱟ ᱯᱟᱨᱟᱵᱽ ᱯᱩᱱᱟᱹᱭ ᱚᱠᱟ ᱞᱟᱹᱠᱛᱤ
ᱡᱩᱜᱟᱹᱲ ᱠᱟᱜᱼᱟᱭ ᱪᱮᱫ ᱠᱚ ᱤᱱᱟᱹ ᱦᱤᱞᱚᱜᱟᱜ ᱥᱟᱯᱟᱵ ᱾
ᱡᱚᱛᱚ ᱠᱷᱚᱱ ᱢᱟᱬᱟᱝ ᱵᱮᱨᱮᱫ ᱟᱛᱮ
ᱜᱩᱨᱤᱡᱟᱭ ᱞᱩᱸᱰᱟᱹᱭᱟᱭ ᱜᱚᱴᱟ ᱚᱲᱟᱜ ᱩᱱᱤ,
ᱡᱚᱛᱚᱱᱟᱭ ᱩᱠᱷᱩᱲ ᱰᱷᱤᱝᱠᱤ ᱦᱟᱴᱟᱜ ᱰᱟᱹᱞᱤᱡ
ᱴᱩᱝᱠᱤ ᱠᱷᱟᱹᱧᱪᱤ ᱫᱟᱹᱣᱲᱟᱹ ᱰᱷᱟᱹᱯᱱᱤ ᱾
ᱡᱟᱦᱟᱸᱭ ᱠᱚ ᱦᱤᱡᱩᱜ ᱫᱩᱲᱩᱵᱼᱮ ᱢᱮᱛᱟ ᱠᱚ
ᱥᱚᱸᱜᱮ ᱛᱮᱜᱮ ᱩᱫᱩᱜᱟᱭ ᱵᱮᱵᱷᱟᱨ,
ᱞᱚᱴᱟ ᱫᱟᱜ ᱟᱛᱮ ᱚᱰᱚᱠ ᱠᱟᱛᱮ
ᱯᱮᱲᱟ ᱠᱚ ᱧᱮᱞᱛᱮ ᱩᱸᱜᱩᱫ ᱟᱛᱮ ᱡᱚᱦᱟᱨ ᱾
ᱰᱟᱺᱜᱽᱨᱤ ᱢᱮᱨᱚᱢ ᱠᱟᱰᱟ ᱵᱷᱤᱰᱤ ᱥᱤᱢ ᱥᱩᱠᱨᱤ
ᱪᱟᱨᱟ ᱡᱚᱜᱡᱚᱢ ᱟᱡ ᱥᱟᱢᱟᱝ ᱛᱮᱠᱚ ᱦᱤᱡᱩᱜ,
ᱰᱟᱠᱟᱰᱟᱜ ᱨᱮ ᱫᱟᱠᱟ ᱵᱟᱦᱱᱤ ᱨᱮ ᱪᱷᱟᱹᱱᱤ,
ᱨᱟᱪᱟ ᱨᱮ ᱪᱟᱨᱟ ᱮᱨ ᱚᱴᱚ ᱠᱟᱛᱮ ᱵᱟᱹᱫ ᱛᱮ ᱫᱟᱠᱟᱭ ᱤᱫᱤ ᱾
ᱡᱚᱛᱚ ᱠᱚᱜᱮ ᱦᱟᱹᱴᱤᱧ ᱥᱟᱴᱟᱣ ᱠᱚᱣᱟᱭ
ᱯᱟᱛᱲᱟ ᱫᱟᱠᱟ, ᱡᱤᱞ ᱩᱛᱩ, ᱞᱮᱴᱚ ᱯᱤᱴᱷᱟᱹ,
ᱟᱡ ᱡᱚᱜᱼᱡᱚᱢ ᱵᱤᱫᱟᱹᱞ ᱛᱮᱫᱚ
ᱴᱩᱠᱩᱡ ᱪᱮᱞᱟᱝ ᱠᱷᱟᱭᱚᱜ ᱥᱤᱴᱷᱟᱹ ᱾
ᱥᱮᱛᱟᱜ ᱥᱤᱸᱜᱟᱹᱲ ᱞᱚᱞᱚ ᱪᱩᱞᱦᱟᱹ ᱠᱩᱰᱟᱹᱢ ᱨᱮ
ᱫᱩᱲᱩᱵ ᱟᱛᱮ ᱫᱟᱠᱟ ᱩᱛᱩᱭ ᱤᱥᱤᱱ,
ᱚᱠᱚᱭ ᱪᱚᱝ ᱮ ᱨᱟᱭᱵᱟᱨ ᱞᱮᱱ
ᱧᱟᱢ ᱞᱮᱫᱮᱭᱟᱠᱚ ᱱᱩᱱᱟᱹᱜ ᱱᱟᱯᱟᱭ ᱠᱤᱢᱤᱱ ᱾
ᱦᱤᱞᱤ ᱫᱟᱹᱭ ᱢᱟᱭ ᱯᱟᱸᱡᱟ ᱦᱟᱱᱟ
ᱡᱟᱱᱟᱢ ᱫᱤᱥᱚᱢ ᱡᱟᱱᱟᱢ ᱟᱭᱳᱣᱟᱜ ᱰᱟᱦᱟᱨ,
ᱧᱟᱛᱮᱭᱟ, ᱠᱤᱢᱤᱱ, ᱮᱢᱟᱱ ᱤᱠᱷᱟᱹᱱ
ᱵᱟᱠᱚ ᱯᱟᱸᱡᱟ ᱞᱮᱫᱮ ᱪᱟᱞᱟᱣ ᱮᱱᱟᱠᱚ ᱵᱟᱡᱟᱨ ᱾
@@@
