ᱟᱹᱛᱩ ᱨᱮᱱᱟᱜ ᱠᱩᱞᱦᱤ ᱢᱩᱪᱟᱹᱫ ᱨᱮ
ᱠᱩᱸᱵᱟᱹ ᱠᱟᱛᱮ ᱢᱮᱱᱟᱭᱟ ᱵᱩᱰᱷᱤ ᱟᱭᱳ ᱾
ᱦᱚᱲ ᱠᱚ ᱢᱮᱱᱟ ᱵᱟᱭ ᱵᱷᱟᱹᱜᱤᱭᱟ
ᱵᱟᱹᱲᱤᱡ ᱱᱚᱡᱚᱨ ᱢᱮᱱᱟᱜ ᱛᱟᱭᱟ ᱢᱮᱫ ᱨᱮ ᱾
ᱵᱮᱲᱟ ᱦᱟᱺᱥᱩᱨ ᱟᱹᱭᱩᱵ ᱛᱟᱨᱟ
ᱪᱤᱞᱤ ᱦᱚᱸ ᱵᱟᱠᱚ ᱥᱮᱱᱚᱜ ᱚᱱᱛᱮ ᱾
ᱵᱚᱛᱚᱨᱟᱭᱟ ᱠᱚ ᱪᱮᱫ ᱪᱚᱭ ᱵᱟᱰᱟᱭ
ᱯᱟᱞᱮᱱ ᱪᱮᱠᱟ ᱵᱚᱱᱟᱭ ᱾
ᱥᱤᱧ ᱨᱟᱴᱯᱟᱴ ᱴᱟᱹᱴᱤ ᱥᱤᱞᱯᱤᱧ
ᱴᱮᱥᱟ ᱴᱮᱜᱷᱟᱱ ᱠᱟᱛᱮ ᱾
ᱟᱴᱮᱫ ᱡᱚᱝ ᱟᱭ ᱫᱷᱟᱫᱽᱨᱟ ᱯᱟᱹᱴᱭᱟᱹ
ᱥᱤᱠᱤᱲ ᱼᱮ ᱫᱟᱱᱟᱝ ᱚᱲᱮᱡ ᱠᱷᱟᱱᱛᱟ ᱛᱮ ᱾
ᱧᱤᱫᱟᱹ ᱧᱩᱛ ᱮ ᱥᱟᱦᱟᱭ ᱞᱟᱹᱜᱤᱫ
ᱡᱩᱞᱟᱭ ᱰᱤᱵᱽᱨᱤ ᱥᱩᱞᱛᱟᱹ ᱵᱟᱹᱛᱤ ᱾
ᱦᱚᱲᱢᱚ ᱨᱮ ᱡᱤᱭᱤ ᱡᱤᱭᱤᱫ ᱡᱤᱵᱚᱱ
ᱵᱚᱨ ᱵᱚᱛᱚᱨ ᱦᱚᱸ ᱛᱟᱭ ᱛᱟᱦᱮᱸᱱ ᱾
ᱵᱷᱩᱜᱟᱹᱜ ᱴᱟᱹᱴᱤ ᱯᱷᱟᱫᱟ ᱠᱷᱚᱱᱟᱜ
ᱧᱮᱞᱚᱜ ᱢᱟᱨᱥᱟᱞ ᱡᱩᱞᱩᱫ ᱡᱩᱞᱩᱫ ᱾
ᱚᱠᱚᱭ ᱪᱚᱠᱚ ᱧᱮᱞ ᱞᱮᱫ ᱛᱤᱥ!
ᱠᱟᱛᱷᱟ ᱯᱟᱥᱱᱟᱣ ᱮᱱᱟ ᱚᱱᱟ ᱥᱮᱸᱜᱮᱞ ᱰᱟᱹᱱᱟᱜ ᱾
ᱥᱚᱨᱠᱟᱨ ᱜᱚᱲᱚ ᱪᱟᱣᱞᱮ ᱧᱟᱢᱟᱭ
ᱠᱟᱨᱟ ᱠᱩᱴᱟᱹ ᱦᱟᱞᱟᱝ ᱥᱟᱦᱟᱱ ᱾
ᱤᱥᱤᱱ ᱠᱟᱜ ᱟᱭ ᱢᱤᱫ ᱫᱤᱱ ᱨᱮᱜᱮ
ᱵᱟᱨ ᱯᱮ ᱫᱤᱱ ᱵᱟᱥᱠᱮ ᱫᱟᱠᱟ ᱡᱚᱢᱟᱭ ᱾
ᱛᱚᱨᱦᱮᱫ ᱠᱷᱟᱱᱛᱟ ᱥᱚᱣᱟ ᱢᱳᱫᱮ
ᱵᱚᱨᱚᱲ ᱛᱚᱨᱚᱡ ᱛᱮᱜᱮᱭ ᱛᱤᱠᱤ ᱾
ᱞᱟᱡᱟᱣ ᱫᱟᱯᱟᱞ ᱚᱲᱮᱡ ᱞᱩᱜᱽᱲᱤ
ᱧᱩᱛᱩᱢ ᱞᱮᱠᱟᱭ ᱵᱟᱸᱫᱮ ᱾
ᱛᱟᱦᱮᱸ ᱠᱟᱱ ᱛᱟᱭ ᱥᱚᱝᱥᱟᱨ
ᱛᱮᱭᱟᱨ ᱞᱮᱫᱟᱭ ᱜᱷᱟᱨᱚᱸᱡᱽ
ᱠᱤᱢᱤᱱ ᱡᱟᱞᱟ ᱥᱟᱥᱮᱛ ᱟᱹᱰᱤ
ᱚᱠᱚᱭ ᱴᱷᱮᱱ ᱫᱚᱭ ᱞᱟᱹᱞᱤᱥ ᱾
ᱛᱟᱞᱟ ᱚᱲᱟᱜ ᱠᱤᱢᱤᱱ ᱡᱟᱹᱨᱤ
ᱢᱟᱱᱟᱣ ᱵᱟᱛᱟᱣ ᱵᱟᱹᱱᱩᱜ ᱾
ᱠᱟᱛᱷᱟ ᱪᱮᱛᱟᱱ ᱠᱟᱛᱷᱟᱭ ᱯᱟᱹᱥᱤᱨ
ᱠᱤᱢᱤᱱ ᱥᱤᱸᱭᱟᱹ ᱡᱟᱹᱨᱤ ᱾
ᱵᱷᱮᱜᱟᱨ ᱛᱟᱦᱮᱸᱱ ᱨᱤᱠᱟᱹᱠᱮᱫᱟᱭ
ᱦᱚᱯᱚᱱ ᱢᱟᱭᱟ ᱪᱷᱟᱰᱟ ᱠᱟᱛᱮ ᱾
ᱚᱠᱚᱭ ᱟᱫᱚᱭ ᱫᱳᱥᱮ ᱱᱤᱛᱚᱜ?
ᱠᱚᱯᱟᱲ ᱞᱤᱠᱷᱚᱱ ᱱᱚᱝᱠᱟᱱ ᱜᱮᱛᱟᱭ ᱾
***
